jaunerevee

[jaunerevee]

كل ما بكبر بصدق في كرم ربنا ووجوده بشكل اكبر كتير جدًا من قبل كده وبكون مؤمنة ب "يرزقكم كما يرزق الطير" وان ربنا بيسبب الاسباب .. النهاردة نزلت من بيتي في معاد لو كنت اتأخرت عنه خمس دقايق او قبله خمس دقايق كان يومي هيمشي بشكل مختلف وكنت هفضل تعبانة اسابيع قدام بس ربنا رتب لي كده اني انزل في معاد معين واقابل شخص معين ينصحني نصيحة عابرة واقرر اخد بيها وربنا ييسر لي اموري في نفس اليوم عشان اكتشف سبب تعبي ايه والدكتور الجديد اللي عرفت اسمه بالصدفة ودخلت الكشف بتاعه في خمس دقايق يعرف مشكلتي ويسعى في حلها في نفس اليوم اللي كانت ترتيباته مختلفة تماما سبحان الله

[jaunerevee]

ابني كان بيقلب في حاجتي القديمة في بيت ماما وجاب لي دي 😅

[jaunerevee]

طيب انا بقالي يومين بيرن عليا ارقام غريبة والنهاردة رديت على رقم منهم واحد قال ل�� ان ده رقم واحدة اسمها منى وواحد ناشره على النت فا انا قولتله ان الرقم غلط وقفلت مع العلم ان ده رقم الشغل ومع ناس كتير جدا .. ايه احتمالية ان ده يكون صح واعرف ازاي ان حد حاطط رقمي فعلا في مكان مهزق ومحتاجة انزل اعمل محضر ؟ او احتمالية ان ده حد فاضي بيضايقني لمجرد انه عرف اسمي من التروكولر !

[jaunerevee]

بسيطه.. خدي لفه في الغرف الصوتية ولما تلاقي الموضوع كويس اتكلمي فيه و هتلاقيني مكانك سهل وسط الناس

هعمل كده ان شاء الله .. شكرًا اوي على المقترح ♥️

[jaunerevee]

في حاجه هتفيدك جداً في الماركتنج الخاص بيكي، في حدود الساعة ٨ أو ١٠ بليل افتحي لايف صوتي ع التيك توك وابداي اطرحي أسأله وإجابات وسيبي الناس ترد عليكي ونسيبي فيديو تعريفي ع صفحتك خاص بيكي وبالتوفيق

حلوة الفكرة اوي بس مرعبة بالنسبة لي 🌚

[jaunerevee]

ينفع اتكلم مع حضرتك لو نفسيتى تعبانه

اعذرني / اعذريني انا بخاف اخد شغل او استشارات من تمبلر سواء مجانية او مدفوعة .. بس لو بنت ابعتيلي وهنشوف الدنيا ايه

[jaunerevee]

خبر وفاة زياد رحباني عدى عليا زي اي خبر وفاة.. صدمة، عياط .. حصل خير .. تفكير عميق في الرابط اللي ربطني بالشخص ده، وفي الحقيقة الرابط اللي بيربطني بموسيقى زياد وفلسفته هي فترة كان قلبي فيها مفتوح على آخره وكانت الحياة قدامي فيها كُلها حُب وانطلاق وزهور وتمشية لساعات طويلة بين اسوار الجامعة مع اصحابي.. وسَلمى

افتكرت اني كانت ال status بتاعتي على الواتساب "ما تفتكري من بعدك بَطَل يطلع زهور" وان سَلمى كانت دايمًا تهديني سألوني الناس وتقولي "لا ت��أليني كيف استهديت كان قلبي لعندك دليلي" .. وحسيت اني مُثقلة اوي بشخصي اللي فات زمان وبكل الحب والتجارب اللي مريت بيها وبكل الايام اللي نمت فيها في اوضتي او في بلكونتي وانا كُلي احلام وفلسفة وقلبي خفيف فشخ وبسمع "عايشة وحدا بلاك"

