#tänz | Explore Tumblr posts and blogs

ourworldofwderlust · 7 years ago

Photo

24.11 - 26.11.2017 MAI CHAU au Diätcamp gnennt! :-P

am 24.11 sind mir am halb achti dusse i de chelti gstande und hend uf euse Guide gwartet, will hüt gönd mr uf MAI CHAU! yippieh. Imne schwarze Van isch de Typ vorgfahre und mir sind ihgstiege. Eich hets sölle en Gruppereis sii, aber mir sind dänn nur zdritte gsi; de Oli und ich uuuund t Martina. En elteri Dame. Soone liebi! Mir sind zwei Stund gfahre und hend denn ah somen Märt inkl. Ussichtspunkt en Pause gmacht. Ich han euch ja verzellt wie chalts in Hanoi isch? das isch nüüüüüt gsi im Gegesatz zu da. Aso ich han mini Leggings ahgha und han drüber namal es paar Hose ahgleit und öbe drü jaggene. Mir händ bi dem Märt “Sticky Bamboo Rice” probiert mitere feine Gwürzmischig. Uuu mega guet gsi!!! Nach dem mr en Rundi gfrohre händ, simmmer schnell wieder is Auto gstiege und witer gfahre und zwar für witeri 2,5h. I de Lodge ah cho, hend mr en Grüentee becho und händs ih euses Bungalow chönne. Es meega herzigs Bungalow. S hät es Himmelbett gha, s Bad isch aber halbe dusse gsi, was bi dene Temperature nöt so toll isch uuund en chlini Terrasse, wo en schöne Garte zur Ussicht gha hät. Denn sind mr grad witergange und zwar hets zmittag binre Familie gä. Sehr gsunds Esse, will die ja kein Migros und Coop hend wie mir und alles selber ahpflanzet, hets das au zmittag gä. aber isch fein gsi. Währendem zmittagesse sind 2 Päärli mit ihrne zwei Töffli verby cho. Völlig verlore. Sie händ nöt gwüsst, wo ane sie müend und was sie sölled gseh und na dezue ischs verdammt chalt gsi. Bini grad froh gsi händ mr öber gha, wo sich uskennt. Nachm Zmittagesse händ mr Velo’s usglehnt und sind dur t Gegen gfahre. Wunderschöni Landschafte, schüüchi & uu herzlichi Lüt uuund gaaanz viell Schmetterling!! Absoluti Hammer! und öbe 5 Hünd sind mit eus mit gloffe haha :D S Velofahre hät au gege t Chelti ghulfe.

Nach dem wunderbare Namitag sind mr zrug it Lodge gange. De Oli und t Martina sind na chli dur dä Garte vo eusere Lodge umegschlenderet und de oli het na chli Drohne gfloge.. was ich gmacht han? schnell ih euses Bungalow zrug grännt, mis Tolino gschnappet und samt allne Kleider under t Bettdecki. Es guets Bueche glese und nüüüme welle ufstah, aaaaber s hät ja na z Nacht gä. Oke, dass schaffi!! Für s Esse stahni uf und gang i die iiischalti wält usse. (Nöt, dass es bi eus im Bungalow wärmer gsi wär. Ich glaube sogar s isch chälter gsi haha) 1,2 uuund drü - schnell usse usm warme Bettli!! Führe gfloffe, wos znacht scho parat gsi isch. Wieder ganz gsund; riis, Chicken, Gmües, Suppe! Bin glaubs ih mim Lebe nanie so froh um en Suppe gsi. haha. Ebe, alles Bio das Znachtesse. Rächt schnäll sind mr fertig gsi mitm esse und mir händ mit dä liebe Martina na chli gschwätzt. Sie isch vo Holland und en wahnsinnig liebe Mensch! Scho schöön wer mr so alles ahtrifft uf Reisene. Inere Stund gits na en Show für eus aber bis döthi namal ab is Zimmer zum eus chli ufwärme. Punkt achti sind mir zvierte inkl. eusem Guide uf eusen Stüehli gsässe und händ gspannt gwartet. Natürli wie überall au hend mr Chinese ih eusem Hotel gha. Die sind au gspannt uf t Show gsi. sooo, die erschte drü Tänz vo dene herzige Ladies sind lässig gsi. Schön zums mal gseh. Vom Butterflydance bis zum Lovedance - alles händs gä! Aaaaber s luschtige isch s letzte gsi. Ich n��nns “S Vietnamesische Gummitwist” haha. Und zwar funktioniert eso: Öbe sächs Lüt sind ah dem lustige Spiel beteiligt. Am Bode knüüdlet/Sitzend fangt s ganze ah. Sie hend so Bambusstöck und jewils zwei Lüt hebet zeme zwei vo dene Stöckli und ueeepaa los gahts. Im Rythmus bewegets die und du muesch denn drüber springe haha. Nei leck, muen ich lache... Die Fraue sind dänn natürli vo Publikum Lüt go hole.. Klar oder. De Oli und ich sind mit einre mit... HAHAHA. Mich verbesets jetzt na. Churzgseit; de Oli isch immer zschnell gsi, eusi netti Dame immer voll im Rythmus und ich hinedri, sodass “pääm, tätsch, buum” mini Füess vo dene Bambusstöck verhaue worde sind. Was mich nurna meh zum lache bracht het.. und das widerrum het dezugfüährt, dass mini Füess na me vo dene blöde Bambusstöck iklemmt worde sind. Die armi Frau het sicher denkt mir sind nöt ganz putzt. Aber hey, s isch en luschtigi Erfahrig gsi. (Video im Ahang.. und nei, nöt, dass vo mir undm Oli. Mir händ zum Glück keis hahaaha) Verby ischs aaber nanig, denn ezt fangt “t Suuferei” vo de Vietnamese erscht rächt ah. Ines Gfäss häts ihre Wiii inegschüttet und öbe siebe Bambusrööhrli inetätscht. Ueeepa, Drink, Drink, Drink... und mir natürli probiert.. Leeeck, isch das gruuuussig gsi! Ui nei, wie öbis, wo abgloffe isch häts gschmöckt. Und die immer wieder; DRINK, DRINK,DRINK und mir so denkt; NOO, NOOO,NOOO PLEEEASE NOOOOOO! hahaha. Ach, isch das luschtig gsi. Soo luschtig, dass mir t Chälti für 2 Stündli vergesse händ. Ab is Zimmer und früäh go pfuuuse. Morn wird en strenge Tag...

