#صور تكميم المعدة | Explore Tumblr posts and blogs

gastricjuice · 5 years ago

Text

تجارب تكميم المعدة | تجربتى مع التكميم

ازيكم يا احلى بنات

طبعا انا واحدة زي الاف البنات اللي كانوا طول عمرهم بيعانوا من زيادة الوزن اللي بتأثر على كل ش الثقة بالنفس وحرمانك من اللبس وكل ش بتحبيه الحساسية من اي كلمة مشاكل كتير قوي كلكم جربتوها اكيد

طولي تقريبا من 168 : 170 جربت رجيمات كتير وكنت بنزل 30 كيلو واطلع اكتر منهم كنت عاملة زي اليويو وعشت تقريبا 10 سنين في معاناة حرمان وعذاب وبعد كده زيادة في الوزن وتعبي كله يروح على الفاضي لغاية من سنتين تقريبا كنت يأست ومبقاش عندي قدرة على الرجيم اكتر من يوم واحد وطبعا نفسيتي كانت مدمرة

ومع ان اهلى طول عمرهم رافضين فكرة الجراحة بس سبحان الله فجاة لقيت ماما من نفسها جاية بتقولي في دكتور عندها في الشغل كان بيحكي عن دكتور جاي من ايطاليا بيعمل عمليات سمنة وناجح وشاطر جدا وكمان جايبة رقم تليفونه وعنوانه انا بصراحة مكونتش متشجعة خالص ولا مصدقة بس كلمته عشان ارضيها وخدت معاد ورحتله ارتحت معاه جدا في الكلام وشفت عنده على التاب صور بنات قبل وبعد من ضمنهم صورة لواحده صحبتي اتصدمت لما شفتها بعد التغيير على طول اول ما روحت دورت عليها على الفيس بوك ووصلتلها واتصدمت اكتر لما شفت صورها وشكلها الجديد كلمتها وخدت منها شوية تفاصيل وبصراحة الفلوس مكانتش متوفرة فنسيت الموضوع وفجاة ربنا بعت الفلوس كلمت الدكتور قالي اعملي التحاليل والاشعات اللي كتبتهالك وتعالي بعد بكره فعلا رحت عملتهم واتكلفوا تقريبا 600 او 700 جنيه ورحتله تخيلت هيقولي مثلا الشهر الجاي احنا كنا يوم الخميس قالي هنعملها الحد اتصدمت من كلامه وبدات افكر تاني واتراجع طبعا كنت عاملة استخارة فلما بدا القلق يدخل جوايا من قرب معاد العملية بدات اغير رايي وفجاة الدكتور اتصل بيا قالي عنده عمليات في المنصورة لانه استاذ في لجامعه فهنأجلها للتلات 8 ابريل وقالي ان يوم الاتنين مكولش اي حاجة غير سوال وجيلي وكاسترد ومهلبيه وحاجات كده اليوم كله معرفش ليه اطمنت وقتها شوية فجأة يوم الاتنين كلمنى قالي مش هينفع التلات الصبح ممكن تبقى الاربع وقتها قلت خلاص انا مش هعمل العملية كده يبقى مش خير هو طبعا كان عنده ضغط عمليات في المنصورة وفي حالة عنده متأخرة فمكانش عاوز يسيبها فقال يدي براح لنفسه لغاية 10 بليل كنت متخيلة ان العملية هتكون الاربع فجأة جالي تليفون ان العملية بكره التلات الساعه 12 اكون في المستشفى طبعا ركبي سابت وبدات استوعب انى دخلت في الجد كلمت صحبتي وقلتلها تيجي معايا عشان لو حصلي حاجة في العملية ماما متكونش لوحدها وعلى فكرة انا عملت العملية مفيش حد في الكون يعرف اني عملتها غير ماما واخواتي وصحبتي دي والدكتور وسكرتيرته والممرضات في المستشفى ومؤخرا خطيبي يعني محدش من العيلة يعرف خالص وكده الافض�� لان كتر الاراء حواليكي هيتعبك وهتبقى سيرة في لسان كل الناس وهيتضرب بيكي المثل فداري على شمعتك ده من مصلحتك بس بقى طبعا منمتش خالص طول الليل وقمت بدري صليت وخدت شاور ولبست ونزلت انا وماما رحنا المستشفى لقينا في حجز سويت باسمنا الاستقبال استقبلونا وخدوا البيانات ومضونا على اقرار ان العملية على مسوليتنا وبعدين خدوني مكان كده قاسولي الضغط وكل حاجة واتاكدوا ان كله تمام طلعت السويت لقيت الممرضات بيستقبلوني وجايين بالمحاليل وحقنة للسيولة بتتاخد تحت الجلد قلتلهم معلش تسيبوني شوية اصلي الظهر سابوني وبعد كده صليت ودعيت ربنا يعديها على خير وخلصت وضربت الجرس جم علقولي المحاليل وادوني الحقنة وفضلت مستنية الدكتور اتاخر جدا لدرجة اني بدات اقلق وكل ما اكلم السكرتيرة او مدير اعماله يقولولي الدكتور موجود هو منتظر الشركة اللي بتجيب الدباسات والدبابيس هما اللي اتاخروا وفجأة الساعه 9 لقيت تليفون اجهزي عشان هتنزلي العمليات طبعا موقف لا احسد عليه اصعب لحظات حياتي وانتى داخلة بكامل صحتك وعلى رجليكي اوضة العمليات وبتودعي مامتك ومش عارفة هتشوفيها تاني ولا لا خدتني ممرضة غيرتلي هدومي للبس العمليات وبعدين نيموني على السرير ودكتور البنج سالني اسمك ايه واداني حقنة في الكانولا وغبت عن الوعي صحيت على حد بيخبطني على راسي بعد كده عرفت انه الدكتور بيفوقني فضلت اصرخ من الوجع وماما كانت بتقولي اني طول الليل بقول سامحنى يارب كنت فعلا بموت من التعب خصوصا اول مرة ادخل عمليات وكنت خارجة في خرطوم خارج من مناخيري وخرطوم خارج من بطني والم فظيع خصوصا بسبب الخرطول اللي في مناخيري مكونتش قادرة اتنفس كانت اصعب ليلة مرت عليا في حياتي بسبب الخرطوم ده مش العملية وكان في ممرض سهران عندي في السويت مش في الاوضة طبعا في الصالة بره كل شوية يدخل يشوفني ويديني مسكن على حسب تعليمات الدكتور وانا طول الليل بعيط وبقول سامحنى يارب جه الدكتور على الظهر كده تاني يوم شالي الخرطوم اللي في مناخيري وانا بصراحة من التعب قلتله انا مش مسامحاك ههههههههههههههههههه قالي هسالك سؤال ندمانة قلته اكبر غلطة في حياتي قالي بعد 3 شهور هسألك السؤال ده تاني وهشوف رايك المهم كنت بتحرك بمعاناة ومفروض كنت اخرج الخميس من المستشفى لاني بصراحة كنت تعبانة الدكتور قالي خليكي ليلة كمان وجالي الجمعة الظهر كده شالي الخرطوم اللي في بطني وقالي حمدالله على السلامة طبعا طول الفترة دي كنت كل يوم بتمشى شوية في المستشفى وقتها الدكتور خد فلوسه كان عاوز تقريبا 22 ماما ادتله 19 بصراحة متكلمش يعني هو عمل العملية ومخدش مننا ولا مليم شخصية محترمة جدا جدا ودكتور ممتاز جدا ربنا يباركله ويبارك للدكتور اللي اتكلم عليه قدام ماما بالصدفة وكان السبب في كل ده

