#برة

[lsd-l]

خالتي قفشتني وأنا بطلع مانجا من اللي هي مخزناها في الفريزر وحسيت انها مسكتني بالجرم المشهود 😥 .

[radwa1]

صباح الغيوم الشتوية اللي بحبها ☁️

[92rose]

‏الناس بتشوف حياتنا من برة بس محدش بيعيش معانا لحظة بلحظة محدش بيحس بخوفنا وتوترنا محدش بيشوفنا واحنا يا اما مش عارفين ننام من الأرق والتفكير يا اما نايمين مش عاوزين نصحى عشان نهرب شوية من الضغط محدش بيشوف الانهيار والعياط ولا الانهزامات وخيبة الأمل.

[thedosky]

النهاردة بعزل من البيت اللي عايش فيه بقالي ٦ سنين. فاكر يوم ما خدت الشقة دي وازاي كانت فاضية وفضلت اجيب فيها حاجة حاجة. وازاي اتحولت مع الوقت لمكان بنتجمع فيه نغني ونشوف أفلام ونتناق�� ونلعب فيفا. اتعلقت بالمكان جدًا بكل تفاصيله وبالجنينة اللي تحت البيت والجنينة الكبيرة اللي جنب البيت اللي كنت بجري فيها وبشرب القهوة الصبح.

ذكريات كتير اوي في المكان ده وكان صعبان عليا اوي امشي منه، حتى اصحابي كلهم زعلوا جدًا لما عرفوا اني همشي من هنا عشان كل واحد فيهم ليه ذكريات كتير اوي فيه.

أول ما عرفت اني همشي كنت متضايق اوي وحاولت اني ممشيش بس منفعش، كنت متخيل إنه هيبقى يوم درامي حزين وانا ماشي بس اتضح العكس. الحمد لله اليوم خفيف على قلبي وحاسس اني ببدأ بداية جديدة وعندي خطط واضحة للفترة اللي جاية من عمري ويمكن دي أول مرة الحاجات تكون واضحة كده بالنسبالي. عندي خطط كمان للبيت الجديد، خطط فيها زرع وقعدة قهوة جميلة وفرش حلو للبلكونات، وستوديو جديد كمان اشتغل منه.

دلوقتي انا في طريقي للشغل وسايب اصحابي في البيت بيلموا الحاجة في كراتين استعدادًا لنقلها للبيت الجديد ومتطمن وواثق إنهم هيعملوا كل حاجة احسن ما انا هعملها كمان. ربنا يجعلها بداية جديدة طيبة ويكتب الخير والتوفيق في اللي جاي والحمد لله على نعمة الصحاب الجدعان وربنا يديم علينا نعمه وفضله، وان شاء الله النقل اللي جاي يكون برة مصر بقى.

[flybirdsworld]

النهاردة و أنا راجعة من الشغل كان نفسي في كشري بالكبدة ف روحت مكان بحبه باكل منه دايماً ف قاعدة برة علي تربيزة باكل لقيت ولد صغير شكله مرهق أوي و معاه ازايز فاضية في إيده طالع من المطعم في إيده التانية كيس كشري بياكل منه ( علي طريقة زمان مع العلم إني عمري ما كلته بالطريقة دي بس عارفاها يعني ) ف ناديته قولتله أقعد علي التربيزة جنبي و اطلب اللي عايزه علي حسابي ، الولد ماشاءالله عنده عزة نفس و رفض بس أنا كنت مصممة لحد ما وافق و قعد قولتله أطلب اللي نفسك فيه و ملكش دعوة و ناديت الراجل ياخد طلبه و طلب فعلا طبق كشري ف طلبتله من نفسي بيج كولا و أكل و خلص قولتله اطلبلك حاجة كمان ابتسملي و قالي شكراً و مشي ، اللي استغربته اني لما روحت احاسب بعد ما خلصت اكل لقيته طالب أصغر طبق كشري رغم إني قولتله أختار أي حاجة تحبها ( طاجن كشري ساندوتشات ) وفعلا والله لو كان طلب ب ٢٠٠ جنيه كنت هدفع لكن نفسه عزيزة و أخد اللي يرضيه و بس ، في ناس علي قد متملكش من رفاهيات الحياة لكنها بتملك الرضا و القناعة و دول أهم من وجهه نظري لأن حتي لو أمتلكوا حاجات بسيطة بتبقي كافية بالنسبالهى و راضين .

