#ربنا معاك يا حب

[bluehour0]

وهبة دي توكسيك

[sho3aibi]

نهايات مارس،

شهري المفضل،

ذكرى ميلادي وميعاد ربيع حياتي!

بختم الشهر بإني مش رايح المستشفى وهنضم للإضراب الموجود حالياً، كونسالتنتس مرضى نفسياً بتعامل معاهم وأنا معنديش طاقة أستحمل أهاليهم!

الواحد كان بيستنى مارس عشان "يشم" ويشوف كل صور الحياة وهي بترجع تاني بعد برد الشتاء وجوّه القاتم،

لكن هنا غير، لا قادر أشم الربيع ولسه الشتاء مكمل.

بدأت رمضان بدور برد صعب وتقيل أوي على النفس، مش عارف مصدره ايه!

غزة، وأحوال المسلمين اللي تقطع القلب في كل مكان، أحوالنا احنا وسكوتنا وعجزنا وقلة حيلتنا، قفلت كل حاجة تقريباً فيها أخبار من كتر ما حاسس إني هيجيلي سكتة من بشاعة ما بشوفه، وبردو ما بقدرش إلا كل لحظة والتانية أشوف حصل إيه، خايف اتلهي وأضحك وتكون المصايب لسه شغالة، رحمتك بعبادك وبينا يارب!

يمكن التعب من الحالة اللي كنت متابعها من أسبوعين قبله، حالة الـ TPE أو Total Pelvic Exenteration اللي هو كده بشيل أي حاجة قدامي، الرحم وعنقه والمبيضين وقناتي ��الوب وكل الـ female genital system والمثانة وال sigmoid and rectum وأي حاجة قدامي مشتبه فيها cancer. منظر صعب وانت شايف إنسان مُفرَّغ بهذا الشكل!

وعملية تقيلة وصعبة لأي مريض، وطويلة تستمر لثمان ساعات تقريباً ويشترك فيها أكتر من فريق جراحي ..

المهم إن ال recovery بتاعت الحالات ده طويل وبيعتمد بشكل كبير على حالة المريض ما قبل العملية وعوامل كتير منها سنّه ووزنه وال performance and frality status، غالباً لو المريضة كبيرة في السن ووزنها كبير ومبتقدرش تمشي- وده الأغلب- يبقى مضاعفات أكتر واستشفاء بطيء، وده ما كانت عليه الحالة، بعتنا مزارع وطلعت تقريباً كل ال organisms المعروفة لدرجة شكينا إن يبقى فيه زي ناسور داخلي fistula كده وهو ما استبعدناه بالأشعة المقطعية ذات الصبغة، والمزارع اللي طلعت اعتمدنا على ريحة ال Pseudomonus الفظيعة اللي كانت مالية المكان في اختيار نوع المضاد الحيوي،

بدّي للبروف فيس ماسك في المرور لقيته مستغرب هل انت مدّهوني عشان الحالة infectious ولا لإيه؟

قولتله لا عشان فظاعة الريحة بس وتقدر تفحص البيشنت كويس، متخفش كده كده الريحة قوية أصلاً هتقدر تشم، بس للأسف كالعادة لا يفهم منطقي !

غريب الراجل ده، أنا بحب شغله وحابب أتعلم منه، بس هو لا يسمح إلا بما أراد فقط أن يعطهولك ولا يعطي إلا نادراً، مغرور لأبعد حد .. قالي مرة خدها قاعدة :

You snooze, you loose!

قلتله تمام، وايه قاعدتك للفوز؟ قالي لما تعرف I am never wrong! قولت في نفسي اممم على وضعك يا معلم بوسة وركنة جنب الحيط ده تمامك.

بعدها بكام أسبوع ببلغه في ال team brief إن فيه مريضة حد شالها الـ IDC وهي عاملة ureteric stent واضطرينا نركب القسطرة تاني ونعمل CT عشان نطمن إن محصلش مشاكل؛ طلع إن هو اللي كان أمر بكده وقال بشكل عابر إنه نسى وغلطته وطبعاً لا يمكن التعليق عليه!

معنديش مشكلة على فكرة، أنا مؤمن يقيناً إن اللي ربنا آته علم لازم يبقى متواضع وإن مفيش حد كبير على الغلط طول ما ممكن نتدارك الغلط ونبلغ المريض باللي حصل ولو تضرر نعرض عليه كل الأوبشنز المتاحة قدامه إنه يتخذها فيما نسميه بالـ duty of candour ، بس لما يكون أكبر واحد فينا مش مقتن�� إنه ممكن يغلط .. ده في ذات حده مصيبة!

من الحاجات الجميلة اللي أنا لسه مبدأتش أعملها كتير وهو موضوع الـ reflection .. إيه انطباعك من اللي حصل وحصل ليه وإيه اللي اتعلمته وإيه الإجراءات اللي هتاخدها عشان تمنع تكراره في المستقبل، رغي كتير بس مهم.

كنت بعمل الابريزال السنوي فسألني الـ appraiser عن significant event حصل معاك خلال السنة اللي فاتت، وأنا أساساً ماشي جنب الحيط مع الحالات لأن مفيش مجال للإستهرار أو الخطأ، it's zero tolerance.

قالي يبقى أكيد فيه حاجة غلط، لازم يبقى فيه خطأ وإن كان مش على مستواك الشخصي فيبقى على مستوى الفريق ككل!

بالرجوع إلى حالي الشخصي، فالإنسان غارق فعلياً في الخطأ، مفتون في حب الدنيا وشهواتها ومشتت بالدخول في هذه الأبواب عن السير على طريق الله المستقيم، حال كل إنسان بداخله ذئبان يتصارعان أحدهما يدعوه للخير والآخر للشر، وسينتصر الذي تطعمه!

وده يرجعنا لنقطة ازاي نحس برمضان، فأنا شايف عشان أقدر أوصل للروح العالية كان المفروض يبقى فيه تجهيز من قبله في رجب وشعبان، حال أي رحلة لازم يبقى فيه تجهيز وإعداد وتدريب وممارسة، لكنها لعنة الـ procrastination يا اسمك ايه!

أناعندي شعور كده إني معدتش عايز أشتغل، فقدت الشغف، نفسي أرتاح فترة -طويلة- أرتب فيها نفسي وأسترجع روتيني وأشحن نفسي وبعدين أشوف عايز أعمل ايه بس -وآسفاه- ده مش قابل للتنفيذ! بس عادي هنفضل نحاول إن شاء الله لحد ما تُظبط!

على صعيد آخر، النهارده العصر قابلت واحد مصري ولقيته بيتقرب مني وإنه ساكن في لندن وجاي هنا المسجد كنوع من أنواع الدعوة وإنه عاوز يتكلم معايا شوية بعد الصلاة، وهنا ارتبت وأخذت أتحسس مسدسي..

لقيت بعد الصلاة بيشاور لحد تاني-أعتقد إنه غَمَز- وفجأة تحاوطت بأربعة أو خمسة وهنا أدركت إن ده لا .. ده شغل جماعة وخدت من ده كتير!

قعدوا يتكلموا كلام غير مترابط، مفيش رسالة معينة بس اللي هما بيخرجوا أربعين يوم دعوة ما بين المساجد وعايزيني ابقى كده وقالولي حاجة كويسة إني أدعي ربنا إنه يديني الوقت ده أو بمعنى يبارك في الوقت، سألتهم كجماعة جهاد ودعوة، ردوا بإنهم تبليغ ودعوة، وللأسف كالمعتاد الغاية جميلة بس بدون علم كافي، وأنا بردو لا عندي علم كافي ولا يحزنون، بس أقدر أفرّق كويس بين اللي أقدر أتناقش بيه عن علم وبين اللي عنده كلمتين بجهل والمناقشة هتبقى تضييع وقت وحرق دم!

مشيت مع كتير أيام الجامعة أبحث عن الحقيقة، أهل سنة ودعوة سلفية واخوان، للدرجة إن حد شبهني بـ سلمان الفارسي، كان الأمر غريب إيه المشكلة أحضر دروسك ودروس غيرك مش كلنا مسلمين ! كل جماعة بشرية مهما كانت فيه منها الصالح والطالح، أنا هاخد منك ما ينفعني وما أتشكك منه أتحقق منه، والخلاف مشروع ما بين كل الأئمة وده لا ينقص منهم، ليه كل حد بيدّعي إن هو الصواب المطلق وما خلافه شرك وتحريف وفسق، وهنا بتكلم بالضرورة عن أي حاجة مرجعها كلام الله ورسوله وبسند صحيح!

عدت بحس إن الجماعات كله بيدعوا للمذهب لا لدين الله الإسلام الخالص النقي، منهمكين بالخلاف وسايبين الغاية نفسها أصلاً! اتعلمت إني أكون حر في رحاب الله، وإن اتخذت دليلاً فياحبذا لو تلميذاً بين يدي عالِم حقيقي!

العلم بالله بحر كبير محتاج دراسة وبحث وتدقيق، وهنا بييجي صمت .. خير من كلام ليس عن علم. ثرثرة كتيرة بس شوية أفكار محتاجة تتأرشف!

27032024

-

ولا تمدن عينيّك إلى ما متعنا به أزواجاً منهم زهرة الحياة الدنيا لنفتنهم فيه ورزق ربك خير وأبقى

28032024

[es-r-aa7]

صباح الخير

الاول عايزة اقول اني بقرأ كل الاسكات اللي بتيجي سواء حد بيحكي لمجرد الحكي او حد طلب اني مردش على الاسك ، او حتى ساعات في اسكات انا بحب أحتفظ بال��د لنفسي.

