#فيلم خلى بالك من عقلك

[evmorfi-a]

مشاهدة فيلم خلى بالك من عقلك كامل اون لاين HD

[mohammed-fakhruddin-lasheen-blog]

فيلم خلى بالك من عقلك .. بطولة عادل امام و شيريهان .. الفيلم اللى حضرناه كتييييير وزهقنا منه .. البنت المجنونة اللى فى مستشفى الامراض العقلية .. واللى حبها الطالب اللى بيعمل بحث فى علم النفس على تجارب حية على العيانين .. حبها واتعلق بيها .. وزى ما احنا عارفين قصة الفيلم .. بس مفيش حاجة حركت قلبى وخليتنى دمعت وكنت هعيط .. لما شوفت المشهد ده .. لمس قلبى قووووووووووى .. قووووووووووووووووى .. لما الناس برا الشقة عاملين فضيحة وبيقولوا عليها انها مجنونة .. وهو بيحاول يتمالك اعصابه ويمتص غضبها وعصبيتها بس برضو هر شغالة زى القطر اللى مش بيقف على محطات .. ورجع فلاش باك يفتكر لما ضربته بالقلم قدام الدكتور بتاعه ويفتكر لما كانت بتزعق فيه وتبهدله قدام زمايله فى ال��ستشفى ويفتكر كل اللى كانت بتعمله .. وبرضو مستحملها .. طلع عشان يمشى الناس من قدام الشقة .. برضو ممسكتش نفسها وعاوزة تتخانق معاهم .. راح انفجر فيها .. وزعق على اخره .. والبركان اللى جواه ثار وانفجر .. وهى تزعق قصاده .. وصوته كان قرب يروح وهو بيزعق ويقولها كفاااااية يا سلوى .. كفاااااااية .. كفاية فضحتينى .. قالتله ايوة بقا اعمل زيهم وقول عليا كمان انى مجنونة .. راحت طلعت من بؤقه وجرحها وقالها ايوة مجنونة و٦٠ مجنونة .. وقعت من طولها وانهارت على الكنبة اللى ف المشهد ده .. وتصرخ وتقول مجنوووونة مجنووووونة مجنووونة .. كلمة مجنونة من الناس كانت معصباها اه وثايرة بسببها .. بس نفس الكلمة دى لما طلعت من جوزها حبيبها .. سندها وضهرها واللى معاه بتحس بالامان .. مستحملتهاش وانهارت من الكلمة كأنها بتسمعها لاول مرة .. وكأن حائط الصد الاخير اللى محيلتهاش غيره فى الدنيا .. تصدع وانهار .. مش ده المهم .. الاهم هو اللى جاى .. ركز معايا قوى ف اللى جاى هو حس انه غلط غلطة كبيرة قوووووى قوووووى .. صعب جدا انه لو مصلحاش دلوقتى .. هيدفع تمنها غالى قووووى .. وكل ما هيتاخر قى تصليحها .. كل ما هتكون التكلفة اكتر والخساير اكبر .. ملامح وشه ونظرته كانت اكبر دليل على ندمه .. راح مسكها من شعرها بحنيه وعشم وبص فى عنيها وهى بصت فى عنيه .. اثناء تبادل النظرات ده .. اللى هو مخدش ثوانى معدودة .. حصل حوار صامت .. اتفهم منه كل حاجة ممكن تقولها لغة العيون بأكثر فصاحة وبلاغة من لغة اللسان .. كان لسان حالها بيقول ان الضهر والسند وحائط الصد المنيع ليه موجود وبيمد ايده ليكى تانى .. وانها حست بندم من عصبيتها عليه وعنفها معاه .. والتانى نظرته بتقول انه بيتأسف جدااااا .. وعاوز يقولها مهما حصل منى متزعليش منى .. نظرة كانت سربعه خاطفة .. اتفهم منها كل اللى ممكن يتحكى فى قعدة عتاب بايخه وباردة مدتها نص ساعه .. وكان بعدها الحضن الدافى قووووووووى .. اللى كنوز الدنيا كلها متعوضوش .. فهمت هى كل حاجة من النظرة دى .. واترمت فى حضنه وتبتت فيه جااااامد وهى بتبكى .. وكأن لسان حالها بتشتكيله من نفسه .. وبتعتذرله فى نفس الوقت على اللى حصل بينهم وان مهما اتخانقوا وزعقوا برضو مينفعش ياخدوا وقت عشان يزعلوا من بعض وميكلموش بعض .. اترمت فى حضنه وهو ضمها لقلبه وكأنه بيقولها انتى مكانك هنا .. مهما حصل لا يمكن تطلعى من قلبى ولا قلبى يقسي عليكى زى ما قست عليكى الدنيا .. ضمها فى حضنه قووووووى وبقوا عاملين زى الجسد الواحد بروح واحدة بقلب واحد ونبض واحد .. المشهد ده اختصر ملايين الكلمات والعبارات اللى ممكن نوصفه بيها .. مشهد ��سمى قشعر منه ودمعت بسببه وحسيت باحساس الحضن ده قوووووووى .. خصوصا لما بيبقا بعد تعب .. بيبقاله لذته قوووووى وهم الدنيا كله بينزاح فى لحظة .. حتى لو كان تقله تقل جبال دايما كنت بقول ومازلت .. ان الحضن .. بيلمس روعه وجمال الروح 💟 تمت

[7awadetshemoz]

-أحنا ليه بنحب؟

- عشان لما نعك وكل حاجة تبوظ ونعمل كل حاجة وحشة فى الدنيا، نلاقى حد لسه رغم كل دا..شايفنا أحسن ناس .

