venkatesharumugam

[venkatesharumugam]

#போகுமிடம்_வெகுதூரமில்லை 🏏

ஆஸ்திரேலிய அணி தண்ணீருக்குள் முதலை போல! அவர்கள் மண்ணில் அவர்களை வீழ்த்துவது மிகக் கடினம். அங்கு ஒரு டெஸ்ட் ஜெயிப்பதே மிகப் பெரிய கவுரம் என்றெல்லாம் இருந்த பிம்பத்தை முதன் முதலில் சுக்கு நூறல்ல சுக்கு லட்சமாக சிதறவிட்டு அவர்களக் கதறவிட்டது நம் இந்திய அணி தான்!

2014 இல் தான் ஆஸ்திரேலியா கடைசியாக இந்தியாவிடம் மோதிய தொடரை வென்றது. அடுத்த 10 ஆண்டுகளில் இந்தியாவை அவர்களால் டெஸ்ட் தொடரில் வீழ்த்தவே முடியவில்லை! கடந்த தொடரில் புது முகங்களான விஹாரி, நட்ராஜ், வாஷிங்டன், ஷர்துல் போன்றவர்கள் அணியில் ஆடினார்கள்!

முதல் டெஸ்ட் தோல்வி கோஹ்லி, ஷமி இருவரும் நாடு திரும்ப முதல் இரண்டு டெஸ்டில் ரோகித் இல்லை! கடைசி டெஸ்டில் பும்ராவும் காயத்தில் வெளியேற இந்தியாவுக்கு நெட்டில் பந்துவீச சென்ற நட்ராஜ் ஆட வந்தார்! கேவலமாக தோற்கப் போகிறார்கள் என்று மைக்கேல் வான் முதல் பாண்டிங் வரை எள்ளி நகையாடினர்.

முதல் டெஸ்டில் 36க்கு ஆல் அவுட் ஆகி தோற்ற அவமானம் ஒரு புறம்! ஆடும் லெவனில் இருந்து முக்கிய வீரர்கள் நாடு திரும்பியது இந்தச் சூழலில் கல்யாணத்துக்கு வந்தவன் மாப்பிள்ளை ஆனது போல ரஹானேவின் தலைமை! இது தேறவே தேறாதுன்னு புதுப் பேட்டை படத்தில் அடிபட்ட தனுஷ் போல கிடந்தது இந்தியா!

ஆனா அடி வாங்கி ரத்த வெள்ளத்தில் கிடந்த குமார் கொக்கி குமாராக மாறி துவம்சம் செய்தது போல 2வது மேட்ச் வெற்றி 3வது மேட்ச் டிரா 4வது மேட்ச் வெற்றினு இந்தியா கொடுத்த கம்பேக் இந்த பார்டர் கவாஸ்கர் டிராபியில் மிகப் பெரிய சம்பவம்! மொத்த BGT தொடரில் மிகச் சுமாரான இந்திய அணி 2020 அணி தான்!

இந்தத் தொடரைக் கூட பார்த்தா ரோகித் இல்லை, கில் இல்லை, ஷமி இல்லை ஜடேஜா அஸ்வினுக்கு வாய்ப்பு தரவில்லை! ரோகித் & கில் இடங்களுக்கு வந்த படிக்கல், துருவ் இருவரும் பெரிதாக ஆடவும் இல்லை! இந்த மேட்சின் முதல் நாளில் 1st இன்னிங்ஸில் 150க்கு ஆல் அவுட்! இந்தியா அவ்வளவு தான் என்றனர் திரும்ப!

ஊர் கூடித்தான் தேர் இழுக்கணும் என்பார்கள்! இங்கு முதலில் தைரியமாக ஒருவன் தான் வந்து வடம் பிடித்தான்! பும்ரா எனும் புதுமை நாயகன்! இந்த மேட்சின் முதல் நாள் பிரஸ் மீட்டில் கூட ஆஸி மீடியாக்கள் பு��்ராவை மிதவேகப் பந்துவீச்சாளர் எனக் குறிப்பிட அவர்களைப் பார்த்து பும்ரா தன்னம்பிக்கையோடு..

நான் வேகப்பந்து வீச்சாளருங்க வந்து மேட்சில் பாருங்க என்றான் சிரித்தபடி! ஆம் சொன்னதை மேட்சில் செய்தும் காட்டினான். மற்றவர்களுக்கு குச்சியாக இருப்பது மேஜிஷியனுக்கு மந்திரக் கோலாக இருப்பது போல மற்ற வேகப் பந்து வீச்சாளர்களின் கைகளில் திரும்பாத பந்து பும்ரா கைபட்டதும் திரும்பியது!

வேண்டும் விக்கெட்டை வேண்டிய நேரத்தில் பும்ரா எடுக்க ஆஸி அணியினர் வேண்டாத தெய்வங்கள் இல்லை! மொத்த ஆஸியை 104 ரன்களுக்குள் சுருட்டி என் கடமை முடிந்தது என்று தான் பிடித்த வடத்தை அணியினர் வசம் கொடுக்க பும்ராவின் வடத்தை வாங்கிய ராகுலும் ஜெய்ஸ்வாலும் தேரை இழுத்து தடம் பதித்து..

புதிய வரலாற்றில் இடம் பிடித்தனர்! பார்டர் கவாஸ்கர் தொடரின் மிகச் சிறந்த இன்னிங்ஸ்களில் ஜெய்ஸ்வால் உடையதும் ஒன்று! 2 ஆண்டுகளாக தடுமாறி வந்த கோஹ்லியும் உத்வேகம் கொண்டு சதம் அடித்து எழும்படி இருந்தது ஜெய்ஸ்வாலின் ஆட்டம்! ஆஸி மீடியாக்கள் நியூ கிங் என ஜெய்ஸ்வாலை கவுரவித்திருக்கிறது!

நாம் குவித்த 487 ரன்கள் தான் ஆஸியில் 2வது இன்னிங்ஸில் எதிரணி எடுத்த அதிக ரன்கள்! இதற்கு முந்தைய சாதனை பாகிஸ்தான் அடித்த 450 தான்! ஆஸியின் வெற்றிக்கு மலைப்பான 534 ரன்களை இலக்காக நிர்ணயித்து அதிலேயே அவர்களின் தன்னம்பிக்கையை தாறுமாறாக நொறுக்கியது இந்தியா!

450 ரன்களை கூட சேஸ் செய்துவிடும் திறன் கொண்ட ஆஸியை 3 வது நாளின் இறுதியில் 5 ஓவர்களில் 3 விக்கெட்டுகளை எடுத்து 12/3 என்று முடித்து இன்று போய் நாளை வா என்று அனுப்பி வைத்தது இந்தியா! கோஹ்லி சதம் அடித்த அடுத்த நொடியே டிக்ளேர் அறிவித்த போது எதுக்கு அவசரம் என்றவர்கள் பலர்!

ஆனால் பும்ராவின் இந்த துரித முடிவைத் தான் இன்று கிரிக்கெட் வல்லுநர்கள் அனைவரும் பாராட்டுகிறார்கள்! கவாஜா, ஸ்மித், லபுஷேன், ஹெட், மார்ஷ், கேரி போன்றவர்கள் ஒரு முழு நாளும் நிலைத்து நின்று ஆடும் திறன் பெற்றவர்கள்! அவர்களை மறுநாள் ஆடவைத்திருந்தால் நிச்சயம் அவர்கள் டிரா செய்துவிடுவார்கள்.

முழுநாளும் பவுலிங் & ஃபீல்டிங் செய்து களைப்பில் இருந்த அணியை கடைசி 5 ஓவர்கள் ஆடவைத்து பொறியில் அகப்பட வைத்தார் பும்ரா! அந்த தாக்குதலில் விழுந்த ஆஸி கவுரவமான தோல்விக்கும் ரன் வித்யாசத்திற்கும் தான் ஆட முடிந்ததே தவிர வெற்றிக்கு ஆட முடியவில்லை! அ��்புதமான வெற்றி இது!

இதைத் தொடர்ந்து இந்தத் தொடர் முழுவதும் எடுத்து செல்ல வேண்டும்! ரோகித், கில் இல்லாமல் வந்த வெற்றி இது! அவர்கள் நாளைக்கு அணிக்கு திரும்பினால் அது நமக்கு பலம் தான்! இந்திய அணி டாப் ஆட்டக்கார���்கள் ஃபார்முக்கு வந்திருப்பதும் இந்த வெற்றியும் மிக நல்ல சகுனம்! ஆனால் இது போதாது..

இன்னும் 4 மேட்சுகள் இருக்கின்றன! ஆஸி அடிபட்ட ஓநாய் அதனிடம் மாட்டிக் கொண்டால் குதறி எடுத்துவிடும். இப்போது நாம் வெற்றிப் பாதையில் அடியெடுத்து வைத்துள்ளோம்! இதே போல ஒரு அணியாக ஆடினால் தொடர் வெற்றி நமக்கு வெகு அருகில் தான்! தொடர்வோம்.. போகுமிடம் வெகு தூரமில்லை🏏

[venkatesharumugam]

“உனக்கென்ன மேலே நின்றாய்”

மும்பை! ஆசாத் கிரிக்கெட் மைதானத்தின் ஓரத்தில் ஒரு கூடாரம்! அது அந்த மைதானத்தை பராமரித்துவரும் கிரவுண்ட்ஸ் மேனுடையது! அந்த கூடாரத்தில் தான் அந்த சிறுவனும் தங்கி இருந்தான்! அவனது சொந்த ஊர் உ.பியிலுள்ள சூர்யவான். அங்கிருந்து கிரிக்கெட் பயிற்சிக்காக மும்பை வந்திருக்கிறான்!

முழு நேரமும் மைதானமே கதியாகக் கிடந்தான்! மாலையில் பானிபூரி வியாபாரம் செய்துவிட்டு இரவில் மைதானத்திற்கு திரும்புவான்! பகல் முழுக்க மைதானத்திலேயே கழிக்கும் ஒருவனுக்கு ஃபைவ் ஸ்டார் ஓட்டலிலா வேலை கிடைக்கும்! அந்த மைதானத்தில் தினமும் பல் வேறு மேட்சுகள் நடக்கும்! அத்தனையிலும் ஆட ஆசைப்பட்டான்.

அவன் நாடி நரம்பு எல்லாம் கிரிக்கெட் கிரிக்கெட் என்றே துடித்தன! ஆனால் வசதியில்லாத குடும்பம்! மும்பை வந்த சமயம் ஒரு பால் கடையில் தான் வேலை! அங்கு வேலை செய்து கொண்டே கிரிக்கெட் ஆட முடியவில்லை. பிறகு தான் இந்த மைதானத்தில் வந்து தங்கியது! மாலை முழுவதும் பானிபூரி வியாபாரம் காலையில் கிரிக்கெட்!

இப்படி எந்நேரமும் கிரிக்கெட்டை சுவாசித்து வந்தான்! 2013இல் ஜ்வாலா சிங் என்னும் கோச் கண்ணில் படும் வரை அவன் பட்ட துன்பங்கள் அதிகம். அவரது முயற்சியில் தான் இவன் மேலேறியது! தன் அறிமுக ஆட்டத்திலே 319 ரன்கள்! அதன் பின் விஜய் ஹசாரே முதல் மேட்சில் 203 ரன்கள் என மேலே ஏறிக் கொண்டிருந்தான்!

இந்திய U19 அணிக்கு தேர்வானது லிஸ்ட் ஏ தொடரில் 564 ரன்கள் குவிப்பு என தொடர்ந்தது எல்லாம் ஏறு முகமே. தியோடர் டிராபியின் இந்திய பி அணிக்கு தேர்வான போது ஐபிஎல் வந்து இவனை இன்னும் மேலேற்றியது! ராஜஸ்தான் ராயல்ஸ் அணியால் வாங்கப்பட்டான்! ஐபிஎல்லில் CSK அணிக்கு எதிராக விரைவான 50 அடித்தான்!

அடுத்து மும்பை இந்தியன்ஸ் உடன் செஞ்சுரி அடித்தபோது இந்திய ரசிகர்கள் அனைவரும் “யாருய்யா இந்த ஜெய்ஸ்வால்னு வியக்க அன்று துவங்கிய அவன் வளர்ச்சி இன்னும் மேலே தான் இருக்கிறது. ஜெய்ஸ்வால் பேட்டில் தொட்டதெல்லாம் ரன் ஆனது! இன்று நம் அணியின் எல்லா பார்மெட் கிரிக்கெட்டிலும் தவிர்க்க முடியாதவன்!

ரவிசாஸ்திரி சொல்கிறார் ஜெய்ஸ்வால் மும்பை மைதானத்தில் தங்கியிருந்த காலத்தில் சோர்வில்லாமல், சளைக்காமல் தினமும் மூன்று மேட்சுகள் ஆடுவான், கடின உழைப்பாளி! சஞ்சு சாம்சன் சொல்கிறார் இவன் நெட் பிராக்டிஸை விட்டு வரவே மாட்டான். இவனுக்கு பவுலிங் போட்டே எங்க பவுலர்ஸ் டயர்டாகிட்டாங்க!

ஆம்! இந்த டெஸ்டில் ஆஸ்திரேலிய பவுலர்களை அவன் டயர்டாக்கிய விதம் உலக கிரிக்கெட்டுக்கு ஏன் ஆஸி கிரிக்கெட்டுக்கே மிகவும் புதிது! இன்றைக்கு ஆஸ்திரேலியா முழுவதும் பேசப்படும் கிரிக்கெட்டர் ஜெய்ஸ்வால்! இந்த சதம் அவனை இன்னும் மேலேற்றி விட்டது நேற்றைய நாளில் ஸ்டார்க் பந்தில் ஒரு சிக்ஸர் அடிப்பான்.

