#بس نقول

[sarrah]

الحمدلله 🥹💖💖💖💖💖💖

[5005-2]

كلنا في الوقت ده بننبقى محتاجين نتحضن لحد ما ننام بس عمرنا ما بنروح نقول، بنيجي نسهر هنا في تمبلر 😂

[alaawarda]

"الصُحبة"🤍🌿

قال تعالى : {وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ ..(28) }

الصُحبة هي أول خطاك للجنة، لو عايز فعلًا الجنة بص للصُحبة حواليك، لو صُحبتك بيهم بتخليك تتردد وتخاف في طاعتك لله عز وجل فا أهرب!

لو بس رصيدك من قعدتك معاهم بتطلع منه بإنك عايزة تشتري الجزمة الفلانية وعايز تشتري البلايستيشن الفلاني وتجرب المطعم الجديد ف لازم نقف مع نفسنا وناخد موقف اتجاه علاقتنا بيهم ونظبط درجة ارتباطنا بيهم محتاجة تكون في أي مستوى عشان منتفاجئش إننا أصبحنا من الغافلين! {وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا (28)}

الصُحبة عَوْن لك، أنت محتاج من يشدد أذرك في دُنياك و دينك

..والله أنا كنت أظلم..

فقال النبي صلى الله عليه وسلم: "إن الله بعثني إليكم فقلتم: كذبت. وقال أبو بكر: صدق، وواساني بنفسه وماله، فهل أنتم تاركوا لي صاحبي". مرتين، فما أوذي بعدها.

دور على اللي يعينك على تقوى الله دور على اللي دايمًا يقولك محتاجين ناخد خطوة محتاجين نبطل الذنب ده محتاجين نزود في النوافل محتاجين نقرب من الله عز وجل عايزين نعلى درجات في الجنة، أسعى لمن تجمعك بيهم تقوى الله دُنيا وآخرة

قال تعالى : { وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَرًا حَتَّى إِذَا جَاءُوهَا وَفُتِحَتْ أَبْوَابُهَا وَقَالَ لَهُمْ خَزَنَتُهَا سَلَامٌ عَلَيْكُمْ طِبْتُمْ فَادْخُلُوهَا خَالِدِينَ ( الزمر: 73 ) }

- الصُحبة تترقب صاحبهم الذي يفلت منهم وتحفظ غايتها وهي : الهدى

{لَهُ أَصْحَابٌ يَدْعُونَهُ إِلَى الْهُدَى}

- د/أحمد عبدالمنعم

{الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ (67)}

و أنت بتختار صُحبتك هدفك يكونوا ليك "صُحبة أصلها هُنا..ومنتهاها الجَنة" أصل أنت هنا ليه غير عشان الجنة؟!

صُحبة تقوم من قعدتك معاهم عايز تبطل تسمع أغاني، تبدء حفظ قرآن، تلبسي حجاب شرعي، نوقف مسلسلات وأفلام،يلا نشجع بعض على الصلاة في المسجد، ناخد خطوة ونبطل غيبة..صُحبة تكن لنفسك صالحة مُصلحة

لسه فيه وقت ولسه معانا فرصة نسعى وأول خُطى سعيّك للصُحبة هي الدعاء، لازم نُضبط الصُحبة عشان مش هينفع نقول

{ يَا وَيْلَتَىٰ لَيْتَنِي لَمْ أَتَّخِذْ فُلَانًا خَلِيلًا (28)} (":💔

[marwa-el-zeiny]

صباح الخير

اتمني يكون يومك جميل و اولادك بخير و مبسوطة و سعيدة ♥️

كنت عايزة اقولك البلوج بتاعتك therapeutic بالنسبالي من زمان جدا و مفيش مرة دخلت فيها عندك غير و انا حاسه ان في حد في الدنيا حاسس بنفس المشاعر الي بتجيلي

(متابعاكي من قبل ما تتجوزي و تسافري)

كنت دايما معجبة بنظامك و روقانك و نفسي اتعرف علي الشخصية العاقلة الي بتصور حلو اوي دي و نبقي اصحاب مع اني متأكدة ان مفيش حد حياته زي ما بتظهر هنا و محدش بيصور خيبته زي ما بيقولوا

لحد ما شوف�� امبارح بوست الي بتتكلمي فيه عن اول مرة بكيتي فيها قدام ابنك و انه كان فاكرك بتلعبي معاه

ده بالضبط الي حصل معايا!!

