#العيله دى

[evmorfi-a]

مسلسل العيلة دي الحلقة 12 الثانية عشر

[mohamedyoussef1]

كنت فى فرح يوم الاربع بنت خالتى وكان حلو جدا لان اول مناسبه من زمان كل العيله متجمعه كل اخواتى وشباب وبنات العيله كلهم.. فكان يوم لطيف بس طبعا لازم حاجه تكدرنا فى النص ..

فيه ناس معينه كل مااجى اسلم عليهم يقولولى (عقبال عوضك ) او (ربنا يعوض عليك ) ، وطبعا دا معناه واضح انى حصلى مصيبه زمااااان وربنا هيعوض عليا فتلقائى بفتكر انى كنت متجوز وطلقت (من اكتر من سنتين) يعنى حرفيا نسيت . واكتشفت حاجه رهيبه بقى جداا من كلام حد معين، ان كله فى العيله بيقول انى لسا بحبها فعشان كدا متجوزتش ، حد انا نسيته ولما بفتكره لاسباب معينه بقول حسبى الله يقولو اصل انا اسا بحبها ، والمشكله انهم عارفين كم الاذيه اللى اتاذيتها زمان فى القصه دى ، والمفروض بكونو عارفين انى تعافيت تماما منه

الناس تقريبا مبتسبش حد فى حالها خصوصا اللى بيشوفوك كل سنه مره دول بس متابعين اخبارك جدا وبيسمعو عنك بس من برا ، البجاحه بس ان اللى بيننا ميخليهومش يدخلو ف تفاصيل كدا وينصحونى ويلا اتجوز ويلا عايزين ربنا يعوض عليك ، ياعم انت مين ..

يلا خير

[marmarika-world]

عندنا ف العيله لما بنحب نقول ان الشخص دا كويس بنقول عليه شبهنا

و مش قادره احدد دى نرجسيه و غرور ولا تواضع

[fozdoaa]

كنت فى البنك انهارده وقضيت ساعتين ولولا صدفه من صدف القدر حصلت معايا كنت كملت ساعتين كمان فى بروسيس مأخدتش فى ايده تلت دقايق .

كان فى بنوته صغنططه جميله فى موازتى ضحكتلها من الشباك وضحكتلى ضحكه جميله قوى خلتنى بعتلها بوسه ع الهوا وقالتلى شكرا وهى بتضحك كانت لحظه حركت فيا مشاعر امومه جميله خلتنى اقول ربنا هب لنا من أزواجنا وذرياتنا قرة أعين.بس للأسف الطريق فصلنا .

السواق وانا بنزل قولتله تمام هنزل هنا لو سمحت قالى مع السلامه قولتله شكرا كان لسه موقفش قالى تانى مع السلامه قولتله ربنا يكرمك قالها تالت قولت لاءه بقى دا انا اقولك الله يسلمك بقلب جامد طالما تكيت ع السين دا انت بقيت من العيله كده يراجل 😂

Ps عندى شويه معتقدات هبله كده تنم عن نسبه تخلف عقلى وعته اجتماعى يعنى مثلا زى السواق لما قالى مع السلامه معرفش ارد واقوله الله يسلمك بحسها متتقالش غير للناس القريبين قووى زيها زى القلب ❤️ بنكسف جدا اعمله لأى حد ولو عملته ببقى متأكده جدا أنى عايزه اعمله وفعلا طالع من قلبى مش معنى كده انى لما اعمل🌸 انها مش من قلبى بالعكس انت هتلاقى نصها كسوف انى اعمل ❤️

انا قولتلكوا ان عمو ابراهيم صاحب بابا اخد منى اربع بوسات غصبا بس بمزاجى🙈 كان طالع من زمتى اتنين هو كملهم اربعه فقولت عديها يا توتا بس اللى كان اكتر حاجه قريبه لقلبى فورهيد كيس ات ووز اميزينج منه علشان هو حد حنين قووى فأصبح مجموعنا اربع بوسات وواحده فورهيد وحضن

