#أجنحة الفراشة | Explore Tumblr posts and blogs

the-conanner · 6 years ago

Text

File 1024 Discussion, Sad Story !

اوك... مثل ما شفنا بالفصل 1024.. تم تأجيل الحوار و الحسم يبن “ماسومي” و “كونان” لـ وقت ثاني بعد تدخل “ران” بالموضوع

القضية انكشفت بالكامل تقريبا بالفصل 1024.. و الجريمتين تم كشف ألغازهم.. شخصياً كنت متمني تكون الحبكة أقوى من هيك.. أو طرق القتل أعقد من هيك.. لكن بشكل عام القضية جيدة.. و موضوع العلاقات بين شخصياتها تم التحضير له بشكل ممتاز

المنشور هذا رح يكون قصير لإني رح أناقش نقط مش منشور كامل.. عموماً خلينا نبدأ

ما بعرف صراحة أحكي بشكل مفصل عن الجرائم أو بشكل سريع... لإن ما في شي غامض نوعاً ما بعد الفصل 1024 اوك خلونا نبدأ بالجريمة الأولى

ما سأكتبه تالياً.. قد يُصيب و قد يُخطئ

بالجريمة الأولى لاحظنا شي مهم جداً و هو تصرفات المساعد “يوتا”.. و خبيرة التجميل.. و احترنا مين منهم يلي تصرفه مريب أكثر.. لكن بعد الفصل 1024 توضح مين المجرم بشكل واضح تماماً

الخدعة بالجريمة الأولى كنت متأمل يكون لها علاقة بـ حبل الأمان يلي كان رح يستخدمه “ماكوتو”.. لكن طلعت أبسط من هيك بكثير.. و هي ان المجرم قام بوضع مجسم فراشة مصنوع يدوياً أسفل جوال الضحية يلي كان خارج النافذة.. و هذا المجسم قابل للطيران و الحركة بسرعة قوية جداً بمجرد نزع الثقل عنه المجسم مصنوع من أدوات بسيطة.. ممكن تتواجد بأي بيت.. و تحضيره بسيط.. بمجرد انه يتم لف أحد أجنحة المجسم بعد الانتهاء من صنعه أكثر من مرة.. ثم وضع ثقل فوقه.. فـ عند إزالة الثقل سيخرج المجسم بشكل سريع و مفاجئ.. و طبعاً طائر.. أي المجسم سوف يطير.. و من هذا الاستنتاج بيتوضح طبعاً ان القاتل هي خبيرة التجميل.. و الدليل بالصورة التالية

واضح ان خبيرة التجميل مستمرة بالنظر للأعلى رغم سقوط الضحية.. شو السبب ؟ السبب ببساطة انها عرفانة ان الفراشة رح تطير.. و كان بدها تتابع طيرانها و تشوف وين رح تهبط عشان تسترجعها لاحقاً.. لكن الفراشة خانتها و تصرفت عكس التوقعات و دخلت لداخل الغرفة بدلاً من الخروج للخارج.. و طبعاً ما كان بإمكانها تدخل تسترجع الفراشة بما ان الشرطة حطّت يدها عالمكان عشان هيك وقت المساعد “اودوري” شاف الفراشة و الفيديو ضحك.. لإنه عرف انها بقيت تنظر للأعلى عشان تتبع مسار الفراشة للخارج بغرض استرجاعها لاحقاً

صراحة كنت متمني خدعة معقدة اكثر من هيك.. لإن في أمور صارت بالجريمة الأولى لم ت��فسر بعد... مثل جوال الضحية.. و هذا الشي يلي خلاني أشك بالخدعة بالبداية انه جوال الضحية سليم 100% و الخبير الجنائي أجرى منه مكالمة بعد سقوط الضحية