انا ام جديدة (ابني عمره ١٠ شهور دلوقتي) و عندي شعور دائم بالانفصال عن الواقع و عن نفسي, انا بعمله كل حاجة بنفسي و باخد بالي منه كويس اوي او علي قد ما اقدر و هو احسن حاجة حصلتلي في حياتي و روحي علي الارض, بس مش قادرة اتخلص من شعور ان دي حياة حد تاني و انا بتفرج عليها من بعيد

فهماني؟

امتي هرجع ابقي انا؟ امتي هبقي متحكمة في حياتي و هو معايا؟

مساءك حلو يارب زي كل كلمة قولتيها وفرحتني بجد بجد مش كلام وخلاص😃

الخيبه موجودة والكركبة موجودة والهبل موجود بس زي ما انتي قولتي محدش بيقول خيبته او بنقولها عادي ف الدرافتس 😃

مش هترجعي تبقي انتي انا لسا مرجعتش بس بطلت اسأل نفسي هرجع امتي لان بقي عندي يقين اني مش راجع يا رأفت😃،بنتغير اوي وتغير بطئ فمبتاخديش بالك اصلا انك اتغيرتي غير بعد ما تقابلي حاجه تفكرك بنسختك القديمه

كان ف مرحلة اني عايزة ارجع ابقي انا دي ف محاولاتي كنت بخلي جوزي ياخد الولاد ويخرج واعتبر ان دا وقتي بقي بتاع مروة هتعمل فيه اللي مروة عايزاه لقيت انه بحتار اصلا طب انا كنت زمان بعمل ايه ومش عارفه او حرفيا مش فاكرة انا بعمل ايه قبل المرحله دي ،امشي مع الموجه دلوقتي هتاخدي بالك من بيبي مبيعرفش يعبر بالكلام هيجيلك احساس ساعات لما متفهميش بيعيط ليه انطق يابني كفرتني، هتعدي بمرحله الكلام ممكن تفضلي ١٢ ساعه قاعده قصاده مستنياه يقول كلمة مفهومه ،مرورا بقي بمرحله الرغي ودي اللي انا فيها ومش اتمناها لألد أعدائي انا عشان أخلي زين يفصل تلات دقايق متواصلين دون كلام يدخل ف مفاوضات معاه ببقي مضغوطه لدرجه انه اتفاقاتنا ساعات عشان يسكت شويه ان انا اطبخله مكرونه اسبوع كامل كل يوم😃

فالفكرة او اللي لقيته لغايه دلوقتي مفيش انا طالما مشيتي ف طريق تكوين أسرة وامومه فيه رحله هتتفرمي فيها هتستمتعي هتطرشقي كتييير هتهدي بضحكة مشاعر كل حاجه وعكسها دي هتكون أنا تانيه خالص ،كل اللي بحاول اعمله اني ابقي واعيه لنفسي انا بتغير ف اي اتجاه ،بعمل نشاطات ليا ف سياق الاسره برده😂يعني بروح جيم بس باخدهم معايا ،قبل ما ابدأ شغل لما درست طهي كان ابني بيحضر معايا معظم الكلاسز حاجات من دي كتير بقي

بعمل دا اعتبريها فوبيا انا مش هكبر واقول لنفسي او لولادي انا ضيعت عمري عليكو انا الجمله دي ممكن نقول انها كابوس اووو جمله بتنبهني متنسيش نفسك وترجعي تلومي اللي حواليكي بعد كدا ،انا هعيش وحبة عليا وحبه ع عيلتي بس هعيش

تتهني ف حياتك يارب ويرزقك الطمأنينه ويكون نونتك خير صديق ليكي يارب يارب 🩷

[92rose]

أيوا يا جماعة فعلاً في قرايب بيكرهولنا الخير بس احنا بنتكسف نقول ع النت

[ohmennaitsyou]

صحاب عمر عملوا نادي كتاب و انضميت ليهم، عمر شخصيا منضمش. صمموا يناقشوا كتب نون فيكشن، وقع الاختيار في اول مناقشة على كتاب كل رجال الباشا لخالد فهمي. الكتاب بضين بشكل، مش ممكن تقل الدم أنا كنت مهتمة بحقبة حكم محمد علي بنسبة كبيرة ممكن نقول ٦٠٪؜ مثلا بعد ما بدأت اقراه اتبخر اهتمامي بالحقبة ديه تماما. الكتاب تقيل و مليان معلومات و متعوب عليه فشخ بس هو مش كتاب لذيذ، هو ممل و اشبه بالدراسة البحثية اللي المفروض الكاتب يروح يناقشها ��ع دكاترة التاريخ زيه. أنا عايزة حد يحكيلي حدوتة.

