#yassmeena's words

[yassmeenamoustafa]

هل معقول !؟ أتممت ال29 من عمري !؟؟

هل تمزحون يارفاق ؟

انا لسة 15 بس كتكوت صغنن عبيط مينفعش يكمل في الكوكب ده خااالص 😅

بس يلا بقى شكلنا كبرنا بجد ومكنش عندي طاقة اتصور صورة السنة الجديدة فنقضي الاحتفال بدي😅

بس انا لو هرجع لوقت معين في الكوكب ارجع لزمن الصورة دي وابقى شاكرة الكوكب باللي فيه

ف السنة الجاية يكون ربنا قدرني أخترع صندوق للسفر عبر الزمن والمكان

وأحتفل بعيد ميلادي ال30 خارج البلاد ومحققة أحلامي والأهم ربنا راض عني🕊️🌿🤍

شكرا .. خلصت خطابي التاسع والعشرين 🤍🌿

كل سنة وانت طيبة يابت ياياسمينة وروحك مبسوطة🤍

[yassmeenamoustafa]

أظن أن تسفلته ! ادق تعبيرا وبلاغة يا دوستويفسكي !

اعذرني

دوستويفسكي - الفقراء

[yassmeenamoustafa]

عزيزي الإنسان

لازم تعود روحك على لحظة ما هيجي فيها اكتر شخص انت متعود عليه في يومك يقولك انا ماشي

أي إن كان السبب اللي ورا الكلمة دي

بمزاجه أو غصب عنه أو لظروف حياتية معينة فوق إرادته

او نفسيا مش قادر ولازم يمشي

المطلوب منك انك تتقبل ده بصدر رحب عشان انت مش مكانه ومدخلتش جوة روحه تشوف حاسس بإيه

وتقول أنا لو مكانه عمري ماهمشي..

بس خلاص آن الأوان أنه يمشي !

هنعمل ايه ؟ هنتقبل ونسلم ونب��سمله ونقوله يارب كل ايامك تبقى حلوة 🌿

ليه ؟

عشان دي الدنيا .. مفيش حد بيفضل ومفيش حاجة بتكمل للآخر إلا لو حد جه أجله ومات في وسط علاقة ما

غير كدة كله بيمشي وبيخلص

عود روحك تتقبل بس وتدرك وتهدي نفسك من جوة لو حسيت انك هتنهار.

[yassmeenamoustafa]

كلنا بلا استثناء عاوزين يكون جنبنا شخص بيحبنا حب صادق يخليك تطمئن لمجرد وجوده

بس الأهم من أنه يحبنا إنه يكون متأكد بنسبة 100% لإرادته بوجودك..

ودي حاجة هو مش بيقدمها ولا بيقولها بكلام دي حاجة انت بتحسها لوحدك كدة

لو محستهاش متوهمش نفسك بأي ذرة حب حتى لو كل اللي باين بيظهرلك ده

معادلة مكلكعة بس هتفهمها وتحسها لوحدك في أي علاقة عموما 🤍

[yassmeenamoustafa]

مفيش أسخف من انك تقابل حد بشعور ما وهو ميبادلكش نفس الشعور..

أي ان كان ايه هو الشعور

[yassmeenamoustafa]

انا مبحبش أتكلم في المواضيع الشائكة دي

بس بقى ينتابني بعض من العصبية كدة لما بشوف ست بتاخد دور رجل والعكس

لحد م الدنيا باظت

جملة " الرجل رجل والست ست " دي تحمل كم معاني ومواقف مش هنخلص لو اتكلمنا فيها

بس لو هتكلم من الجانب بتاعي انا .. ومن غير هزار عشان الإفيه اللي كان منتشر ده

كم الستات اللي بتعمل مليون حاجة دي واتحطت في مواقف أنها تهد الدنيا وتبنيها وتبقى جدعة وتقوم بمليون دور حتى لو محدش طلب منها ده

