#عشان الحب

[4fcvv]

أنا أترجاك لاتنسى لياليّ الحب وسنيني

وحـاول لأجل حبي لك إنك ماتخليني

عشان الحب وإللي بيني وبينك

[osamawael]

ماتصدقش إن فيه حد بيحبك ومش بياخد باله من حالتك النفسية المتغيرة.. ولا إن حد يكون شاري خاطرك ومش قلقان على أحوالك اللي متوترة

الحب تركيز.. الغلاوة تفاصيل صغيرة.. العزوة أولوية

طول ما اللي قدامك مش قلقان على قلقك.. طول ما اللي قدامك بيتهمك بالدلع أكتر ما يحاول يتطمن عليك.. طول ما اللي قدامك مش واخد باله من تغيّر قلبك عشان زحمة حياته.. يبقى فيه مليون علامة استفهام فيه.. مش في دلعك زي ما بيحاول يخليك تقتنع

اللي بياخد باله من وجعك من غير ما تقول.. شايلك جواه في أغلى مكان.. والعكس صحيح

رفيق عصام

[lolaa-253]

يارب كل الابهات اللي في الدنيا تزرع الاستحقاق في بناتها وتحبهم وتدعمهم وتديهم ثقه في نفسهم عشان ميقبلوش فتات الافعال والمشاعر بعد كده من اي حد غريب لو خدت كل الحب اللي في الدنيا بس مخدتوش من اهلك عمرك ما هتحس بيه وهتطلع هش نفسيا وشايف ان اي حاجه كتير عليك

[persephoneeisback]

دايمًا بشوف ان الlevel الأعلى من الحب في أي علاقة إني أقدر أحكي بكل أريحية عن هواجسي الغير منطقية، وأفكاري الغريبة، ومخاوفي اللامبررة، وأحلامي الصغيرة، كأني بحكي مع نفسي من غير م اشيل هم الي قصادي هيشوفني ازاي، من غير م احتاج أحاسب ع كلامي عشان متفهمش غلط.

[smallbutkindcouch]

مفيش معروف ممكن الإنسان مننا يعمله في نفسه أكبر من إنه يصدق إنه يستحق الحب .. عشان لما يجيله الحب يعرف ياخده، مش يخاف منه، ويجري وديل الجلابية في سنانه زي عبيط القرية..

[yooo-gehn]

اتجمع شوية خبراء للعلاقات في جامعة إدنبرة، وعملوا دراسة كان هدفها تحديد أثر الأفلام الرومانتيك كوميدي على الطريقة اللي بنشوف بيها الحب. وجابوا 100 متطوع خلوهم يتفرجوا على أشهر الأفلام دي، وبعدها سألوهم عن رأيهم في الحب والرومانسية. والباحثين توصلوا لأن الأفلام دي ممكن تفسد حياتك العاطفية، لأنها بتقنعك بتصورات غير واقعية عن الحب، زي إن القدر لازم يجمعك مع حبيبك ومسيرك تلاقي نصك التاني، وزي إن حبيبك عنده قدرة سحرية في أنه يعرف احتياجاتك من غير ما تعبر عنهم.

وانتهى الباحث، اللي كان اسمه كيمبرلي جونسون، إلى المحصلة دي: "يمكن للأفلام تجسيد إثارة العلاقات الجديدة، ولكنها تمنح تصورًا خاطئًا عن أن الثقة والحب يولدان بمجرد لقاء الأحبة، في حين أن هذه المشاعر تتطلب أعوامًا لتوطيدها."

والأسوأ إن بعض المشكلات النفسية (زي التعلق المرضي أو المازوخية أو حب التملك) بتتعرض في الأفلام بطريقة رومانسية بتجملها، وبتعلقك من غير ما تاخد بالك بأشكال غير صحية للعلاقات، وبتخليك مش قادر تفرّق بين قبول الطرف الآخر، وبين اعتبار تحمل أذاه اللانهائي جزء أصيل من الحب.