[imazikaty]

أنا عايز إيه؟.. مش عارف.. فيه حاجة ناقصاني ولكن فعلا مش عارف إيه هي.. أنا شخص بحس بالإنجاز بسهولة فشخ.. أو ما بحسش بيه خالص.. حاسس الجملتين شبه بعض بشكل ما.. القصد يعني إن ماعنديش طموحات كبيرة ولا حققت حاجات عظيمة ولا مريت بنكسات قاتلة.. كله في المتوسط الحمد لله.. كل شهر بقبض مرتبي وبكمل في وظيفتي.. كل مرة بدفع مصاريفي والتزماتي الشهرية بحس بإنجاز.. كل يوم بقدر أجيب حاجة محتاجها أو نفسي فيها مهما كانت بسيطة بحس بإنجاز.. بتبسط وبحمد ربنا وبحس إن�� ملكت الدنيا وما فيها.. بجد ومش مجرد كلام ولا مبالغة.

لما بتحصل لي حاجة سخيفة بزعل كام ساعة وبعدين أفتكر شوية النعم اللي ربنا انعم علل بيهم ومع مقارنة بيني وبين ناس كتير غيري بقول تمام.. مادام المهم موجود والستر والصحة موجدين تمام أي حاجة تانية تضيع عادي.. اشتغلت في حاجة تعبت فيها في الاول مع شوية كورسات وشهادات وكنت معتبرها خطوة مهمة في حياتي المهنية.. لكن الدنيا ممشيتش والدنيا مبقتش احسن حاجة.. وقفت خالص وماعرفتش مصيرها اية.. واشتغلت في حاجة تانية واتعطلت في نصها لأسباب خارجة عن إرادة الجميع وعادي أشياء بتحدث مافيش أزمة.. ولا أي مشكلة.. مش أول ولا آخر واحد.. الحاجات دي كلها حصلت على مدار سنين.. محاولات فاشلة زي ماهو واضح ولسه تقريبا بدور على نقطة الصفر في الحتة دي.. بس فعلا.. فعلا.. مش متضايق أوي ولا حاسس إنها حاجة كبيرة.. حظي حلو في حاجات ووحش شوية في حاجات.. أكيد أحسن ما يبقى حظي خرا في كل حاجة.

ساعات كتير أبقى قاعد لا بيا ولا عليا ولا حواليا.. وييجي حد من اللا شيء كده يعشمني بخطوة هايلة وفرصة عظيمة.. وأتحمس فعلا وأندمج وأجتهد على قد ما أقدر .. وبعدين الحد ده يختفي أو يطلع كان مكبر المواضيع والوعود والاتفاقات كلها تتبخر بسهولة فشخ.. وبرضه بفضل زي ما أنا.. احساس بالاحباط ياخدله كم ساعة وبعدها بقول إنها طبيعة الحياة.. مش معقول يعني هتجيلك الفرص المقشرة وإنت قاعد على مؤخرتك كده.. الله جاب الله خد الله عليه العوض.. إنسى.. وبنسى فعلا.

رغم كل هذا التصالح.. اللي هو حقيقي أقسم بالله جدا جدا.. أو عشان الحلفان يعني.. خلينا نقول إن ده اعتقادي عنه.. بيفضل برضه هذا الإحساس الهائل إن فيه حاجة ناقصة.. إحساس مؤلم بالخواء وعدم الجدوى.. كان ممكن أفهمه أكتر لو كنت من الناس اللي بتسعى وبتحارب وبتحزن حزن حقيقي على كل فرص النجاحات والإنجازات اللي ضاعت أو فلتت من إيديها.. حاسس إني ضايع مني حاجة كبيرة جدا.. بس حاجة مالهاش علاقة بكل الحاجات اللي ضاعت بجد دي.. مش بندم على اللبن المسكوب.. بندم على شيء تاني اتسكب.. أو يمكن ماتسكبش مش عارف.. المهم إني مش مرتاح برضه... شكرا جدا مافيش أي جملة مفيدة في الآخر للأسف.

أو لأ معلش لقيت جملة..

أنا راح مني حاجة كبيرة.. أكبر من إني أجيب ليها سيرة.

[shu-rooq]

شوفت فيديو لكيكة بالشوكولاتة معمولة ببساطة من غير بيض ولبن والشيكولاتة من غير شيكولاتة متسيحة، معمول صوص بالكاكاو. كانت ليلة راس السنة وكان نفسي اكل حاجة حلوة قولت اجربها. وريت الفيديو لخالد وهو تحمس وعملتها. كان طنط وعمو عندنا وخالد قالهم استنوا متمشوش الا اما ناكل الكيكة سوا. ف من باب المشاركة بحكي لطنط إن الكيكة من غير بيض ولا لبن. ف امتعضت قوي كدة وان ازاي يعني. اومال فين القيمة الغذائية اللي فيها، ما كدة تبقى دقيق بس.