பின்னால் ஸ்லிப்பில் நிற்கும் ஸ்மித்தும் லபுஷேனும் அந்த ஷாட்டை காற்றில் கைகளில் வீசி அடித்து பார்த்து பிரமிப்பார்கள்! பொதுவா ஆஸி வீரர்கள் பிறரை பாராட்டுவது அரிது! அவர்களை மீறி ��து வெளிப்பட்டது! அதே போல அவனது சதமும் சிக்ஸரில் தான் வந்தது! அந்த ஷாட் பெயர் அப்பர் கட் (மேல் நோக்கி தட்டுவது)

ஒரு எளிய குடும்பத்தில் பிறந்து கடினமாக உழைத்து கிரிக்கெட் ஆட வந்து தன் திறமையால் இரட்டை சதங்களாக குவித்து இன்று கவாஸ்கர், சச்சின், விராத், போன்ற ஜாம்பவான்கலைப் போல் ஆஸ்திரேலியாவில் கொண்டாடப்படுகிறான்! அவன் ஏறிவந்த உயரம் அப்படி இது தொடர்ந்தால் அவன் மேலே தான் நிற்பான்!

[venkatesharumugam]

“அது ஒரு அசைவ காலம்”

{அந்தக் காலம் அது அது வசந்த் அன்கோ காலம் மாதிரி இது அந்த காலத்து அசைவக் கடைகள் பற்றிய உண்மைப் பதிவு..}

தமிழ்நாட்டில் அசைவச் சாப்பாட்டைப் பற்றி யார் சிலாகிச்சு பேசினாலும் மதுரை ஓட்டல்களைப் பர்றி பேசாமல் இருக்க முடியாது. மதுரையின் சிறப்பான அயிரை மீன்குழம்பு, கறி தோசை, விரால் மீன் பத்தியெல்லாம் நிறைய கேட்டுக் கேட்டு நம்ம காதுகள் மட்டுமல்ல கபாலமே புளிச்சு போச்சு! சரி இந்தப் பதிவு எதுக்கு?

மதுரையின் அசைவக் கடைகளுக்குன்னே ஒரு மார்க்கெட்டிங் ஸ்டார்டிஜி இருந்தது! என் அப்பா என்னிடம் சொன்னது, என் தம்பியின் அனுபவம், பல மாஸ்டர்களிடம் நான் கேட்டு தெரிஞ்சிகிட்டது, என் நேரடி அனுபவம் இப்படி ஆச்சி மசாலா ஓனர் மாதிரி நான் பார்த்துப் பார்த்து தெரிஞ்சுகிட்டதை இங்க உங்க கிட்டே பகிர்ந்துக்கிறேன்!

சமீபத்தில் கூட மதுரையில் ஒரு அசைவக் கடையை பற்றி சோஷியல் மீடியாவில் கழுவி ஊத்தியிருந்தாங்க! சாப்பாடு ₹100 ஆனா குழம்புக்கு தனியா காசு அங்கே எதை வாங்கினாலும் ₹250க்கு குறைவு இல்லை அப்படின்னு! ஆனா அந்த காலத்தில் இந்த நடை முறை கிடையாது அன்று அசைவக் கடைகளின் ஸ்டைலே வேற.

முதலில் அன்றைக்கு தரமான பொருட்கள், ருசியான சமையல் இதுதான் தாரக மந்திரமாக இருந்தது. நல்ல இறைச்சியைப் பார்த்து வாங்கும் நிபுணர்கள் இருந்தனர். கலப்படம் இல்லாத இறைச்சி, கைப்பக்குவம் மிக்க மாஸ்டர்கள், வாடிக்கையாளர்களுக்கு நல்ல மரியாதையோடு பரிமாறுவது அன்பான கவனிப்பு எல்லாமிருந்தது!

பொதுவா கஸ்டமர் பிரண்ட்லி அணுகு முறை தான் பல அசைவக் கடைகளின் நற்பெயருக்கு காரணமே! அன்று அதிக இறைச்சி அயிட்டங்களை விற்பனை செய்வதைவிட கஸ்டமர் திருப்திக்கு முதலிடம் கொடுத்தாங்க! கடைக்கு வரும் கஸ்டமர்களைப் பற்றி நன்கு அறிந்துகொள்ள அன்று என்ன செய்வார்கள் தெரியுமா?

கூட்டமான கடைகளில் வெயிட் பண்ணி சாப்பிடுறவங்களுக்கு ஒரு இடம் இருக்கும்! இங்கு 2 சூபர்வைசர் இருப்பாங்க! இவங்க தான் டேட்டா கலெக்டர்கள்! வந்திருப்பவர் உள்ளூரா, வெளியூரா? என்ன தொழில் செய்யறாரு? மதுரைக்கு என்ன விஷயமா வந்துருக்காருன்னு என்று சகல விவரங்களையும் வாங்கிடுவாங்க!

வந்திருக்கிறவரு அடிக்கடி மதுரைக்கு வர்றவர்னு தெரிஞ்சா அவருக்கு தடபுடலா கவனிப்பு இருக்கும். அவர் கேட்காத குழம்பு கிடைக்கும், 4 துண்டு கறி கூடுதலா கிடைக்கும். அவரை மகிழ்ச்சி படுத்துவதன் மூலம் அடுத்தடுத்து அவரை அங்கே வரவழைக்கும் விதை அன்று விதைக்கப்பட்டு அதன் பலனை அறுவடை செய்வார்கள்!

பில் தொகையில் 10 ரூபா 20 ரூபா குறைஞ்சா கூட அடுத்து வரும் போது தாங்க என்று விட்டுக் கொடுக்கவும் செய்வாங்க! இன்னொரு முக்கியமான டெக்னிக் பிரியாணிக்கு ��ரை சாப்பாடு இலவசம்! அ��ுக்கு அசைவ குழம்புகள், ரசம், மோர் உண்டு. சூடா ஒரு ஆம்லெட் போடவாண்ணேன்னு கேட்டு சுடச்சுட அவர்கள் தரும் ஆம்லெட் நமக்கு ஒன்றோடு நிற்காது.

பின்னாளில் அரைச் சாப்பாட்டுக்கு ரசம், மோர் மட்டும் தான் என்று புது கண்டிஷன் அப்ளை செய்து மக்களுக்கு உணவு சப்ளை செய்யும் வாய்ப்பை இழந்து கடையை மூடியவர்களும் உண்டு! இன்னொரு அற்புத வெரைட்டி சாதா அசைவ சாப்பாடு! அதென்ன சாதா? சோற்றுடன் எல்லா குழம்புகளும் தருவாங்க அதில் இறைச்சி இருக்காது! குழம்பு மட்டும் தான்!

நாம தனியா கறி வாங்கியாகணுமுன்னு எந்த அவசியமும் இல்லை! ஆனா மட்டன் குழம்பு ஊத்தினா அதில் ஒரு கரண்டி நிறைய எலும்பு துண்டுகள் சோற்றில் விழும்! அட வெறும் மட்டன் குழம்பிலேயே இவ்வளவு கறியான்னு மக்கள் முகம் வியக்கும்! ஆக்சுவலா அந்த எலும்பில் கறி என்பது 8000 கோடி ரூபாயை 5000 இல்லை 50 ஆயிரம் கோடி பேருக்கு தந்தால் எப்படி இருக்குமோ..

அந்தளவுக்கு தான் கறி இருக்கும்! சிக்கன் குழம்பில் சிக்கன் உதிரிகளான கழுத்து, ஈரல், விங்ஸ் துண்டுகள் நிஜமாகவே இருக்கும். சில மீன் குழம்புகளிலும் இப்படித்தான் மீன்கள் நீந்தும்! அடடா இறைச்சிக்கு பணம் வாங்காமலேயே கறியைத் தர்றாங்க என்னா மனுசன்யா என்று வடிவேலு டெம்ப்லட் போல மக்கள் சிலாகித்து உருகிவிடுவார்கள்.

இன்னொரு முக்கிய விஷயம் கறிக் குழம்பில் எலும்பு போட்டு சமைத்தால் எலும்பின் எசன்ஸ் இறங்கி குழம்பின் ருசி அபாரமாக இருக்கும்! இதுபோல மக்கள் சேவையும் செய்து , வசதியானவர்களை கண்டறிந்து அவர்களை திருப்திபடுத்தியே தங்கள் மார்க்கெட்டை மதுரை அசைவக்கடைகள் தக்கவைத்துக்கொண்டன! இரண்டாவது அவர்களின் தனித்த ருசி!

முனியாண்டி விலாஸ் ஓட்டல்களில் இறைச்சிக்கு குறிப்பிட்ட கிராமங்களில் இருந்து தான் ஆடு வாங்குவார்கள். பிரியாணியில் ஆட்டுக் கொழுப்பு கட்டாயம் கலப்பார்கள். நெய் செலவு குறையும். ஆட்டுக் கொழுப்பு நெய்யின் இடத்தை ஈடுகட்டிவிடும்.. ருசியும் குறையாது! கோழி, மீன் வகைகளிலும் இதுபோல ருசிக்கு பல தரக் கோட்பாடுகள் உண்டு.

சில அசைவ ஓட்டல்களில் வாடிக்கையாளர்கள் சாப்பிட்டு இலையில் மீதம் வைக்கும் எலும்புகளை கடையின் குப்பைத் தொட்டியில் சேகரித்து அதை குறிப்பிட்ட தூரம் வண்டியில் எடுத்து போய் தெரு நாய்களுக்கு போடும் வழக்கம் இருந்தது. அன்று இப்படி நாய்களையே கருணையோடு கவனித்த அசைவ ஓட்டல்கள் தான் இன்று மனிதர்களை… 😢🥱

யெஸ் அந்தக் காலம் நிஜமாகவே பொற்காலம்..

[venkatesharumugam]

#பெண்_ஓட்டுநர்கள்

நாங்கள் அமெரிக்கா சென்றிருந்த போது நிறைய நீண்ட தூர சாலைப் பயணங்கள் செய்திருக்கிறோம். 6 மாநிலங்களை எல்லாம் கார் பயணத்திலேயே கடந்து இருக்கிறோம்! அந்தளவு அங்கு சாலைகள் பராமரிப்பும் போக்குவரத்து கட்டுப்பாடும் கண்டு வியந்து இருக்கிறோம்! எங்கள் பயணங்களில் நாங்கள் அதிகம் பார்த்தது அதி கனரக வாகனமான மெகா கண்டெயினர் டிரக்குகள்!

அமெரிக்காவில் சாலைகள் தான் மிக முக்கிய போக்குவரத்து! ரயில் சேவை அங்கு இந்தியா போல இல்லை! அமெரிக்க மக்களுக்கு தேவையான அத்யாவசியப் பொருட்களை வெவ்வேறு மாநிலங்களுக்கு எடுத்து வருவது பெரிய பெரிய டிரக் வண்டிகள் தான்! நீங்கள் புறவழிச் சாலையில் 200கி.மீ கடப்பதற்குள் நிச்சயம் 200 டிரக்குகளை பார்த்துவிடலாம்!

இந்த கனரக டிரக்குகளை அமெரிக்க தட்பவெப்ப நிலையில் மனிதன் ஓட்டுவது மிகக் கடினம்! வெயிலுக்கு வேலை இல்லை. பெரு மழை, சூறாவளி, டொர்னாடோ சுழல் காற்ற���, கொட்டும் பனி, உறைந்த பனி என்று அமெரிக்க வானிலை மதில் மேல் பூனையாகவே இருக்கும்! இந்த டிரைவர்கள் எல்லாருமே நம்ம ஊர் பணத்துக்கு ஒரு வருடத்தில் கோடிக் கணக்கில் சம்பாதிப்பவர்கள்!

இந்த வண்டியை ஓட்ட உடல் பலம் மட்டுமல்ல மன பலம், புத்தி கூர்மை, சுறுசுறுப்பு என எல்லாம் கலந்தது! சில பயணங்கள் மாதக் கணக்கில் கூட நீடிக்கும்! டிரக்கிலேயே தங்கி சமைத்து தூங்கி எழுந்து செல்ல வேண்டும்! நம்மூர் போல உதவிக்கு க்ளீனர்கள் கூட அங்கு இல்லை! சில இடங்களில் கொண்டு செல்லும் பொருட்களின் தேவைக்கேற்ப 2 ஓட்டுநர்களை அனுப்புவர்.

பெரும்பாலும் தனித்து செல்லும் பயணங்கள் தான்! இதில் நாங்கள் பார்த்து வியந்தது ஐஸ் ரோட்ஸ் எனப்படும் பனி படர்ந்த சாலைகளை கடக்கும் ஓட்டுநர்களை! இவர்களுக்குத் தான் சம்பளம் ��திகம்! ஆனால் அந்த ஐஸ் ரோடுகளில் வண்டியை செலுத்துவது என்பது சென்னை ரங்கநாதன் தெருவுக்குள் 100 கிமீ வேகத்தில் புல்லட் டிரெயின் ஓட்டுவது போல மிக மிக மிக சவாலானது!

வழுக்கும் பனி, சரிந்து விழும் பனிப்பாறைகள் பனிச் சகதி, பனிப் புயல் என பனியே சனியாக வந்து சோதிக்கும்! இந்த ஓட்டுநர்களில் நிறைய பெண் ஓட்டுநர்களும் இருக்கிறார்கள்! எந்த அமெரிக்கரும் அதை வியப்பாகப் பார்த்ததில்லை! (நாங்க தான் பார்த்தோம்) ஆனா நம்ம இந்தியாவில் இன்னும் ஒரு பெண் பஸ் ஓட்டுவதே வியப்பான செய்தியாகவும் மிகப்பெரிய சாதனையாகவும் பார்க்கப்படுகிறது.

இன்னும் பெண்களைப் பற்றிய நமது பார்வையில் பல ஆண்டு காலம் பின்னோக்கியே இருக்கிறோம்! அது தான் இன்னும் டேய் பஸ்ஸை பொண்ணு ஓட்டுதுடா என வியந்து கொண்டிருக்கிறோம்! யூடியூப் சானல்கள் பில்டப் அதுக்கும் மேல! இதெல்லாம் உலகில் மிகச் சாதாரணம் எனும் மனநிலை நமக்கு எப்போது வரும்? திருந்துங்கடே மகளிர் சுய உதவிக்குழு தயாரிச்ச டீ வாங்கித் தர்றேன்!