انون اللي خطوبته قربت .. شكلك محتاس وتايه - والمرحلة دي دا شكلها عموماً متقلقش - اعتقد انكوا في مرحلة ما بعد الانبهار العيون اللي بتطلع قلوب ف ممكن مش قلة حب بس خلاص بقى في stabilization للمشاعر.

الوضوح والمشاركة مهم جداً جدأ ف المرحلة دي لأن انت بيبقى عليك ضغوطات والتزامات- وفي حاجات قابلة للتغيير مش قرآن يعني - والمشاركة والكلام معاها بيخليها هي نفسها تقول بلاش دا او مش مهم دا او ممكن بعدين ، لانها بتحبك وعارفاك ف مش دي التفاصيل اللي هتبقى مهمة عن الشخص نفسه.

يعني لو كان صالونات كنت هفهم احراجك ف انك تتكلم ف دا او تمسكها بالمبلغ الفلاني ، لان ببساطة انتو لسة بتتعرفوا على بعض ومفيش ضمانات .

وبما ان في خطوبة يعني اتكلمت مع أهلها وانت ادرى هل في تأثير خارجي عليها من قبل الآهل في النقطة دي ولا لا.

فكرة ان في شقة وعفش ووضع اقتصادي متأزم- ربنا يعينك ويرزقك برزق حلال طيب يا رب - يخلي النقاش ف النقطة دي منطقي اكتر .. اللي هو المبلغ دا هيكون رايح ف الحتة دي دلوقتي ، هنعمل بيه كذا عشان الفلوس اللي هايجي منه نوضب بيها كذا للانجاز.

حقيقي حاول تتكلم معاها وتشاركها افكارك ف النقطة دي - وهي لو عاقلة وفاهمة وفعلًا واثقة فيك هتقدر دا جداً - ممكن يكون حد مفهمها صورة مغلوطة.

لو هي بقت تمام والموضوع ف الاهل ف وقت كتب الكتاب مثلاً بيبقى في حاجات بتتكتب ممكن تكتب ان هي ليها مبلغ كذا دهب او كام جرام دهب وفي كل الأحوال زيتكوا ف دقيقكوا يعني 🥹

ممكن يكون دا من الآهل عشان مش مطمنين ليك لسة ف بيحفظوا حق بنتهم دا شئ وارد .

اعتقد ان الاتفاق والكلام ف الموضوع دا مش محرج ، عشان ياما حصلت اتفاقات وراحو يشتروا الدهب ف عجبها حاجة اغلى من المبلغ المتفق وبقوا يضغطوا ع العريس ويعني مستخسر الكام ألف دول والموضوع بدأ بمشكلة اصلاً ف مش بيبقى لذيذ.

الإتفاق من البداية مهم .. لو شايف انك اديت كلمة وتنفيذها هيزنق معاك حاول تأجل او تستنى شوية.

مش لازم خطوبة يعني - أسرّوا الخطبة - والله هتشيل مشاكل وحوارات كتير ودي نصيحة عن تجارب.

حاجة كان مفروض ابدأ بيها .. صلّي استخارة كتير وتحديداً ومن حاسس بتوهة .. ادعي ربنا يارب انك تعلم وانا لا اعلم .. تقدر وآنا لا اقدر وانت علام الغيوب.

ربنا يرزقك الخير يا رب و يفرح قلبك وييسرلكم الدنيا على خير.

وابقى طمني ان الدنيا عدت بسلام بإذن الله

[lsd-l]

شهر 10 اللي فات،

اتوفت إنسانة كانت من أغلى الناس في قلبي بلا سبب،

طنط ليلى، مش قريبتي .. مش جارتي

لكنها والدة جارتي، المرأة الجميلة التي توفت في عمر يناهز الستين، ذات الشعر الطويل الجميل والعيون الطيبة

طنط ليلى كانت بتسكن في بلد قريبه من بلدنا، وكانت بتيجي تزور بنتها وتشوف أحفادها في نهاية كل أسبوع وتيجي تقعد معانا وضحكتها تدخل السرور والبهجة في قلوب كل اللي في الشارع مش في قلبي ��نا و بس، وكانت دايماً تشبهني بالملايكة وتناديني ب "جميلة الشارع"، كانت ست منتمية جداً لبيتها وبلدها وربنا رزقها ببنت واحدة، اللي هي جارتنا، وبنتها ربنا رزقها باتنين توأم، فا كانت حياتها مقتصرة على جوزها وبنتها وأحفادها الاتنين اللي كانو كل عمرها وبتخليهم يتحلوا بكل صفاتها الجميلة،

جوزها، رجل سبعيني يعاني من بعض أعراض الزاهيمر المبكر، كان راجل متعب جداً وعنيد ولكنها كانت بتحبه حب صادق كان بيبان في عيونها وهي خايفه عليه وبتقوله "وبعدين معاك يا عزت ياحبيبي ومع قلة سمعانك للكلام"، عمو عزت كان عنيد جداً مش بيرضى ياكل ولا ياخد أدويته ولا بيسمع كلام حد،

ماعدا طنط ليلى، كنا دايماً نتحايل عليها تيجي تقعد كام يوم وتبات في البلد عشان نشبع منها، لكن كانت دايماً ترفض وتقول "عزت مش بيحب يسيب البلد ومش بياخد باله من نفسه وبينسى ياخد دواه، مش هقدر أسيبه لوحده" وكانت كالملاك الحارس

وفعلاً رغم ان عمو عزت كان دايماً تعبان الا انه لما كان بيبقى معاها كان بيكون في أحسن حالاته الصحية ويقدر يجري كمان، كان طفلها المدلل هي دايماً كانت بتقول عليه كدة،

طنط ليلى كانت سليمة وماكانتش بتعاني من أي أمراض مزمنة أو ما شابه، وكانت ست رقيقة وتحب تتفرج عليها وهي بتتعامل، بسكوتة أو وردة رقيقة كدة ..

في يوم تعبت على غفلة ودخلت المستشفى مكملتش يومين وتوفت بسبب انسداد الشريان الاورطي في القلب

كان وفاتها خبر صاعق وصدمة بالنسبالنا كلنا،

الا انه كان شئ مختلف بالنسبة لعمو عزت، أغمي عليه يومها لما تلقى الخبر وفضل يبكي عليها أيام بصوت عالي ورافض الأكل والدوا والشرب، جسمه كان رافض الحياة وعقله وقلبه رافضين يعيشوا من بعدها، كانت دايماً يبكي ويقول سايباني لمين ياليلى، سايباني لمين وانتي الوحيدة اللي كنت بتفكريني بنفسي، كان منظره يقطع القلب، عدى أسبوع والتاني، عمو عز�� حالته اتدهورت تماماً، رافض العيشة وبيتمنى يموت عشان يشوفها، رافض الدوا ..

الزاهيمر زاد، نسي أحفاده، نسي بنته ونسي الصيدلية بتاعته ولكنه كان دايماً يردد إسم ليلى، كان فاقد كل شئ في الحياة ورافض حتى بنته، بنته ماستحملتش وحطته في دار مسنين من شهرين بالظبط بعد مارفض العلاج وبعد مافضل يزعق كل يوم بالليل وهو نايم على طنط ليلى، لحد من إسبوع ..

اتصلوا بيها وقالولها ان هو وقع ودخل في غيبوبة، وكان قبلها بيومين بيقول انه رايح لحبيبته ليلى، وانه عمل اللي يقدر عليه عشان يتأكد انه هيشوفها في الجانب الجميل لانها كانت من الملايكة،

لحد ما دخل الغيبوبة وفضل اسبوع في العناية المركزة تحت الأجهزة لحد ماقلبه توقف عن النبض تماماً، وراح لحبيبته ليلى ..

عمو عزت رفض الحياة بعد طنط ليلى، لإن هي كانت كل الحياة ب��لنسباله، توفى قبل السنوية بتاعتها، وبعد عيد ميلادها لان عيد ميلادها كان في شهر 9 ..

لما توفى أنا فضلت أفكر، معقولة من حبه ليها لحقها؟

معقولة هي فضلت تناديله عشان يونسها؟

هو مات من الحزن عليها ..

ودي كانت اول مرة أصادف قصة حقيقية كدة قدام عيني ..

ربنا يرحمهم يارب ..

[mr-wolfenstein]

الانون السري...

انت عاوز تكون High Value Woman.

اعذرني علي الانجليزي بس اقصد انك عاوزه تكوني امراة ذات قيمة عالية.

بص يا انون انت محتاج 3 حجات.

الاولي هي ال Plan يعني خطة.

تقعد مع نفسك تكتب انت عاوز توصل ل ايه تحديدا وخليك دقيق جدا. يعني انا عاوز انجح في دراستي. انا عاوز اوصل لهدف معين في حياتي. عاوزه اشتغل مبرمجة مثلا.

خليك واثق ان كل حاجة سهل تتعمل. احنا في واقع ان كل حاجه متاحة وسهلة. كل حاجه عاوز تتعلمها موجود و مش بعيده وصعبة. الفكرة كلها ان معظم الناس كسلانة ومعندهاش شغف.

انت محتاج تكتب افكارك في ورقة وتشوف انت عاوز توصل ل ايه.

بعد كدا انت محتاج تعرف ان مفيش حاجه هنوصلها الا عن طريق الافعال.

Only through actions we can move forward.

يعني مش هتحقق اي حاجه عن طريق التخطيط ولا عن طريق الكلام. ولا عن طريق الكتابة. مش هتحقق حاجة غير لما تشتغل فيها وتبذل فيها مجهود.

