#افلام لمحمد خان | Explore Tumblr Posts and Blogs

hazemehab · 11 months

Text

كنت اتمني اني اكتب عن الظروف والأحداث اللي احنا فيها دي لكن الموضوع صعب, ماعنديش قدرة علي التركيز اني اكتب عن ده وماعتقدش حد يقدر يكتب إلا لو أخد مسافة ولو بسيطة. آه بفكر في فترة قريبة اكتب سلسلة مقالات عن فلسطين اتناول فيها الاحتلال والمقاومة من زوايا تحليلية مختلفة يمكن ده يكون له جدوي, بس بعد ما اخلص من اللي ورايا الأول والشحنة الانفعالية تهدي شوية كمان عشان اقدر افكر.

المهم انا بكتب النهارده بعد فترة توقف كده لإن من شوية قريت خبر ان الاستاذ رؤوف توفيق اتوفي. وللي مايعرفوش فهو ناقد سينمائي وصحفي وسيناريست ومن اشهر اعماله سيناريو فيلم زوجة رجل مهم لمحمد خان, بس علاقتي الافتراضية بالأستاذ رؤوف بدأت من قبل ما اعرف انه كاتب الفيلم ده ومعرفتي بشغله خلتني مدين له بكتير جداً لحد ما اموت تقريباً.

لما بدأت اهتم بالسينما بشكل جد وانا في ثانوي كنت حريص اني اقرا عن السينما علي أد ما اقدر اللي هي كانت بالنسبالي عالم عندي احساس اني بنتميله وفاهم لأول مرة بشكل عفوي جداً ايه هي شغلة المخرج بالظبط والشغلة دي كنت عايز اعملها بأي شكل. المهم, انا كنت ساكن في الهرم, وفي اثناء رجوعي مالدروس مشي في أغلب الاوقات كان في طريقي قرب البيت منفذ بيع او قول مكتبة يعني بتاعة الهيئة العامة للكتاب لزق في سينما رادوبيس بالظبط. المكتبة دي كانت كنز بالنسبالي بما اني شخص بيحب القراية بالإضافة للأسعار اللي كانت في متناول التريسكل بتاع العيش مش طالب في ثانوي حتي, فكل ما اعدي عليها كنت استلقطلي كتابين تلاتة اربعة كده في حسبة ماتعديش بالميت المحروق 12 جنيه ولا حاجة, وارجع اخبي الكتب دي في درج المكتب عندي عشان اتفادي اي مشكلة يتقاللي فيها اني سايب مذاكرتي وبضيع وقتي في الكلام ده وفي اسوأ الاحوال لا قدر الله يتعرضوا لخطر المصادرة.

الفكرة اني الحمدلله برضه كنت بقعد اذاكر وكل حاجة, بس كل ما آخد بريك كده يا إما كنت امسك الجيتار في الخباثة كده اقعد اعمل عليه اي حاجة يا إما بطلع كنز الكتب الاستراتيجي ده انقي كتاب اقعد اقرا فيه شوية عشان افصل برضه, خصوصاً اني كنت قاطع فيسبوك بقرار شخصي يعني وده كان احسن طبعاً. الكتب دي كانت من بدايات الطريق اني احاول ابقي بني آدم فعلاً ويمكن اكتر كتاب فاكره فيهم كان مختارات مترجمة لشعر بوشكين, وهو شاعر روسي من اهم شعراء القرن التسعتاشر وبحبه من ساعتها الحقيقة.

المهم, من ضمن كام كتاب اشتريتهم عن السينما لكنهم ماكانوش كفاية نهائي, كان فيه كتاب اسمه اوراق في عشق السينما ومكتوب اسم مؤلفه, رؤوف توفيق. مين رؤوف توفيق طيب؟ مكتوب انه كاتب فيلم كذا وكذا ووالله مانا فاكر حتي كان مكتوب الكلام ده جوا ولا برا بس صباح الفل يعني مش كتاب عن السينما؟ وسعره كلام فارغ يعني يبقي توكل علي الله واهي بترزق يعني اكيد محترم مادام فيه سينما في الموضوع.