وأنا في رأيي إن نص المشاكل اللي بتحصل في العلاقات بتبقى ناتجة عن سوء التواصل. سوء تعبيري عن احتياجاتي وسوء فهمي لاحتياجات حبيبي. تخيل مثلاً أني بتكلم عن أحمد ومنى. أحمد عايز يتحب بطريقة معينة، عايز يتفهم بطريقة معينة، عايز حد يهتم بيه بطريقة معينة. وفي نفس الوقت، منى ليها طريقتها الخاصة بيها في الحب والفهم والاهتمام، والأزمة كلها بتحصل لما أحمد يبقى عايز يتحب بطريقة مختلفة عن الطريقة اللي منى متعودة تحب بيها الناس.

وكأن أحمد بيطلب عصير مانجا، هايموت عليه، فمنى تقدمله أحسن عصير فراولة عندها. بس أنا عايز مانجا؟ خد فراولة. بقولك عايز مانجا!! لأ خد فراولة. فأحمد يقولها والله يعني تسلم إيدك، بس أنتِ بتديني اللي أنا مش محتاجه، عشان هو ده اللي بتعرفي تعمليه. فمنى تبالغ أكتر، وتضحي أكتر، وتقضي 3 ساعات برضه بتعمل عصير فراولة أحسن! والخناقة في الآخر بتبقى انتي ليه مش بتقدميلي المانجا اللي أنا محتاجها؟ وأنت ليه مش مقدر الفراولة اللي أنا بقدمهالك؟ وتبقى علاقة فخفخينا.

عشان كده بدون وعي بنفسنا بنفضل نلف وندور في فلك نفس الخناقات اللي عمرها ما بتتغير، عشان كده الجهل مش نعمة. عشان كده الاهتمام بيتطلب. لازم على الأقل واحد فينا يبقى واعي باللي بيحصل ده، ومنى مثلا تقول تصدق فعلاً أحمد عايز مانجة بس أنا بتاعة فراولة، ولازم نتفاهم، لازم نوصل لحل وسط يرضينا إحنا الاتنين، ممكن أنا أتعلم أعمل المانجة، وممكن أحمد يقدّر إن الفراولة هي الديفولت بتاعي، ويشوف لو يقدر يصبَّر نفسه بيها لحد ما أبقى شاطرة في المانجة.

أصل مالهاش حل تاني. الحب والتآلف بين اتنين مش بيحل مشاكلهم بشكل سحري، مش بيلغي حقيقة إن كل واحد فيهم شخص مختلف عن التاني. وساعتها بس المشاعر بتقدر تنقذ العلاقة، لما مش بنستخدمها عشان نُضفي رومانسية بتموت ببطء، ولكن عشان نحل مشكلة في العلاقة اللي بيني وبينك.

وأعتقد هو ده الفرق بين شخص بتحبه، وشخص بتحبه وبتحب عشرته. الشخص اللي بتحبه ومش سامعك ومش فاهمك ومش مهتم بيك زي ما أنت عايز، لما شهر العسل بيخلص، بتعد الساعات لحد ما يمشي. لكن الشخص اللي بيتعلم عشانك يعمل المانجا اللي بتحبها، بيكون كفاية بس تسمع صوته في الأوضة التانية فتحس بالألفة والونس.

[cherryvanillas-world]

جماعه حد يتكرم و يقوله اني بحبه الحب دا كله عشان اختكم مكسوفه اروحله واقوله ..

[nadamuhammmed]

ممكن أعرف بتلاقوا الحب فين، عشان مش بلاقي في حياتي غير الدكاترة

[rooh-elhaya]

كلمتين ع الماشي

بمناسبه عيد الحب اللي بعد يومين تقريباً 😍

مش هقول إحنا المسلمين عندنا غير عيدين بس واحنا عارفينهم عيد الأضحى والفطر لأن الكلام ده كلنا عرفينه