كل حاجة اتغيرت اوي بجد .. الاصحاب والاماكن وبيتي ومدينتي وبلدي وكبرت بقا عندي بيت وولد وشريك حياة مجرد وجوده بينقذني من كل مرة الالم بيتمكن مني ، تجاربي القاسية زادت قساوة والصمت والمسافة بيني وبين حبايبي زادت وخسرت كتير اوي اوي بس كُل خساراتي كانت تعوض والله الا خسارة سَلمى

[jaunerevee]

بتدي كورس ايه ؟

بدي كورس عن التربية وعلم النفس اسمه الكلمات التي تشفي عن تأثير اللغة في التربية

[jaunerevee]

معادي مع البوست السنوي الصيفي الموسمي اللي بحب اقول فيه ان رامي صبري هو احسن صوت بيغني حاليًا وهو سايب ايديه وبدون حزق، ويا سلام لو ماكانش قاعد في التختة اللي ورا عمرو دياب لحد النهاردة ومش عارف يبص في ورقته

[jaunerevee]

بدأت الاعلان عن الكورس الجديد النهاردة ومبسوطة اوي بالانجاز اللي عاملاه لحد دلوقتي 🥹♥️

[jaunerevee]

انا بعيط على زياد الرحباني ليه دلوقت؟

[jaunerevee]

طبيعي ماكونش مبهورة بخطيبي؟

ده أول شهر ليا، ودي الخطوبة التانية ليا الخطوبة الأولى كانت سنة ونص واكتشفت إنه خازوق وأنا كنت بعافر

المرة دي حاسة اني عاوزة مستوى اعلى من كدة ثقافيًا و وظيفة احسن من كدة وهكذا برغم انه ماديًا كويس جدًا، بس حاسة أغلب الوقت اني استاهل مستوى اعلى

ده طبيعي؟

لا مش طبيعي .. لازم تكوني مبهورة ومبسوطة واتراكتد لو ده مش موجود في الخطوبة مش هييجي لوحده بعد كده

فترة الخطوبة دي فترة وردية فشخ لو مش حاسة فيها بكل المشاعر القوية دي مش هتيجي بعدين

[jaunerevee]

حماتي ابنها الوحيد اللي هو جوزي طبيب .. النهاردة بقولها هاتيلي بنادول اخده .. قالتلي لاااا هتاخديه على معدة فاضية يتعبك، قولتلها ماتخافيش الدكاترة بيقولوا انه آمن على المعدة قالتلي يا خايبة ماتسمعيش كلام الدكاترة ده كل كلامهم خرف يا بنتي اسأليني انا 🤭

[jaunerevee]

ماشاء الله اعرص خدمة توصيل .. الموقف اتكرر تاني النهاردة بالحرف

عندي ناس وطلبت اوردر من طلبات والمندوب حرفيا بقاله نص ساعة بيلف في الزقازيق كلها ماعدا المنطقة اللي بيتي فيها

[jaunerevee]

عندي ناس وطلبت اوردر من طلبات والمندوب حرفيا بقاله نص ساعة بيلف في الزقازيق كلها ماعدا المنطقة اللي بيتي فيها

[jaunerevee]

كُل مرة بركب تاكسي،او بشتري حاجة، او بفتح التلاجة الاقي اكل يكفينا، او حتى بشرب كوباية مياة ساقعة في بيتنا، او بحس اني مش شايلة هم اقساط الجامعة اللي بدرس فيها لاول مرة حاجة بحبها بسبب ان جوزي طلب مني ده، او حتى بتفرج على التلفزيون وانا نايمة في سريري على ملايات نضيفة في بيت قلبي مرتاح فيه بحمد ربنا وبدعي لجوزي ان ربنا يوسع عليه زي ما هو موسع علينا ومخلينا مش محتاجين حاجة ابدً ومش مخليني شايلة هم اني قاعدة من شغلي بقالي سنتين وبحس انه احسن حد في الدنيا.. ربنا يبارك لي فيه ومايحرمنيش من حسه في الدنيا ابدًا

[jaunerevee]

منمن في ثوبها الجديد حرفيًا