....

الأيام على قد تعبها إلا أنها مبهجة بالنسبالى عشان وجود المسرح، حاسة أنى رجعتله فى الوقت المناسب.. شوقى و شغفى بيه زايد زى ما أكون لسه داخلة جديد، بزعل لما حد ميقوليش برافو.. بتنطط لما حد يقولى بس “ كويس.. تمام”

مسمينى رابعة العدوية ف الكاست.. معرفش ليه :”D 

بس تقريباً عشان الرولز اللى بحطها ف تعاملاتى بقت واضحة والكل شايفها جداً.. ودى حاجة مريحانى نفسياً.. بضايق بس لما افتكر انى ولا رابعة العدوية ولا اى حاجة.. تقصيرى فى علاقتى مع ربنا مخلينى عايزة أتف على نفسى!

...

ازاى تصالح حد فى تلت خطوات بطريقة شيماء.

1- ألو 

2- أيوة يا شيماء

3- على فكرة.. ياسمين كانت بتحضنى من شوية، وقالتى وسطك حلو يا بت يا شيماء، لو فضلنا متخانقين وسبتنى ومتجوزناش هتندم طول عمرك على الوسط دا

4- بحبك

....

محتاجة فلوس الأيام دى بدرجة مميتة، أول مرة أحس بتأثير الأزمة اللى عيلتى بتمر بيها.. يمكن عشان أول مرة أحس ان معنديش رفاهية انى ابقى محتاجة حاجة جداً ومعرفش أجيبها.. أحتياج مش مجرد رغبة.. 

بدور على شغل ع النت.. تقريبا الدنيا كلها معاندة ورافضة تشغلنى فريلانسر.. بس يعنى ربنا هيفرجها أنا متأكدة وهعرف أجيب كريم دوف اللى نفسى فيه

أيوة أنا كريم دوف عندى احتياج مش رغبة

...

فى مشهد من فيلم خلى بالك من عقلك

وائل وسلوى بيتخانقوا ف بيتهم، خناقة كبيرة جداً .. بيكسروا كل حاجة تقريباً فى الشقة.. بيزعقوا فى وش بعض.. بيروحوا ع الصالون .. وائل بيبص ف الارض.. سلوى بتعيط وايديها على وشها..

وف اقل من ثانيتين.. بياخدوا قرار واحد

يجروا ويحضنوا بعض.

ودا أعظم مشهد شوفته :)

...

بهزر.. أكيد كريم دوف مش اللى مجننى يعنى!

...

أنا أسفة.. أنا متعبة ومجنونة.. وبخلص طاقتك .. بوصلك لكل الزعل والزهق.. أسفة أنى أوقات بخذلك وبكون متعبة فى أكتر وقت انت محتاج راحة.. أسفة أنى مش بلتمس الأعذار ومش بتراضى بسهولة، أسفة أنى بزعل بسرعة وعلى أبسط الأسباب.. وأسفة أنى هخليك تقرا كل دا عشان  أقولك أسفة تانى

والأهم أنى أقولك.. أنا مهما بكون وحشة.. أنا بكون معاك أنت أحسن نسخة منى.

...

ممكن لو حد لقى شغل ع النت يارت تايم كتابة أو ترجمة يبعتلى

وهدعيله فى كل صلاة..

..

عزيزى المسرح.. رغم انى بقيت بشوفك أقرب وأفهمك أكتر.. بقيت بحس أنك أنانى.. بتاخد من الناس أعظم شىء عندهم .. مشاعرهم

عادل من فترة قالنا.. الممثل بياع مشاعر.. بيبيع مشاعره للاسف..بيستغل كل شعور بيحسه عشان يخزنه فى ذاكرته عشان يطلع ع المسرح يمثل بيه والناس تتبسط

وقتها حسيت انى مضايقة، ومش عايزة ابقى كدا.. أنا عايزة أدى مشاعرى أه.. بس مش ابيعها.. مش عايزة يبقى مشاعرى سلعة بتاجر فيها.. عايزاها تتطلع بطبيعية بتلقائية.. زى ما هى كدا من غير ما اخزنها واشكلها واقلل منها وازود واظبط عشان الناس تتبسط.. عايزة اللى أحسه أطلعه من غير اى تدخل بشرى يحوله لشىء مادى أتاجر بيه..

شيكسبير له جملة عظيمة بتقول فيما معنهاها: أنا عايز مبقاش تحت رحمة مشاعرى، أنا عايز أتحكم فيها أنا.. وأديها للناس.

يا ترى يا شكسبير لما اتحكمت فيها حسيت انك بتاجر بيها عشان الناس..ولا فضلت مشاعرك غير مستهلكة ونقية؟!

...

لو هتمنى حاجة الليلادى.. فهتبقى أن ربنا يرزقنى طمأنينة فى قلبى من القرب منه، طمأنينة تنيمنى نومة الطفل دا.. ورضاك محاوطنى يارب!

يارب!