بس هقول أن إحنا المسلمين سيدنا النبي صل الله عليه وسلم علمنا الحب

والي عايز يتعلم الحب بجد يقرأ عن سيدنا محمد في مواقفه مع زوجاته

معروف اد إيه كان بيحب السيدة عائشة وكل المواقف رومانسيه ... ومش هي وبس لا كمان في مواقف كتير مع كل زوجاته

وهيييييييييييييييييييييييه 😍

قال الرسول صلى الله عليه وسلم: "أطعم إذا طعمت وأكس إذا اكتسيت

رواه الحاكم وصححه الألباني

يعني متاكلش غير لو هي كلت ومتجبش لبس جديد غير لو هي جابت كمان يعني متحسسهاش أنها قليلة وحسسها أنكم واحد وزي بعض في كل حاجه حسسها #بحبك

الرسول الحبيب صل الله عليه وسلم كان بيقول عن ستنا خديجة "أنى رزقت حُبها"

رواه مسلم

يا الله علي الجمال 😍 الحب رزق

يعني

ملناش يوم معين نحب فيه بعض ياشباب احنا نبينا محمد صل الله عليه وسلم

معلمنا الحب يعني أيامنا كلها حب في حب لأن ده هو الحب ... اما الي بيختاروا يوم يحبوا بعض فيه

دول معندهاش حب غير في أيام معينه مش دينا

إحنا غيرهم ودينا غيرهم

أيامنا ممشينها بروتين شديد فافقدنا فيها الحب 💔 للأسف

الحب مش شرط يكون بين ولد وبنت ممكن بين بنتين أصحاب والله عادي وممكن بين الأخوات عادي بردو 😁

طيب جربوا كده في أي يوم تقولي لأي واحده من صحبك بحبك ... أول كل يوم وانتي معايا أو أي كلمة حلوه ☺ والله فرحتها بتكون كبيييييييييره اوي والقلب بيها بيدق بيطير من الفرحه 💚

أما عن يوم الحب لو قولتي لأي حد بحبك هايحس الكلمه روتين عشان اليوم بس 😊

جربوا تحبوا بعض كل يوم أو كل كام يوم عشان متملوش 😂 صدقوني حياتكم هاتتغير 💚

[katoisha11]

الانسان مينفعش يحب في أسبوع ولا في شهر ولا حتي في سنة ..الحب عاوز مشاكل ، عاوز أزمات ، عاوز تعب ، عاوز فترات سيئة ومواقف بشعة ، عاوز عشرة طويلة عشان يبقي حب ..

يعني بأختصار" الحب يبدأ عندما ينتهي الحماس "

#مثلا #حقيقة

[cutyrozy]

بقيت أشوف إن الحب مش إنك تهد الدنيا عشاني ، ولا إنك تعمل مستحيلات عشان تبهرني . الحب ممكن جدا يبان في كلمة حلوة بعد زعل ، في لمسة حنينة بعد تعب يوم صعب ، في دعوة من قلبك ، في أكلة ولا مشروب سخنين في عز البرد ، في حضن يساعك لو الدنيا ضاقت عليك ، في نظرة تقول أنا جنبك وحاسس بيك 🫂 أصل الصعب ممكن يتعمل من باب الواجب مهما كان مستحيل . إنما كل الحاجات الهينة دي لو إنت مابتحبش مش هتعملها وهتبقي هي المستحيل بعينه 🙍🏻‍♀️

{ إحنا مش دايما محتاجين مواقف مبهرة .. إنما دايما محتاجين ونس و حنية و مشاركة } 💙💙

#amany_alaa

[imazikaty]

مصطفى إبراهيم .. ف قصيدته - تفرانيل - بيقول: " ماليش ف البنت طلبات غير .. تنسيني اللي قبليها " .. دي الجملة الوحيدة ف القصيدة اللي كل ما اسمعها اقول لنفسي لأ .. مفيش حد بينسي حد يا مصطفى .. مفيش علاقة بتعوض علاقة .. مفيش بصمة روح بتتكرر .. مفيش بني آدم مش ضعيف .. مفيش حد كامل .. مفيش فايدة من العند مع القدر .