[alaawarda]

" أحيانًا بيكُون حل مُشكلتك كله بيتلخّص بس في: إنّك تبُص للسَّماء"

المقصد النظر ليس للتسلية ولكن لمعرفة عظمة الخالق

يعني لما تبص للسما ده بيديك نوع من الرحابة والسعة تعرف إن الكون واسع مش ع قد مشكلة أو مشكلتين أنت عايش فيه

النظر إلي السماء تفكُرًا وتدُّبرًا عبادة عظيمة

النبي كان كثيرًا ما ينظر إلي السماء وكان كثير ما يرفع رأسه إلى السماء حتى قبل أن يدعو بل إن بعض الصحابة كانوا إذا رأوا النبي يرفع رأسه إلي السماء يقولون"الآن يدعو"

النظر إلي السماء بيخرجك برة مشاكل الأرض وضيق نفسك ويخليك تعلم أن الكون متسع وده أحد الحلول الرائعة لكتير من المشاكل إنك تعرف حجمها الحقيقي لإن طول ما أنت مكبّر المشكلة هتحس إن ملهاش حلّ نهائي ولكن حلَّها عند الخالق سُبحانه وتعالى.

لذلك نتيجة التفكُر إنك تقول ربنا ما خلقت هذا باطلًا سُبحانك فقنا عذاب النار. "

د.أحمد عبدالمنعم

[secaii]

صباح الخير، صحيت ٧. أمس ذاكرت ٧ ساعات، (مع استراحات ١٥ دقيقة كل ٤٥ دقيقة) وشفت فيلم واتمشيت برة وقرأت جزء جيد من هذا الكتاب -خلصته اليوم في الصباح- ، متأخرة في تحدي القراءة حقي بس قرأت كتابين كاملين بالعربي وأحس هذا جيد، أغلب قراءاتي كانت سماع كتب تركية وإنجليزية، لا أظن أن القراءة أكثر معنى من الاستماع بس الجلوس للقراءة فعل مختلف يحتاج تركيز أكثر ومبسوطة أني أستطيع، طبعا أستطيع وأنا أعيش وحدي في هدوء شديد، تجربة قراءة كتاب عربي جيد من أعظم متع الحياة بالنسبة لي، وهذا الكتاب كاد يكون تلك التجربة، بس النهايات ما عجبتني مثل البدايات، يمكن لأني أكلمت الكتاب بعد فترة طويلة من الانقطاع، عندي دروس زي أمس ٧ ساعات اليوم كمان، تبدأ ١٠، صاحية مرهقة ومصدعة مزاج يقول قربت الدورة -حتى وهي ما قربت مرة- ،

[messamelhussini]

حادث ديروط اسيوط

الميكروباص كان مليان بالركاب، وكل واحد فيهم بيحاول ينقذ نفسه بأي طريقة، لكن الام كانت حاجة تانية. كان معاها طفلين صغيرين، وقلبها مشغول بيهم أكتر من روحها.

الميه بتتسلل بسرعة جوا العربية، وكل ثانية بتعدي كانت بتقلل فرص النجاة.

في وسط اللحظة الحرجة دي، الأم قررت تعمل اللي ما يقدرش عليه إلا أم بمعنى الكلمة. فتحت الشباك بإيدين بتترعش من البرد والخوف، ورفعت أول طفل بكل قوتها ورمته برة الميكروباص ناحية الناس اللي بتحاول تساعد.

وبعده، نفس الحركة مع الطفل التاني.

كانت بتصرخ للناس: "خدوا العيال.. أنقذوهم!"، من غير ما تفكر ولو لحظة واحدة في نفسها. آخر حاجة اتشافت منها كانت عينيها وهي بتبص للطفلين من بعيد، كأنها بتقولهم

"عيشتكم أهم من حياتي".