أنا بس جه على بالي وقتها سؤال بس مكنش عندي سرعة بديهة كافية تخليني اسأله في ساعتها، هي إيه القيمة الغذائية اللي انتوا مستنينها من الكيك مطلقا يعني؟

*ابقى متفهمة إننا نقول انها ممكن متكونش غنية طعما، وده يتطلب إننا نستنى اما ندوقها عشان نقدر نحكم اذا كان طعمها حلو ولا وحش.

**انا بالفعل حطيت معلقتين شيكولاتة مع صوص الكاكاو ده عشان يديها طعم غني.

*** اللطيف ف الموضوع إنها طلعت جميلة قوي واللي ميعرفش ميقدرش يلاحظ انها كيكة من غير مكونات الكيك وشيكولاتة من غير شيكولاتة.

[re1996-r1]

فيه معضلة فلسفية قديمة لحد النهاردة لسه متحلتش بشكل نهائي، اسمها معضلة سفينة ثيسيوس.

باختصار: ثيسيوس ده هو ملك إغريقي خد سفينته وراح حارب الأشرار وانتصر عليهم، فا لما رجع الناس احتفلت بيه وقررت تخلد سفينته الأسطورية.

بمرور الوقت، خشب السفينة كان بيتهالك، فا كل سنة الناس كانت بتشيل لوح خشب بايظ وتستبدله بلوح جديد.. وهكذا، سنة بعد التانية بعد التالتة... لحد م ف النهاية السفينة مبقاش فيها ولا خشبة أصلية... ومن هنا المعضلة:

هل السفينة لسه هي هي نفسها سفينة ثيسيوس اللي انتصر بيها؟

هل لسه ليها نفس الأسطورية الأصلية بتاعتها؟

لو أه، فازاي والخشب الأصلي بتاعها مش موجود؟

ولو لا، فا عند أي مرحلة فقدت السفينة ذاتيتها؟ هل من بعد أول لوح خشب اتغير فيها؟ ولا التاني؟ ولا الألف ولا الأخير؟

من هنا نصصدم بسؤال: هل الأشياء ليها جوهر بتتعرف بيه حتى لو اتغيرت من برة؟ ولا مفيش حاجة اسمها جوهر والأشياء ما هي فقط إلا مجموع عناصرها وخصائصها الخارجية؟

المعضلة ديه تم ربطها بسؤال الهوية الإنسانية.. فا مش بس التغي��ات البيولوجية اللي بتحصلنا مع الوقت من موت الخلايا وتجديدها وخلافه، لكن على مستوى الذات والشخصية.

فا طرحت سؤال: احنا مين بالظبط؟ أنهي نسخة فينا هي حقيقتنا؟

بقياس بسيط، ممكن تفكر ف فريق الكورة اللي بتحبه.. تخيل لو إن كل يوم فيه لاعيب منه بيتباع وبييجي مكانه واحد جديد.. وهكذا لحد ما ف مرة تتفرج ع الماتش وتشوف فرقة جديدة تماما مفيهاش اسم لاعب واحد تعرفه.. هل ساعتها هيفضل هو نفسه الفريق اللي انت مرتبط بيه وبلاعيبته وتقول الفريق بمن حضر،

ولا هتحس إن لأ فيه حاجة غريبة؟

وطن أو مدينة بتحبها ومرتبط بكل مكان وشارع فيها،

ومع الوقت اتشال منها ملامحها، والشجر اللي بتحبه اتقطع، البحر اتحاوط بقضبان، والأماكن اللي مرتبط بيها اتحولت خرسانة،

يا ترى هتحس بنفس شعور الارتباط والانتماء؟

عموما، نظريات كتير حاولت تجاوب على معضلة السفينة، أنا مش مهتم باستعراضها هنا أد ما مهتم ��كتر بطرح الأسئلة والتفكير فيها.