الإنسان .. بينسى لإنه مخلوق كدة .. option ربنا حطه ف كل واحد فينا عشان يقدر يتجاوز المرار اللي هيشوفه ف مراحل عمره .. على كل المستويات ..

المشكلة ف انك تكون مريض بالذكريات .. هي انك بتفقد اهم option فيك كبني آدم .. المرض ده للأسف ليه نوع من الألم مفيش كلام يوصفه، وما يحسوش إلا الناس اللي بتعاني منه، ودول مش كتير .. لإننا ف عصر السرعة .. النسيان دلوقتي بزرار .. هي بلوك يا معلم، وخلاص خلصت ..

ماشي يا باشا .. انا معاك للآخر .. لو كل الحاجات بزرار ..

زرار بلوك القلب منين؟

تعرف تقولي؟!

الحب الحقيقي .. مش نوع من أنواع المحن .. خالص .. الحب الحقيقي حرب .. السنين اللي الواحد ممكن يضيعها من عمره ف التمسك ب حبل أ��ل دايب .. هو أولى بيها .. ماشي انا موافق، وعارف كل ده .. لكن فكرة انك تاخد قرار بالتجاوز .. دي ف حد ذاتها مش موجودة .. مش إنت اصلا اللي خدت قرار إنك تحب .. ربنا شاء إنك تحب فلان .. فحبيته .. الحب مش قرارك كبني آدم .

كل العلاقات اللي مبنية على حسابات .. نقدر نسميها شراكة .. لكن ما نقدرش نسميها حب .. جايز تكون الشراكة انجح من الحب لإن العقل بيتحكم ف جزء كبير منها .. لكن الحب .. احلى .

مشكلة الحب من اول نظرة .. انه ابتلاء .. زيه زي المرض كدة .. قدر اتكتبلك يوم ما قلبك اتخطف اول مرة .. ما بيتكررش مش عشان هو مش موجود .. لأ .. هو موجود بس نادر .. والبني ادم عمره اقصر من ان قلبه يتخطف مرتين ..

الخطفة الحقيقية .. ما بنشوفهاش ف العمر إلا مرة واحدة وبس ..

يا صابت .. يا خابت ..

الشخص اللي بيتجاوز حكاية بحكاية .. قدامة حاجة من اتنين .. يا بيتجاوزها فعلا، وهنا تبقى حكايته الأولى مكانتش حقيقية بالقدر الكافي .. يا ما بيقدرش حتى لو حاول بمليون طريقة مش بس بحكاية تانية .. وهنا برضه قدامه حاجة من اتنين .. يا بيعرف انه غلط .. وبيحاول يصلح ده .. يا بيكابر .. وكل اللي بيكابر بيخسر .. ومش معنى ده ان اللي بيحاول يصلح بيكسب .. اوقات كتير فيه حاجات ما بتتصلحش .. بس ع الأقل المكسب الوحيد هنا .. هو انه هيبطل يحاول .. مش هيقدر ينسى ده طبيعي .. لإن الحب الحقيقي بيعيش .. بس ع الأقل هيعيش .. حتى لو هيعيش ميت .

عشان كدة ..

لما تلاقي نفسك .. مريض بالمرض ده ..

اوعى تجرب غير الدعا .. قول:

" يا رب .. انت اللي ابتليت قلبي، وانت اللي قادر تنجيه او تريحه "

وجود الناس حوالينا مهم .. بشرط .. الناس لازم تكون ف أقرب مسافة بعد آمن .. لإن القرُب مؤذي ..

زمان، ومكان زي اللي احنا عايشين فيهم دلوقتي دول .. مفيش حد فينا متزن او سوي .. خلينا نعرف بعض من بعيد لبعيد، ونسيب نفسنا للزمن .. خلينا أبسط من كل ده .. الدنيا مش مستاهلة، وكدة كدة النهايات كلها واحدة .