لحد دلوقتي، الطفلين دول هما الناجين الوحيدين من الحادثة، واسم الأم بقى حديث ديروط. الناس هناك ما بين دموع وحسرة، بيحكوا عن "الست اللي ضحت بحياتها عشان ولادها يعيشوا".

القصة دي مش بس بتعبر عن لحظة تضحية، لكنها بتمثل حاجة أكبر بكتير. الأمومة هي أكتر قوة في الدنيا، قوة تخلي حد يضحي بروحه من غير تفكير، قوة تخليها تسيب علامة في قلب كل حد سمع قصتها.

ديروط النهاردة ��ش بس فقدت أم، لكنها كسبت قصة عن التضحية والبسالة، قصة هتفضل تتقال للأجيال الجاية

[ebrahimx]

انا مبقتش عارف حياتي عاملة ازاي برة الشغل

[ohmennaitsyou]

في الوقت اللي واحدة انتحرت فيه بسبب ابتزاز زمايلها في الجامعة فيه بنت تانية عندي على تويتر (عاملين فولو لبعض بس مش بنتكلم) بتنشر سكرين شوتس لمحادثات لواحد بيبتزها و مفبركلها نودز، بترد عليه بقوة و بتقوله حط النودز في طيزك و أمها راحت عملتله محضر عشان البنت بتدرس برة مصر. دلوقتي الواد العرص عمال يترجاها تسامحه بعد ما كان نازل فيها قلة آدي و تحرش و وساخة. البنت بتشير كل حاجة عادي بثقة و قوة لأنها صاحبة حق و مغلطتش في حاجة في حين أن البنت التانية انتحرت بعد ما اتذللت للأوباش اللي بيبتزوها مستحملتش و انتحرت، ربنا يرحمها و يرجع حقها، بنت ضحية تربية متحفظة خلتها تفضل الموت و هي مجابتش ٢٠ سنة عن الفضيحة و ضحية مجتمع وسايط و عيال مشافوش تربية فاكرين نفسهم يقدروا يدوسوا على الناس لو أهلهم واصلين. تربية بنات قوية عارفين حقهم ممكن حرفيا ينقذ حياتهم من الموت، وجود علاقة قوية و متفهمة بين الأهل و عيالهم ممكن ينقذ حياتهم من الموت.

[es-r-aa7]

بعد منتصف الليل

عارفة ان اي حاجة هكتبها دلوقتي مش ناس كتير هيشوفوها، ودا بيفكرني بشكل البلوج زمان .. ايام م كنت بكلم نفسي حرفياً وبعتبرها electronic dailies

حابة اتكلم عن مشاعري اكتر الفترة دي، حاسة انها فترة انتقالية ف حياتي وهتكون فاصل مختلف عن اللي فات.

انا متلغبطة، مشاعر حزن، غضب ، عصبية، هدوء ، نشاط، كسل وعياط كتير ، وفقد شغل ف الحياة، مع وجود لمحة امل ساعات.

فترة غريبة ويمكن بمر بكل المشاعر دي ف يوم واحد.

اليوم بدأ بمحايلة نفسي اني لازم اروح الشغل لأني بقالي يومين مش بروح ومش هينفع .. ان كان حبيبك عسل متلحسوش كله ، ورصيد اجازاتي ف الشلاحات خالص.

الجو العام كان متوتر ف الشغل، او انا اللي متوترة زيادة عن الطبيعي ممكن، يمكن كمان عشان بقيت ازحلق نفسي بشويش من كل المسئوليات لكن فجأة بلاقي نفسي ف وش المدفع وقت الجد بحكم اني السينيور.

شربت قهوة اول م وصلت، شربت قهوة ف اخر يوم الشغل، وشربت قهوة عند تيتة.

كنت محتاجة اعمل اي نشاط مختلف عن اني اروح الشغل واروح، لكن الشمس كان ليها رأي اخر والحر اللي رجع فجأة بدون انذار.

فالعادي انا بفرك طول اليوم، لكن اما بيوم مزاجي سئ بقعد مكاني مش بتحرك.. النهاردة كان مزاجي بشع وبفرك، مش طايقة الحر ومش طايقة القعدة.