دخلت ادفع فاتوره النت وانا شايفه انه هو بيعمل فون كول برا دخلت مكنش فيه غيرى وعارفه انه كان المفروض اقعد ع الكرسى قدامه بس هو مكنش موجود ومقاليش اتفضلى فقعدت فى كراسي الويتينج لما دخل فيرست معتذرش تدرى ليه لأنه فضل فتره وعمل بدل الفون اتنين والأكيد ان واحد فيهم ان لم يكن الإتنين بيرسونال بس انا التكيف كان تمام ومكنتش مستعجله فقولت عادى بما ان الدنيا فاضيه بس كنت شايفه انه المفروض يقول سورى ع الإنتظار او التأخير بس ماعلينا ،الغريب انه قالى( تعالى) فانا سمعت الكلمه وحصلى حاله فصام كتاتونى فى مكانى كده اللى هو انا سمعت صح !هو قالى تعالى! لقيته بيعدها تانى قالى تعالى بصوت أعلى هو انا قومت اينعم بس كنت حاسه انه المفروض يقول اتفضلى نوت تعالى او تكبر منى ولا غرور ولا انا بنت ناس وهو لاءه خالص الفكره انه مش المفروض تبقى تعالى احنا مش صحاب اسمها اتفضلى بس افتكرت كلمه ماما وهى بتقولى احنا مش هنربى الناس ،وهو هو نفس الشخص عملى غلطه فى الفاتوره ودفعنى اكتر حقيقه فى دى اعتذر انا قولتله عادى جدا محصلش حاجه كده كده الزياده موجوده فى حسابى ومحسستوش انه فى مشكله .

روحت لمحمد الترزى وكالعاده فتح جاعورته عليا وقالى انتى زهقتينى انا نص السنه بوسع والنص التانى بضيق قولتله على فكره انت ظالمنى المره دى سوسته ضحك عليا ومشانى ومعملهاش برضه .

ماما عامله محشى وحقيقه انا بقالى اسبوعين مليش نفس للأكل خالص حاسه انه بيحتاج طاقه ومجهود فى الحر ده بلس ان معدتى كانت وجعانى فكنت حابه افضل خفيفه ووقت ماكل اكيد مش هيبقى محشى ،ماما فضلت تتحايل عليا وقالتلى اكل رز الحشو بتاع الفرخه وقطعتهالى فى طبقى نقنقت علشان متزعلش وفضلت اتكلم معاها وقومت فعلا مكنتش قادره.

دخلت مواعيد غلط فى بعض وكركبت الدنيا ومطلوب منى اظبطها فمحتاجه رغى كتير وتشغيل دماغ وانا مش قادره اشغلها خالص وضميرى كل شويه يفكرنى وينقح عليا بس لما بفتكر انى هتصل وارغى يجيلى هبوط نفسي فاهرب واعمل نفسي قال ايه لسه قدامى وقت وانا فى الأصل مزنوقه جدا فى الوقت

كتوتال لليوم الحمد لله يارب والله فضل ونعمه

[amal63]

انا عيلتى تتحب تتحب وتتشال ع الراس

صحابى جم قضوا ١٠ ايام عندى وشافوا العيله كلها واخدتهم عن كل حد مننا وحقيقي لحد الان بيشهدوا بالايام دى وبنبسط اووى لما تيجى سيره اللمه وكدا فلاقيهم يقولوا احلى ايام قضيناها ايام المحله لما كنا عند امل 🫂💖💖💖💖

[aaaalsafar]

#جوازه_والسلام

✍️مفيش حاجه تجبرك انك تتجوزى بس علشان سنك أتأخر

⛓️ولا انك تتجوزى علشان بنات العيله اتجوزوا وانتى لسه

⛓️او انك خايفه ان القطر يفوتك

او ان الناس كل شويه تسألك هو مفيش جديد

⛓️او انك عايزه تتجوزى بغرض الخلفه وبس

⛓️كلها امور ممكن تدفع البنت انها تاخد اى عريس والسلام

⛓️ممكن مش بيكون العريس مناسب ليها بس عايزه ترتاح من الحاح اهلها ... او نظرات الناس

