#بتمن

[fozdoaa]

لا اخفى عليكم سرا ياجماعه بس حوار انك تلاقي حد تعرف تخوض معاه محادثه حقيقيه عن نفسك و ت open up معاه بأفكارك اللى بتهلكك وتعرف تبينله حقيقه المشاعر المكلعكه اللى جواك نعمه لا تقدر بتمن

[thedosky]

Ask

مساء الخير،

 أولًا أناعايز اقول إني متفهم بالظبط إنتي حاسة بإيه دلوقتي وأتمنالك إن الفترة دي تعدي عليكي بأهون وأخف طريقة ممكنة. وعايز اقول برضه إني بحس بمسؤولية كبيرة في الرد على النوع ده من الأسئلة واني هرد على السؤال من خلال وجهة نظري وتجاربي الشخصية. فـ وقت ما تحسي إني بقول حاجة مش منطقية تقدري تعتبري كلامي فارغ وتضربي بيه عرض الحائط.

ثانيًا، اللي ممكن يكون بديهي ومفاجئ في نفس الوقت إني شبه متأكد إن غالبية البشر مروا باللي انتي مريتي بيه وحسوا باللي انتي حسيتي بيه على الأقل مرة في حياتهم، أتمنى إنك تلاقي في ده ولو جزء صغير من السلوى.

طبيعي جدًا إننا بنتقبل حياتنا قبل ظهور الأشخاص اللي بنعتبرهم مفضلين لينا ومبنكونش شايفين الوحدة بنفس التُقل اللي بنشوفه بعد ما يمشوا. لأن الوحدة شيء صعب وممكن اتجرأ واقول إنه شيء كريه لكن في نفس الوقت فترات الوحدة هي فترات استثنائية بتربي الإنسان، صحيح بالطريقة الأصعب والأقسى لكنها للأسف مفيدة.

انتي بتقولي إنك كنتي بتعملي كل حاجة لوحدك قبل الشخص ده ما يكون في حياتك ومكنتيش بتشاركي الحاجات. ولما الشخص ده ظهر اكتشفتي حاجات عن نفسك جميلة مكنتيش تعرفي انها موجودة، ده في حد ذاته جميل ونفع لا يقدر بتمن، انتي عرفتي انك شريك جميل اهو : ) معرفتنا عن نفسنا تستاهل شوية تعب معلش.

ثالثًا، مسألة شعورك بالغضب ده منطقي ومفهوم لكن انا اللي ساعدني اني اتجاوز منطقة شبيهة إني غيرت الفكرة المحركة لمشاعري، يعني سؤال هو سابني ليه؟ وإزاي يتخلى عن صداقة مثالية زي دي وعن شخص بيعتبره صاحبه الوحيد؟ ده سؤال مفخخ ممكن يضيع منك سنين بلا مبالغة ومش هتوصلي لإجابة في النهاية برضه.

والحقيقة إن مش دي المشكلة خالص، المشكلة الحقيقية إنه سابك، بعد إنه سابك مفيش كلام تاني خلاص، مفيش أي معنى لأي سؤال بيدوّرعلى تفسير، الأسئلة من النوع ده غالبًا عقولنا بتوجهنا ليها عشان هي بتنكر حقيقة إن ممكن الأمور المثالية تنتهي، أنا آسف إني هقول لك كده، معلش والله. بس كل العلاقات ممكن تنتهي عادي.

دي مرحلة إنكار عنيف عشان الحقيقة أعنف، لكن للأسف هتظل هي الحقيقية. الموضوع انتهى، خلص، صاحبي المفضل مبقاش موجود. اللي جاي مش إني اسأل ده حصل ليه، اللي جاي المفروض يكون اتعامل مع ده ازاي.

الخبر الجيد في المسألة دي وهو خبر مؤلم لكنه جيد، إنك دلوقتي مريتي بواحدة من أكتر التجارب اللي بتساعد الإنسان إنه ينضج ويكبر، تجربة في غاية الأهمية والله العظيم، على قد قسوتها وعنفها بس يمكن استغلالها في صالحنا، انتي دلوقتي على طريق إن يكون عندك دفاعات نفسية حقيقية هتنعكس على كل التجارب الحياتية التانية مش بس التجارب العاطفية.

