#هتعيش

[glimpse-of-hope]

إن مقدرتش تضحك متدمعش ولا تبكيش و إن مفضلش معاك غير قلبك اوعى تخاف مش هتموت هتعيش و إن سألوك الناس عن ضي جوة عيونك مبليمعش متخبيش قولهم العيب مش فيا ده العيب في الضي

[rooh-elhaya]

انتظارك انك تاخد الأمان من علاقاتك .. ولا من شغلك ولا من صحتك .. ولا من أهلك ولا من أي بني آدم في الكون معناه .. انك هتعيش طول عمرك خايف ..ومنتظر

الله وحده هو مصدر الأمان التام .. والمطلق .. وغير المشروط في هذا العالم الخائف المضطرب .🌸🌸

[quiet-lady-nana]

‏متقبلش بأقل من اللي تستحقه لا ف حب ولا ف شغل ولا ف صحوبية.. انت هتعيش مرة واحدة 🦋☘️🦋

[mrvictive]

مفيهاش سوبرمان يا جماعه والله.

مفيش حد جاي هينقذك و هيخلي الوضع احسن. مفيش حد هيجي يطبطب و يخلي الوحده تروح.

مش هتتحسن ولا هتاخد خطوه غير لما تعرف أن دي مشاكلك و محدش هيحلها غيرك. الوضع مش كويس بس هو ده الحال و مفيش حل غير انك ت act علي كدا.

طول ما انت مستني حد مش هتتحرك. بالعكس كون انك منتظر شخص دا اكبر احساس أن في حاجه ناقصه و دا هيبقي مصدر عدم سعاده كبير جدا.

الرحله فرديه يا جماعه.

فرديه مع ربنا. هو ده الرفيق الوحيد. هو ده اللي عمره ما هيتخلي عنك ولا هيعذبك بالعكس هو ده احن حد و اكتر حد رحيم و اكتر حد بيسامح.

مفيش حد هيحل اي مشكله من دول غيرك. لا سوبر مان ولا رفيقه طيبه. ولا اي حد غير نفسك. و لو دخلت علاقه مستني حد يصلح يبقي لا هتبقي احسن ولا الحد هيصلح و هتعيش ضحيه طول الوقت.

Don't wait for someone, and Take actions for yourself.

[zahraa17]

- فين الأمان في علاقة عارفين إنها مؤقتة!

= وهو كان فين الأمان في علاقة فاكرين إنها هتعيش العمر كله!

[tafasillyasminaa]

حتى لو هتعيش بقية حياتك لوحدك ...

متقبلش بأقل من اللي تستحقه ،

.

# كلمتين ع الماشي

[amolas-blog]

الجواز عن حُب دا كِذبة تسويقية اتعملت علشان تُبيح تواصل الجنسين خارج دائرة الشرع، ومن أقبح أنواع التسويق دا إنهم عملوا مصطلح مُضاد للجواز عن حُب وسمُّوه جواز صالونات اللي هو (الزواج الشرعي) أصلاً!

لازم تعرف إنك عمرك أبدًا ما هتعيش حياة سعيدة بالحرام!

قالﷺ: (إن اللَّه لم يجعَل شِفاءَكم فيما حَرَّم عليكم)🤍

[mentally-damaged]

طيب انت دلوقتي سعيت و لسا بتسعى و مش مخلي وراك حاجه معملتهاش ، لو موصلتش ف نهاية السعي دا هتعمل ايه ؟

هتعيش الباقي من عمرك بتقنع اللي حواليك انك عملت اللي عليك ، و ان دا مش فشل لا دا نصيبك ربنا كاتبلك ان سعيك دا كله متجنيش ثماره في الدنيا

هل كل اللي سعوا قبلك وصلوا ؟ طيب الناس اللي كانت شاهده على كفاحهم بيعتبروهم فشلة ولا محاربين و ايه هي مرجعيتهم في الحكم ؟

و هل انت في عز الصدمة و مواجهة الواقع دا هيكون فارق معاك اصلا حكمهم عليك ولا هتقدر تتجاهله وتحاول تاني لحد ما تموت ؟

طيب انت متخيل حجم المعاناة ؟ ، جاهز تعيشها لو مكتوبالك ولا مش هتستحمل ؟

[fyunka]

لو عرفت السرعه اللي هتتنسي بيها لما تموت مش هتعيش ترضي حد غير ربنا.

