#गुजरात टायटन्स | Explore Tumblr posts and blogs

airnews-arngbad · 7 months ago

Text

Regional Marathi Text Bulletin, Chhatrapati Sambhajinagar

Date: 21 April 2024

Time: 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक: २१ एप्रिल २०२४ दुपारी १.०० वा.

****

जैन धर्मियांचे चोविसावे तिर्थंकर वर्धमान भगवान महावीर यांची जयंती आज देशभरात विविध उपक्रमांनी साजरी होत आहे. राष्ट्रपती द्रौपदी मुर्मू, उपराष्ट्रपती जगदीप धनखड तसंच पंतप्रधान नरेंद्र मोदी यांनी देशवासियांना महावीर जयंतीच्या शुभेच्छा दिल्या आहेत. पंतप्रधानांच्या हस्ते आज नवी दिल्लीमध्ये दोन हजार पाचशे पंन्नासाव्या भगवान महावीर निर्वाण महोत्सवाचं उद्घाटन करण्यात आलं आणि टपाल तिकीटासह नाण्याचं अनावरण करण्यात आलं. जागतिक स्तरावर सध्याच्या युध्द्जन्य परिस्थितीत भारताच्या तिर्थंकरांची शिकवण अधिकच महत्वपूर्ण असल्याचं पंतप्रधानांनी या��ेळी सांगितलं. विश्वशांतीसाठी जग भारताकडे अपेक्षेनं बघत आहे तसंच महावीर यांच्याविषयी युवा पीढीचं समर्पण बघता देश योग्य दिशेनं मार्गस्थ असल्याचा विश्वास वाटतो, असंही मोदी यावेळी म्हणाले.

****

महावीर जयंती निमित्तानं छत्रपती संभाजीनगर इथं आज जन्मकल्याणक महोत्सव आयोजित करण्यात आला आहे. सकाळी शहराच्या मध्यवर्ती भागातून भव्य मिरवणूक काढण्यात आली.

****

विद्यापीठ अनुदान आयोग-यु.जी.सी.च्या राष्ट्रीय पात्रता परीक्षा - नेटच्या नोंदणीला सुरुवात झाली आहे. संस्थेच्या संकेतस्थळावर येत्या दहा मे पर्यंत ही नोंदणी आणि बारा मे पर्यंत शुल्क जमा करता येईल, असं युजीसीनं म्हटलं आहे. येत्या १६ जुन रोजी ही परीक्षा होणार असून संशोधन गौरववृत्ती, सहाय्यक प्राध्यापक नियुक्तीसह विविध विषयांत विद्यावाचस्पती -पी.एच.डीसाठी ही परीक्षा उत्तीर्ण होणं गरजेचं आहे.

****

लोकसभा निवडणुकीच्या अनुषंगानं कॉंग्रेस पक्षाच्या केंद्रीय निवडणूक समितीची महत्वपुर्ण बैठक नवी दिल्ली इथं सुरू आहे. पक्षाचे अध्यक्ष मल्लिकार्जुन खरगे,कॉंग्रेस संसदीय मंडळाच्या अध्यक्ष सोनिया गांधी यांसह अन्य वरीष्ठ नेते बैठकीला उपस्थित आहेत.

****

केंद्रीय निवडणूक आयोगानं जारी केलेल्या, १८००-२२१-९५० या मतदार सहाय्यता खुल्या दूरध्वनी क्रमांकावर १८ एप्रिलपर्यंत ७ हजार ३१२ लोकांनी संपर्क केल्याची आणि त्यांना आवश्यक ती माहिती आणि मदत देण्यात आली आहे. उपमुख्य निवडणूक अधिकारी शरद दळवी यांनी दिलेल्या माहितीनुसार राज्यात यापैकी सर्वाधिक, म्हणजे १ हजार ५७५ दूरध्वनीची नोंद मुंबई उपनगरातून झाली आहे. या माध्यमातून मतदारांना हवी ती माहिती देण्यासाठी २४ तास मनुष्यबळ नियुक्त करण्यात आलं असल्याचं त्यांनी सांगितलं.

****

नांदेड, हिंगोली लोकसभा निवडणूक मतदान प्रक्रियेची युद्धपातळीवर तयारी सुरू असल्याची माहिती जिल्हाधिकारी अभिजीत राऊत यांनी दिली आहे. या मतदार संघामध्ये येत्या २६ तारखेला मतदान होत आहे. नांदेड लोकसभा मतदारसंघासाठी २ हजार ६२ मतदान केंद्रावर मतदान होणार आहे. नांदेड लोकसभा मतदारसंघात २३ उमेदवार निवडणुकीच्या रिंगणात आहेत. लोकसभा निवडणुकीतील मतदानासाठी कर्मचाऱ्यांचं दोन फेऱ्यांमध्ये प्रशिक्षण घेण्यात आलं. मतदान केंद्रावर कर्मचाऱ्यांना पोहोचवण्यासाठी राज्य परिवहन महामंडळाच्या १०८ बस उपलब्ध करून देण्यात आल्या असल्याचंही जिल्हाधिकारी राऊत यांनी सांगितलं.

****

��ुंतवणूकदारांची पाचशे कोटी रुपयांची फसवणूक केल्याप्रकरणी सक्तवसुली संचालनालयानं काल मुंबईत शोधमोहीम राबवली. ऑक्टा एफएक्स ट्रेडिंग अॅप आणि वेबसाइटवरून बेकायदा ऑनलाइन ट्रेडिंगप्रकरणी ही कारवाई करण्यात आली. विविध कागदपत्रं, डिजीटल उपकरणं यात जप्त करण्यात आली. या कारवाईत सुमारे पावणे तीन कोटी रुपये असलेली बँकखाती गोठवण्यात आली असून यामध्ये क्रिप्टोकरंसी तसंच सोन्याच्या नाण्यांसह ३५ कोटी रुपयांची संपत्ती जप्त करण्यात आल्याचं संचालनालयानं म्हटलं आहे.

****

आयपीएल क्रिकेट स्पर्धेत आज दोन सामने रंगणार असून यातला पहिला सामना कोलकाता नाइट रायडर्स आणि रॉयल चैलेंजर्स बंगळूरू यांच्यात कोलकाताच्या ईडन गार्डन मैदानावर दुपारी साडेतीन वाजता सुरु होईल. तर, दुसरा सामना पंजाब किंग्स आंणि गुजरात टायटन्स दरम्यान चंदीगडच्या महाराजा यादविंद्र सिंग मैदानावर संध्याकाळी साडेसात वाजता खेळला जणार आहे.

****

महाराष्ट्रातील अंगणवाडी कर्मचाऱ्यांचे मार्च महिन्याचं थकीत मानधन देण्याची मागणी कर्मचारी सभेतर्फे करण्यात आलं आहे. या मागणीचं निवेदन मुख्यमंत्र्यांसह महिला बालकल्याण मंत्र्यांकडे करण्यात आल्याचं अंगणवाडी कर्मचारी सभेच्या अध्यक्षा विधिज्ञ निशा शिवूरकर यांनी एका निवेदनाद्वारे नमुद केलं आहे.

****

कोकण, मध्य महाराष्ट्र, मराठवाडा आणि विदर्भात आज तुरळक ठिकाणी पाऊस पडण्याची, तसंच वीजा आणि सोसाट्याचे वारे वाहण्याची शक्यता हवामान विभागानं वर्तवली आहे.

****

0 notes

airnews-arngbad · 7 months ago

Text

Regional Marathi Text Bulletin, Chhatrapati Sambhajinagar

Date: 07 April 2024

Time 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ०७ एप्रिल २०२४ दुपारी १.०० वा.

****

निवडणूक आयोगानं लोकसभा निवडणूकीच्या अनुषंगानं उमेदवारांच्या प्रचारासंबंधी परवानगीचं निवेदन स्विकारण्यासाठी सुविधा उमेदवार संकेतस्थळ उपलब्ध केलं आहे. या संकेतस्थळाच्या माध्यनमातून प्रचार कालावधीचं महत्व लक्षात घेत रॅली आयोजित करणं, तात्पुरतं पक्ष कार्यालय उघडणं, घरो-घरी जाऊन प्रचार, हेलीकॉप्टर, वाहन वापर परवाना आणि प्रचार सामग्री वितरण करण्याची परवानगी देण्यात येते. हे संकेतस्थळ म्हणजे स्वतंत्र, नि :ष्पक्ष आणि पारदर्शक निवडणूक प्रक्रीयेसाठी लोकतांत्रिक सिद्धांतांनुसार सर्व पक्ष-उमेदवारांना समान सुविधा उपलब्ध करुन देत आहे.

लोकसभा निवडणूकिची अधिसूचना जारी झाल्यापासून फक्त वीस दिवसांतच यातून आयोगाकडे ७३ हजारांहून अधिक अर्ज प्राप्त झाले. ज्यामधून ४४ हजारांहून अधिक अर्ज मंजूर करण्यात आले तर दहा हजार अर्ज रद्दबातल करण्यात आले तर काही अर्ज प्रक्रीयाधीन आहेत.

****

आज जागतिक आरोग्य दिन साजरा होत आहे. स्वत:च्या आरोग्याविषयी जागरुक राहण्यासाठी या दिनाचं आयोजन करण्यात येतं. 'माझं स्वास्थ्य-माझा अधिकार' अशी यावर्षीची संकल्पना जागतिक आरोग्य संघटना म्हणजेच डब्ल्यु.एच.ओ.तर्फे मांडण्यात आली आहे. अजुनही जगातील साडेचार अब्ज म्हणजेच एकूण लोकसंख्येपैकी अर्ध्याहून जास्त लोक आरोग्य विषयक सुविधा आणि देखभालीपासून दूर असल्यानं त्यांच्यापर्यंत पोहोचण्याची गरज याद्वारे अधोरेखीत करण्यात आली आहे.

सध्या, जीवन शैलीशी निगडीत आजार विशेषत: युवा पिढीत झपाट्यानं व��ढतांना दिसत आहेत. त्यामुळे जीवन शैलीत योग्य बदल आणि योगासारख्या आरोग्यदायी पद्धतींचा अवलंब करुन आजारांना दूर करता येईल असं नवी दिल्लीच्या एम्स -अखिल भारतीय आयुर्विज्ञान संस्थेतील प्रोफेसर डॉक्टर रीमा दादा यांनी आकाशवाणीशी बोलतांना नमूद केलं.

****

पंतप्रधान नरेंद्र मोदी यांची चंद्रपुर शहरात उद्या सायंकाळी चार वाजता निवडणूक जाहीर सभा आयोजित केली आहे. लोकसभा निवडणूकीची घोषणा झाल्यानंतर पंतप्रधान मोदी यांची ही महाराष्ट्रातील पहिलीच जाहीर प्रचार सभा असणार आहे.

