rootsofroses

[rootsofroses]

Ist alles nur passiert, denn wir waren so verliebt,

Jetzt sind alle live bei unserem Rosenkrieg.

[rootsofroses]

[rootsofroses]

الحمد!

الحمد لله على كل شيء

أولاً وأخيراً!

الحمد هو القناعة اللي تقتنع بيها ان انت عندك نعمة حتى لو تشوف فيها حاجة عا��ية، سواء البصر، السمع، اللمس، الكلام، الصحة، المال أو الذرية وإلى آخره......

نعمة تخليك ترضى باللي انت تشوفه قليل حتى ربي الكريم الوهاب الرزاق الفتاح العليم يعطيك أكثر لأنك من قلبك مقتنع وراضي باللي عندك وبعدها لما تكون الوفرة والشكر بالنعمة من قناعاتك ربي يزيدك أكثر وأكثر وأكثر، و الحكمة مرات ما تقدرش تشوف الزيادة هاذي زي ما تبي انت في الأول، لأن الدنيا والقدر مرات يحطو في عقلك تساؤلات تبعدك أو تنسيك النعم اللي عندك بس لما تكون على قناعة تامة ان حتى لو صار شيء انت مش متوقعه او جاء أقل من توقعاتك ف تأكد ان في حكمة، يمكن مازال في حاجات لازم تديرها قبل ما يجيك اللي في بالك، ومع قناعتك بالنعم والشكر خليك صبور بس إخدم على روحك؛ الخدمة مش شرط تكون وظيفة يعني، مرات عندك سلبيات نفسية أو روحية أو عقائدية أو فكرية قبل ما تكون مادية! غيّر اللي تقدر تغيره وتقبل اللي ماتقدرش تغيره و من هنا تكون انت درت اللي عليك والباقي على ربي

ولما يكون الباقي على ربي لازم تشوف كم نقطة منها

التوكل على الله يكون وانت مقتنع بينك وبين نفسك ان الله هو الوكيل (مش زي البعض اللي يقول خليها على الله وهو محبط أو يحس باليأس وكأنه حاط الله أخر حل واستغفر الله)

لما تكون نيتك صافية ربي يعطيك على قد نيتك وأكثر يعني حتى لو مشت الأمور مش زي ماتبيها ح يجيك وقت وتعرف السبب

مرات الواحد فينا مايحسش بالنعمة إلا لما تمشي منه لأنه مكانش يبارك فيها أو شاكر ليها؛ ولهذا لازم كل واحد فينا يحمد ويشكر ربي على النعم.

[rootsofroses]

“إن كثير الكلام يُنسي بعضه بعضا.”

— أبو بكر الصديق

[rootsofroses]

و تمت السنة،

وعادي يعني بالنسبة لمنظوري الشخصي الحدث هذا زيه زي أي يوم الفرق في التاريخ بس!

بس خليني نتكلم على 2021 ومش بإختصار...

البداية كانت غريبة و كان الأمل موجود ان الوباء ينتهي ويرتاح العالم من حدث خلى أغلب لو مش كل الدول فترة من الخوف واللحظات اللي فقدنا فيها ناس عزاز علينا....

وفي نفس الوقت انكشفت أوراق هلبا حاجات سواء على الصعيد السياسي أو الإجتماعي وأكيد ماننساش العامل الإقتصادي؛ (لأن كذبوا علينا وقالو لنا ان المال لا يشتري السعادة، وتو نزيد نتكلم على الموضوع في باقي المنشور)

مش غريب عليا اني نعيش بين الوظيفة والبطالة بحكم اني نتململ و في نفس الوقت المكان أو الأشخاص اللي في المكان لما يتخطوا الخطوط الحمراء متاعك بعدين يضيع الإحترام وتضيع الخصوصية.

بس أكيد مش كل السنة كانت سلبية، بس أنا (وحتى في الواقع) نحب نعطي العيوب/السلبيات قبل المميزات/الإيجابيات!

تعرفت على ناس جديدة وزدت قويت علاقتي مع الناس المقربة مني وقريت مايقارب الـ60 كتاب جديد.