اتحطت في الموقف ده عشان ملقتش اللي يقوم بيه بدالها

او عارفة أنها هتقول كتير ومفيش حاجة هتحصل

ولو الرجل في الطبيعي بيتعامل على جملة الرجل رجل والست ست "السوية" مكنش هيوصلها لموقف زي ده

وفي حين ان الست قادرة تعمل مليون حاجة بردو مش من الطبيعي تقوم بيها لوحدها .. محتاجة دايما دايما حد تقول حتى لو بينها وبين نفسها انا عارفة انام بليل ومش خايفة عشان في سند ما في حياتي .. كم امان مش طبيعي

مع انها عارفة تحسس نفسها بإنها هتسند نفسها عادي بس سبحان الله تفرح اكتر وتطمن اكتر في وجود رجل ما

اللي نتوصل ليه في الاخر .. ان الست الجامدة اللي بنشوفها طول الوقت جواها جزء بيتمنى أن حد يشيل ده عنها مش لفكرة انها مش عاوزة تشيل حاجة ولكن لفكرة الشعور نفسه أن في حد جنبها

وللأسف للأسف بنات كتير بوظت كل الأفكار بشوية جمل طلعت مؤخرا كدة واني انا لوحدي اقدر اعمل كل حاجة فخلاص

التوضيح هنا لأي رجل عموما .. هي لو البنت فعلا في حياتها حد وطول حياتها حاسة أنها لوحدها بدون مشاركة ف انت لازمتك ايه ؟ "كشريك حياة" مش المفهوم الواصل لمعظم الناس أن انت ملزم تشيل مسؤلية وهي لا .. الفكرة فكرة مشاركة وسند وأمان

فليه كل واحد ميعيش دوره صح وكلنا نعيش في سلام

نشارك بالأجزاء اللي تخص كل واحد على أكمل وجه فنحس فعلا أن الست عايشة حياة الست والرجل عايش حياة الرجل مش كل واحد بيحارب التاني على دور مش دوره ؟

وعلى رأي Sia لما قالت :

But even Superwoman

Sometimes needed Superman's soul

ومن جهة أخرى :

يابخت اللي ربنا نصفها ورزقها برجل بجد !

وشكرا للي استحمل الصداع ووصل لحد هنا 😅

[yassmeenamoustafa]

وأخاف..

أتعود فأتعلق

أغير فأعشق

أنسى نفسي..فأضيع.

[yassmeenamoustafa]

التوبة الصادقة .. تُشعرك أنك في معية التواب ومُحاط بأمانه بطريقة لا توصف🌿

[yassmeenamoustafa]

انا مكنتش مستوعبة حوار الغيرة ده في الكلمات دي عموما الا لما جربت اغير على حد ومش قاصدة كان بدافع الحب الشديد جدا

بس انا طلعت غيرتي وحشة اوي اوي اوي

ومكنتش عمري هعرف نفسي ولا تصرفاتي العجيبة الناتجة من الغيرة الا لما اعيشها

وقتها بس عرفت قوة معاني كلمات الأغنية دي ويعني ايه حد يغير على حد بالطريقة اللي تحرق القلب وترهقه دي ودائما لما كنت بقول اني لما بغير على حد بتعصب عليه وببقى عاوزة أبلعه جوايا عشان احب فيه لوحدي مكنتش ببالغ ده كان شعوري حقيقي .. المهم

الحمدلله تخلصت من الشعور لما تخلصت من ذرات الحب اللي كانت مستخبية جوايا وعمالة تجري مني مش عارفة امسكها

المهم الشعور ولا اروع انك ترجع متغيرش على حد وتسيب اللي عاوز ياخده ياخده وفوقيه بوسة 😅

أيا داعيا بذكر العامرية أنني

أغار عليها من فم المتكلم

[yassmeenamoustafa]

انا اكتشفت دلوقتي اني اقدر أشيل على كتفي جبال بالحب ولا أشيل ذرة رمل وانا مش حابة !

وده ينطبق على العلاقات ✅

[yassmeenamoustafa]

اقولكوا حقيقة شوفتها في حياتي وانا عارفة أنها في حياتكوا لا سحر ولا شعوذة !

