#اديني

[sarahtarek]

انتو عارفين ان في 2019 كسلت اروح كورس جرافيك ديزاين كان ب ١٥ جنيه السيشن

[littlekittycat]

انا لما حد من صحابي بيقولي اروحله البيت ببقى عاملة زي العيال الصغيرة وكل الي فارقلي هو "هنلعب ايه؟"

[yassen-world]

انا محتاج اجيب جبنة ريكفورد في اسرع وقت

جبنة ريكفورد كتييير 😌❤️

[theoldb]

مش عارف هو انا بس الي ملاحظ دا ولا في حد تاني واخد باله التطور الرهيب في الوقت تخيل ان قبل الالفينات كنا ابيض واسود وقناتين تلفزيون وبتاع الالفينات بدأنا نشوف الدنيا بقي و الوان و واي فاي وقصة وجيمز وحورات كتيرة راح زمن الاتاري مثلاً دا سكة لحد 2013 او 2014 اعتقد يعني بعدها الدنيا بدأت تتغير تدريجياً وفي الحقيقة الي فاكره انها بدأت تبقي اسوء من 2017 من بداية حقوق الشواذ في تلفزيون عربي مسلم لمذيع عربي مسلم في برنامج في دولة عربية مسلمة لا تدعم هذة الاشياء ولكن تعالجها لأنه لا اتفضل عصر الحرية قول رأيك واعترض وعرف الناس عادي انك شاذ جنسياً وكأن كلنا (المسلمين) منعرفش قصة قوم لوط؟ وتتوالي الاحداث وسريعاً كدة نوصل لجائحة وتخلص ويبدأ عصر ما بعد التطور الطبيعي وهو الذكاء الاصطناعي! ومن ثم يفقد العالم كل التوازن الخاص بيه! في ابشع مجازر وابشع عنصرية وتطهير عرقي وبنسأل ازاي العرب او المسؤولين فخامة السادة الحكام مبيتحركوش ساكنين! وكلامي عن مصر بشكل خاص فوق في 2017 علشان دا انا عشته بس تتوالي الصدمات في البلاد التانيه، السعودية بتدي الحق للمرأة بالقيادة وحرية المرأة؟ لا مليون علامة استفهام المرأة المسلمة في الاصل حرة! الدين ضامن حريتها بشكل لا يؤذيها ويحافظ ديماً عليها دلوقتي ليها حرية وبقي في معازف في بلد الكعبة؟ في الحقيقة غريبة وهتفضل غريبة ازاي دولتين من اهم الدول يعتبر في الشرق الاوسط يبقو بالشكل دا؟ ازاي بجد وطبعاً لو بدأنا نتكلم عن بلد ورا التانيه هنطلع مليون الف غلط غريب مفيش مبرر لية نرجع تاني كنا بنسأل ازاي مبيتحركوش، الناس دي اوريدي اصلاً سبب في دمار جزء كبير من المجتمع سيدي الفاضل وفي الاخر متنساش مينفعش تقول رأيك ومينفعش تفهم علشان هتوجع دماغهم وهيقرفوك خليك زي القطيع لو فاهم اسكت ولو مش فاهم عيش واتبسط وارضي ها علشان الرضي دا اهم حاجة انت طبعاً عارف.

[btotaa]

‏انا وانت

والخميس

وارقصلك ع عبد الباسط وهو بيقول :

يا عمي وعم قلبي يا معلمني الهوى

إتفضل جوا قلبي تعالى نعيش سوا

يا سيد الناس يا جامعة💆🏻

في الحب وفي الملاوعة😚

أنا قلبي ناره والعة❤️‍🔥

وفـ إيديك الدوا❤️‍🩹

واقول اديني 💋

يقوم رميني ع السرير 💥

ويديني 😉

بكل حب ودلع 😂❤️

[es-r-aa7]

اديني نصيحة اكتبها في ورقة و اعلقها في الآوضة بتعتي

مفيش أجمل من نصح النبي صلى الله عليه وسلم لينا ، الحديث دا بينور ف ذهني بشكل يومي وبيخلي حاجات كتير تعدي ف يومي وانا متوكله على الله وعارفة ان كل شئ مكتوب ومهما عملت مش هبقى controller on my life

يا غُلامُ إنِّي أعلِّمُكَ كلِماتٍ ، احفَظِ اللَّهَ يحفَظكَ ، احفَظِ اللَّهَ تَجِدْهُ تجاهَكَ ، إذا سأَلتَ فاسألِ اللَّهَ ، وإذا استعَنتَ فاستَعِن باللَّهِ ، واعلَم أنَّ الأمَّةَ لو اجتَمعت علَى أن ينفَعوكَ بشَيءٍ لم يَنفعوكَ إلَّا بشيءٍ قد كتبَهُ اللَّهُ لَكَ ، ولو اجتَمَعوا على أن يضرُّوكَ بشَيءٍ لم يَضرُّوكَ إلَّا بشيءٍ قد كتبَهُ اللَّهُ عليكَ ، رُفِعَ��ِ الأقلامُ وجفَّتِ الصُّحفُ.

