#iyasa eris efiana

[diiah99js-blog]

SEWU DALAN

Srengenge isuk wis ngetokake sinare. Ing pinggir dalan wis ana bocah cilik sing umure kira-kira 13 tahun, bocah kuwi pawaane sedengan ora dhuwur nanging ya ora endhek-endhek banget. Bocah kuwi jenenge Agus.

           “Gus, piye wis oleh akeh ta?” pitakone Roi marang Agus.

           “Alhamdulillah, wis oleh setengah krenjang.” wangsulane Agus.

           “Ya wis Gus, ayo mulih wae. Supaya botol bekas iki bisa didol menyang tukang rosok, banjur awakedhewe bisa ndang oleh dhuwit.” pangajake Roi.

           “Iya Roi.” wangsulane Agus cekak.

           Nglumpukne botol bekas iku wis dadi kegiyatan sabendinane Agus. Iku dilakoni supaya bisa digawe ragat urip sabendinane. Agus lan Roi wis teka ning tukang rosok.

           “Iki le dhuwite saka botol iki.”ucape Pak rosok karo ngelungne dhuwit menyang Agus lan Roi.

           “Inggih pak, matur suwun.”jawabe Agus lan Roi bareng-bareng.

           Ing dalan Agus lan Roi lujak-lunjak amarga kesenengan oleh dhuwit. Olehe dhuwit ya ora sepira nanging kanggo bocah sing kaya Agus lan Roi iku dhuwit sing gedhe.

           “ Bisa mangan enak dina iki Gus.” Ucape Roi.

           “Ndak lah, aku mangan kaya biasane wae, turahane arep takcelengi.” Jawabe Agus.

           “Nyelengi? arep kok gawe apa Gus?” pitakone Roi marang Agus.

           “Sapa ngerti aku bisa sekolah.” Jawabe Agus.

           “Awakmu pengin banget sekolah? Ndak mungkin Gus. Kanggo bocah kaya awakedhewe mangan wae angel, apa maneh sekolah dhuwit saka ngendi?”

           “Merga iki aku nyelengi, supaya dhuwite bisa nglumpuk akeh. Awakmu ora pengin ta sekolah?”

           “Sekolah? Ndak, aku ora pengin. Sekolah oleh apa? Dhuwit? Ora kan?” jawabe Roi karo rada nyolot.

           “Sekolah iku oleh ilmu, sekolah  bisa nggawe awakedhewe pinter banjur awakedhewe bisa nggolek penggaweyan sing luwih apik tinimbang sing saiki Roi. Iku sing paling penting. Awakmu pengin ta terus-terusan urip sara?” panjelasane Agus

           “Karepmu Gus.” Roi langsung ninggalne Agus tanpa pamitan dhisik

           Penggaweyane Agus ora mung nglunpukne botol plastik wae, Agus uga nduwe penggaweyan liyane yaiku dodolan koran. Iku dilakoni Agus kanggo ngewujudne impiane, senajan iku angel. Olehe dodol koran pancen ora akeh nanging iku tetep disyukuri Agus.

           Agus mubeng-mubeng ngiderne koran. Kawit saka pasar banjur pindah menyang prapatan bangjo, banjur pindah maneh menyang salah sijine kampus sing biyasane diparani Agus. Dina iki Agus kesel banget amarga wis mubeng tekan ngendi-ngendi nanging korane Agus durung ana sing payu. Banjur Agus leren menyang lungguhan pinggir dalan. Karo lunggung Agus terus nawak-nawakne korane menyang wong liwat ning ngarepe Agus.

           “Pak Buk, mboten mundhut koran?”

           “Ora le” jawabe salah siji wong sing liwat.

           Agus nglamun ing pinggir dalan. Agus mikirne nasibe sing saiki, beda adoh karo telung tahun kepungkur. Kawit wong tuwa lorone Agus seda, Agus malih urip dhewe. Ora ana sedulure sing gelem ngopeni Agus, kawit iku Agus ora sekolah maneh.

           “Gus!” Celuke wong lanang sins marani Agus.

           Lamunane Agus langsung buyar amarga kaget ana sing nyeluk dheweke. “Oh, Mas Radit ta? Saka ngendi Mas?” Pitakone Agus marang Mas Radit.

           “Ya kaya biyasane, mulih saka kampus. Kok dengaren wis sore kok durung mulih awakmu Gus?”

           “Iya Mas, dina iki koranku durung ana sing payu.” Jawabe Agus.

