#ريستارت

[zawzana1]

الإنسان بيفكر بجدية يمسح كل ال Apps اللي عنده ويعمل ريستارت كدة لدماغه ويشغل نفسه في أي شئ يفيده أو مايفيدوش بس علي الاقل بعيد عن صداع التريندات والرغي،

ما عدا تمبلر العزيز طبعا، لأنه مش ابلكيشن.. ده النوت بوك بتاعتي!

[marmarika-world]

الكوكب محتاج ريستارت او اعادة ضبط المصنع

حاجة في الرينچ دة

[deepkingdomdaze]

عاوز أعمل ريستارت لدماغي علشان تعبت

[howzees-blog]

عايز اعمل ريستارت لدماغي

[scorpiowithmuchlove]

يااه لو ليك عمر كمان غير عمرك لما تلاقيك عكيت اوي تعمل ريستارت و تبدأ بعمر جديد و نفسية جديدة لكن بنفس الذاكرة 😶‍🌫️

[nefrti-t-i]

أعتقد إن من السهل إن الواحد ي آمن بوجود الآله ويعتنق الإسلام مثلا لكن من الصعب إن لما يفقد الإنسان إيمانه وصوابه يعمل ريستارت ويرجع يقول آحد آحد آحد بشوف إن الإيمان وعلاقة ومعرفة الإنسان بالآله تجربه شخصيته نتاج خلاصة حياته سواء هو اتولد مسلم بالوراثه يعني موحد او اتولد فور فري وقرر يعتنق اي حاجه حتى لو بقرةالخلاصه إن الإيمان خلاصة حياة احنا مخترناهش انت وحظك بقا بومب او صواريخ ايش هذا والله نفس الشي!

[blankbudd]

عايزه اشوف جبال وبحر حالا وماخدش حد معايا دي بجد احسن طريقة اني اعمل لنفسي ريستارت من هنا ورايح:(

[amrovich]

أظن من الاختراعات المُلحَّة انه يتم اختراعها هو جهاز يفقد الانسان ذاكرته بانتقاء يعني يعمل سيليكت للمواقف السيئة يعمل شيفت ديليت ويحتفظ بالدروس المستفادة منها بحيث يبدأ مع نفس الحد دا بعد ما يعمل ريستارت للريليشن بس علي نضافة بعد ما عرفوا بعض وفهموا بعض ودرسوا وذاكروا بعض كويس لان الواحد بيمر بمأزق الا وهو ان كم التخبط الي هيجرا بيني وبين اقرب حد ليا علشان نتعامل مع بعض حلو بيساوى في قوته وشدته كم من الفجوات واسوار الدفاعات بيبنيها الطرفين للاحتياط في المستقبل وبالتالي بعد ما فهموا بعض الحمدلله وعرفوا لغات حبهم وانواع زعلهم وشخصياتهم وطرق ردود افعالهم وانفعالاتهم وجابو اخر بعض يعني فخلاص كل حد جهز قاموس معاملات يقدر يتعامل بيه بقلب جامد بيحصل التوست فالحياة بقا وبيخبطوا في حيطة جديدة الا وهى انهم مش عارفين يتخطوا الاسوار الدفاعية لبعض والي بيتعملها ابديت يوم ورا يوم..

ليه مينفعش ناخد فترة trailer كدا نفهم بعض فيها بما فيه الكفايه وبعدها نـ reset كل العك واللعبكة بحيث نبدأ سوا تانى مالاول علي نضافه واحنا معانا مفاتيح بعض دون ما حد يكون معبي من حد ولا شايل ومراكم جواه بلاوى؟

[ahmednasserph]

مش عارف يوم ايه اللي بيبتدي العصر دا انا محتاج اعمل ريستارت لدماغي

[clingyasfuckkk]

هو مينفعش اعمل ريستارت لاخر ١٠ سنين في حياتي ؟

[90s0]

هخلع من كوكبنا اللطيف

و هطلع المريخ

هبدأ تاني على نضيف

ريستارت يا تاريخ

زهقت من البني آدمين

مش قادر، حوارات ..

رحت الحرفيين و عملت سفينة فضاء

هاخد الناس اللذيذه

سوا سوا نتخبط

نتحرك من الجيزه

الرحله وان و تيكيت

هننسى كل اللي فات

و بدوسة نعمل سكيب

الوضع هنا مش ظريف وكله في باد تريب

وهحب واحده فضائيه عينيها واسعه و راسها دواريه

زهقت انا م الكورة الارضيه

قصص الحب كلها هي هي .

