#شهر وان

[t-ablog]

من الحياة وقصصها ....

‏واحد صاحبي بيقول كنت بمر بفترة مادية صعبة جداً لدرجة اني كنت رايح اقعد مع واحد صاحبي علي القهوة وعارف انه هيحاسبلي لاني معيش فلوس كوباية الشاي الي هشربها

صاحبي ده كان شخص قريب مني جداً كان مفيش بينا فرق عمرنا ما اتكلمنا في حساب او فلوس الي معاه هيحاسب علي القهوة ، القريب من ‏المطعم هو الي هيجيب اكل ، الي هيطلع الفلوس الاول في المواصلات هو الي هيدفع مفيش مرة حد فينا قال للتاني حساب

الفترة دي كان ليا فلوس شغل متأخرة وفعلاً كانت حياتي واقفة علي الفلوس دي ومعيش غيرهم ، وقعدت حكيت لصاحبي قد ايه الدنيا مزنقة معايا جداً واني محتاج فلوس الفترة دي علشان ‏اقدر اتحرك واجيب فلوسي انا قاعد في مكاني مش عارف اعمل حاجة لأني حتي مش معايا فلوس اشحن رصيد

او اركب مواصلات علشان اجيب فلوس شغلي

لقيت صاحبي بيقولي طيب ما تبيع قزازة برفيوم من الي كنت جايبهم من شهرين مش عندك واحدة مقفولة لسه !!

صاحبي كان معايا وقت ما اشتريتهم كانت القزازة

‏بـ 850 جنيه ، ردي عليه كان الطبيعي اني مبعرفش ابيع حاجة انا شاريها لنفسي وبعدين مين هيشتريها مني وانا مزنوق في الوقت

رد وقالي هاخدها انا

شوية ونروح البيت اجيب فلوس وانت تجيبها

هشتريها منك وافقت وكان مفيش حل تاني قدامي .

شوية وروحنا فعلاً جيبنا قزازة البرفيوم

واديتها لصاحبي ‏طلع 400 جنيه وادهومني بصيت في الفلوس وبصيتله انا متأكد انه فاكر سعرها وقت ما اشتريناها بس فهمت ولاني كنت محتاج الفلوس سكت وكانت صدمتي في صاحبي كبيرة وكان اول حاجة اعملها اني روحت فكيت الفلوس وقولتله طيب امسك بقي حق الشاي الي شربته علي القهوة

الدنيا ظبطت معايا ورجع معايا فلوس

‏وحاولت مخسرش صاحبي بس بقيت قليل جداً في التعامل معاه بقيت لما نقعد علي القهوة اتعمد اقوم احاسب انا وبقيت برفض انه يحاسبلي علي اي حاجة وديماً لما كنت اعمل كده كان بيبتسملي ابتسامة مبفهمش معناها ومهتمتش اسأله

يوم عيد ميلادي اتصل بيا وقالي عايز اقابلك ضروري ، نزلت وقابلته لقيته ‏بيديني شنطة هدية وبيقولي كل سنة وانت طيب !!

في الاول رفضت اخدها منه كنت حاسس اني مش متقبل منه حاجة ومكنتش لاقي طريقة شيك ارفض بيها الهدية لحد ما هو الي فتح الشنطة وطلعلي الي جواها وكانت قزازة البرفيوم الي اشتراها مني بنص تمنها من شهر

ابتسملي نفس الابتسامة بتاعته قبل ‏ما اتكلم وقالي علي فكرة انا مكنش معايا غير الـ 400 جنيه ولاني عارفك كويس عارف انك مستحيل هتوافق تستلف مني فلوس ، ومحبتش احرجك والح عليك انك تاخدهم لاني عارف انك عنيد وهتتعبني

ومش هتاخدهم مكنش قدامي غير الحل ده ..

