walisanghampang-blog

[walisanghampang-blog]

Figma Link halin sa “The Legend of Zelda: Twilight Princess”

Subong nga adlaw, mahatag ako sang akon nga kritiko sa “Figma The Legend of Zelda: Twilight Princess Link DX Version” nga action figure.

 Ang “The Legend of Zelda” ang akon nga pinakapaborito nga mga video games kag ang video game nga ginhalinan sang action figure nga ini ang akon nga pinakauna nga nahampangan nga Zelda game. Amo na, may ara ini sang espesyal nga lugar sa akon nga tagipusuon. Sa videogame nga ini nagsugod ang akon nga pagpasimpalad sa kaharian sang Hyrule. Makalab-ot man ayhan ang halampangan nga ini sa pagkaespesyal sang video game nga ini sa akon? Lantawon naton.

 Nakabutang ang action figure sa pirme nga bulutangan sang Figma. Isa ka kahon nga may ara sang masinaw nga plastik para makit-an ang halampangan sa sulod. May ara sang mga litrato sang halampangan sa kilid, babaw, kag idalom sang kahon. May ara man mga litrato sa likod sang kahon nga gapakita sang mga gamit sang action figure kag mga sari-sari nga mga posisyon nga mahimo mo sa action figure nga ini. Pirme gid ako nanamian sa mga litrato sa bulutangan sang Figma kay kanami sang mga posisyon nga ginaubra sang photographer sa mga action figures.

 Ari na si Link kag ang iya nga mga gamit sa gua sang iya bulutangan. May ara sang duha ka klase ang halampangan nga ini, may ara sang “regular vesion”  kag may ara man sang “DX vesion”. Mas damo ang gamit sa “DX version”, amo na nga amo nalang ini ang akon nga ginkuha. Lantawon anay naton ang gamit nga ara sa duha ka klase. May ara si Link sang iban nga mga kamot nga pwede maislan. May ara siya sang kamot nga gainumol, gaabre, kag kamot nga pangkapot. Makit-an gid ang detalye sang iya nga guantes kag makit-an mo man ang iya nga mga kuko. May ara man ang “DX version” sang kamot nga pangkapot sa iya nga pana kag baslay. May ara man sang bulutangan ang mga kamot para indi mo madula samtang waai mo ginagamit. Dala man dira ang lain-lain niya nga hitsura nga pwede mo maislan galing napaslawan ako nga wala sang hitsura nga gayuhum. May ara man nga dala nga “Master Sword” nga may tagob kag taming. May iban pa gid nga gamit nga nadala sa “DX version”. May ara pana kag baslay, bola nga may kadena, “Claw Shots,“Ordon Sword”, kag buhok nga may ara maskara. Manami ang detalye sang mga gamit kag kaangay gid ini ang orihinal nga mga desinyo. May ara man ziplock nga bulutangan kag duha ka “figure stands” nga gabulig sa pagposisyon sa action figure kag sa mga gamit sini.

 Damo ang mga detalye sa action figure, makit-an mo gid ang mga tahi sa iya nga bayo kag ang gamay nga mga kadena sa iya nga hinganib. Ginpintuhuran man ang mga bilya sa iya sinturon kag iban pa gid nga parte sang iya bayo. Ginhimo man ang mga desinyo sa hinganib sa iya butkon kag botas. Isa lang ang akon reklamo sa paghimo sang action figure, sobra siya kamaskulado kon ikumpara sa orihinal niya nga desinyo. Damo ang posisyon nga mahimo mo sa action figure nga ini. Maggamit niya sing maayo ang iya nga mga armas, makaptan niya pa gani ang espada niya gamit sang duha niya ka kamot. Limitado lang ang paghulag sang iya nga tiil tungod kay malaba ang iya nga bayo. Kon ikumpara mo ang Link nga ini sa mga una nga nagguwa nga Figma Link, mas taas siya kag mas damo ang detalye. Depende nalang sa imo kon ano ang imo nga paborito nga desinyo sang karakter.