نفترض إن عند مرحلة ما من حياتك قدرت تكوّن هوية تقدّم بيها نفسك للناس.. خلاص انت حددت عقيدتك ومبادئك وطباعك واللي بتحبه وبتكرهه.. وخلينا نقول إن فيه شخص اسمه A كان معاك طول الفترة ديه.. ومع الوقت، كل ده اتغير، مبادئك لو كانت في اليمين بقت ف اليسار، اللي كنت بتؤمن بيه بقيت بتسخر منه، طباعك اختلفت، والحاجات اللي بتحبها وتكرهها اتغيرت بالكامل. ونفترض إنك خلال كل ده كنت بعيد عن الشخص A، واتعرفت على شخص تاني B.. السؤال هنا: مين فيهم اللي يعرف حقيقتك اكتر؟ واحد منهم؟ ولا الاتنين؟ ولا واحد فيهم؟ ولا أيا كان اللي هيشهد على نسختك الأخيرة في نهاية الرحلة؟

ولو بعد التغيير اللي حصلك ده قابلت صديقك القديم A،

يا ترى انتوا الاتنين هتحسوا ب إيه وهتتعاملوا ازاي مع بعض؟

نرجع للسفينة، فا فيه فيلسوف قرر بدل م يحلها إنه يزود سؤال تاني للمعضلة، قالك تخيل إن كان فيه شخص ما بيجمع كل الخشب الأصلي المتهالك، وعمل بيه سفينة جديدة، فهل وقتها نقدر نقول عليها هي ديه سفينة ثيسيوس؟ ولا اللي احنا رممناها هي سفينته؟

ممكن نقربها شوية بالقياس بتاع فريق الكورة.. تخيل إن اللاعيبة اللي اتباعت راحت كلها لفريق جديد. والفريق الجديد ده بيلاعب فريقك الأصلي، اللي هو كل اللاعيبة اللي فيه دلوقتي انت متعرفش أساميهم، بس بيلاعبوا الفريق اللي فيه كل اللاعيبة اللي انت مرتبط بيهم وبذكريات بطولاتهم وشاري تشيرتات عليها أساميهم.

فا ولائك وتشجيعك وقتها هيبقى لمين؟

لما بنقول: أنا أعرف فلان، أو فلان يعرفني.. بنقصد ايه؟

طيب هل عموما فيه إنسان ممكن فعلاً، فعلاً، يعرف إنسان تاني؟

هل للأشياء جوهر أصلي (Core/ Essence) خاص بيها مهما حصل، ولا الأشياء هي مجرد انعكاس لتصورات الراصدين ليها؟

هل احنا طيب عبارة عن سلسلة من النسخ الغير مرتبطة ببعض بالضرورة، ولا هل فينا حاجة ما بتخلينا لو شوفناها ووصلنالها

نقدر نتعرّف على الناس (أو اللي بنحبهم على الأقل) ونحس بالألفة معاهم مهما الحياة بدّلت فينا وغيرتنا من برة؟

— Amr Samir

[waelahmedsblog]

‏العلاقات فيها حاجة اسمها"رواسب" الرواسب دي بتتكون جوانا بعد كل عتاب مجابش همه بعد كل مشكله كبرت وموصلناش فيها لحل، بعد كل مره نمنا زعلانين ومحدش صالحنا، بعد ما غيرنا عليهم ومافهموش غيرتنا وقللو منها الرواسب دي لما بتتكون جوانا، بتخلي الكلمة الحلوة رافضة تطلع، بنشتاق بس مابنرضاش نقول، بنزعل بس مابنحكيش علشان محدش هيهتم، الرواسب بتقل العلاقة على قلبك وبدل ما الحب يبقي هو الجزء المريح في حياتك بيبقي للأسف هوا الجزء المتعب اللي بيضغط عليك.

[royaa]

من التفاصيل اللي تعلمتها من الشيخ محمد خيري هي تزيين جميع الأدعية بِجُملة «في عَفوٍ وعافية»، أنْ نقول اللهُم ارزقنا "كذا" في عفوٍ وعافية، حتىٰ أثناء الدُعاء بأبسط الأمور وأصغرها..

مع الوقت بتُدرك قيمة أنْ يستجيب المولىٰ -سُبحانه- وأنت بعافية، ولا يَفتنك بِهَذه الحاجة ولا يَشغلك بها عنه جلَّ عُلاه = فَهذا هو عين العطاء..

قال المُصطفىٰ ﷺ:

[ سَلوا الله العفو والعافية فإنَّ أحدًا لم يُعطَ بعد اليقين خيرًا مِنَ العافية. ]

يعني لو المُسلِم فضل طول حياته يسأل اللَّه -عزَّ وجل- العفو والعافية بس، لأصاب خَيرَي الدُنيا والآخرة!

فاللهم إنا نسألك العفو والعافية والمُعافاة في الدين والدُنيا والآخِرة، آمين:')

[auroratalking]

إيه اللي يخليك تقدر تقول على نفسك إنك إنسان كويس ولا إنسان وحش؟ أو على غيرك؟

إيه المقياس الواحد اللي نقدر نقيس بيه الناس؟

هل الدين؟ في ناس هتختلف، ومنهم أنا، كم من بشر غير متدينين أو غير مؤمنين وأفضل من شيوخ وقساوسة ورهبان.