القصد.. انه لو الفراشة كانت تحت جوال الضحية... و الضحية رفع الجوال عشان ياخذه.. رح تظهر الفراشة بوجهه فوراً.. و قبل ما يلحق يمسك الجوال حتى رح يكون واقع و صاير بالأرض لكن شفنا ان الجوال يلي كان ضايع لسه بمكانه.. و مش متحرك من محله.. يعني معقول الضحية رفع الجوال و طلعت الفراشة بوجهه.. و انصدم و خاف.. و بعدين رجّع الجوال لمكانه.. بعدين وقع ؟ هههههههه مستحيل هذا الكلام.. لازم بعد ما يرفع الجوال و تظهر الفراشة بوجهه.. عالقليلة من الرعبة رح يرمي الجوال شي 4 أو 5 أمتار بكل قوته من الخوف هههههههه أما انه يكون بنفس مكانه هذا شي مستحيل تماماً و كمان شغلة.. كيف الجوال يلي كان عم يتصل منه سليم و ما فيه شي و مش مكسّر أو مخدوش ؟ يعني مستحيل يوقع هيك من الطابق الرابع بدون ما ينخدش.. مستحيل.. إلا اذا كان بـ جيبة الضحية.. و هذا يلي خلاني أشك بخدعة الجريمة من البداية.. لإن مهما فكرنا بخدعة ان الفراشة تحت الجوال.. رح تكون النتيجة ان الضحية مش رح يلحق يحط الجوال بـ جيبته.. و رح يوقع و يوقع الجوال و يصير 100 قطعة.. أو عالقليلة مش رح يكون بنفس المكان يلي تم ايجاده فيه بالفصل 1023

فـ شخصياً أنا ما زلت مع خدعة بتخص حبل الأمان بداخل الغرفة..مش بالجوال.. و مثل ما حكيت بتحليل الفصل 1023.. ان الضحية كان مخطط يعمل مقلب بـ “ماكوتو”.. و أخذ الجوال و وضعه بجيبته.. (راجعوا تحليل الفصل).. و توجه للحبل حتى يعمل مقلب بـ “ماكوتو”.. والخدعة يلي هي الفراشة ظهرت وقتها اما موضوع انه يتفاجأ من الفراشة تحت الجوال.. و يكون معه وقت رغم الصدمة انه يحط الجوال بـ جيبته.. فـ هذا شي مستحيل تماماً.. و الدليل على كلامي هو كلام “كونان” بنهاية الفصل 1024

اوك... ما بظن ان “كونان” عم يحكي عن الفراشة بحد ذاتها هون.. يعني ما بدها كل هالصدمة من مجسم فراشة... يعني لو عنجد كلامه عن الفراشة... كان انصدم و حكى هيك أول ما شافها باللقطة الأولى من الصفحة لكنه قال هالكلام باللقطة الأخيرة من الصفحة.. يعني بآخر الصفحة.. و لاحظوا وقت حملها الخبير الجنائي “كونان” دقق منيح بالفراشة.. بعدين قال الكلام يلي قاله

فـ بظن هون ان “كونان” شاف شي على المجسم و تفاجأ منه.. مش المجسم نفسه.. و هذا يلي بخليني أشك أكثر و أكثر بإن الفراشة ما كانت تحت الهاتف.. بل كانت مجهزة بمكان ثاني.. عدا عن ان حجمها كبير.. و ممكن تبين بالغلط تحت الجوال.. و هيك بتفسد الخدعة و عنصر المفاجأة.. فأنا حالياً مع خدعة بتخص حبل الأمان.. مش الجوال لكن عموماً المجرم توضح من هالخدعة مهما كانت.. و هي خبيرة التجميل.. يلي بقيت تنظر للأعلى حتى تتابع مسار الفراشة وين رح تهبط حتى تسترجعها بعدين مثل ما شرحت فوق

بالجريمة الثانية حاول “غوشو” يخلط الأوراق و يضيع السالفة... فـ عمل كتير تعقيدات بالجريمة مثل ما شفنا.. و دفع الفانز للشك بالكل.. بالمساعد “يوتا” يلي راح يجيب العصير.. و بـ خبيرة التجميل.. و بـ الممثلة يلي شربت من عصير المساعد “اودوري” قبل ما تعطيه للمساعد “يوتا” يوصله له.. و بالمخرج يلي أعطى العصير لـ “اودوري” بالنهاية.. يعني ضيّع الطاسة.. و دخّل الدنيا ببعضها.. و العالم فاتوا بالحيط.. لكن بتبقى الخدعة سهلة هون كمان

اوك.. حتى نعرف المجرم بالجريمة الثانية.. و يلي هي خبيرة التجميل طبعاً.. مش ضروري نركز على موضوع السم و كيف وصل للضحية.. أو موضوع تبادل كأس الضحية من يد لـ يد.. مش ضروري ممكن التركيز على أمور ثانية كمان بتكشف القاتل.. و هم شغلتين