لو مش هتاخد خطوة عمرك ما هتوصل يا انون. عمرك ما هتتحرك لحظة واحدة قدام.

العمر ده مجرد رقم يا انون. ملوش علاقة ولا مردود خالص ولا معني سنك ده صغير او كبير ان خلاص راحة عليك. في ناس كتير وصلت وهي كبيرة. عندك مثلا الراجل صاحب شركة ford بتاعت العربيات. كان شغال نجار وبعد كدا كان عنده فكرة و صمم عليها لحد ما اخترع العربية بالمواصفات دي وقدر يحقق ده في سن كبير.

مش معني اننا كبرنا اننا خلاص روحنا ماتت ومش هتقدر. بالعكس السن بياثر علي الجسم. لكن انك توقف تعمل حاجة حلوة او فيها قيمة ده بياثر علي الروح.

لازم تعرف ان كل حاجه فيها الم. كل حاجة فيها معاناه. كل حاجه فيها مجهود. لو كل حاجة سهلة كانت كل الناس بقت عظيمة.

بس حقيقي اللي بيوصل هو اللي بيستحمل. هو اللي بيسهر. هو اللي بيتعب. هو اللي بيتغلب علي الظروف. هو اللي بيعافر. غير كدا طول ما انت بتشتغل علي نفسك بطريقة عادية ومريحة هتبقي شخص عادي ومريح.

طول ماانت بتتغلب علي تعبك والمك وعندك عزيمة تكمل هتبقي شخص استثنائي محصلش.

انت انون مؤمن بالله وعارف ان ربنا قال وان ليس للانسان الا ما سعي. وان سعيه سوف يري. ثق ان ربنا مش هيضيع تعبك ابدا وهيقف جنبك وهيسندك وهيساعدك تبقي احسن.

فيه طرق تحفيز كتير. من ضمنها و بحب استخدمها انك وانت تعبان ومش قادر و خلاص هتستلم. افتكر كل المواقف الوحشة اللي هتحصلك لما تبطل. افتكر انك هتبقي فاشل وشخص سيء. افتكر ان الناس هتبصلك بصة الشخص المهزوم. افتكر انك هتبقي دمرت نفسك. افتكر كل المرات اللي وقعت فيها وملقتش حد يسندك عشان انت كنت ضعيف ومقدرتش تسند نفسك.

لازم تعرف يا انون ان مفيش حد جاي ينقذك ولا انا اقدر انقذك ولا اي حد يقدر ينتشلك غير نفسك.

لازم تعرف انك الشخص الوحيد اللي يقدر ياخد بايدك ويقدر يخليك اعظم شخص موجود.

لازم تعرف ان اللي مخليك مكانك هو كسل وشيطان وتعب.

لو قدرت تتغلب علي كل ده هتبقي شخص عظيم. و خليك عارف ان 99% من البشر مش بيقدروا يتغلبوا علي الحجات دي.

لازم تعرف انك الشخص الوحيد اللي متحكم في حياتك وبايدك تخليها عظيمة او عادية او مش موجودة. لو متحركتش دلوقتي مش هتتحرك تاني ومفيش حد هيجي يحركك.

الموضوع صعب مش سهل. بس الموضوع مش مستحيل. الموضوع ممكن بس انك تضغط علي نفسك.

انت محتاج مثابرة اول 21 يوم بس. وساعتها انت مش هتعرف توقف. عشان هتعرف ان نفسيتك بتبقي في السماء لما بتشتغل علي نفسك. وانك بتحترم نفسك لما بتحقق شيء كويس. وانك بتحب نفسك. وانك شخص كويس. وانك مش هتقدر تبطل عشان لو بطلت هتلاقي روحك بتموت. وانت هتقدر تكمل.

تالت حاجة يا انون.

حب نفسك يا انون

حب نفسك وخد بالك منها. ومتسناش حد يديك حب خالص يا انون. ولا من صديق ولا حبيب. لو استنيت ده هتتعب يا انون. اكتفي بحالك. وخليك عارف انك انسان عزيز وغالي. و انك لواحدك احسن مية مره من مع حد.

قرب من ربنا وصلي وادعي وارقي نفسك يوميا. وخليك لو قربت من ربنا هتعرف ان ربنا احن من اي حد. واحسن من اي حد. واقرب مصدر سعادة اكتر من اي حد. وان لو اصلحت ما بينك وبين الله. ربنا هيصلح ما بينك وبين نفسك وبين كل شيء.

واعرف ان راحتك النفسية في قراءة القران وسعادتك في الاذكار والصلاة. وان لا ملجا من الله الا اليه.

وربنا يعينك يا انون وانا معاك لو عاوز اي مساعدة

انا بعتذرلك اولا اني مش هقدر ارد خاص. انا عندي اسبابي وحقيقي هكون ممتن علي تفهمك.

تاني حاجه خليك واثق ان كل كلمة بعتها هتعتبر سر وانا بعد ما هجاوب عليك همسحها من عندي عشان تكون مطمن ونفسيتك مرتاحة

[lucid-dreamer-0]

الإنسان بيعيش حياته كلها بيحاول يتشاف، من وهو بيبي وكل شوية يعيط ويخبط راسه عشان يتشال، لحد ما يكبر ودوايره توسع عن بابا وماما ويكتشف إن كل دايرة الفاليديشن بتاعها بيتوصله بطريقة مختلفة عن التانية، سواء بقى عن طريق إنه يشتغل أكتر، يقدم حب أكتر، يثبت نفسه واستحقاقيته أكتر، الناس بتفضل تسمي كل ده بمسميات مختلفة لكن في الحقيقة إنها كلها محاولات مستترة لنيل الفاليديشن، انت عايز تتشاف يا بيبي ف متحورش.

باخد كورس بيرسوناليتي الفترة دي ووصلنا للشخصية الConscientious، اللي كنت اعرفه عنها قبل كده انهم الناس المنظمين اللي بيشتغلوا بذمة أوي وممشين كل حاجة بنظام وروتين، خصوصًا إن الد��تا بتقول إن أكتر الناس نجاحًا في الحياة هما اللي عندهم النوع ده من الشخصيات (تاني أدق indicator للنجاح بعد الiq)، واللي هو طول عمري كنت بقول أنا بعيد كل البعد عن باترن الشخصية دي ومليش فيها نصيب، بس في الكورس اكتشفت العكس.

باترن الشخصيات دي بيتقسم لجزئين: orderliness وده له علاقة بالروتين والنظام والحاجات دي، والجزء التاني هو الناس الindustrious ودول مش بيشتغلوا عشان المكافأة زي الناس الextrovert ولا عشان يتجنبوا العقاب زي الناس الagreeable، دول بيشتغلوا عشان ميحسوش إنهم يوزليس وملهمش قيمة، بوم بوم.

مشكلة الرغبة في إنك تتشاف هي إنها زي أي حاجة نفسك توصلها مبتبقاش قيمتها في ذاتها وبس، يعني عارف مثلا لما كنت عامل ليست في دماغك للسولميت وكنت بتقول إنها لازم الكلام معاها يكون سهل وبيفلو كده، وبعدين تروح تقابل واحدة وتلاقي الكلام سهل والكونفيرسيشن بتفلو والدنيا زي الفل، بعدين تقرب منها اكتر وتلاقي انها كده مع الناس كلها، مش مسألة كيمستري معاك ولا حاجة، لا انتوا الاتنين بتعرفوا تتكلموا وبس مفيش حاجة سبيشال زي ما كنت فاكر، فتقوم راجع لليست بتاعتك في دماغك وتزود: الكلام معاها يكون سهل وبيفلو "معايا بس".

نفس الفكرة مع الفاليديشن، كنت اعرف ناس شايفني جامد فشخ بس بالنسبال�� الفاليديشن بتاعهم مكنش محسسني بحاجة، عشان كنت شايفهم برضه بيدوه لناس تعبانة، فاللي هو نو ثانكيوو .. فترجع لليست اللي في دماغك وتزود عليها عايز اتشاف "من الناس الصح".

تريكي اوي الحتة دي عشان انا متأكد إن كل واحد فينا عنده ناس، أو بلاش دي عشان التعميم، أنا متأكد إني عندي ناس لو لاقيتهم بيصقفولي بعرف مليون في المية إني ماشي غلط، واللي هو استنى كده يكابتن أما اشوف أنا بعمل إيه غلط طالما الناس دي مبسوطين مني أوي كده.

وفي نفس الوقت الواحد لازم يتعود على ما هو عكس الفاليديشن من الناس اللي مش صح، معرفش عكس الفاليديشن إيه بصراحة بس هنمشيها الرفض فور ذا سيك اوف زيس بوست.

واحد من الكتب القليلة اللي قريتها 3 مرات في حياتي، هو كتاب المختصر للفيلسوف اليوناني ابكتيتوس، واللذيذ إن كل مرة بقراه بكتشف حاجة جديدة لانج، يعني لما قريته اول مرة وعجبني رشحته لواحدة صاحبتي، وبعدها يومين جت تقولي الكتاب صعب اوي ومعقد، قولتلها ساعتها ما انتي متعودة على كتب ادهم شرقاوي (يعع) هستنى منك إيه يعني هيهي.

بس لما جيت اقراه للمرة التانية طلع صعب ومعقد فعلا هي مبتكدبش، وبعدين لما جيت اقراه للمرة التالتة (الشهر ده) اكتشفت فيه كونسبت جديد لانج أول مرة يعدي عليا (ولا كأني قريته قبل كده مرتين)، ابكتيتوس بيسميه ثمن الوليمة.