[elzuz]

هخلع من كوكبنا اللطيف و هطلع المريخ ابدأ تاني على نضيف ريستارت يا تاريخ زهقت من البني آدمين مش قادر حوارات روحت الحرفيين و عملت سفينة فضاء هاخد الناس اللذيذه سوا سوا نتخبط نتحرك من الجيزة الرحلة One Way Ticket هننسى كل اللي فات و بدوسه نعمل Skip الوضع هنا مش ظريف و كله في Bad Trip

[gemyevan]

هتشيل؟ طب بص هي بسيطة، شوية حديد عشان لما تقول نكته بايخه يتضحكلك على كام حاجة قررت انك تخليها جزء منك و عشان انت شايف انك قادر تشيل و عشان انت كدا كدا لو مكنتش هتقدر مكنتش هتوافق، بس لما ميزان عقلك و جهدك يجيب مؤشراته القصوى و يبقى خلاص المقياس عدى الوحدة المطلوبة، اوعي تقول تعبت، اوعى تطلب راحه و اوعى اي حاجة غير انك تفضل زي ما انت، اي كلمة هتقولها هتتسمع انك بتقول كفايه، بتقول مش قادر.

و دا مش حقيقي، هتضطر تثبت للعالم ان فيه فرق ما بين اني بقالي كتير بجري و عايز اخد نفسي و بين اني عايز اخد نفسي و اطلع اجري!! و اكمن ساعتها اكتر ما هيصيبك بالاحباط انهم افتكروك بتقول كفاية و دا مش حقيقي، و انك بس كان نفسك الدنيا تبقى زي اي لعبة صالات ف تعرف تاخد وقت مستقطع..

هتكون حساس شويتين، تلاتة.. هو هتكون اوي مش حتى تلاتة، يمكن هيستخدموك بعد كدا يوزنوا بيك الدهب و الفضة. وارد انك تبكي، بس يستحسن تستنى لما الدنيا تشتي لزوم الخداع البصري ..

و انت متشبهش لاي حد بيقولك انك شبهه، ولا حتى تشبهلك زمان.. انت مين؟ حد بيحاول، يروح من هنا لهناك، و بالرغم من انك مصمم تاخد كام حاجه معاك ف الطريق و كل ما تمسك حاجة تقع منك التانيه و بقالك كتير واقف مكانك بتلملم عشان مش عايز تمشي من غيرهم، المنظر من بعيد مبيضحكش! منتاش تشارلي تشابلن بروح امك يعني.

بيقولوا مالك و مبقتش تقضية واجب، بقوا بيسالوا بجد، و دا شيء محزن و مخجل و متعب و بايخ و غريب.. و الاغرب انك بتحاول تقول، بس الطبيعي و المعتاد انك مبتقولش، بتحاول تكسب فتخسر، بتقول مش لاعب ...الكورة بتيجي لحد عندك .. و اول ما تشوط و تستنى عينك تشوفها ف الجون عشان تحتفل، العالم يتحول لحلقة كابتن ماجد و تلاقي السنين بتعدي مستنيها تعدي الشبكة.

زرقاء اليمامة بدون البصيرة و دا بيخليك تشوف و تخلق كل الاحتمالات بس بتنهار ف نتايجهم لانك مش عارف ، يدوبك تمتلك كم معلومات مهول بس من كل حاجة حبة يدوب ع القد يخلوك تعرف تكمل مناقشة او تنهيها او انك تحرك راسك و تقول فاهم فاهم..

مقدار نومك بيتقاس بحبات الخردل قصاد حبات قرع..

لوحاتك كلها منظورها مسحوب و انت مش موزون، لما قررت تكبر نسيت تدوس شيفت فموزعتش النسب صح،

فيثاغورث مصدوم جدًا منك..

ممكن تعمل ريستارت للراوتر،

ولا اقولك،

شيل الفيشة..

استريح..

عايز تفكر؟ طب فكر بس ابقى قولي قررت ايه.

ها ، هتشيل؟

[sarrah]

برتاح لما أيامي يبقى فيها شيء روتيني، ويسلام لو أكتر من شيء، ببقى متطمنة إن مهما مزاجيتي لعبت في اليوم هيبقى في نقطة ريستارت الدنيا بترجع عندها مستقرة تاني، وهترجع تترتب تاني، بقول دا علشان كلها يومين تلاتة ويومي يتشقلب وميبقاش فيه حاجة في مكانها، ففترة وهتعدي وهنقدر نخلق روتين تاني، تمام؟

[muhammadmhn]

هل التعب دا من فايزر؟ ولا برد من الجو؟ ولا مشاكل كبيرة في بطني؟ ولا مجرد إرهاق من الـ12 ساعة شغل يوميًا والمشاوير والمستشفى واللذي منه؟ لن نعلم وعايزين نعمل ريستارت