الشغلة الأولى هي سبب احضار العصير بالمقام الأول.. ليش تقرر احضار العصير ؟ طبعاً بسبب اللقطة التالية

يعني واضح انها حركة مصطنعة.. و واضح انها عملت هيك عشان تجبر المساعد يجيب عصير (رح أرجع لـ هالنقطة لاحقاً بالمنشور.. لكن حالياً تابعوا معي).. و بـ هالطريقة رح تخلي شكوك الشرطة حول الشخص يلي جاب عصير بالأساس.. و بتقدر توفر طريقة تسمم فيها الضحية.. يعني عصفورين بحجر واحد

الشغلة الثانية هي جوال الضحية.. حسب بعض نقاشات الفانز يلي شفتهم.. انه الكل عم يقول ان المجرم أرسل للضحية قبل ما يموت بـ لحظات انه متى رح نتحدث.. و بعد هيك الضحية مات فوراً.. هذا بيعني انه يلي سمم الضحية غير يلي أرسل الرسالة.. يعني مستحيل القاتل يرسل له رسالة عالجوال قبل لحظات من موته اذا كان عرفان انه رح يموت بعد شرب أو رشفة من العصير.. أكيد يلي أرسل الرسالة و يلي سممه شخصين مختلفين

لكن لا عزيزي.. و هون النقطة المهمة تخيل مثلاً ان الضحية تسمم و بقي جواله بـ جيبته.. شو رح يصير ؟ رح تجي الشرطة تفحص كل شي مع الضحية.. و تفحص الجوال.. و تشوف رسالة منه لـ شخص انه كشف المجرم.. و وقتها هذا الشخص رح يكون موضع شبهات كبير.. فالمجرم هون عمل حركة استباقية.. و هي انه أرسل للضحية متى سنتقابل بعد أول رشفة له من العصير (أي ابتلاع السم).. و هيك الضحية رح يطلع جواله عشان يشوف الرسالة.. و هيك بصير سهل على المجرمة انها تاخذ جوال الضحية من الأرض بعد سقوطه و موته.. و التخلص منه لاحقاً.. أو على الأقل مسح الرسائل و رميه لاحقاً.. و لاحظوا شو صار بعد سقوط المساعد

أول مين نزل لعنده هي خبيرة التجميل.. و طبعاً نزلت عشان تاخذ الجوال و تمسح الرسائل.. و بعدها ترميه بمكان ما.. أو تحتفظ فيه حتى تقدر ترميه لاحقاً بمكان ما.. و لو بتلاحظوا ان الجوال ما ظهر بالفصل بعد لقطة سقوط الضحية.. و لا حتى مع مقتنيات الضحية و هون بيجي السؤال المهم.. كيف تسمم الضحية ؟ يعني وين السم كان ؟ شفنا ان الشرطة قالوا ان السم مش موجود له أثر لا بالكأس.. و لا بالقشة.. فـ كيف تسمم ؟

بما ان القاتلة مثل ما حكينا هي خبيرة التجميل.. فـ السم أتى منها.. لكن متى كان آخر اتصال بينها و بين شيء بخص الضحية ؟.. اوك بالصورة التالية

اوك.. هذا كان آخر اتصال بين خبيرة التجميل .. و بين الضحية.. معناها السر بالقشة اوك.. مثل ما الكل لاحظ.. ان القضية مشابهة لقضية الاحياء اليائس.. يعني نفس الشي.. عصير ما فيه أثر للسم.. و رغم هيك تم التسميم.. معناها غالباً في شي “قابل للذوبان” مثل الثلج.. أو شي “غير قابل للذوبان” مثل حبوب التحسس مثلاً

فـ لو فرضنا ان المجرمة قامت بوضع السم بـ إحدى حبوب الحساسية خاصتها.. و وضعتها لاحقاً بالقشة.. فـ وقتها عند أول رشفة من الضحية رح يبلعها و يبلع السم معها.. لكن كيف وضعت الحبة بالقشة ؟ مش ممكن انها تسد مجرى العصير ؟ و هيك بينتبه الضحية انه في شي عم يعيق العصير لكن لا.. الحبة غالباً تم وضعها بالمكان يلي بتنطوي فيه القشة.. أو مفصل القشة.. و هذا المكان واسع.. و صعب الحبة تتسبب بانسداد المجرى فيه... و مع أول رشفة للعصير رح تتحرك الحبة و يبلعها الضحية بدون ما يحس انه بلع شي أصلاً ليش ؟