قررت ف اللحظات الآخيرة اني اروح لتيتة ، اخر مرة كنت عندها مكنتش كويسة، حسيت بمسئولية تجاها بغض النظر عن وجود عيالها، من ساعة ما مريت بتجربة جدو الله يرحمه وانا بخاف عليها جداً، الاعمار بيد الله .. بس انا مش هيتحمل احس بتأنيب ضمير اني كنت مقصرة معاها.

اليوم بدأ يبقى له طعم اول ما قررت تحاول تحرك نفسها من القعدة عشان تعملي البامية الويكا اللي بحبها من ايدها 💗💗

شكراً لأي حد بيساهم ف تحسين مزاجي.

بحاول افصل بين مشاكل ماما مع عيلتها وبين علاقتي بيهم عشان أفضل اصل الرحم بدون اي مشاعر سلبية.

اكتر حاجة بشعة ف الايام اللي بتبقى طويلة برة البيت هو اني بضطر افضل لابسة لبسي اكتر من ١٢ ساعة بجد حاجة يعني قرف.

بحاول افهم نفسي، بحاول مضايقش من اللي بيحصل عشات افهمه أسرع واوصل لوضع مريح.

بحاول مخليش مخاوفي المالية تكون شغالة تفكيري اغلب الوقت ، رغم ان البلد مش بتعمل حاجة غير انها تسنتر التخوفات دي ف وشي.

ساعات كتير بحس سبب شقائي ف مشاعري اني بجد بنسى انها دنيا وستنقضي، لبنا رب كبير رحيم وعليم بينا، وآني محتاجة أخلي الآخرة هي اكبر همي.

رجعت اكتب تاني ف النوت بتاعتي عن مشاعري ويومي ، بقلم لونه رمادي شبه ايام دلوقتي.

الحمدلله رب العالمين اني جاهدت نفسي لحد م صليت العشا عشان الشيطان كان عمال يكسل فيا جداً.

من اسخف الحاجات اني اكون برك البيت طول اليوم وارجع الاقي المطبخ مقلوب ومضطرة انضفه، بيستهلك طاقة مش وقتها خالص عشان مش بعرف اكروت ف تنضيفه خالص.

عملت قربة سخنة وبابونج ف محاولة للاسترخاء عشان اعرف انام الساعة ٣ الفجر.

شكراً لاي حد وصل لحد هنا مع كم الرغي دا، أعتقد اني زي م بقالي ٨ شهور واكتر منعزلة عن انستا وفيسبوك-لاحتياجات نفسية لدا - حاسة اني هعمل كدة ف باقي السوشيال بما فيهم تمبلر.. مش لأي غرض غير اني استعيد جزء من تركيزي تاني بدون تشتتات كتير.

شكراً 🫶

[lsd-l]

الإبتزاز العاطفي ..

جملة صغيرة لكن ممكن تؤدي لكارثة كبيرة،

خصوصاً لو سهل إن يتم إبتزازك عاطفياً، لأنك طيب مثلاً .. أو "مش بيهون عليك"، بتحس بالذنب وما ألى ذلك، بتلاقي نفسك إتدبست في حاجات ومش قادر تشتكي علشان انت عارف إنك جيبته لنفسك ومحدش هيعرف يساعدك لأنه بكل بساطة كان إختيارك انت من الأول، أياً كانت النتائج والعواقب .. هتتحملها بنفسك،

وأنا دايماً شايفة أنه فعلاً بيؤدي لكوارث وده مش مجازاً، في ناس مستقبلها بيتحدد على أساس إبتزاز عاطفي حصلها ماعرفتش تواجهه،

