#محصلش

[sarrah]

قالوا إلزاميًا بزعيق كدا، فمكنش ينفع مسجلش السنة دي يعني 👀🤷🏻‍♀️

[zawzana1]

‏انت عارف المشكلة في ايه ؟

انك مكنتش طالع بال expectations دورين مخالف ولا حاجة .. كنت بتتمنى العادى .. ويمكن اقل من العادي

وبردو محصلش معاك ولا نولته!

[rooh-elhaya]

إبدأ يومك وأنت مقتنع أن هيحصلك حاجة ‏حلوة ولو محصلش .. عادي يعني هي أول مرة 😀

[fozdoaa]

‏هو شكلي يوحي إن تفكيري open minded بس أنا عليا قفلات وطبع صعيدي محصلش بجد

[imazikaty]

بتمني إن الكلام ده اللي اتقال دا يكون محصلش ! و بتمني إنه يكون بيقول كده عشان يكسب تعاطف زيادة مش أكتر !و ميكونش اللي حصل ده حقيقه فعلاً ..

لإن لو حصل فـ هو شىء كارثي ، إيه مدي أهمية الشغل في لحظة زي دي ! هو إحنا بنشتغل ليه ؟ هل إحنا بنعبد الشغل ! هل لما أقوم بشغلي في اللحظة اللي أبويا محتاجني فيها الناس هتشاور عليا و تقول الراجل البروفيشنال أهو !

يا جماعة أنا لحد اللحظة اللي احنا فيها دلوقتي مش قادر أتخطي وفاة أبويا والله ! فـ مش مصدق إن فيه حد في لحظة زي دي هيفضل مصلحة شغله عن حاجة زي دي !

يمكن الكلام ده تمهيد لـ رسالة مهمة ، ربك ، رسولك ، دينك ، أهلك ،أرضك دول اللي يستحقوا تتخانق و تتحمق عشانهم و تموت نفسك ! الأهلي و الزمالك مش دين ! مش وطن ! مش كتاب مُقدس ! مش شىء هيضيفلك حاجة أبدًا ولا هيخليك بني آدم كويس !

بطلوا تدافعوا عن تفاهات ! خناقة اهلي و زمالك حتي ليها حد معين ، لو تم تخطيه أقف مع نفسك ! فكر إنت موجود علي هذه الأرض من أجل إيه !

الأهلي و الزمالك و الكورة كلها موجودة عشان تبسطنا شوية ، هم موجودين عشان متعتنا اللحظية ! لكن لو هتكسب من وراها سيئة أو هتخسر دينك أو أهلك بسببها تغور ، و تغور إنت كمان وراها بجد

[na-nncy]

‏لا محصلش خير والله يسطا انا هفضل فكرلهالك طول عمري.

[zahraa17]

اول ما تختلف مع حد بتحبه وتبدأ تفكر انه ليه بيعمل معاك كده وليه مش فاهمك امسك اعصابك ثواني ومترميش عليه اللوم لوحده وفكر هو انت فاهمه؟ طيب بتحاول تفهمه؟ لو لا يبقي لازم تحاول تقربله اكتر وتفهمه اكتر ومفيش مانع ساعة صفا تشرحله نفسك وتقربله مسافتك بعد محاولاتك دي لو محصلش تغيير يبقي ده مش مكانك ولازم تمشي

-فارس محمد

[shrukk]

محصلش اي حاجه بس انا عاوزه اعيط ..

[a7med-7gag-3]

هو محصلش حاجة بس حاسس انى عايز اكتئب

[thedosky]

لو ربنا وفقني وعداني من الأزمة دي هيبقى عندي قصة جميلة بنهاية مثالية، ولو محصلش هيبقى عندي قصة جميلة برضو وهبقى فخور بيها كمان بس نهايتها هتبقى أحزن من المحتمل.

[egypt-official-blog]

إحساس الخذلان او الخداع اللي بيحصل فالعلاقات وصفته 'وردة' بالنسبة ليا وهى بتقول

"رسملي عالسما جنة فيها الهنا وقال هنعيش هنا قلت احلوت سنيني وبنالي فالخيال قصور من الامال وقال مفيش محال نمت وغمضت عيني..

ومرت الايام وصحيت من الأحلام ملقتش غير الام وعذابي مستنيني"

معرفش ازاي حد قدر يوصف بالدقة دي..

انك تحب حد وتأمنله وتصدق كل الوعود وتسيب نفسك وقلبك وفجأة تصحى من الحلم وكأن كل ده سراب وتعيش فتأنيب انك ازاي صدقت وازاي هتكمل بالالم ده وانت مكنتش مستعد ليه..

وتنهي 'وردة' بالمقطع الأجمل على الاطلاق

" لا عتاب هيشفي جراح ولا هيجيب اللي راح.. "

وكأن الحل مش فعتاب الشخص او سؤال "ليه" اللي بنكون مستنيين إجابته لأن لا الإجابة ولا العتاب هيريح ولا حاجة هترجع زي الأول..