لإن العصير يلي بيشربه الضحية هو عصير مخفوق.. يعني نوعاً ما لزج.. مش سلس.. يعني مش صافي و خفيف.. بالعكس.. عصير ثقيل و مركز نوعاً ما.. فـ ابتلاع حبة مع عصير مركز و مخفوق شي من المستحيل الاحساس فيه.. حتى عند البلع.. و المشكلة هي التالية

المشكلة ان الطاقم كله بيعرف شراب الضحية اللزج و المخفوق ههههههههههههه حتى أعضاء الطاقم الغير مهمين بيعرفوا هههههه فـ طبيعي المجرمة تعرف شراب الضحية.. و تعرف انه مستحيل تتميز الحبة او بلعها أثناء شرب هيك عصير.. و هذا يلي شجعها على التصرف بهيك خطوة جريئة

الحين رح أكتب بعض الأمور بشكل عام عن القضية بشكل يكمل الكلام يلي كتبته فوق

المجرمة طبعاً تحججت بـ موضوع المي.. عشان تجبر المساعد يروح يجيب عصير و هيك بياخذ الفريق كله استراحة طيب كيف عرفت المجرمة ان االمساعد “يوتا” رح يتبرع و يقول انه رح يجيب عصير ��لكل و خلونا ناخذ استراحة ؟ السبب بكلام المساعد “يوتا” نفسه

اوي اوي مان... يعني شمست الدنيا.. فضحت الدنيا.. والله عرفنا انه من العادة تروح انت و هذا “نيشيبي” تجيبوا عصير للطاقم كله و تاخذوا استراحة ههههههههههه عرفنا والله عرفنا.. الفضيحة وصلت لألمانيا لعندي ههههههههه يعني واضح من كلامه انه في بالعادة انه يروح هو و المساعد السابق يلي مات و يجيبوا عصير للكل.. و هيك المجرمة قدرت تتوقع انه اذا تحججت بموضوع المي.. رح يتبرع المساعد “يوتا” و يجيب عصير

الموضوع الثاني هو موضوع الحبة المسممة ممكن يجي حدا يسألني انه كيف قدرت تسمم حبة الدوا تحضيراً لقتل الضحية الثانية ؟ يعني مستحيل تقدر تجهز هالحكي بـ هالسرعة برأيي انها كانت مخططة تنتحر بعد قتلها للضحية الأولى بالحبة المسممة هذي.. و واضح هالحكي من الجرأة يلي تصرفت فيها بالقضية خدعة الفراشة الغير مضمونة.. انه ممكن تدخل للغرفة بدل توجهها للخارج مثل ما حكينا.. و امكانية ان “ماكوتو” شاف الفراشة فوق أثناء سقوط الضحية.. و هذا رح يكون ثغرة ضخمة بـ خطتها.. و موضوع جوال “اودوري”.. يعني سرقته من مسرح الجريمة و إبقاؤه معها حركة جداً خطيرة.. و لو الشرطة استطاعت الحصول عليه قبلها كان أمرها انفضح من الرسائل فـ واضح انه في عدة ثغرات بـ خطتها.. و هذا دليل على انه بالواقع مش فارقة معها ان انكشفت.. يعني بمعنى آخر.. جرائمها انتحارية تماماً و تخطيطها فاشل و متسرع.. فـ غالباً كانت محضرة الحبة المسمومة لنفسها حتى تنتحر فيها.. لكنها غيرت رأيها بعد كلام “اودوري” التالي

و هذا الكلام كان قبل اكتشافه للفراشة.. و عاد و كرر هالكلام بالفصل 1024 بشكل وقح و هذا يلي ممكن يكون دافع لها لقتله.. و السبب برأيي هو التالي

الممثلة وقت صار معها الحادث.. قالت انه يدي المساعد وقتها كان لونهم أحمر.. يعني دم... اوك مش ممكن ان جرح الممثلة تسبب بـ كمية دم بـ هالقدر هذا.. لذا ممكن يكون اللون الأحمر يلي كان على يدي المساعد كانت من أثار خدعة “اودوري” و الممثل (الضحية الأولى) وقتها ؟ و هم الاثنين يلي عملوا هالخدعة فيه ؟ و غالباً هم الاثنين يلي تسببوا بحادث موته بوضع مقلب له بالسيارة أدى لصدمة له و فقدانه للسيطرة على السيارة و موته بـ حادث مثل ما شرحت بتحليل الفصل السابق هذا الموضوع.. و واضح كيف الكل شك ان “اودوري” عم يعمل فيهم خدعة.. لإن له ��وابق

