#óhollt að borða | Explore Tumblr posts and blogs

fyndnarmyndir · 4 years ago

Photo

ég er í megrun beint ofan skot pizza

0 notes

nannaarnad · 6 years ago

Text

Allt eða ekkert?

Ert þú allt eða ekkert týpa þegar kemur að heilbrigðum lífsstíl? Ertu ein af þeim sem ætlar alltaf að byrja í átaki á mánudegi, kaupir inn bara grænt og vænt og skrifar niður allt sem þú borðar gramm fyrir gramm? Hættir öllu sem heitir óhollt og ætlar helst að fasta og vera á ketó á sama tíma og þú byrjar að mæta 5x í viku í ræktina?

Hefurðu prófað þetta allt en endar alltaf á því að geta þetta ekki til lengdar og ferð því alltaf í sama farið aftur? Heillast svo af næstu töfralausn sem allir eru að tala um og verður að prófa?

Ég ætla að segja þér svolítið sem þú hefur pottþétt heyrt áður en ekki viljað hlusta á, eða ekki nennt eða getað farið eftir. Lífið er ekki allt eða ekkert. Lífið er ekki þannig að þú getir mætt alla daga í ræktina og tekið alltaf jafn vel á því. Lífið er ekki þannig að þú getir alla daga sleppt því að borða í 16-18 tíma á dag og neitað þér um öll gómsætu kolvetnin. Það eru veislur, það eru veikindi, það kemur tímabil þar sem maður þarf bara á meiri mat að halda og það kemur annað tímabil þar sem líkaminn einfaldlega kallar á kolvetni.

Ef þú ert sú týpa sem líður vel af því að fasta og hefur ekkert fyrir því en getur á sama tíma fengið þér morgunmat þann morguninn sem þú finnur fyrir því að líkaminn þarf á því að halda án þess að þurfa að gera það alla hina dagana líka þá er það bara frábært. Ef þér finnst gott að sleppa kolvetnum en getur fengið þér kökusneið í afmæli ef þig langar til þess, haldið svo áfram með kolvetnislausa lífstílinn þa er það flott. Staðreyndin er sú að fæstir hugsa svona þegar kemur að kúrum. Takið eftir því að ég tala um lífsstíl þegar dæmið gengur upp, kúr þegar þetta er bara enn ein hugdettan um hvernig þú getur grennst sem mest á sem stystum tíma. Ef þig langar að prófa föstur, ketó, grænmetiskúrinn, hreinsunarkúrinn eða hvað þetta allt heitir hugsaðu þá skrefinu lengra. Geturðu virkilega lifað á þessum kúr það sem eftir er? Þú þarft að lifa lífinu þínu þannig að það sé lífsstíll og flest viljum við gera það heilsusamlega svo við aukum möguleikana okkar á góðu og löngu lífi.

Ef þú ert á 0 punkti og langar að breyta til, byrja að hreyfa þig og borða hollan mat þá legg ég eftirfarandi til:

- Byrjaðu á því að hreyfa þig 2-3 x í viku og hafðu hreyfinguna við hæfi miðað við núverandi líkamlegt ástand. Ef þú hefur ekkert hreyft þig í nokkur ár þá er kannski ekki skynsamlegt að byrja á hörku æfingum. Göngutúr, smá jogg, jóga eða léttar æfingar með eigin líkamsþyngd er kannski eitthvað sem þú ættir að byrja á. - Ekki breyta mataræðinu á sama tíma og þú byrjar að hreyfa þig. Það tekur á líkamann að byrja í líkamsrækt og það tekur á líkamann að breyta mataræðinu. - Vertu meðvituð/aður fyrstu vikuna um það sem þú ert að setja ofan í þig og hugsaðu aðeins af hverju þú tekur þær ákvarðanir sem þú tekur dagsdaglega varðandi næringu. - Eftir fyrstu vikuna geturðu byrjað á því að setja þér eina venju sem tengist því sem þér fannst neikvætt varðandi mataræðið þitt og snúið því upp í eitthvað jákvætt. Þetta geturðu svo gert eftir því sem vikunum fjölgar og verður alltaf auðveldara og meðvitaðara þegar tíminn líður og líkamlegt ástand batnar. - Skrifaðu niður í dagbók hvernig þér líður á æfingum. Skrifaðu líka niður á kvöldin hvernig þér líður eftir daginn og sjáðu hvort þú takir ekki eftir einhverjum jákvæðum breytingum eins og t.d. hvort þú sofir betur, vaknir hressari, blóðsykurinn falli síður um eftirmiðdaginn o.s.frv. Ég get lofað þér því að það er alltaf eitthvað sem kemur á óvart og maður bjóst ekki við.

Haltu svo áfram að reyna þitt besta á hverjum degi og reyndu að umkringja þig fólki sem er með sama hugsunarhátt og þú. Það líður engum vel í kringum fólk sem dæmir allt sem maður gerir og setur út á þig. Það skilur enginn þig nema þú.

Mundu svo að ef þig langar í smá mola með kaffinu, kökusneið í afmælinu eða langar einfaldlega til þess að panta þér eina pizzu á Megaviku að þá er það bara allt í góðu. Næsta dag eða í næsta matmálstíma heldurðu bara áfram með sama góða lífsstílinn, velur hollan og næringarríkan mat sem hentar þér og þér líður vel af, og þú gerir það því þú veist að það hentar þér. Lykillinn að árangri eru góðar venjur, consistency is key! Langhlaup en ekki spretthlaup!