vincipenn

[vincipenn]

A mi Amada

by: vincipenn

Kamusta ang iyong paglalakbay?

Sa kasalukuyan ba’y merong kasabay?

Isang gulo sa aking isip kung oras ay nagagasta,

sa kasalukuyang pag-irog sa ibang mata

Tulad ng isang araw sa reynang buwan, kung ‘sang libong taon man ang hintayan

Inip ay ipagpapaliban kung dun ka lamang masilayan

Estrangherong wangis nakatakdang ipagtagpo

Magmula sa malayo pahilang higit sa bigkis ng ating mga puso

Ngalan mo ba’y minsan nang nabanggit?

O sa kasulukuyang makilala ka ay pinagkakait?

Isa lamang ang tila ako ay sigurado,

Nasulat na ang yugto ng ating kwento,

Unti-unting binabaybay tungo sa kanyang plano,

Kung san ang malihis ay malabo

Masaya akong makilala ka, wala pa man.

Ibibigay ang yaman ng kalangitan,

Kapayapaan ng karagatan,

Para lang sa tulad mong nilalang

Sinusulat itong liham

Patungo sa adres na hindi ko alam

Para sa taong isa pang lihim

Ang wagas na aking asam

[vincipenn]

Balang Ani ✿

by: vincipenn

Siya ay tila isang binatilyong di alam ang magmahal,

Kailangan ba ng magarbong salita o regalong materyal?

Tila’y kabado pa sa una, isip ay dinadaga

Gustong ma i-alay lahat hanggang puso ay mapiga

Problemado man ng konti, sa kakahayahan at butas na bulsa

Mahalaga’y ang katiting ay magsisilbing punla

Bitbit ang binhi patungo sa lupaing pag-asa

Mapabukakad lamang ang bulaklak na nais matamasa

“Oh Ikaw na ang bahala aking mahal na panahon, sa iyong lupain ako ay la-laon”

Yaring sinasambit ng aking bibig, ang tanging sigaw ng aking dibdib.

Nagsimulang maghukay sa lupang tanging mainam,

Galak sa taong matagal nang takot malantaan

Ibigay sana ang aking tanging kahilingan,

Sabay sa lupa ay aking tinabunan

Ngunit dumadating ang tagtuyot, hindi mo pa na ambunan

Ang sabi ko’y “sige ako nang gagawa ng  agusan”

Ngayo’y kailangan ko ng sinag, kaliwanagang galing sayo

Pero maulap naman na tanghali ang dala dala mo

Di bale na, ililipat ko na lamang sa isang paso,

Medyo makukulob ngunit ligtas naman ang aking puso

Magpapayabong sa malayo na matatanaw mo,

Ngunit tandaan na kung sakali, dala ko parin ang pala ko

[vincipenn]

new home for my mind's little world