الشي الثالث و يلي بتمنى ما يكون صح.. لإن لو كان صح.. رح تكون قصة جداً حزينة.. و رح تنتهي بـ طريقة صراحة مش متمني تنتهي فيها.. و هي ان الطاقم بيعرفوا المجرمة و بيعرفوا انها كانت رح تقتل

أول سبب خلاني أشك بـ هالنقطة هو زاوية التصوير يلي وافق عليها المخرج.. و يلي ما أظهرت الطابق يلي سقط منه الضحية.. صح مش المخرج يلي وضع الزاوية.. لكنه وافق عليها.. و ما غيرها.. و هذا ممكن يكون بسبب علم مسبق بتجهيز المجرمة للجريمة.. و قصداً جعل زاوية التصوير بـ هالشكل للتغطية عليها

السبب الثاني هو المساعد وضع يده مباشرة على القشة يلي أخذها الضحية “اودوري”.. و تحديداً على المكان يلي حكيت عنه

فاحتمال يكون شاف شي أو عرف شي و تجاهل و اكمل وضع القشة بالعصير

السبب الثالث و يلي يُعتبر أكثر شيء مثير للجدل بالنسبة لي.. انه ما في حزن على الضحيتين !!! يعني غريب.. كانوا زملاء.. و ماتوا أمامهم بـ طرق فظيعة.. و رغم هيك ما شفنا أي آثار حزن أو زعل على أي حدا منهم !! شي غريب.. و كأنهم مبسوطين انهم ماتوا هذا السكوت و التصرفات المريبة من أغلبهم ما بتبشر بالخير.. خاصة نظرتهم سوا وقت استهزأ “اودوري” بـ “نيشيبي” بالمرة الثانية

بتمنى ما يكون يلي ببالي صح.. لإن وقتها فعلاً رح يكون شي محزن جداً.. و نهاية القضية رح تكون محزنة أكثر من الجرائم يلي صارت

رابع نقطة و الأخيرة هو المساعد “نيشيبي” نفسه... شفنا من الفصل 1024 ما يلي

اوك.. كان يشتغل بمجال المؤثرات الخاصة.. معقول شخص مثل هذا ينخدع بـ الدم المزيف يلي طلع من الصابونة يلي حكى عنها الضحية “اودوري” ؟ صعب جداً أصدق شخص بيشتغل بمجال المؤثرات الخاصة و بمجال التمثيل... و ينصدم من هيك خدعة بسيطة و سخيفة !! ما بظن

فاحتمال ان خدعة الصابونة هذي صارت بعد حادثة الممثلة من تدبير الضحيتين.. و خصوصاً انه كان يشعر بالذنب لإنه غفي و ما قدر يوصل الممثلة بالوقت المناسب... فـ لما شاف الدم من الصابونة.. ممكن تذكر حادث الممثلة والذنب يلي حمله لنفسه وقتها.. و هذا يلي جعله يصرخ على الأرجح.. و طبعاً مثل ما حكيت.. ان موته بحادث سيارة كان بسبب مقلب من تحضير الضحيتين.. و المجرمة كشفت هذا لاحقاً و برأيي انه كان هذا شي مثل انتقام منه لإنه تأخر و تسبب بحادثة الممثلة لإنها راحت تبحث عن تاكسي.. و كلام الممثل بدل نوعاً ما على هالشي

اووووهو��.. و هون قصده طبعاً على حادثة الممثلة.. فـ غالباً كان الهدف من خدعة الصابونة هو تذكيره بالحادث و الذنب يلي تحمّله.. و هم كمان قاموا بتدبير خدعة بالسيارة أدّت لموته مثل ما شرحت

طبعاً بتمنى من يلي ما قرأ منشوراتي عن الفصول السابقة من القضية يرجع يقرأهم.. موجودين بمفضلة حسابي بـ تويتر.. فيهم كلام مهم عن الضحية الأولى.. و كيف لاحظ الشبه بين “ماكوتو” و المساعد “نيشيبي” بالبداية