المهم كتبلي ��وشتة فيها علاج ب 400 جنيه تقريبا جبناه وخدت اخر حقنة مسكن يوم الجمعة بليل والحمد لله محتاجتوش تاني طبعا كان كل اللي باكله وبشربه ماية علبه العصير كان ممكن اشرب فيها يومين واكل قطعة جبه مثلثات مثلا في اليوم كله وممكن تقعد يومين كارهه الاكل خالص اه في حاجة نسيت اقولها الدكتور بعد العملية ادى لاخويا المعدة بتاعتي اللي اتقصت وقاله ادفنها معلش انا دوشتكم برغيي الكتير بس قلت اقول كل التفاصيل

جينا للجد

انا دخلت غرفة العمليات 114.6

8 ابريل 114.6 8 مايو 105.8 8 يونيه 97.8 8 يوليو 93.8 25 يوليو 89.4 8 اغسطس 90.3 23 اغسطس 85.6 8 سبتمبر 85 8 اكتوبر 85 23 اكتوبر 81 6 نوفمبر 78

بصوا بقى خلينا نمشي بالتفصيل بصراحة الدكتور غلط غلطة او انا بصراحة استغليت كلامه غلط الدكتور قالي ممكن تمصى في شيبسي وسناكس لما تحبي تغيري طعم بقك طبعا انا كنت طول اليوم بغير طعم بقى ههههههههههههههه عشان كده خسيت 9 كيلو بس اول شهر مع ان الطبيعي في ناس ممكن تنزل 15 كيلو كان اكلي كله عصاير وزبادي وكسترد وجيلي لمدة اسبوعين والشيبسي طبعا وبعد كده بدات اخد شوربة وفص فراخ صغير او لحمة وشوية شوية بدات ادخل اكل تاني الرز كانت من الحاجات المستجيلة بالنسبة لي لمدة اكتر من 6 شهور المعلقة الواحدة تخليني ارجع دلوقتي باكل رز اخري معلقتين او تلاته دلوقتي تقريبا باكل كل حاجة السمك عموما كان معاناة بالنسبة لي كل ما كنت اكله ارجع حتى لو فص صغير دلوقتي احسن كتير