****

वंचित बहुजन आघाडी पक्षातर्फे बीड लोकसभा निवडणुकीसाठी अशोक हिंगे पाटील यांना उमेदवारी जाहीर करण्यात आली आहे. त्याशिवाय नागपूरच्या रामटेक लोकसभा मतदार संघातील अपक्ष उमेदवार-माजी सनदी अधिकारी किशोर गजभिये यांना जाहीर पाठींबा देण्यात येत आहे. याबाबत पक्षाच्या प्रदेशाध्यक्ष रेखा ठाकुर यांनी प्रसिद्धीपत्रकाद्वारे माहिती जाहीर केली.

****

नांदेड शहरात आज सकाळी जिल्हा पोलीस दलातर्फे सद्भावना रॅली काढण्यात आली. सध्याच्या विविध सण-उत्सवाच्या अनुषंगानं याचं आयोजन करण्यात आलं. यात जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी मीनल करणवाल, महापालिका आयुक्त डॉक्टर महेशकुमार डोईफोडे, पोलीस अधीक्षक श्रीकृष्ण कोकाटे यांसह शहरातील ठाणे अधिकारी, विविध धर्मांचे धर्मगुरू, एकात्मतेचं दर्शन घडवणारी वेशभूषा केलेल्या शालेय विद्यार्थ्यांचीही यात मोठ्या संख्येन उपस्थिती होती.

****

पुणे जिल्ह्याच्या मावळ लोकसभा मतदार संघातील पनवेलच्या ग्रामिण आणि शहरी भागात आज मतदान जनजागृती कार्यक्रम राबवण्यात आला. विद्यार्थ्यांच्या सायकल रॅलीद्वारे मतदान जनजागृती करण्यात आली. शहरातील एका शाळेत आयोजित तृतीय पंथीयांची बैठक, तसंच नविन पनवेलच्या एका प्रभागात पथनाट्याद्वारे मतदारांना मतदानाचं महत्व पटवून देण्यात आल्याचं आमच्या वार्ताहरानं कळवल�� आहे.

दरम्यान, कोल्हापूर इंथ मतदार जनजागृतीसाठी जिल्हा निवडणूक अधिकारी कार्यालयातर्फे 'रन फॉर व्होट' या लोकशाही दौडच आज सकाळी आयोजन केलं होतं. या दौडमध्ये सहा हजाराहुन अधिक नागरिकांनी सहभाग नोंदवला.

****

मणिपुरमध्ये सुरक्षा दलांनी संयुक्‍तपणे राबविलेल्या तपासणी अभियानात मोठ्या प्रमाणात शस्त्रसाठा सापडला असल्याची माहिती मणिपुर पोलिसांनी दिली. मणिपुर पोलिसांसह सुरक्षा दलांनी राज्यातील डोंगराळ आणि घाटमाथ्यावरील जिल्ह्यांमधील संवेदनशील भागात हे अभियान राबविण्यात आले. या अभियानात रायफल, पिस्तुल, ��ॅड ग्रेनेड, बॉम्ब, डेटोनेटर, बुलेट प्रूफ जॅकेट, वॉकी टॉकीसह इतर साहित्य जप्त केले आहे. ही शस्त्रास्त्रे जप्त केल्यानंतरही सुरक्षा दलांचं अभियान सुरूच राहणार आहे.

****

आईपीएल क्रिकेट स्पर्धेत आज दोन सामने होणार आहेत. पहिला सामना मुंबईच्या वानखेडे मैदानावर मुंबई इंडीयन्स आणि दिल्ली कॅपिटल्स यांच्यात दुपारी साडेतीन वाजता होईल. तर अन्य दुसरा सामना लखनऊच्या एकाना स्पोर्ट सिटी मैदानावार लखनऊ सुपर जायंटस आणि गुजरात टायटन्स यांच्यात संध्याकाळी साडेसात खेळला जाईल.

स्पर्धेची सध्याची गुणतालिका बघता, खेळलेले चारही सामने जिंकून राजस्थान रॉयल्स संघ आठ गुणांसह अव्वल स्थानी आहे. तर,खेळलेले तीनही सामने गमावल्यानं मुंबई इंडीयन्स संघ सर्वात खालच्या स्थानावर आहे. ३१६ धावा फटकावणारा रॉयल चॅलेन्जर्स बेंगरुळूचा फलंदाज विराट कोहली ऑरेंज कॅपसाठी अग्रेसर आहे. तर,आठ बळी टीपणारा राजस्थान रॉयल्सचा फिरकीपटू युजवेंद्र चहल पर्पल कॅपसाठी अग्रेसर आहे. नेट रनरेटचा विचार करता कोलकाता नाईट रायडर्स प्रभावी असल्याचं दिसत असून पंजाब किंग्ज यात सर्वात पिछाडीवर आहेत.

****

कझाकस्‍तानच्‍या अस्‍ताना इथं आयोजित आंतरराष्ट्रीय बॅडमिंटन स्‍पर्धेत भारताच्या अनुपमा उपाध्याय आणि एम. तरुण यांनी महिला आणि पुरुष एकेरीचं अजिंक्यपद पटकावलं आहे.

****

0 notes

airnews-arngbad · 7 months ago

Text

Regional Marathi Text Bulletin, Chatrapati Sambhajinagar

Date: 04 April 2024

Time 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ०४ एप्रिल २०२४ दुपारी १.०० वा.

****

अमरावतीच्या खासदार नवनीत राणा यांचं जात प्रमाणपत्र वैध असल्याचा निकाल आज सर्वोच्च न्यायालयानं दिला. सर्वोच्च न्यायालयाच्या या निकालानं नवनीत राणा यांचा खासदारकीसाठी उमेदवारी अर्ज भरण्याचा मार्ग मोकळा झाला आहे. नवनीत राणा या अमरावतीमध्ये भाजपच्या उमेदवार आहेत. थोड्याच वेळात त्या आपला उमेदवारी अर्ज दाखल करतील. याआधी उच्च न्यायालयानं नवनीत राणा यांचं जात प्रमाणपत्र अवैध असल्याचा निकाल दिला होता. त्याविरोधात राणा यांना सर्वोच्च न्यायालयात धाव घेतली होती.

****

गेल्या काही दिवसांपासून पक्षात होत असलेल्या निर्णयांशी सहमत नसल्याने काँग्रेसच्या प्राथमिक सदस्यत्वासह सर्व पदांचा राजीनामा देत असल्याचं सांगत काँग्रेसचे प्रवक्ता गौरव वल्लभ यांनी आज काँग्रेसला सोडचिठ्ठी दिली. पक्षाचे अध्यक्ष मल्लिकार्जून खरगे यांना पत्र लिहून त्यांनी आपल्या मनातील खदखद व्यक्त केली. पक्षाच्या चुकीच्या आर्थिक धोरणांचे समर्थन करू शकत नाही. तळागळाशी असलेला पक्षाचा संबंध पूर्णपणे तुटलेला आहे. या विषयावर मला खूप काही बोलायचे आहे. परंतु, इतरांना दुखावण्याचा मानस नसल्यामुळे आपण गप्प आहोत. तरी सत्य लपवणे अयोग्य असल्यामुळे पत्राद्वारे आपली कैफियत मांडत असल्याचं सांगत त्यांनी आपण पक्ष सोडण्याचा निर्णय घेत असल्याचं त्यांनी म्हटलं आहे.

****

राष्ट्रपती द्रौपदी मुर्मू आज मुंबईत आय आय टी बॉम्बे इथे कर्करोगावरील सी ए आर टी सेल उपचार पद्धतीचं लोकार्पण करत आहेत. कर्करोगावरील इलाजासाठी उपयुक्त असणारी ही उपचार पद्धती बॉम्बे इन्क्युबेटेड कंपनीद्वारे विकसित करण्यात आली असून या उपचारपद्घतीला आय आय टी बॉम्बे आणि टाटा मेमोरियल सेंटरच्या एकत्रित प्रयत्नाच्या स्वरुपात विकसित करण्यात आलं आहे.

****

भारतीय जनता पक्षाचे ज्येष्ठ नेते पंतप्रधान नरेंद्र मोदी आज लोकसभा निवडणुकीतील भाजपच्या प्रचाराला बिहारमधून सुरुवात करणार आहेत. पंतप्रधान मोदी यांची बिहारमधल्या जमुई जिल्ह्याच्या बल्‍लोपूरमध्ये जाहीर सभा ��ोणार आहे. राष्ट्रीय लोकशाही आघाडी एनडीएच्या जागावाटपाच्या घोषणेनंतर बिहारमधली पंतप्रधानांची ही पहिली जाहीर सभा आहे. यावेळी एनडीएच्या बिहारमधील घटक पक्षांचे नेतेही उपस्थित राहणार आहेत. बिहारच्या जमुईसह बिहारच्या औरंगाबाद, गया आणि नवादा लोकसभा क्षेत्रात, पहिल्या टप्प्यात येत्या १९ तारखेला मतदान होणार आहे.

****

औषधांच्या किमतींमध्ये उल्लेखनीय वाढ झाली असल्याच्या वृत्तांचं केंद्रीय आरोग्य मंत्रालयानं खंडन केलं आहे. हे वृत्त चुकीचं आणि निराधार असल्याचं मंत्रालयानं म्हटलं आहे. औषधांच्या किमती वाढल्या असल्याबाबतच्या अहवालांमध्ये ५०० हून अधिक औषधांच्या किमती वाढल्याचं म्हटलं आहे. मात्र, असे अहवाल आणि असे वृत्त पूर्णपणे खोटे, भ्रामक आणि हेतुपुरस्सर असल्याचं आरोग्य मंत्रालयानं नमूद केलं आहे. ७८२ औषधांसाठी सद्यस्थितीत कमाल दरांमध्ये कोणताही बदल करण्यात आला नसून ५४ औषधींच्या किमतीत केवळ एक पैसा इतकी वाढ करण्यात आली असल्याचं मंत्रालयानं स्पष्ट केलं आहे.

****

येत्या ४ दिवसात देशाच्या पूर्व भागात उष्णतेची लाट येण्याचा अंदाज हवामान विभागानं व्यक्त केला आहे. उत्तरी कर्नाटक, ओडिशा, पश्चिम बंगाल, झारखंड, तेलंगणा तसंच आंध्रप्रदेशमध्ये समुद्र तटांवर या कालावधीत उष्णतेच्या लाटेचा प्रभाव राहण्याची शक्यता आहे. येत्या ३ दिवसात, पूर्वेकडच्या अनेक भागातल्या तापमानात २ ते ३ डिग्री सेल्सियसची वाढ होण्याची शक्यता आहे. या उष्णतेच्या लाटेचा परिणाम देश��च्या अन्य भागातही जाणवू शकेल.