هل العلم؟ النجاح؟ الشهرة؟ كلها مقاييس في رأيي مش دقيقة.

في رأيي المقياس الأهم على الإطلاق هو الـ إمپاثي

Empathy

ومن مفاجآت حياتي اللي كانت بداية غيرت كثير من أفكاري إن الكلمة مالهاش ترجمة دقيقة بالعربي، يعني التعاطف والرحمة وغيرهم مش ترجمات دقيقة، لحد ما قريب أختلق ليها كلمة بالعربي "المواجدة" لكنها كلمة مش دارجة وموجودة بس لاغراض الترجمة، وده خلاني أتساءل ليه كلمة ومعنى زي ده مش في ثقافتنا.

التعاطف في الإنجليزي هو ال سيمپاثي.

الفرق بين الامپاثي والسيمپاثي أو التعاطف، هو أن التعاطف بيشترط الأذى اللي واقع على شخص وشخص ثاني ماحصلوش أذى تعاطف معاه، في حد سليم وحد متضرر، في حد بشكل ما أعلى من حد.

الإمباثي معناه إنك توصل لمرحلة إنك حاسس بمشاعر الآخر كإنك إنت هو، تفهم منطقه كإنك بتفكر بدماغه وبدون أحكام، تعامله كإنك بتعامل نفسك، مش لازم يكون حصله أذى، ومش لازم يكون ليك اليد العليا، إنت وهو متساويين وبقيتوا كإنكم إنسان واحد.

المقياس الحقيقي في نظري لخامة الإنسان ومعدنه علشان نعرف نقول هو إنسان كويس ولا لأ هو قد إيه إمپاثاتيك، قادر يحس بالاخرين ويفهمهم ويحط نفسه مكانهم مهما كانوا مختلفين عنه.

لو حتى عدوه مات، يحزن له، ولأهله اللي فقدوه مثلا، وهكذا.

لو حد مختلف معاه حتى لو عقائديا، يقدر يفهم الآخر ده إيه منطقه.

في مليون دراسة عن الإمپاثي، ليهم نتائج مختلفة، مثلا النساء عندهم امپاثي اكثر من الرجال، الفقراء أكثر من الأغنياء، الأطفال أكثر من الكبار، وهكذا، وفي حلقة حديثة للدحيح إتكلم فيها عن شوية تجارب ثانية.

إحنا كشعوب عربية وخصوصا مصرية في رأيي امپاثاتيك أقل من شعوب ثانية كثير.

في رأيي أسباب ده هو المنافسة الشديدة بسبب نقص الموارد، فمافيش رفاهية الإمپاثي، وبرضه بسبب إننا شعوب خايفة أكثر من غيرها، لاسباب سياسية أو إجتماعية، وفي رأيي في تفسيرات غلط كثير للدين بتؤجج فكرة لا أنسنة الآخر، واللا أنسنة أو نزع الإنسانية من الآخر أكثر حاجة بتقلل الإمپاثي بشكلٍ كبيرا.

آه إحنا شعوب مثلا بتعمل خير كثير وبتتبرع كثير وهكذا، لكن من منظور ديني لكسب الحسنات اكثر ما هي إمپاثي.

من شواهد قلة الإمپاثي مثلا إنك تستمتع بالمقالب وهي بتتعمل في الآخرين، وألمهم يمتعك، وطبعا إحنا برامج المقالب أعلى مشاهدة كل سنة، طبعا في برامج مقالب في كل بلد، بس عمرها ماكانت في قايمة الاكثر مشاهدة.

من شواهدها الثانية إزاي حد ممكن تشوف ان حد يستحق أي عقاب أو أذى لمجرد وصف أو إنتماء، يعني ده عسكري فيستحق يتقتل، ده إسرائيلي فيتحرق، ده إخواني فينتفخ، ده ثوري فيتسجن، ده بيحب السيسي فنفجره.

طبعا كلنا بنوزع الإمباثي باشكال غير متساوية أكيد عندك إمپاثي لإبنك أكثر من جارك، لكن الحد الأدنى بتاعك من الإمباثي، هو اللي بيحدد إنت مين.