من وقتها وانا بقي كل حاجة في حياتي اشوفها بمليون طريقة ، ، ،

اوقات ‏كتير ناس بتعمل فينا الخير بحسن نية

واحنا بنشوفه شر ،

اوقات كتير سوء الظن بيتحكم فينا من غير مانحس

اتضايقت جداً من نفسي لأني طول الشهر ده كنت ببص لصاحبي علي انه شخص استغلالي كان أي حاجة بتحصل منه بشوفها بطريقة تانية كنت شايف افعاله ديماً بجزء اسود اترسم جوة عقلي

لحد ما فوقت ‏علي اني انا فعلاً الي كنت وحش معاه وان كل الي عمله معايا كان نوع من جبر الخواطر .. كنت شايف ان فضل مني اني سيبته في حياتي

بعد الموقف ده

واكتشفت بالصدفة ان كان فضل منه هو انه استحملني كل الوقت ده

عرفت وقتها ليه ربنا خلي

جبر الخواطر عبادة

منقول .............. ......... ........... .......

أحسنوا الظن بالاخرين

والله يعلم وانتم لا تعلمون ،، ،، ،،،

T

[white-tulip323]

عن جَمعٍ من الصّحابة -رضي الله عنهم- أنّ رسولَ اللهِ ﷺ قالَ: «يَطَّلِعُ اللهُ -تبارك وتعالى- إلى خلقِه ليلةَ النِّصفِ مِن شَعبان، فـيَغفِر لجميعِ خلقِه إلّا لِـمُشرِكٍ أو مُشاحِن». أخرجه الطبرانيّ واللفظ له، وابن ماجه وصحّحه الألبانيّ ■ مُشاحِن : أي بينه وبين أخيه المسلم شحناء؛ أي : عداوة وخصومة.

يـليــــــــــــــه

إخوتى فى الله أنا اليوم أعتذر منكم وألتمس من قلوبكم الطيبة برآءة الذمة وان تسامحوني قبل أن ترفع الملائكة صحيفة أعمالي قبل منتصف شهر شعبان أستحي أن أقول عفوت عنكم لأني ماوجدت منكم إلا الخير وال��حبة والكرم،،،،، بل أقول عفا الله عني و عنكم واذكروني في صالح دعواتكم واللهم بلغنا رمضان وأنت راض عنا

اللهم إني أشهدك أني قد سامحت كل من آذاني أو أساء لي بقول أو فعل بقصدٍ أو دون قصد أو خانني أو خدعني أو كذب علي أو أبدى لي إخلاصا وهو يكن في صدره غير ذلك أو أراد بي شر أو سوء فإني يا الله قد سامحته لوجهك الكريم ،،،، كل عام وانتم بعفو الله ومغفرته تنعمون 🤍♡

[es-r-aa7]

2019

لو كنت بس ساعتها عارف ان دي * السنة * الاخيرة.. مية مية كانت هتفرق ف الوداع "))

السنة دي كانت وستظل من السنوات الفارقة في حياتي، من الناحية الفكرية والاجتماعية

رغم الحنين لحاجات كتير فشخ فيها إلا أن مفيش حاجة استغنيت عنها او استغنت عني فيها إلّا وانا مش ندمانة دلوقتي عليها.

ميموري الفيديو دا طلعتلي وانا بدور على صورة لشهادة معينة كنت مصوراها وحطاها على جوجل فوتو .. افتكرت كل لحظة ف اليوم، فالفترة كلها .. قولت شهر ٧ دايماً مش كويس ف حياتي، لكن في أوقات مينفعش انكر جمالها في حياتي.

كان بقالي اكتر من ١٥ يوم مروحتش الشركة - عشان كان عندي امتحانات ومشاكل ف البيت - ويومي كله بيبقى ف الجام��ة او ف مكتبة مصر العامة .. حالتي النفسية كانت تحت الصفر.

الشغل ساعتها كان هو الملهى الوحيد عن كل العبث اللي كان بيدور ف حياتي، والكوميونتي اللي كنت فيه كان supportive جداً ليا وللظروف النفسية بتاعتي.

ف يوم دخلت ف هستيريا عياط .. مكنتش عايزة اروح الامتحانات ولا عايزة انزل الشركة ولا حتى اطلع من اوضتي.

