Regional Marathi Text Bulletin, Aurangabad Date – 05 March 2022 Time 7.10 AM to 7.25 AM Language Marathi आकाशवाणी औरंगाबाद प्रादेशिक बातम्या दिनांक ०५ मार्च २०२२ सकाळी ७.१० मि. ****
कोविड पासून सुरक्षित राहण्यासाठी कृपया चार साध्या उपायांचं पालन करा. कोविड लसीकरण पूर्ण करा, मास्क वापरा, दोन मीटर अंतर राखा आणि हात तसंच चेहरा स्वच्छ ठेवा. कोविड संबंधी अधिक माहिती आणि मार्गदर्शनासाठी राष्ट्रीय हेल्पलाईन क्रमांक ०११ - २३ ९७ ८० ४६ आणि १ ० ७ ५ वर संपर्क करा.
****
· ओबीसी राजकीय आरक्षणावरून विधिमंडळात गदारोळ; कामकाज दिवसभरासाठी तहकूब
· सोमवारी विधिमंडळात ओबीसी आरक्षणासाठी विधेयक मांडणार -उपमुख्यमंत्री ���जित पवार
· एसटी महामंडळासंदर्भातला अहवाल विधानसभेत सादर; विलीनीकरण अशक्य
· शेतकऱ्यांच्या विविध मागण्यांसाठी भाजप किसान मोर्चाचा काल विधानभवनावर मोर्चा
· राज्यात कोविड संसर्ग झालेले नवे ५२५ तर मराठवाड्यात नवे २७ रुग्ण
· नांदेड जिल्ह्यात घरगुती गॅस पुरवठ्यासाठी बाराशे कोटी रुपयांच्या वायूवाहिनी प्रकल्पाला मान्यता
· उस्मानाबाद जिल्ह्यातल्या नवप्रभा महिला प्रभाग संघाला “आत्मनिर्भर संघटन” पुरस्कार
· ऑस्ट्रेलियाचे फिरकी गोलंदाज शेन वॉर्न यांचं निधन
आणि
· श्रीलंकेविरुद्धच्या कसोटी क्रिकेट सामन्यात भारताच्या पहिल्या दिवशी सहा बाद ३५७ धावा
****
सर्वोच्च न्यायालयानं ओबीसी राजकीय आरक्षणासंदर्भातला मागासवर्गीय आयोगाचा अहवाल फेटाळल्याचे पडसाद काल विधिमंडळात उमटले. या मुद्द्यावरुन प्रचंड गदारोळ झाल्यानं दोन्ही सभागृहांचं कामकाज दिवसभरासाठी तहकूब करावं लागलं.
इतर मागासवर्ग - ओबीसी आरक्षणाशिवाय स्थानिक स्वराज्य संस्थांच्या निवडणुका होणार नाही, यावर सरकार ठाम असल्याचं, छगन भुजबळ यांनी काल विधानसभेत सांगितलं. सभागृहाचं कामकाज सुरु होताच विरोधी पक्षनेते देवेंद्र फडणवीस यांनी, ओबीसी आरक्षणाचा मुद्दा उपस्थित केला. या मुद्यावर सर्व पक्षांनी एकत्र येऊन मार्ग काढण्याचं आवाहन भुजबळ यांनी केलं
दरम्यान, नवाब मलिक यांचा राजीनामा, मराठा तसंच ओबीसी आरक्षण या आणि इतर मुद्यावरुन, विरोधी पक्षांनी काल विधानसभेत जोरदार घोषणाबाजी केली. या गदारोळातच उपाध्यक्ष नरहरी झिरवळ यांनी, राज्यपालांच्या अभिभाषणावर चर्चा सुरु केली. मात्र विरोधकांचा गोंधळ वाढत गेल्यानं विधानसभेचं कामकाज सोमवारपर्यंत स्थगित करण्यात आलं.
ओबीसी आरक्षणासाठी मध्यप्रदेश सरकारच्या धर्तीवर येत्या सोमवारी विधिमंडळात विधेयक मांडणार असल्याची माहिती, उपमुख्यमंत्री अजित पवार यांनी दिली. विधान परिषदेत विरोधी पक्षनेते प्रवीण दरेकर यांनी नियम २८९ अन्वये हा विषय उपस्थित केला होता. या विधेयकाला एकमताने पाठिंबा देण्याचं आवाहन पवार यांनी केलं.