[venkatesharumugam]

📀 வல்லிய டிஸ்கி 📀 : ரஹ்மான் சார் விஷயத்தை ஜு.வி கழுகார் ஸ்டைலில் எழுதியிருக்கேன்.. சத்தியமா இதெல்லாம் எனது கற்பனையே.. சீரியஸா எடுத்துக்காம சிரிச்சிகிட்டே போயிடுங்க 🙏🙏🙏

சீனியர்_விகடன்_கூகையார்

இருள் கவிழ்ந்ததும் கண் விழித்த கூகையார் சோம்பல் முறிக்க தன் இறக்கைகளை படபடவென அடித்துக் கொண்டு வார்ம் அப்பினார்! அவர் அமர்ந்திருந்த மரத்தின் இடது பக்கம் தான் இன்று பறக்க முடிவு செய்திருந்தார். ஏன்னா அங்கு தான் கோடம்பாக்கத்தில் நம்ம பெரிய பாய் வீடு இருக்கிறதே!

வழக்கமாக அரசியல் தலைகள் இருக்கும் ஏரியாவில் உள்ள மரங்களில் நைட் ஸ்டே செய்யும் வழக்கம் உடைய கூகையார் கடந்த 3 தினங்களாக கோடம்பாக்கம் பக்கமே தன் விழிகளை சுழல விட்டு பல அரியத் தகவல்களை கணித்து வந்துள்ளார். போன மாதம் இரவு 2 மணிக்கு கூகையாருக்கு மூக்கில் வேர்த்தது!

அந்தத் தெருவில் ஒரு சாதாரண ஓலா டாக்ஸி ஒன்று நுழைந்து அதிலிருந்து ஒருவர் மின்னல் வேகத்தில் பெரிய பாய் வீட்டிற்குள் நுழைந்ததை 180 டிகிரியில் திரும்பும் அவர் கழுத்தால் கண்டார் முன்னாள் துக்ளக் ஆசிரியரின் விழியை விட மும்மடங்கு பெரிய விழியால் அவர் கண்ட இந்த காட்சி அவரை வியக்கவைத்தது!

ஆம்.! காரில் இருந்து இறங்கியவர் இந்தியாவின் மிகப் பெரிய VIP ஜோசியர்! பெரிய பாயின் திருமதியே வரவேற்று அழைத்துப் போக வீட்டினுள் பாயை சந்தித்தாராம் விடிவதற்கு 10 நிமிடம் இருக்கும் போது ஜோசியர் வெற்றிப் புன்னகையோடும் மலர்ந்த முகத்தோடும் வெளியேறியது நம் கூகையார் கண்களில் இருந்து தப்பவில்லை.

என்ன நடந்திருக்கும்? கூகையாரின் புலனாய்வில் கிடைத்த ருசிகரமான தகவல்கள் இது தான்.. பாய் இந்தியாவின் சிறந்த இசையமைப்பாளர் என்றாலும் சமீபமாக அவர் இசையமைத்த படப் பாடல்கள் பெரிய ஹிட் இல்லை. தற்போது தமிழ் சினிமாவில் முன்னணியில் இருப்பது அந்த ஒல்லி இசையமைப்பாளர் தான்.

ஸ்லம் டாக் மில்லியனர் பாயை இந்த ஸ்லிம் பாய் பின்னுக்கு தள்ளிவிட்ட வருத்தம், சமீப காலமாக பெரிய விருதுகள் இல்லை, சென்னை லைவ் ஷோ சொதப்பல், தமிழணங்கு பிரச்சனை மகள் ஹிஜாப் விஷயம் போன்றவற்றில் விமர்சனங்கள் இதற்கு என்ன செய்யலாம் என்று அந்த ஜோசியரிடம் ஆலோசிக்கப்பட்டதாம்!

திருமதி பாயின் ஜாதகத்தில் தற்போதைய நேரமும் சரியில்லை என்பதால் இதற்கு பரிகாரம் தான் இந்த விவாகரத்து அறிவிப்பு! ஊரே உங்களை திட்டணும் எல்லா புகழும் இறைவனுக்கே சொன்ன நீங்க எல்லா வாயிலும் விழுகணும் அப்படி ஊர் வாயில் விழுந்தா திருஷ்டி பூரா கழிஞ்சிடும். இதான் சரியான பரிகாரம்!

இதைக் கேட்டது பெரிய பாய் அதிர்ந்து போய் அய்யோ ஜோசிய பரிகாரத்துக்காக விவாகரத்தா! என் அன்பு மனைவியை நான் விளையாட்டுக்கு கூட டைவர்ஸ் செய்ய மாட்டேன் என்று மறுக்க அட இதெல்லாம் லுலுலாய்க்கு முதலில் இதை சொல்லிட்டு பிறகு வாபஸ் வாங்கிடுவோம், அட அதுவும் நீங்க சொல்ல வேண்டாம்..

நம்ம பாயம்மா சொல்லட்டும் அவங்க கெட்ட நேரமும் நல்லதா மாறிடும், நீங்க கம்முன்னு கிடங்க என்று பாய் வீட்டு உறுப்பினர்கள் மூலம் பெரிய பாய்க்கு உத்திரவாதம் அளிக்கப்பட்டதாம்! அதன் பின்பு தான் பாயம்மா இந்த அறிவிப்பை வெளியிட ஜோசியர் சொன்னது நடந்தது! ஒரு பக்கம் ஊரே தீப்பற்றி எரிந்தது.

சமூக வலைத்தளங்கள் ஓவர் டூட்டி பார்த்தன! பயில்வான் முதல் முந்தா நாள் சானல் ஆரம்பிச்சவங்க எல்லாம் திரைக்கதை எழுதி டைரக்டர்கள் ஆனார்கள். நிறையா பேரு பாய்/பாயம்மாவுக்கு அறிவுரை கூறும் சமுத்திரகனி ஆனார்கள். ஆடு ஜீவிதம் படத்துக்கு ஒரு ஆஸ்கார் உறுதி என்னும் முதல் தகவல் நேற்று வந்தது.

இதோ இன்றைக்கு காதலிக்க நேரமில்லை பாடல்கள் ஹிட்! என்னும் செய்தி வந்துருக்கு! ஸ்லிம் இசையமைப்பாளர் போன வாரம் இன்னும் 10 படம் 50 பாடல்கள் இசையமைக்கணும் என்ன செய்யப் போறேனோ என மலைப்பாக ஒரு பேட்டி தந்திருந்தார். இப்போ அந்தப்பட தயாரிப்பாளர்கள் முடியலன்னா விடுங்க தம்பி..

பெரிய பாய் இருக்காரு நாங்க அவர்கிட்ட போயிக்கிறோம் என்று சொல்லிட தர்மசங்கடத்தில் இருக்கிறாராம் ஸ்லிம்! இந்தியிலும் 2 பெரிய வாய்ப்புகளுக்கு பேச்சு வார்த்தை நடக்கிறதாம்! ஷங்கர், மணிரத்னம், லோகேஷ் கனகராஜ், மகிழ் திருமேனின்னு பெரிய டைரக்டர்களின் படங்களும் அடுத்து வரிசையில் இருக்கிறது.

தொடர்ந்து நல்ல செய்திகள் வந்ததும் பாயம்மா விவாகரத்தை வாபஸ் வாங்கிக் கொள்வதாக அறிவிக்க அநேகமாக இன்னும் ���ரிரு நாளில் பெரிய பாய்க்கு ஹாலிவுட் படத்திற்கும் ஒரு வாய்ப்பு வரலாம் என்று லாஸ் ஏஞ்சல்ஸ் நகர நாரை நண்பர் ஒன்றிடம் இருந்து கூகையாருக்கு நம்பகமான தகவல்கள் வந்துள்ளது!

வழக்கம் போல நடந்ததை உளவுத்துறை மூலம் தாமதமாக அறிந்து கொண்ட மத்திய அரசு தற்போது அந்த ஜோசியர் யார் என்று விசாரிக்கிறதாம். பாய் வீட்டருகே இருந்த வேப்ப மரத்தில் இருந்து இதையெல்லாம் கவனித்த கூகையார்.. நேராக நம்மிடம் வந்து இந்த இரகசியங்களை யாரிடமும் சொல்லிவிடாதே..

என்று கூறி நம்மிடம் சத்தியம் வாங்க மறந்து.. நாம் அவருக்கு கொடுத்த சூடான பாதாம் பாலையும் முந்திரி பக்கோடாவையும் சாப்பிட்டுவிட்டு விருட்டென அவர் உறங்கும் ஆலமரத்துக்குப் பறக்க கிழக்கே வானில் சுடரொளியுடன் சூரியன் உதித்தது.!

இது பரம இரகசியமுங்க இதை யாரிடமும் சொல்லிடாதீங்க.. 🙏ப்ளீஸ்.. 🙏

[venkatesharumugam]

#கேரளா_அல்வா

பாம்பே அல்வா, திருநெல்வேலி அல்வா, அசோகா அல்வா, தம்ரூட் அல்வா, மஸ்கோத் அல்வான்னு பல புகழ் பெற்ற அல்வாக்களை கேள்விப்பட்டு இருப்போம்! புகழ் பெற்ற கேரளா அல்வா தெரியுமா! கோழிக்கோடு அல்வான்னு சொல்லப்படும் கறுப்பு அல்வா உலகப் புகழ் வாய்ந்தது. நெய், டால்டா இல்லாமல் தேங்காய் எண்ணெய்யில் இது தயாரிக்கப்படுகிறது! (இப்போ நெய்யும் உண்டு)

வளைகுடா நாட்டில் செட்டில் ஆன கேரள குடும்பம் ஒன்றின் தயாரிப்பு முறை தான் இந்த அல்வா! 300 ஆண்டுகளுக்கு மேலான பாரம்பரியம் கொண்டது இதன் தயாரிப்பு! பாரம்பரிய கறுப்பு அல்வா மட்டுமின்றி ஆரஞ்ச் அல்வா, லிச்சி அல்வா, பைனாப்பிள் அல்வா, நட்ஸ் அல்வா, பேரீச்சை அல்வா ஆப்பிள் அல்வா என்று இன்றைக்கு பல ஃபேளேவர்களில் வித விதமாகக் கிடைக்கிறது.

எனது கேரளத் தோழியான ஶ்ரீலக்ஷ்மி கேரளாவில் ஆலுவா (ஒரு ஊர்) மட்டுமில்ல, அல்வாவும் ஃபேமஸ் சாப்பிட்டுப் பாருன்னு சொன்னது மட்டுமின்றி அன்போடு ஊட்டியும் விட்ட பின்பு ஶ்ரீலக்ஷ்மியின் அழகில் மட்டுமல்ல அந்த அல்வாவின் ருசியிலும் மயங்கிப் போனேன்! கோழிக் கோடன் அல்வா எனப்படும் இந்த அல்வா சர்க்கரை/ வெல்லம் தே. எண்ணெய், ���ைதா மாவால் செய்யப்படுவது!

திருநெல்வேலியில் பஸ் ஸ்டாண்ட் & ஜங்ஷனில் அல்வா கடைகள் அதிகம்! இருட்டுக்கடை போல ஒரு சில கடைகள் கடை வீதியில் இருக்கும்! கோழிக்கோட்டில் இதுக்கு ஒரு தெருவே இருக்கு! S.M. ஸ்டிரீட் (SWEET MEAT STREET) எனப்படும் அங்கு ஏராளமான அல்வா கடைகள்! 52 வகையான அல்வாக்கள்! என்னென்ன வகை அல்வாக்கள் தெரியுமா?

இளநீர் அல்வா, பச்சை மிளகாய் அல்வா, நேந்திரம் அல்வா, நுங்கு அல்வா, மிளகு அல்வா, தர்பூசணி அல்வா, அத்திப்பழ அல்வா, மசாலா அல்வா ஆஹா எல்லாமே வித்யாசமா இருந்தது! ஜவுளிக்கடை மேட்சிங் ப்ளவுஸ் செக்‌ஷன் போல அத்தனை வண்ணங்களில் அல்வா கடை நெடுக தென்பட்டது! நெல்லைக்கு சாந்தி ஸ்வீட்ஸ் மாதிரி கோழிக்கோடுக்கு சங்கரன் பேக்கரி!

இத்தனை சுவாரஸ்யத் தகவல்களைக் கேள்விப்பட்டதும் கேரளா அல்வா பற்றி அறிந்து கொள்ள ஞானும் பின்னே லக்ஷ்மியும் கோழிக்கோடு சென்று 3 நாட்கள் தங்கியிருந்து இதன் சரித்திரத்தை தேடி அதன் ரெஸிபியை வாங்கிட்டோம்! உங்களுக்கு அல்வா தராமல் இதன் ரெஸிபி & தகவல்களை விரைவில் பதிவிடுகிறேன் 🩷🩷

[venkatesharumugam]

#வெங்கிஸ்_கிச்சன்

🟣 வெட்டு கேக் {கஜடா}🟣 (முட்டை கோஸ்)

கப் அளவு : மைதா எடுக்கும் கப் அளவு தான் மற்ற பொருட்களுக்கும்.

தேவையானவை : மைதா - 2 கப், வறுக்காத ரவை - 1கப், சர்க்கரை - ஒன்றே கால் கப், அரிசி மாவு - கால் கப், முட்டை -1, ஏலக்காய் - 8,பேக்கிங் பவுடர் - முக்கால் ஸ்பூன், நெய் அல்லது வெண்ணெய் - 2 ஸ்பூன், காய்ச்சி ஆற வைத்த பால் - 200மிலி, ஆயில் : பொரிக்கத் தேவையான அளவு, உப்பு - கால் ஸ்பூன்.

செய்முறை : ஒரு அகலமான ப��ுலில் மைதா, ரவை, அரிசி மாவு, பேக்கிங் சோடா, உப்பு, நெய் அல்லது வெண்ணெய் எல்லாம் சேர்த்து மாவை நன்கு கலக்கி வைக்கவும். மிக்ஸியில் ஒரு முட்டை, (மைதா 100கிராமுக்கு 1 முட்டை) சர்க்கரை, ஏலக்காய் அனைத்தையும் போட்டு கலக்கி அடித்து எடுக்கவும்!

