#-نفس بعض ناس-🌚

[ii2xj]

Ouch Something cute happened to me!

[sarrah]

جارنا يقول علينا إيه؟

عمو اللي ساكن في الشقة اللي جنبنا من ساعة ما والده توفى الله يرحمه وهو تزوج وسكن جنبنا مبنسمعلهمش صوت حرفيًا، ناس طيبين متربين من تلت لخمس مرات كدا، مشوفناهمش مثلًا غير خمس ست مرات في حياتنا، واحنا ساكنين جنب بعض بقالنا سنين، المهم امبارح لما رجعت كان هو راجع من صلاة العشا وطالع قدامي، فتأخر وخلاني أطلع، وطبعًا أنا في قمة إحراجي مبقيتش عارفة أطلع السطح طيب استناه يدخل وبعدين أنزل بيتنا ولا أعمل إيه طيب؟ لإن لو طلعنا في نفس الوقت شقتنا هتكون مكشوفة ليه واللي هتفتحلي بكل عفوية هتكون مكشوفة ليه شكلًا وصوتًا، فخدت السلم في ثواني علشان ألحق أسبقه وأدخل بيتنا قبل ما هو يوصل لبيته، يعني كنت هتطمن أكثر لو هو طلع الأول وأنا طلعت على مهلي براحتي وبمراعاة ظروفي الصحية، لكن لأنه متربي من تلت لخمس مرات استنى تحت لحد ما أنا دخلت الشقة وقفلت وبعدين طلع، وصراحة أنا تفاجئت، بقالي سنين مشوفتش راجل عارف القواعد دي.. من ساعة ما دخلت الجامعة مثلًا!

المهم انهاردة بردو رجعنا في نفس الوقت، طب الراجل يقول عننا إيه دلوقتي؟ اللي بيسيبوا بنتهم برا البيت لحد الساعة ١٠ أهم 🌚 التوقيت الصيفي دا جاي علينا بخسارة، لكن لأني شوفته من أول الطريق أخرت نفسي لحد ما هو طلع ودخل بيته وبعدين طلعت أنا براحتي، علشان البشر دول ميتوثقش فيهم بردو حتى لو متربين من تلت لخمس مرات 😂

[lifeofadaydreaminmind]

بمناسبة فكرة الtwins كان فيه account إسمه siblings or dating كل الفكرة إللي فيه بيعرضوا كل مرة صورة لإتنين والناس تعمل vote بقى هل الأشخاص دول إخوات ولا بيحبوا في قصة حب ولا إيه ؟ الغريب في الموضوع إن فيه ناس كتير من إللي كنت متخيلة إنهم إخوات بل شكلهم يبدوا إنهم توائم أصلاً نفس لون العينين ونفس المناخير حتى نفس شكل الأسنان ويطلعوا dating في الآخر مش عارفه إزاى ؟🌚 ده إنتوا لو مهكرين بعض مش هتطلعوا شبه بعض بالشكل ده. ودي حاجة لاحظتها موجودة في الحقيقة برضه لناس سواء في المعارف أو الصحاب أو أي ناس أعرفهم في حياتي ويكونوا متجوزين ويكونوا شبه بعض أساسًا كأنهم إخوات أساسًا. 🙄 ده شيء مش مفهوم بالنسبة لي الحقيقة بيحصل إزاى وإزاى بيبهتوا على بعض بالشكل ده؟ كأنهم copy paste وجو ملامحك كلها مني يدوب الإسم متغير. يمكن يطلعوا قرايب من بعيد وهما مش عارفين ولا هي قوة الحب إللي بينهم بتظهر على ملامحهم في بتخليهم يبقوا شبه بعض ؟! ما أنا لازم أعرف. طبعًا الناس إللي مش شبه بعض دول بيقتلوا بعض في الآخر معروفة.

[lifeofadaydreaminmind]

طول الوقت بأبقى بأتكلم في دماغي بعلق على حاجة شوفتها أو سمعتها أو حتى عقلي بيعملي دوشة بأي شكل ما يقلقني بسبب حاجة، يفتكر ذكريات مزعجة يضايقني بيها مثلاً ويقولي لو كنتي عملتي رد الفعل الفلاني كان زمانك واخدة جايزة نوبل في السلام دلوقتي لكن شوفتي نتيجة إنك سكتي حصل إيه ؟ويحرق لي دمي. أو أفتكر ذكريات حلوة عادي أو أشخاص عايزة أشوفهم وأقابلهم ف دماغي دايمًا بتبقى زحمة ودوشة لدرجة إني أوقات مبحبش الناس تتكلم معايا بصراحة عشان بيقاطعوني وبيشتتوا تفكيري وطبعًا أنا لو قولتلهم كده هيشتموني أكيد يعني. وبستغرب من فكرة إن الناس بتبقى شايفاني هادية أو بيصنفوني على إني شخصية هادية لإني بأبقى متخيلة إنهم عايشين في الدوشة إللي في دماغي وعارفين إللي فيها ف already عارفين إني رغاية جدًا جدًا جدًا جدًا ف إزاى شايفني هادية ولكن للأسف محدش عايش في الدوشة دي غيري وبكتشف إن كل إللي بيظهرلهم مني ردود أفعال بسيطة أو صمت أحيانًا أو مبتكلمش كتير أساسًا عشان بحس إني already اتكلمت كتير جوه دماغي ف خلاص بقى طاقتي خلصت في الرغي. معدل كلامي في الواقع ٥-١٠٪ كلامي ع النت بيبقى أكتر من الواقع وأنا بحب أسمع الناس أكتر من إن أنا أرغي بصراحة. لكن لو ارتحت لأحدهم أو إحداهن مش هبطل رغي الحقيقة بالذات لو ناس فهماني أو أنا متحمسة ف بستغرب من موضوع هادية ده بحسهم بيحطوني في category مختلف عني شوية. ترا إني دماغي مبتفصلش والله لكن أنا طاقتي بتخلص من الرغي والحكي الكتير بصراحة بالذات لو في الواقع. أوقات بحس كأن في ١٥ شخص بيتكلموا في نفس الوقت في عدة مواضيع مختلفة وبيقاطعوا بعض في كلامهم جوه دماغي. 🌚🌚🌚 ده حتى كل الرغي والهري إللي بقوله ع النت لا يتجاوز ١٠٪ من إللي في دماغي. أنا محتاجة مجلدات عشان أفكاري تخلص ومع ذلك دماغي مش هتبطل تفكير برضه.