#الواحد هيعيط | Explore Tumblr posts and blogs

lucid-dreamer-0 · 3 years ago

Text

كل ما الدنيا تأزم بسأل نفسي سؤال واحد بيحل كل المشاكل ويجيبها في شوال: المفروض الموضوع ميكونش سهل، لكن هل لازم يكون بالصعوبة دي؟؟

ودايمًا دايمًا دايمًا بتبقى الإجابة لأ، أنا اللي ببقى مصعبها سيكا بإني شاغل نفسي ��حاجات مليش كنترول عليها، أو اني بقارن نفسي بناس تانية اصلا معرفش عنهم حاجة، أو بحكم على نفسي زيادة عن اللزوم، أو مستني من العالم حاجة مش بيدين ليا بيها.

وحتى لما مبعرفش أحل اللي بعمله غلط، كوني عارف إني بعمل حاجة غلط والمعاناة المش ضرورية دي مسؤوليتي، بمجرد ما بدرك ده بهدى وبطمن شويتين.

حكيت المشهد ده 100 مرة قبل كده بس هحكيه تاني برده، في مسرحية Cocktail Party لما البطلة راحت لدكتور نفسي وقالتله أنا بتمنى إن الألم اللي عايشة فيه ده يكون غلطتي.

فلما الدكتور استغرب وسألها ليه، قالتله على الأقل ساعتها هبقى عارفة إن الغلطة دي ممكن اصلحها وابطل اعمل الحاجة الغلط اللي بعملها فالشعور الوحش هيروح، إنما لو مش غلطتي والعالم هو السبب فساعتها مش هيبقى فيه حاجة ممكن اعملها والالم هيدوم للأبد!

****************************

عارف لما تبقى بتعمل كل اللي عليك، كل اللي تعرفه، وعلى الورق كل حاجة المفروض تكون بيرفيكت، لكن في الواقع النتايج صفر!

فاللي هو تقعد تسأل طيب ناقص إيه، طب اعمل إيه زيادة، طب انا خلصت اللي ورايا والمفروض اقعد استنى النتايج تيجي براحتها ولا لسه فيه حاجات المفروض اعملها؟

عشان والله بقالي فترة في مود ابو العربي وهو في مبنى المحافظة واسمه مطلعش في قرعة إسكان الشباب، وبيطرح تساؤل منطقي وعقلاني جدًا وهو بيقول بلكنته البورسعيدية المرحة وبيخبط بايده على المكتب للموظف أبو قميص نص كم مقلم:

”إسمي فين إسمي مطلعش في القرعة ليه، تسجيل وسجلت، مقدم ودفعت، تراويش وروشت المكتب كله، ليه اسمي مطلعش، مين احق مني بالشقة في بورسعيد كلها؟!“

في رائعة المؤلف المهدور حقه طارق عبد الجليل، ابو العربي بيروح بعد المشهد ده على طول ويطلع فوق البرج ��يهدد بإنه هيرمي نفسه من فوق لو المحافظ مدالوش شقة.

طب برا الفيلم، المفروض الواحد يعمل إييييه؟

****************************

بصراحة انا ديسابوينتد من نفسي شوية، اصلي مكنتش متخيل إن أول عشريناتي تكون كده، حاسس اني بلحس للدنيا بدل ما هي اللي تلحسلي (لو مش واصلك الاكسبريشن، يبقى أحسن).

اللي هو حاسس اني بتلزق، الكارير ده شغال وفرصه وفلوسه حلوة؟ طب يلا. الحاجات دي مطلوبة؟ طب يلا. الحاجات دي مش مطلوبة؟ خلاص فاكس متضيعش وقتك.

وده مش اتيتيود واحد عنده 22 سنة خالص، ده اتيتيود واحد متجوز وعنده يوسف ومنه وخايف على اقساط العربية ومصاريف المدرسة، فبيلحس للدنيا براحته، انما دلوقتي، ليه تمشي جنب الحيط؟!

مش عارف بصراحة ايه اللي مخوفك يا عم كريم، بتستخبي من العالم ليه يا حبيبي، ما تطلع وتعمل فيه اللي بيعمله فيك، اعمل كل اللي انت عايزه، ايه اللي مانعك، انت الريدي معندكش حاجة تخسرها، وطز في السباقات والحواجز والحوارات الخايبة بتاعة المجتمع اللي برا ده، محدش فيهم هيعيط عليك لما تتنيل، محدش فيهم هينفعك لما تلاقي نفسك في rat race ومش عارف تطلع منه.

بالعكس هيدوك بالجزمة، هيفعصوك، مش عشان هما وحشين بس عشان انت اللي رضيت بكده.