صدقيني إنتوا لو كنتوا كملتوا كان ممكن جدًا انك انتي اللي تنهي العلاقة دي عادي لأي سبب انتي شايفاه منطقي. دي طبيعة العلاقات، هي كده. سبحان من خلق البشر بالتعقيد ده! مهمة إنجاح علاقة دي انا بشوفها من أصعب المهمات الإنسانية على الإطلاق.

الحياة بعد الانفصال العاطفي هي سلسلة من الكوابيس المؤلمة أنا عارف. قلبي عندك والله، لكنها بتنتهي، صحيح محتاجة وقت لكن بتنتهي، كل اللي مطلوب منك دلوقتي إنك تقللي الوقت ده على قد ما تقدري ولو مقدرتيش مش مهم بس خليكي عارفة إن الوقت كفيل بإيضاح حقيقة الأشياء وانا بوعدك إن فيه لحظة إدراك هتجيلك وهتقولي فيها إن لو هو مكانش مشي انتي اللي كنتي هتمشي وإن كويس إن ده حصل. أتمنالك إن ده يحصل في اقرب وقت.

بخصوص سؤالك أعمل ايه دلوقتي؟ فرأيي إنك طبعًا متعمليش أي حاجة من الحاجات اللي بتقولي عليها دي، لا تبعتي له تتخانقي معاه ولا تفرغي فيه غضبك. ده مش هيعمل أي حاجة غير مزيد من الألم غير المفهوم المسبب لمزيد من الأسئلة التي لا إجابة لها وربما كمان يجرك لتصرفات إنسانية رديئة ممكن تندمي عليها بعدين. متعمليش حاجة طبعًا، معلش والله بس دي تجربتك انتي دلوقتي، لازم تتعاملي معاها على إنها كده عشان تقدري تقومي تاني لوحدك.

 إن شاء الله تقابلي أصدقاء مفضلين تاني، وتقابلي في حياتك "ناس ليهم قلب، مش زي ولاد الكلب اللي نسيونا زمان"

[mustaphi]

١١:١١

حياتنا مليانة أرقام.. تاريخ ميلاد، نمرة تليفون، رقم عربية، أو حتى توقيت معين.. فى ناس بتشوفها مجرد أرقام، و ناس تانية مقتنعين إنها رسايل كونية.. تفاصيل و علامات تحسسهم إنهم ماشيين فى الاتجاه الصح.. بس كل اتجاه بنمشى فيه، صح أو غلط، بيأثر علينا و على ناس تانية كتير.. و كل تفصيلة ف حياتنا حتى لو صغيرة ممكن تمنع عننا شر أو تورَّطنا فيه.. ناس هتشوفها رسالة، و ناس هتشوفها مجرد صدفة..

مفيش حاجة ف حياتنا بتحصل صدفة.. كل صدفة أصلها ��َدَر، و كل واحد فينا عنده حكاية، و الحكاية وراها أسئلة ما بتنتهيش.. بنعمل ايه دلوقتى؟ ايه اللى جابنا هنا؟ و فى اللحظة دى بالذات؟ و ليه اتقابلنا النهاردة؟ ليه مش امبارح؟ و ليه بنغَّير رأينا ف آخر لحظة؟ أسئلة كتير ملهاش إجابة..

حياتنا بتتغير ف لحظة، بين الحلو اللى على مزاجنا و المُر اللى ممكن يقلب حياتنا.. و الغريب إن كل واحد فينا فاكر إن هو اللى بيرسم طريقه بنفسه.. لكن الحقيقة، محدش فينا عارف الدني�� واخداه لفين.. و كل ما نحاول نفهم نتوه..

بس اللى لازم نفهمه إن كل اختيار بييجى بتمن، و لازم نبقى مستعدين ندفع تمن اختيارتنا.. و ما ننساش إن الخط الرفيع بين الحياة و الموت أصغر حاجة ممكن ترسمه و أبسط حاجة ممكن تمحيه.. و لإننا كلنا واصلين ببعض، نتايج اللى بنعمله ما بنحسش بيها غير لما تلف و ترجعلنا.. و ساعتها بس بنتأكد إن مفيش حاجة بتحصل صدفة..