[marwa-el-zeiny]

مفيش حد ف الدنيا كلهاااا من أب لام لاخوات لأصحاب لأجواز لعيالنا ننفع نبقي ادامهم كتاب مفتوح ١٠٠% او تقولي كل ما يخطر ف بالك من غير ما يعدي ع فلتر وتحسبي توابعه تصدقي دي بقي 😃،واللي يقول غير كدا اعرفي انه اكتر من تلات اربع علاقاته مع اللي حواليه بايظه

ممكن تستفيضى اكتر فى النقطة دى

صباحك فل

يعني الإنسان سر نفسه وبس مفيش استثناءات اطلاقا

ربنا أنعم عليا بعيلتي الكبيرة بابايا ومامتي واخواتي وعيلتي الصغيرة جوزي وولادي وصحاب من اعدادي وصحاب مرحله ومواقف بجد الحمد لله انا محظوظه بالناس اللي حواليا ... عارفه اني ف الاخر مملكش منهم حاجه وهما شرحه ميملكوش فيا حاجه انا لواحدي

مفيش حب مش مشروط الحب والاهتمام وكل الحاجات المعنويه اللي بنقدر نعيش بيها احنا راضيين لازم لهم تمن ولازم تمن كبير ع قدر قيمتهم ف حياتنا ، رقم واحد ف الفاتورة اللي هدفع تمنها دي اني مش هبقي كتاب مفتوح لحد مش هقول كل حاجه تخطر ف بالي مش هعمل كل حاجه عايزاها واعتمد ان اللي قصادي فاهمني وهيقدر لانه جس واات دا مبيحصلش😂 اول مرة بتزعل م الشخص تاني مرة بتزعل من نفسك التالته بتحس انك مش لازمك حد وانك مكتفي بنفسك فتبعد فتلاقيك بتخسر ناسك بس بتلاقي انه مينفعش دي رحله ولازم ننبسط يامحي فأدامك ساعتها ياتعيش دايما مش راضي ودايما بتدور ع الإنسان اللي هيقبل منك اي حاجه وكل حاجه ودا طبعا مش هنلاقي ه فتبقي ناقم ومش هيتبقي حد حواليك الا بوزك وغضبك يا هتعيش خفيف انا موجودة وانتو كمان موجودين خفاف بندعم بعض بننبسط سوا بنعيط لبعض بس كله بحدود كله من غير ما تكشف نفسك ١٠٠% او ترمي حملك ع اللي قصادك بشكل كامل

من رحمة ربنا بالبشر وحكمته انه مخلاش اللي ف القلوب يتكشف ولا نعرف النوايا يقوم الإنسان بذكاءه يعري نفسه للي قصاده 😃والحدوته دي انا جربتها كتير زمان وكانت دايما بتبقي نهايتها لحن يقهر مش حزين بس😃

[dedi-ashour]

أصحاب الأخدود لمّا اترموا في النار و همّا أحياء كله وقف يتفرج عليهم، و محصلتش أي معجزة وقتها علشان تنقذهم !

منزلش مطر من السماء

ولا جت ريح شديدة تطفي النار

ولا طير ابابيل تضرب الظالمين

ولا الأرض اتزلزلت من تحت الظلمة ..

المشهد ( في ظاهره ) مشهد صعب جدًا، و حتى بعد ما اتحرقوا و ماتوا القرآن مقالش إن نزل عذاب بعدها على الظالمين .