दरम्यान, विरोधकांनी हौद्यात उतरून फलक झळकावत घोषणाबाजी केली. या गदारोळातच सभापतींनी प्रश्नोत्तराचा तास घेण्याचा प्रयत्न केला. मात्र गोंधळ कायम राहिल्यानं त्यांनी सभागृहाचं कामकाज आधी २० मिनिटांसाठी, आणि नंतर सोमवारपर्यंत तहकूब केलं.
****
ओबीसी आरक्षण मिळवून द्यायचं असेल तर महाविकास आघाडीला तात्काळ निधी उपलब्ध करून मन्युष्यबळ उभं करावं लागेल, असं भाजपाचे प्रदेश सरचिटणीस आमदार चंद्रशेखर बावनकुळे यांनी म्हटलं आहे. पुढील १५ दिवसात हे काम पूर्ण करायचं असेल तर तत्काळ पावलं उचलण्याची गरज बावनकुळे यांनी व्यक्त केली.
****
राज्य मार्ग परिवहन - एसटी महामंडळाचं राज्य सरकारमध्ये विलीनीकरण करण्यासंदर्भातला अहवाल परिवहन मंत्री अनिल परब यांनी काल विधानसभेत सादर केला. त्यानंतर पत्रकारांशी बोलताना परब यांनी, एसटीचे राज्य सरकारमध्ये विलिनीकरण करणे शक्य नसल्याची शिफारस त्रिसदस्यीय समितीनं केली असल्याची माहिती दिली. संपकाळात कर्मचाऱ्यांवर केलेली निलंबनाची कारवाई किंवा बडतर्फीची नोटीस मागे घेण्यात येईल, त्यामुळे सर्व संपकरी कामगारांनी १० तारखेपर्यंत कामावर रुजू व्हावं, असं आवाहन परब यांनी कर्मचाऱ्यांना केलं. तसंच जे कर्मचारी सेवेतून बडतर्फ झाले आहेत, त्यांनी विनंती अर्ज करावा, ज्यांचा विनंतीअर्ज करण्याचा कालावधी संपलेला असेल अशा कामगांराना १५ दिवसांची मुदतवाढ देउन देण्यात येईल, असंही परब यांनी यावेळी स्पष्ट केलं.
****
विधीमंडळाच्या सुरू असलेल्या अर्थसंकल्पीय अधिवेशनात विधान सभेच्या अध्यक्षपदाची निवडणूक घेण्यासाठी तारीख निश्चित करण्याची मागणी राज्य सरकारने राज्यपाल भगतसिंह कोश्यारी यांच्याकडे केली आहे. उपमुख्यमंत्री अजित पवार यांच्या नेतृत्वात राज्य मंत्रिमंडळातले सन्माननीय सदस्य अशोक चव्हाण, सुभाष देसाई, एकनाथ शिंदे, नाना पटोले, जयंत पाटील, छगन भुजबळ, अनिल परब, आणि सतेज पाटील यांच्या शिष्टमंडळानं राजभवनात राज्यपालांची भेट घेऊन, याबाबतचं निवेदन सादर केलं.
****
सांगली जिल्ह्यातील दिघंची हे गाव ओबीसींचा इम्पिरिकल डाटा संकलीत करणारं देशातलं पहिलं गाव ठरलं आहे. ओबीसी समाजातील लोकांनी स्वतःच 'इम्पिरिकल डाटा' संकलित केला आहे. यासाठी शैक्षणिक, आर्थिक, सामाजिक, जातनिहाय आणि सर्व माहिती घरोघरी जाऊन संकलित केली आहे.
****
शेतकऱ्यांच्या विविध मागण्यांसाठी भाजप किसान मोर्चानं काल विधानभवनावर मोर्चा काढला. शेतकऱ्यांची वीज देयकं माफ करावीत, उसाचा रास्त आणि किफायतशीर दर- एफआरपी एकरकमी द्यावा, नियमित कर्जफेड करणाऱ्या शेतकऱ्यांना ५० हजार रुपये प्रोत्साहनपर अनुदान द्यावं, आदी मागण्या विधिमंडळात सरकारला मान्य करण्यास भाग पाडू, असा निर्धार माजी मुख्यमंत्री देवेंद्र फडणवीस यांनी यावेळी व्यक्त केला. भाजपा प्रदेशाध्यक्ष चंद्रकांत पाटील, विधानसभेचे माजी अध्यक्ष हरिभाऊ बागडे, यांच्यासह अनेक मान्यवर या मोर्चात सहभागी झाले.
****
मलिक यांच्या राजीनाम्यासाठी भाजप नेत्यांनी विधीमंडळ परिसरात स्वाक्षरी मोहीम राबवली. विधीमंडळाच्या पायऱ्यांवर बसून भाजप आमदारांनी सरकारविरोधात घोषणाबाजी केली.