ابكتيتوس كان بيواسي صاحبه (أو نفسه منعرفش) عشان القيصر معزموش على الوليمة الملكية في القصر، وبيقول لصاحبه إحمد ربنا إن القيصر معزمكش وإلا كنت هتضطر تدفع تمن الوليمة، فصاحبه قاله تمن إيه يعمنا انت فاكر القيصر هيحاسبني على تمن الاكل الملكي؟ ده كله ببلاش.

قاله وهو انت فاكر إن فيه حاجة في الدنيا ببلاش يا ابو عمو، انت اه مش هتدفع تمن الوليمة بس هتدفع تمن العزومة تملق للقيصر وتطبيل وسماع كلام، فقبل ما تفكر في العزومة المجانية فكر في تمنها المش مجاني.

نفس الكلام على فاليديشن الناس الغلط، قبل ما تعيط على إنك مش واخده بص على تمنه الأول من تلزيق وتمثيل وعمل حاجات مش شبهك، وساعتها اسأل نفسك هل انت فعلا عايز الفاليديشن ده ولا بالنسبالك ملوش قيمة وميستاهلش تمنه؟

[esraaxoxo]

النسخة الحالية اسعد نسخة في حياتك؟ دا انت حطمتني

اسعد نسخة في حياتك عايش سعادة كبيرة؟ هتتجوز؟ حياتك هتستقر معاها؟ هتتجوز وسنك كبر وعايز تتجوز؟ ومبسوط بيها وهتبقى مراتك؟ هتتجوز خلاص؟ وكنت عايزه اقابلك؟ الحمد لله انه محصلش هتتجوز؟ هتبقى متجوز وبعيال وانا سنجل لوحدي؟ وانت حياتك ماشية حلو بطبيعية معاها؟ ومبسوط ؟ قمة السعادة؟ معاها؟ معاها؟ مبسوط؟ اكبر انبساط في حياتك؟ اكككبر انبساط في حياتك؟ هتتجوزها؟ وعايزني ابقى صاحبتك؟ وانت متجوزها؟ وانت بتقولها بحبك بالليل والصبح والعصر؟ عايزني ابقى صاحبتك؟ البعد عنك غنيمة قلبي مش هيستحمل هتتجوزها؟ وحياتك هتمشي في كورس طبيعي وانا مش قادرة امضغ اللقمة؟ هتتجوزها كدا؟ مبسوط خالص كدا ؟ النسخة الحالية اسعد نسخة ؟ هتكمل معاها هتحضنك؟ ليل ونهار؟ اتنفس ازاي؟

ربنا مهون عليا ربنا مخليني عندي امل في مستقبل أفضل وحاجة حلوة في الطريق ربنا هيهون عليا ويعملي حاجات حلوة ربنا هيريح قلبي ويقدرني اتنفس ربنا هيريح قلبي خالص ربنا هيعيشني حلو انا عندي يقين فيه بس خايفة عشان حاسة اني على شفا حفرة وهوا مبسوط هوا مش هيقع م الحفرة هوا مستقر وبيستقر ورايح على طريق الاستقرار الكلي وانا هقع

علمتني الحياة عمري ما اقارن نفسي بحد ولسه فاكرة ايمان وسماح في اولى كلية وباقي السنين كنت طول ما انا في طريقي انا اهدى واحسن منهم كلهم بس زعلانة اوي انه هيبقى كدا وانا كدا هيا مش مسابقة بس مش عارفه استحمل انه سابني بالبساطة دي وهيستقر كدا وانا وضعي كدا وهوا عارف وعايزنا نبقى صحاب انا مفتقداه خاااالص بس مفتقدة نبقى مع بعض مش هوا اسعد ايام حياته وانا في حفرة معفنة مستنقعية كدا انا بجد زعلانة انه بيتكلم عنها ع التايملاين كتير زعلانة بجد حتى لو شوو زعلانة عشان دا اللي انا شايفاه منهم الحب وانا مش عندي طاقة اني استنى هيقف ولا لاه انا مش فيا حيل للانتظار انا زعلانة بجد زعلانة منك والله العظيم يا عزت وحاسة اني صغيرة اووووووي عشان كدا مبسوطة بقرار اني مكلموش تاني عشان مديني كرامة انا مش صغيرة انا حد كبير وله قيمة مش صغير جنبك انا مش ههين نفسي معاك جنبها انا استاهل تحترمني احترام حقيقي مش كلام ع الوش انا بجد زعلانة انه انهم بيحققوا امنياتي وانا قاعدة كدا بيعيشوا احلامي ولاد اللذينة وانا في مستنقع بيعيشوا احلامي مبسوطين اسعد فترات حياتهم وانا مكتئبة كدا انا حزينة خالص مش عايزة ابقى باثيتيك قدامهم كمان انا شاطرة وحلوة وجميلة وقيّمة متعملش فيا كدا متهينيش كدا انا مش خفيفة انا غيرانة م التايملاين اووووووووي غيرانة اوووووووي عايزة كل حاجة عايزة الحب دا عايزه الحنان عايزة المشاركة عشان الاعتراف عايزة الاستقرار عايزة الاستقرار عايزة الاعتراف عايزة العلنية عايزة الطمأنينة عايزة الامان عايزة سندة الكتف ومسكة الايد وبوسة الراس عايزة الحضن عايزة الطمأنينة عايزة حياة طبيعية مع حد مش متنمر حد بيطمني ويسعدني وميعيشنيش في حرب عايزة اعيش اسعد فترات حياتي مع حد انا كمان هما بيحققوا احلامي وانا اترميت ع الجنب بكل إهانة وقسوة واستخفاف انا عايزه حب عايزة حب ضروري وعايزة راجل في حياتي وعايزة وجود صلب قوي يطمني ان كل حاجة هتبقى تمام وانه خايف عليا وانه عايزني مرتاحة ويبص في عيني هما واخدين كل دا وانا بائسة في المستنقع هوا استخف بيا اوووووي ودا فوّق جروح انا كنت عايزاه كان هوا اللي بيخفف ألم الجروح كان هوا كل حاجة عندي كل حاجة ليا كان هوا كل حاجة عندي كان هوا كل حاجة عندي دلوقتي هوا بيعيش اسعد فترات حياته مع واحدة انا مبحبهاش ومبطيقهاش ووحشة وحشة خاااااالص اااه يا الله اه يا عيني اه يا قلبي م اللي شفته انا مش عارفه هخرج من دا ازاي وانا اتعمل معايا كدا وبشوف كدا بقا اسعد ايام حياتك؟ بجد؟ معاها؟ سعيد؟ اوي؟ هتتجوزوا؟ هتعيش في حب وهنا؟ وانا هنا؟ في المستنقع؟ مش بتحبني؟ بتحبها اكتر؟ هيا؟ هيا؟ هيا؟ هتموفوا اون بحياتكم للمستوى التاني؟ هتبقوا مع بعض ؟ هتتخطبوا؟ هتلبسوا دبل؟ هتبقوا كويسين؟ بدبل؟ وانا ايدي فاضية ؟ وفي مستنقع ؟ اسعد ايام حياتكوا؟ يعني ايه سعادة دا السؤال اللي بساله من كتر ما انا العكس بينما انتوا سعداء كدا .. انتوا اسعد ايام حياتكوا؟ وانا مبسوطة بوجبة؟ بتقولوا بحبك ؟ عارفين واحشاني الطمانينة قد ايه طيب؟ الوم مين على حالة قلبي؟ انا عمل فيا كدا ازاي؟ عايش اسعد ايام حياته؟ هيجنني اسعد ايام حياته الكلمة دي ��تحرق مش عارفه اوصف بتعمل ايه انا زعلانة اوي اسعد ايام حياتك ؟ اسعدها؟ اسعدها يا عزت؟ معقولة؟ معاها؟ انا كنت قليلة؟ دا جذر المشكلة انا كنت قليلة؟ هيا عملت ايه احسن مني؟ هتستقر معاها وتعيشوا في بيت واحد ؟ هتبقوا لبعض؟ وانا طيب انا ليه اصلا في اللعبة دي انتوا مع بعض في حياة بعيدة عن عيني انا مالي بس انا قلبي حزيييين انا مالي بس تخيلكوا بيخليني حزييينة انتوا بتعيشوا كل اللي انا محتاجاه مش بس عايزاه مش بس عايزاه انا في احتياج لدا والا ألم شديد بقا اسعد ايام حياتكوا؟ حاسين بكل اللي انا نفسي فيه؟ نفسي ربنا يرحمني عشان مش عارفه اعمل ايه في كل دا نفسي ربنا يرحمني نفسي نفسي نفسي عارفه ربنا بيستجيب قعدت ادعيه يارب اعرف اتنفس بعالج حساسية اهو وهعرف اتنفس بحد يارب اتجوز جوازة حلوة قريبة يارب تعبت اوي عايزه حد اقرب منه زي ما قربت من عزت صعب اوي يا رب بس انت العظيم مفيش حاجة صعبة او بعيدة عليك انا نفسي اعيش اسعد ايام حياتي ��ارب انا زعلانة منهم اوووووووووووي يارب حلوين اوووي وانا حزينة حزينة حزينة هما حلوين اووووي يارب يارب يارب يارب يارب اني مسني الضر وانت ارحم الراحمين لا اله الا انت سبحانك اني كنت من الظالمين يارب سارب في ارجوك يارب يا ارحم الراحمين ارحمني يارب صعب اوي صعب اوي كل دا صعب مينفعش مش قادرة استحمل اللي هما فيه

[darkinside2511]