           “Lek ngono aku tuku siji wae”

           Mas Radit wis setahun kenal karo Agus. Senajan durung kenal suwe, nanging Mas Radit apikan banget karo Agus. Mas Radit akrab banget karo Agus, malahan wis nganggep Agus kaya adhike dewe. Mas Radit uga wis weruh ngenani permasalahane Agus telung tahun kepungkur. Mas Radi kerep banget tuku korane Agus, sakliyane iku dheweke uga kerep nulungi menawi Agus nduweni masalah.

           “Oh iya Gus, aku mrene mau pengin ngomong karo awakmu. Aku arep mbukak toko buku, panggone ning ngarep kampusku. Ora toko gedhe, tokone mung cilik. Merga iku, aku pengin ngajak awakmu kerja ning tokoku. Tinimbang dodolan koran panas-panasan, piye awakmu gelem kerja ning tokoku?”

           “Iki tenanan ta Mas? Lek ngono aku gelemMas, gelem banget malahan.” Jawabe Agus.

           “Ya tenan lah, sesuk awakmu bisa langsung kerja tak tunggu ning tokoku, jam sanga awakmu kudu wis teka.”

           “Gampang iku Mas, aku ndak bakal kasep. Nanging aku durung ngerti apa wae sing kudu tak lakoni sesuk.”

           “ Awakmu ndak usah bingung, sesuk tak warahi apa wae tugasmu. Ya wis aku mulih dhisik ya Gus.”

           Agus teka ing toko tepat waktu. Agus ora pengin kasep ing dina kapisan dheweke kerja. Teka ing toko Agus langsung nyetuki Mas Radit, banjur Mas Radit nerangne menyang Agus tugas-tugas sing kudu dilakoni. Agus wis ngerti apa sing diterangne Mas Radit, senajan ta isih rada bingug. Agu uga dipercaya Mas Radit kanggo njaga kasir.

           Ing dina kapisan, wis akeh sing tuku menyang tokone Mas Radit. Nganti Agus kebingungan ngladeni pelanggan sing tuku. Dina wis rada sore pelanggan sing tuku wis rada sepi. Mas Radit teka ning toko sakwise mulih saka toko.

           “Piye Gus lancar?” pitakone Mas Radit.

           “Alhamdulillah Mas, pelanggane rame banget. Aku nganti kebungungan.” Jawabe Agus.

           “Nanging kabeh lancar ta, ora ana masalah?” pitakone maneh marang Agus.

           “Ora ana Mas.” Jawabe Agus.

           Telung sasi wis kliwat. Saya suwe tokone Mas Radit tambah rame, amarga akeh mahasiswa sing melbu metu saka tokone Mas Radit. Agus seneng banget. Merga kerja ning toko iki Agus bisa nyelengi kanggo dheweke sekolah. Agus wis nduwe rencana yen dheweke bakal daftar sekolah sasi ngarep. Rencana kuwi wis dipikirne Agus tenanan.

           Agus karo Mas Radit sigek-sigek amarga jam wis nuduhne jam wolu bengi, pratanda tokone arep ditutup. Sakdurunge tutup toko Mas Radit ngomong menyang Agus.

           “Gus, awakmu ndak pengen ta sekolah maneh?” Agus kanget krungu pitakone Mas Radit.

           “Pengen banget Mas, malahan aku wis nduwe rencana bakal daftar sekolah sasi ngarep.” Jawabe Agus

“Ndak usah nanggu sasi ngarep, minggu ngarep awakmu tak daftarne sekaolah. Biayane sing nanggung aku.”

“Nanging Mas.....” omongane Agus kandheng amarga Mas Radit takon.

“Nanging nyapo? Ndak usah nolak aku wis nganggep awakmu kaya adhikku dhewe. Bathine saka toko iki saya suwe saya akeh, bisa tak gawe nyekolahne awakmu.”

“Inggih Mas, matur suwun banget. Sampeyan apikan banget karo aku padahal aku iku dudu sapa-sapane sampeyan.”

“Iya Gus, kaya karo sapa wae.”

Agus langsung ngrangkul Mas Radit. Luh tumetes saka mripate Agus, iki tangisan merga rasa syukure Agus marang Gusti Allah, amarga wis nyetukne dheweke karo wong sing apikan banget kaya Mas Radit. Impiane Agus bisa kewujud amarga pitulungan saka Mas Radit.

                                                     RAMPUNG