दुसरीकडे, देशाच्या पूर्वोत्तर भागात रविवारपर्यंत काही ठिकाणी वादळ तसंच पावसाची शक्यताही हवामान विभागानं वर्तवली आहे.

***

आयपीएल क्रिकेट स्पर्धेत आज अहमदाबादच्या नरेंद्र मोदी स्टेडियममध्ये गुजरात टायटन्स आणि पंजाब किंग्ज यांच्यात सायंकाळी साडेसात वाजता सामना होणार आहे. काल या स्पर्धेत कोलकाता नाइट राइडर्सने दिल्‍ली कैपिटल्‍सचा १०६ धावांनी पराभव केला. कोलकाता नाईट रायटर्र्सने निर्धारित २० षटकांत ७ बाद २७२ अशी धावसंख्या उभारत विक्रमी कामगिरी केली. या लक्ष्याचा पाठलाग करताना दिल्ली कॅपिटल्सचा संघ १७ षटकात १६६ धावांवर सर्वबाद झाला.

****

0 notes

airnews-arngbad · 8 months ago

Text

Regional Marathi Text Bulletin, Chhatrapati Sambhajinagar

Date: 24 March 2024

Time: 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक: २४ मार्च २०२४ दुपारी १.०० वा.

****

आज होळी अर्थात हुताशनी फाल्गुन पौर्णिमा - शिमगा हा सण साजरा होत आहे.आज संध्याकाळी घरोघरी तसंच सार्वजनिक ठिकाणी होलिका दहन केलं जणार आहे.वाईट गोष्टींचा नाश करुन चांगल्याचा विजयी प्रकाश यानिमित्तानं सर्वत्र पोहचवणं असा या सणाचा उद्देश आहे. यानंतर उद्या रंगांची उधळण असणारा,वसंत ऋतुचं जल्लोषपूर्ण स्वागत करणारा सण अर्थात धुलिवंदनाचा उत्सव उद्या देशभरात साजरा होणार आहे.

****

राज्यपाल रमेश बैस यांनी होळी तसंच धुलीवंदनानिमित्त जनतेला हार्दिक शुभेच्छा दिल्या आहेत. परस्पर प्रेम, स्नेह आणि बंधुभावाचं प्रतिक असलेला रंगांचा हा सण सर्वांच्या जीवनात आनंदाचे रंग भरो, देशबांधवांमध्ये असलेली बंधुत्वाची भावना अधिक बळकट करो, ही प्रार्थना, असंही राज्यपालांनी आपल्या संदेशात म्हटलं आहे.

****

मुस्लिम बांधवांचा पवित्र रमजान महिनाही सध्या सुरु आहे.या एकंदर संणाच्या पार्श्वभूमीवर आणि त्यालगत आलेल्या सुट्ट्यांया अनुषंगानं सर्वच ठिकाणी विविध खरेदीसाठी बाजार फुलला असल्याचं ��ित्र पहायला मिळत आहे.

****

प्रभु येशूशी संबंधित आणि ख्रिस्ती बांधवांच्या पवित्र अशा आठवड्याला आज पाम संडे या दिवसानं प्रारंभ होत आहे. ईस्टर संडेच्या एक आठवड्यापूर्वी आणि गुड फ्रायडे आधीचा हा महत्वाचा दिवस आहे. या सप्ताहादरम्यान अंजिराचा सोमवार तसंच मौदी गुरुवार याप्रमाणे दिवस साजरे करण्यात येतात.आज ठिकठिकाणच्या चर्चमधून विशेष प्रार्थना घेण्यात आली.वाशिम इथं सकाळी नऊ वाजता ख्रिस्ती समाजाच्या नागरीकांनी नारळाच्या झावळ्या घेत चर्चमधून सुरुवात करत शांतता फेरी काढल्याचं आमच्या वार्ताहरानं कळवलं आहे.

****

भारतीय नौदलानं राबवलेलं विशेष समुद्री अभियान `ऑपरेशन संकल्पनं` काल शंभर दिवस पूर्ण केले. याअंतर्गत संकटकाळी सहाय्य आणि समुद्री क्षेत्रात महत्वपूर्ण सुरक्षा भागिदाराची भूमिका नौदलानं बजावली आहे. यादरम्यान,विविध १८ घटनांमध्ये अदनची खाडी आणि त्या नजिकचं क्षेत्र, अरबी समुद्र आणि सोमालियाच्या पूर्वेकडील क्षेत्रात समुद्री सुरक्षा अभियान चालवलं आणि नौदलानं समस्या आणि संकटाशी सामना करत समुद्री लुटेरे,सागरी सुरक्षा आणि भारताचं हित यासाठी कारवाई केली. नौदलानं हिंद महासागरात सूचनेच्या आदान-प्रदानातही या अंतर्गत सक्षम कार्य केलं.

****

लेबनानमध्ये सुरु असलेल्या विश्व टेबल टेनिस फीडर बैरूत विजेतेपद स्पर्धेत विविध गटात यश मिळवत भारतीय खेळाडूंनी आगेकुच केली असून काही प्रकारातील अंतिम फेरीत भारतीय खेळाडू समोरासमोर असणार आहेत.आज हे सामने खेळले जाणार आहेत. संमिश्र गटाच्या अंतिम फेरीत साथियान ज्ञानशेखरन आणि मनिका बत्रा या जोडीचा सामना आकाश पाल आणि पॉयमंती बैश्य या जोडीसोबत होईल. यासह, पुरुष दुहेरीच्या अंतिम फेरीत मानुष शाह आणि मानव ठक्कर या जोड़ीचा सामना मुदित दानी आणि आकाश पाल या जोडीशी होईल. तर, महिला दुहेरीत भारताच्या श्रीजा अकूला आणि दिया चितळे या जोडीचा सामना हाँगकांगच्या दू होइ केम आणि झू चेंगझू या जोडीसोबत होणार आहे. महिला एकेरीच्या उपांत्यपूर्व सामन्यात भारताच्या श्रीजा अकूलाचा सामना दक्षिण कोरियाच्या सुह ह्यो वॉन सोबत होईल. तर, पुरुष एकेरीच्या उपांत्यपूर्व सामन्यात जी सत्यनचा सामना कजाकिस्तानच्या किरिल गैरासीमेंको याच्याशी होणार आहे.

****

इंडियन मास्टर्स नॅशनल बैडमिंटन विजेतेपद स्पर्धेत, महाराष्ट��राची खेळाडू नाहीद दिवेचा हिनं दोन सुवर्ण पदकांची कमाई केली आहे. हरीयाणाच्या पंचकुला इथं झालेल्या या स्पर्धेत महिला एकेरीच्या अंतिम लढतीत हरियाणाच्या सुनीता सिंह पंवारला हरवून नाहीद विजेती ठरली. यासोबतच, मिश्र दुहेरीच्या प्रकारात नाहीद दिवेचा आणि किरण मोकाडे या जोडीनं कर्नाटकच्या प्रबागरान सुब्बैयन आणि जयश्री रघू या जोडीला पराभूत करत मिश्र दुहेरीच्या किताबावर शिक्कामोर्तब केलं.

****

काँग्रेस पक्षानं लोकसभा निवडणुकीसाठी काल आपल्या उमेदवारांची दुसरी यादी जाहीर केली असून त्यात गडचिरोली-चिमूर लोकसभा क्षेत्रातून महाविकास आघाडीचे उमेदवार म्हणून डॉ.नामदेव किरसान यांच्या नावाची घोषणा करण्यात आली आहे. उत्पादन शुल्क विभागात अधीक्षक आणि त्यानंतर उपायुक्त म्हणून १८ वर्षे नोकरी केल्यानंतर २००८ मध्ये स्वेच्छानिवृत्त झालेले किरसान तेंव्हापासून काँग्रेस पक��षात सक्रिय असल्याचं आमच्या वार्ताहरानं म्हटलं आहे.

****

आयपीएल टी ट्वेंटी क्रिकेट स्पर्धेत आज राजस्थान रॉयल्स आणि लखनऊ सुपर जायंटस दरम्यानचा सामना जयपूर इथं दुपारी साडे तीन वाजता सुरू होईल. मुंबई इंडीयन्स आणि गुजरात टायटन्स दरम्यान अहमदाबाद इथं आजचा दुसरा सामना संध्याकाळी साडे सातवाजता होणार आहे. दरम्यान काल झालेल्या सामन्यांत पंजाब किंग्जने दिल्ली कॅपिटल्सचा सहा गडी राखून पराभव केला. तर कोलकाता नाईट रायडर्सने सनरायझर्स हैदराबाद संघावर चार धावांनी विजय मिळवला.

****

0 notes

airnews-arngbad · 8 months ago

Text

आकाशवाणी छत्रपती संभाजीनगर

संक्षिप्त बातमीपत्र

२४ मार्च २०२४ सकाळी ११.०० वाजता

****

आज असणारी होळी पौर्णिमा तसंच उद्याचं धुलिवंदन यासह सध्या सुरु असलेला पवित्र रमजानचा महिना आणि त्यासोबत आलेल्या सुट्या यामुळं सर्व ठिकाणच्या बाजारपेठांमध्ये उत्साहाचं वातावरण दिसून येत आहे. आजच्या हुताशनी पौर्णिमेच्या पार्श्वभूमीवर घरोघरी पारंपारीकरित्या होलीका दहन केलं जाणार असून जागोजागी नागरीकांच्या सहभागातून सार्वजनिक होळीचं आयोजनही करण्यात आलेलं आहे.

****

यंदा होळी पौर्णिमेच्या दिवशी चंद्रग्रहण आलं आहे. हे चंद्रग्रहण भारतात दिसणार नाही, असं खगोलशास्त्रज्ञांनी म्हटलं आहे.

****

राज्याच्या कोकण आणि मध्य महाराष्ट्रात आज आणि उद्या ढगाळ वातावरण राहील अशी माहिती हवामान विभागानं दिली आहे.

****

उन्हाच्या झळां सर्वानाच जाणवू लागल्या असून उन्हाळ्यात वन्यजीवांची पाण्यासाठी भटकंती न व्हावी या साठी वाशिम जिल्ह्यातील वनोजा इथं प्रादेशिक जंगलामध्ये लोकसहभागातून कृत्रिम पाणवठे तयार करण्यात आले आहेत. वनविभागाकडून ह्या पाणवठयांमध्ये टँकरद्वारे पाणी टाकण्यात येत असल्यामुळं शेकडो वन्यजीवांची तहान भागविण्यासाठी मदत होत आहे.

