nanoosh30

[nanoosh30]

ماذا أفعل أكثر يا دانيال..

الذي أحبه يرى دموع عيوني عادية..

[nanoosh30]

أنا أنتمي إلى كُلّ أولئك الَّذين لا ينتمي إليهم أحَد.. إلى كُلّ الَّذين وجدوا أنفسهم غُرباء حَتّى عَن قُلوبهم.”

[nanoosh30]

ومن قال إني تركتُ دياري؟ مادام قلبك في العمر داري، أحبكَ لا شأنَ لي بإختياري، فحبُّك عاصفةٌ لا خَيارِ..

[nanoosh30]

رساله مني لكل أمهات الحاضر و المستقبل بمناسبة يوم المرأه

رجائي الحار انكم تنتبهوا بتربية أولادكم قبل بناتكم ، ربوهم على الرفق بأخواتهم أولا و انه الرجولة تكليف و ليس تشريف، لا تفضلوهم على أخواتهم البنات حتى لا تخلقوا فجوه في تفكيرهم، علموهم انه متل ما تعبتوا بتربيتهم في ناس بره تعبت في تربية بناتها ، رددولهم السيرة النبويه و معاملة الرسول عليه ال��لاة لزوجاته ، فهموهم أن الضرب أبعد ما يكون عن الرجوله ، احكولهم انه الخيانه من الكبائر، ازرعوا فيهم مفاهيم رفقا بالقوارير و صلة الرحم و الإمساك بالمعروف و التسريح بالإحسان ، ربوهم على الشرف و العفه و فهموهم أنه هاي المفاهيم مش انثويه ، بالعكس هاي مفاهيم رجولية بالدرجه الاولى، ذكروهم ان أول ما تشهد عليه يوم القيامه هو ايده اللي ظلمت و ضربت و فخذيهم اللي ما عرف يصونهم ، احكولهم أن السعادة مرتبطه بالقناعه و الرضا و الحياه الزوجيه مقدسه و انها مودة وسكينه ، رجاءا يا أمهات ربوا ولادكم قبل بناتكم ، القوامه الهم و العمده عليهم . ادخلوا بولادكم الجنه قبل بناتكم و اعملوا معروف ببنات العالم ، خلينا نربي جيل واعي فاهم و عارف شو بده . حبوهم من غير ما تفسدوهم و عاونوهم على الحق و ليس الظلم . وقتها بس بصير من حقنا نحتفل بيوم متل هاد اليوم. الله يسعد كل أوقاتكم

#أم_البنات#حب#تربيه

[nanoosh30]

المواقف بتغير

اوقات كتير عشان تبقى بنفس الصلابة و القوه اللازمه للوقوف من دون الحاجه للاخر، من دون الحاجه لأي حدا بالدنيا مين ما كان يكون، عشان اضلك محافظ على نفس الصوره و المسافه .. بتلاقي حالك بالاخر فقدت الكثير من الحب و الحنان بقلبك اتجاه كتير عالم #المواقف_بتغير

[nanoosh30]

الحب....