سلام

[shu-rooq]

وهبة امبارح كان بيقول "اه نسيت إنك راجل بتاع اسانسيرات" في إشارة لأن الشخص ده أسير الرأسمالية وبتاع شغل من ٩ ل ٥ وكل همه انه ياخد الاسانسير ويلحق البصمة.

أنا اتحبست في شغل الاسانسيرات عشان بشكل ما بيضمن لي امان واستقرار -احتمال يكون زائف- وبيحسسني إني واقفة على أرض. بس طول الوقت بحس إني باجي الشغل ادفع بتمن مرتبي حرقة دم وأعصاب وبانك اتاكس ومشاكل نفسية. وشغلانتي اصلا بتحتم عليا اتعامل مع الجانب السيء في الأشخاص. مش عارفة هفضل كدة لحد امتى، وهتفضل لحد امتى لقمة العيش تذل صاحبها كدة.

اللهم إني اشكو إليك ضعف قوتي وقلة حيلتي وهواني على الناس.

[itsbtates]

الفوارق في مصر مرعبة بس كانت متدارية فاهمين؟ يعني كان آخرنا نشوفها في مسلسلات وأفلام ونقول تمثيل وكدة، انما دلوقتي بنشوفها في تيك توك وانستجرام وتويتر، ملايين ومليارات وأرقام كبيرة وغريبة، يعني انا واحدة لو فكرت اجيب موبايل جديد هخش في معضلة لا ده بتمن كام جهاز صغيرين لجهازك هاتيهم احسن، غير حوار هادية غالب والشو بتاعها اللي كلنا مضطرين نعرف عنه عشان الناس لازم تورينا قالت ايه، ف حقيقي كل الضغط ده بشع، بشع وصعب، وجهاد الصبر والرضا صعب اوي اوييي طول الوقت مع كل اللي بنشوفه ده

يا رب يزيدهم ويرزقنا معاهم..

[5005-2]

صباح الخير

أد ايه النوم ده نعمة عظيمة لا تقدر بتمن والله، تخيل تنام في مكاان مريح و تروح في النوم من غير مهدئات ولا منوم و تبقى نايم مش حاسس بوجع ولا مرض في جسمك و أول ما تغمض عينك تفصل و متحلمش بكوابيس تصحيك مرعوب و تفضل نايم لحد ما جسمك يرتاح تماماً وتصحى كأنك كنت فاصل و شحنت

يا الله على الجمال و الراحة ❤ تبان حاجة عادية بس و الله ما هيحس أد ايه هي نعمة غير اللي أتحرم منها قبل كدة

[messamelhussini]

مفيش متونس بيتعَب.

الإمام بن الجَوّزي بيحكي في كتابه صيد الخاطر عن الوَنس، وإنه شاف إتنين شايلين جزع نخلة علي كتافهم، والغريبة إنهم كانوا بيضحكوا ويغنوا.. مع إن جزع النخلة تقيل.. فبيقول: فتتبعتهم" مشيت وراهم أشوف إيه حكايتهم.. لقي واحد بيغني جملة والتاني ساكت، وبعدين التاني يقول جملة ويرددوها سوا.

فقال إن الوَنس بيخفف الحمول، والتعب، وبيختصر الوقت.

= لو ليك زميل في الشغل بترتاح معاه.. هتلاقي اليوم بيعدي خفيف خفيف.

= ممكن الواحد يكون مابيحبش المدرسة او الكلية.. بس بينزل مخصوص عشان هيشوف صحابُه.

= الست تطبخ وتغسل وتمسح، ولو جوزها طلع من جيبه منديل ومسح عرقها، وباس راسها وطبطب عليها.. ياسلام كله يهون عليها ساعتها والله.

= الابن لما يذاكر وابوه يدخل يناوله كوباية الشاي، ويضحك في وشه ويحسسه إنه مآمن بيه.. بيبقي عاوز ياكل الكتب أكل.