****

बीड जिल्ह्यात आदर्श आचारसंहितेचा भंग होणार नाही तसंच पिण्याच्या पाण्याची कमतरता भासणार नाही याची दक्षता घ्यावी, असे निर्देश जिल्ह्याधिकारी दीपा मुधोळ -मुंडे यांनी दिले आहेत. त्या काल परळी इथं या संदर्भात घेतलेल्या एका आढावा बैठकीत बोलत होत्या.

****

परभणी जिल्ह्यातल्या जिंतूर शहरात काल पोलिसांनी दहा लाख ५८ हजार रुपयांचा प्रतिबंधित गुटखा जप्त केला. रात्रगस्ती पथकानं एका संशयास्पद चारचाकी वाहनाची तपासणी केली असता हा प्रकार उघडकीस आला असून आरोपी चालक वाहन सोडून पसार झाला असल्याची ��ाहिती पोलिसांनी दिली.

****

लेबनानमध्ये विश्व टेबल टेनिस फीडर बैरूत स्पर्धेत संमिश्र गटाच्या आज होणा-या अंतिम लढतीत दोन भारतीय जोड्या समोरासमोर असणार आहेत. यात साथियान ज्ञानशेखरन आणि मनिका बत्रा यांचा सामना आकाश पाल आणि पॉयमंती बैस्य सोबत दुपारी चार वाजून चाळीस मिनिटांनी खेळवला जाणार आहे.

****

0 notes

airnews-arngbad · 1 year ago

Text

Regional Marathi Text Bulletin, Aurangabad

Date : 27 May 2023

Time : 7.10 AM to 7.25 AM

Language Marathi

आकाशवाणी औरंगाबाद

प्रादेशिक बातम्या

दिनांक : २७ मे २०२३ सकाळी ७.१० मि.

****

ठळक बातम्या

येत्या सहा महिन्यात मुंबईपर्यंतचा संपूर्ण समृद्धी महामार्ग सुरू होईल- मुख्यमंत्री एकनाथ शिंदे

नव्या संसद भवनाचं उद्घाटन र��ष्ट्रपतींच्या हस्ते करण्याची मागणी करणारी याचिका सर्वोच्च न्यायालयानं फेटाळली

पुण्यश्लोक अहिल्याबाई होळकर यांच्या स्मरणार्थ राज्यातल्या ५० गावांमध्ये सुसज्ज सामाजिक सभागृह बांधण्यास मान्यता

एकाच छताखाली अनेक योजनांचा लाभ मिळत असल्यानं, ‘शासन आपल्या दारी’ उपक्रम राबवण्याचा निर्णय क्रांतिकारी ठरल्याची मुख्यमंत्र्यांची भावना

राज्यात शिवचरित्राशी संबंधित स्थळांना जोडणारं, 'छत्रपती शिवाजी महाराज सर्किट' विकसित करण्याची राज्यपाल रमेश बैस यांची सूचना

केंद्रीय सांस्कृतिक मंत्रालयाच्या वतीनं आज वेरुळ इथं, “किल्ले, कथा आणि लेणी” महोत्सवाचं आयोजन

परंडा कृषी उत्पन्न बाजार समितीच्या सभापती आणि उपसभापतींची बिनविरोध निवड

आणि

आयपीएल क्रिकेट स्पर्धेचा अंतिम सामना उद्या गुजरात टायटन्स आणि चेन्नई सुपर किंग्ज यांच्यात होणार, मुंबई इंडियन्सचा ६२ धावांनी पराभव

सविस्तर बातम्या

येत्या सहा महिन्यात मुंबईपर्यंतचा संपूर्ण समृद्धी महामार्ग सुरू होईल, असा विश्वास मुख्यमंत्री एकनाथ शिंदे यांनी व्यक्त केला आहे. नागपूर ते मुंबई पर्यंतच्या समृद्धी मार्गाच्या दुसऱ्या टप्प्याचं उद्घाटन, काल मुख्यमंत्री शिंदे आणि उपमुख्यमंत्री देवेंद्र फडणवीस यांच्या हस्ते शिर्डीत झालं, त्यावेळी ते बोलत होते. शिर्डी ते भरवीर असा ऐंशी किलोमीटर अंतराचा हा दुसरा टप्पा आहे. समृद्धी मार्ग गडचिरोली पर्यंत नेणार असल्याचं मुख्यमंत्र्यांनी यावेळी आपल्या भाषणात सांगितलं. ते म्हणाले…

Byte…

आपल्या सगळ्यांसाठी महत्वाकांक्षी असा प्रकल्प पहिला टप्पा देशाच्या आदरणीय प्रधानमंत्री नरेंद्र मोदी साहेबांच्या शुभ हस्ते डिसेंबर मध्ये नागपूर ते शिर्डी झाला. आणि लगेच आपण पुढचा टप्पा ८० किलोमीटरचा आज त्याचं लोकार्पण करतोय. आपल्या सरकारचा मार्ग जसा मोकळा केला, तसाच आपण समृद्धीचा देखील हा मार्ग मोकळा केला, आणि शेवटचा १०० किलोमीटरचा टप्पा या डिसेंबर महिन्यापर्यंत पूर्ण होईल म्हणजे होईल.

यावेळी बोलतांना उपमुख्यमंत्री देवेंद्र फडणवीस यांनी, अलीकडेच महामार्गावर झालेल्या अनेक अपघाताच्या पार्श्वभूमीवर, अपघात टाळण्यासाठी वाहन चालकांनी वेगावर नियंत्रण ठेवण्याचं आवाहन केलं. या महामार्गावर लवकरच सुगम वाहतूक व्यवस्थापन प्रणाली बसवण्यात येईल असं ते म्हणाले. महामार्गाचं महत्त्व विशद करताना ते म्हणाले....

Byte…

हा समृद्धी महामार्ग का आहे, हा एक ईकॉनॉमिक कॉरीडोर आहे. राज्याच्या १५ जिल्ह्यांचं भाग��य हा बदलणार आहे. आणि शेवटी जगाच्या पाठीवर त्याच देशांमध्ये प्रचंड आपल्याला विकास झालेला दिसतो, ज्याठिकाणी पोर्ट लेड डेव्हलपमेंट म्हणजे, पोर्टच्या आधारावर विकास झाला, त्या पोर्ट लेड डेव्हपमेंटचा आतापर्यंत उपयोग हा केवळ मुंबई, एमएमआर रिजन, आणि पुण्याला होत होता, त्याच्या पलिकडे तो होत नव्हता, आता पार गोंदिया पर्यंत पोर्ट लेड डेव्हलपमेंटचा उपयोग होणार आहे, आणि म्हणून महाराष्ट्राला रिडीफाईन करणार हा महामार्ग आहे.

****

पंतप्रधान नरेंद्र मोदी यांच्या नेतृत्वातल्या भारतीय जनता पक्षाच्या केंद्रातल्या सरकारला काल नऊ वर्ष पूर्ण झाली. या निमित्तानं भाजप, येत्या ३० तारखेपासून जनसंपर्क अभियान सुरू करणार आहे. या अभियानातून सरकारची कामं जनतेपर्यंत पोहोचवण्याचा प्रयत्न केला जाणार आहे.

दरम्यान, सरकारला नऊ वर्ष पूर्ण झाल्याच्या निमित्तानं आज केंद्रीय गृह आणि सहकार मंत्री अमित शाह हे ‘नौ साल सेवा सुशासन, गरीब कल्याण’, या विषयावरच्या एका राष्ट्रीय परिसंवादाचं उद्घाटन करणार आहेत. यावेळी माहिती आणि प्रसारण मंत्री अनुराग ठाकूर यांच्यासह याच खात्याचे राज्यमंत्री डॉ. एल. मुरुगनही उपस्थित राहणार आहेत.

या कार्यक्रमात तीन सत्रं होणार असून, त्यात इंडिया सर्जिंग अहेड, जन जन का विश्वास आणि युवा शक्ती गॅल्व्हानायझिंग इंडिया या तीन विषयावर चर्चासत्रं होणार आहेत. या परिसंवादात विविध मान्यवर वक्ते मार्गदर्शन करणार आहेत.

****

दिल्लीतल्या नव्या संसद भवनाचं उद्घाटन राष्ट्रपतींच्या हस्ते करण्याची मागणी करणारी याचिका सर्वोच्च न्यायालयानं काल फेटाळली. ही याचिका सुनावणी घेण्यायोग्य नाही, असं न्यायालयानं म्हटलं आहे. त्यानंतर याचिकाकर्त्यांच्या वकिलानं ही याचिका मागे घेतली.

दरम्यान, नवीन संसद भवनाचं उद्या पंतप्रधान नरेंद्र मोदी यांच्या हस्ते होत असून, यावेळी ७५ रुपयांचं नवं नाणं जारी करण्यात येणार आहे.

****

पुण्यश्लोक अहिल्याबाई होळकर यांच्या स्मरणार्थ राज्यातल्या ५० गावांमध्ये सुसज्ज सामाजिक सभागृह बांधण्यास मान्यता देण्यात आली असल्याची माहिती, ग्रामविकास तसंच पंचायत राज मंत्री गिरीश महाजन यांनी दिली. ते काल मुंबईत यासंदर्भातल्या बैठकीत बोलत होते. या माध्यमातून जालना, नांदेडसह जळगाव, अहमदनगर, कोल्हापूर, नंदुरबार, पुणे, यवतमाळ, रत्नागिरी, सातारा, सिंधुदुर्ग, चंद्रपूर, अमरावती, नागपूर आदी जिल्ह्यांतल्या गावांची निवड करण्यात आली असून, लवकरच बांधकाम करण्याबाबत आदेश जारी करण्यात येतील असं महाजन यांनी सांगितलं.

****

‘शासन आपल्या दारी’ या उपक्रमामुळे लाभार्थ्यांना एकाच छताखाली अनेक योजनांचा लाभ मिळत असल्यानं हा उपक्रम राबवण्याचा निर्णय क्रांतिकारी ठरत असल्याचं, मुख्यमंत्री एकनाथ शिंदे यांनी म्हटलं आहे. औरंगाबाद जिल्ह्यातल्या कन्नड इथं काल शासन आपल्या दारी या उपक्रमाचा शुभारंभ केल्यानंतर ते बोलत होते. केंद्रीय अर्थ राज्यमंत्री डॉ भागवत कराड, पालकमंत्री संदीपान भुमर��, सहकार मंत्री अतुल सावे, कृषी मंत्री अब्दुल सत्तार, आमदार हरिभाऊ बागडे, जिल्हाधिकारी आस्तिक कुमार पाण्डेय, यावेळी उपस्थित होते.