بعد محايلات كتير من الليدر بتاعتي .. قدرت انزل وأروح لاستديو الدور ال١٧ “D .. هيفضل احسن مقر للشركة ف نظري - رغم اننا روحنا اماكن اكبر واحسن بعدين - فكرة ان CEO الشركة يقرر انه يسجلي كتاباتي وياخد من وقت الأستوديو ك نوع من انواع الدعم النفسي واني امر بالفترة دي بأقل خساير و يكون في انجاز بحبه موثق للوقت دا عشان يفضل ذكرى ان مهما الوضع سئ بيكون في اوقات حلوة.

على غرار ان مديرتي كانت هي اللي بتوثق دا ( كنت رايحالهم بالعباية حرفياً 😂 ) التراك نزل ف حتة معينة .. وكان سبب ف ان شخص معين يعرف يفتح معايا كلام .. ودواير وعلاقات كتير تكبر وتوسع بينا.

اقتكرت فجأة الكومنت عل التراك .. مكنتش أعرف والله ان السنين هتعدي وهلاقي كلامي بيتحقق .. وان الكومنت - اللي الشخص دا كتبه -المقتبس من التراك هيبقى واقع بنعيشه 🥹

٢٠١٩ كانت اخر سنة بعرف احط خطة وتكون أصعب من انها تتحقق واعرف احققها .. من بعدها وانا يومي لو كملته ري ما رتبت له الصبح ببقى عايزة اسجد سجدة شكر.

المهم يعني الذكريات حلوة مهما كانت مؤلمة عشان بتورينا كنا فين وبقينا فين .. وبعد ما الانسان بيعقل بيعرف انه مهما كان مدى سعادته ف استحالة يكون دا الطريق اللي يقدر يكمل فيه وهو لسة محافظ على جزء من شخصيته وفطرته

شكراً لإسراء الطايشة اللي مش بتبطل فرك ولا بتمل من تجارب الأشياء ولا ف مرة حست انه مينفعش .. لولا النسخة دي انا مكنتش قدرت اكوّن شخصيتي حالياً ")

[m-anarrr]

امبارح كان يوم تقيل علي قلبي نوبات التوتر اللي بتلزمني كانت ازيد فيه ،في وجع مش عارفة مصدره ايه بس يمكن الخوف.

بس كان يوم شغل طويل ..اتسحلت وممتنة للسحلة عشان ساعتها دماغي وقفت تفكير في كل حاجة وكان كل اللي شاغلني اني لازم اخلص

اخدت مجي الجديد الشغل وقررت انه هيبقي مج مارس ..وان كل شهر هقضيه بمج مختلف من غير سبب واضح بس عشان اكسر التكرار ...

فرض النفس علي الغير بشع ونفسنا متستاهلش مننا اننا نقلل من قدرها ودي حاجة لازم نفتكرها دايما .

في خلل عشان في حاجات حصلت في الطفولة عقلنا مكنش قادر يستوعبها فبتخلينا ندور في دواير مفرغة بس طالما فهمنا بتكون مسألة وقت عشان نحل اللي فات واللي بعدو واللي بعدو لحد ما كل ركن فينا يترمم.

انا شخص عشوائي ومش بيعرف يعبر ،يمكن بعرف اكتب بس الكلام مش لعبتي اوي ودي حاجة محتاجة اشتغل عليها عشان حابه ده.

اكتشفت اني لما بكتب بشكل عشوائي هنا جزء من قلقي بيهدي عشان بتكلم مع نفسي من غير ما استني ردود من غير ما استني حاجة زي ما بكلم سقف الاوضة .

يمكن اتاخرت شوية في الخطوة دي بس النهاردة الصبح صحيت علي قرار اني اقطع كل سبل التواصل مع ناس معينة وانه كده خلاص مش هنستني اعتذار اللي فات راح مع اللي راحو ومالوش مكان في ايامي الجاية

الواقع اني بكبر والدوشة اللي جوايا بتكبر واني بحاول اتاقلم وافضل جوايا الحماس وللشغف والطاقة اني ابقي انا و ابقي شبه نفسي القديمة بشكل ما .