اللي اتكسر مبيتصلحش ولا الجرح هيتبخر كأنه محصلش.♥

[re1996-r1]

التلاجة طارت!

إمبارح الساعه ٣ الصبح، صحيت على صوت بيخبط برا، ولقيت البالكونه مفتوحه، وانت ماشي رايح ناحية البالكونه لقيت سلك في الارض وطالع برا البالكونه، بتبص برا لقيت التلاجه طايره وبابها مفتوح ونور التلاجه منور من غير ما السلك يكون واصل. وفجأه بدون أي فواصل صحيت! الساعه دلوقتي ٨ الصبح، خرجت برا لقيت التلاجه مكانها بس السلك مش متوصل في الكهربا.

أكيد لسبب ما الفيشه مش متوصله، انت مش فاكر إنك فكيتها، وفي نفس الوقت إفتكرت اللي حصل إمبارح، أو يمكن محصلش. انت مش متأكد إن كنت صاحي ولا نايم، مفيش طريقه تتأكد بيها، الحاجه الوحيده اللي تفسرلك إزاي الفيشه بتاعت التلاجه إتفكت هي إن التلاجه إتحركت فعلاً، لسبب ما خرجت من البلكونه، وطارت زي ما شوفتها. المشكله إنك مش قادر تلاقي سبب إن الفيشه تكون إتفكت، وفي نفس الوقت مفيش عندك تبرير غير أطروحه معقده جداً إثباتها أصعب من إجابة السؤال عن سبب خروج الفيشه من مكانها.

لما حكيت اللي حصل معاك لصاحبك تاني يوم، قالك يمكن بيتهيألك. كلنا بنحلم وأوقات مش بنعرف نميز الحلم من الحقيقه، وحتى لو معرفتش سبب إن الفيشه إتخلعت من مكانها ده مش مبرر إنك تقبل شئ أكثر لا منطقيه عشان تبرر شئ سببه مجهول. يعني مش معنى إنك مش عارف إيه اللي خلع الفيشه إنك مضطر تسلِّم بإن اللي حصل معاك كان حقيقه وإنه هو التفسير الوحيد المتاح للظاهره.

الكلام مريحكش، خصوصاً إنك شوفت التلاجه طايره فعلاً، والمشهد كان vivid، ولسه جواك مشاعر الإندهاش باللحظه دي. لأ لأ، أكيد اللي حصل حقيقي، وأكيد هو ده سبب إن الفيشه مكانتش في مكانها. لما معجبكش كلام صاحبك، روحت تدور online ولقيت ناس كتير بتتكلم عن زيارات من الفضائيين، وقولت إنه يمكن اللي حصل كان حرفياً كده، في فضائي جه وحرَّك التلاجه، أيوه، ده تفسير مقبول، أصل إزاي التلاجه هاتطير وتنور من غير كهربا؟ أكيد الفضائي ده عنده تكنولوجيا أكثر تطوراً من بتاعتنا، أصل لو كل ده محصلش، إيه اللي فك الفيشه؟

رجعت تاني لصاحبك وقولتله اللي انت وصلتله، والمره دي معاك أدله أقوى. وكل ما يقولك بيتهيألك هاترمي قدامه إجابتين، الأولي إنه مدام ميعرفش إيه اللي فك الفيشه يبقا البديل اللي انت بتقدمه هو سبب أفضل. التاني هو إن في ناس كتير بتتكلم عن زيارات الفضائيين، ف لو عايز يقول إنها مستحيل تحصل يبقا لازم ينفي إمكانية حدوثها، ولو معرفش ينفي يبقا انت تبريرك للموقف أفضل وهو مضطر ينقطع عن الإجابه.

قولتله الطرح الجديد اللي عندك وهو قالك إنه محتاج كام دقيقه يفكر. في الوقت اللي هو بيفكر فيه روحت انت جهزت كام موقع بيتكلم عن زيارات الفضائيين وفضلت مستنيه يقول اللي عنده عشان تديله الدليل النهائي عندك. الحقيقه بعد ما فكر قالك إنه ميقدرش ينفي، أصل هاينفي وجود الفضائيين إزاي؟ المنطقي إن عبء الإثبات على اللي بيدعي الإيجاب، يعني المفروض اللي بيقول إن (١) في فضائيين و (٢) يقدرو ييجو للأرض و (٣) عندهم تكنولوجيا (٤) متقدمه ممكن تنوَّر التلاجه و (٥) تطيرها هو اللي محتاج يثبت كل إدعاء من دول. وكلمك عن ال falsifiability بتاعت كارل بوبر، بمعنى إن ما لا يُمكن إثبات عدم صحته لا يُمكن إثبات صحته، لأن ده معناه إن مفيش دليل يُمكن فحصه أساساً. وبالتالي بالرغم من عدم قدرة صاحبك إنه ينفي إدعاءك انت بردو متقدرش تثبت إدعاءك وبالتالي متقدرش تستخدمه في تفسير الظاهره محل الخلاف.