जनतेची कामं लवकरात लवकर होण्यासाठी हे सरकार सदैव प्रयत्नशील राहील, असं आश्वासन देताना मुख्यमंत्री म्हणाले,

Byte…

आजपर्यंत जनतेला शासनाच्या दारी जावं लागत होतं, पण मी आणि उपमुख्यमंत्री देवेंद्र फडणवीस साहेबांनी ठरवलं, की का आपण लोकांपर्यंत जाऊ शकत नाही. आणि मग या यंत्रणेचा वापर या सर्वसामान्य लोकांना झाला पाहीजे. आपलं सरकार आल्यानंतर २८ प्रलंबित सिंचनाच्या योजनांना आपण सुप्रमा दिला. सहा लाख हेक्टर जमिन या निर्णयामुळे ओलीताखीली येणार आहे.

या कार्यक्रमात मुख्यमंत्र्यांच्या हस्ते शेतकऱ्यांना ट्रॅक्टर आणि शेतीची इतर अवजारे वितरीत करण्यात आली. पीक काढणीसाठी वापरण्यात आलेल्या हार्वेस्टरची त्यांनी माहिती घेतली. शेतकऱ्यांनी शेती आणि संबंधित उद्योगांमध्ये यंत्रसामुग्रीचा वापर करून उत्पन्न वृद्धीसाठी प्रयत्न करण्याचं आवाहन मुख्यमंत्र्यांनी यावेळी केलं.

****

लातूर जिल्ह्यात उदगीर इथंही शासन आपल्या दारी या उपक्रमाचं उद्घाटन आमदार संजय बनसोडे यांच्या हस्ते काल झालं. या उपक्रमामुळे शासकीय योजनांचा लाभ एकाच छताखाली थेट मिळत आहे. त्यामुळे उदगीर आणि जळकोट तालुक्यातल्या अधिकाधिक नागरिकांनी या उपक्रमात सहभाग घेऊन विविध योजनांची माहिती करून घ्यावी, असं आवाहन बनसोडे यांनी यावेळी केलं.

****

छत्रपती शिवाजी महाराजांच्या राज्याभिषेक सोहळ्याला साडेतीनशेवर्ष पूर्ण होत असल्यानिमित्त, राज्यात शिवचरित्राशी संबंधित स्थळांना जोडणारं, 'छत्रपती शिवाजी महाराज स��्किट' विकसित करावं, अशी सूचना राज्यपाल रमेश बैस यांनी केली आहे. साडेतीनशेव्या शिवराज्याभिषेक दिन सोहळ्यानिमित्त मुंबईहून रायगड इथं सहस्त्र जलकलश घेऊन जाणाऱ्या रथयात्रेला राज्यपालांनी काल हिरवा झेंडा दाखवून रवाना केलं, त्यावेळी ते बोलत होते. राज्यातल्या गडकिल्ल्यांच्या संवर्धनासाठी अभियान सुरु करावं, असं आवाहन त्यांनी यावेळी केलं.

****

केंद्रीय सांस्कृतिक मंत्रालयाच्या वतीनं आज औरंगाबाद जिल्ह्यात वेरुळ इथं, “किल्ले, कथा आणि लेणी” महोत्सवाचं आयोजन करण्यात आलं आहे. याअंतर्गत साहित्य, संस्कृती, कला, पुरातत्व आणि इतिहास यांचा समन्वय साधला जाणार आहे. आज सकाळी सात ते दहा या वेळेत हेरिटेज वॉक, छायाचित्र प्रदर्शन आणि चित्रकला शिबिर घेण्यात येईल. तर संध्याकाळी साडेपाच ते आठ या वेळेत, सांस्कृतिक कार्यक्रमात शाहीर यशवंत जाधव आणि समुहाचं “पोवाडा गायन”, प्रश्नमंजुषा कार्यक्रम, आणि वेरुळ लेणींच्या वास्तुकला आणि कलाकुसर यावर आधारित, सुप्रसिद्ध नृत्यांगना पार्वती दत्ता आणि त्यांच्या महागामी नृत्य समूहाचा “नृत्यांकन”- हा कार्यक्रम होणार आहे.

****

परभणी जिल्ह्यात वीज जोडणी प्रक्रिया युद्धपातळीवर राबवण्याचे आदेश पालकमंत्री डॉ. तानाजी सावंत यांनी दिले आहेत. जिल्हा नियोजन समितीच्या बैठकीत काल ते बोलत होते. शेतीसाठी रोहित्र तात्काळ उपलब्ध करून द्यावेत, तसंच जळालेली रोहित्रं तात्काळ बदलण्याच्या सूचनाही, त्यांनी यावेळी दिल्या. जिल्ह्यातल्या पर्यटन स्थळांच्या विकासासाठीचे प्रस्ताव सादर करण्यात यावे, तसंच शेतकऱ्यांना खरीप हंगामामध्ये बोगस बि-बियाणं, खते, किटकनाशकांची विक्री करताना आढळून आल्यास, कृषि केंद्र संचालकांवर गुन्हे दाखल करण्याचे निर्देशही सावंत यांनी प्रशासनाला दिले आहेत.

दरम्यान, राष्ट्रीय आरोग्य अभियानांतर्गंत बांधण्यात आलेल्या स्त्री रुग्णालयाचं लोकार्पण सावंत यांच्या हस्ते काल झालं. यावेळी केंद्रीय आरोग्य राज्यमंत्री डॉ. भारती पवार दूरदृष्य संवाद प्रणालीद्वारे सहभागी झाल्या होत्या. यावेळी बोलतांना सावंत यांनी, राज्यातली आरोग्य यंत्रणा बळकट करण्यासाठी रुग्णालयांना आकस्मिक भेटी देऊन सद्यस्थिती जाणून घेतल्याचं सांगितलं.

****

उस्मानाबाद जिल्ह्यातल्या परंडा कृषी उत्पन्न बाजार समितीच्या सभापतीपदी, महाविकास आघाडीचे जयकुमार जैन यांची, तर उपसभापती म्हणून, संजय पवार यांची बिनविरोध निवड झाली आहे. या दोन्ही पदांसाठी एक- एकच अर्ज आल्यामुळे सहाय्यक निबंधक सहकारी संस्थेचे प्राधिकृत अधिकारी कुमार बारकुल यांनी त्यांच्या बिनविरोध निवडीची घोषणा केली.

****

औरंगाबादमध्ये आजपासून ३१ मे पर्यंत आंबा महोत्सव आयोजित करण्यात आला आहे. छत्रपती शिवाजी महाराज कृषी उत्पन्न बाजार समिती आणि महाराष्ट्र कृषी पणन मंडळाच्या वतीनं हा महोत्सव होत असल्याचं, सभापती राधाकिशन पठाडे यांनी सांगितलं. पालकमंत्री संदीपान भुमरे यांच्या हस्ते या आंबा महोत्सवाचं उद्धाटन होईल, अधिक माहिती देताना पठाडे म्हणाले...

Byte…

हा आंबा महोत्सव २७/०५ ते ३१/०५ असं, त्यात पुढे काही वाढवायचं ठरलं शेतकऱ्यांच्या आणि ग्राहकांच्या नुसार आपण एक दोन दिवस पुढेही वाढवू शकतो. आणि कोकणामधून येणारे, देवगड, रत्नागिरी, चिपळूण या भागातून सर्व शेतकरी याठिकाणी स्वत:चा पिकवलेला आंबा, घेऊन येणार आहेत. पणन मंडळाकडे जे नोंदणीकृत केलेले शेतकरी आहेत. असेच या महोत्सवात भाग घेणार होते. परंतू मिटींगमध्ये असं ठरलं की, औरंगाबाद जिल्ह्यातील शेतकरी आंबा पिकवत असेल किंवा स्वत:च्या मळ्यातला आंबा असेल तर ते पण या महोत्सवामध्ये भाग घेवू शकतील, त्यांना या ठिकाणी परवानगी देण्यात येणार आहे.

****

बीड जिल्ह्यात गाळयुक्त शिवार मोहीमेअंतर्गत सिंचन प्रकल्पातला गाळ काढण्याची कामं पूर्ण करण्याची सूचना, जिल्हाधिकारी दीपा मुधोळ- मुंडे यांनी दिली आहे. जिल्ह्यातल्या विविध जलसंधारण कामांचं नियोजन करण्यासाठी आयोजित बैठकीत काल त्या बोलत होत्या. शेतकरी, लोकसहभाग आणि स्वयंसेव�� संस्थांच्या माध्यमातून हा गाळ काढावा, तसंच तो शेतकऱ्यांच्या शेतात टाकण्यात यावा असंही त्यांना यावेळी सूचित केलं.

****

उस्मानाबाद हा जिल्हा केंद्र सरकारच्या नीती आयोगानं आकांक्षित जिल्हा जाहीर केला असून, जिल्हा कुपोषण मुक्त करण्यासाठी कृती दलाची स्थापना करण्यात आली आहे. त्यासाठी विविध उपाय योजना केल्या जात आहेत. याबाबत माहिती देत आहेत आमचे वार्ताहर,

Byte..

यामध्ये १९१ तीव्र कुपोषित म्हणजे सॅम आणि एक हजार ५१९ मध्यम कुपोषित म्हणजे मॅम तर सर्वसाधारण श्रेणीतील एक लाख १३ हजार ७९४ बालकं आढळून आली आहेत. यातील एक हजार ७१० बालकांची आरोग्य विभागामार्फत स्वंतत्र पथकाव्दारे जून मध्ये संपूर्ण आरोग्य तपासणी करुन त्यांना औषधोपचार दिले जाणार आहेत. आरोग्य तपासणीमध्ये आढळून आलेल्या आजारी तीव्र कुपोषित सॅम श्रेणीतील बालकांना पोषण पुनर्वसन केंद्रात दाखल करुन उपचार केले जाणार आहेत. गंभीर वैद्यकीय दोष आढळलेल्या बालकांना संदर्भ सेवा देऊन वैद्यकीय उपचार केले जाणार आहेत.