 Manami gid ang action figure nga ini. Damo sing gamay nga mga detalye nga ginbutang kag damo man ang gamit nga nadala diri. Kon sa akon lang, manami ini nga representasyon sa karakter. Reasonable man ang presyo, sa 6,000 yen (PHP 2,780) damo ka na makuha. Ginarekomendar ko gid ini kon naluyag ka man sa “The Legend of Zelda: Twilight Princess” o kon nanamian ka sa desinyo sang karakter kag gusto mo man magbakal sang manami nga action figure sini.

[walisanghampang-blog]

Ano ang blog nga ini?

Damo gid ang gakalatabo sa adlaw-adlawon sang pangabuhi naton, kon kaisa gakalipat man kita nga maghatag sang oras para sa aton kaugalingon. Kon gakatabo ini mas gabug-at pa gid ang aton nga mga problema. Gadugay ang mga ulobrahon nga dapat madasig, nagakaubsan kita sang gana nga atubangon ang aton nga mga responsibilidad, kag gakasubo ang kalibutan nga dapat masadya. Sa mga amo ni nga panahon, kinanlan naton magpahuway kag maghimo sang bagay nga aton pwede kawilihan kag makuhaan sang kalipayon, amo na nga luyag ko nga ipabalo sa inyo ang akon nga kalingawan, ang paghampang sang video games kag ang paghimo ko sang koleksion sang mga halampangan. Gusto ko ipabalo sa inyo ang akon nga kalingawan para kon maluyagan niyo man ini, may ara kamo makadtuan para sa mga hibaluon diri.

 Sa blog nga ini, masulat ako sang akon nga mga critiko kag paghunahuna sa mga video games kag halampangan agod makahimo kamo sang opinyon niyo tuhoy sa mga bagay nga ini. Ihambal ko sa inyo ang akon nga mga nanamian kag indi nanamian sa video game ukon sa halampangan. Tungaon ko man ang akon nga critiko sa lain-lain nga mga seksion para mas mahangpon ninyo ang mga bagay nga ini. Halimbawa, sa isa ka videogame, masulat ako tuhoy sa kanamian sang biswal nga aspekto sini. Ukon masulat ako tuhoy sa kanamian sang paghampang sa video game, kon masadya gid bala ini ukon indi. Mahangpan ko man nga may ara gid nga mga bagay nga indi kita magaugyon, amo nga ginahambalan ko na kamo nga ginarespeto ko na ang inyo nga mga opinyon. Akon lang ini nga mga critiko. Tani, bisan wala kita nagaugyon, may ara man kamo gihapon nga kuhaon sa akon nga ginasulat, bisan mga gamay lang nga ihibalo sa kawilihan nga ini.

 Indi lang mga critiko ang akon nga ipahibalo sa inyo. Isulat ko man ang akon nga mga karanasan sa akon nga kalingawan. Mga panugda sa pagbakal sang mga halampangan ukon panugda sa paghalong sa sini nga mga halampangan. Sa kalingawan nga ini, sigurado gid nga may ara ka nga maguba nga halampangan. Kon matabo man ina, amo na ini ang akon nga una nga panugda sa inyo: indi lang kamo magkabalaka gid kay halampangan lang ina. Damo pa kamo mabakal sa inyo kabuhi. Ipahibalo ko man sa inyo ang mga rason kon ngaa naluyag gid ako sa mga partikular nga video game kay amo gid na ang kamatuoran, may ara gid kita mga paborito nga mga bagay.

 Lain-lain ang aton nga mga kawilihan kag ginakuhaan sang kalipay galling may isa gid ka bagay nga palahero sa mga ini: mas masadya ang aton nga ginakawilihan kon may ara kita upod. Amo na, kon gusto niyo nga may ara kamo upod sa kawilihan sang video games kag halampangan, pwede gid kamo ka upod sa akon. Masulat gid ako kon mabasa kamo. Kon indi kamo naluyag sa akon nga ginakawilihan, pwede gid nga mag-upod ka man gihapon, wala lang kita kabalo, basi maluyagan niyo man ini sa ulihi. Tani mag-kitaay man kita gihapon sa dason, antes sini, maghalong kamo kag indi gid kamo magkalipat nga mas nami gid ang kabuhi kon may ara ka may ginahampang.