[jaunerevee]

امبارح قلقت في نص الليل بعد يوم طويل تقيل وصحيت بصيت من الشباك لقيت السما صافية .. من المرات القليلة اللي بشوف فيها السما بجد في البلد دي .. من جمال المنظر صحيت جوزي عشان يشوف معايا .. اول مرة في حياتي اشوف النجوم بالكثافة دي وبالكمية دي .. لما كنت في دهب من كام شهر كان نفسي احضر النايت بتاعة ال star gazing في الجبل بس للاسف انا ام وصعب جدًا مع وجود ابني اعمل ده فا اكتفيت اني من وقت للتاني بعد ما ينام اطلع ابص من شباك البانجلو ع السما واشوف كام نجمة واحس انه الله ايه الجمال ده .. امبارح شوفت اكبر كمية من النجوم شوفتها من يوم ما اتولدت ولو كان عندي امنية وقتها كان ان نظري يكون احسن شوية .. يمكن من اكتر اللحظات في حياتي اللي حسيت فيها اني بتنفس وان الحياة كلها في حضني .. انا اتربيت في قرية صغيرة لازقة في مدينة صغيرة وزحمة جدًا وسفري جوه مصر كان من مدينة لمدينة واول مرة احس بالهدوء والسكوت واسمع صوت النهر والحيوانات واشوف الشجر والسما واحس اني بتنفس كان لما نقلت المكان ده من شهر .. الحمدلله

[light-intothedarkness]

ليا واحدة صاحبتي بتلهمني جداً وبتخلي يقيني يزيد في قدرة ربنا وعوضه اللي ممكن يكون بأشكال كتير غير اللي احنا متخيلينه وبيطلع احلى ومناسب لينا أكتر.

صاحبتي بعد ٥ سنين انفصلت وكانت كل سنة تعدي بتحاول تخلي حياتها احسن، فيه فترات كانت حياتها مستقرة جداً بس للاسف الطباع بتغلب ومع مواقف الحياة الصعبة قدرت تاخد قرار الانفصال اللي مكانش سهل تماماً عشان معاها اولاد كمان، بعد ما انفصلت كان وقت صعب اوي عليها وكانت بتحاول تتوازن تاني وربنا كرمها ورجعت تشتغل في مكان كانت فيه زمان ووقتها كانت مبسوطة ان حياتها بتمشي، بس مع الاسف بعد كام شهر فصلوها من الشغل لاسباب محدش عارفها، كانت فترة صعبة عليها خصوصاً انها بتصرف على ولادها وبتحاول تكفي نفسها فا حست اخعا رجعت للصفر تاني بس كانت بتقول لي انها بتحاول متفقدش الامل، ومن اول مشاكل انفصالها ودايماً اسمعها بتقول لي "انا عارفة ان ربنا هيعوضني جداً وانا ظني في ربنا مش هيخيب" حتى في اكتر لحظات يأس عدت عليها.

سبحان الله خير ربنا بقا ينزل عليها وكل الوعود اللي في "سورة الطلاق" انا لاقيتها بتتحقق معاها، اتقبلت في شغل احسن بكتير من اللي قبله كا عائد وناس وتعامل وخبرة، بجانب ده كانت بتدي دروس اونلاين واجرت مكان عينت فيه ناس بيعلموا الأطفال، ولسة قافلة معاها من شوية انها خلاص حوشت وجابت عربية وهيكون اسهل عليها، بتقول لي انا شفت تيسير من ربنا وفتح عظيم، بس بجد انا دايماً اقول لها انتِ من اكبر ارزاق ربنا عليكي انه دايماً بيديكي طاقة تكمّلي وتجتهدي وبيوّجهك وبيكتبلك سير حياتك مع كل موقف بيحصل معاكي.