الحب مش شرط يكون من شريك/شريكة حياتك بس، الحب هو العائلة، هو الأصحاب، هو الأماكن الطبيعية زي البحر أو الجبل أو الغابات و المساحات الخضراء.

لما تحب نفسك انت مش أناني، انت تحب نفسك باش الناس المحيطة بيك تحبك لأنك تحب نفسك وتقدرها.

الحاجات الوحيدة اللي ماتقدرش تشريها بالفلوس هما الصحة والوقت، الباقي كل شيء ليه سوم.

العزلة مع نفسك مش معناها ان انت مكتئب، حزين، متضايق أو انطوائي؛ اللي تعرفه على نفسك في العزلة يمكن تتفاجأ بيها، وكأنك تتعرف على روحك من جديد.

بحلوها ومرها؛ هاذي 2021 بعيوني.

و صفحة وانطوت!

[rootsofroses]

"‏تستطيع كلمة واحدة حقيقية يلقيها أحد ما إليك، أن تثير في داخلك مهرجانًا من الكوارث، أن تجعلك تعود مجددًا وتعيد كل حساباتك القديمة، أن تجعلك تراجع كل شيء، أن تغيّرك إلى الأبد" 🖤

[rootsofroses]

When you join Twitter for a long time, yet you still kinda hopeless!

[rootsofroses]

كنت ما نرقدش الليل لين نسمع صوتك،

وكان صوتك هو الآنين اللي يهون عليا تعب اليوم،

وكان هو الحاجة اللي تعطيني push باش يومي يولي أحلى....

لكن توا تعودت، لأن اليوم سكرت 4 سنين و انت غايب عليا،

عايش زي ما أنا عايش لكن انت في مكان، و أنا في مكان.

اللي تغير هو ان أنا تعايشت مع الغياب

مش زي أول سنة ولا زي أول 6 شهور....

والوقت يعلم النسيان.

[rootsofroses]

بداية جديدة من الصفر،

لما تبعد على كل الناس، تخلي غير كم واحد يتعدو على الأصابع، اللي تلقاهم في وقت ضيقتك، اللي مايحسبوهاش معاك، اللي يحسو بيك من غير أي تكبر ولا هزوة في قلوبهم.

اللي فات فات و اللي جاي مجهول، أهم حاجة توا....

توا... الآن، الحين، هسة، دابا، هلق...

بأي لهجة و بأي لغة و في أي مكان، الآن هو أهم وقت في كل الزمان.

ماتستناش حاجة من حد، أسعى و ماتوقفش...

لو طحت أوقف على رجليك و كمل طريقك،

لأن لو بتسمع كلام اللي يقولك "مستحيل" مش ح تدير شيء و يبدأ الندم في داخلك يلوم فيك لأنك مادرتش اللي تبيه و اللي شفته صح.

و بالنسبة لمفهوم الصح والغلط؛ هذا بروحه موضوع طويل لأن اللي تشوفه بعيونك مش زي اللي نشوفه بعيوني، و حلمك وتخيلاتك مش زي أحلامي وتخيلاتي، و عن نفسي أنا عشت في عائلة عندهم فوبيا من البحر لأن زمان غرقوا فيه 3 أشخاص من العائلة و النتيجة عائلة كاملة تخاف من البحر....،

بس أنا رغم اني غرقت مرتين لكن قاعد في خاطري اني نتعلم السباحة باش نكسر القاعدة ويكون تحدي لنفسي أولاً، و منه نتعلم حاجة تفيدني، رغم اني نحب البحر لكن قعدتي في الشط بس تحسسني بأن في قيود بيني و بين البحر ياللي اختلفو الناس في وصفه؛ في اللي قالو على البحر غدّار، و في اللي قالو على البحر مليان أسرار.

من بداية جديدة لقيت روحي خاش من موضوع لموضوع لموضوع!!!

في الختام، رجعت من جديد....،

و هذا أول منشور ومش ح يكون أخر منشور بإذن الله.