في مسيرتك في الحياة هتلاقي فجأة اللي هتحس أنه شبهك وبتلاقي معاه روحك ونفسك الحقيقية من جوة بلا أي تلوين

بس من وسط كل الناس هو الوحيد اللي مش هينفع يبقى ليك ومتسألش ليه..

مصمم تسأل ؟ ماشي

عشان دي الدنيا ولسة في خبايا انت متعرفهاش بس هتفضل زي الطفل الغبي اللي بيسأل اسئلة غير منطقية عشان انت مش عارف أن في خبايا انت متعرفهاش اصلا

انت مصمم بس انك تحقق اللي حاسس بيه وبتقول في سرك مش عاوز مبررات انا عاوز الشخص ده يبقى معايا وخلاص حاسس اني هرتاح ..

ممكن يبقى حقيقة وممكن يبقى شعور والحيرة هنا مش المشكلة

المشكلة انك هتسأل سؤال منطقي بحت الا وهو .. طب مادام مش هو ده ومش هيبقى ليا ليه قابلته وعرفته وشوفت فيه نفسي وروحي ومن حيث لا اعلم من غير قصد مني ولا نية ليه ؟

والحقيقة هنا مفيش رد على السؤال.

[yassmeenamoustafa]

لولا الخيال .. كانت هتبقى ايامنا كلها بائسة

الخيال حتى لو حدوده دماغنا وحاجة مبتحصلش

بس ع الأقل يبقى عيشنا الشعور في خيالنا

مش هيبقى ممنوع في الخيال والواقع ! 💔

[yassmeenamoustafa]

لسة كنت بقول كدة امبارح لحد بيتخانق معايا اني ليه دايما مش شغوفة اني اعرف حد واحب واتجوز وبلا بلا

وقولت أن ده رزق من ضمن ارزاق ربنا ومفتوح باب للاختيار فيه مع اني مش مقتنعة أنه اختيار وان كل حاجة رزق مكتوب من ربنا

بس مقتنعة اقتناع تام أن ربنا مقسملنا كل حاجة بالتساوي ومحدش زايد عن حد في حاجة فلو الحاجة دي مجتش لشخص ما هيتحط النسبة بتاعتها في رزق تاني ويبقى اكتر ومتصاحب بشعور العوض والراحة النفسية ليه

ربنا كريم وجميل

مش شرط يبقى الونس ده بني ادم تكمل معاه حياتك ممكن ربنا يخليك في حياتك ونس لنفسك

ويمكن وجود ربنا ولطفه المحاوطك هو الونس الأهم على الاطلاق 🌿

جايز هنلاقي ونيس للعمر، وجايز ملناش نصيب.

[yassmeenamoustafa]

الإنسان محشور مابين فكرتين اصعب من بعض

إدراكه بإن مفيش حاجة في ايديه يعملها

وسؤاله المُلح جواه ب ها المفروض نعمل ايه يريحنا ؟؟؟

[yassmeenamoustafa]

عارف لما توصل لدرجة أنك تتمنى انك مكنتش حبيت اللي حبيتهم

وتتمنى تحب اللي المفروض يتحبوا عشان هم فعلا يتحبوا بس لاعمرك هتحبهم ولا هم هيحبوك !

ولا عمرهم هيكونوا ليك !

بس هيفضل جواك شعور غريب غريب عجيب ناحيتهم

شعور راحة عايز تزيله مش هتعرف

ومش هتعرف تحبهم عشان مأذي من غيرهم قبلهم

وتاني من كل قلبي

يلعن أي شعور تعلق بحد لا هتبقى ليه ولا هيكون ليك

بس هو حاجة وهتفضل ملازماك تقهرك وخلاص 💔

[yassmeenamoustafa]

نتأقلم كدة ياشباب بكل أريحية بإن دي مش الحياة اللي مفروض نعيش فيها دايما وليها نهاية عشان مش دي الصح لينا ولا الباقية

بلاش ندبدب ف الأرض بقى احنا كبرنا على الكلام ده

نتأقلم ونستنى الجنة بقى 🤝