⛓️وللاسف الجوازه دى فى الغالب مش بتنجح

⛓️لانها قامت على رغبات الاخرين

مش حسب اختيار البنت

👈بلاش تظلموا البنات فى جوازات مش مناسبه لهم

⛓️بلاش تضغطوا عليهم انهم يقبلوا عريس بس علشان ترضيكم

الجواز مش هو الهدف الاسمى

⛓️ممكن الانسان يعيش سعيد بدون ارتباط

⛓️ممكن تكمل حياتها عادى جدا وهى بدون ضغوط

⛓️ليه حكمنا على البنت اللى لم تتجوز انها مش ناجحه او ان ناقصها حاجه

او انها لم تكمل نصف دينها

⛓️والله هى كامله بالعريس او بدونه

مفيش حد بيكمل حد

⛓️كل واحد كامل بنفسه

بطلوا نظرات وهمسات

⛓️بطلوا انكم لما تشوفوها تقولوا حرام لسه ما تجوزتش

⛓️والله حرام عليكم اصلا كلامكم ده

حرام عليكم نظرات الشفقه

⛓️نصيحتى للبنت لا تشغلى بالك بكلامهم ولا نظراتهم

لا تقبلى اى حد والسلام

⛓️اختارى اللى يناسبك ويناسب ظروفك

⛓️خدى وقتك تماما دى حياتك انتى مش حياه حد تانى

انتى اللى حتعشيها

⛓️اختارى اللى يقدر يكمل معاك ويكون سند ودعم

⛓️مفيش حاجه اسمها القطر فات

فى حاجه اسمها قسمه ونصيب

⛓️فى حاجه ان ربنا كاتب لك الخير ومحدد لك الاوان لاتقلقى نصيبك جى جى جى

ارحموا بنات الناس

وخليكم فى حالكم .... يرحمكم ربنا🤲🏻

[unbreakablesal]

افتكرت لوهله كده زيارة عائلية غير مبرره بس المره دى كنت قادره اتحكم فيها الى حد ما و هى انى كنت عامله عملية ف ضهري و متآخد مني مادة من النخاع الشوكي مخليانى مش قادره اقف حرفيا و دايخه و مصدعه طول الوقت مهما حصل و كانت اصعب لحظات حياتى كلها .. و هووب معلش ألاقى ناس برضو راشقه اللى هو هانيجى نقعد معاكى و بتاع ٢٥ فرد مثلا بالاطفال بالبابا غنوج .. جماعه هو شكلى بيوحى انى اقدر اقعد مع حد و اخدمه انا كواحده مريضه؟ لا .. بجد دى بالتسبة لى مش بشوفها حب و تقدير و كده خالص و لو ان ربنا اعلم بالنوايا .. بس طالما مش بتساعدنا ف حاجه و ف وقت زى ده .. جاي عايز نضايفك و نهتم بمعاليك .. بشوفها بقى قمة ف قلة الذوق و عدم التقدير و التفهم لظروف المرض نفسه حتى لو اهلى شارحينه ! زى ما قبل ما ادخل العملية كده اتجمعوا برضو ف اوضتى و قعدوا يرغوا و يهزروا و يآكلوا و يرموا ف الارض و يستخدموا حاجتى اللى ف الاوضه و يرموها بدون اى مراعاه ! حقيقى لوهله احيانا كده بكره العيله و العزوة و المسميات الفارغة دى

[albatross-me]

الليله دى كانت برد جدا، حبيت اعمل قهوه باللبن

القهوه باللبن هى مشروب العيله فى الأيام البرد اللى زى دى كانت ماما تعملهالنا ونقعد كلنا على السرير نشربها ونتدفى ونحس ب ونس و دفى وحب كبير.