இப்போது இதை கலந்து வைத்த மாவில் சேர்த்து நன்கு பிசையவும். இதைப் பிசையும் போது நீர் விடக் கூடாது! கவனம் காய்ச்சிய பாலை சிறிது சிறிதாக விட்டு தான் பிசையவேண்டும். சப்பாத்திக்கு பிசைவதை விட சற்று தளர்வான பதத்தில் பிசைந்து அந்த மாவை பவுலிலேயே ஒரு மணி நேரம் மூடி வைத்திருக்கவும்!

பிறகு வாணலியில் பொரிக்கும் அளவு ஆயில் ஊற்றி அடுப்பை மிதமாக எரியவிடவும்! ஆயில் அதிக சூடு இருக்கக்கூடாது! பிறகு பிசைந்த மாவை தேவையான அளவு உருண்டையாக எடுத்து அதை கையில் அழுத்தி உருட்டாமல் மேலாக உருட்டி ஆயிலில் போட்டு எல்லா பக்கமும் வேகும்படி திருப்பிவிட்டு அது பொரிந்ததும்..

அளவு பெரிதான அளவாகிவிடும் அப்போது எடுத்துவிடவும்! ஆயில் அதிக சூட்டில் இருக்காமல் பார்த்து தீயை கூட்டிக் குறைக்கவும்! பொரித்த உருண்டை அதுவே வெடிப்புகள் விட்டு இருக்கும். மாவை அழுத்தி உருண்டை பிடித்தால் பிளவுகள் வராது. உருண்டையும் வேகாது! இப்போது ருசியான வெடி கேக் ரெடி!

🥣 குறிப்புகள் 🥣

🥮 இதை கோதுமை மாவு கருப்பட்டி சர்க்கரையிலும் செய்யலாம்! பொருட்கள் எல்லாம் அதே அளவுகள் தான்!

🥮 கோதுமை நாட்டு சர்க்கரை என்றால் பிசைந்த மாவை 30 நிமிடங்கள் ரெஸ்ட் தந்து வைத்தால் போதும்!

🥮 உங்களுக்கு இதில் இனிப்பு தேவை என்றால் மாவு பிசைந்த பின் ருசித்துப் பார்த்து சிறிது கூட்டிக் கொள்ளலாம்! அதிக இனிப்பு கூடாது.

🥮 மாவு பிசையும் போது பாலை மொத்தமாக ஊற்றக்கூடாது! சிறிது சிறிதாகத் தான் சேர்க்கணும். நீர் சேர்க்கவே கூடாது.

🥮 100 கிராம் மைதாவிற்கு ஒரு முட்டை என்பது அளவு! நீங்க எடுக்கும் 2 கப் 200 கிராம் எனில் 2 முட்டை தேவை.

🥮 மாவு பிசையும் போது சிறிது மஞ்சள் அல்லது ஆரஞ்ச�� கலர் சேர்ப்பது உங்கள் விருப்பம்.

[venkatesharumugam]

“கஜடா என்றழைக்கவா”

முருகா என்றழைக்கவா, முத்துக் குமரா என்றழைக்காவான்னு டி.எம்.எஸ் தன் கணீர் குரலில் பாடும் பாடல் வரிகளை ஏன் இங்கு சொல்றேன்னா எழுதப் போற விஷயம் அப்படி! நம்ம தமிழ்நாட்டு மக்களுக்கு உணவுகள் மீதுள்ள காதல் உலகறிந்தது! நமது மரபணுவிலேயே உணவு ரசனை பின்னிப் பிணைந்துள்ளது! நம்ம உணவுக் கலாச்சாரத்தில் தான் எத்தனை விதவிதமான பலகாரங்கள்!

பலப் பல வகைகள் இருப்பதால் தான் இதுக்கு பலகாரம்னே பேரு வச்சிருப்பாங்க போல! அதிலேயும் தமிழக டீக்கடை பலகாரங்கள் என்றால் என்சைக்ளோபீடியா சைஸில் பெரிய புத்தகமே போடலாம். அவ்வளவு வெரைட்டிகள் இருக்கு.ஒவ்வொரு மாவட்டத்திலும் அந்த மண்ணின் மணத்தையும் குணத்தையும் தன்வசம் கொண்ட சிறப்பான பலகாரங்கள் குவிந்துள்ளன! அதுல ஒண்ணு தான் இந்த கஜாடா!

இது இனிப்பு பலகாரம்! நல்ல மொறு மொறுன்னு அளவான இனிப்பா இருக்கும். சூடா சாப்பிட்டா ஒரு ருசி ஆறினா ஒரு ருசின்னு 2 வகை ருசிகள்! ரெண்டு ருசியுமே அட்டகாசமா இருக்கும்! அதிரசத்தை அளவான இனிப்போடு சாப்பிட்டா எப்படி இருக்குமோ கிட்டத்தட்ட அந்த ருசி தான். ஆனா இது கெட்டியா, கிறிஸ்பியா இருக்கும்! மேக்கப் போட்ட கன்னத்தில் ஜிகினா மினுக்குறா மாதிரி..

இதன் மீது ரவை துணுக்குகள் மின்னும்! இதன் வாசம் ரொம்ப நல்லாயிருக்கும்! பல டீக்கடைகளில் இதான் தேசியப் பலகாரம்! டி.எம்.எஸ் எப்படி பல பெயர்களில் முருகனை அழைப்பாரோ அதுமாதிரி சென்னை, வட தமிழ்நாடு பக்கம் இதை கஜாடான்னும், தென் மாவட்டங்களில், வெடி கேக், வெட்டு கேக், முட்டைகோஸ், ஆட்டுக் கால் கேக், வெடி கோஸ்னு பல பெயர்களில் இதனை..

நம் மக்கள் அழைக்கிறார்கள்! செல்லூர் பக்கம் போனா காலை 7 மணிக்கே நூற்றுக்கணக்கில் இதை பொரிச்சு எடுத்து தட்டில் கொட்டுவார்கள். ஒவ்வொரு கேக்கும் கிரிக்கெட் பந்து சைஸில் நல்லா அகலமா மலர்ந்த ரோஜாப்பூ போல தெரியும். அந்தப் பிளவுகளை பிரிச்சு தான் சாப்பிடணும். வெளியே கிறிஸ்பி, உள்ளே மென்மையா இருக்கும்!2 வெடி கேக்கும் 1 டீயும் குடிச்சா..

அடுத்த 2 மணிநேரம் பசிக்காது! சிலர் 3 கேக் சாப்பிட்டுட்டு உள்ளூர் அரசியல் முதல் உலகரசியல் வரை பேசிட்டு போவாங்க! எங்க பெரியப்பா கிண்டலா எலே டீக் கடையில சூதானமா அரசியல் பேசுங்கய்யா அப்புறம் கோபம் வந்து வெடி கேக்கை வீசி அடிச்சிக்க போறிங்கன்னு சொல்வார்.அவர் சொல்றா மாதிரி சில கடைகளில் இந்த கேக் அப்படித்தான் கையெறி குண்டு போலவே இருக்கும்.

எடுத்து எறிஞ்சு மேல பட்டா நிச்சயம் வலிக்கும்! முட்டையும், பேக்கிங் சோடாவும் இதில் சரியா சம அளவு சேர்த்தால் கேக் வெடி கேக்கா இல்லாமல் ரசிச்சு “கடி கேக்” போல மாறிடும்! இதுக்கும் ஸ்பெஷல் கடைகள் இருக்கு! இந்த கேக் பொதுவா பிரவுன் அல்லது செக்கு எண்ணெய் கலரில் தான் இருக்கும்! விருதுநகர், சிவகாசி, அருப்புக்கோட்டை, ராஜபாளையம் பக்கம் இந்தக் கேக்கை..

டைமண்ட் ஷேப்பில் தருவார்கள்! நிறத்திலும் மஞ்சள், ஆரஞ்சு, ஏன் நடிகை தமன்னா நிறத்தில் வெள்ளாவி வெளுப்புடனும் கிடைக்கும்! வெடிகேக், பால்பன் சாப்பிட்டவர்களுக்கு இலவசமா கொஞ்சம் சேவு மிக்ஸர் கொடுத்த கடைகள் எல்லாம் விரைவாக மார்க்கெட்டை பிடித்திருக்கின்றன! ருசியான டீ, அற்புதமான கேக், இலவசமாக கொஞ்சம் காராசேவு, மிக்ஸர் இதற்கே அன்று ஆழ்வார்கள் போல..

இந்திரலோகமாளும் அப்பதவியே வேண்டாம் என்ற பரமானந்த நிலையை அடைந்தவர்கள் பலர்! வெடி கேக் என்னும் ரஜினிக்கு பால் பன் என்கிற கமல் தான் அப்ப மார்க்கெட் போட்டியாளர்! இது கெட்டின்னா, அது சாஃப்ட், இது அளவான இனிப்பு, அது அதிக இனிப்பு ஆனா வெடி கேக் சும்மா அப்படியே கையில் எடுத்து சாப்பிடலாம் பால் பன்னில் ஜீரா ஒழுகும் கை பிசுபிசுக்கும் ஆனா..

இந்த ரெண்டுக்கும் ரசிகர்கள் ஏராளம்! குமரி, நெல்லை, ராம்நாட், மதுரை, திருச்சி, சேலம், கோவை, தஞ்சை, வேலூர்னு ஒவ்வொரு ஊரு உணவுக்கும் பெரிய இதிகாசமே எழுதலாம்! ஒரு பாமர விறகு வெட்டி பெரும்புலவர் ஹேமநாதரையே பாட்டுப் போட்டியில் தோற்கடி��்சது போல, தமிழ்நாட்டு டீக்கடை உணவுகளே போதும் உலகின் எந்தப் பலகாரத்தோடும் போட்டியிட்டு வென்றுவிடும்!

[venkatesharumugam]

#என்_அம்மாவும்_அசைவமும்

“த(ன)ம் பிரியாணி”

என் அம்மாவின் கை வெல்லம்.! மொட்டை ரசம் வைத்தாலும்.. ஒரு ஆம்லேட் போட்டாலும்.. பழைய சாதத்திற்கு தொட்டுக் கொள்ள பச்சை மிளகாய், சின்ன வெங்காயம், நல்லெண்ணெய் ஊற்றி பொன்னிறமாய் வதக்கி.. புளி & கொஞ்சமாய் இஞ்சி பூண்டு சேர்த்து அம்மியில் அரைத்துத் தரும் துவையல் என்றாலும் அது தேவாதி தேவ அமிர்தம்.! வாரா வாரம் ஆரவாரம் என்று என் 12 வயது வரை வீட்டில் 4 முறை அசைவம் சமைக்கும் வழக்கம்..! 13 வயதிற்கு பின்பு வந்த வறுமையால் வழக்கொழிந்து போனது.!

தயிர் சாதத்திற்கே நெய்யூற்றி சாப்பிட்ட காலங்கள் கனவாகி தினமும் சாப்பிட்ட இட்லி தோசையையே இனி ஆண்டுக்கு ஒரு முறை உனக்கு தீபாவளிக்கு மட்டுமே என்னும் டிமானிடைசேஷனை கொண்டு வந்தான் இறைவன் எனும் மோடி.! வறுமையில் இருந்து தப்பிக்கலாம் என்று 5 ஆண்டுகள் பொறுத்திருந்த பின்னும்.. அவ்வளவு சீக்கிரம் உங்களை விடமாட்டேன் என்று கூறி அடுத்த 5 ஆண்டுகளுக்கும் எங்கள் பின் தொடர்ந்தான்.! ஆனால் பண்டிகைகளில் அம்மா சமைக்கும் சமையல் அற்புதமானது! எல்லாருக்கும் தங்கள் அம்மாவின் சமையல் பிடிக்கும்!

நான் ஏற்கனவே பல பதிவுகளில் சொன்னது போல என் கண்களைக் கட்டி விட்டாலும் என் அம்மா போடும் ஆம்லேட்டை 30000% மிகச் சரியாக ருசி பார்த்து கணிப்பேன்..! ஆம்லேட் யார் போட்டாலும் ஒரே சுவையே.! ஆனால் அதிலும் அம்மாவின் கைப்பக்குவம் பிரமாதமானது.. முருங்கைக்காய் உள்ளே உள்ள ஜெல்லியையும் கறி வேப்பிலையையும் கலந்து அம்மா செய்யும் ஈரல் பிரட்டல் ஒரு அலாதியான டிஷ்.. இட்லியுடன் சாப்பிட்டால் நிச்சயம் 20 இட்லிக்கு குறைந்து ஒருவர் சாப்பிடவே முடியாது.! அதே போல தோசை..!

கறிக்குழம்பை கொஞ்சம் தண்ணீராகத்தான் அம்மா வைப்பார்.. கறி நல்லா வேகும்டா மகனே.. என எனக்கு சமையல் குறிப்பும் தந்தவர் அவரே.. வெள்ளை சோயா பீன்ஸ், கொஞ்சம் உருளைக் கிழங்கு பிறகு கறி என அம்மா வைக்கும் கறிக்குழம்பு.. தன் மேலே கம்யூனிஸ்ட் சிவப்பில் எண்ணெய் மிதக்க தோசைக்கு தொட்டுக் கொள்ள அவ்வளவு பிரமாதமாய் இருக்கும்.. அதிலும் அம்மா சின்ன வெங்காயத்தை வதங்கி போட்டுத்தரும் முட்டை ஆணியன் தோசை இருக்கிறதே அதெல்லாம் 7ஸ்டார் ஹோட்டல் லெவல்.!

தண்ணீராக வைக்கும் குழம்பை மறுநாளைக்கு சுண்ட வைத்தால் கெட்டியான குழம்பு கிடைக்கும் என்னும் அறிவியலை எனக்கு சொல்லித்தந்தவளும் அம்மா தான்.. முட்டைகளைத் தனியாக வேக வைத்து அரை வேக்காட்டில் எடுத்து அப்படியே குழம்பு கொதித்து இறக்கும் போது போட்டுவிடும் பக்குவத்தை சொல்லித்தந்ததும் என் அம்மா தான்.! சில நேரங்களில் குழம்பிலேயே முட்டையை உடைத்து ஊற்றி லேயர் லேயராக கறிக்குழம்பில் ஊறிய முட்டைகளே மட்டன் போல ஆகவைத்து கொடுக்கும் பக்குவம் அம்மாவின் தனிச்சிறப்பு.!