أول إبتزاز عاطفي الإنسان ممكن يواجهه في حياته بيبقى غالباً نابع من البيت، من الأب والأم، وغالباً مش بيكونوا فاهمين إنهم بيبتزوك عاطفياً .. هما فاكرين إن ده الأفضل ليك، ولما توصل لمرحلة إن صعب يفرضوا رأيهم عليك بيبدأوا يمشوا على التكنيك الجديد اللي هيخليك تقتل نفسك بعد ماتنفذلهم رغباتهم؛ "ده أبوك تعبان علشانك من يوم ما إتولدت وإتخانق مع عمك وضحّى بالورث بتاعه علشان مايحصلش مشاكل كتير تضرك لما تكبر وشغال زي الحمار في الساقية علشان تفرحه وتدخل طِب وانت بتقوللي عايز أدخل أدبي؟ طب وأبوك طيب وشقى عمره، ودعواتي اللي بفضلها كنت بتعدي من الإمتحانات -دمعتين- "

"يعني إحنا جنبك السنين دي كلها ومارضيناش نتغرب وأبوك ماوافقش يسافر برة علشان مانتفرقش وتيجي انت تسيبنا وعايز تعيش برة وتشتغل وتنسانا خلاص؟ طب وبنت خالتك اللي عايزينك تتجوزها؟"

وكدة بقى خد من ده كتير مواقف اذا انت ضعيف داخلياً هتاخد قرارات كتير أوي مبنية على الإبتزاز البشع اللي بيحصلك، يترتب عليه بقى شغلانة جوازة ولا حتى أي حاجة بيترتب عليها عمر بحاله مش لحظات ومحدش بيتحمل النتايج غيرك، اذا إتجوزت بنت خالتك اللي مبتحبهاش وخدتها علشان خاطر خالتك وأمك وإتخانقتوا هيقولوا وإحنا مالنا إحنا مابنتدخلش في مشاكل حد ليقولوا إن إحنا السبب،

واذا صاحبك قعد يصيح ويبتزك عاطفياً علشان تروح معاه كل مشاويره وانت مش عايز ومش حابب وقرفان ومودك زفت، اذا إتعصبت غصب عنك في نص الخروجة أو إستعجلته هيلوم عليك وهيجيب كل الغلط حرفياً عليك انت لوحدك لأن انت نزلت بمزاجك محدش أجبرك على ده،

أو الراجل اللي انتي مش بتحبيه بس هو بيعشقك لو قعد يتعذب في لياليه ويذكر إسمك للقمر والنجوم ويفرشلك الأرض ورد ويعملك من البحر طحينة وانتي رفضتيه وقعد يعيط ويتكلم عن قد إيه انتي إنسانة بشعة وأذيتيه وهينتحر بسببك حالاً، اذا انتي ضعيفة هتبقي ضحية للإبتزاز وتقبلي تتجوزيه والله أعلم الموضوع ممكن ينتهي بإيه،

وعيالك كمان ممكن يبتزوك عاطفياً علشان تحققلهم رغباتهم اللي ممكن تضرهم وإذا انت ضعيف برضو ممكن تأذيهم غصب عنك،

الإبتزاز العاطفي بشع ومقرف، أنا شخصياً بقع ضحية ليه دايماً وقليل أوي مابعرف أتحكم في نفسي وشيلت طين كتير لوحدي وعيطت ومحدش سمعني وحسيت بالذنب ومحدش تاني حس بحاجة غيري،

بس لاازم نتعلم نقول لأ، لازم نتعلم نرفض اللي مش عايزينه حتى لو كان على حساب اللي بيبتزنا، لازم نتجرأ ويكون عندنا لسان زي ماهما عندهم لسان وكمان دموع تماسيح، ولكن بلاش نتحول من "ضحية" "لمُبتَذ" علشان ناخد اللي إحنا عايزينه، ناخده بالعقل والمنطق وال"لأ" الصارمة وخلاص،

بلاش مايهونش عليك فلان بس تهون عليك نفسك عادي، علشان حرفياً .. النتائج هتشيلها لوحدك .

