weirdnoury

[weirdnoury]

ولعلّني رُغْمَ احتياجيَ أنْطَوي

وألوذُ بالصلواتِ والخلواتِ

النَّاسُ تهجرني لعيبٍ واحدٍ

والله يقبلني على عِلّاتي

نسّقت ألف قصيدة في فهمهم

والله يعرفني بِغير لُغاتِ

الناسُ عن وجعي ستغمض عينها

والله داوَى موجعي بأناةِ

في قُربه كل المخاوف تَنجلي

في حُبّه أحببت حتمًا ذاتي

[weirdnoury]

الشخص النرجسي تخصص تعكير صفو أي حاجة حلوة مهما كانت بسيطة ،، روح إلهي ينكد عليك كمان وكمان

[weirdnoury]

هقول رأي مريب دلوقتي

السلمون دا سمك ملوش طعم وفلوسه حرام عشان غالي ع الفاضي

[weirdnoury]

أنا مش محارب بس شكلي يدي

وبخوض لآخر المعركة لوحدي

[weirdnoury]

انا مبسوطة بتسنيمو جداً بس انا مش حاسه اني عايزه اعيد تجربة الحمل والولادة دي تاني، يعني هي الجولة الأولى تمام و آدينا بنتخطى المصاعب وبنحاول، اعيدها مع وجود طفل تاني كمان ازاي مش متخيلة لا.. اظن ده كلام سابق لأوانه اوي بس السهر مع الطفلة يعمل اكتر من كده.. المهم انا طبعا مرعوبة اقول قرار زي ده لأي حد مش عشان حاجة هو عشان وجع الدماغ بس والأحكام المسبقة وهاتي واحنا نساعدك و وقت الجد مبتلاقيش حد معاك وبتشيل الشيلة لوحدك معظم الوقت.. مش عايزه اسمع كلمة أمال بنتك هتفضل وحيدة غي الدنيا مش هتجبيلها اخ يونسها.. يا جدعان هتبقى واخده كل حاجة ليها لوحدها هو في أحسن من كده حب ورعاية وفلوس وكله كله لها بس

[weirdnoury]

عاوزه اقوم اصحي كريم اقوله قوم اعملي بوست على فيسبوك بمناسبة عيد ميلادي اتحرررك

[weirdnoury]

كل سنة وانتي جميلة ويخليك الكتكوتة الصغيرة وتتربي في عزك 🌹

وانت طيب يا انون .. شكراً بجد 🌼

[weirdnoury]

النهارده عيد ميلادي.. معنديش مشاعر تجاه الموضوع ده أوي بصراحة، أنا باينلي نضجت ولا إيه ولا ده تأثير الأمومة

[weirdnoury]

[weirdnoury]

كنت داخله مكان والباب بتاعه ضيق ومعايا بنتي على دراعي ولقيت ست قدامي تبدو ريفية بسيطة وبدأت تزاحمني انها تدخل الأول فدخلتها بحكم سنها الكبير وبعدين لقيت بنتها بتزاحمني بشكل اكبر وانا عند الباب خلاص لدرجة إن راس بنتي اتخبطت في الباب فبقولها هو إيه بتتزاحمي ليه؟! البت اتخبطت في رأسها اصبري! قالتلي معلش هو انتي معاكي طفل؟! انا لو اعرف مكنتش اتزاحمت .. استغربت بجد طيب هو ليه من الأول هو سباق! هتاخدي جايزه لو زاحمتي الناس يعني؟!

تدي للناس صباعك ياكلوا دراعك طيب انا عديت أمك ولا قريبتك عشان ست كبيرة تفكيرها على قدها انما انتي اتعلمي الذوق شوية

[weirdnoury]

انتي حلوة زي ما انتي ❤️

شكرا يا انون يا لطيف ❤️

[weirdnoury]

عاوزه اعمل عملية تجميل في أنفي بس معاييش إلا ١٤٥٠ جنيه و دول يادوب اكشف بيهم اول مرة عند الدكتور

بجد للأسف دي أمنية مترسخة من زمان في قلبي انا مش بحب الميك اب ولا بحطه كتير ولا مثلا مهووسة بالإسكين كير والهير روتين والكلام ده انا اي صابونه لطيفة بغسل بيها وشي و أي شامبو وبلسم بحطهم على شعري وببقى كويسه ولا فكرت في فيلرز ولا بوتوكس، بس بجد مسألة تجميل الأنف دي هتفرق معايا اوي وهحبني اكتر منا بحبني ونفسي لو اتوفر معايا تمنها اتشجع واعملها وألاقي شيخ يقولي انها مش حرام

[weirdnoury]

عمال يجيلي اعلانات هنا شات مع بنات وصور بنات استغفر الله العظيم وكده .. مين قالهم اني التارجت اودينس بتاعهم بجد انا ست عاوزه اعيش في حالي و اربي بنتي

[weirdnoury]

الحياة دي متعبه لا المجاملات نافعة ولا قلة الأدب نافعة.. ناخدلكم ترامادول يا ولاد الجزمة!

[weirdnoury]

النهارده حاسة إني أخيب أم في الدنيا.. رجعت من بره حطيت تسنيم على السرير ملفوفة بغطاء وروحت الأوضة التانية ارتبها وبعد شوية سمعتها بتصوت فكرتها زعلانه عشان انا مش قدامها يعني وفضلت تصوت لحد ما روحت بعد دقيقتين لها لقيت وشها متغطي بالغطا وبترفص ومش عارفه تشيله ونفسها مكتوم و وشها وراسها كلهم عرق

شيلتها وقعدت اعتذرلها كتير اوي وهي غلبانه أول ما شيلتها بس ابتسمتلي وانا لحد الآن عماله ابصلها وانا زعلانه من نفسي واقولها سامحيني، ويارب تسامحني إني من اول مرة سمعت صوتها تجاهلته

[weirdnoury]

أنا أصغر اخواتي فأخويا اللي قبلي على طول بيسألني انتي عيد ميلادك الشهر ده قولتله ايوه قالي هتتمي ال٢٥ صح؟ قولتله أحمد أنا هتم ال٢٧ سنة فكان مستغرب كده اللي هو لا انا مهما كبرتي شايفك صغيرة والبت اللي على دراعك دي منعرفهاش وقبلها بنت اخويا بتقولي انتي حاسه انك أم؟ قولتلها ايوه يا لولو منا عندي بنت قالتلي اصل انا مش حاسه انك أم أنا حاسه ان تسنيم دي اختك وانتي فنانة مش أم

أنا أقدر مشاعركم دي يا أهلي وأنا حاسه زيكم بالظبط وعاوزه افضل عندي ١٢ سنة وبلعب زوما وفنانة بتحب الرسم وقاعده ترسم على برنامج الرسام

[weirdnoury]

البت نيمو جمعت الف ونص عيدية النهارده

لأول مرة اجرب إحساس هاتي اشيلك العيدية معايا يا حبيبة ماما وطلع إحساس حلو أوي