بيطاردني هاجس أن دي نهاية الرحلة و أن ماتش الأعتزال خلاص قرب خايف أرمش بعيني اللي بقت ناحلة لتفوت اللحظة و تقل الساعات عقرب سايق العمر أعمى و مطوح أيديا قدامي البحر و ف ضهري الجبل عارف هيسبني و يجي المحطة الجاية بزود السرعة متحمس بيأس الأمل السما بتمطر ورود جاية تنعيني قلبي بيرفرف كما كان وداعة حمل كل المناجل و الغربان بتدعيني ألم الدنيا صعيب.. ألم الموت يُحتمل بتودعني نجمة كانت بتونسني م الشباك و بتبكي عليا نور ف ليالي الصيف بتقولي هفتكرك و أدعي ربنا يفضل معاك كات إقامتك أليفة و خفيفة يا ضيف بتودعني قصيدة سيبتها ف عز الكلام مكملتهاش لجل عيل كان بيبكي ف خيالي و واسيته كات عن ليل و بنت سمرا و طفل برضو زيه عاش عاش يحارب أمل زي اللي زمان أسيته رُد روحي يا "سلام" زي م أنت زمان هديتها لولا خوفي ع رضاك كنت أنا اصلا ناهيتها بس لجل شئ خفي أنسلخ م الليل سبيل و أهو نجيت من الغيب نصيب لجل رايدلي أكون خيبت آمال الملاك الحايم حواليا كما العادة رغم دا زود ف حزني الا أنه زاد عقرب زيادة سبت نفسي للجناين تين و زتون و زادي فيها كله كان حب و شجون و راجع لأوضتي اطمن نجمة الشباك و نشرب كاسين نبيت من دمع العيون

[ma7moud-5allaf]

ايه اللي يخلي حد يفلت ايده منك، وهو عارف انك شاريه وعايزاه وانك بتحبه، ويفضل حد تاني عليك وتهون عليه عشره سنين! ليه

ياريت ترد عليا ف بوست وابقي امسحه هكون ممتنه ليك.. كان نفسي ادخل احكي معاك بس مش هقدر غير انون

يا لهوي يا أنون يا لهوي .. طيب لو نفترض إن البيه مفلتش ايده إيه بعد كده؟! أو نخلى السؤال بصورة أكثر عمومية إيه بعد الحب؟! .. خليني أصدمك وأصدم السادة القراء إن بيانات الإحصاء بتقول إن نسبة الطلاق أعلى بكتييييير في الزواج عن حب مقارنةً بالزواج المُرتّب أو ما يُسمى بجواز الصالونات .. والإحصائيات دي عالمية وعلى أكتر من بلدها وكلها بنفس النتايج تقريبًا .. وأزيدك من الشعر بيت إن نسبة كبيرة من الطريفين قالوا إن الحب تحول لكره بعد فترة من الزواج .. وسهل إن أي حد يتأكد من الكلام ده ببحث بسيط على جوجل .. بيت القصيد إن الحب وحده لا يُقيم بيت وأسرة .. وإن غالبًا خيارات العقل المنطقية في الموضوع ده أكثر أمانًا واستقرارًا .. فالإنسان المفروض يحفظ مشاعره لليوم اللي ينادى فيه منادٍ من المسجد القريب لمنزلك ليُخبر أهل الحي والأحياء المجاورة أن فلانة بنت فلان صارت زوجًا لفلان ابن فلان .. وقتها بقى عيشوا الحب والرومانسية.. أما سيولة المشاعر والاستيكرز والإيموجيز اللي مليانة قلوب ودباديب رايحة جاية على الشبكة طول النهار والليل دي مترضيش ربنا .. وطبيعي إن كل واحد يفكر إن قصته مختلفة وإن فلان مش زي فلان بس لا فلان زي فلان وقصتك صفحة من كتاب كل الصفح فيه شبه بعض .. يا أنون فوق لنفسك وتخطى اللي حصل وأحمد ربنا إنها جت على قد كده واحفظ نفسك ومشاعرك للي يحترمك ويحترم أهلك ويجيلك البيت من بابه.

ربنا يجعلنا أزواج صالحين ويجعلكم زوجات صالحات ويرزقنا وإياكم الحلال والذرية الصالحة.

[light-intothedarkness]

اسم الله الحي القيوم.

"يا حي يا قيوم برحمتك أستغيث، أصلح لي شأني كله ولا تكلني الى نفسي طرفة عين"

ذِكر بنقوله كل يوم مرتين في أذكار الصباح والمساء غير لو دعينا بيه في باقي يومنا او في صلاتنا، بالذِكر ده احنا بنستمد الحياة من ربنا بنستمدها من المصدر الوحيد للحياة والحي الوحيد في الوجود، اي حد عشان يفضل عايش ربنا هو الوحيد اللي يقدر يمده بالطاقة اللي تخليه يستمر، ولا حد فينا يقدر يكمل من غير اسم الله الحي، الحي يعني الكامل في صفاته واحنا ناقصين عشان احنا بنكبر وبنعجز وبنموت، الحي الوحيد اللي مبينقطعش عنك كل اللي حواليك ممكن يجي يوم ينقطعوا عنك او يبعدوا بسبب ظروف سفر او وقت، او في ايامك العادية متلاقيش حد صاحي حواليك تشكيله او وقت ما تحتاجه يبقى صاحي عشان حاسس بيك مع انهم بيحبوك جدا، بس ربنا الوحيد اللي حاسس باللي جواك، اللي شايف تعبك، اللي موجود حتى لو كل الدنيا انقطعت عنك، بمجرد ما تقول يارب في اي ساعة وفي أي مكان يقول لك لبيك عبدي، في أي وقت حاسس بيك وجمبك

واي حاجة عشان تكمل لازم تتعلق بالحي وبايمداده، وانت نفسك متقدرش تكمل الا بالحي.

الحي اللي بيمد اجهزتك كل يوم من غير ما تحس بالحياة عشان تفضل في صحة لان المرض هو ان حياة تُسلب من عضو عندك و ينقطع امداد الحياة ليها، لو كلية انقطع امدادها بالحياة "فشل كلوي" لو نقطة دم وقفت ومتحركتش "جلطة" لو عصب من الأعصاب مات "شلل".

الحي اللي لو اتعلقت بيه هيخلي في حياتك حياة، واحسن حاجة ممكن يديها ليك هي حياة القلب، وانه يديم امداده لقلبك بالسكينة والطمأنينة والرضا بقضاء ربنا، وانك مهما كبرت يكون لسة جواك خير و مهما عدى عليك تكون لسة روحك حلوة وحابب حياتك، ومن ضمن حياة القلب انك تحب ربنا وتحب طريقه وذِكر ربنا يكون بيطمنك وايه حاجة تطمنك اكتر من ان الحي بنفسه معاك، فيارب احيي قلوبنا بذِكرك.

اي حاجة تنقصك لا تسأل من هو زائل، اسأل الحي الذي لا يموت، ربك حياته كاملة وتامة ومعندوش حجات ناقصة، لو انت عندك نقص في اي حاجة، توسل لله وقول يا كامل في حياتك كمل لي ما ينقصني، لان كلنا عندنا نقص طباع صفات ابتلاءات ثغرات في حياتنا حجات متعلقين بيها تعلق مرضي.

فا بنقول كل يوم الصبح وبليل (يا حي يا قيوم برحمتك استغيث) يعني يارب خليني استمر في الحياة احفظلي حياة قلبي وعقلي واعضائي، يا كامل في حياتك وقيوميتك اكشف عني كربي وكمل لي نقصي، لان الحياة الكاملة تستوجب صفات الكمال، احنا حيات��ا ناقصة فا محتاجين الامداد ده.

القيوم اللي مفيش حد يقدر يقوم بشؤون كل ذرة في الوجود غيره، كل حاجة تحت هيمنته وسيطرته، اللي يقدر يقوملك اي حاجة ويظبطلك حياتك وتفضل قايم متقعش، دائم المدد في رزقك في حب الناس ليك في سترك في صحتك، اللي ممشيك مخلي ايديك تتحرك وقت ما تحب ومخلي ودنك تسمع ومخليك تتحرك في الاتجاه اللي انت عايزه، اللي يقدر يبدء حاجة من جديد حتى لو مفيش امل ولا في اي اشارة حواليك ان اي حاجة تمشي، متحكمش بسنن الكون على ربنا لانه خالق السنن دي وقائم عليها وقادر على تغييرها.

القيوم القائم على شؤون عباده حباً وعناية، يعني كل اقداره فيها حب ورعاية ليك، اللي بيقومك بعد ما تقع وبيقوم اي حاجة ممكن تقع، حتى وانت نايم قائم عليك وعلى حركتك وعلى حفظ بيتك واهلك، قائم على حركة كل ذرة في الكون من اول الكواكب لحد حركة الخلايا اللي جواك، هو اللي بيدي كل حاجة قوتها، بيمدك بالقوة الذهنية والبدنية حتى الافكار والابداع والفهم بيمدك بيهم، هل القائم على كل شئ كده واللي قوم السماوات فوقك مش قادر انه يقومك بعد وقعة؟ مش قادر يقوم حياتك بعد فشل او قرار غلط؟ مش قادر يرجع ضحتك وحياة قلبك تاني؟

فا لما يحصل لك اي ظاهرة من ظواهر الانهيار او الوقوع في حياتك، ارفع ايدك للسما وقول يا حي يا قيوم برحمتك استغيث اصلح لي شأني كله ولا تكلني الى نفسي طرفة عين..