அதே போல குடல் குழம்பு என்றால் கடலை பருப்பு, தேங்காய், வாழைத்தண்டு போட்டு அம்மா வைக்கும் குடல் குழம்பிற்கு திருவிளையாடலின் ஹேமநாதபாகவதர் இருந்திருந்தால் பாட்டுக்கு போட்டியிடாமல் இந்த போட்டியை உண்டுவிட்டு.. சிவபெருமான் வருவதற்கு முன்பே நான் பாண்டிய நாட்டுக்கு அடிமை என சாசனம் எழுதிக் கொடுத்து விட்டு நாட்டை விட்டே ஓடியிருப்பார்.! அம்மாவிற்கு வெகுநாளாக கைவராதது பிரியாணி மட்டுமே.! ஒன்று குழைந்த தக்காளி சாதம் போல இருக்கும் அல்லது விறைத்த..

புளிச்சோறு போல இருக்கும்.! சேலத்தில் இருந்து மதுரை வந்த பின்பு ஒருமுறை வீட்டு வாசலில் சில பாய்மார்கள் நின்றிருந்தனர்.! என்னடா இது நம்ம வீட்டுக்கு இவங்க என்னும் கேள்வியோடு யாரு பாய் நீங்க எனக் கேட்டேன்.. தனம் (அம்மாவின் பெயர்) அம்மா இருக்காங்களா தம்பி என்றார்கள்.. என்னங்க விஷயம் என்றேன்.. இல்ல நாளைக்கு ரம்ஜான்.. 50 பேருக்கு பிரியாணி செய்யணும் அதான் அம்மாவை பார்க்க வந்தோம் என்றார்கள்.! எனக்கு வியப்போ வியப்பு நம்ம அம்மாவுக்கு பிரியாணியா.? பாய் அட்ரஸ் மாறி வந்துட்டிங்களான்னு..

கேட்கப் போகும் போது அடுத்தத் தெருவில் இருந்து அம்மாவின் சி��ேகிதியான பூமா அக்கா வந்தாங்க.. எலேய் தம்பி நீ உள்ளாற போ அவங்க கரெக்டா தான் வந்திருக்காங்கன்னு சொல்லிட்டு.. வியாபார டீல் பேசி அட்வான்ஸ் வாங்கிட்டு அவங்களை அனுப்பிட்டு.. எலேய் உங்கம்மா அம்புட்டு அருமையா பிரியாணி சமைக்கும் தெரியுமான்னு எனக்கு அதுவரை தெரியாத தகவலை சொல்ல.. எப்படிக்கா என்றேன் அம்மா இந்த ஊரில் முஸ்லிம் பெண்களுடன் பழகி அந்த சமையல் சூட்சுமத்தை பழகிக் கொண்டார்னு அன்னிக்கு தான் தெரிஞ்சது.!

அப்போ ஏன் அதை எங்களுக்கு சொல்லவில்லை?? இட்லி தோசை கறிக்குழம்பே வருடத்திற்கு ஒரு முறை தீபாவளிக்கு கிடைக்கும் வறுமை சூழ் குடும்பத்தில் அடிக்கடி மட்டன் பிரியாணியை கொண்டு வந்து கொடுத்து பிள்ளைகளின் ஆசையை வளர்த்த வேண்டாம் என்று அம்மா எடுத்த முடிவே தனக்கு பிரியாணி அற்புதமாக செய்யத் தெரியும் என்பதை மறைத்ததற்கான காரணம் என்று தெரிந்து கொண்டேன்.! பிறகு வசதிகள் வந்ததும் அம்மாவை பிரியாணி செய்யச் சொல்லி அதன் செய்முறையை கேட்டறிந்து கொண்டேன்!

இன்றும் ரம்ஜான் பிரியாணி என்றால் அம்மாவின் நினைவும் அவர் தேர்ந்தெடுக்கும் இளசான ஆட்டுக்கறியின் பாகங்களும்.. கொழுப்பு& எலும்போடு சுரைக்காய், அவரைக்காய், மாங்காய் போட்ட பருப்பு தால்ஸாவும், வாயில் கரையும் பதத்தில் மெலிசாக நறுக்கி புளிப்பில்லாத தயிரில் ஊற வைத்த வெங்காயமும், மொச்சை, கத்திரி போட்டு செய்த புளித��� தொக்கும், கேரட் வெள்ளரி தயிர் பச்சடியும், புதினா துவையலும், பொரித்த நாட்டுக் கோழியும் என் கண் முன்.. சாரி வாய்முன் வந்து போகும்.!

அம்மா செய்யும் பிரியாணிக்கு என்றும் என் வந்“தனம்”

[venkatesharumugam]

🍔 #பாண்டிய_பர்கர் 🍔

🍔 பர்கர் என்பது பாண்டியநாட்டு உணவு என்பது உங்களுக்குத் தெரியுமா! வியப்பாக இருக்கிறதல்வா! ஆம் அந்த அரிய உண்மையை அறிந்து கொள்வோம் வாருங்கள்…🍔

🍔 தலையானங்கானத்துப் போரில் பாண்டிய நெடுஞ்செழியன் வென்ற காலத்தில் மதுரையில் பேச்சியப்பன், இருளப்பன் எனும் 2 சகோதரர்கள் வாழ்ந்து வந்தனர். இவர்கள் அந்த காலத்திலேயே ரொட்டி சுட்டு விற்றுக் கொண்டிருந்தார்கள் என்று பைந்தமிழ்ப் புலவர் பழங்காநத்தர் வைகையாற்று படையில் குறிப்பிடுகிறார்.

🍔 இதுதான் அந்தப் பாடல்👇���

முளிதயிர் பிசைந்த இருளன் மென்விரல்

செழுவுறு மாவினில் வெல்லமும் குழைத்தே

குவளையுள் இட்டே குய்ப்புகை அடுப்பினுள்

தீயினை எழுப்பியே சுட்டதை எடுத்து

இனிதென அதனினை நுண்ணிதின்

மகிழ்ந்தே உண்ணுதல் பன்னே. 🍔

🍔 இப்பாடலில் வரும் ‘பன்’ என்னும் வார்த்தை இருளப்பன், பேச்சியப்பன் ஆகிய இருவரின் பெயரில் கடைசி 2 எழுத்தில் இருந்து வந்திருக்கலாம் என்று இங்கிலாந்து நாட்டு வரலாற்று ஆய்வாளர் வில்லியம் என்ஃபீல்டு வியப்போடு குறிப்பிடுகிறார்.

🍔 இவர்கள் வாழ்ந்து வந்த பகுதி தான் இப்போதும் மதுரையில் ரொட்டிக்கார சந்து என்றழைக்கப்படுகிறது. இந்தத் தெரு தெற்கு வடம் போக்கித் தெருவில் இருக்கிறது. மேலும் அன்றைய பாண்டிய நாட்டிற்கு வாணிபம் செய்ய வெளிநாட்டினர் அதிகம் வந்தனர்.

🍔 அவர்களுக்கு ஜெட்லாக் பிரச்சனை வரும் என்பதால் தான் மதுரையில் இரவு அங்காடிகள் திறக்கப்பட்டு வாணிபம் நடந்தது! அன்றே பேச்சியப்பன் பகல் நேரத்தில் நாளங்காடியில் ரொட்டி விற்றதாகவும் இரவு அல்லங்காடியில் இருளப்பன் ரொட்டி விற்றதாகவும் இவர்கள் கடையில் அக்கவுண்ட் வைத்திருந்து சாப்பிட்ட இத்தாலி நாட்டு யாத்ரீகர் டி டொமாஸோ கூறுகிறார்.

🍔 வெளிநாட்டு பயணியரை கவர இந்தச் சகோதரர்கள் இரண்டு ரொட்டிகளுக்கு நடுவில் வெண்ணெய், சுட்ட ஆட்டிறைச்சி, கோழிக்கறி, முட்டை & காய்கறிகளை வெட்டி வைத்து தருவார்களாம். இதன் ருசிக்காக கூட்டம் அலை மோதுமாம்.

🍔 அன்றைக்கு திருப்புவனம் செல்லும் வழியில் பருகர் என்ற ஊரில் வளர்க்கப்படும் ஆடு, கோழிகளை மட்டும் தான் இவர்கள் வாங்குவார்களாம். அந்த இறைச்சியே ரொட்டிகளுக்கு நடுவில் வைக்கப்பட்டது. இதை பருகர் ரொட்டி, பருகர் ரொட்டி என்று அன்றே பாண்டிய மக்கள் அன்போடு அழைத்து வந்தனராம்.

🍔 கோவலன் மதுரைக்கு சிலம்பினை விற்க வந்த போது கூட சந்தையில் இந்த பருகர் ரொட்டியை சாப்பிட்டு பசியாறிய பின்பே ப��ற்கொல்லனை பார்த்த விஷயத்தை இளங்கோவடிகள் எழுத மறந்தது ஆச்சரியம் தான் என்கிறார் கொல்கொத்தாவை சேர்ந்த மூத்த வரலாற்று ஆய்வாளரான டாக்டர் முன்ஷிராம் பிட்டர்ஜி.

🍔 இந்த பேச்சியப்பன் & இருளப்பன் சகோதரர்களின் வம்சத்தில் வந்தவர் தான் வந்தி எனும் பிட்டு விற்கும் பெண்! ஆம் பின்னாளில் இந்த வந்திக்காக வந்து தான் பிட்டுக்கு மண் சுமந்து பிரம்படி பட்டார் ஈசன்! பர்கர் பாண்டிய நாட்டின் உணவு என்னும் உண்மை இன்று இணையதளத்தில் வைரலாகி பரபரப்பாக பேசப்பட்டு வருகிறது 🍔

[venkatesharumugam]

#கோமியத்_தங்கம்

கோமாதாவின் கோமியத்திலிருந்து தங்கம் தயாரிக்கலாம் எனும் வேத காலத்து உண்மையை தற்போது ஹரித்துவார் நகரில் கண்டறிந்துள்ளனர்! உங்களுக்கே இதை நம்ப முடியாமல் இருக்கலாம் ஆனால் இதுவே நெய்யாகும்.. மன்னிக்க மெய்யாகும்!

மஹாலக்ஷ்மி பசுவின் பின்னால் வாழ்கிறாள் என்பது நம் வேத ஆன்றோர்களின் வாக்கு. பசுவின் பின்னால் தான் இந்த கோமியம் வெளியேறுகிறது எனும் அரிய அறிவியல் உண்மையை அன்றே கணித்த நம் முன்னோர்களின் அறிவுக் கூர்மையை எண்ணிப் பாருங்கள்!

வியப்பாக இருக்கிறது அல்வா! மேலும் கோமியத்தின் நிறமும் மஞ்சள், தங்கத்தின் நிறமும் மஞ்சள், எனும் இன்னொரு அரிய அறிவியல் உண்மையையும் உங்களுக்கு நினைவூட்ட இங்கே நான் கடமைப்பட்டுள்ளேன்! இது எப்படிங்க சாத்தியம் என்கிறீர்களா?!

சரி அறிவியல் முறைப்படியே வருவோம்! தங்கத்தின் கெமிக்கல் ஃபார்முலா Au என்றழைக்கப்படுகிறது! ஏன் Au? அதன் விளக்கம் என்ன? A என்றால் ‘ ஆ’ இதற்கு தமிழில் அர்த்தம் பசு! U என்றால் Urine கோமியம் எனும் அர்த்தம் வருகிறதல்வா! இந்த உயரிய..

கண்டுபிடிப்பைத் தான் கடந்த 1000 ஆண்டுகளாக ஆராய்ச்சி செய்தும் பதிலில்லாமல் நாஸா பல்வேறு நிலைகளில் அதிசியத்தும் அரண்டும் நிற்கிறது. அமெரிக்கா விண்வெளியில் ராக்கெட் ஏவிய போது கூட ஒரு பசுவை அனுப்ப திட்டமிட்டதும் இதனால் தான்!

மேலும் கோமாதாவின் சாணம் விண்ணின் ஓஸோன் ஓட்டைகளை முற்றிலுமட அடைக்கும்! அதனால் தான் அது ‘கோ’பர் கேஸ் என்று அழைக்கப்படுகிறது ரிக் வேதத்தில் எழுதப்பட்டுள்ளதை படித்த ‘விஞ்சாணிகள்’ பேரதிர்ச்சிக்கு உள்ளாகி உடனே துறவறம் பூண்டு..

ரிஷிகேஷில் செட்டிலாகி உள்ள உண்மை இப்போது உலகிற்கே தெரிய வருகிறது! இதனால் ஜெர்மனியும், பிரிட்டனும் அஞ்சியுள்ளன, ரஷ்யா வெலவெலத்து போயுள்ளது! சீனா நம்மை சீண்ட யோசிக்கிறது ஃபிரான்ஸ் நம் காலில் கிடக்கிறது! இதற்கெல்லாம் காரணம் யார்??

பல கோடி ஆண்டுகளுக்கு முன்பே வேதங்களால் பல அற்புதங்களை, அதிசயங்களை, நம் முன்னோர்கள் நிகழ்த்திக் காட்டியுள்ளதை வேத சிரேஷ்ட ரிஷி சிஷ்ருபஷ்ருதர் குறிப்பிடுகிறார். கோமியத்தில் தங்கத்தை எப்படித் தயாரிக்க முடியும் என்பது பற்றி ஒரு குறிப்பு!

இது பாதியிலேயே நிற்கிறது! உஷை வேளையில் கோமாதாவின் மஞ்சள் நிறக் கோமியத்தை, மஞ்சள் நிற பித்தளை பாத்திரத்தில் வாங்கி அதில் ஆவாரம்பூ, அரைத்த மஞ்சள் சில காரட்டுகளை போட்டு ஊறவைத்து என ஆரம்பிக்கிறது அந்தக் குறிப்பு!