قالتلي برضه كلام حلو بجد انا لمسته في حياتي، الدروس اللي بتديها اونلاين والمكان اللي فتحته ده بتعلم فيه الناس القرآن، قالتلي انا لولا بركة القرآن في حياتي ومعانيه اللي كانت بتسندني وقت ما ايأس انا ماكنتش صمدت كده، انا شايفة ان القرآن بيغير حياة البني ادم تماماً وانها بقت شخص مختلف من وقت ما بقت مواظبة عليه وبتعلمه للناس، وان لولاه مكانتش عرفت تتمسك بظنها الجميل بربنا، فا سبحان الله.

فا بجد انا بقيت مؤمنة ان اي وقت صعب بيعدي بالاجتهاد وبظنك في لطف ورحمة ربنا بيك، رحمة ربنا اللي لو فعلاً صابتك هيرحمك من التفكير الكتير ومن القلق والتوتر ومن التعب في سكة ملهاش فايدة، لطف ربنا في الاقدار اللي بتحصل لك، وانك لو متأخر عليك شغل او نجاح او اي حاجة حابب توصل لها فا ده برضه لطف منه، انت بس اجتهد شوية كمان وخليك واثق ان طول مانت متوكل عليه مش هيضيعك.

[gomls-world]

من كتر ما أتعزمت علي أفراح في شهر 8

بقيت أصحي بليل أسقف

وأنام تاني العقل الباطن يخزن ما هي اهتماماتك

ولو اهتمامنا بالقضيه الفلسطينيه لاخواننا الفلسطينيين الذين استشهدوا والذين جرحوا اطفال ونساء لصحينا من النوم ونحن نبكي عندما ينحدر الانسان الى الذل والمهانه الموت اولى به وشتان بين مجاهد وقاعد لا يستويان عند الله والله ان القلب ليحزن وان العين لتدمع على ما وصلنا اليه يا امه الاسلام والمسلمين

[sihrbayan]

انها اول جمعة من شهر ذي الحجه وبداية الايام المباركه ايام معدودات لها فضل واجر كبير اللهمَّ إنا نسألك بأن تفرج كربنا وتصلح شملنا وتجمع كلمتنا وتوحد صفنا وان لايحل يوم عرفه الا وقد افرحتنا بمايسرنا يارب العالمين جمعة مباركة مقدماً

[jojou2]

عيد ميلاد

نهني مواليد شهر يونيو *جوان* أسأل الله لهم التوفيق والسعادة وراحة البال وان يرزقهم الله من فضلة ورحمته وكل عام وانتم بخير 💚 عقبال المئة سنة وإن شاء الله تكون سنة خير وسعادة عليكم، وأتمنى لكم حياة سعيدة مليئة بالخير والحب والسعادة

🎂🎂🎂

[iihtimalat-kitaba]

( م )

في خضم هذه الحياة واحداثها المريرة المتلاحقة وقرقعة وضجيج افراحٍ ومآتم على جانبي غزة الإباء والصمود تأتين كخاطرة أخذت ملامحها أصوات القنابل وازيز رصاص المقاومين وغبرة اقدامهم لتعيدين لسطوري استقامتها وتلملمين ما بقي من حروفي المشظاة في اروقة خانيونس ودير البلح ورفح والمخيمات، وتعيدي لها شدوها الأول مضمخة بأصوات مآذن جينين وآهات متصلة بآهات اياما العراق وسوريا واليمن، مصفرة شعثاء رقراقة تمسح على قلب ابٍ انتزع طفلته من بين الركام ويهمس بين عينيها يا روح الروح وآخر يساوي قبضة طفله على قطعة حلوى ويدسها في كفنه وثاكلة تندب فلذة كبدها وتوجه خطابها للسماء (كون راضي يارب) واعادت بنا الذاكرة إلى ايام عقيلة الهاشميين زينب وهي تقف على اشلاء سيد شباب أهل الجنة وتناجي ربها ( اللهم تقبل منا هذا القربان) وكأننا في أيام الأخدود،

تشابهت الايام والقوم أبناء القوم.