واصلح لي شأني كله يعني يارب صلح لي كل حاجة كل جوانب حياتي مادية صحية علاقتي بالناس حتى علاقتي بيك، صلح لي قلبي نفسيتي اخلاقي قراراتي وديني.

ولا تكلني الى نفسي طرفة عين.. يعني انت يارب لو سبت تدبير امري لنفسي انا هضيع، انا ولا حاجة من غير تقويمك لحياتي وامدادك، ولا هقدر اروح ولا اجي في حياتي الا بيك.

واسم الحي القيوم موجود مش بس في الذِكر ده، ده موجود في أعظم آية في القرآن الكريم آية الكرسي، الآية اللي بتحفظنا وبتضمن لينا استجابة الدعاء وبتضمن لينا الجنة والامان باذن الله.

[ala-mhmd]

مساء الخير يا انون .. بمناسبة موضوع اختك

سن المراهقة للبنات محتاج اشباع احتياجاتها عناية واهتمام جدا جداا من حب وخروج ودفى جدا جدا وفيه نقطة مهمة جداً انها هتبدء تحس انها انثى وجميلة وتستحق انها ترتبط وانت فاهم مقصدي .

انت دورك ايه مع اختك !! دورك انك تصاحبها وتخليها تحكيلك كل شئ حتى لو كانت غلط ١٠٠ % خلي جواها دافع انها ايا كان الغلط لل عملته تحكيلك.

اتكلم معاها واحكيلها وانت في سنها كنت بتعمل ايه وشوية شوية هتتجرء هي وتحكيلك .

لو هتحكي لامها والأم متفاهمة وهتقدر تحتويها معاك قول بس ياريت بهدوء مش لازم اهانة جامدة عشان اما تحس انها غلطت وانتم عرفته وفهمتوها ال عملته هتبدء تطمن واي حاجة بعد كدة هتحكي .

وفهمها انت دماغ الشباب عاملة ازاي وبيفكروا فالبنات الل بيصاحبوهم ازاي وانك لسه صغيرة علي الامور دي ومفيش شب هيتجوزها بدون م يدخل البيت .. لاغي اختك كتييير وحاول بجد تحتويها البنت فالسن ده مش محتاجة غير احتواء احتواء احتوااء من هنا لحد م تعدي وتدخل الكلية مرحلة الخطرة فالمراهقة بعد كدة هي مخها هيوجها .

ده لل اقدر افيدك به .

ربنا يحفظ البنات جميعا يارب

[sayed-soliman]

مش عارف ايه الي حصل وهما بيحضروا الفطار، فقالت لبنتها روحي يا شيخه الله يعكنن عليكي عيشتك.. البنت اصلها بطيئه شوية وهي بتحضر الفطار او بتتدلع.. فـ امها قالتلها كده!!💔

بس الحقيقة هي الام مش قالت، هي الام دعيت، دعيت على بنتها بالعكننه، وسبحان الله الام كأنها تحرت وقت إجابة.. اجابة الدعاء! دعوة الصائم حين يُفطر..

تفتكروا الدعوة دي لو استجابت، الي عملته البنت يستحق الدعوة دي!

معلش دي كلمة مش مقصودة وانا كنت متعصبة!

معلش!! معلش ايه!

النبي صلى الله عليه وسلم نهانا اننا ندعي على ولادنا،

عارفين نهانا ليه؟ تعالوا احكيلكم..

واحده هنا على الفيس بتحكي عن ام كان بتدعي على بنتها ان ربنا يحرق دمها، الدعوة استجابت.. والبنت جالها سرطان في الدم..

اب كان دايما قال لابنه ابن الـ 17سنة وهو نازل الهي ما ترجع، الولد مرجعش..

اخت بتحكي على ان امها قالت لاخوها وهو نازل روح ربنا يبتليك بمصيبة، اتاخد وهو ماشي في الشارع، ومش عارفين هو فين!

والاب الي بيقول لابنه انا مش هستحمل اعيش معاك كتير، وفعلا معاشوش مع بعض كتير، وكان بيكلم نفسه في الجنازة وبيقول كانت امنيتي وربنا حققهالي!

دي نقطة من بحر دعاوي اهالي على ولادهم استجابت.. ونقول معلش! متعصبين!

الاولاد كانوا فعلا مشاكسين او متعبين، بس هل كانوا يستحقوا الدعوة دي!! قصف عمر ومرض واعتقال!

مش هنسى مره لما واحد قال للمدرب: متحاولش انا مش هبقى صالح، عشان انا امي دعيت عليا وهي كانت بتاعة ربنا فاكيد استجابلها..!!

متخيلين الام دي زرعت في ابنها ايه طول حياته!

انا امي دعيت عليا.. الكلمة دي بقيت تتسمع كتير قوي على فكرة.. وإنا لله وإنا إليه راجعون..

زي الست الي جت المسجد تسأل عن كفارة دعائها، فبيسألوها يعي ايه كفارة دعاء! قالت انها كان بتدعي على بنتها بوقف الحال والبنت فعلا متجوزتش وبتحكي ان بنتها في مره انفجرت فيها قالتلها عملتلك ايه انا عشان تحرميني ابقى عروسة واني ابقى ام، عملت ايه استاهل تدعي عليا كده.. والست عايزه كفارة عن دعائها على بنتها..! والست بتحلف انها متقصدش وانها كانت بتقولها تهريج الهي يتوقف حالك..

تهريج!💔

قصص الندم الي بيوصل للبكاء بالدم.. من الاهالي الي مقهوريين على عيالهم لانهم دعوا عليهم تملا كتب.. الي ممكن توصّل بعض الاهالي لمحاولة الانتحار لفكرة ان ابنهم ولا بنتهم ماتوا بسبب دعائهم.. والي اغلبهم بيجوا يسألوا مستغربين هو معقولة دعائنا على عيالنا يُستجاب! ، ده انا كنت بقول كلمة عادية

نيجي نسأل ايه الكلمة العادية دي تلاقي: الله ينغص عليك عيشتك، الهي تنشل، الله ينتقم منك، الله ياخدك، ربنا يفرسك زي ما فارسني، الهي ما تكسب ولا تربح، الهي ما توعى.. اتوكس.. !

ده كلام عادي!! وده كلام للولاد!! امال الاعداء بتقولولهم ايه!

والكلمة الشائعة للاطفال: اتهد ربنا يهدك! ربنا يهده! يهد ابنك!💔

ولسه احنا في غفلة وبندعي على عيالنا واحنا مش واخدين بالنا..

ولسه في غفلة وساكتين على الي بيدعو على عيالهم قدامنا؟

في مرة انا كنت عند واحدة قريبتنا، ابنها 8سنين، وقفت تصرخ فيه: الهي ربنا ينتقم منك.. وانا ببصلها وساكت.. فضحكت قالتلي معلش بقيت شرشوحه، قولتلها الاذان بيأذن، قالت هستغفر، هو كان صوتي اعلى من الاذان؟.. قولتلها: لأ مش موضوع اعلى من الاذان، ده موضع استجابة دعاء، قوليلي عايزه ربنا ينتقم منه ازاي؟ يعمل فيه ايه!!

اتلجلجت كده وقالتلي بخوف: ده ابني.. يعمل فيه ايه يعني ايه! هو انا قاصده!

فهمتها وفضلت اتكلم معاها واقنعتها انها لما تتعصب تدعيله مش تدعي عليه وتدرب نفسها على كده، وعدى فترة،

بعديها لقيتها بتقولي: عايزه اشكرك على موضوع الدعاء ده، وحكيت بتقولي: انا كنت لما اقوله ربنا ينتقم منك كان يوقف يبصلي ويعيط ويقولي بعند آمين ويزود كمان ويقولي ربنا ياخدني ياماما، فانا كنت أعند واقوله آمين

دلوقتي لما بقوله ربنا يهديك وبقولها وانا بصرخ برده مفيش فايده فيا لازم اصرخ، فبقى يقف يضحك ويرفع ايده لربنا ويقوله اهديني يارب عشان امي تسكت.. وساعات يجري عليا بعدها ويحضني.. قالتلي تصدق الولد كان حاسس بالدعاء عليه وحاسس بالدعاء ليه!

طبعا الولاد بتحس وبتميز، حتى لو أطفال.. ما بالكم لو كبار..

كانوا بيحكوا عن اب في جنازة ابنه وقف يسأل صحاب ابنه هو ابني كان حاسس اني بحبه!! كان عارف اني بحبه؟ .. واحد من صحاب ابنه حب يهديه وقاله ايوه يا عمو كان حاسس وعارف، الاب قاله: منين، حس منين وعرف منين؟! وانا كنت بدعي عليه في وشه، حس حبي ازاي وعرف منين اني بحبه!!

والحقيقة السؤال ده مهم جدا، خصوصا اننا في مجتمع متربناش اننا نقول لولادنا قبل النوم احنا بنحبكم، فـ الولاد دول ممكن يحسوا او يعرفوا منين اننا بنحبهم؟! واحنا بندعي عليهم في وشهم وبصوت عالي!

احنا اليومين دول في رمضان..يعني اوقات الاجابة اوسع.. ابواب السماء مفتوحة...