இதன் முழு குறிப்பு எங்குள்ளது எனத் தெரியவில்லை! ஆனால் லண்டனில் உள்ள வேர்ல்டு கோல்டு கார்ப்பரேஷன் இதைப் படித்துவிட்டு.. ஓ அதனால் தான் தங்கத்தை 24 காரட் 22 காரட் என்று குறிப்பிடுகிறோமோ என வியப்பின் உச்சிக்கே ஏறிவிட்டனர்!

இந்தத் தயாரிப்பு இந்திய கோமாதாக்களின் கோமியத்தில் மட்டுமே கிடைக்கும் என்பது குறிப்பிடத்தக்கது! வெகு விரைவில் இந்த சூத்திரம் கண்டறியப்படும்! கோமியத்தில் தங்கம் தயாராகும்! அன்று நம் தேசம் உலகிலேயே மஹா கோடீஸ்வர தேசமாக முன்னேறும்!

🥇ஜெய் தங்கம்மா.. கோமாதா எங்கம்மா.. தங்கமே தங்கும்மா..🌟

💚 வாட்ஸப் யுனிவர்சிட்டி சிலபஸ் ✅

[venkatesharumugam]

#சட்டைகள்

சட்டைகள் என்றால் உங்களிடம் எவ்வளவு இருக்கும்? ஒரு 300 அல்லது 500? என்னிடம் 1300 சட்டைகள் உள்ளன. அதில் எப்போதும் 100 சட்டைகளாவது புத்தம் புதிதாய் விலை அட்டை கூட எடுக்காமல் பீரோவில் தங்கிக்கிடக்கும். போன தீபாவளிக்கு ஆசையோடு வாங்கிய 30 சட்டைகளில் 20 சட்டைகள் கலையா கற்போடு என் கப்போர்டில் (அட கவித) இடம் பிடித்திருக்கின்றன.

குறைந்தது 1500 ரூபாய் விலையில் இருந்து 10 ஆயிரம் வரை சட்டைகளும், டி சர்ட்டுகளும் வாங்கிக் குவித்திருக்கிறேன். என் வீட்டில் இருக்கும் 2 டபுள் டோர் கப்போர்டுகள் நிரம்பி வழிந்து சத்யராஜ் போல ஆறடி உயர பீரோ ஒன்றும் என் சட்டைகளை தாங்கி நிற்கிறது. நிற்க! அல்லது சாய்ந்து கொள்க! இதெல்லாம் பெருமை பீத்த கலயம் போல இருக்கே பாஸ்! என்பவர்களுக்கு..

ஆமா சார் இதை பீத்தல்னு கூட நினைச்சுக்கோங்க! உங்க கண் முன் கொசுவர்த்தி சுருள் ஒண்ணை சுத்தவிடுறேன்.. அப்படியே 1985க்கு போவோமா! ஆம் வறுமை எங்கள் வீட்டில் வலது காலை எடுத்து வைத்து வசதியாக நுழைந்தது அந்த வருடத்தில் தான்! வீட்டிலுள்ள பொருட்களை விற்றே 1986 வரை ஒரு வருடம் பசியில்லாத வாழ்வு வசப்பட்டது! 86 இன் இறுதியில் அது 2 வேளையாகி 1987இல்..

ஒரு வேளையாக இளைத்தது! சாப்பிட சோற்றுக்கே வழியில்லாத வீட்டில் நல்ல ஆடைகளுக்கு ஏது வழி? இயல்பிலேயே நன்றாக ஆடைகள் உடுத்தி பழகிவிட்ட எனக்கு 3 வருடங்கள் ஒற்றைப் புதுத் துணி கூட எடுக்காதது புதுமையாக இருந்தது. சட்டைகள் உயரம் குறைந்து இடுப்புக்கு மேலேறின, அக்குளில், முதுகில் கிழிந்தன. கீழே அணியும் பேன்ட்டுகள் பசியால் குறைந்த..

என் இடுப்பு சுற்றளவால் பசலை கண்ட தலைவியின் ��டைகள் போல கழன்றன. வீட்டில் இருந்த ஒரே ஒரு பீரோவும் அரிசிப் பானை போல காலியாகி, ஒரு அசுப தினத்தில் யாரும் இல்லாத டீக்கடையில் யாருக்கு டீயாத்த இருக்குற என அந்த பீரோவையே விற்று 1வாரம் வறுமையை விரட்டினோம். 8ஆம் வகுப்பு வரை படித்த தையல் வகுப்பின் ஆசியால் கிழிந்த இடத்தில் தைத்துக் கொண்டோம்!

சில நேரம் நூல் வாங்கக்கூட காசிருக்காது! எங்கள் வீட்டின் 6 நபர்களின் துணிகளும் 1 பெரிய அட்டைப் பெட்டியில் அடங்கின! அதே அட்டைப் பெட்டியில் சில எலிகள் வந்து குடியேறின! பஞ்சம் மிகுந்த வீட்டில் சாப்பிட எதுவும் கிடைக்காத கோபத்தில் அந்தப் பெட்டியில் இருந்த ஒன்றிரண்டு நல்ல துணிகளையும் எலிகள் சாப்பிட்டு எங்களை அழவைத்தன! இப்ப கைவசம் 2 சட்டைகளே..

3 பேன்ட்டுகளில் இரண்டை எலிகள் குதறியால் அதில் ஒன்று மட்டும் மிஞ்சியது! இந்த நிலையில் 85இல் நடந்த இலங்கை கலவரத்தால் அங்கிருந்து மதுரைக்கு குடிபெயர்ந்தது எங்கள் பாண்டி சித்தப்பா குடும்பம்! சித்தப்பா இருந்தது கொழும்பில். நல்ல வசதி படைத்த சித்தப்பா மிகவும் ஜாக்கிரதையாக 20 சதவீத சொத்தை மட்டும் இழந்து மீதி 80 சதவீத சொத்துகளுடன் மதுரைக்கு வந்தார்.

அன்றைக்கு அவரிடம் இருந்த பணத்துக்கு உடனடியாக எல்லீஸ் நகரில் ஒரு சொந்த வீடு (ஹவுஸிங் போர்டு) வாங்க முடிந்தது. சித்தப்பா மதுரைக்கு வந்த பின்பு எனக்கு சித்தப்பாவின் மகனும் எனக்கு அண்ணனும் ஆகிய சேகரின் உடைகள் கிடைத்தன! சேகர் அண்ணன் என்னைவிட 4 வயது மூத்தவர். ஆகவே அவரது 10ம் நம்பர் ஆடை 8ஆம் நம்பர் அளவுள்ள எனக்கு கிடைத்தன!

ஆல்டரேஷன் செய்யக்கூட வசதியில்லை! ஏன் பணமில்லை! அண்ணன் நல்ல உயரமானவர் அவரது ஜீன்ஸ் பேண்ட்டை உள் பக்கமாக 12 இஞ்ச் அளவில் மடித்து நானே தையல் போட்டு அணிந்து கொள்வேன்! சட்டைகள் மட்டும் புதுச்சேரி முதல்வர் ரங்கசாமி போல தொள தொளப்பாக இருக்கும். அபூர்வமாக சிறிய சைஸ் ஆடைகள் (தோராயமாக அவருக்காக வாங்கியவை)

எனக்கு அப்படியே புதியதாகவே கிடைக்கும்! அந்த அளவு எனக்கு பர்ஃபெக்டாக பொருந்திப் போகும். கமல்ஹாசனைப் போலவே அன்று உணர்வேன்! 86இன் இறுதி முதல் 90 வரை என் ஆடைத் தேவைகளை தீர்த்து வைத்த பொட்டிக் எல்லீஸ் நகர் சித்தப்பா வீடு தான்! ஆண்டுக்கொரு முறை இலங்கையில் இருந்து என் அளவுக்கே சட்டைகள் தருவித்துத் தருவார் பாண்டி சித்தப்பா!

அண்ணன் படிப்பு முடித்து சென்னை சென்றதும் எனக்கு வரும் ஆடைகளின் வரத்து நின்றது. 92இல் நானே வேலைக்கு சென்ற போது எனக்கு மதுரையில் அறிமுகமான பிராண்ட் NECK FINE சட்டைகளோ, பேன்ட்டுகளோ அவர்கள் போல தையல் ��ென் இந்தியாவில் யாரும் இல்லை! இன்றைக்கும் மதுரையின் காஸ்ட்லி டைலர் அவங்க தான்! டைலர் பேரு Breeze மேலமாசி வீதி!

அன்று மாதம் 300 ரூபாய் சம்பளம் வாங்கும் போதே ஒரு சட்டை 200 ரூபாய்க்கு வாங்குவேன். எனது ஆடை ரசனை மேம்பட இந்த பிராண்ட் தான் காரணம். பின்னாளில் இவர்களிடமே மீட்டர் ₹6000க்கு துணி மட்டும் எடுத்து தைத்தால் தையல் கூலியுடன் 15 ஆயிரம் வரும். வறுமை எனக்குத் தந்த கோபம், நல்ல ஆடைகள் அணிய முடியாத ஆதங்கம், உடைகள் மீதிருந்த வெறி எல்லாம்..

என்னை ஆடைப் பைத்தியமாக ஆக்கியிருந்தன! சார் போடும் சட்டை எல்லாம் சூப்பர்.. எங்க வெங்கி துணி எடுக்குறிங்க.. எப்படி உங்களுக்கு மட்டும் இப்படி ஆடைகள் அமையுது.. யாருங்க உங்க காஸ்ட்யூமர்.. இப்படி காதில் புகழ்மொழிக் கேட்டுக் கேட்டே SJசூர்யா டெம்ப்ளேட் போல புளகாங்கிதம் அடைந்தேன்! இன்றும் மாதம் 10 சட்டையாவது என்னால் வாங்காமல் இருக்க முடியாது!

வறுமையில் நான் பட்ட கஷ்டமும், நல்ல ஆடைகள் கிடைக்காத விரக்தியும், ஏமாற்றமும் தான் இன்றைக்கு என்னை இப்படி ஆடை வேட்டையாட வைத்திருக்கிறது. ஆடைகள் உங்களுக்குத் தரும் கம்பீரமும், மதிப்பும் அந்த பிராண்ட் மீது இருக்கும் காதலும் ஒரு மனிதனுக்கு தேவைப்பட்டால் அவன் என்னைப் போல அல்ல அதை விட இரண்டு மடங்கு வாங்கிக் குவிப்பான்! சரிதானே..!

[venkatesharumugam]

#நியூயார்க்_நிமிடங்கள் {சுற்று - 1}

ராஜேஷ்குமார் நாவல் தலைப்பு போல இருக்கும் இந்த ஹேஷ் டேக் எங்கள் பயணத்திற்கு மிகப் பொருத்தமானது. 1 நாள் சுற்றுப் பயணம் என்பது கூட தவறு வெறும் 12 மணிநேரத்தில் நியூயார்க் நகரினை வலம் வந்தோம். ஒவ்வொரு நிமிடமும் இப்பயணத்தில் ஒரு மணி நேரம் போல மதிப்பு வாய்ந்தது. முதலில் லிபர்டி சிலை இருக்கும் தீவுக்கு போய் வந்தது தனிப்பதிவாக வரவிருக்கிறது.

இந்தப் பதிவில் நியூயார்க் டிரேட் சென்டர், வால் ஸ்டீரிட், டைம் ஸ்கொயர் போன்ற இடங்களை சுற்றி வந்தது பற்றி.. அமெரிக்க நாட்டில் மெட்ரோ ரெயில் வசதி மிக்க நகரங்களில் நியூயார்க் முதன்மையானது. ஆசான் சுஜாதா இதை தரையடி ரயில் என்பார். நெருக்கியடிக்கும் கூட்டத்தில் டிரெயினுக்குள் நடனம், ஜக்லிங், ஜிம்னாஸ்டிக் என விதவிதமாய் வித்தை காட்டும் கருப்பின மக்கள்.

அசோகர் நட்ட மரங்களைப் போல நடைபாதையின் இருபுறமும் வீடிழந்து படுத்து இருப்பவர்கள், பிச்சைக்காரர்கள், பிக்பாக்கெட் அடிப்பவர்கள், அசந்தால் குழுவாக வந்து வழிப்பறி செய்யும் கேங் லீடர்கள், நம்ம ஊரு டாய்லெட் கிறுக்கர்கள் போல டிரெயின் மீது ஸ்பிரே பெயிண்ட் அடித்து கிறுக்குபவர்கள் அமெரிக்க தண்ணி வண்டிகள் இப்படி கலவையான கீழ்த்தட்டு மக்களைப் பார்த்தோம்.

முதலில் நாங்கள் World Trade centreக்கு டிரெயின் ஏறினோம்! டிரெயினின் சுவர்களில் வானவில், பஞ்சவர்ணக்கிளி, கொலாஜ் போன்றவற்றில் உள்ள நிறங்களை விட அதிக நிறங்களில் கிறுக்கியிருந்தனர். ஓவியர்களின் பேலெட் போர்டு போல வண்ணங்கள் இறைந்து இருக்கும் இந்தக் கிறுக்கல்களுக்கு கிராஃபிடி என்று பெயர். எங்கள் பெட்டிக்குள் ஒரு வாலிபன்!

கருப்பினத்தவன் டிரெயின் உள்ளே கைப்பிடி கம்பிகளை பிடித்து ஜிம்னாஸ்டிக் செய்து கொண்டிருந்தான். பல பேர் அதனை கவனிக்கவே இல்லை (தினசரி பார்ப்பதால் இருக்கலாம்) நாங்கள் ஆர்வத்துடன் அதைப் பார்க்க பர்ஃபார்மென்ஸ் முடிந்ததும் அவன் அணிந்திருந்த பேஸ்பால் தொப்பியை கழற்றி அதனை பிச்சைப் பாத்திரமாக கன்வர்ட் செய்து தொப்பியேந்தி யாசித்து நின்றான்.