تتوقعوا سورة البروج بالقصة الصعبة جدًا دي موجودة في القرآن ليه ؟

علشان ( والله اعلم بحكمته) رب العالمين يعلم هتيجي أزمنة، تتكرر فيها نفس المشاهد الصعبة على أي نفس مسلمة عندها فطرة سوية، باختلاف شكل المشاهد دي !

و دي فتن بتزلزل القلوب زلزله جامدة جدًا ، مش سهلة ، علشان كده وردت اسماء حسنى كتير في السورة دي علشان عقيدتك متتهزش لحظة و الشيطان يدخلك الشك ناحية افعال الله .

فـ القرآن بيثبتك في عز المشاهد الصعبه دي ، إن اللي شايفهم قدام عينك دول ( خسروا و ماتوا ابشع ميتة ) في عين السماء ( هما في فوز كبير )

إن اهل البروج مكنش على ايامهم سوشيال ميديا تسجل الحدث ، ولا كاميرات تصور و توثق ! فـ رب العالمين أكدلنا في السورة إن كل ده ( ربك شهيد عليه و جت كلمة شاهد و مشهود ) و ربنا ردلهم أول حق من حقوقهم بإن الدنيا كلها سمعت عنهم ..

مفيش حق عند ربك بيضيع مهما دق!

الدنيا كلمة في أول سطر في كتاب كبير ، كتاب فيه قبر ممكن تقعد فيه الف سنة و يوم قيامة ممكن تقعد فيه ٥٠ الف سنة ، و انت في الدنيا ��تعيش قد ايه ؟ ٧٠ سنة ؟ طيب و لحظة لما اترمى اصحاب الأخدود في النار اخدت قد ايه ؟ ساعة ؟ اقل ؟ اكتر ؟

طيب بالنسبة للقبر و نعيمه ليهم، و فوزهم الكبير في جنة ابدية ، الساعة دي تتحسب ؟ هما اصلاً حسوا بيها بعد كده ؟

الفتنة شديدة ، و ده اختبار ليك معاهم ، و خليك واثق إن :

الإيمان لا يوجد إلا بغياب جزء من الصورة .

كذبتِ يا عيني ، و صدق وعد الله .

[nochnicht]

لا عرفت ترجع ورا

ولا عرفت تتقدِّم

واقف بتشحت ضِل

أو ساعة رِفْقِة خِل

سابك ماسابش الحل

تايه في أسبابك

سابك

كأن مفيش

ولا جد ولا تهويش

ولا حاجة كات هتعيش

من بعده في غيابك

[mustaphi]

يا هتعيش بتندم على عُمر فاتك ، يا تفتح لبكرة شبابيك حياتك..

تَجَاوز..

[itsziizou]

متزعلش لو الدنيا مشيّت عكس توقعاتك، هو أصلًا مش من الطبيعي إنها تمشي بناءًا على توقعاتك .. المفروض ان ده بيحصل عشان يخلينا نحاول تاني، عشان يخلينا نكمل، عشان يبقى عندنا سبب للحياة من الأساس .. تخيل لو كل حاجة حصلت زي ما انت عايز؛ هتعيش ليه؟ عشان تحقق ايه؟ ماهو كده كده انت مش محتاج تعمل حاجة..

كنت فـ مرة قاعد مع حد من صحابي بيلعب لعبة، فـ كان بيدور على شفرة ليها عشان يكسب ويطلع الأول.. انا استغربت من جوايا بصراحة وقولتله ايه فايدة انك تفوز وأنت معملتش حاجة عشان تفوز؟ ولا فكرت ولا تعبت ولا حتى كسبت بمجهودك؟ لقيته رد وقالي ان عادي ودي مجرد لعبة وبيتسلى شوية وقت فراغه .. بس هو ميعرفش انه كده بيهيَّأ عقله أنه يفضل كسلان وميفكرش لحد ما هينتهي به الحال فـ مكان هو مش حابب يكون فيه..