مشتاقه للقهوه باللبن من ماما وتيشرت بابا وروب ماما فى الأيام البرد

[evmorfi-a]

مسلسل العيلة دي الحلقة 3 الثالثة

[mohamedyoussef1]

عندى مشكله بقت واضحه لأى حد وسمعت تعليق عليها من كذا حد الفتره دى ، انى بقيت بحب اقعد لوحدى تماما ، فى لحظات ما بنسحب وهوبا انا طالع بيتى حد عايز حاجه وادخل قوقعتى مع نفسى واعيش ، مبقتش بسمح لحد يخترق دا فى اوقات ما والحقيقه ان الاوقات دى بقت كتير اوى ، فكرة ان حد ييجى يعيش معايا فتره طويله فى البيت صحاب او اهل مبقتش متاحه عندى لانى حرفيا مبقتش عايز احس ببشر فى النقطه دى عشان دى النقطه الوحيده اللى بجرى على الأمان او بهرب ليه فيها وعندها ، طبعا مش عبيط ومبدخلش حد بيتى بس لما انطرح ان ممكن حد من العيله جاي من برا مصر هييجى ويقضى اجازته عندى فرحت عشان اللمه وكدا وفجأه دماغى سألت ايه دا ومساحة الامان بتاعتك الشهر دا هتروحلها فين

دى نعمه كبيره بحمد ربنا عليها بس تعودى عالموضوع دا عملى مشكله شويا مع اللى حوليا للأسف واعتقد دا مفهوم ، وكمان مع نفسى ، ياترى مين فى الحياه هتقدر تخترق القوقعه دي واقدر اعيش معاها جوا مساحتى الآمنه دى اللى حرفيا ممكن اعدى بلاد وبحور عشان اوصلها

ليلتكم حلوه

[zahraa17]

وبعدين في العيله اللي مفيهاش حد عايز يلبسنا فساتين فرح دى .

[lamis-salaheldeen]

الشجره دى وفى اختها ورارها مش باينه بابا زارعها من سنتين مشفتهمش اول مااتزرعوا بس طلعين حلوين اووى بتهيالى شجر توت بس لسه مطرحش باين مش عارفه .. كان زمان وانا صغيره مكانها شجره صفصاف كنت بحبها اووى بفروعا النازله واتعلق عليها وعامله نفسى طرازان واقع واتخبط واتعور ولا يهمنى ..

كبيرنا وذكرياتنا بدأت تتنسى وبقى فى جيل جديد من الاطفال بيعمل ذكريات جديده .. حتى شكل البلد مابقاش زى زمان .. كل الجدود ماتوا مفضلش حد يحكى عن جدودنا الحكايات الى كنا بنحبها زمان ورجاله العيله ملهمش طاقه يقعدوا مع أطفال يحكلهم حاجه زى مامان ابهاتنا بيقعدوا ويحكولنا .

ربنا يرحمهم اجدادنا كلهم يارب العالمين .

[esraathehobbit]

الحقيقة انا مبسوطة إن الإعلام عرض قضية زى دى لأول مرة فى التليفزيون قضية بيت العيله و تدخل الاهل و تحديدا " الام "

و الأهم انهم عرضوها وسط طبقه مختلفه تماما عن اللى متعودين نسمع عنهم " الأرياف و الصعيد " و دة شئ تانى عظيم بيوضح ان العقليات ملهاش علاقة بالطبقه الاجتماعيه او البيئة و ما تزال القضية دى من اهم و اخطر القضايا و اكتر سبب فى خراب البيوت