و هذي اللقطة كانت تماماً قبل انفعاله على المساعد.. و كمان كتبت عنت محاولة تذكر المخرج أين رأى وجه “ماكوتو”.. و كتبت وقتها انه غالباً بيشبه المساعد يلي مات فالأفضل مراجعة المنشورات مع هذا المنشور

و هيك بكون خلصت كلام عن القضية.. أو أغلب الكلام يلي ��نت بدي أقوله.. و اظن هيك كافي... و حالياً رح نروح للتوقعات للفصل القادم.. و نهاية السلسلة

اوك مثل ما شفنا ببداية الفصل 1024 انه تم ابعاد الشكوك عن “كونان” مبدئياً من قبل “ماسومي” بعد كلام “ران” عن سلسلة الاحياء اليائس... لكن واضح تماماً انه الموضوع لسه ما خلص

مثلاً ممكن “ماسومي” تبدأ البحث عن هوية “كونان” المزيف يلي كان وقتها بالحفل.. فاحتمال تطلب فيديوهات أو صور من المدرسة.. أو تسأل الطلاب يلي كانوا حاضرين وقتها عن حدا شاف “كونان” وقتها طيب ممكن حدا يجي يسألني كيف طيب بعد ما تأكد لها ان “كونان” و “شينتشي” شخصين مختلفين حسب كلام “ران” ؟ مان.. هي بتعرف حقيقة “كونان” و هذا شي لا جدال فيه.. لو “ران” بتبقى بتنفي من الحين للعيد.. “ماسومي” عارفة 100% ان “كونان” هو نفسه “شينتشي”.. فـ ما في فايدة.. كلام “ران” مجرد ابرة تخدير.. مجرد تأجيل للمواجهة و ليس إلغاء.. و كلامها عن الجريمة الثانية انتحار هي مجرد تهيئة لحصر “كونان” و إجباره على الاتصال و حل القضية بصوت “شينتشي”.. لكن يبدو ان الامور رح تكون أسهل عليها بسبب “ران”.. عموماً قصدي انه لازم يصير شي يرجع يحيي الشكوك بالقضية الحالية قبل ما تنتهي

فـ برأيي.. يلي رح يصير بالفصل القادم بما يخص هذا الموضوع هو ان “ران” رح تتذكر قضية الاحياء اليائس مرة ثانية.. و رح تتذكر ان القضية هذي مشابهة تماماً للقضية الحالية بما يخص العصير و عدم وجود السم في أي مكان.. و طبعاً “ماسومي” رح تسأل “ران” و تطلب منها المزيد من الأدلة و التفاصيل عشان تحاول تحل القضية.. و هون غالباً “ماسومي” رح ترجع تحاصر و تضغط على “كونان”.. و تطلب من “ران” تتصل بـ “شينتشي” عشان تطلب منه مساعدة بحل القضية الحالية بما انه هو يلي حل القضية المشابهة وقتها هههههه

و هون “كونان” رح يرجع ينحصر بالزاوية من “ماسومي” أمام الكل.. ��ن “ران” رح تتصل على جوال “شينتشي” و عيون “ماسومي” عشرة على عشرة عليه.. يعني ما في مهرب ههههههههه فإذا حاول يرد أو يسحب جواله من الجيبة رح تفضح امله ههههه و احتمال تتبع معه أسلوب الفخ.. و تخليه يختفي عن الأنظار و يرد على المكالمة.. و فجأة تظهر له من خلفه و تقول مع مين عم تحكي بنص المكالمة مع “ران” ههههه او مثلاً تنتظره حتى ينهي المكالمة و تواجهه بشكل مباشر.. تماماً مثل ما عمل “اوكيا” وقت كشفه بقضية “يوساكو المجمدة” و غالباً هذا يلي رح يصير... انه رح تخليه يختفي و يحكي المكالمة.. و بس يخلص رح يلاقي “ماسومي” فوق راسه مع ابتسامة ام ناب ههههههه و تدير ظهرها و ترجع للباقي .. بتمنى “غوشو” يرسم اللقطة هذي مثل ما أنا متخيلها بالضبط.. لإني متأكد ان “غوشو” رح يرسم هيك مشهد.. سواء بـ هالطريقة أو بـ غيرها.. و هذا الشي رح يرجع ثقة “ماسومي” بنفسها.. و رح يخليها تبحث بشكل أقوى عن “كونان” المزيف وقت المسرحية