25.11.2017 - Mai Chau / Diättag Nummer 2 Nanie hani soo fescht welle im Bett bliebe wie hüt!! es isch soooo soo chalt. Ich chas gar nöt in Wörter fasse. Mol, eich scho; s isch so als würsch dusse schlafe. Sehr schwer ischs eus gfalle us dem warme Bett ussezcho, aber mir händ eus parat gmacht und sind führe go zmörgele; Green Tea, Pancakes, Banane, frische Honig, Eier und Toastbrot. Isch fein gsiii! Zrug is Zimmer, Trekkingschueh ahgleit, Rückseckli packt und ab gahts. Hüt gömmer 12 Kilometer go wandere. Am Morge sind mir am nüüni losgange und sind eifach wieder duur unglaublichi Landschafte duregloffe und s schöne isch gsi, dass es wiit und breit KEIN EINZGE TOURISCHT gha het. Defür umso meh Schmetterling!!! Han ih mim Lebe nanie sovill Schmetterling gseh; chlini, grossi, farbigi - eifach alles! Chüeh und Wasserbuffalo’s hend mr au ganz vili uf eusem Trekking ahtroffe. Letzteres sehr ungern, da euse Guide immer gseit het, dass die sehr gföhrlich und aggressiv sind und ich jedes mal schier en Herzbarage becho han, woni die gseh han. Anyyway, mir händ eus scho langsam ufs zmittagässe gfreut. uund gesse händ mr binre Familie dihei. Das händ mr uuu schöns gfunde. Intressant isch gsi, dass de Bode vo Ihrne Hüttene us Bambus gmacht sind. Wenn mr s erscht mal ue gaht und umelauft, denkt mr mr gheit jede Moment abe, aber dem isch nöt so. Sie händ amal sogar riiiese Feschter ih dene Hüüser.. Bis zu 50 Lüt! Wowie!!! S isch aber au bewundernswert wie die lebet.. Vor allem ih dene chalte Täg. Dene ihri Hütte isch praktisch dusse.. Heizig kennet die nöt. Mir händs scho guet dihei! Nichts desto trotz sinds sooo liebi Mänsche!! De Husherr het eus sogar Wiii ahbote.. Gemäss em Guide isch das sone Art Willkommensgeste. Ja, dänn chan mr nöt ablehne. Hahaha am Oli sis Gsicht isch U N B E Z A H L B A R gsi!! Bild dueni au na uelade!! Ich han nöt trunke.. bis de Husherr namal cho isch und mit mir het welle ahstosse.. Ja super oder.. haha. Eis ganz chlises Schlückli hani gna.. uuuui, s hät mi hineusse tätscht. Kei ahnig, was de mir da ihgschenkt het. Nach dem feine Zmittagesse (natüürli wieder alles seehr gsund!!) isch euse Hike wieder witer gange.. Namal es paar Stündli dur Wald, Flüss, Riisterrassene usw. gwanderert. Bettina, wenn das liesisch; ja, ich bin so gwanderet wie mir damals für 2 Mönet!! Wienes ÖÖMI! De Driver het immer schön uf mich glueget, dass mich nirgends uf de Latz haut haha. De Hike isch würki soooo soo toll gsi! Als letzt hend mr na imne Dörfli ahghalte und ganz viiil Chind gseh. UU schüch sinds gsii. Immer wenn de Oli Kamera füührezückt het, sinds grad wäggrännt und händ glachet und gschroue haha. T Martina het en Packig Lolipops debbie gha und hets de Kids gä. Ganz schüüch hendses ahgna.. usser ich, ich has grad sofort gna, wo sie mir na eis ahbote het. hahaha. Ui, isch das lang her sit ich so eine gha han!! Ihr au? yummsyumm.