السيدة الجليلة قاصرة الطرف اتعلمين بأني قبل هذه السطور كنت ثوايا في بيت احزاني ترتعش يداي، ابتلع شجى الأحداث غصة في الحلق وترمد عيناي مشاهدها حتى دخل عامنا هذا شهر رجب الاصب إذ يصب الكريم رحمته على عباده صبا وهو خامس رجب لنا وهو بداية عامنا المعنوي وسيأتي شعبان الخامس وشهر رمضان السادس وكلها بوابات خيرٍ ورحمة وايمان وزيادة في النور والعرفان والمحبة بين الناس وانا خل�� من هذا الخلق يطيب له الدعاء لكِ في هذه الايام المباركة واسأله الإجابة فأني ادعوه كما أمرني وارجوه الإجابة كما وعدني

إيها المجهول الجليل

لا أعرف كيف أبتكرت لي ضوئًا

وأخذت يدي من حروب القتال الطويل و منعطفات القصف

وخاطبت قلبي الذي لا يعرف مداواة طفل الا في دعاء ودمع

ولفت بالي الذي كان ملتف متسائل عن منصات يزج بها الأتفاق على قتل مأذنة في خان يونس تختبيء فيها طفلة غزاوية تلعق ماء الحياة من جدران مرفوعة بالألم الى واجهة التوكل واقصى مقاصد التسليم والأيمان

أيها المجهول المهيب المرفع

الذي أخرجني من عباءة الليل الموحشة ومن نفوس تشابك عليها التنافر الى مدى رحيم من شهر بلغنا فيه رغائب لطفه

وفواتيحه خيره

اسأل الله أن يتقبل دعائنا بالفرج والنصر وأن يجعل ارضنا وارض المسلمين ملاذاً آمناً دائما وان يوفقك الله في عمرك وعملك وذريتك واهل بيتك .

[marmarika-world]

من 22 اكتوبر لحد 21 نوفمبر ..

هالوين مدته شهر..

للاحتفال ببرج العقرب..

تعالوا احكيلكم عن المسكوت عنه 😈

- احنا برج العقرب.. غامضين.. غامضين اوي.. بس مش شبحنة ابدا والله العظيم... انما زهق.. احنا ما بنحبش نتكلم كتير.. وعايشين على مبدأ الشكوى لغير الله مذلة... فا تسألنا مالك.. مفيش.. يا حبيبي... مفيش... فضفض... مفيش... فا ده اترجم منذ العصور السحيقة على انه غموض وانت عمرك ما هتعرف برج العقرب بيفكر في ايه

- احنا برج العقرب.. يعني الانتقاااااااااااام..... اوعى تتحدانا... اوعى تقف في وشنا... عارف ليه؟؟؟ عشان ولا حاجة.. ايون.. ولا فيه اي برج عقرب بيهبب اي حاجة... هو حقة بيجيله لحد عنده وكأن الحياة تسير لكي تعيد ما سلب منه.. فا يطلع يقولك شووووفت.. انه الانتقام... بينما هو كان عادي في الحمام بيعمل تواليت.. ولا في دماغه...

- احنا برج العقرب... يعني العناد.. يعني الحديد المسلح اللي مليان اسمنت وعليه طبقة من الفولاذ في الدماغ... يعني ما تحاولش.. يعني طالما قرر يبقى انت تنسى بقى... انما عارف؟؟ كل العند ده بيختفي اول ما تقوله طب عشان خاطري (بس بحب وصدق) كدة خلاص.. عيل اهبل ورجع في كلامه في ثانية.