♥️اروع ما قرات 📄

[marwa-el-zeiny]

ازيك يا مروة هحكيلك حكايتي انا من ٦ شهور اتعرفت علي شخص عن طريق النت وهو مهاجر انجلترا اصلا و اتكلمنا و في الاول قالي انه بيمشي بالشرع ولو اتجوزنا مفيش قايمة والكلام ده وهو هيجيب كل حاجة في بيته و قولت مش مشكلة و قالي انه عنده اكتئاب وقلق مرضي قولت مش مشكلة وانا كمان زيك و اتبسطت انه زيي وقولت هنفهم بعض بس هو تربيته كان قاسية اوي و كلها ضرب وقولت انا هعوضه عن امه اللي اتوفيت وموريتهوش اي طيبة و حنان وهو كان حابب ده فيا و عند وانا تربيتي طيبة و حب غير مشروط فا هو كان محكم عقله جدا و انا سايبة مشاعري و طيبتي جدا .. المهم عدا ال ٦ شهور و كان نازل الشهر الجاي يتقدملي ومتفقين علي كل حاجة و فجأة جاه سيرة التعدد و عشان هو شخص متدين وهو متمسك بالفكرة اوي و عاوزني اسلم لشرع لربنا قولتله مشكلتي مفيش ف الدين مشكلتي نفسية ازاي هستحمل ده وانا عارف اني مش قوية قالي انا مش بقولك ده تارجت هوصله انا بقولك احتمال يحصل اوبشن موجود لو كل خطط و حلولنا باظت قولتله يعني انا مستاهلش قالي طب انا مستاهلش يكونلي اوبشن زي ده قالي الناس كلها بتتغير بعد الجواز قولتله فتروح تكافئ نفسك وتتجوز تاني قالي ده عشانك وعشان مهدش البيت الاولاني قولتلي قولي اسباب كبيرة قالي يعني لو واحدة حسيت ليها مشاعر فجأة وهي كمان مش همشي معاها ف الحرام لا هتجوزها طبعا قولتله حرام عليك يعني اسيب اهلي و اتغرب معاك مع اكتئابي ده وتعبي و تعمل فيا كده قالي مانتي هتبقي مع ولادك قولتله انت اناني قالي ليه كده و عيطت و هداني تاني يوم اتخانقنا بردو وقولتله كل اللي يهمك خططك و نفسك وبس راح قالب الترابيزة عليا وقالي لا انا استحملت كتير وانتي بتغلطي فيا وانتي كده مش هتستحمليني وانا مش هكمل و سابني وانا بنهار ومش مستوعبة قولتله انت بتسيبني وانت غضبان وهتندم .. دلوقتي بحاول اقول لنفسي ده خير انه بعد بس لسه بفكر فيه

هار أسود ايه المجتمع دا ع رأي وحي�� سيف 😂😂

انتي طيبه جدا بلاس انو ومن غير زعل بأمانه هبلة! أقول ايه واسيب ايه طيب انتي مفروض تحوشي من مصروفك وتدبحي خروف كرامة للنجدة اللي اتنجدتيها من عند ربنا

انتي كنتي مسافرة تعيشي مع انسان عبارة عن شوال عُقد نفسيه ومفاهيم مغلوطه وبيشربهالك بالمعلقه تحت اسم الشرع!

يخربيت القايمه ويخربيت اللي بيتكلم ف القايمه ويخربيت اللي بيتكلمو ف بديهيات اللي مسافر دا وبيفكر ف جواز تاني من قبل ما يتجوز أولاني بيفكر ف قايمه ليه بروح كل عيلته الا اذا كان نيته شكل وشه

عارف شرع ربنا هل ربنا حرم ضمان الحقوق يابنتي! عقدونا ف الشرع وخليتو الواحد دماغه تنور ساعة ما تيجي سيرة الشرع! يوم كتب كتابي جوزي مضي ع قايمه بابا لسا مكنش كملها لا يعرف بكام ولا انا اعرف بكام ولا اعرف بابا كملها ولا لاء ولا حد فينا يعرف مكام القايمه دلوقتي ف بيتي ولا بيت بابا ولا بيت حماتي! ودا مش صح ع فكرة البنت ليها حقوقها اللي لازم تضمنها بدون مغالاة فكك من جو لو طلع شرير مش عايزة من وشه حاجه احنا ف زمن ربنا يطلعنا منه ع خير لا نبقي مُؤذيين ولا مَأذيين من حد، الفكرة كلها ان لو فيه تراضي وحسن نيه وعدم مغالاة ومبالغه خلاص متخليش حد يلعب لك ف اعدادت مخك باسم الشرع احنا مكفرناش!

وبعدين اتربي ع الضرب وانا هحتوي احزانه وهحتوي الليله دي جو l can fix him دا مبيسترش وحيات ربنا واخر الطريق دا لحن حزين ولطم السنين😃هتتحملي وتحتوي شهر! شهرين! سنه يوم ما تبقي بطل وهتزهقي فهتبطلي او يوم ما تبقي خلاص عديتي مجهودك اللي بتبذليه هيقل فهوا هيحس انك اتغيرتي وهيطالبك باللي انتي كنتي بتعمليه من باب انه مؤقت او من باب انه بكرة يبقي حلو ويفتكرلي اللي كنت بعمله عشانه بس ف الناحية التانيه هوا اعتبره بقي حق من حقوقه وهيفضل مريح ع كدا لغاية ما يفطسك انتي!

مفيش حد عوض عن حد، فيه انسان قوي يعرف يعالج نفسيته ويعرف يراضي نفسه ويتصالح مع المشاكل اللي مر بيها وف انسان دا بيبقي فوق طاقته فيعترف بدا ويتعالج مع اخصائي مش واجبك ومش ليلتك واعرفي حدود قدراتك ومتدخليش ف حاجات انتي مش قدها كل اللي حصل رحمة من ربنا بيكي ودا بني آدم مش جدع وناقص ومش تمام وبيكتسب قوته من ضعف اللي قصاده

[shu-rooq]

شروق انا حقيقي مش عارف يعني ايه حب او خايف اموت مش هعرف احب تاني

باختصار حبيت مرة ولأن كان عندي ظرف وقتها مصرحتش بده ، ولقيت صاحبي معجب بها وهي بالتالي بعد ما كانت مشدودالي اتشدت له واتجوزوا

المرة الثانية حبيت وكان متبادل الحمد لله ووصلنا لأن دي علاقة مش هتنفع لأنها مكانتش مصرية ومش هقدر تيجي تعيش هنا بعد ما كانت موافقة في الاول

الفكرة اني لسة على تواصل ومشدود للاثنين ، بس طبعا بمنع نفسي او مشدود جوايا بس طبعا مافيش أي سلوك والله مني

لأن منهم واحدة بقت مرات صاحبي فطبعا مجرد أنها متجوزة ما اقدرش اعمل اي تصرف والله انا بقول مشاعر جوايا

الفكرة اني خايف اني ما احبش تاني

انا وصلت لاني قلت اتجوز صالونات ، بشوف بنات كتير الحمد لله كويسين ، بس مش قادر اتشد لهم

مش عارف لما احس بايه يبقى كدا احنا ننفع لبعض

انا بفكر معاكي بصوت عالي يمكن ما تعرفنيش بس انا مش قادر فعلا ومش عارف اعمل ايه بقالي على الحال دا سنتين والله.

كان حد بيقولي اتجوز اللي تبقى فرحان بيها وطاير من الفرحة عشان هي معاك ....

انا والله ما قادر أكثر من الفرحة بحد ، انا مش عارف اتشد لوحدة فأتمناها حتى انها تبقى ليا حتى ولو بالشكل.

صباح الفل يا عزيز 🌸

شوف، هو تقريبا كدة والله اعلم لسة نصيبك مجاش رغم إنك في اشد الحاجة إنه ييجي. أنا بس محتاجة اقولك اشتغل واتخلص الاثر اللي جواك عشان لما ييجي تستقبله على نضافة. مرة حضرت مسرحية فيها مقتطفات من كتاب طوق الحمامة وكان فيها جزء بيقولوه على لسان ابن حزم ما معناه يعني إن البني ادم بيقدر يجدد قلبه ويتجاوز حب قديم ويحب تاني من جديد وبيبقى حب حقيقي بيملاه ويملى كيانه. فاحنا نستغل النقطة دي بقى. الحمد لله إن ربنا جعل قلبنا متجدد وإلا كنا هلكنا والله. أنا عن نفسي بشوف المحبة بيتمشي لها ومش بتيجي فجأة يا مفيش.

اللقطة التانية اللي مرضتش ابتدي بيها هي إنك تحاول تخلص نفسك من العلاقات المستحيلة اللي انت مزنوق فيها وبتنجذب لها دي. شوف ليه بتنجذب لها، معرفتك بالسبب هي نص الحل والله. ولما تلاقي نفسك مشدود لاتنين ف نفس الوقت اعرف إن ده مش انجذاب حب، يمكن انجذاب احتياج أو تعلق أو أي تروما إنما مش حب.

إيه هو الحب بقى؟ صعب والله يا صديق أنا مش عارفة. بس الحاجة الوحيدة اللي عرفاها ومعولة عليها إنه لما هييجي هنعرفه من غير مجهود وهيبقى حاجة مبهرة كدة. ف من هنا لحد ما ييجي تعالى نجهِز له ❤️

[vanilla-diaries]

كان نفسي ابقي مميز في حاجه كدا يا ميّ واحس اني بعمل حاجه مميزة بس مش عارف بعمل شغلي العادي ال زيي ، حاجه كدا تقضية وقت وبتحيب فلوس وخلاص

أولًا بس خلينا نتفق إنه العادي والطبيعي، ده حال أغلب الناس طبيعي إن الإنسان في المقام الأول عشان يوفر لنفسه حياة كريمة وميعتمدش على حد تاني فلازم يشتغل سواء كان الشغل ده شايفه عادي أو روتيني بس ده في حد ذاته إنجاز، حتى لو الشغل بتحبه فأتت هيجي عليك وقت اكون مش قادر تكمل أو تزهق وانا بس تضطر تكمل عشان المسؤوليات اللي عليك، ف خلينا نتفق إن الشغل في حد ذاته نعمة لازم نحمد ربنا عليها فأنت لازم تغير وجهة نظرك ورؤيتك دي وتشوفها من جهة تانية عشان تقلل من الاحباط والسلبية حواليك.

