venkatesharumugam

[venkatesharumugam]

13. புள்ளின்வாய் கீண்டானை...

#மார்கழியின்_மறை

திருப்பாவையை எல்லாரும் விரும்பக் காரணம் இதில் தான் இராமாயணம் மகாபாரதம் இரண்டையும் ஒன்றாகப் படிக்கலாம். இ��்பாசுரத்தின் முதல் வரியில் கிருஷ்ண அவதாரத்தில் கொக்கின் வடிவில் வந்த பகாசூரனின் அலகைப் பிளந்ததையும் அடுத்த வரியில் ராம அவதாரத்தில் இராவணனின் பத்துத் தலைகளைக் கிள்ளி எறிந்ததையும் பாடுகின்றார் ஆண்டாள்.

அவதாரங்கள் வேறாகினும் அவர் வீரம் எப்போதும் மாறாது! அத்தகைய வீரம் மிகுந்தவரின் புகழ் பாட எல்லாப் பெண்களும் முன்பே சென்றுவிட்டனர். பார் வானில் வெள்ளி முளைத்து வியாழன் உறங்கிவிட்டது. நீயும் அந்த வியாழன் போல உறங்குகிறாயா அல்லது கள்ளத்தனமாக உறங்குவது போல நடிக்கிறாயா?

பார்! இந்த அதிகாலையில் பறவைகள் கூட எழுந்து சப்தமிடுகின்றன தாமரை மீது வண்டமர்ந்தது போல கண்ணுள்ள பெண்ணே நீ இன்னுமா உறங்குகிறாய்? உன் உறக்கத்திலிருந்து எழுந்து வந்து எங்களோடு சேர்ந்து குளிரக் குளிர நீராடு என்றழைக்கிறார்.

இப்பாசுரத்தில் வியத்தகு விஞ்ஞானம் உள்ளது. பூமி மட்டுமின்றி பிற கோள்களின் உதய அஸ்தமன நேரங்களையும் இன்றைய அறிவியல் முன்னேற்றத்தால் கண்டுபிடித்து இருக்கிறோம். ஆனால் 1200 ஆண்டுகளுக்கு முன்பான ஆண்டாள் காலத்தில் அவரின் வான சாஸ்திர அறிவைப் பார்த்து இன்றைய விஞ்ஞானம் வியந்து நிற்கிறது!

ஆண்டாள் “வெள்ளி எழுந்து வியாழம் உறங்கிற்று” என்கிறார் அதாவது வியாழன் கோள் உறங்கும் வேளையாம்! பூமியின் அதிகாலையே வியாழனில் இரவு என இன்றைய விஞ்ஞான வளர்ச்சியில் விஞ்ஞானிகள் கண்டறிந்து சொன்னது பெரிதல்ல!

1200ஆண்டுகளுக்கு முன்பு பெரும் அறிவியல் வளர்ச்சி இல்லாத காலத்தில் தென் தமிழகத்தில் உள்ள ஶ்ரீவில்லிப்புத்தூர் எனும் எளிய ஊரில் பெரியாழ்வார் என்னும் எளியவரின் வளர்ப்பு மகளாக வளர்ந்த ஆண்டாள் எனும் பெண் அரங்கன் பால் கொண்ட பக்தியால் தெய்வீகக் காதலால் இதை அன்றே சொன்னார் எனும் போது நமக்கு மெய் சிலிர்க்கிறது!

மார்கழி 13 ஆம் நாள் பாடல்...

புள்ளின்வாய் கீண்டானைப் பொல்லா அரக்கனைக்

கிள்ளிக் களைந்தானைக் கீர்த்திமை பாடிப்போய்

பிள்ளைகள் எல்லாரும் பாவைக் களம்புக்கார்

வெள்ளி எழுந்து வியாழம் உறங்கிற்று

புள்ளும் சிலம்பினகாண் போதரிக் கண்ணினாய்

குள்ளக் குளிரக் குடைந்துநீ ராடாதே

பள்ளிக் கிடத்தியோ பாவாய்நீ நன்நாளால்

கள்ளம் தவிர்ந்து கலந்தேலோர் எம்பாவாய்.

[venkatesharumugam]

12. கனைத்து இளம்..

#மார்கழியின்_மறை

நினைத்தவுடன் நடந்துடும்னு எதிர்பார்க்காதே! நினைச்சா மட்டும் அது நடந்துடுமா! உட்கார்ந்து நினைச்சிகிட்டே இருந்தா செய்யறது யாரு? இவையெல்லாம் ஒரு செயலைச் செய்யாமல் நினைத்துக் கொண்டிருப்பவர்களை பார்த்து நாம் கேட்பது! ஆனால் தாய்ப்பாசம் அப்படியல்ல! மனதால் நினைத்தாலே போதும்.அதனால் ஏற்படும் விளைவுகள் தன்னால் நடக்கும்! அது மனிதனோ விலங்கோ அனைவருக்கும் பொதுவானது என்கிறார் நமது நாச்சியார்.