****
बारावीच्या परीक्षेला कालपासून सुरुवात झाली. विज्ञान, कला, वाणिज्य, किमान कौशल्यावर आधारित अभ्यासक्रम आणि तांत्रिक विज्ञान, या शाखांचे १४ लाख ८५ हजार ८२६ विद्यार्थी परीक्षेला बसले होते. सर्व परीक्षा स्थळांवर कोरोना प्रतिबंधीत उपाययोजना करण्यात आल्या आहेत. दरम्यान, शालेय शिक्षण मंत्री वर्षा गायकवाड यांनी सर्व विद्यार्थ्यांना परीक्षेसाठी शुभेच्छा देत सर्व पालक आणि शिक्षकांचे आभार मानले.
****
राज्यात काल कोविड संसर्ग झालेले नवे ५२५ रुग्ण आढळले. त्यामुळे राज्यभरातल्या कोविड बाधितांची एकूण संख्या ७८ लाख ६७ हजार ९१६ झाली आहे. काल नऊ रुग्णांचा उपचारादरम्यान मृत्यू झाला. राज्यात आतापर्यंत एक लाख ४३ हजार ७२७ जणांचा मृत्यू झाला असून, मृत्यूदर एक पूर्णांक ८२ शतांश टक्के आहे. काल ९९२ रुग्ण बरे झाले, राज्यात आतापर्यंत ७७ लाख १५ हजार ७११ रुग्ण कोरोना विषाणू संसर्गातून मुक्त झाले असून, कोविड मुक्तीचा दर ९८ पूर्णांक ०७ शतांश टक्के झाला आहे.
****
मराठवाड्यात काल २७ कोरोना विषाणू बाधित रुग्ण आढळले. औरंगाबाद जिल्ह्यात १४, बीड आणि लातूर जिल्ह्यात प्रत्येकी चार, नांदेड तीन, तर उस्मानाबाद जिल्ह्यात दोन रुग्णाची नोंद झाली. परभणी, हिंगोली तसंच जालना जिल्ह्यात काल एकही नवा रुग्ण आढळला नाही.
****
कृषीपंपाला सुरळीत वीजपुरवठा मिळावा यासाठी, स्वाभिमानी शेतकरी संघटनेचे नेते राजू शेट्टी यांनी कोल्हापूर इथं सुरू केलेल्या आंदोलनाच्या समर्थनात काल राज्यात अनेक ठिकाणी शेतकऱ्यांनी आंदोलन केलं. हिंगोली, परभणी, तसंच जालना जिल्ह्यात रास्तारोको आंदोलन करण्यात आलं.
****
औरंगाबाद जिल्ह्याच्या खुलताबाद तालुक्यातल्या धांड नदीचं पाणी गिरजा मध्यम प्रकल्पात वळवावं, यासाठी बाजार सावंगी ते गिरजा मध्यम प्रकल्पादरम्यान अडीच क���लोमीटर लांबीचा कॅनॉल करण्यासंदर्भात शासनाने त्वरीत योग्य ती कार्यवाही करावी अशी मागणी मराठवाडा पदवीधर मतदारसंघाचे आमदार सतीश चव्हाण यांनी केली आहे. चव्हाण यांनी काल विधान परिषदेत यासंदर्भात तारांकित प्रश्न उपस्थित केला. या मध्यम प्रकल्पाचं बांधकाम १९८७ मध्ये पूर्ण झालं, मात्र गेल्या ३३ वर्षात हा प्रकल्प फक्त तीन वेळाच पूर्ण क्षमतेने भरला, याकडे चव्हाण यांनी सदनाचं लक्ष वेधलं.
****
नांदेड जिल्ह्यात घरगुती वापराचा गॅस पुरवण्यासाठी नैसर्गिक वायूवाहिनीच्या एक हजार दोनशे कोटी रुपयांच्या प्रकल्पाला मान्यता देण्यात आली आहे. खासदार प्रतापराव पाटील चिखलीकर यांनी काल पत्रकार परिषदेत ही माहिती दिली. या प्रकल्पाद्वारे आठ लाख घरांना घरगुती वापराचा गॅस पुरवला जाणार आहे. जिल्ह्यात १७० सीएनजी पंप उभारणीचाही या प्रकल्पात समावेश आहे.