****

इंडियन प्रिमियर लीग - आयपीएल क्रिकेट स्पर्धेचा अंतिम सामना उद्या गुजरात टायटन्स आणि चेन्नई सुपर किंग्ज यांच्यात होणार आहे. काल झालेल्या दुसऱ्या बाद फेरीच्या सामन्यात गुजरात टायटन्सनं मुंबई इंडियन्सचा ६२ धावांनी पराभव करुन, अंतिम फेरी गाठली. गुजरातच्या संघानं प्रथम फलंदाजी करत निर्धारित षटकात २३३ धावा केल्या. शुभमन गिलनं ६० चेंडूत १२९ धावांची खेळी केली. प्रत्यूत्तरादाखल आलेला मुंबईचा संघ १८ षटकं दोन चेंडुत १७१ धावांवर सर्वबाद झाला.

****

परभणी इथं जिल्हा कौशल्य विकास, रोजगार, उद्योजकता मार्गदर्शन केंद्राच्या वतीनं, बेरोजगारांसाठी ‘शासन आपल्या दारी’ या उपक्रमांतर्गत, आज पंडित दिनदयाळ उपाध्याय ऑनलाईन रोजगार मेळावा आयोजित करण्यात आला आहे. जिल्ह्यातल्या जास्तीत-जास्त सुशिक्षीत बेरोजगार उमेदवारांनी, डब्ल्यू डब्ल्यू डब्ल्यू डॉट महास्वयम डॉट जीओव्ही डॉट इन, या संकेतस्थळावर आपला सहभाग नोंदवावा, असं आवाहन, कौशल्य विकास, रोजगार आणि उद्योजकता विभागाचे सहायक आयुक्त प्र. सो. खंदारे यांनी केलं आहे.

****

माजी मुख्यमंत्री, दिवंगत विलासराव देशमुख यांच्या ७८ व्या जयंतीदिनानिमित्त लातूरसह राज्यभरात अभिवादन सभा तसंच विविध कार्यक्रम काल घेण्यात आले. लातूरमध्ये निवळी इथल्या विलास सहकारी साखर कारखान्यात रक्तदान शिबीर घेण्यात आलं. यावेळी ७३ जणांनी रक्तदान केलं. लातूर तालुक्यातल्या मौजे वासनगाव ग्रामपंचायतीत, विलासराव देशमुख यांच्या प्रतिमेला पुष्पहार अर्पण करुन आदरांजली वाहण्यात आली. औरंगाबाद शहर जिल्हा काँग्रेस समितीच्यावतीनंही विलासराव देशमुख यांना अभिवादन करण्यात आलं.

****

0 notes

airnews-arngbad · 1 year ago

Text

Regional Marathi Text Bulletin, Aurangabad

Date : 26 May 2023

Time 01.00 to 01.05 PM

Language Marathi

आकाशवाणी औरंगाबाद

प्रादेशिक बातम्या

दिनांक : २६ मे २०२३ दुपारी १.०० वा.

****

नव्या संसद भवनाचं उद्घघाटन राष्ट्रपतींच्या हस्ते करावं, याबाबत दाखल जनहित याचिका आज सर्वोच्च न्यायालयानं फेटाळली आहे. ही याचिका सुनावणी घेण्यायोग्य नाही असं न्यायालयानं म्हटलं असून, त्यानंतर याचिकाकर्त्यांच्या वकीलानं ही याचिका मागे घेतली आहे.

दरम्यान, नवीन संसद भवनाचं उद्घाटन परवा २८ तारखेला होणार असून, यावेळी पंतप्रधान नरेंद्र मोदी ७५ रुपयांचं नाणं देखील जारी करणार आहेत. या उद्घाटन समारंभात विरोधी पक्षांनी सहभागी व्हावं, असं आवाहन संरक्षण मंत्री राजनाथ सिंह यांनी केलं आहे. नवीन संसद भवन हे भारताची लोकशाही आणि १४० कोटी नागरिकांच्या अपेक्षांचं शक्तिशाली मूर्त स्वरूप आहे, त्यामुळे ज्या राज��ीय पक्षांनी नव्या संसद भवनाच्या उद्गघाटन समारंभावर बहिष्कार टाकण्याचा निर्णय घेतला त्यांनी पुर्नविचार करावा, असं त्यांनी ट्विट संदेशात म्हटलं आहे.

***

२०२२-२३ या वर्षासाठी प्रमुख पिकांच्या उत्पादनाचा तिसरा आगाऊ अंदाज कृषी मंत्रालयानं जारी केला. या चालू कृषी वर्षात तीन हजार ३०५ लाख टन अन्नधान्य उत्पादनाचा अंदाज यात वर्तवण्यात आला आहे. तांदूळ, गहू, मका, सोयाबीन, आणि उसाचं विक्रमी उत्पादन होईल, असं मंत्रालयानं म्हटलं आहे. लाखो शेतकऱ्यांचे कठोर परिश्रम, शास्त्रज्ञांचं प्राविण्य सरकारच्या शेतकरी अनुकूल धोरणांमुळे कृषी क्षेत्र दिवसेंदिवस विकसित होत असल्याचं कृषी मंत्री नरेंद्र सिंह तोमर यांनी ट्विट संदेशात म्हटलं आहे.

***

नवीन संकल्पना अंमलात आणून यावर्षीचा गणेशोत्सव साजरा करावा असं आवाहन सांस्कृतिक कार्यमंत्री सुधीर मुनगंटीवार यांनी केलं. मुंबईतल्या सह्याद्री अतिथीगृहात काल झालेल्या गणेशोत्सव पूर्वतयारी बाबत बैठकीत ते बोलत होते. सांस्कृतिक कार्य विभागाकडून यंदाही गणेशोत्सवात स्पर्धा घेण्यात येणार असल्याचं मुनगंटीवार यांनी स्पष्ट केलं.

***

महाराष्ट्र लोकसेवा आयोगाच्या प्रवेश परीक्षेचा डाटा हॅक करणा-या तरुणाला नवी मुंबई पोलिसांच्या सायबर विभागानं पुणे इथून अटक केली आहे. हा तरूण डार्कनेटवरील काही हॅकर्स सोबत संपर्कात असल्याचं आढळून आल्याचं, नवी मुंबईचे पोलीस आयुक्त मिलिंद भारंबे यांनी काल पत्रकार परिषदेत सांगितलं. या हॅकर्सकडून त्याला प्रवेश पत्र आणि पश्नपत्रिका हॅक करण्यासाठी ४०० डॉलरची सुपारी मिळाल्याचं देखील तपासात समोर आल्याचं त्यांनी सांगितलं.

***

आषाढी वारीसाठी शेगाव इथून संत गजानन महाराजांच्या पालखीचं आज पंढरपूरकडे प्रस्थान झालं. या पालखीचं यंदाचं हे ५४ वं वर्ष आहे. एका महिन्याच्या प्रवासानंतर २७ जून रोजी ही पालखी पंढरपूरला पोहचेल.

***

औरंगाबाद शहरातील मौलाना आजाद महाविद्यालयाचे प्राचार्य डॉ. मजहर फारुखी यांची नियुक्ती केंद्र सरकारच्या विद्यापीठ अनुदान आयोगाच्या सदस्यपदी झाली आहे. यानिमित्त काल औरंगाबाद इथं त्यांचा जाहीर सत्कार करण्यात आला.

***

धुळे जिल्ह्यातल्या शिंदखेडा तालुक्यासाठी महत्वपुर्ण असलेल्या ८५ गांव वॉटरग्रीड योजनेचं भुमिपुजन काल आमदार जयकुमार रावल यांच्या हस्ते झालं. केंद्र सरकारच्या जलजीवन मिशनअंतर्गत २७४ कोटी रुपयांच्या निधीतून ही योजना साकारली जात आहे.

***

गडचिरोली जिल्ह्यातल्या चामोर्शीचे पोलिस निरीक्षक राजेश खांडवे यांना न्यायाशीधांना धमकावल्याप्रकरणी निलंबित करण्यात आलं आहे. चामोर्शी कृषी उत्पन्न बाजार समितीच्या निवडणुकीदरम्यान माजी सभापती अतुल पवार यांना मारहाण केल्याप्रकरणी खांडवे यांच्यावर गुन्हा नोंदवण्याचे आदेश प्रथम वर्ग न्याय दंडाधिकारी एन. डी. मेश्राम यांनी दिले होते. त्यानंतर खांडवे यांनी न्यायाधीशांच्या बंगल्यावर जाऊन त्यांना शिवीगाळ करून हुज्जत घातली होती.

***

नांदेड - जम्मू तावी एक्सप्रेस ही रेल्वेगाडी आज आठ तास उशिरा धावणार आहे. ही रेल्वेगाडी नांदेड रेल्वे स्थानकावरुन तिच्या निर्धारित वेळेऐवजी संध्याकाळी सहा वाजून चाळीस मिनिटांनी सुटणार असल्याचं दक्षिण मध्य रेलवेच्या नांदेड जनसंपर्क कार्यालयानं कळवलं आहे.

***

क्वालालंपूर मध्ये सुरु असलेल्या मलेशिया मास्टर्स बॅडमिंटन स्पर्धेत, भारताच्या पी. व्ही. सिंधू आणि एच. एस. प्रणॉय यांनी उपांत्य फेरीत प्रवेश केला आहे. आज झालेल्या उपांत्यपूर्व फेरीत सिंधूनं चीनच्या झांग यीमान हिचा २१ - ११, २१ - १४ असा पराभव केला. तर प्रणॉयनं जपानच्या के निशिमोतो याचा २५ - २३, १८ - २१, २१ - १३ असा पराभव केला. पुरुष एकेरीच्या अन्य एका सामन्यात किदांबी श्रीकांतचा इंडोनेशियाच्या सी. एदिनाता याच्याकडून पराभव पत्करावा लागला.

***

इंडियन प्रीमिअर लीग - आयपीएल क्रिकेट स्पर्धेत आज बाद फेरीतला अखेरचा सामना गुजरात टायटन्स आणि मुंबई इंडियन्स संघात होत आहे. अहमदाबाद इथं नरेंद्र मोदी क्रीडा संकुलावर होणाऱ्या या सामन्यातला पराभूत संघ स्पर्धेतून बाहेर पडेल, तर विजेत्या संघाचा परवा अंतिम फेरीत चेन्नई सुपर किंग्जसोबत सामना होणार आहे.

//***********//

0 notes

airnews-arngbad · 1 year ago

Text

Regional Marathi Text Bulletin, Aurangabad

Date : 26 May 2023

Time : 7.10 AM to 7.25 AM

Language Marathi

आकाशवाणी औरंगाबाद

प्रादेशिक बातम्या

दिनांक : २६ मे २०२३ सकाळी ७.१० मि.