நண்பர் மகேஷ் 10 டாலர் நோட்டு ஒன்றையும் சசி 5 டாலர் நோட்டு ஒன்றையும் போட்டதும் அவன் முகத்தில் தமிழகத்தில் மலராத மலர் ஒன்று மலர்ந்தது. அவன் கறுத்த முகம் மகிழ்வால் சிவந்தது! தேங்யூ மேன் என்று முஷ்டியை மடக்கி குத்துவது போல உயர்த்த அதை ஃபிஸ்ட் பம்ப்பினோம். வேர்ல்டு டிரேட் செண்டர் நிலையத்தில் இறங்கிய போது சென்னை அளவு வெயிலடித்தது.

சித்திரைத் திருவிழா ஊர்வ��ம் போல மக்கள் சாரை சாரையாக சென்று கொண்டிருந்த இடம் ட்வின் டவர் எனும் இரட்டை கோபுரம் நோக்கித்தான். செவன் லெவன் என வரலாற்றின் கறுப்பு பக்கங்களில் இடம் பெற்ற அந்த இடத்தை காணத்தான் ஒட்டு மொத்தக் கூட்டமும் சென்று கொண்டிருக்க அந்த குகன்களுடன் நாங்களும் ஐவரானோம். வடிவேலு காமெடி ஒன்றில் வருமே..

துபாயா அது ஈரோடு பக்கமோ திருச்சி பக்கமோ இருக்குன்னு சொல்லுவாரே அது போல இருந்தது ட்வின் டவர் தெரு. அப்படி ஒரு சம்பவம் அங்கு நடந்ததிற்கான ஒரு அறிகுறியும் இன்றி புதிய ட்வின் டவரை மிகவும் பிரம்மாண்டமாக புதுப்பொலிவுடன் கட்டி முடித்திருந்தனர். பழைய ட்வின் டவர் இடிந்த இடத்தில் சிவப்பு நிறத்தில் டியூப் பலூன் முடிச்சு போல ஒரு நினைவுச் சின்னம்.

ட்வின் டவர் வளாகம் முழுக்க அத்தனை பாதுகாப்பு ஏற்பாடுகள், துல்லிய கேமிரா கண்காணிப்புகள், போலீஸ் ரோந்து என பெண்டகன் வளாகத்துக்கு இணையான வசதிகள் இருந்தன. 8 திசையிலும் கண்காணிப்பு கோபுரங்கள், டிவி மானிட்டர்களுடன் கண்ட்ரோல் அறைகள் அமைத்திருந்தனர். நாம் குடிக்கும் 2 சொட்டு கோக் சாலையில் சிந்தினாலும் அவர்களுக்குத் தெரியும்.

ட்வின் டவர் அருகில் புகைப்படங்கள் எடுத்துக் கொண்டோம். நாங்கள் போன சமயம் அந்த புதிய டவரின் எதிரே கட்டுமானம் நடந்து கொண்டிருந்தது. அங்கே இருந்த ஒரு மொபைல் கடையில் கோக் + பர்கர் வாங்கி சாப்பிடும் போது ஜார்ஜ் என்கிற ஒருவர் ட்வின் டவர் இடிந்த நேரத்து அனுபவங்களை சொல்லிக் கொண்டிருந்தார். (ஜார்ஜ் அங்கே பலரைக் காப்பாற்றியவர்)

டவர் இடிந்து எழுந்த தூசுக்க, சாம்பல் துகள்கள் முற்றிலும் அகல 2 மாதங்கள் ஆனது என்றார். அவர் சொன்ன சில சம்பவங்கள் திகிலூட்டுவதாக இருந்தது. கனத்த இதயத்துடன் அதை அறிந்து கொண்டு கிளம்பினோம். மீண்டும் தரையடி ரயில் இப்போது எங்கள் பயணம் உலகப் பத்திரிக்கை மற்றும் பங்கு சந்தைகளின் முக்கிய அடையாளமான நியூயார்க் வால் ஸ்டிரீட் நோக்கி..

வால் நீளும்…

[venkatesharumugam]

#நரகாசூரனின்_சாபம்

சப்பாணியின் ஆத்தா மட்டுமல்ல நரகாசூரனும் ஆசையாகப் பல ஆடுகளும், கோழிகளும் வளர்த்து வந்தான். அவன் அசுர குணம் உடையவன் என்பதால் ஆடு கோழிகளுக்கு நல்ல சண்டை பயிற்சி அளித்து அவற்றை ஒன்றுடன் ஒன்று மோதிக் கொள்ள வைப்பான்.

இப்படி அந்தக் காலத்திலேயே ஆடுகளம் கண்ட அவனுக்கு போர்க் களத்தில் வந்தது தான் பெரும் சோதனை! கிருஷ்��ர் அவனை போரில் வீழ்த்திக் கொண்டே வெற்றியை நோக்கி முன்னேற அவன் வளர்த்த ஆடுகளும் கோழிகளும் போர்க்களத்திற்கு வருகின்றன.

கிருஷ்ணரின் நேர் பின்னே அவை வந்து நிற்க நரகாசூரனுக்கு உற்சாகம் பிறந்தது! கமான் கைஸ் அட்டாக் தட் கிருஷ்ணா என கமெண்ட்ஸ் பிறப்பிக்க அதுக்கு லைக்ஸ் போடாது அவையனைத்தும் அசையாமல் நின்றன! என்னடா ஆச்சு உங்களுக்கு என அவன் கதற..

ஆடுகள் சார்பில் கிருஷ்ணரே பேசினார் ‘நரகா உன் ஆடு கோழிகள் என்னை ஒன்றும் செய்யாது ஏனெனில் நான் நல்ல மேய்ப்பன் என அவைகளுக்குத் தெரியும். இப்போது கூட அவை எல்லாம் இங்கு உனக்கு உதவ வரவில்லை! நீ தப்பித்தால் உன்னைத் தடுத்து..

தப்பிக்கவிடக் கூடாது என எனக்கு உதவவே வந்திருக்கிறது. இதோ பார் என்று சொல்லிவிட்டு ‘அட்டாக் ஆடூஸ்’ என கிருஷ்ணர் கமாண்ட ஆடுகள் அனைத்தும் வேகமாக ஓடி வந்து நரகாசூரனின் தேர் சக்கரத்தை முட்ட தேர் அப்படியே ஷேர் மார்க்கெட் போல வீழ்கிறது.

நிலை குலைந்து நிராயுதபாணியாக தரையில் விழுந்த நரகாசூரனின் கண்களை பறந்து வந்து கோழிகள் கொத்திவிட கண்களில் ரத்தம் சொட்ட நின்றான். கோழிகளால் பார்வையிழந்த நரகனை அசால்டாக போட்டுத் தள்ளினார் கிருஷ்ணரின் தோழியான சத்யபாமா.

உயிரிழக்கும் தறுவாயில் தன் இறந்தநாளை மக்கள் தீபாவளியாக கொண்டாட வேண்டும் என வரமாக கேட்டவன் தனக்கு உதவாது துரோகம் செய்த இந்த ஆடு, கோழிகளின் இனமும் அந்நாளில் வெட்டப்பட்டு அழியவேண்டும் என போனஸ் வரம் வாங்கி இறந்தான்!

“தீபாவளியன்று மட்டன் சிக்கன் சாப்பிடும் ஐதீகம் இது தான்” நமக்கு போனஸ் தரும் ஐதீகமும் இது தான்🙏🙏

[venkatesharumugam]

#கெத்து

லப்பர் பந்து படத்தை பார்த்த பின்பு முன்னாள் கிரிக்கெட் ஆட்டக் காரனான நான் இந்தப் பதிவை எழுதாமல் இருந்தால் அதை வரலாறு, புவியியல் எதுவே மதிக்காது! கிரிக்கெட் ஆட்டம் இன்று 3வது தலைமுறையாய் நமது இந்திய மக்களின் வாழ்வியலோடு எந்தளவு பின்னிப் பிணைந்துவிட்டது என்பதைப் பார்ப்போம்!

கிரிக்கெட்டில் ஒரு நாள் ஆட்டம் அறிமுகம் ஆனபோது தான் இந்த விளையாட்டு நாடெங்கும் பரவலாக அறியப்பட்டது! டிவியில் ஆட்டங்கள் ஒளிபரப்பப்பட்ட பின்பே அது கிராமங்களில் வேரூன்ற ஆரம்பித்தது! கிரிக்கெட் மோகம் 80களின் ஆரம்பத்தில் துவங்கியது! 1983இல் இந்தியா உலகக் கோப்பையை வென்றிட கபில்தேவ் எனும் முதல் தேவகுமாரன் இந்தியாவில் தோன்றினார்.

கவாஸ்கர், அமர்நாத், ஶ்ரீகாந்த், அசாருதீன் போன்ற கபில்தேவின் தளபதிகளுக்கு தனித்தனி ரசிகர்கள் பெருக சச்சின் என்னும் பாலகன் ஆடவந்தான்! அவன் கிரிக்கெட்டின் கடவுள் ஆகும் வரை விளையாடி பலப்பல சாதனைகளைப் படைத்தான். நமது இந்திய கிராமங்களில் பெரிய அளவிற்கு கிரிக்கெட்டை கொண்டு சேர்த்த பெருமை சச்சினுக்கே சேரும்! அப்போது கிராமங்களில்..

கில்லியே ஆடப்பட்டது இந்த கில்லியில் இருந்து வந்தது தான்யா கிரிக்கெட் என்னும் தற்பெருமையை பேசாத ஆட்களே அன்று இல்லை! ஆனால் மெல்ல மெல்ல அவர்களை கிரிக்கெட் பக்கம் திருப்பியது டிவி ஒளிபரப்புகள் தான்! கேட்ச், LBW, ஸ்டம்பிங், ஹிட் விக்கெட், வைடு, நோபால், பைஸ், எல்லாம் எளிய மக்களுக்கும் புரிய ஆரம்பிக்க ஆட்டம் களை கட்டியது!

கிரிக்கெட் பணக்காரர்களின் ஆட்டம் என்று சொல்லப்படும்! ஆம்! நான் ஆடிய கிரிக்கெட் அந்தச் சூழலில் தான் அமைந்தது! லீக் டிவிஷன் கிரிக்கெட் ��ன்று மாவட்டம் தோறும் இருந்தது! பேட், கேப், ஆர்ம் பேண்ட், க்ளவுஸ்கள், பேடுகள், ஸ்டம்ப், அப்டமன், தை பேடு, ஆர்ம் பேடு, உள்ளிட்ட கிரிக்கெட் உபகரணங்கள் அடங்கிய ஒரு கிட் பேக்கின் விலை 1987லேயே 10ஆயிரம் ரூபாய்!

வெள்ளை நிற ஜெர்சி தான் அப்போது, அதுவே ஒரு செட் ₹500 வரும்! அன்று 1 மாத வீட்டு வாடகையே ₹300 தான். அன்று கிரிக்கெட் பந்தின் விலை ₹50/- இதில் பால் மேட்ச் எல்லாம் நடக்கும் பந்தின் விலையான 50ஐ இரு அணியும் தலா ₹25 போட்டு வாங்குவோம். ஜெயிக்கும் அணிக்கு பந்து சொந்தம்! நிறைய பந்துகளை இழந்து கொஞ்சம் பந்துகளை வென்றோம்!

அந்தப் பந்தை ஜெயித்த பின்பு பெருமையா நெஞ்சை நிமிர்த்தி நடப்பதால் தான் ‘ பந்தா’ என்னும் வார்த்தையே வந்திருக்கலாம். இப்படி பந்துக்கே ₹50 ரூபாய் என்றால் பேட்? குறைந்தது ₹300 இருந்தால் தான் ஓரளவு நல்ல பேட் கிடைக்கும்! சைமண்ட்ஸ், SG, SS போன்ற பிராண்டுகள் ₹900விலை. இதனால் சாமானியர்கள் கிரிக்கெட் ஆட தயங்கிய போது அறிமுகமானது (ல) ரப்பர் பந்து!

கிராமங்களில் டிவி கிரிக்கெட் ஆட்டத்தை பார்க்க வைத்தது ஆனால் கிரிக்கெட்டை ஆட வைத்த பெருமை ரப்பர் பந்துக்கே! 2 ரூபாய்க்கு பந்தும் 40 ரூபாய்க்கு பேட்டும் கிடைக்க ஆரம்பமானது ரப்பர் பந்து யுகம்! விறகுகள், மரக்கிளைகள், கம்புகள் எல்லாம் ஸ்டம்புகள் ஆகின! குச்சி இல்லாத போது கற்களை ஒன்றின் மேல் ஒன்றாக அடுக்கி ஸ்டோன் ஏஜ் கால குன்று போல ஆக்கினார்கள்!

கிராமங்களின் பொட்டல்கள் மைதானங்கள் ஆகின! சில ஊர்களில் ஆடும் வீரர்களே முட்களை வெட்டி தரையை சுத்தப் படுத்தி பிட்ச் அமைத்து மைதானங்களை உருவாக்கினர்! கிராம கிரிக்கெட் களத்திற்கு சென்றால் அங்கு ஆடுபவர்களை பார்த்தால் சுவாரஸ்யமாக இருக்கும். பள்ளி மாணவர்கள் மட்டுமின்றி, கொத்தனார், வெல்டர், கார்பெண்டர்னு பலரும் ஆடுவார்கள்!

வார இறுதிகளில் ஒரே மைதானத்தில் 6 டீம்கள் ஆடும்! 6 டீம் அங்கு ஆடியும் பந்துகள் அதிகம் அடுத்த டீம் மேலே படாது என்பது உலகின் மிகப் பெரிய ஆச்சரியம்! இப்படி ரப்பர் பந்து வந்து கிரிக்கெட்டை எளிமையாக்க சச்சின் வருகை பிறகு கங்கூலி, சேவாக், யுவராஜ்சிங், தோனின்னு நட்சத்திரங்கள் உருவாக கிராமத்து கிரிக்கெட் அப்டேட் ஆகிக் கொண்டே இருந்தது!