طول ما الجواز فاقد للمعانى بتاعته زى * الاستقلال * �� * الاستقرار * و * التفاهم * ف دى مش حياه !! ، بيوت العيله بتسلب الجواز كل المعانى دى و مبتبقاش حياه دى بتكون جمعية خيريه كل اللى عايز يشارك فيها بحاجه بيشارك ،، و المصيبه الاكبر فى الشخص لو بلهجتنا العامه " وِدَنى " و بيسمع لكلام اهله و متعلق بيهم و مش قادر يفهم انه بدأ حياه جديده حتى لو مش فى بيت عيله و مستقل بس بيسمع لكل كلمة بتتقاله ف ده مختلفش كتير عن بيت العيله و التأثير واحد

استقلالك بحياتك و احترامك للشخص اللى معاك مبيتعارضش مع برك لأهلك و مبيتحطوش فى كفه واحده اصلا ولا بيتخلطوا ببعض و حقيقى اتمنى العادة دى تختفى تماما من كل الطبقات و الأوساط لأننا مش هنقدر نغير البشر و طباعهم و نقول للام اتقى الله فى مرات ابنك ولا للإبن انه يتعلم ازاى يحترم مراته و يبر امه و ميخلطش الامور ببعضها

مرتبط بأهلك و مش قادر تسيبهم و لا تبعد عنهم و تستقل بحياتك و تحترم خصوصية بيتك و تدير أموره لوحدك و " تسترجل " خليك ��اعد جمبهم و متبهدلش بنات الناس معاك

منقووول

[fozdoaa]

مساء الخير ..بص /بصى يا انون دى اختك وليها حق فى البيت مقصدش حق مادى اقصد معنوى وولادهم ليهم الحق ده بالتبعيه انا عارفه انهم اكيد بيبقوا عاملين دوشه ومرستان ومفيش خصوصيه لاى حاجه من حجاتك بس دى منعرفش نتكلم فيها خاصتا ان باباك ومامتك موافقين وحتى لو مش موافقين ميقدروش يقولو ويزعلوا اختك ...بص العيله بتتاخد باكدج واحده على بعضها .

ثانيا ممكن جايز تكون انت/ى حد حساس جدا وبالتالى اكيد ظروف زى دى هاتزود حساسيتك .خلى عندك ثقه فى نفسك وميهمكيش البنت ممكن تحاول /ى تصاحبيها جايز جايز ولو منفعش نبقى نتفادى الاصطدام ما استطعنا اليه سبيلا

ياريت اكون قدرت افيدك

[doradoddy]

امبارح حد م العيله بتقولى اتخطبى لواحد اسمه غير احمد ومحمد عشان التغير وكده...وقالتلى يوسف مثلا....بعدها بكام ساعه حد تانى قالى انت هترتبطى بواحد اسمه يوسف😌 ومعرفش ايه الصدفه الغريبه دى😂

ومن هنا بناشد الساده المسئولين ...اي حد اسمه يوسف يجى كده عشان العيله قررت اني هرتبط بحد اسمه يوسف خلاص😌

الحقيقه انى مش عارفه افاتحهم ازاى ان مقابلتش ف حياتى حد اسمه يوسف غير ناس صغيره😌.

اظن كده دى رساله واضحه للعيله ان مفيش ارتباط😌

[alahramplatform]

تفاصيل دور الفنانه إنعام سالوسة فى مسلسل العيله دى

تفاصيل دور الفنانه إنعام سالوسة فى مسلسل العيله دى

متابعه:آيه محمد تشارك الفنانة “إنعام سالوسة” في مسلسل “العيلة دي” مع النجمة وفاء عامر، والذي بدأ تصويره منذ أيام قليلة ومن المقرر عرضه خلال الموسم الشتوي القادم وتجسد إنعام سالوسة خلال أحداث المسلسل دور حماة الفنانة وفاء عامر ووالدة الفنان إسماعيل فرغلي، وتتعرض خلال الأحداث للكثير من الأحداث والمواقف الكوميدية.   ومسلسل “العيلة دي ” ينتمي لنوعية مسلسلات الـ 30 تدور أحداثه حول عائلة تعيش في طبقة…