****

ठळक बातम्या

बारावीचा निकाल यंदा ९१ पूर्णांक २५ टक्के;मुलांच्या तुलनेत मुली उत्तीर्ण होण्याचं प्रमाण साडे चार टक्क्यांनी अधिक

इंधनावरचा खर्च कमी करण्यावर लक्ष केंद्रित करण्याची आवश्यकता-केंद्रीय मंत्री नितीन गडकरी

शासन आपल्या दारी कार्यक्रमासाठी मुख्यमंत्री एकनाथ शिंदे आज औरंगाबाद दौऱ्यावर

जायकवाडी धरणात पाणी उपसा संच उभारणीच्या कामाची, केंद्रीय अर्थराज्यमंत्री डॉक्टर भागवत कराड यांच्याकडून पाहणी

हिंगोली जिल्ह्यात दोन ट्रकच्या अपघातात चौघांचा मृत्यू;दीडशे मेंढ्याही दगावल्या

परभणी जिल्ह्यात वाळू तस्करांवर कारवाईसाठी जाणारे तलाठी नदीपात्रात बेपत्ता

आणि

आयपीएल क्रिकेट स्पर्धेत आज गुजरात टायटन्स आणि मुंबई इंडियन्स संघात बाद फेरीतला अखेरचा सामना

सविस्तर बातम्या

राज्य माध्यमिक आणि उच्च माध्यमिक शिक्षण मंडळाच्या बारावी परीक्षेचा निकाल काल जाहीर झाला. या परीक्षेत ९१ पूर्णांक २५ टक्के विद्यार्थी उत्तीर्ण झाले. मंडळाचे अध्यक्ष शरद गोसावी यांनी काल पुण्यामध्ये पत्रकार परिषदेत ही माहिती दिली. ते म्हणाले...

Byte..

ओव्हरऑल निकाल नियमित विद्यार्थ्यांचा ९१ पूर्णांक २५ टक्के एवढा सक्सेस रेट आहे. मागच्या वर्षी पेक्षा जरी दोन पूर्णांक ९७ टक्के जरी कमी झाला असला तरी एकूण परिस्थिती बघता २०२० ची तुलना केली, ज्यावेळी रेग्युलर परीक्षा झाली होती त्याचा विचार करता हा निकाल शून्य पूर्णांक ५९ टक्क्याने जास्त आहे.

सर्व नऊ विभागीय मंडळांतून ९३ पूर्णांक ७३ टक्के विद्यार्थिंनी उत्तीर्ण झाल्या असून, ८९ पूर्णांक १४ टक्के विद्यार्थी उत्तीर्ण झाले आहेत. मुलांच्या तुलनेत विद्यार्थिनींचं उत्तीर्ण होण्याचं प्रमाण टक्केवारी, चार पूर्णांक ५९ टक्क्यांनी जास्त असल्याच�� माहितीही गोसावी यांनी दिली.

कोकण विभागात सर्वाधिक ९६, तर मुंबई विभागात सर्वात कमी ८८ पूर्णाक १३ टक्के विद्यार्थी उत्तीर्ण झाले आहेत. औरंगाबाद विभागात ९१ पूर्णांक ८५, लातूर ९० पूर्णांक ३७ टक्के विद्यार्थी उत्तीर्ण झाले. पुणे विभागात ९३ पूर्णांक ३४ टक्के, नागपूर ९० पूर्णांक ३५, अमरावती ९२ पूर्णांक ७५, कोल्हापूर ९३ पूर्णांक २८ आणि नाशिक विभागात ९१ पूर्णांक ६६ टक्के विद्यार्थी उत्तीर्ण झाले आहेत. सर्व शाखांमधून ३५ हजार ५८३ पुनर्परीक्षार्थी विद्यार्थ्यांनी परीक्षा दिली. खासगी विद्यार्थी म्हणून नोंदणी केलेल्या विद्यार्थ्यांची एकूण संख्या ३६ हजार ४५४ एवढी असून त्यांच्या निकालाची टक्केवारी ८२ पूर्णांक ३९ असल्याचं गोसावी यांनी सांगितलं.

दरम्यान, बारावी परीक्षेतल्या यशासाठी सगळ्या उत्तीर्ण विद्यार्थ्यांचं अभिनंदन आणि त्यांना भावी वाटचालीसाठी मनापासून शुभेच्छा, असं मुख्यमंत्री एकनाथ शिंदे यांनी म्हटलं आहे. या परीक्षेत यंदा मुलींनी आणि दिव्यांगांनी लक्षणीय यश मिळवल्याबद्दल मुख्यमंत्र्यांनी त्यांचं विशेष अभिनंदन केलं. विरोधी पक्ष नेते अजित पवार यांनीही उत्तीर्ण विद्यार्थ्यांचं अभिनंदन केलं असून, अनुत्तीर्ण विद्यार्थ्यांनी निराश न होता पुन्हा जोमानं प्रयत्न करावेत, असं म्हटलं आहे.

****

इंधनावरचा खर्च कमी करण्यावर लक्ष केंद्रित करण्याची आवश्यकता केंद्रीय मंत्री नितीन गडकरी यांनी व्यक्त केली आहे. काल मुंबईत हरित हायड्रोजन परिषदेचं उद्घघाटन केल्यानंतर, ते बोलत होते. जीवाश्म इंधन आयात आणि प्रदूषण, ही देशासमोरची दोन मोठी आव्हानं आहेत, असं सांगत, भारताला ऊर्जा निर्यात करणारा देश बनवण्याचं स्वप्न पूर्ण करायचं आहे, असं गडकरी म्हणाले. एकूण प्रदूषणापैकी सुमारे चाळीस टक्के प्रदूषण हे परिवहनामुळे होतं. या दृष्टीनं, इथेनॉल, बायो-सीएनजी, बायोइथेनॉल आणि हायड्रोजनचे एकशे पस्तीस प्रकल्प प्रक्रियेत असल्याची माहिती त्यांनी दिली. भविष्यकालीन तंत्रज्ञानाच्या दृष्टीनं हरित हायड्रोजन परिषदेचं आयोजन प्रेरणादायी असल्याचा आनंद आहे, अशी भावनाही गडकरी यांनी यावेळी व्यक्त केली.

****

नव्या संसद भवनाच्या उद्धाटन सोहळ्यावर बहिष्कार घालणं म्हणजे लोकशाहीला नाकारणं असल्याची टीका, उपमुख्यमंत्री आणि भारतीय जनता पक्षाचे नेते देवेंद्र फडणवीस यांनी केली आहे. ते काल मुंबईत बोलत होते. आधीच्या काळात झालेल्या अशा कार्यक्रमांचा संदर्भ देत, या उद्धाटन सोहळ्यावर बहिष्कार घालणं हा विरोधी पक्षांचा दुटप्पीपणा असल्याची टीकाही फडणवीस यांनी यावेळी केली.

****

राज्यात सर्व लाभार्थ्यांना शासनाच्या योजनांचे सगळे लाभ मिळावेत, अशी अपेक्षा मुख्यमंत्री एकनाथ शिंदे यांनी व्यक्त केली आहे. त्यांनी काल रत्नागिरी इथं `शासन आपल्या दारी` या उपक्रमामध्ये मार्गदर्शन केलं, त्यावेळी बोलतांना ते म्हणाले

Byte…

हे शेतकऱ्यांचं, बळीराजाचं, माता-भगिनींचं, विद्यार्थ्यांचं, ज्येष्ठांचं, सगळ्यांचं सरकार या राज्यात आलेलं आहे. आणि म्हणूनच आपल्याला हे नवीन नवीन पाहायला मिळतंय. या नवीन योजना डायरेक्�� आपल्या दाराजवळ येतायत. याचं कारणच एवढं आहे, हे सरकार तुमचं आहे. या राज्यातल्या सगळ्या लाभार्थ्यांना जेव्हा हे शासनाचे लाभ मिळतील, तोच दिवस आमच्यासाठी खऱ्या अर्थाने समाधानाचा असणार आहे.

****

मुख्यमंत्री एकनाथ शिंदे आज औरंगाबाद जिल्ह्याच्या दौऱ्यावर येत आहेत. सकाळी पावणे बारा वाजेदरम्यान त्यांचं चिकलठाणा विमानतळावर आगमन होईल, त्यानंतर ते हेलिकॉप्टरने कन्नडकडे प्रयाण करतील. कन्नड तालुक्यात अंधानेर इथं आयोजित शासन आपल्या दारी कार्यक्रमाला उपस्थित राहून दुपारनंतर मुख्यमंत्री अहमदनगर जिल्ह्यात जेऊर कडे प्रस्थान करणार आहेत. शासन आपल्या दारी या अभियानात शासकीय योजनांच्या लाभांचे प्रमाणपत्र तसंच आवश्यक कागदपत्रं एकाच ठिकाणी मिळणार आहेत.

****

हिंदुहृदयसम्राट बाळासाहेब ठाकरे नागपूर - मुंबई समृद्धी महामार्गाच्या शिर्डी ते भरवीर या दुसऱ्या टप्प्याचं लोकार्पण, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या हस्ते आज होणार आहे. ऐंशी किलोमीटरचा हा टप्पा आहे. समृद्धी महामार्गावरच्या नागपूर ते शिर्डी या ४८० किलोमीटरच्या पहिल्या टप्प्याचं लोकार्पण पंतप्रधान नरेंद्र मोदी यांनी गेल्या वर्षी ११ डिसेंबरला केलं होतं.

****

मोसमी पावसाच्या आगमनाची वेळ जवळ आल्यानं बँकांनी शेतकऱ्यांना बियाणं तसंच रासायनिक खतांच्या खरेदीसाठी पीक कर्ज वेळेत द्यावं, असे निर्देश राज्याचे सहकार आणि इतर मागास बहुजन कल्याण मंत्री अतुल सावे यांनी दिले आहेत. काल मुंबईत सहकार विभागाच्या आढावा बैठकीत ते बोलत होते. जास्तीत जास्त शेतकऱ्यांना पीक कर्ज पुरवठा करण्याचे निर्देश मुख्यमंत्र्यांनी दिलेले आहेत, त्यानुसार सहकार विभागानं कार्यवाही करावी, असे निर्देशही सावे यांनी दिले.