[marmarika-world]

عندي تساولات كتير اوي اوي

١- هنرجع ٢٠١٧ امتي؟

٢- ايه الماتشا دي ؟

٣- ايه بورد تحقيق الاهداف اللي الناس كلها بتعملها دي ؟

٤- ايه شريف تانيوس دة ؟

٥- مين دول و ايه Gen z دول و ليه كلهم شكل واحد و لابسين زي بعض في ايييهههه ؟

٦- ليه مرسيدس چيب بقت مع ٤/٣ الشعب في ايه ؟

٧- ايه ضريبه الموبيلات من برة دي ماحنا بنجيب من برة عشان ارخص عادي فا نقوم دافعين بقيت تمنه ؟

٨- القطن المصري بجد فين؟

٩- الصيني ليه بقي ب ١٠٠ و ١٢٠ الف جنيه ؟

١٠- ايه كميه محلات الفرايد تشيكن دي ؟

١١- ليه لبس البنات غالي اوي اوي اوي عن الولا�� ؟

١٢- ليه البيستاشيو مفضلش فسدق ؟

١٣- ليه النعناع في ا��شتا طعمه ملوخيه ؟

١٤- ليه احنا مش في ٢٠١٧ عايزه اعرف ؟

١٥- ليه الناس دي كلها في الشارع دايما ؟

[hippolyta-dream]

اكثر ما يؤلم في العيشة في مصر إنك دلوقتي واعي بكل الجمال والسهولة و اليسر اللي موجودين في العيشة في أماكن تانية. الإنترنت بيلزق في وشك كل اللي فايتك. مناظر طبيعية وهوا نضيف و بيوت جميلة و شوارع نضيفة و محلات قهوة بتعمل كيكة سخنة و الدنيا بتمطر برة و مكتبات فيها بنت حلوة بترتب الكتب من غير ما تكون ساخطة على شغلانتها وعلى الدنيا.

احنا عايشين في مجاري.

[5005-2]

عميلة طلبت مني حاجات أكدنا و تمام

بعدها بساعة بعتتلي عايزة تلغي شوفت الرساله من برة و قولت تمام دخلت لغيت الحااجات

10 دقايق مسحت كل الرسايل و قالتلي معلش انا بعتلك بالغلط عملت عبيطة و قولتلها ولا يهمك فا دخلت اكدت الحجز تاني

دلوقتي بعتت تاني عايزة ألغي شوفت من برة بس قولت هخلص الحتة اللي بقراها و ادخل ألغي للمرة التانية مسحت دلوقتي الرسايل برضو و بتقولي معلش كنت بأكد بس عليكي عشان عارفة انك بتنسي و مش بتركزي !!!! انا؟؟

ميتين ام تردد النسوان على هرموناتهم 🙂

[t-ablog]

" بوست شخصى مصرى "

‏بمناسبة الذكري المشئومة دي ( ذكرى مذبحة رابعة)

انا لاول مرة هتكلم عن جانب بسيط من حياتي الشخصية ويمكن لاخر مرة

ومعلش استحملوني

قبل انتهاء ذكري رابعة التي ما زالت ذكراها تنغص العقل والقلب في كل عام

كل ما تيجي الذكري دي وافتكر الليلة دي

واحداث صباح هذا اليوم

احس اني بكره البلد دي قوي بكل اللي فيها

‏بكره جيشها وشرطتها وكل ولاد العرص اللي فيها

انا دلوقتي لما بشوف ظابط جيش ماشي في الشارع بيبقي هاين عليا ابصق عليه واشتمه والله ايا كان موقفه وميوله بس مجرد اني بشوف البدلة بس

انا يمكن قبل 25 يناير مكانتش مصر تفرق معايا في اي حاجة وعمري ما افتخرت اني مصري وكنت لا بحبها ولا ‏بكرهها بس كنت دايما حاسس انها مش بلدي ولا بلد الغلابة اللي عايشين فيها ولكنها بلد الجيش والشرطة والقضاء والنيابة واي واحد صاحب سلطة او نفوذ واما الباقيين فهم ضيوف في البلد وضيوف تقال كمان علي الناس دي

بس كنت عايش فيها مضطر طبقا للظروف اني اتولدت فيها وتمنيت كتير اني اسافر برة مصر واهرب من القرف ده وسعيت لكده فعلا كتير وكنت بالفعل قاب قوسين او ادني واخدت التأشيرة للسفر الي اوروبا ولكن شاء ربنا في اللحظات الاخيرة اني الغي السفر واقعد في مصر

