#تشبيهات ياسمينا العجيبة

[yassmeenamoustafa]

لو هوصف الشعور بالظبط

اعتقد كإن شبابيك قلبي مفتوحة وفي هوا داخل خارج هوا ساقع وبيلسع في نفس الوقت

كإن في بداية عاصفة كدة والشبابيك دي مش مقفولة كويس بتتخبط على الحيطان كدة مع لسعة الهوا دي

ده شعوري بالحرف..

الشعور متعب وبقاله كتير اوي ومش راضي يبطل بجد وبيبدأ اول ماصحى من النوم.

[yassmeenamoustafa]

كنت بفكر اني نفسي آكل مانجا دلوقتي بس بديهي مفيش فكانت فكرة

فتحت التلاجة لاقيت كوباية فيها عصير افتكرته برتقال وقولت حلو بردو نعمة بدوق طلع مانجا !!

انا بس نفسي نعمل تحويل بسيط اوي نحط الحب مكان المانجا أتمناه الاقيه قدامي ويطلع بالطعامة اللي انا كان نفسي فيها 😅🤍🥭

لطفك مغرقني يارب😅🤍

[yassmeenamoustafa]

لما ببدأ احس اني هبدأ أحب أو اصاحب انسان جديد بكرهه بسرعة اوي عشان مش عاوزة وجع دماغ من دماغي

الكلام يبان غريب بس ديييييب اوي

[yassmeenamoustafa]

عارفين أحلام العصاري ؟

انا عندي حالة اسمها "بكاء العصاري"

تيجي ساعة العصر كدة متعرفش انت بتبكي ليه

بس ممكن نعالجها بكوباية شاي نعناع بتاع العصاري بردو 😅

[yassmeenamoustafa]

هل أنا شخص يستاهل أنه يتبعتله كم الرسايل دي من ربنا !

انا حصلي اغرب موقف دلوقتي وقاعدة بسأل ليه ؟ ليه فتحت شوفت ده دلوقتي حالا ؟؟ طب لو هي رسالة من ربنا رسالة لإيه وعلى ايه !

انا في الطبيعي مبركزش مع ميموريز الفيسبوك وبعديها انا مبقتش افتح فيس بوك اصلا ! فتحت دلوقتي وشوفت بوست الميموريز اللي بيبقى اول حاجة قدامنا ده وقولت أما اشوف كدة كنت كاتبة هبل ايه في اليوم ده !

طلعت كنت كاتبة بوست لحد معين بس اللي يشوفه وكتبت فيه الجزء ده ولا داعي لذكر الباقي وكإني عندي حاسة سادسة اني هقعد دلوقتي اشوفه واقراه تاني واقول ياريتني ماكتبته !

بس الغريب اني بضحك على الزمن الغريب

ومش لاقية تعبير يوصف ذهولي بإني كنت في حالة وبقيت في حالة تانية عكسها تماما

انا مش عارفة حكمتك يارب من إن ده يحصل بس هسيب الكلام ده هنا يمكن يفكرني بإني ممسكش في حاجة في الدنيا وافتكر انها دايمة

وتبقى اصدق مرة هكتب فيها هاشتاج ياسمينا في الغابة لحد مانطلع منها ..

اللي ضحكني ايه ؟ اني زعلت بنفس الطريقة اللي قلقانة ازعل بيها 😅

لا دائم الا وجهك الكريم 😅

[yassmeenamoustafa]

كان في فيديو معرفش هو منين أو مين دول

بس كان حد بيقلب قهوة بسرعة بسرعة واول ما حبيبته مسكت ايده بدأ يهدى

انا عاوزة حد يعامل دماغي وقلبي بنفس الطريقة يهديهم عشان والله هيموتوني في مرة 😅

[yassmeenamoustafa]

فيه كلمة كدة عرفتها مؤخرا وبقيت استخدمها لأشخاص معينين كدة الا وهي "باكس" او "بكس" مش متأكدة اوي بس عارفين مدى رخامة الشخص لما يوصلنا لإننا نقوله الكلمة دي معناها كبير بالنسبالي درجة رخامة لا توصف

انا مش هوصف بيها شخص المرة دي أنا هوصف بيها

حياااتتي

حياتي بكسة رخمة رزلة غلسة واي حد عارف اي معنى يقوله بردو

بس بنعمل ايه بعد مابنفضفض بنسكت ونقول الحمدلله

حكمتك يارب أنا بس بطلع اللي جوايا عشان مفرقعش

بس انا من جوايا بضحك على حياتي وبقول الحمدلله والله 😅

[yassmeenamoustafa]

كم مشاعر بيعجنوا في بعض جوايا وانا قاعدة اتفرج عليهم زي الاب اللي قاعد حزين أنه معرفش يربي عياله وبيقطعوا بعض قدامه

💔🥲

[yassmeenamoustafa]

انا اكتشفت اني مينفعش اخد حد مش حنين او مش بيتعامل معايا بقلبه وبلين ولطف كدة العقل في العلاقات دي مبيإكلش عيش زي القلب في علاقات كتير مبيإكلش عيش

يا هقتله ياهقتله إنما جو استحمل عدم وجود حنية دي عشان المركب تمشي هسرح وانا قاعدة في المركب أخرم فيها خرم يدخل ماية فتغرق !

يعني كدة كدة غرقانة !

هيطلع يقولي بطلي الأحلام الوردية دي ! هقوله وليه لا ؟ ليه منعيش في ورد مادام مقتنعين أنه مش دايم بس وجوده بيحلي حاجات صعبة تانية..!؟

انا هسكت احسن مش هكمل .

[yassmeenamoustafa]

عاوزة date مع جيسون استاثام ونشرب كوبايتين شاي بالنعناع ونتكلم كتير اوي

هو الميكس غريب بس انا بحبه اوي

وعاوزة اتكلم معاه حقيقي

[yassmeenamoustafa]

جوايا دايما صوت بيقولي انت لازم تسعي ياياسمينا وتقومي وتتحركي عشان محدش هيجيبلك كل حاجة لحد عندك لازم تحاولي وتتحركي بنفسسسك

اسمع صوت أعلى منه بيزعق للصوت ده ويقوله بس يلا

انت مش شايفها تعبانة ؟ ريحي ياحبيبتي وفكك من العبيط الفرهود ده

وبدون مبالغة دي حياتي كل يوم 😅

[yassmeenamoustafa]

وصلت للمرحلة العمرية اللي تخليني بكل تلقائية اقول

مسم

بعد كل كوبليه لأم كلثوم يأثر فيا 😅

[yassmeenamoustafa]

جماعة فكرتوا قبل كدة

لو كنت أي شيء غير إنسان .. كنت تحب تبقى ايه ؟

[yassmeenamoustafa]

كلنا عارفين دور البرد اللي بيبقى في أوله وبنحس بحاجات بسيطة كدة في جسمنا نعرف اننا داخلين على دور برد هيقتلنا فبنحاول بكل الطرق نتجنب أنه يزيد ويخلينا ننام في السرير بجد ونطول ايام

ده اللي بحاول اتبعه مع نفسي دلوقتي قبل مادخل على حب جديد عارفة أنه هيهلكني...