கபடிக்கு அடுத்தபடியாக கிரிக்கெட் டோர்னமெண்டுகள் நடக்கத் துவங்கின. ரஞ்சி டிராபி, துலீப் டிராபி போல கிராமங்களின் பெயரில் டிராபிகளும் நடந்தன! சுழல் கோப்பைகள் நடந்தன! அப்போ வந்தது ஐ.பி.எல். லப்பர் பந்து படத்தில் வருவது போல அடேங்கப்பா லெவன்ஸ், சச்சின் பாய்ஸ், தோனி 11 போன்ற பெயர�� கொண்ட அணிகள் வாடிப்பட்டி வாரியர்ஸ், கீரனுர் கிங்ஸ் என்று..

தங்களை உயர்த்திக் கொண்டன! கிரிக்கெட்டால் மக்கள் ஒன்றாக விளையாட ஆரம்பித்தனர். இதிலும் சில களச் சண்டைகள், தாக்குதல்கள், சில மரணங்கள், ஊர்ப்பகைகள் உருவாகின! ஆனால் அதற்கு காரணம் கிரிக்கெட் ஆட்டம் அல்ல! வேறு முன் விரோதக் காரணங்களால் அது நிகழ்ந்ததே தவிர நிச்சயம் கிரிக்கெட் ஆட்டம் அதற்கு காரணமாக இருந்ததே இல்லை!

இந்திராகாந்தி பிரதமராக இருந்த போது 1983 உலகக்கோப்பை ஆட்டம் நடந்த நேரத்தில் இந்தியாவில் பிரச்சனைக்குரிய பகுதிகளில் கூட மக்களிடையே எந்த ஒரு அசம்பாவிதமும் இன்றி அமைதி நிலவுவதாக உளவுத் துறை அறிக்கை தந்தது! காரணம் டிவியில் கிரிக்கெட் ஆட்டங்கள்! இதனால் இந்திராகாந்தி கிரிக்கெட்டை நமது நாடெங்கும் ஊக்கப்படுத்த உத்தரவிட்டார்!

அதன் பின்னர் நடந்தது வரலாறு! 1987 உலகக் கோப்பையே இந்தியாவில் நடந்தது! பிறகு 1992இல் வெள்ளை சீருடைகள் வண்ணத்திற்கு மாற கிரிக்கெட்டும் வண்ணமயமானது! அரசியல் இருக்கும் எதுவுமே உயராது! ஆனால் அதை மீறி இங்கு கிரிக்கெட் வளர்ந்துள்ளது! ஆனால் இதிலும் பல களைகளை அகற்றியாக வேண்டும்! நிச்சயம் அது கிராமங்களில் இருந்தே உருவாகும்!

[venkatesharumugam]

#ராவணனும்_புரோட்டாவும்

புரோட்டா எனும் உணவு பாரசீகத்தில் தான் கண்டுபிடிக்கப்பட்டது என்பது தவறான தகவல்! புரோட்டா முதுபெரும் தமிழ்ப் பாட்டன் இராவணன் காலத்திலேயே சமைக்கப்பட்ட உணவாகும்! இது குறித்து இதிகாச காலத்திலேயே புரோட்டா இருந்த பல்வேறு குறிப்ப���கள் சமஸ்கிருதத்தில் தெளிவாக எழுதப்பட்டூ உள்ளது!

வேத காலத்து ரிஷியான ‘ரிஷ்ய மைதாங்கியர்’ என்பவர் தான் சமஸ்கிருதத்தில் புரோட்டா பற்றியக் குறிப்புகளை முதன்முதலில் எழுதியவர்! எனவே தான் கோதுமையில் இருந்து இவர் கண்டு பிடித்த மாவிற்கு “மைதா”எனப் பெயர் சூட்டப்பட்டது! இவ்வரலாறு தெரியாதவர்களே புரோட்டா பாரசீக உணவு என்னும் பொய்யை பரப்பி வருகின்றனர் என்பது இப்போது உங்களுக்குப் புரிகிறதா!

மைதாங்கியர் கணிப்பில் அன்று புரோட்டா மாஸ்டராக இருந்தது பாட்டன் இராவணனே என்கிறார்! இவரது சீரிய தலைமையில் இராமனோடு போரில் ஈடுபடும் இராவணனின் வீரர்களுக்கு புரோட்டா மாவு பிசையும் பயிற்சி மற்றும் புரோட்டா வீசும் பயிற்சி வழங்கப்பட்டதாம்! அந்தப் பயிற்சியால் தான் புஜபலம் பெற்றவர்கள் போரில் ஆக்ரோஷமாக சோர்வின்றி போரிட்டனராம்!

முதலில் சுக்ரீவன் உள்ளிட்ட வானரப் படைகள் சீக்கிரம் சோர்வடைய இராவணன் முன்னேறிக் கொண்டே இருந்தான். போர் முகாம்களில் திடீரென இடி இடித்தது போல டப்.. டுப்பு.. டிப்பு.. டப்புன்னு யாரையோ குத்துவது போல மாவை பிசைந்து அடிக்கும் பெரும் ஒலி கேட்கும். அதன்பின் மனதை மயக்கும் சால்னா வாசனையுடன் கல்லில் புரோட்டா வேகும் கமகமவென மணம் கிளம்புமாம்!

அந்த மணத்தில் சுக்ரீவனின் படைகளே கிறங்கிப் போகுமாம்! மனம் ஒரு குரங்கு அல்லவா! ஒரு நாள் கொரோனா வந்த கொரங்கு போல ஒரு வானரவீரன் மாஸ்க் அணிந்து கொண்டு எதிரிப்படைகளுக்கு உணவளிக்கும் இடத்திற்கு போய் கள்ளத்தனமாக புரோட்டாவை வாங்கியவன் தன் வானர குணம் மேலிட அதை பிச்சுப் போட்டு சால்னா ஊத்தி சாப்பிட்டவுடன் அதன் ருசியில் அசந்து போனான்!

ஆம்! முதன் முதலில் புரோட்டாவை பிச்சு போட்டது ஒரு வானர வீரனே! அதை ருசித்ததும் அவன் உடலில் உற்சாகமும், வீரமும் ஒருங்கே முறுக்கேறியது! இந்த உண்மையை சுக்ரீவனிடம் அவன் சொல்ல சுக்ரீவனின் புதல்வனான அங்கதன் தலைமையில் ஒரு குழு அமைக்கப்பட்டது! அதன் வேலையே சுட்ட புரோட்டாவை சுடுவது தான்! புரோட்டாவை இப்படை சென்று பிச்சிப்போட்டு வந்துவிடும்.

புரோட்டாவை பிய்த்து தின்னும் வழக்கம் இல்லாத இலங்கை படை பிச்சிப் போட்ட புரோட்டாவின் அருமை தெரியாது அதை சினத்துடன் சாப்பிட மறுத்தனர். பிறகு மாவை திரட்டி அடித்து நடுவே முட்டை ஊற்றி அதை நான்கு பக்கமும் மடித்து புரோட்டா செய்து பார்த்தனர்(இதுவே சிலோன் புரோட்டா என்பது உங்களுக்குத் தெரியும் தானே ) அதையும் பிய்த்து போட்டது வானரப்படை!

இப்படி புரோட்டா சப்ளையை தடை செய்தே இராவணனை வென்றார் இராமர்! என்பதே மெய்யாகும். அப்போது அதற்கு புரோட்டா எனப் பெயரில்லை ‘புரிய��ை’ எனக் கம்ப இராமாயணத்தில் குறிப்பிடுகிறார் கம்பர்! உண்மையில் புரோட்டா முகலாய உணவல்ல அது இதிகாச காலத்து தமிழரின் உணவு என்பதே இவ்வுலகம் அறியாத உண்மை! இந்த உண்மையை நம் சொந்தங்களுக்கு உரக்கச் சொல்லுவோம்! பொய்யான பரப்புரையை மறக்கச் சொல்லுவோம்! 💪 💪

[venkatesharumugam]

#முதல்மரியாதை

5009 கிரகங்களும் உச்சம் பெற்ற ஒருவன் அல்லது ஸ்பெஷலான இடங்களில் அதிர்ஷட மச்சம் உள்ள ஒருவன் எப்படி வேணா எடுத்துக் கோங்க இன்று விடியும் போதே தம்பி வீட்டுக் கேட்டரிங் கிச்சன் பரபரப்பாக இருந்தது. பிறந்தநாள் கொண்டாடும் ஒருவர் வீட்டிற்கு 50 பேருக்கான காலை உணவு தயாராகிக் கொண்டிருந்தது.

தம்பி வீட்டில் 100 பேருக்கு சமைக்கும் அளவு வசதி உண்டு. அதிகாலை எழுந்ததால் 8 மணிக்குள் குளித்து ரெடியாகிவிட்டேன். நெய் மிதக்கும் பைனாப்பிள் கேசரி, தளதளப்பாக கொதிக்கும் பால் முந்திரி வெண�� பொங்கல், சூடான இட்லி, மொறு மொறு உளுந்து வடை, மினி பூரிக் கிழங்கு, கோசுமல்லி, 2 வகை சட்னி இது மெனு.

சம்பிரதாயத்திற்கு ஒரு ஸ்பூன் கேசரி எடுத்து வாயில் வைத்தால் அது இந்தியப் பொருளாதாரம் போல வேகமாக சரிந்து வயிற்றுக்குள் சென்றது. சூடான இட்லியும் கோசு மல்லியும் தேங்காய் சட்னியும் மற்றுமொரு அட்டகாசம். ரெண்டு இட்லி சாப்பிடலாம்னு தான் உட்கார்ந்தேன் ஆனா 5 இட்லி சாப்பிட்ட பின்பே ஆசை அடங்கியது.

தோட்டக்கா��னோட நிறுத்திக்கலாம்னு பார்த்தான்னு வடிவேலு காமெடி வருமே அது போல! மதுரை ஆரியபவன் பாரம்பரியத்தில் வந்த சமையல் குடும்பம் என்பதால் 1990களில் புகழ் பெற்ற பால் பொங்கல் நாவில் நாஸ்டால்ஜியாவை காட்டியது. கொதிக்கிற பொங்கலில், சாம்பாரில் குதிக்கிற வடையை போட்டு ஊறவிட்டு..

பொங்கல் + சாம்பார் வடை காம்போவில் சாப்பிட பூர்வ ஜென்மம் மட்டுமல்ல பூரா ஜென்மத்திலும் புண்ணியம் செய்திருக்க வேண்டும். மினிபூரிக்கு லெஃப்டில் இண்டிகேட்டர் போட மனசு நினைத்தாலும் நாக்கு ரைட்டில் திரும்பி அதிலும் இரண்டை ருசிக்கவைத்தது. அற்புதமான ஒரு ஃபில்டர் காபி ஃபினிஷிங் டச்சாக இருந்தது.

இதைத்தான் மச்சம் உச்சம்னு சொன்னியான்னு? மீடியாக்கள் மழை நிலவரத்தைப் பற்றி பரப்பும் செய்தி போல அவசரப்படாதிங்க! இனிமே தான் ஆரம்பம். மதுரையில் இருந்து அத்தை (தம்பியின் மாமியார்) கரெக்டா 10 மணிக்கு வந்தாங்க. இன்று விடியகாலமே மதுரை கரிமேடு மீன் மார்க்கெட் போயி வாங்கிட்டேன்யா என்றார்.

மனோ கர்வாட் வந்திருக்கு என்பார்களே அதுபோல அவர் கொண்டு வந்த பாத்திரத்தை திறந்தார் வாவ் ..! என் கண்கள் மாஸ்க் பட ஜிம் கேரியின் கண்கள் போல விரிந்து துள்ளி விழுந்தது! தூக்கு வாளியில் மங்களாரமாய் மஞ்சள் பூசியது போன்ற கெழுத்தி மீன்கள்! மஞ்ச கெழுத்தின்னு சொல்லுவாங்க அடிவயிறு மஞ்சளில் இருக்கும்.

இப்படி சொன்னா உங்களுக்குத் தெரியாது. முதல் மரியாதை பட மீன் என்று சொன்னா தெரியும் 100% குழம்புக்காகவே பிறப்பெடுத்து வந்த ஆற்று மீன். இன்னொரு பெரிய தூக்கு வாளியில் விரால் மீன்கள் மதுரையில் இருந்து சேலம் வந்தாலும் என்னை தலையை வெட்டினா தாண்டா சாவேன் என்று உயிருடன் துள்ளியது. என் மனமும் தான்!

குழம்புக்கு கெழுத்தின்னா, பொரிக்க விரால் மீன் இது இரண்டும் ஒரே நேரத்தில் கிடைப்பது என்பது பீகாரில் இடியாத மேம்பாலங்களைப் பார்ப்பது போல ஆ’பூர்வமானது! சம்பவம் இதோடு முடியவில்லை.. அத்தை ரெண்டு செக்கானூரணி நாட்டுச் சேவல்களையும் உயிரோடு கொண்டு வந்திருந்தார். குட்டியாடு ஏதும் கொண்டுவரலிங்களா..

என்று கேட்டிருப்பேன். ஆனா சபை நாகரீகம் கருதி அத்தையிடம் அப்படிக் கேட்கவில்லை. இப்போ திட்டம் என்னான்னா கெழுத்தி மீனில் அரைச்சுவிட்ட மீன்குழம்பு வச்சிட்டு, நல்லெண்ணெய் ஊத்தி நாட்டுக்கோழி (சேவல்) மிளகுக் குழம்பும் வச்சிடணும், பிறவு பிச்சி போட்ட கோழி ஃப்ரை, அவித்த முட்டை தக்காளிரசம் இதான் மெனு!

மதிய உணவுக்கு சோறு, சிக்கன் குழம்பு, பிச்சு போட்டது, முட்டை, ரசம் மட்டும் சாப்பிட்டுக்கலாம். தேவைக்கு வேணுமுன்னா ஐந்தாறு விராலை பொரிச்சுக்கலாம். இன்று இரவு மீன் குழம்பு இட்லி, மறுநாள் காலை மீன் குழம்பு தோசை மதியம் சோறு மீன் குழம்புன்னு பிளான்! இப்போ சொல்லுங்க மச்சம் உச்சம் எல்லாம் சரி தானே..

🍖🍗புரட்டாசி முடிந்த மறுநாளே புரட்சி செய்த புரட்சிவீரனே உமக்கு என்றும் எங்கள் முதல் மரியாதை உண்டு 🍖🍗