- اللمة، والطبطبة، والحُضن علي غفلة، والكلام الحلو، والقعده الرايقة، والضحكة وانت بتضم رجليك علي بعض ومتونس باللي قاعد يتكلم ومش عاوزه يسكت ده مايتقدرش بتمن والله.. لأن كل ده وَنس.. تهيون من نوع تاني.. بيضيف للحياة طعم حلو وبينزع منها المرار.. الايام مابتعديش غير بالتعكيز علي بعض.. سيدنا موسي لما ربنا كلفُه بالنبوة طلب ونيس يشيل معاه الحمل، وقال لربنا "إجعل لي وزيرًا من أهلي، هارون أخي، اشدُد به أزري "قوي بيه ضهري" وأشركُه في أمري.

آنسونا، وونسونا بيكم يا جماعة.. بنضعف من غيركم.. مهما شفتونا جامدين، وبنفتقد غيابكم خليكم موجودين.

وعلي رأي فؤاد حداد: حِمل الليالي خفيف.. لما يشلوه إتنين. ❤️

[crazy-2m]

‏لا أخفيكم سرًا ياجماعة بس حوار انك تلاقي حد تعرف تخوض معاه محادثة حقيقية عن نفسك وتكون ع طبيعتك معاه وانت مطمّن من غير ماتكون خايف ولاقلقان منه وتحكيله عن أفكارك الغير مفهومة ومشاعرك الملعبكة جواك وهو يترجمها ويفهمها فـ الوقت الـ احنا فيه دا فـ حد ذاته نِعمة عظيمة لا تقدّر بتمن

[dimitri97]

أنا محتاج حد يقنعني ، يعني ايه كيلو نسكافيه بألف جنيه !!! يعني بتمن ٣ كيلو لحمة ؟ يا جدعاااااااان 😂💔

[bonboony]

لحظات الصمت اللى الواحد بيخطفها فى دوشة اليوم و الحاجات و الناس دى لا تقدر بتمن..

[lucid-dreamer-0]

معروف في رمضان لو معدي في الشارع ولاقيت كذا عيل صغير واقفين مع بعض يبقى توقع إن فيه صاروخ رفيع على وشك الفرقعة، بس ملاحظ حاجة غريبة السنادي إن الصواريخ بتاخد وقت طويل اوي عقبال ما تفرقع، زمان وإحنا صغيرين كانت أشهر غلطة في فرقعة الصواريخ إنك تخليه يغيب في ايدك بعد ما تولعه، فيقوم مفرقع في صباعك، إنما دلوقتي انت ممكن تولع الصاروخ وتروح تقضي مشوارك وترجع عقبال ما يفرقع.

النضارة بتاعتي اتكسرت فروحت لحمتها عند واحد معرفوش غير اللي بعمل عنده النضارات، والراجل طلع جدع وقالي كل سنة وانت طيب ومرضيش ياخد مني فلوس. قومت انا مسكتش، روحت عنده تاني يوم عشان اجيب شامبر جديد للنضارة وعشان اثبتله إن الgood deeds مش بتتنسى يعمو.

معرفش السنادي استوردوا صواريخ برازيلي ولا إيه، اللي متعود عليهم هما 3 انواع أصفر واسود واحمر، الأحمر ده كان طويل ونادر اوي وممكن يفرقع مرتين، بس كان غالي مكنش بيجيبه غير العيال اللي أهاليهم حرامية وإحنا عارفين (حقد طبقي ايوه)، والأسود كان صوته أجمد واحد بس كان بتمن اتنين صُفر برضه، أما الأصفر مكنش أصفرعادي اللي هو اصفر شمسي ده، لا كان اصفر عدسي، لون شربة العدس، بتاع عامة الشعب بقى مكنش حد بيتخانق عليه.

من كام يوم كنت بخلص ورق مع مرات خالي الل�� يرحمه، فكانوا عايزين صورة بطاقته القديمة، قامت مرات خالي وهي بتطلع البطاقة من الشنطة باست صورته قبل ما تديها للراجل .. المشهد رغم بساطته وتلقائيته، إلا إنه فضل معلق معايا طول اليوم وحسيت انه سوييت اوي.