قد إيه قادر تحس بالآخر، تسمعه، تهتم بيه، تحط نفسك مكانه؟

قد إيه؟

[khaledalansary]

للأسف الشديد الحدث حدث هام لأحبائنا اهل فلسطين ولا يوجد به اى دولة عربية ..لا حول ولاقوة الا بالله العلي العظيم .. اقرأ

امبارح فيه حدث دولي مهم حصل، مش هكون مبالغ لو اعتبرته إنه حدث ضخم وكبير في دلالاته وكمان تبعاته، وبشكل لن يقل في صداه وأثره عن أوامر الاعتقال اللي صدرت من الجنائية الدولية بحق" نتنياهو" و"غالانت".

امبارح وفي سابقة هي الأولى في التاريخ، أعلنت ٩ دول (ليس بينها أي دولة عربية) عن تدشين أول تجمع دولي أطلق عليه "مجموعة لاهاي" بهدف ملاحقة العدو ال$هيوني في المحاكم الدولية والعمل على إنهاء الاحتلال الا$رائيلي للأراضي الفلسطينية (الأراضي الفلسطينية المحتلة عقب ١٩٦٧)

الدول دي هي جنوب أفريقيا وماليزيا وكولومبيا وبوليفيا وكوبا وه��دوراس وناميبيا والسنغال وجزر بليز.

المجموعة قررت إنها مش بس هتعمل على ملاحقة العدو قضائياً، دول قرروا كمان إنهم يحاصروه سياسياً واقتصادياً وعسكرياً من خلال اتخاذ الاجراءات التالية:

١. تنفيذ أوامر الاعتقال الصادرة من الجنائية الدولية بحق "نتنياهو" و"غالانت" في حال وصول أي واحد منهما إلى أراضي أي دولة من ال ٩.

٢. منع تصدير أو توفير أو نقل الأسلحة للعدو.

٣. منع رسو أي سفن تنقل أسلحة او وقود للعدو في موانيء أي دولة من ال ٩.

حد هيقول بس دي دول صغيرة -عدا ماليزيا- وتأثيرها مش كبير، هرد وأقول كلامك صحيح، لكن رأيي الشخصي إن تدشين التجمع نفسه في حد ذاته بيمثل تجرؤ على المحظور، وإعلان عصيان للابن المدلل لأمريكا، وتحدي جديد بيقول للعدو إن ما قبل الطوفان غير ما بعده، حتى لو معاك أمريكا بجلالة قدرها.

وإن مجرد تدشين التجمع بهذا العدد من الدول، يعني إنه بيفتح الطريق إنه يكبر وتشارك فيه دول أكبر نفوذاً وتأثيراً، وده لوحده تهديد كبير للعدو متأكد إنه مدركه بشكل واعي وهنشوف ردود الأفعال عليه الأيام القادمة.

لكن كمان على الرغم من إن الدول دي تبدو صغيرة نظرياً من ناحية التأثير على المشهد الدولي عموماً، لكن عملياً هي قادرة على التأثير على العدو لوحده تأثير مش بسيط، وهضرب أمثلة على سبيل المثال لا الحصر عن أوراق الضغط والتأثير اللي ممكن يمتلكوها:

1. أولاً ده يعتبر أول تكتل دولي رسمي ضد العدو، بيجمع الدول اللي علاقتها السياسية تاريخياً متوترة مع العدو زي كوبا وبوليفيا وماليزيا، مع مع دول كان بينها وبين العدو تعاون اقتصادي وعسكري زي كولومبيا وجنوب أفريقيا وناميبيا والسنغال وهندوراس، وده بيعطي التجمع قوة مبنية على تكامل الأدوار ما بين دول لديها تاريخ طويل من المناكفة السياسية مع العدو، ودول كان بينها وبين العدو علاقات ممكن بعضها تكون متوترة لكنها في النهاية علاقات قوية إلى ما قبل الطوفان، وكان العدو ييأمل أنها تعود وتتحسن تاني بعد انتهاء الحرب.

2. كولومبيا، تعتبر من أكبر مصدري الفحم للعدو، وكان الفحم الكولومبي قبل الطوفان بيمثل 65% من إجمالي واردات العدو من الفحم، ومن ساعة الطوفان وهي أوقفت التصدير. كمان حجم الصادرات العسكرية من العدو لكولومبيا وصل لقرابة ال 200 مليون دولار، وده كله هيتوقف تماما.

3. جنوب أفريقيا، وعلى الرغم من مواقفها القوية المؤيدة لحق الفلسطينيين في تقرير مصيرهم ومعادية لسياسات الاحتلال في الضفة الغربية، إلا إنها بيجمعها مع العدو علاقات اقتصادية وتعاون عسكري مهم. مثلا 15% من واردات العدو من الفحم من جنوب أفريقيا، وجنوب أفريقيا كانت دوما بتمثل بوابة العدو لأفريقيا لثقل دورها وتأثيرها في القارة، كما إنها سوق مستهدف للصنا��ات الأمنية والسيبرانية للعدو.