[jaunerevee]

النهاردة لقيت دي في الميموريز .. وحقيقي شكرًا يا رب على كل اللي حصل وشكرًا انك اديني فرصة ابعد عن المدرسة دي والناظر اللي كان فاكر انه عشان قضى اسبوع في باريس فا بقى فرنساوي وعقد نقصه تخليه يحق لنفسه انه يتنمر عليا ماعرفش ليه مع اني كنت انضف حد عتب المدرسة دي تقريبًا، ومديرة المدرسة المعرصة اللي معاها مؤهل متوسط وكانت بتدخل تتنطط على المدرسين وتزعقلهم والراتب اللي كان حوالي ٦٠٠ ج وماكنتش بقبضهم وكل الاشكال الوسخة اللي اثرت عليا سلبًا الفترة دي وشكرًا على كونك اديتني فرصة اجرب واتعلم شغل جديد واقبض منه كويس واتعامل مع ناس كويسة واقعد على مكتب واترقى وابقى مديرة وشكرًا انك اديتني اجمل امان في الدنيا واجمل حياة حتى لو مابشتغلش وحتى لو مابقبضش فيها .. شكرًا انك خلتني اجرب حاجات كتير عشان احس بنعمة اللي في ايدي دلوقتي .

[esraa-el-shahat]

وعلي رأي الاستاذ عبد الباسط حمودة

اديني جرام محبة اديك وقة حنان .. اديك بزيادة حبة توزع عالجيران

[personanongrata-1]

اووه اديني ف العلاقات المستحيلة انا احب كدا

[maybeher]

صحيت روقت دولابي، كويت فساتيني، رتبت الأوضة، غيرت الملاية، عملت فطار وشربت قهوة وأخدت الدوا ونازلة أبدأ يومي لو حد بيسأل مين أشطر بنت فالدنيا يعني اديني جاوبته

[gannaadel]

النهارده صاحية أقول يا رب اديني أمارة. اديني أمارة. جه في بالي موسى وهو بيطلب يشوفه وش كده عشان محدش كبير على ألم الـ uncertainty حتى أولوا العزم من الرسل. ما ظهرش لموسى، بس ظهر للجبل قدام موسى، ودا كان كافي.

يا رب أرني أنظر إليك أو حتى للجبل. أي حاجة. مش بتعامى والله بس فعلًا مش شايفة. مش دا اتفاقنا يا رب؟ إن القلقان يطلب أمارة؟ أنا قلقانة أهو. عديني سور وحدتي وتوهاني وعمايا.

[elsaqqa-4ever]

فضفصة

من يومين في فترة نقاهتي وفي ايام الدلع ايام ماكان فيه دلع وراحة البال، الله لا يسامحك

جالي خبر بخناقة 🤣.

قالتلي.. فينك يا كبير، في خناقة وبوستات وبلوكات بتتاخد.

قالتلها : اديني الإسماء ومين اللي دخل كتب كومنتات.. ده الاهم..

متقلقيش يا ست الكل، ردح مصري ولعب عيال 🤣..

[littlekittycat]

لا ما انا مش هسيب الشغل ده كمان بسببها ده انتي الي عملتيلها ريكومنديشن يا متخلفه!!

+ هتفهم يعني خبطتين في الراس توجع

يا رب اديني طولة البال والتفاهم والتسامح وكل الصفات الحلوة بزيادة عشان اعدي ايامنا سوا بدل ما اخسرها أو اخسر الشغل 🤦🏻‍♀️

[saraadel-00]

أنا دايما ف علاقاتي ماشية بمدأ أستاذ عبدالباسط حمودة: "اديني جرام محبة أديك وقة حنان"

وثانك جاد عمر المبدأ ما فشل يخزوقني وجيس وات؟ وحياة النبي كل مرة بقول دي آخر مرة ومبتعلمش أبدا 😂

[marmarika-world]

-يا ميس اديني نجمة لما اخلص

=ده انا هديك المجموعة الشمسية كلها بس خلص 😅

[ebrahimx]

مبحبش الناس اللى خروجتها كلها نقاشات عن حال البلد وميزانية الشركة الاماراتيه وغلاء الأسعار وجشع التجار وهبل النسوان وجنون الجديان أنا نازل أغير جو مش احل مشاكل الناس وعلى رأي مزجنجي اديني في الهايف وانا احبك يا ننس