[zahraa17]

بطل تتمرع على اللي بيحبك عشان الحب مش دايم وبكرة لما يبطل يحبك هتقعد تدبدب في الأرض

-لقائلها

[vincaros]

٢٠٢٤ كانت سنة قاسية عليا جدا فقدت ناس كانوا مهمين في حياتي بشكل كبير بس كان لازم افقدهم لان رصيدهم انتهى عندي واحترامي لذاتي كان أهم

وفقدت سارة اللي كانت افضل داعم وأكتر شخص فاهم أمومتي واقدر اتكلم معاها في اي حاجة منغير ماتحكم عليا واخرج مبسوطة وحاسة بامتنان ورضا وكل المشاعر الحلوة اللي خلقها ربنا.. سارة علمتني أعظم دروس الأمومة وهي "الحنية" واه الأمومة مش شيء غريزي .. بس أنا معرفش الحنية في حياتي الصراحة .. فسارة علمتني ازاي اكون حنونة .. وكل مرة بحس ان عاوزة اكون قاسية .. بفتكر سارة وهي بتقولي "الأطفال كائنات ضعيفة" .. "الاطفال لازم يكونوا مبسوطين ومرتاحين".. والله يا سارة مفيش حد عرفته أحن وألطف منك ومش هلاقي ابدا.. اااه يا سارة فيه حاجات كتير اوي عاوزة اخد رأيك واناقشك فيها لإن رأيك أهم رأي بالنسبالي

اتعلمت كمان ان سعادة الانسان باختياره "مش بتكلم عن الناس اللي بيمروا بأزمات وظروف صعبة أو مشاكل نفسية لان دول محاربين وأبطال بجد"

الانسان قادر يكون مبسوط وراضي لو قرر يعمل ده هيشوف انعاكسه على الناس اللي حواليه اللي بيحبوه فعلا وهيلاقي اثره في ردود فعلهم معاه .. وطبعا بينتج عنها احترام اكبر وتقدير لذاته

سوء الظن من ابشع الحاجات اللي كان ممكن تبلع كل حاجة حلوة جوايا .. لأن الاسوأ من سوء الظن هو انه بيتبعه تصرفات دفاعية مؤذية جدا جدا جدا

الكلمة الطيبة والابتسامة دول أهم وأجمل وأعظم الحاجات اللي لما بقدمها لحد بكون مبسوطة وهو مبسوط

قعدت فترة سنة مثلا بعد ماولدت باسل مكنتش بركب غير اوبر عشان مش بعرف اتحرك بيه لوحدي .. بس لما بخرج لوحدي واركب مواصلات واشوف البؤس والقرف والفقر اللي منتشر في البلد برجع مخنوقة ومتضايقة .. ادركت ان لازم لما ب��سل يكبر شوية معودوش ع العزلة والمواصلات السهلة .. ولازم يتعلم يشوف العالم ويشفق على الناس وحالهم ويتعاطف معاهم ويقدم دعم ومواساة عشان يحافظ على انسانيته

الحب فن زي أي فن .. لازم الانسان يتعلم ازاي يحب وازاي يقدم دعم وازاي يبسط اللي بيحبهم ودي مهارة صعبة جدا على شخص مكانش متصل بمشاعره زيي .. بس مش مستحيلة

التحضير والتجهيز لأي شيء وانتظار الجو المناسب قبل مانبدأ ماهو الا مضعية للوقت.. اكتشفت ده وانا قعدت فترة بسوف ان اقرأ حاجة وبتلكك بالمود والهدوء اللي مبقوش موجودين في حياتي مؤخرا .. لقيتني فجأة بمسك الموبايل في اي فرصة افتح أبجد وانغمس في اي كتاب موضوعه يهمني بكل سهولة منغير تحضير كإني بتناقش مع حد ومنتظره رده مثلا

العالم بشع وسيئ ولعين وابتلاء كبير وكل حاجة فيه سيئة بس لازم نعيش ونكون مبسوطين ونقتنص الفرص ونتجاهل الحاجات اللي بتإذينا ونبعدها عننا .. ونتنفس ونرقص ونحب ❤️

[marmarika-world]