كان في حد قال قبل كده مش كل حاجة بنحبها لازم نعرف نعملها، ومش كل حاجة بنعملها لازم نكون بنحبها وده شيء مهم جدًا لازم ندركه، بالإضافة إلى إن في جانب مُظلم في كل حاجة والله يا أنون، اوعي تفكر إن اللي بيعمل حاجة بيحبها فهو دايمًا بيعملها وفي فراشات بتطير جمبه وقلوب بتطلع من عنيه والدنيا وردي، لا إطلاقًا، لكل شيء ضريبة، تعب وتوتر وقلق عشان الحاجة تكون بيرفكت ومجهود كبير جدًا لأن كل خطوة بتحتاج تفكير كبير وكل غلطة حرفيًا بفورة، وبالعكس الشغل المميز ده والهاند ميد عامة عشان يطلع مميز لازم بتعمل بدقة ومراعاة للتفاصيل لكن أوقات كتير إن الانسان بيكون مش في المود أو تحت ضغط وخنقة وعليه حاجات عايزة تتسلم وفي نفس الوقت ملزوم بتسليمات ومش أي تسليمات، أنا بتكلم عمومًا وعلى سبيل المثال لا الحصر ومش ��صدي غير إني أبين إن لكل حاجة حلوة ظاهريًا الكثير من التعب وراها.

ثانيًا بقى وده الأهم وأنا قلته ليك قبل كده، مش لازم تكون الحاجة المميز فيها تكون ملموسة كشيء مادي، أنت ممكن تكون مميز في حاجات تانية كتير أنت مش واحد بالك منها زي مثلا إن حد بيستريحلك انت بالذات، حد بيحب يتكلم معاك ويفضفضلك دونًا عن الآخرين، أو انك تكون بتحب تفرح الناس بتلقائية، زي ما بفرح بالآسك اللي بتبعته كده :'D أو حتى في حاجات ملموسة انت ممكن تكون مميز فيها بس انت لسه مكتشفتهاش، حب نفسك وتقبلها وتصالح معاها وحاول تشوف أقل شيء بتعمله حلو ومميز وخليك فخور بيه كمان.

بس وأخيرًا أتمنى إن يكون كلامي ساعدك لو بنسبة قليلة، ربنا يسعدك وينولك اللي في بالك وتحقق كل اللي بتتمناه.

[sesobeeh]

رسالة حب وشكر وتقدير واعتذار ..

على مدار رحلتي الجميلة دي، ومن ساعة ما قررت أكتب عنها وأحوّل البلوج بتاعي من فوود بلوج لبلوج بيشجع الناس على الهليثي لايف ستايل، وأنا شكرت ناس كتير جدًا جدًا على دورهم معايا في الرحلة ديه ..

شكرت ربنا أولًا على نعمة الصحة والقدرة وعلى نعمه الكتير عليا، شكرت والدتي اللي دايمًا واقفة معايا وبتشجعني واللي ياما اتخانقنا على الموضوع ده بالذات ورغم كده صبرت عليا وعمرها ما زهقت مني، شكرت والدي اللي مارضيش إني أعمل عملية تحويل المسار وقالي إنت تقدر تخس من غير عمليات وقد كان الحمد لله، شكرت أختي اللي ساعدتني في بداية الطريق وقالتلي ممكن تخس وإنت بتاكل اللي بتحبه عادي، شكرت أخصائيين التغذية والمدربين والأماكن اللي اتدربت فيها وكانوا محترمين وطيبين وبيعاملوني بالرفق واللين اللي أنا محتاجه، وشكرت صحابي اللي دائمًا وأبدًا هما سندي وضهري وأول حد بيشجعني وأكتر حد بيدعمني أحقق أحلامي وأكتشف العالم من حواليا وأنا مش خايف من حاجة طول ماهما في ضهري .. شكرت الناس دي كلها وهفضل دايمًا ممتن ليهم ولوجودهم في حياتي ولقيمتهم واضافتهم لحياتي وهفضل دايمًا بحمد وبشكر ربنا عليهم وعلى وجودهم في حياتي ..

في واحد بس هو اللي أنا ماشكرتوش على الرغم من إنه هو الأحق بالشكر ده كله، واحد بس اللي صبر معايا مش بس في الرحلة ديه، لأ ده من يوم ماتولدت لحد ما هموت وهو معايا وعمره ما خذلني ولا اتخلى عني، نعمة ربنا الأولى عليا والأكبر في حياتي واللي من غيرها ماكنش هيبقى ليا وجود في الحيا�� أصلًا .. الواحد ده هو جسمي .. نعمة ربنا الأكبر والأجمل واللي للأسف للأسف اختصرتها واختزلتها أحيانًا في شكلها ووزنها رغم إنها أكبر وأعظم بكتير من ده ..

جسمي اللي استحمل معايا سنين وسنين كان هو الملجأ والسكن من صعوبات العالم الخارجي ووحشته عليا وأنا طفل مش عارف الناس بتتريق عليه ليه ولا بيقصوه في بعض النشاطات ليه ولا بيتعمدوا يئذوه ويتنمروا عليه ليه لمجرد انه مختلف عنهم، استحمل معايا وماتكسرش ولا انهار بالعكس خزّن ألمه وتعبه ومشقته وحماني منها وسابني أعرف أعيش وأكمل حياتي بخفة وسعادة وانبساط ..

جسمي اللي لما قولتله ياللا ندوس في الأكل قالي معاك لآخر المشاور، خمس سنين من أول ما بدأت فوود بلوجينج وكتابة عن الأكل لفينا فيها مصر من شرقها لغربها ومن فوق لتحت عشان نجرب أكلة حلوة لحد مانا زهقت وحسيت إني جبت آخري وهو معايا وسندي ..

جسمي اللي حبيته وآمنت بيه وقولتله أنا بحبك ومش هحرمك تعمل حاجة نفسك فيها وبتحبها وقد كان وسافرنا مع بعض وفرحنا ورقصنا وقلبنا روسيا رأسًا على عقب وبقى فيديو سيسو أشهر من اداء منتخب مصر كله هناك 🤣

جسمي اللي لما قولتله ياللا نتغير قالي معاك وواحدة واحدة هنعمل معجزة لا انت ولا اي حد يعرفك يحلم بيها، بس انا واثق فيك وبحبك وعمري ما هتخلى عنك ولا أقصر معاك في حاجة، وقد كان، ومن فضل الله عملنا المعجزة ولسه مكملين ..

جسمي اللي للأسف لما ساعدني وعملنا الإنجاز وحققنا المعجزة نسيت الفضل ليا لوحدي ونسيت أشكره، حبيت ال٧٥ كيلو اللي راحوا ومابقيتش أحب ال١٣٥ اللي موجودين، فتحت الباب إن الناس ترجع هي اللي تقولي انت كده تمام ولا مابقيتش تمام .. واحد ماعرفوش بقالي ساعتين يقولي خد بالك هترجع تتخن تاني الا لو عملت العملية واخاف من كلمته واشك ف جسمي انه هيفشل، واحدة تقولي انا كمان خسيت كتير بس مابكتبش اصدقها واقول هو انا مأڤور ولا ايه وانسى كل الليالي الصعبة والأيام اللي ماكنتش قادر وجسمي هو اللي سندني وكمّل معايا ..

بقالي كذا شهر اختزلت جسمي في وزنه واختزلت رحلة نجاحي في إني يا إما أعرف أوصل للرقم اللي نفسي فيه يا إما هبقى فاشل .. عاملت جسمي بقسوة الحكم بالمثالية ويا تحقق الدرجة النهائية يا كإنك ماعملتش حاجة وده كان فيه ظلم شديد ليه وحطني في ضغط عصبي ونفسي بدون داعي واتسبب في عصلجة كبيرة في رحلة الخسسان وفقدان الوزن نفسه ..

ف أنا إنهاردة بكتب الرسالة دي علشان أقول لجسمي إني بحبك وبقبلك في كل أحوالك، بحبك لما كنت ١٩٧ كيلو وبحبك لما وصلت ل١١٩ كيلو وبحبك دلوقتي وانت ١٣٥ فيهم كتلة عضلية عمري ما وصلتلها في حياتي بسبب جدعنتك وقوتك وصبرك وتحملك .. بحبك علشان انت نعمة ربنا عليا وعلشان عمرك ما قسيت عليا ولا خذلتني ولا بعتني .. بحبك وبقبلك في أي وضع وبعتذرلك لو عاملتك بقسوة وشدّة إنت مالكش أي ذنب فيها وعارف إنك هتسامحني وإنك أكيد عارف إنه مش قصدي أضايقك ولا أأذيك ..

إحنا بدأنا الرحلة ديه وإحنا مع بعض ومبسوطين مع بعض ومالناش دعوة بحد ولا مستنيين رأي حد، وهنكملها مع بعض بإذن الله ونخس وإحنا مبسوطين ♥️

———————

أنا بشكر د/نشوى فؤاد علشان الرسالة دي والوعي بتاعي ليها كان نتاج أحد محاضرات كورس الHealth Coaching اللي هي بتدرّسه لنا مع Intellect والمعتمد من الICF .. ممتن لحضرتك جدًا والله 🥰