لكن فالحقيقة الإنسان مننا بيدوَّر على أسهل طريق لمجرد الوصول لوجهته، يمكن المعظم أصلًا مبيفكرش انه لما توصل هتكون إستفدت ايه وخدت معاك ايه وأستغنيت عن ايه مقابل ايه أثناء رحتلك دي؟ فـ لما وصلت المجمل بتاعك كـ إنسان طبيعي لقيت انك كسبت؟ ولا إتعلمت؟ وفالحالتين انت كسبان ومفيش خسارة، ازاي ياعم الكلام ده؟

ماهي الخسارة هتيجي لو انت مشيت زي صاحبنا ده، بشفرة .. اه زي ما بقولك كده والله .. الحياة كمان بنمشيها بشفرات زي الألعاب والكلام ده، عشان فالأول والأخر ده مبدأ .. أستخدمته فـ حاجة صغيرة هتستخدمه فالكبيرة، يعني توصل بدون تعب او ألم أو أي مجهود شخصي، هتلاقي نفسك خسرت وقتك، عقلك، مجهودك، فرصتك وجايز تكون خسرت نفسك وانت مش واخد بالك!

[zahraa17]

‏مع الوقت هتكتشف انك لما تقرر انك عايز تتجوز ف ده هيكون عشان قابلت شخص عايز تصحى الصبح تفطر معاه، تشربوا قهوة سوا، تروح الشغل وترجع البيت تلاقيه او تستناه، تتفرجوا على فيلم سوا، تحكيلوا عن رواية قرأتها وتشوف رأيه فيها.. تنزلوا تتمشوا سوا وتخرجوا وتسافروا وتنبسطوا، تواجهوا صعوبة الحياة وخوازيقها سوا.

‏لما تقرر تتجوز اتجوز شخص تعرف تعيش معاه تفاصيل يومك، تحس ان كل حاجة بتزيد حلاوتها وهو فيها، شخص بينكم تفاهم لان الحب لوحده مش كفاية لو مش هتعرفوا تقعدوا تتناقشوا وتتجادلوا وتوصلوا لحل.

‏هتكتشف ان فكرة انك تتجوز حد معاه فلوس ممكن تعملها بس هتعيش تعيس ولوحدك لو كل الحاجات دي مش ��وجودة

‏بلاقي دايمًا ناس بتكلمني بتسألني توافق على العريس المناسب ولا تستنى اللي بتحبه.

‏ساعات بيكون هاين عليا اقولها سيبيه لانه لو بتحبيه مش هتفكري تتجوزي حد غيره اصلًا بس بحاول افهمها ان الغرض من الجواز مش الجواز، الغرض من الجواز السكينة والسُكنة والأمان والمودة، دائمًا وأبدًا هكون مع نظرية أن الشخص المناسب هو اللي انت بتحبه وبيحبك وعارفين تأسسوا حياة مع بعض مش الشخص اللي معاه فلوس ويقدر يشيل.

‏ربك قادر يغير الأحوال بين ليلة وضُحاها، اللي اتجوزتيه عشان فلوسه ممكن تضيع وتبقي ضيعتي حياتك على سراب واللي اتجوزتيه لا يملك شيء ربنا يرزقه من وسع ويرزقه برزقك ويعوضكم

‏الجواز مش صفقة، ده مشروع حياة.

-لقائلها

[crazy-2m]

الراجل مننا أول حاجة بيدور ع البنت الحلوة.. بعدين بيكتشف ان الجمال مش كل حاجة بالذات لو نكدية ومفيش تفاهم.. فبيدور بعدها ع الفرفوشة اللي بتحب الهلس.. لكن بيكتشف ان المسخرة والتفاهة مش دايمين دول حبة وبيخلصوا.. فبيدور ع العاقلة اللي هتعيش.. بس بيكتشف انها هتبقى زيها زي الرجالة.. فبيفضل يدور ويكتشف ويدور ويكتشف لحد ما يكتشف انه بقا بتاع ستات 🤷🏻‍♂️