الحب... يمكن اسهل شيء صار ممكن حدوثه هالأيام هو الحب، ءصار البنت بدها تحب و الشب بدو يحب...حتى المتزوج بدو يحب على اعتبار انه هو انغش و الاشي اللي مع زوجته مش حب متل ما اتصور، و اوقات الزوجه بتلاقيها عندها نفس وجهة النظر....و بصيروا الطرفين يغرقوا بعض هدايا و كلام حلو و أغاني و عزومات (معظم الوقت على حسابها بس هي بتحكي معلش فش فرق بينا انا بنت أصل و بنت الاصل بتستحمل و بتدعم الرجل🙄🙄)... بس السؤال لَيش بعد كل هالحب و الكلام و السعاده بسيبوا بعض و ببلش فلم انا ما بنفعك و ا��تي بتستاهلي احسن مني، و بديش أضيع مستقبلك 😭.... ببساطه لانه مش هاد هو الحب ...الحب مش انك بس تزهق و تقرف تسيب اللي بتحبه و تمشي..الحب مش طلعه و لا تلفون اخر الليل و لا كلام بتحكي بالليل و بتنساه بالنهار....الحب مش دبدوب و لا عيد و لا عزومه و لا كنكنه بسياره... الحب احترام للوعد...انك ما تكون اناني...انك تكون مسؤول و كبير و تكون رجل.... الحب عزيزتي انك تنامي ليلك و انتي متأكده و متطمنه انه مهما شاف بنات و مهما قابل عالم احلى و اذكى و احسن منك مش راح يسيبك و مش راح يخونك و مش راح يجرحك...الحب دمعته اللي بتنزل على وجعك قبلك، و شدة ايده على إيدك وقت ولادتك...الحب هو انك تكوني متاكده انه مش راح يرميكي بنص الطريق لو صارلك اشي، و لا باخر العمر لو ما صارلك اشي... حبها الك انك تصلحك وقت تغلط، تخاف عليك و تحميك من عذاب الاخره متل ما بتخاف عليها و بتحميها بالدنيا، الحب انها تستحملك وقت فقرك و شدتك و انك تكرمها وقت يسرك و غناك... الحب انك تخاصمها ازا زعلت من اهلها و تاخد منك موقف ازا زعلت أهلك.. الحب احترام...احترام بالكلمة ، ما بنفع تحبها و تسبها...تعشقها و تضربها....تخاف عليها و تكون اول واحد يكسرها.... الحب انكم تكبروا سوا...رغم كل شي، انكم تصحوا كل يوم لآخر العمر تلاقوا حالكم مع بعض...و بوجه بعض و جنب بعض.. و لما يخلص الحب بيوم من الأيام ....بتعرف انه الطرف التاني ما عاد اله وجود... هاد الحكي مش تنظير و لا صف حكي و لا وهم، هاد الحكي بحس في فعلا كل حدا و كل واحده ربنا رزقه الحب الحقيقي...لانه فعلا لسه موجود ... ‎#نور_حجه #وجهة_نظر #الحب #احترام

[nanoosh30]

[nanoosh30]