- احنا برج العقرب ما بنعرفش نحب... بنحب الامتلاك... انت بتاااااااااعي انا وبس... انتي بتاعي انا يا بت بدل ما اشوهك... ما بنقولش كلام حلو... ما بنعرفش نعبر عن مشاعرنا ولا عندنا عواطف... بس الحقيقة.. حسبي الله ونعم الوكيل فيكم وفي اللي فهمكم كدة 😂😂 احنا برج العقرب اللي قلبه بيتفطر حتت حتت في صمت لان عزة نفسه بتمنع عنه حتى انه يعرف يشكي او يبكي.. احنا برج الزفت اللي لما بنحب بجد بيبقى خلاص كدة الدنيا... خلصت من البشر والعالم وما بقاش فيها غير المحبوب وان امطرت عليك السماء نساءً أو رجالًا

- احنا برج العقرب... اللي سمعتنا مهببة وطباعنا ��عبة ومعندناش قلب... انما كل اللي اتعامل معانا عارف احنا مين.. وعارف جوانا ايه... وعارف اننا اغلب من الغلب... بس هي الحياة والدنيا وكلام الناس اللي حصرونا في ادوار الشر

العقرب 🦂🦂🦂🦂🦂🦂🦂🦂🦂🦂♏️♏️♏️♏️♏️

[yassen-world]

انا تقريبا آخر مرة كتبت هنا كان في اواخر شهر سبتمبر

والحقيقة ان من بداية شهر اكتوبر وانا الوضع بالنسبة ليا سئ سوء غير طبيعي.... مشاكل كتير في الشغل والموضوع مش الطف حاجة والوضع في فلسطين اللي كل يوم بيروح من سئ لأسوأ

والحقيقة هي ايام تقيلة علي القلب بطريقة صعبة جدا .... الحمدلله علي كل حال وكل وضع والواحد وضعه كويس بالنسبة لناس كتيير اوي ... بس الحقيقة ان دي تقريبا اكتر فترة فيها عدم استقرار نفسي ليا عدت عليا من 2019

والوضع العام كله مخلي النفسية مش احسن حاجة

حاجات كتير وقفتها بسبب الوضع النفسي المنيل دا... وقفت سباحة برغم اني كنت ملتزم جدا، وقفت حاجات كنت ناوي اتعلمها، بدأت ابقي مهمل في اكلي وصحتي، معدل التدخين زاد، بقيت متشتت في كذا حاجة، بقيت عصبي الفترة الاخيرة بطريقة عالية عن المعتاد، حتي اني اعمل أكل لنفسي بطلته ومش فاكر اخر مرة دخلت المطبخ ونفسي مفتوحة وعملت اكلة بمزاج كان امته

واكتشفت ان الاستقرار النفسي وان روح الانسان تكون هادية دا من أهم النعم اللي الواحد ممكن مايبقاش حاسس بقيمتها

ربنا يعدي الايام دي علي خير ويبعت من عنده علامة لنور جاي يزيل الغمة دي ...

الحاجة الوحيدة اللي واثق منها ان ربنا عمره ما بيخذل حد ودايما بيفاجئني بحاجات فوق توقعي وبيراضيني🤍

ان شاء الله هتعدي...

[badr-world]

في السنين القليلة اللي فاتت وبفضل ربنا قدرت ألاحظ في نفسي طاقة "العطاء" اللي بتخليني أصحى كل يوم من النوم الصبح وتقويني على ظروف الحياة الصعبة اللي بنعيش كلنا فيها..والعطاء هو دايما وأبدا أول وأهم مبدأ في حياتي واللي باحس ان روحي بتحيا علشانه كنت باشوف ان مهما خدت فوق دماغي لازم أكون معطاء وبحب الخير والعلم والمنفعة لكل الناس حواليا وكان ده حقيقي الدينامو اللي بيخليني أكمل السنة دي وفي آخر كام شهر من ٢٠٢٣ لاحظت أهمية احساس "الشكر" وان من الكرم والنبل والتربية الحميدة أني أشكر كل الناس اللي من حواليا اللي بشكل ما مباشر وغير مباشر ساعدوني في حياتي وأسهموا أن شكل الحياة يكون أهون وأفضل قد ايه جميل ان الواحد يسمع كلمة "شكرا" وان لما الناس بتسمع مجرد الكلمة دي بتحس ان كل حاجة بقت هينة وانهم يستاهلوا الأحسن وأن ده معنى التقدير في أبسط صوره بقيت أمشي في كل مكان أشكر أي حد وكل حد خايف لأكون نسيت أي حد ساعدني أو حتى نوى أنه يساعد وأصبح "الشكر" هو تاني أهم مبدأ في حياتي وأهم درس من ٢٠٢٣ شكرا لأي حد وقف جنبي وخلاني انسان أحسن وخلاني أتعلم وأشوف حاجات كتير جوايا عمري ماكنت هاعرفها لوحدي وشكرا انكم خليتوا سنة من أجمل وأصعب السنين تكون سنة مميزة بالشكل ده كل سنة واحنا طيبين ومعطائين وشكورين