واحدة من اكتر المقولات المرعبة اللي قريتها في حياتي كان كارل يونج لما قال:

“Sooner or later, the world will ask you who you're. And if you don't know the answer, the world will tell you!”

واعتقد انك الريدي عارف ناس كتير اوي عايشة زي ما العالم قالها، بيشتغلوا كذا عشان العالم قالهم كده، اتجوزوا دي عشان العالم قالهم كده، عايشين حياة طويلة عريضة عشان العالم قالهم انهم المفروض يكونوا كده ويعملوا كده ويعيشوا بالشكل ده ويموتوا بالشكل ده، هما مختاروش ولا حاجة من دول، هما بس لما العالم سألهم انتوا مين ومعرفوش يجاوبوا، مكنش عندهم الشجاعة يختاروا، فالعالم اختار مكانهم.

واللي أنا عايزه منك حاجة تانية خالص، العكس، عايزك تطلع ام الدنيا دي وتـtake life from the throat before it takes your throat، روح أختار الماكسميزد ريسك ومش مهم الreturn، المهم تبقى مختاره عشان عايزه مش عشان ده المتاح ولا عشان ده اللي شغال.

عندك إيه تخسره؟ خد الريسك بتاعك واحفر فيه 3 سنين، 5 سنين، وحتى لو فشلت، دايما ممكن ترجع تاني، مفيش حاجة هتطير، يخربيت ام الشعور بتاع ان حد بيجري وراك ده، بدل كده روح انت اجري ورا حاجة عايزها بجد وحاببها، انت مش محتاج تثبت حاجة زي ما انت متخيل.

وبعد 5 سنين لو اتطربقت على دماغك، تقدر تبدأ من الأول تاني عادي، هيفوتك إيه يعني، هتبقى 27 سنة؟ لسه هتعيش قدهم 3 اضعاف، يعني 27 ده لسه عيل بشخة مش مطلوب منه حاجة.

****************************

فيه واحد جديد جه الچيم من كام يوم، عنده 44 سنة (ضعف عمري، صدفة)، شكله عامل زي الunderdog اللي بيبقى في الأفلام واللي بعد 15 سنة جواز اكتشف إن مراته بتخونه مع البيست فريند، وبعد ما طلقها وخدت معظم فلوسه، قرر يغير حياته ويبدأ من الأول، وأول قرار خده إنه يروح الچيم!

أتمني ان نظرتي دي تكون لا تمت للواقع بصلة وان شاء الله مش هيطلع كده خالص.

بس المهم إنه كل ما يسأل حد عن حاجة في الچيم، يقعد يقوله انا ندمان اني مبدأتش من 20 سنة وشوف انا عندي كام سنة ولسه بتعلم .. وكل شوية يقولنا كويس برافو عليكم انك بادئين بدري قبل ما تبقى تو ليت وبتاع، وحالته تصعب على الكافر بجد.

المهم وأنا راجع يومها وطالع السلم جه في بالي اني في يوم من الأيام مش هبقى قادر اطلع السلم، مش هبقى قادر اجري، مش هبقى قادر اتمرن، مش هبقى قادر ادخل الحمام لوحدي، and it scared the shit out of me.

الفكرة دي ممكن تبقى مصدر موتيفيشن جامد وكل حاجة، بس في نفس الوقت بتخليني اعمل حاجات انا مش عايز اعملها، بعملها عشان بس قادر اعملها وعشان هيجي وقت مش هبقى قادر اعملها.

****************************

مش فاكر كان عندي كام سنة ساعتها، بس احمد عسيلي كان عامل ايفينت في AUC وقعد يتكلم عن سلالم المجتمع وإزاي المجتمع بيحط ترتيب السلالم حسب مزاجه هو مش حسب استعدادك انت.

يعني بيقولك بعد سلمة التعليم خد سلمة الشغل، وبعد سلمة الشغل خد سلمة الجواز، وبعد سلمة الجواز خد سلمة الخلفة، وبعد سلمة الخلفة خد سلمة انك تفني عمرك عشان عيالك ياخدوا نفس السلالم دي، وهكذا..

الكلام ده بيفكرني دلوقتي بتوني سوبرانور في مسلسل The Sopranos، وهو قاعد مع دكتور ميلفي وبيشرحلها إن ازاي كل حاجة عبارة عن distraction، شغله وعصابته والملهى الليلي والجومار بتاعته، حتى جلسات الثيرابي معاها، كل دي مجرد الهاءات، حاجات تشتت انتباهه وخلاص.

طب لو خدنا نفس النظرية دي وعممناها هيحصل إيه؟

بص إحنا مش محتاجين نعمل حاجة، عمو ارنست بيكر في كتابه Denial Of Death عممها على كل حاجة وقال مش بس الحاجات اللي distraction، لا ده كمان المجتمع والدين والزواج والوظيفة والعلاقات والفن والأدب والسينما، كل دي الهاءات.