الحقيقه انت مكنتش محضر للرد ده، بس كنت محضر رد أقوى هاتقوله في كل الأحوال ... "يعني متعرفش إيه اللي فك الفيشه؟"

ف قالك لأ معرفش، ومش معنى إني معرفش إن تفسيرك بكل الإدعاءات غير المثبته فيه هو الحل. ف انت رديت عليه وقولتله إنك تقدر تثبت إن في فضائيين بإن الفيشه إتخلعت. ف هو قالك مانت كده بتعمل حاجه إسمها إحتجاج دائري، يعني عايز تثبت إن الفضائي حرك التلاجه وفك الفيشه، بس عشان تثبت إن في فضائي بتحتج بالمطلوب اللي عايز تثبته أصلاً وهو إنه موجود بدليل إنه فك الفيشه.

آخرة ما بدأ خلقه يضيق منك قالك إن مش معنى إن في شئ معندناش معطيات كفايه لتفسيره إننا مضطرين نقبل طرح يتضمن في داخله نقط تانيه كتير غير قابله للبرهنه، الجهل ب X مش مبرر لقبول ٥ مجاهيل تانيين غير قابلين للبرهنه عشان بيهم نفسَّر X. كده كل اللي بنعمله إننا بنتنطط بعيد وبنعقد السؤال أكتر، عشان منقولش "معرفش" في نقطه واحده بنضطر ناخد باقي ال package بتاعت الإفتراضات وخلاص. قالك الكلمتين دول وراح بالع كوباية ال Espresso اللي في إيده على بق واحد، بعد حرقة الدم دي.

بعد ما ركزت في كلامه كويس جداً قولتله "أفهم من كده إن معندكش تفسير لإيه اللي فك الفيشه؟".

[lsd-l]

النهاردة صحيت بفكر في فيلم البطلة فيه كانت عايزة تشتغل موديل وإشتغلت بالفعل وكانت أحلى من زميلاتها في الشغل كلهم وكانو بيغيروا منها فشخ وهي كانت طيبة وجميلة أوي فا في آخر الفيلم قتلوها وشربوا من دمها وإستحموا بيه وخلعوا عينيها وأكلوها وأكلوا أجزاء تاني من جسمها مش فاكراها إعتقاداً منهم إن سر جمالها في جسمها وملامحها وإن لو عملوا كدة هيبقوا شبهها وناجحين زيها ولكن ده محصلش ومش فاكرة الفيلم إنتهى بإيه .

[2asma]

انا من ربع ساعه بالظبط كنت بقول اليوم النهارده حلو ومن زمان محصلش حاجات حلوه كده وكنت مبسوطه اوي من قلبي بجد بس هنقول ايه بقا دنيا 😂

[esraa-el-shahat]

العلاقات الإنسانية معمولة عشان نرتاح ونتبسط ، عشان نحكي براحتنا ونقول اللي جوانا..

عشان لما نتخنق نجري نتصل بيهم من غير ما نشيل هم انهم هيلومونا ويقولوا علينا "مبيفتكروناش غير في المشاكل!"..

عشان لما نبقى مش قادرين نشوف حد او نرد على حد يفهمونا.. ولما نرجع وسطهم تاني يتعاملوا معانا كإن محصلش حاجة..

عشان نتكلم معاهم من غير ما نفكر في الكلام مليون مرة قبل ما نقول حرف منه..

عشان نحكي معاهم في كل اللي قانون "مينفعش" مانعنا نقوله او حتى نحس بيه..

عشان نبقى على طبيعتنا معاهم وعادي نسمح لملامحنا تاخد نفس شكل اللي جوانا..

العلاقات الإنسانية موجودة عشان نكمل بعض.. عشان نملى بعض طاقة إيجابية.. عشان نفرح بعض وقت الزعل ونقوي بعض وقت الضعف ونضحك بعض وقت البكا..

عشان لما نشوف رقمهم نفرح.. ولما نقابلهم نحس اننا مرتاحين.. ولما نحكي معاهم نحس اننا خلصنا م الهم ��التفكير..

احنا موجودين في حياة بعض عشان نسعد ونساعد ونساند ونريح بعض

[vincaros]

بما اني شخص في العادي مش بعرف اتخلى عن اي حاجة مالهاش لازمة باعتبار ان ممكن يجي وقت ويكون لها لازمة وده في العلاقات برضو بيحصل معايا

استغربت امبارح وانا بحذف أرقام ناس كتير مبقيناش نتواصل سوا .. وان شوفتي اهو محصلش اي حاجة لما روقنا الزحمة دي

عقبال باقي الحاجات اللي مالهاش لازمة يارب