மருத்துவமனைகளின் பிரசவ வார்டில் நள்ளிரவில் அன்று தான் குழந்தையை பிரசவித்த அலுப்பால் அயர்ந்து உறங்கும் தாய் அங்கிருக்கும் அத்தனை குழந்தைகளில் தன் குழந்தையில் குரல் கேட்டால் மட்டும் சட்டென உறக்கம் கலைந்து எழுவார். இது இயற்கை நமக்களித்த வரம்! இறைவன் இதை ஆறறிவு படைத்த மனித��்களுக்கு மட்டும் இன்றி விலங்குகளுக்கும் படைத்துள்ளான்.

வெளியூரில் தங்கி படிப்பவர்கள், வேலை பார்ப்பவர்கள் தங்கள் தாயை நினைக்கும் வேளையில் அவர்கள் அம்மாவிடமிருந்து அவர்களுக்கு தொலைபேசி அழைப்பு வரும்! இதுபோல பலருக்கு நடந்துள்ளது! எதையும் சாதிக்க நம்மைப் பெற்ற அம்மாவின் குரல் ஒன்று போதும்! அதுவே உலகின் ஆகப்பெரும் புத்துணர்வு சக்தியாகும். இது போல நூறு மடங்கு சக்தி தன் பிள்ளைகளின் குரல் கேட்டால் தாய்க்கு வரும் என்பதே மெய்! அதெல்லாம் சரி!

பிள்ளைகளின் குரல் கேட்டால் பாசம் பொங்கும் ஆனால் பால் பொங்குமா? பொங்கும் என்கிறார் ஆண்டாள்! இந்தப் பாசுரத்தில் தம் கன்றுகளின் குரல் கேட்ட நொடியில் எருமைகள் தாய்ப்பாசத்தில் உருகி தம் மடியில் இருந்த பாலை யாரும் கறப்பதற்கு முன் தாமாகவே சுரக்கின்றன! அப்படி சுரந்த பால் வீடெங்கும் வெள்ளமென ஆறாகப் பாய்ந்து அந்த வீடே வெண்ணிற பால் சகதியாக உள்ளது.

இவ்வளவு பால் செல்வம் மிக்க, வீட்டிலேயே பாலாறு பாயும் செல்வந்தனின் தங்கையே! மார்கழி மாதத்து அதிகாலை பனித் துகள்கள் எங்கள் தலைமீது படிந்திருக்க நாங்கள் உன் வீட்டருகே வந்து உனக்காக நிற்கின்றோம். ஒற்றைத் தலை கொண்டு பத்துத் தலை இராவணனை வதம் செய்த எங்கள் ‘தல’ ராமன் பேர் பாடுகிறோம்! வா நீயும் வந்து பாடு, எழுந்து வந்து கதவைத்திற..

உனக்கு ஏனிந்த பெரும் தூக்கம்? நீ எழவில்லை என்பது அக்கம் பக்கம் வசிக்கும் எல்லார்க்கும் தெரிந்துவிட்டது. பெருமாளைப் பாடுவதை விடவா இந்தத் தூக்கம் முக்கியம் எழுந்துவா பெண்ணே. இந்தப் பாசுரத்தில் நாம் நுகர்வது பாலின் மணத்தை மட்டுமல்ல! ஆண்டாள் கண்ணன் பால் கொண்ட காதலின் மணத்தையும் தான்! ஆம் அது கறந்த பாலைப் போல் அவ்வளவு தூய்மையானது.!

மார்கழி 12ஆம் நாள் பாடல்..

கனைத்துஇளம் கற்றெருமை கன்றுக்கு இரங்கி

நினைத்து முலைவழியே நின்றுபால் சோர

நனைத்துஇல்லம் சேறாக்கும் நற்செல்வன் தங்காய்

பனித்தலை வீழநின் வாசற் கடைபற்றிச்

சினத்தினால் தென்இலங்கைக் கோமானைச் செற்ற

மனத்துக்கு இனியானைப் பாடவும்நீ வாய்திறவாய்

இனித்தான் எழுந்திராய் ஈதென்ன பேர்உறக்கம்

அனைத்துஇல்லத் தாரும் அறிந்தேலோர் எம்பாவாய்.

[venkatesharumugam]

11. கற்றுக் கறவை...

#மார்கழியின்_மறை

சினிமாப் பாடல்களில் மின்னல் இடை, கொடியிடை, இஞ்சி இடுப்பழகி இப்படி எல்லாம் இடுப்பை பற்றி பாடல்கள் பல உண்டு! “இல்லையென்று சொல்வதுந்தன் இடை அல்லவா மின்னல் இடை அல்லவா” எனக் கவிஞர் கண்ணதாசனும்.. “இடையோ இல்லை இருந்தால் முல்லைக் கொடி போல் மெல்ல வளையும்.” என கவிஞர் வாலியும் எழுதியதற்கு இப்பாசுரமே தூண்டுகோல்.!