[fadeel-zone]

من شهر ونص تقريبا اخدت قرار اني اقاطع السوشيال ميديا بشكل عام لانها بقت بتصدر طاقه سلبيه اكتر بكتير من ايجابيتها وبتجبرنا نحط نفسنا في مقارنات غصب عننا ودا شئ حسسني باحباط واني متاخر عن كل الناس مع اني بشتغل بكل ما اوتيت من قوه واكتر من شغلانه كمان وحاسس اني بعيد عن الناس دي اوي المهم اني مستمر ومرتاح نفسيا بنسبه كبير الابلكيشن الوحيد اللي نزلته تاني هو تمبلر لانه حقيقي لا يحوي غير الناضجين بنسبه كبيره وبيمدني بطاقه كبيره جدا ممتن بجد لكل اصدقائي اللي هنا اللي اتعرفنا واللي متعرفناش بس طيفهم اللطيف بيعدي علينا وبيدعمنا بصوره كبيره وربنا يقدرني ويقدركم اننا نحقق كل احلامنا والحمد لله اني كنت قوي كفايه اني ابعد عن العالم المزيف دا ومضعفتش وان شاء الله مكمل في البعد عن المجتمع المبني علي الشكليات والسطحيه دا.. ♡

[mernajjam]

انا حقيقي بقيت اكره شهر ابريل.. ابريل ٢٠٢٣ والدتي تعبت جدا.. واخدت قرار اني اسيب كل حاجة وابقي معاها،

كانت حقبة سوداء في حياتي ف كل شئ..

نفس الشئ حصل انهاردة.. وكأنها علامة من ربنا لشى او لحكمة معينة انا فعلاً لا ادركها حالياً، ولكن كان الله في العون واتمني من الله ان ربنا يعفو عنها ويشفيها.. في مثل تركي بيقول الانسان بيكبر وقت وفاه ابوه وامه.. حقيقي الواحد بيكبر وقت تعبهم وكبرهم اكتر.. والنضج بيكتمل يوم فراقهم.. رب لا يكتبها لاحد..

بس حقيقي الظروف دي بتبينلك مين حبيبك ومين عدوك..بيبينلك كمان مين انسان ومين معدوم من الانسانية.. بيبنلك حقيقة الحياه وان مينفعش تثق ف حد الا الله.

كان الله ف العون انا مستعدة عموما..

[jaunerevee]

ليڤل انفصال الامهات المصرية عن الواقع في انكار ال LGBTQ مضحكة فشخ، اللي هو مش "انا مش هفهم ابني ان الناس بره الخرارة عايشين مع بعض عادي وافهم ابني ان السيكشوالتي اختيار وانه يحترم كل الناس مادام ماحدش اتخطى حدوده معاه .. وان ديننا بيقولنا كذا يا حبيبي بس ده مش معناه ان الحاجة دي مش موجودة " لااااا ده انا هعيشه في الدينايال بتاعي ومش هفرجه على كوكوميلون عشان في اتنين جايز، ولا على ميس رايتشل عشان لوجو القناة بتاعها اتحط عليه الرينبو في شهر يونيو، شخصية انمي مش عارفة مين كانت هوموسيكشوال يا ماميز ماتخلوش ولادكم يشوفوا المش عارفة ايه .. وكأن ولادهم لو ماشافوش الكونتنت ده مش هيبقوا كده .. قال يعني الواد الgay اللي من كفر الشيخ خريج جامعة الازهر كان بيتفرج على كوكوميلون وهو صغير.