الكتاب ده كان من الكتب القليلة اللي قريتها في وقتها من الجلدة للجلدة. هو الكتاب كله عبارة عن تجميعة لمقالات نقدية لأفلام اغلبها ان ماكانش كلها افلام اجنبي وسبق نشرها قبل كده بس قرر يجمعها في كتاب, وهنا كانت الصدمة الأولي او الاكتشاف الاول. السينما اللي بجد مش في امريكا بس, ده فيه سينما في اوروبا وفي اليابان كمان, وسينما مهمة ويمكن اكتر اهمية من امريكا. فجأة باب اتفتح علي عالم جديد تماماً ماعنديش عنه فكرة, افلام اول مرة اسمع عنها, رؤي نقدية شديدة الحساسية والعمق بالنسبالي وقتها, المقالات نفسها في عرضها للأفلام ممتعة جداً وتعليمية كمان بالنسبة لواحد زيي وقتها, مافيهاش لغة متكلفة ولا عامل نفسه عميق ولا بيستعرض عالقارئ, بالعكس بياخده من ايده يمشيه في العوالم دي ويفرجه ويقول له رأيه برضه. ده كان الاكتشاف الاولاني اللي حببني في اني اشوف الافلام اللي اتكلم عنها في مقالاته دي بأي طريقة.

الاكتشاف التاني واللي انا بعتبره في ميزان حسنات الراجل ده كان الجزء التاني من الكتاب. الجزء التاني من الكتاب كان عبارة عن مقالات زي سكيتشات كده او مقالات تعريفية بشخصيات, وده كان اكتشاف بالنسبالي لا يعادله الا اكتشاف الانسان للشطافة. فيديريكو فيلليني, انجمار بيرجمان, اكيرا كوروساوا, جون هيوستن, جان لوك جودار, اورسون ويلز, انا عايزك تتخيل الانبهار اللي بيشعر بيه انسان وهو بيسمع عن الناس دي لأول مرة وبيقرا عن حياتهم واسلوبهم السينمائي والمواضيع اللي تناولوها مع امثلة وعروض نقدية سريعة لكذا عمل من اعمالهم كده في وسط الكلام. ده يمكن زي ادراك واحد في القرن الستاشر لآراء كوبرنيكوس أو لما تعرف ان فيه واحد اسمه نيوتن فصص حاجة اسمها الجاذبية بمعايير زمنه. ذهول وسعادة وحماس ويوفوريا ما بعدها يوفوريا. دي السينما اللي انا عايز اتفرج عليها ودي الحاجات اللي انا عايز اعمل زيها, خصوصاً فيلليني اللي كل دماغي من اول ما قريت عنه في الكتاب.

طبعاً في سيكشن الشخصيات كان بيتكلم عن ممثلين كمان, تقريباً اتكلم عن مارلون براندو ومش فاكر اتكلم عن مدير التصوير سفين نيكفست ولا اتكلم عنه في مقالته عن بيرجمان. بس المقالات دي كانت ويكيبيديا بالنسبالي بس بشكل موجه ومرتب وتدريجي. بمجرد ما ثانوية عامة خلصت قررت ادور عالأفلام دي علي يوتيوب - ماكانش عندي ادني فكرة عن التورنت لسه - ولقيت شوية, اغلبهم مش مترجمين, حاولت اتفرج علي اللي لقيته وذاكرت المنهج بتاع المدرسة العربية للسينما والتليفزيون اللي عالموقع بتاعهم صم, ده كان قبل ما ادخل اولي جامعة علي طول ولهذا قصة اخري نحكيها بعدين. المهم اني بعدين شوفت الافلام دي واكتر واتعرفت المخرجين دول واكتر وتعلقت بإني ادرس واحاول اعمل افلام اكتر واعتقد تفكيري ونظرتي وفهمي وحبي للسينما كانوا هياخدوا شكل مختلف اقل عمقاً في نظري لو ماكنتش قريت الكتاب ده في الوقت ده. اوراق في عشق السينما مش بس من جانب الكاتب لكن اعتقد بتورط قراءه في عشق السينما اللي بجد هما كمان.

شكراً ليك يا استاذ رؤوف علي كل اللي قدمته, كنت اتمني اني اقابلك واقوللك الكلام ده بشكل مباشر, ماعرفش هل كنت تتخيل او تعرف ان كتاب من كتبك ممكن يغير ويضيف لحياة بني آدم اد ايه او يخلي حياته افضل ولا اذا كنت سمعت الكلام ده من اي حد قبل ما تتوفي بس اكيد انا مش لوحدي في ده. الله يرحمك يا استاذ ويسكنك فسيح جناته ويجازيك خير عن كل حرف انت كتبته.

#السينما #رؤوف توفيق

4 notes · View notes