وبعد كده لاسباب كتير لغيت تماما فكرة السفر من دماغي وقلت خلاص

بقي مش مستاهلة نفضل في البلد دي ونكمل فيها ‏وامرنا لله

ولعل الله يحدث بعد ذلك امرا

والصراحة كنت فاقد اي امل في البلد دي او الشعب ده ان الحال ممكن يتغير او ينصلح

وكنت عارف انه عامل زي قطيع من الخرفان او الغنم

وفعلا صفارة بتجمعه وعصايا بتفرقه وانهم وصلوا لمرحلة من الجهل والبلادة والتخلف يخليهم فعلا يستاهلوا الحال اللي ‏هما فيه

عمري ما امنت ولا صدقت في اي انتخابات في البلد دي وعمري ما فكرت مثلا اني اروح اطلع بطاقة انتخابية او انضم لحزب سياسي

وعمري ما روحت صوتت في اي انتخابات في حياتي

ويمكن كمان كلامي في السياسة كان قليل جدا او مكنتش بحب اتكلم فيها خالص ولا مهتم بيها من الاساس

حتي قبل الثورة ‏بأيام انا مكنتش مصدق ان دي ممكن تبقي ثورة او ان الشعب ده ممكن كله ينتفض فجأة

وكنت شايفها هتبقي مظاهرة عادية وكام قنبلة غاز وخرطوم مية هيخلي الكل يروح بيته والموضوع يخلص

بس بعد اللي حصل في ال 18 يوم وحتي تنحي مبارك

حاجات كتير قوي اتغيرت معايا وبدأت افتخر وانا بقول انا مصري ‏بدأت اهتم بالسياسة واتكلم فيها كتير ونزلت الاستفتاء بتاع 19 مارس لاول مرة في حياتي واحس ان صوتي ليه قيمة وهيفرق ومفيش تزوير خلاص

حسيت خلاص ان مصر بقت بتعتي وبتاعت اهلها

وان مصر والمصريين ممكن يعيشوا اخيرا احرار في جو ديمقراطي نضيف زيهم زي اي شعب محترم في الدنيا

وفي انتخابات ‏الرئاسة مكانش فارق معايا قوي مين هييجي مرسي ولا حمدين ولا ابوالفتوح ولا حتي خالد علي

بس المهم ان هييجي واحد هو عارف ان الشعب هو اللي اختاره وقدامه اربع سنين عشان يقدم فيهم نفسه للشعب

خلاص بعد الثورة العظيمة دي خلصنا من عصر الدكتاتوريات وعصر الفرد الواحد وعصر الجيش او كان متهيا‏لي كده

لحد ما جه اليوم المشئوم بتاع تلاتة يوليو

وظهر تاني المصريين علي حقيقتهم اللي انا كنت اعرفها عنهم بجد وكمان من بعدها ذكري 14 اغسطس الاليمة جدا

قلت لنفسي فعلا هما دول المصريين اللي انا عرفتهم طول عمري بفقرهم وبجهلهم وبتخلفهم وهمجيتهم وعبوديتهم واللي بسببهم انا كنت عايز ‏اطفش من البلد دي

المرة دي بقي بجد انا كرهت البلد وتاني كرهت الجيش وكرهت الشرطة وكرهت كل المعرصين من الشعب ده

واكتر بكتير من الاول ومش طايق حد فيهم

وبجد مش طايق اقعد في البلد دي ونفسي اسيبها النهاردة قبل بكرة

ومنهم لله وحسبي الله ونعم الوكيل في كل واحد وصلنا للي احنا فيه ده

انتهي ............. ...... ......... منقول من مصرى مقهور

الكلام دا يمثلنى شخصيا بنسبة 100%

الاختلاف الوحيد أنة هو لم يسافر ... انا سافرت فعلا

كان عندنا امل أن نعيش ...

ولكن الامل تبدد وأصبح سراب بل للدقة أصبح جحيم نعيشة ونراة ونلمسة ونتذوقة بمرارة 👎👎

ومازال الامل فى بكرة 📍

لعل الله يحدث بعد ذلك امرا

T