لكن يبقى السؤال: عشان تشتت نفسك وتلهيها بحاجة، لازم يكون فيه حاجة تانية بتحاول تشتت نفسك عنها، بتحاول متشوفهاش، حاجة غير سلالم المجتمع والفناء من أجل الآخرين، حاجة كبيرة اوي لدرجة إننا مستعدين نعمل كل ده عشان نتلهي عنها، إيه هي الحاجة دي بقى؟!

****************************

افتكرت النجيب، نجيب محفوظ، في واحدة من اقرب الروايات لقلبي، ملحمة الحرافيش، واقتباس يتكتب بماء الدهب:

”حلمت بجدك شمس الدين ثلاث مرات في ثلاث ليالٍ متعاقبة، وقال لي أن الدنيا لا تساوي شيئًا حتى يهبها الإنسان روحه“

****************************

طب قولي بس انت بتنهج ليه، بتجري ليه، مستعجل علي إيه، مين بيجري وراك؟

يا حبيبي افهم مش كل حاجة في الدنيا دي ليها ديد لاين، مفيش حاجة هتفوتك، الحاجات واقفة هناك اهي، ملهاش تاريخ انتهاء صلاحية، انت الوحيد اللي لي��، ف بالعقل كده مين اللي المفروض يجري ورا مين؟!

17 notes · View notes

sarrah · 4 years ago

Text

عملت العجين وسيبته يخمر وجهزت الحشو والصوص وبعدين فقدت الشغف، وكمان بقيت عاملة زي الليمونة المعصورة ورجلي مش شايلاني وشبه متغديتش و٣ دقايق كمان واحتمال أفقد وعيي فـ على إيه! أنام دلوقتي وسلمى تكمل السينابون بقى، بس والله أنا كنت ناوية أبدأ في الفصل حتى جهزت مكاني وفتحت اللاب ورتبت أفكاري، يلا الحمدلله الواحد متزنقش بقاله كتير بردو.. بفكر يا ترى لو دا حصل ومكانش في سلمى أنا كنت هعمل إيه؟ مين كان هيكمل بدالي! غالبا كنت هكمل وأنا بموت جوايا وببكي على حالي ومكنتش هاكل منه علشان أعاقبني على فقدان الشغف اللي في غير وقته دا.

اليومين دول بعرف إني خلاص خِلصت لما ألاقيني بصفر كدا، زمان مكنتش بصفر كنت ببهت بس وعلطول أنام حتى لو واقفة، دلوقتي مختلف بصفر وأحس إني عيني مطلعة نار وأعاني شوية حلوين قبل ما أقدر أنام، غريب الحال كيف بيتغير.. أنا راضية يارب بس موصلش تاني للحال اللي ببقى واقفة فيه وفجأة أحس روحي بتتسحب مني وبشرتي تبيض زي الموتى وأحس بإن دمي الجاري بجسمي أتحول لنار ومبقاش قادرة أنادي على حد يجي يسندني، أنا بكره الحالة دي أوي يارب ما أوصلها تاني.

بمناسبة المعاناة افتكرت انهاردة وأنا في السكشن والبغل واقف جنبي بينفخني في الاسئلة سألني لو كنت عملت العلاقة بينهم ولا لأ قولتله لأ لسة بنبرة متهدجة كدا، وبعدين لما قالي أمال مستنية إيه متعمليها مكنتش عارفة أجاوب لأني فعلا مكنتش عارفة مستنية إيه أنا مليت بيانات انتيتي من الموجودين ومقدرتش أكمل الباقي أصلا، فقولت بعبط تام بنبرة حد هيعيط بجد مستنية الدكتور يكمل، وأنا عمري ما استنيت دكتور تقريبا أنا بخلص أول بأول علطول علشان أقوم أشوف باقي السكشن واقف عندهم إيه كمساعدة للمعيدين، حسيت بالضغط رغم إن الموقف ميستحقش، أنا بكرهني جدا في اللحظة دي، احنا نضعف ماشي لكن حد تاني يحس بضعفنا لأا من هنا لبكرة، وبالذات لو الحد دا هو.

بس رغم الضغط في حاجة إيجابية بردو، برنامج السنة دي مختلف فإن شاء الله أقدر أتغلب على موتاني دا وأتعلمه لأني تعفنت مللا حقيقي.. وكلها يومين ونسائم رمضان تهل وبعدها بكام يوم في تراويح والدنيا هتتعدل إن شاء الله، حتى لو معدولة بحزن بس أبقى حاسة براحة علشان أنا فعلا مشتاقة لراحة أو لهدنة بعيد عني، تعبت مني جامد أوي.

3 notes · View notes