اذا قدرت تحصل على صور لـ “كونان” وقتها (يلي كان “هايبرا” طبعاً)... فاحتمال تقدر تستنتج هويتها.. بما انها وقتها كانت لابسة كمامة.. و بسلسلة القطار شافتها و هي لابسة كمامة.... فاحتمال من نظرات العين تقدر تحدد هويتها.. و هذا طبعاً في حال حصولها على صور أصلاً أما بالنسبة لنهاية السلسلة بشكل نهائي... فـ بفضّل تأجيل كلامي عنها لما بعد صدور الفصل 1025... لكن بشكل سريع غالباً “غوشو” رح يكتفي بالتلميحات اذا استمر الوضع هيك.. يعني مش رح ينهي السلسلة بمواجهة مباشرة بين “كونان” و “ماسومي” مثل ما توقعنا... بل رح يكتفي بوضع تلميحات هون و هناك عن “ماسومي” و عيلتها... و كلام من “ماسومي” بنهاية السلسلة.. و احتمال كلام بينها و بين “ميري” بالنهاية.. لكن مواجهة مباشرة بينها و بين “كونان” غالباً رح تتأجل.. لإن الهدف التالي مش “كونان”.. بل “كونان” المزيف

بالنسبة للقضية بالفصل 1025.. فـ رح نقضيها على محاولة البحث عن السم و مصدره... و البحث عن هاتف “اودوري” المفقود.. و يلي غالباً رح يلاقوه بعد ما تتخلص المجرمة منه بعد مسح الرسائل رح نشوف شكوك الشرطة و اشتباههم بـ المساعد “يوتا” و المخرج بما انهم هم يلي أحضروا العصير و سلموه للضحية.. يعني غالباً رح يكون في مراجعة شاملة للأحداث و المعطيات و أكيد هذا بيتضمن تحقيق “كونان” بشكل أعمق عن بعض الأمور بالقضية مع “ماسومي”.. و طبعاً مثل ما ذكرت موضوع “ران” و تذكرها لسلسلة الاحياء اليائس و اتصالها بـ “شينتشي” و ضغط “ماسومي” على “كونان” مرة ثانية

بالنسبة لإدانة المجرمة... فـ دامها كانت مخططة للانتحار بالحبة المسمومة.. فـ أظن انها ما أخرجت مادة دواء الحساسية الفعالة من داخل الحبة.. و وضعت السم معها.. لذا احتمال الدليل يكون فحص الجثة.. و ظهور آثار من مواد الدواء بـ دم الضحية.. عدا عن الفراشة يلي كانت مخططة تسترجعها لاحقاً.. فـ غالباً ما كانت آخذة احتياط كثير من ناحيتها.. لذا ممكن يتم ايجاد شي بخصها فيها.. أدوات مثلاً أو أي شي.. و هذا طبعاً قبل ما نشوف الفصل 1025 يلي احتمال يتضح فيه المزيد من الدلائل.. و لحد الآن ال��اقص هو دليل ادانة واضح فقط.. اما خدع الجرائم فـ واضحة نوعاً ما.. عدا الجريمة الأولى يلي لسه مش واثق تمام الثقة من موضوع الحشرة تحت الجوال مثل ما شرحت فوق

وهيك بكون خلص المنشور... أو لا لحظة.. لسه فيه فقرة الونبسة هههههههه

بتعرفوا اني كشفت مكان السم الحقيقي بالجريمة الثانية... الكل فكّر ان السم موجود بالقشة أو بالكاسة.. أو حبة او ثلج او أي شي.. لكن لا المكان هو التالي

السم بالواقع موجود على شارب الضحية... فـ بمجرد ادخال القشة بـ فمه.. غالباً بسبب طول شاربه.. رح تحتك القشة بالشارب.. و هيك بينتقل لها السم.. و بيتسمم و بموت تن تا را را رن.. تن تن

و بتعرفوا ان ولا خلص بلا بلا هههههههه بلا رفع ضغط ههههههه هيك بكفي.. ونبسة واحدة كافية

طبعاً الفصل 1025 رح يصدر بـ 25/ديسمبر.. لكن احتمال تصير مفاجأة ؟

عموماً لسه بكير على الفصل

و هيك بكون خلص المنشور.. و كالعادة أي سؤال أو استفسار فأنا موجود على تويتر..و تنويه ان هذا الحساب فقط لنشر المنشورات... و الأسئلة على تويتر.. مش هون

و السلام عليكم

#كونان

4 notes · View notes