****
उस्मानाबाद जिल्ह्याच्या लोहारा तालुक्यातल्या जेवळी इथल्या नवप्रभा महिला प्रभाग संघाला राष्ट्रीय ग्रामीण आजीविका अभियान अंतर्गत “आत्मनिर्भर संघटन” हा राष्ट्रीय पुरस्कार जाहीर झाला आहे. याबद्दल जिल्हा परिषदेच्या अध्यक्ष अस्मिता कांबळे यांनी नवप्रभा महिला प्रभागसंघाच्या कार्यकारी समिती सदस्यांचं पुष्पगुच्छ देऊन अभिनंदन केलं
****
ऑस्ट्रेलियाचे फिरकी गोलंदाज शेन वॉर्न यांचं काल थायलंडमध्ये निधन झालं, ते ५२ वर्षांचा होते. हृदयविकाराच्या तीव्र झटक्याने त्यांचं निधन झाल्याची माहिती समोर आली आहे. वॉर्न यांनी १९९२ मध्ये भारताविरुद्ध सिडनी इथं कसोटी क्रिकेट सामन्यातून आंतरराष्ट्रीय क्रिकेटमध्ये पदार्पण केलं होतं. तर जानेवारी २००७ मध्ये त्यांनी सिडनीमध्ये इंग्लंडविरुद्ध शेवटचा कसोटी सामना खेळला होता. वॉर्न यांनी आपल्या कारकिर्दीत १४५ कसोटीत ७०८ तर १९४ एकदिवसीय सामन्यांमध्ये २९३ बळी घेतले आहेत. वॉर्न यांच्या निधनामुळे क्रिकेट विश्वातून हळहळ व्यक्त होत आहे.
****
भारत आणि श्रीलंका दरम्यान दोन कसोटी क्रिकेट सामन्यांच्या मालिकेतला पहिला सामना कालपासून मोहाली इथं सुरु झाला. भारतानं नाणेफेक जिंकून प्रथम फलंदाजीचा निर्णय घेतला. काल खेळ थांबला तेव्हा भारताच्या पहिल्या डावात सहा बाद ३५७ धावा झाल्या होत्या. रविंद्र जडेजा ४५ तर रविचंद्रन अश्विन १० धावांवर खेळत आहेत.
विराट कोहलीने काल आपल्या शंभराव्या कसोटी सामना तसंच १६९ व्या डावात आठ हजार धावा पूर्ण केल्या. कसोटी क्रिकेटमध्ये आठ हजार धावा पूर्ण करणारा विराट हा भारताचा सहावा खेळाडू आहे.
****
महिलांच्या विश्वचषक क्रिकेट स्पर्धेला कालपासून न्यूझीलंडमध्ये सुरुवात झाली. या स्पर्धेतला भारताचा पहिला सामना उद्या रविवारी पाकिस्तानबरोबर होणार आहे.
****
स्त्री सक्षमीकरणाचा प्रयत्न समाजाने जागरूकतेने सोडवायला हवा, असं मत सामाजिक कार्यकर्त्या अनुजा डोईफोडे यांनी व्यक्त केलं आहे. नांदेड जिल्हा परिषदेच्यावतीनं जागतिक महिला दिनाचं औचित्य साधून सात दिवस ‘उत्सव स्त्री जाणिवांचा’ या उपक्रमात विविध कार्यक्रमांचं आयोजन करण्यात येत आहे. या कार्यक्रमात काल डोईफोडे यांची मुलाखत घेण्यात आली त्यावेळी त्या बोलत होत्या. या कार्यक्रमांतर्गत जिल्हा परिषद कर्मचारी, शिक्षिका, अंगणवाडी सेविका, ग्रामसेविका, लिपिक, लेखक कवयित्री, कलाकार यांच्या आविष्कारांचं सादरीकरण करण्यात आलं. या उपक्रमातून निर्माण होणारी कलाकार, कवयित्री, लेखिका ही सक्षमपणे आयुष्याला सामोरे जाईल, असा विश्वास जिल्हा परिषदेच्या मुख्य कार्यकारी अधिकारी वर्षा ठाकूर यांनी यावेळी व्यक्त केला.
****
जागतिक महिला दिनाच्या औचित्यानं औरंगाबाद असोसिएशन फॉर वुमन इन स्पोर्ट्स तर्फे 'औरंगाबाद ची वेगवान महिला' ही स्पर्धा आयोजित करण्यात आली आहे. सात गटांमध्ये होणारी ६० मीटर धावण्याची ही स्पर्धा सर्व महिलांसाठी खुली आहे. उद्या रविवारी सहा मार्चला सकाळी साडेसात वाजता गरवारे क्रीडा संकुलासमोरच्या युनिव्हर्सल हायस्कुल मध्ये ही स्पर्धा होईल.
****
0 notes