****

आम आदमी पक्षाचे नेते तथा दिल्लीचे मुख्यमंत्री अरविंद केजरीवाल यांनी आपल्या मुंबई भेटीत काल दुसऱ्या दिवशी राष्ट्रवादी काँग्रेस पक्षाचे अध्यक्ष शरद पवार यांची भेट घेतली. केंद्र सरकार विरोधी पक्षांना धमकावत असल्याचा आरोप केजरीवाल यांनी या भेटीनंतर घेतलेल्या पत्रकार परिषदेत केला. दिल्लीच्या लोकनियुक्त सरकारचे अधिकार काढून घेऊन ते केंद्र सरकारकडेच ठेवण्यासाठी केंद्र सरकारनं अध्यादेश काढला असून, ही देशासाठी घातक स्थिती असल्याची टीका त्यांनी केली. शरद पवार यांनी यावेळी बोलताना, प्रत्येक बाबीमध्ये केंद्र सरकारचा हस्तक्षेप होणं, हा लोकशाहीवर आघात आहे, अशी टीका केली. या विधेयकाबाबत राष्ट्रवादी काँग्रेस पक्षाचा केजरीवाल यांना पाठिंबा असल्याचं, पवार यांनी यावेळी जाहीर केलं.

****

१६ आमदारांच्या अपात्रतेच्या मुद्द्यावर लवकरात लवकर निर्णय घ्यावा, या मागणीसाठी शिवसेना उद्धव बाळासाहेब ठाकरे गटाच्या शिष्टमंडळानं काल विधान��भा अध्यक्ष राहुल नार्वेकर यांची भेट घेतली. आपल्या मागणीचं निवेदन या शिष्टमंडळानं नार्वेकर यांना सादर केलं. याबाबत लवकरात लवकर सुनावणी होईल, अशी ��ात्री असल्याची प्रतिक्रिया, विधान परिषदेचे विरोधी पक्षनेते अंबादास दानवे यांनी या भेटीनंतर दिली.

****

संजय गांधी निराधार अनुदान योजनेतंर्गत ४४५ कोटी, आणि श्रावणबाळ सेवा राज्य निवृत्तीवेतन योजनेतंर्गत ७५२ कोटी रुपयांचा निधी, सगळ्या जिल्हाधिकारी कार्यालयांना वितरीत करण्यात आला आहे. लाभार्थ्यांना दरमहा वेळेवर अनुदान मिळावं, यासाठी हा निधी देण्यात आला असून, तो लाभार्थ्यांना तत्काळ वाटप करण्याची सूचना, सामाजिक न्याय आणि विशेष सहाय्य विभागाचे सचिव सुमंत भांगे यांनी जिल्हाधिकाऱ्यांना केली आहे.

****

येत्या अट्ठावीस तारखेला मॉरिशस इथं स्वातंत्र्यवीर सावरकर विश्व संमेलनाचं आयोजन करण्यात आलं आहे. स्वातंत्र्यवीर सावरकर यांचे तेजस्वी विचार पुढच्या पिढीत नेण्याचं कार्य अव्याहतपणे सुरू रहावं, म्हणून हे आयोजन केलं जातं. यावेळी मॉरिशसच्या राजधानीत स्वातंत्र्यवीर सावरकर यांच्या अर्धाकृती पुतळ्याचं अनावरणही होणार आहे.

****

जायकवाडी धरणातल्या नव्या पाणी उपसा संच उभारणीच्या कामाचा, केंद्रीय अर्थराज्यमंत्री डॉक्टर भागवत कराड यांनी काल भेट देऊन आढावा घेतला. अमृत अभियानाअंतर्गत औरंगाबाद शहराच्या पाणी पुरवठा योजनेसाठी हा संच तयार होत आहे. कराड यांनी यावेळी पाणी पुरवठा योजनेतल्या संबंधित अधिकाऱ्यांशी संवाद साधून आवश्यक त्या सूचना केल्या.

****

उस्मानाबाद जिल्ह्यात उमरगा तालुक्यातल्या मुरूम कृषी उत्पन्न बाजार समितीच्या सभापतीपदी, महाविकास आघाडीच्या बापूराव पाटील यांची, तर उपसभापतीपदी, बसवराज कारभारी यांची बिनविरोध निवड करण्यात आली. या दोन्ही पदांसाठी प्रत्येकी एकच अर्ज दाखल झाल्यामुळे या निवडी बिनविरोध झाल्याची घोषणा निवडणूक निर्णय अधिकारी बी. व्ही. काळे यांनी केली.

****

हिंगोली जिल्ह्यात कळमनुरी कृषी उत्पन्न बाजार समितीची निवड प्रक्रिया काल पार पडली. यामध्ये शिवसेना उद्धव बाळासाहेब गटाचे मारोतराव खांडेकर यांची सभापती पदावर, तर उपसभापतीपदी कांग्रेसचे नितिन जिंतूरकर निवडून आले आहेत.

****

हिंगोली जिल्ह्यात कळमनुरी तालुक्यातल्या माळेगाव जवळ ट्रक आणि मेंढ्यांची वाहतूक करणाऱ्या ट्रक मध्ये झालेल्या अपघातात चार जणांचा मृत्यू झाला तर सुमारे दीडशे मेंढ्या दगावल्या. काल सकाळी हा अपघात झाला. रस्त्यावर उभ्या असलेल्या ट्रकला मेंढ्या घेऊन जाणाऱ्या ट्रकनं पाठीमागून जोराची धडक दिल्यामुळे हा अपघात झाला. या अपघातातल्या तिघा जणांना हिंगोली इथल्या जिल्हा रुग्णालयात नेण्यात आलं असता डॉक्टरांनी तपासून मृत घोषित केलं. चौथ्या गंभीर जखमी व्यक्तीचा नांदेड इथं उपचार सुरू असताना मृत्यू झाला.

****

परभणी जिल्ह्यात नदीपात्रात वाळू माफियांना पडकण्यासाठी गेलेले डिग्रस सज्जाचे तलाठी सुभाष होळ नदीपात्रात बुडाल्याची गटना काल घडली. जिंतूर तालुक्यातल्या मौजे डिग्री इथं, नदीपात्राच्या द��सऱ्या किनाऱ्यावर वाळूमाफिया ट्रॅक्टरमध्ये वाळू भरत असल्याचं होळ यांच्या निदर्शनास आलं, त्यांना पकडण्यासाठी ते पाण्यातून पोहत जात असताना ते नदीपात्रात अचानक बेपत्ता झाले. काल संध्याकाळपर्यंत त्यांचा शोध लागला नसल्याचं, याबाबतच्या वृत्तात म्हटलं आहे.

****

लखनौ इथं खेलो इंडिया विद्यापीठ क्रीडा स्पर्धेचं उद्घाटन काल पंतप्रधान नरेंद्र मोदी यांच्या हस्ते दूरदृश्य प्रणालीच्या माध्यमातून झालं. खेलो इंडिया विद्यापीठ क्रीडा स्पर्धांमुळे खेळांचं नवं युग सुरू झालं असून, आंतरराष्ट्रीय स्तरावर भारताचं नाव मोठं होत असल्याचं पंतप्रधान यावेळी म्हणाले. ही स्पर्धा तीन जून पर्यंत उत्तर प्रदेशात वाराणसी, गोरखपूर, लखनौ आणि गौतम बुद्ध नगर इथं होणार आहे. या स्पर्धांमध्ये २०० हून जास्त विद्यापीठांमधले चार हजारांपेक्षा जास्त खेळाडू सहभागी झाले आहेत.

****

क्वालालांपूर इथं सुरू असलेल्या मलेशिया खुल्या बॅडमिंटन स्पर्धेत भारताच्या पी व्ही सिंधू, किदंबी श्रीकांत आणि एच एस प्रणॉयनं उपांत्यपूर्व फेरीत प्रवेश केला आहे. सिंधुनं जपानच्या अया ओहोरीला २१-१६,२१-११ असं हरवलं. पुरुष एकेरीच्या स्पर्धेत किदंबीनं थायलंडच्या खेळाडूचा, तर प्रणॉयनं चीनच्या खेळाडूचा पराभव केला.

****

उस्मानाबाद जिल्ह्यात श्रीक्षेत्र तुळजापूर इथं तुळजाभवानी माता छत्रपती शिवाजी महाराजांना भवानी तलवार देतानाचं १०८ फूट उंचीचं शिल्प उभारण्याचा निर्णय घेण्यात आला आहे. याचं संकल्प चित्र बनवण्यासाठी संकल्पना स्पर्धा आयोजित करण्यात आली आहे. यामध्ये निवड झालेल्या अद्वितीय कलाकृतीस एक लाख रुपयाचं बक्षीस देण्यात येणार असल्याची माहिती आमदार राणा जगजितसिंह पाटील यांनी दिली आहे. या शिल्प समूहाचं संकल्पचित्र पाठवण्याची मुदत एक जून पर्यंत आहे.

****

शासकीय योजनांची जत्रा अंतर्गत औरंगाबाद जिल्ह्यात आरोग्य शिबीरं घेण्यात येत आहेत. यात काल शहरातल्या सिल्क मिल्क कॉलनी परिसरात शासकीय योजना सुलभीकरण अभियानाअंतर्गत मोफत आ��ोग्य शिबीर घेण्यात आलं. यावेळी नेत्र रोग तपासणी, मोफत चष्माचे नंबर, मोतिबिंदू निदान, स्त्री रोग तपासणी आणि दातांची तपासणी करण्यात आली. या शिबीरामध्ये १४८ जणांची तपासणी केल्याची माहिती महानगरपालिकेचे आरोग्य अधिकारी डॉ.पारस मंडलेचा यांनी दिली.

****

नांदेड जिल्ह्यातल्या बिलोली पंचायत समितीमध्ये काल पाणी आणि स्वच्छता अभियानाअंतर्गत महिला मेळावा घेण्यात आला. जागतिक मासिक पाळी दिनानिमित्त सुरू असलेल्या, `आम्ही कटिबद्ध आहोत`, या विशेष जनजागृती सप्ताहानिमित्त हा कार्यक्रम घेण्यात आला. समुदाय आरोग्य अधिकारी डॉक्टर स्मिता पाटील यांनी, मासिक पाळी व्यवस्थापन, याविषयावर यावेळी मार्गदर्शन केलं.

****

संत भगवानबाबा शासकीय वसतीगृह ��ोजनेअंतर्गत बीड जिल्ह्यातल्या बीड, गेवराई, केज, पाटोदा, परळी वैजनाथ आणि माजलगाव तालुक्यांच्या ठिकाणी, स्थलांतरित उसतोड कामगारांच्या मुलामुलींसाठी, बारा वसतीगृहं सुरू करण्यात आली आहेत. २०२३-२४ या शैक्षणिक वर्षासाठी इयत्ता पाचवीपासून पुढच्या पात्र आणि गरजू विद्यार्थ्यांनी या वसतीगृहांमध्ये प्रवेश घ्यावा, असं आवाहन समाज कल्याण विभागाच्या सह आयुक्तांनी केलं आहे.

****

0 notes