#نور_حجه

عيد ميلادي الثلاثين

بكره يوم عادي، عادي الك و الها و لصاحباتي و جيراني بس مش عادي لأمي و لا لأبوي، مثل بكره قبل 30 سنه ماما صارت أم لأول مرة و بابا صار أب لأول مرة، و انا صرت أنا لأول مره! … لأ…بكره أهم من هيك بالنسبه الي، بكره راح أصير 30 سنه، بكره راح أدخل عالم الثلاثينات و أنا ما زلت “عزباء”. مش راح أكزب على حالي و أحكي انو عادي و الوضع “cool” و إني “alright” و انو “whatever”، المشكله اني فعلا كنت تمام و الموضوع ما ما كان ماخد حيز كبير من تفكيري و بالنسبه إلي شخصيا المعادلة أبسط من هيك بكتير، بس اللي حوالي الوضع مش عاجبهم و مصرين يحسسوني بخطورة و تأزم وضعي و انه العلاج وجب قبل ما تصير حالة العزوبيه عندي مستعصيه و يصبح علاجها ضرب من المستحيل و قبل ما المرض يتفشى ليفتك بسنوات عمري المتبقيه. امبارح و بمحض الصدفه واحدة من قرايبنا من بعيد و مليون خط تحت بعيد شفتها بالشارع، بعد السلام “حبيبتي اسم الله شو حليانه زمان ما شفتك صايرة بتجنني شو صاير معك خبريني!” أنا و بكل براءه “ و الله الحمدلله، أنا كتير منيحة خلصت ماجستير من بريطانيا بامتياز و بشتغل بشركه معروفه و شريت سيارة جديدة و انعرض علي مؤخرا منحة دكتوراه و عم بفكر فيها ” هي مع ابتسامه زرقا ما الها معنى أو داعي و كأنها ما سمعت و لا اشي من اللي حكيته “ ما خطبتي أو تزوجتي!” لأول وهله حسيت بالإحراج، بعدها بثواني حسيت بالغضب، و بعدها بأجزاء من الثانيه شعرت بالظلم و حسيت اديه سؤالها صغر كل انجازاتي و كان ممكن يقتل كل طموحاتي لو عقلي متل عقلها و تفكيري مثل تفكيرها بس الحمدلله انه ثقتي بنفسي مش متلها! واضح جدا إني بالنسبه إلها من غير زواج اعتبر انسانه مش موجودة أصلا و كأن الزواج هو العنوان لإثبات الوجود لجميع اناث العالم. جاوبتها بإبتسامه برضو ما الها أي معنى “لأ لسه!” “أها!! غريبه طب ليه!! شدي حيلك!!” أنا!! أنا اللي أشد حيلي!! انتو اللي شدوا حيلكم !! و لوني شخصيا لا أفضل نهائيا يجيني عريس عن طريقك ، و بعدين شو ليه؟ بالله هادا السؤال بالذات كيف أجاوبه؟ انتو شوروا علي كيف أجاوبه؟ على كل قررت أخده بجسن نيه و أفترض انه المره مش شايفه في أ�� عيب في شخصي و عشان هيك مستغربه اني مش متزوجه. “انشالله بحاول أشده، و مش غلط شدوا حيلكم معي كمان ,,, يلا معلش عندي موعد و لازم اروح. "طبعا حبيبتي!” بترد تبوسني و نظرة الشفقه بعيونها و دعواتها الي “بالسترة” معبيه الشارع ، مع انها فضائح زوجها منتشرة بالبلد و هو أولى مني بالدعاء اله بالستر. قررت اني اروح البيت و أختصر الناس خصوصا اليوم، لكن يبدو اني كان لازم أختصر البيت و أضلني مع الناس أرحم. أمي الحنونه واضح انها كاينه تبكي و ما كان صعب عل أبدا إني أحزر ليش بتبكي، بصراحه إحساسي اني خيبت ظن أمي بوصول عتبة الثلاثينات و أنا لسه مش متزوجه راح يقتلني، احساسي اديه نفسها تشوفني عروس و تجهزلي مثل كل بنات العيله عم يشلني، و شعوري ببرود حضنها و اشتياقه لبيبي صغير يدفي و يشبع من حنانه هو بالنسبة الي الضربه القاضيه. لكن موتي الحقيقي كان بنظرات أبوي اللي واضح فيها الخوف على مستقبلي و احساسه بأنه ملزم يوفرلي الأمان للماضي و الحاضر و المستقبل و هلا صار المستقبل بالنسبه اله مجهول و ما اله ملامح طول ما انا مش متزوجه. حتى المعايدات على الفيسبوك هالمره كانت غريبه و مختلفه، بتقدروا تحكوا كانت مجامله زيادة و حميميه بشكل واضح، و كانت أضعاف معايدات كل عام ، و كأن الناس افترضت إني بمر بفترة عصيبه بحياتي و احتياجي لهذه المجاملات و التشجيع هو في أوجه، صراحه…تشجيعهم صابني بالإحباط و حميميتهم حسستني اديه هدول الناس بعاد عني و مجاملاتهم كانت أتقل علي من جبل أحد لأنها فعلا كانت كلمات لا هو وقتها و لا كانت في محلها ، لأني ببساطه ما كنت أصلا محتاجيتهم! رجاءا….لا تجاملوني و لا تشجعوني أنا فعلا في أفضل حال و سعيده يمكن أكتر منكم، لا تحملوني فوق طاقتي بتوقعاتكم و لا بحبكم، لا تخلوني أستعجل و أسيء الإختيار لمجرد انكم بتتوقعوا مني أني بهالعمر لازم أكون متزوجة، لا تصغروا انجازاتي و تقيموا نجاحي في حياتي من خلال ارتباطي برجل …عيشوا حياتكم و خلوني أعرف أعيش حياتي…. #عيد_ميلادي_الثلاثين