Und ezt zrug it Lodge fahre. Han soo dringend ufs WC müsse Leute und die Strasse vo dene sind nöt grad fördernd gsi, dassi mir das ganze chan verthebe.. Unde ufe und abe und ufe und abe hets eus im Auto umegschlüderet haha. Chönd eu schomal vorstelle wie schnell ich us dem Auto is Zimmer gsecklet bin. Denn hets wieder es meega gsunds Znachtesse gä und ab is Zimmer. Hüt hend mr eus gseit mir gönd go Dusche.. Ich meine,s isch soo verdammt chalt.. und denn na dusse dusche. Mal ehrlich, wer macht das freiwillig?? ja, mir ghöret au nöt zu dene. Aber die lieb Martina het gmeint es tögi u guet. Oke guet, euse strategische usdenkte Plan: Alles parat mache, Handy ihstecke, Wecker stelle, Pischi parat mache, abschminke (Aso nur ich, de oli nöt haha), demit mr nach de Duschi nurna chönd is Bett renne und eus kein ZENTIMETER meh müned bewege. Heiss, heiss, heiss - so hend mr duschet!! S hät würkli u guet ta. mir händ ih dere Nacht 13 Stund gschlafe. Soo guet!!

26.11.2017 - Letzte Tag vo Diät/Sportcamp

Au hüt sind mr wieder früäh ufgstande und go zmörgele. Hüt isch de einzig Tag, wo t Sunne würkli schiiint. Nachm zmorge wieder Trekkingschueh go montiere und go laufe. Dasmal nur mit eusem Guide. Ernännenswert isch au dass de Driver all eusi Trekkingroutene kennt het, da er da ufgwachse isch. Euse Guide dementsprechend nöt chöne.. Was au dezue gfüährt het, dass mr am Endi vo eusem Hike imne Wald gsi sind und euse Guide gseit het: da abe müend mr... han leider keis Bild, aber lönds mich so beschriebe, dass mir all drüü ufeimal gseit händ. WAAS??? DA ABE??? WEISCH WO MR SIND?? s isch steil durab gange und alles volle Gebüsch, rutschige Bamboobletter und Bäum. Immer wieder ischr stah bliebe und het chli überleit, wo mr duremönd. Äh mol ja, so fühlt mr sich sicher und geborge hahah. Dur jenstes Zügs simmer gwanderet. Einisch hend mr sogar be 3-4 CM Abstand vomne Biendlinescht gha, aber hey, susch alllleees eaasypeasy!! Mir händs aber na gschafft. Logisch. Such chönti ja das nüme schriebe. Danke liebe Guide! Mir händ ufm Wäg au ganz viiil Welpe gseh, soo süess!! Eis isch gaanz allei im Nirgendwo gsii. Und mir händ denn sis Dihei ufgsuecht. uu süess isch gsi. Und eis Hündli isch zwüschet Äst amne Fluss entlang stecke bliebe. Wo de Guide im zur Hilf geeilt isch, hettr en fascht t Bisse, was s Befreie vo dem Hundi relativ erschwert het. De Oli und de Guide hends aber nacher no gschafft.

Nach dem schöne Wandermorge gahts wieder ab uf Hanoi. 5 Stund Autofahrt ligget vor eus. Schön gsi du wunderbars MAI CHAU! Danke, dass eusi Kilo wegpurzlet sind und mir so traumhafti Täg gha händ.

Für die Nacht händ mr es ganz günstigs Hostel buechet gha, da mr nur ein Nacht händ müsse übernachte und am nächste Tag gahts scho wieder uf die nechsti TOUR!! Im Hostel ahcho, ihcheckt und alles is Hotelzimmer ta. Wüsseder was mr als ersts gmacht händ? Nach drü täg nur riiis gmües, riis gmües und sooovil sportliche Aktivitäte... Hä? wüsseders?? ...

...

klaar, bingo! Pizza und Pasta Resti go ufsueche und go iiineebiege. Restaurant 4P sölls sii! Verby gange und die hend eus gseit, dass sie erscht inre stund en tisch frei händ. Jaa eaasy. Gits halt erscht am halbi nüüni znacht. Defüür händ mr na Zyt für de absoluti phänomenali EIEEERKAFI!!! De gits ebe nur im Nordvietnam. Ah Isch de guet!! t Creme obedra schmöck sowie, wenn mr d Tiramisu macht und denn t Schüssle uslecke chan! hell yea! so guet! Denn sind mr na dur dä NIghtmarket! Wie ich die Nightmarkets liebe! Ihr au?? Nöt mal öbis z chaufe sondern eifach dure zschlendere. Ups! scho halbi nüüni! Schnell zrug grännt. PIZZAAAA mir chömed!! es isch uu fein gsii. zrug is hotel und go pfuuse. Morn gahts wieder los uf es AAABENTÜÜÜÜR. Guet nacht liebi Lüt.

6 notes · View notes