‏"الرحمه" دي شيء أعمق من الحب بكتير ، ناس كتير مننا قادرين يحبوا لكن قليل جدا اللى بيعرف يرحم ويحن على اللى حواليه، الرحمه حاجه حلوه اوي من عند ربنا، ومافيش ابشع من الناس اللى قلوبهم بتعرف تقسى ،مافيش أبشع من اللى بيعرفوا يجوا على غيرهم ،عشان كده ربنا قال "فويل للقاسية قلوبهم"

[elsoltansworld]

دكتورة في الجامعة سألت الطلاب بتوعها : هل الحب احساس ولا اختيار ؟

اغلب الردود كانت إنه احساس ...

الدكتورة كان ردها إنهم لو فضلوا مقتنعين إنه احساس فقط ، علاقتهم باللي بيحبوهم هتنتهي بسرعة .

بعد كده حكت لهم عن استطلاع عملته على ناس متزوجين ومطلقين ...

قالت إن كل اللي شاركوا في الاستطلاع ده اعترفوا إنهم جاتلهم لحظة في حياتهم والحب اللي كانوا بيحبوه للطرف التاني اختفى أو على احسن تقدير ، قل كتير عن الأول ... إن كلهم مرت عليهم لحظات ما كنوش فيها سعداء مع شريك حياتهم ... كلهم اعترفوا إن المشاعر شيء متغير جدا ، ومش منطقي إنك تبني حاجة عاوزها تعيش العمر كله على اساس مش ثابت زي المشاعر

لما سألوها طيب لما كل الناس بتحس بده ، ليه في ناس جوازتها بتكمل وفي ناس اتطلقوا ؟

قالت إن اللي لسه متجوزين في الاستطلاع قالوا إنهم لما حسوا الإحساس ده قرروا يتكلموا مع شريك حياتهم ويوجدوا لغة حوار مشتركة ، اختاروا يعترفوا إن في مشكلة وإنهم محتاجين يلاقوا لها حل ... اختاروا يعملوا حياة تستاهل إنهم يحبوا يعيشوها

اللي اتطلقوا قالوا إنهم قرروا يمشوا

وده الفرق بين الحب كمشاعر والحب كعَهد !

سهل إنك تحب حد وتتوتر وقلبك يدق بسرعة وتفرح بمشاعر البدايات ... سهل تقع في حب حد في الأول وكل صفة فيه جميلة وكل تصرف منه مُبهر وكل عيب فيه مستور بنور الافتتان ...

الصعب إنك تلتزم بالحب ده ! إن لما بريق البدايات يتطفي تلاقي نفسك لسه حابب صحبة الشخص ده ... إن في عز ما الدنيا وحشة ، إنت لسه عندك القدرة إن تلاقي فيه حاجة تقع في حبها ... إن لما تتعب أو تزهق في النص ، تقدر تبص لشريك حياتك وتحس إنك عاوز تتعب عشان تحتفظ بيه في حياتك ... والأصعب إنك تلاقي حد هو كمان عاوز يتعب عشانك ... حد يختارك زي ما أنت اختارته ... ويفضل يختارك مهما الحياة اتغيرت ...

في واحدة من اللي حاضرين قالت :

( مابقتش خايفة إن اللي كان شايفني دُنيته كلها في يوم يصحى ومايشوفش لمعة عيوني لما ابص له ... طول ما هو هيصبر كفاية إنه يدوّر لحد ما يلاقيها تاني ).

كان في واحدة دايما بتقول لي إن بالنسبة لها الحب هو الصُحبة ... إني لو فكرت هلاقي إن أبونا آدم - عليه السلام - شخصيا كان نفسه في الصحبة والونس والسكن ، فربنا خلق أمنا حوا ...

الحب عندها هو اختيار واعي منك إن في شخص معين- دونا عن بقية خلق الله - يستاهل إنك تتعب عشانه ويستاهل إنك تبذل مجهود عشان تحتفظ بيه في حياتك ... شخص واحد قلبك اختاره إنه يولّف حياتك على حياته وفي المقابل قلبه كمان اختار كده .