4. ماليزيا وكولومبيا وكوبا نقدر نقول إنهم بالموانيء الاستراتيجية اللي بيشرفوا عليها، بيتحكموا في حركة التجارة في شرق آسيا وأمريكا اللاتينية، إلى جانب ناميبيا وجنوب أفريقيا والسنغال اللي بيتحموا في حركة التجارة في أفريقيا نفسها ومن جنوب وغرب أفريقيا إلى أوروبا. ده معناه إن الدول دي قادرة إنها تسبب مشاكل لوجيستية كبيرة للعدو في نقل الأسلحة والوقود والتجارة بالعموم، ومش هنبالغ لو قلنا إنهم قادرين يضروه اقتصادياً بشكل كبير ومؤثر.

في النهاية الحقيقة حدث زي ده على قد ما هو مفرح، على قد ما هو محزن وبيقلب المواجع، وبيخللي في الحلق غصة من المرارة والألم، إن دي مواقف تصدر من ناس لا تجمعهم بفلسطين أي روابط لا قومية ولا أيديولوجية ولا عرقية ولا ثقافية، ولكن مواقفهم هي مواقف أخلاقية بشكل كبير، في الوقت اللي إخوة الدم والدين والعرق مش بس بيخذلوا إخوانهم، دول بيخونوهم وبيشاركوا عدوهم في القضاء عليهم.

[byjwa]

ماعندي شك بأن حياتي تميل للاستقرارالآن، بس ما زال هناك وعود مستقبلية حافلة قيد التنفيذ، تخليني أقول في كل يوم لي يمضي:

‏من أنا؟ أفقي وعدٌ وعينايَ انتظار

‏ وأنا ودي أصير سعييييدة و أنالها اليوم.. حالاً، طيب خل نقول غدًا ماهو مشكلة أبصبر

[marwa-el-zeiny]

ازاي الإنسان يقدر يخفف تقل وجود شخص في حياته مادام مفيش طريق أو حياة بعيدة عنه؟إحساسه انه مش قادر يتنفس من مجرد وجوده في محيطه؟ وكأنه بيشفط الهوا من حواليه! صوته ونفسه وأبسط تصرف ليه تقيل وبيولد غضب

ليه ربنا بيطول في عمر الناس المؤذية ل أقرب الناس ليها وبياخد الناس الكويسة اللي بتخلى الحياة محتملة شوية! وليه الإنسان بيوصل للمرحلة دي من عدم الوعي ب وجوده المؤذي والمنفر والتقيل في حياة غيره

الآسك بتاعك دا كان معايا وانا بفطر ووانا بشتغل ووانا بعمل الاكل ووانا قاعده معاهم ف البيت ووانا بطبخ بصي كان معايا ف كل نفس بتنفسه النهاردة والله رغم اني مشوفتوش غير لما فتحت الصبح بس اقدر أسمعهولك كويس اوي لاني عارفه كويس اوي اوي انتي بتتكلمي ف ايه أو حاسه بايه...

فكرت مردش لان انا معنديش رد عليه كله لانه أي رد هيكشفني ويكشف تعويراتي والصراحه هذا شئ غير محبذ ليا اووو خلينا نقول معنديش الشجاعه اني اعمل دا

هتقوليلي امال نشرتي الاسك ليه هقولك عشان اقولك انك هتتراضي ، هيجي يوم والرضا هيملي كل ذرة ف قلبك وهنا مقصدش انك هتتعافي اطلاقا بيفضل ف نغزة ف قلبك مهما حسيتي ان ربنا راضاكي لأن أثر الجرح لا يزول مهما عملناله عمليات تجميليه ومهما كان مش باين بس انتي مبتنسيش محدش بينسي انه اتعور بس بتعيشي، واللذيذ ف الموضوع انك بتلاقي الدنيا لو أكلت ف بعضها أكل الحاجه الوحيده اللي مستحيل تعمليها واللي بتبقي زي الفوبيا عندك ان وجودك يبقي مؤذي نفسيا لأي شخص حتي لو دا خلاكي تيجي ع نفسك اوقات بس بتلاقيه تمن أقل من انك تبقي مؤذيه لحد

[fozdoaa]

انا عارفه ان العالم قاسى جدا بس مش لازم نكون قاسيين ممكن نعيط وممكن نقول العالم قاسى وقلبى لسه حنين زى مهو