بالنسبة للترجيع انا من كتر بحثى على النت فهمت ان الترجيع ثمة اساسية للعملية اول شهرين مكونتش برجع خالص لدرجة اني تخيلت ان العملية بايظة ورحت للدكتور قالي انتى مفترية مش تحمدي ربنا هههههههههههههه والحمد لله قريت على نفسي وقعدت بعد كده تقريبا 4 شهور في ترجيع متواصل فهمت بقى السبب من الدكتور بعد كده مكونتش برجع لاني مكانش في نفس للاكل فمكونتش بجازف اصلا لما بدات اكل واكل غلط من غير ترتيب الدكتور ونظامه بدات ارجع باستمرار مثال: انا بحب السمك المشوي جدا اول ما كنت اخد فص صغير كنت ارجعه مع ان معروف ان السمك المشوي خفيف لا هو الموضوع مش كده بقى الموضوع ان المعدة الجديدة مش فاهمه السمك فلازم ابدا بالسمك الشوربة الدايب ده فترة لغاية ما معدتي تتأقلم عليه وابدا ادخل انواع تانية وهكذا دلوقتي الحمد لله باكل نص سمكة بوري مشوي وده من فضل ربنا الحمد لله انا بقالي 4 شهور نادر جدا لما برجع يمكن 3 او 4 مرات

اخر مرة كتبت وزني كانت 6 نوفمبر كنت 78 داخلة تقريبا في 3 شهور مش ملتزمة خالص وبلبخ في الاكل جدا جدا طبعا مش باكل وجبات كبيرة بس باكل وجبات كتيرة وكمان الشتا والسوداني وادمان الشيكولاته فوصلت دلوقتي ل 80.5 تقريبا في 3 شهور بس بصراحة لو من غير العملية وفي الوضع ده كنت زدت 30 كيلو في ال 3 شهور ههههههههههه

وعلى فكرة انا طويلة وعريضة شوية فوزني ده تقريبا مش كتير انا لما بقوله لحد بيتصدم بيقولولى اخرك 70 بس الحقيقة حاجة تانية لان العضم بيوزن يعني لو واحده قصيرة وزنها هيكون اقل من كده بكتير فمتقلقوش

مأساة حياتى الماية انا من الناس اللي بتحب تشرب ماية كتير للاسف بعد العملية كان بيبقى اخري اخد بق ماية ولو زودت اشرق وارجع دلوقتي ممكن اشرب كوباية مثلا على فترات ودي بالنسبة لي معاناة نفسي احس احساس اني ماسكة ازازة ماية وبشرب براحتى لغاية ما ارتوي

بالنسبة لجرح العملية 5 فتحات صغيرين جدا اكبرهم 1 سم تقريبا فضلت تقريبا مش قادرة اتحرك بشكل طبيعي اسبوعين بعد كده بقيت طبيعيه جدا الدكتور فكلي الخياطة بعد اسبوع من خروجي من المستشفى

مميزات العملية

انا انسانة تانية خالص كفاية انى بدخل المحلات اختار اي ش وبلاقي مقاسي الحمد لله ثقتي في نفسي اختلفت تماما حركتى اصبحت خفيفة جداااااااا وسهلة بصراحة زي ما قلت انا بقيت واحده تانية غير اللي كنت اعرفها

عيوب العملية انك مهما عملتي عمرك ما هترجعي لطبيعتك اوقات اقول لماما انا نفسي مرة واحده في العمر ادخل مطعم واكل اكله انا حبها اكل منها وجبة كاملة لغاية ما احس انى شبعت ومبسوطة فقدت الاستمتاع بالاكل تماما كله طعم واحد لان هي معلقة وببدا اتعب فاهدي في الاكل عشان الترجيع بقى والفضايح وانتم فاهمين بقى

شعري هو اكبر مأساة شعري وقع اكتر من نصه وده مش عيب في العملية ده كسل منى لان الدكتور كتبلي على حقنة قيتامين المفروض اخدها كل 3 ايام انا كنت باخدها مرة في الشهر وساعات لا واديني بحصد دلوقتي للاسف

انا تقريبا قلت كل اللي في بالي وزيادة شوية اي استفسارات انا تحت امركم

بس امانة عليكم ادعولى دعوة حلوة بالهداية وانى ربنا يجمعنى على زوجي بخير لان فرحى في خلال كام شهر وانى اخس 10 كيلو قبل الفرح عشان اكون راضية عن نفسي اكتر

اه ملحوظة اخيرة صحبتي اللي كانت عملت العملية اتجوزت وحامل دلوقتي ما شاء الله يعني مفيش تأثير على الحمل عقبالي يارب وعقبال كل البنات يارب

#تكميم المعدة #دكتور احمد السبكى #عملية تكميم المعدة #تجربتى تكميم المعدة #تكميم المعدة فى مصر

0 notes