النهارده وانا بتوضى سمعت واحدة بتزعق للعيال اللي بترمي صواريخ، بس مكنش زعيق عادي لا، زعيق كله شتيمة بالاهل والاسلاف واللي هو يا ولية يام لسان طويل دول لو بيرموا صواريخ في بلكونتك مش هتعملي كده!

ف وانا راجع من التراويح سألت اشبال شارعنا مين اللي كانت بتزعقلهم دي، قالولي انها واحدة ساكنة جديد في العمارة اللي ورانا، كانوا ناويين ميروحوش يلعبوا هناك تاني بس انا سخنتهم جامد، لو على الزعيق فعادي إنما متسيبوش حد يشتمكم كده وتسكتوا، وخلاص من هنا ورايح الصواريخ هتتحدف تحت بيتها حرفيًا انا اتفقت مع الرجالة الصغيرين خلاث.

"أنا لا أحب ذاك الرجل، لذلك ينبغي عليّ أن أعرفه أكثر" .. دي حكمة قالها لينكولن رئيس امريكا الستاشر، حكمة قوية اوي وعميقة، عمري ما طبقتها غير وندمت عليها في الاخر وكرهت ذاك الراجل أكتر.

[fozdoaa]

لا اخفى عليكم سرا ياجماعه بس حوار انك تلاقي حد تعرف تخوض معاه محادثه حقيقيه عن نفسك و ت open up معاه بأفكارك اللى بتهلكك وتعرف تبينله حقيقه المشاعر المكلعكه اللى جواك نعمه لا تقدر بتمن نسأل الله أن ينعم علينا بيها يوما ما بجد علشان الواحد مبقاش قادر يشيل كل ده لوحده

[cybelle-jessy]

حاجات ممكن تعملها بتمن ايفون ١٥

١-تاكل قشطوطة لوتس لمدة ١٢ شهر

٢-تسمع زياد ظاظا علي سبوتيفاي مدي الحياة

٣-تشتري شقة في المنيب

٤-تحلق حلاقة زياد ظاظا مدي الحياة

٥-تجيب محمود الليثي وبوسي في فرحك يغنوا لزياد ظاظا

٦-تجيب عربية ربع نقل محملة سجاير pine

٧-تعمل سكيت بورد عاج علي شكل زياد ظاظا

٨-تحطهم اسهم تحت باط الطوخي

٩-تشتري جيلاتي عزة وتقفله

١٠-او تعمل ببهم صدقة جارية في ٥٧٣٥٧ باسم زياد ظاظا

[imazikaty]

رغم إن دي حاجة الواحد مش بيعرفها إلا بعد ما يجربها بنفسه فعلًا وكمان في الآخر، و ياريت الواحد كان يقدر يشوف دي أول حاجة بس والله النهايات دي والطريقة اللي الواحد بيمشي بيها من حياة أي حد فعلًا بتقول كل حاجة عن الشخص!

إن الواحد يمشي من حياتك من غير أي أذية أو قلة أدب أو افترا وتحسه أخد بعضه بهدوء ومشى وبيحميك من كلام الناس عليك حقيقي حاجة لا تقدر بتمن! بتبقى انت فاكر دا الطبيعي ف مش بتقدره، لحد ما تشوف العكس!

حتى لو المشاعر اتغيرت بس بيكبر أوي في نظرك وتحترمه طول العمر. لا في قلة أدب ولا أسرار بتطلع ولا بيلففك حوالين نفسك ولا أطراف بتتأذى ولا حد غيركم بيعرف أي حاجة حصلت في يوم بينكم.

[marmarika-world]

و الله لو الإنسان بشكله و بهدومه.. و بيتقيم بتمن الهدوم اللى لابسها.. فأنا احب ابشركم انكم ما تساووش حاجة .. و انكم مالكوش قيمة.. و اللى تمنه فلوس رخيص..

[tarekmurad6]

مذكرات من البيت الميت

" إنّ المال حرية رنانة و راجحة ، لا تُقدر بتمن بالنسبة لإنسان حُرم حرماناً كاملاً من الحرية الحقيقة إذا أحسّ ببعض المال في جيبه ، فإنّه يتعزى عن حاله " ص40