ஆண்டாள் இடைக்கு என்ன உவமை தருகிறார் தெரியுமா.! புற்றில் இருக்கும் பாம்பு எடுக்கும் படத்தைப் போன்ற இடை என்கிறார். பாம்பு படம் எடுக்கும் வரை அது தெரியாது எடுத்த பின்பு சரேலென விரியும்! அதாவது இருப்பதும் தெரியாது விரிவதும் தெரியும்.! புற்று அரவு அல்குல் என்கிறார் என்ன அழகான உவமை ஆன��ல் அல்குல் என்பது இடையல்ல அது பெண்ணின் பிறப்புறுப்பு எனும் வாதமும் உண்டு!

அது தான் நாகத்தின் விரித்த படம் போல இருக்கும் இன்றைய உரையாசிரியர்கள் நாகரிகம் கருதி அல்குலை இடையாக்கி விட்டார்கள் என்ற கருத்தும் இருக்கிறது! அப்படிப் பார்த்தால் தமிழில் யோனி பற்றி எழுதிய முதல் பெண்ணியவாதி ஆண்டாள் தான். எப்படியோ அவர் சொன்ன அந்த உவமை இரண்டிற்கும் மிக அழகாகப் பொருந்துகிறதே!

கன்றுகளோடு கறவைப் பசுக்களும் கூட்டமாக நிற்க பாலைக் கறந்து கொண்டிருக்கும் ஆயர் குலத்தினர் பாலைக் கறப்பதிலும் தம்மை எதிர்க்கும் பகைவர் குல வேரை அறுப்பதிலும் வல்லவர்கள் அக்குலத்தில் பிறந்த தங்கக் கொடியே.. புற்றிலிருக்கும் பாம்பின் படம் போன்ற அல்குல் உடைய மெல்லிடையாளே, மயில் போன்ற பெண்ணே உன் தோழியர் யாவரும் உன் வீட்டு வாசல் வந்து..

கார் முகில் வண்ணனின் புகழைப் பாடிக் கொண்டு இருக்கிறோம்.. எதற்கும் அசராமல் உனக்கு ஏனிந்த உறக்கம்? செல்வச் சீமான் பெற்ற செல்லப் பெண்ணே நீ அசையாமல் படுத்துறங்கும் நோக்கமென்ன? எழுந்திடுவாய் என்றழைக்கிறார்.

அரவமின்றி (சப்தம்) உறங்கும் பெண்ணிற்கு அந்த அரவம் விரிக்கும் படத்தையே உவமையாகச் சொன்ன ஆண்டாளின் பாசுரம் ப��்தி இலக்கியத்தின் மகுடி! இதற்கு மயங்காத பாம்புகள் ஏது.!

மார்கழி 11ஆம் நாள் பாடல்..

கற்றுக் கறவைக் கணங்கள் பலகறந்து

செற்றார் திறலழியச் சென்று செருச்செய்யும்

குற்றம்ஒன் றில்லாத கோவலர்த்தம் பொற்கொடியே

புற்றுஅரவு அல்குல் புனமயிலே போதராய்

சுற்றத்து தோழிமார் எல்லாரும் வந்துநின்

முற்றம் புகுந்து முகில்வண்ணன் பேர்பாட

சிற்றாதே பேசாதே செல்வபெண் டாட்டிநீ

எற்றுக்கு உறங்கும் பொருளேலோர் எம்பாவாய்.

[venkatesharumugam]

10. நோற்றுச் சுவர்க்கம்...

#மார்கழியின்_மறை

நாற்றம் அடிக்குது என்று மூக்கைப் பொத்திக் கொள்கிறோம். ஆனால் நாற்றம் என்றால் நல்ல மணம் என்றே அர்த்தம். துளசியை அழகுத் தமிழில் துழாய் (திருத்துழாய்) என்கிறார். துளசி வாசம் வீசும் நம் தவசியின் பெருமையைப் பாடு அவனை விரதமிருந்து துதித்தாலே போதும் உன் சொர்க்க வாழ்விற்கு நான் கேரண்டி என்கிறார் ஆண்டாள்.

சொர்க்கம் புகவேண்டும் என விரதம் இருக்கிற பெண்ணே நீ கதவைத் தான் திறக்கவில்லை ஒரு குரல் கொடுத்தாவது பதில் பேசலாமே, நறுமண துளசியை மாலையாய் அணிந்திருக்கும் நாரணன் பெருமையை ஊர் போற்றத் துதித்தால் அவர் பேரின்பத்தை நமக்கு பரிசாகத் தருவார். அதை விட்டுவிட்டு சிற்றின்பமான இந்த உறக்கம் உனக்குத் தேவையா?

அரசியல்வாதிகள் சொன்ன வாக்கினைத் தவறுவது போல, அன்று யமனிடம் வாய் தவறி வரம் கேட்டு தூக்கத்தை வரமாக பெற்றுக் கொண்டானே கும்பகர்ணன் அவனிடமிருந்து நீ தூக்கத்தை பரிசாகப் பெற்றுக் கொண்டாயா? அல்��து உனக்கும் அவனுக்கும் தான் போட்டியா? இல்லை அவன் தான் உன்னிடம் தோற்று விட்டானா.?

எல்லையற்ற உன் சோம்பலை துறந்துவிடு, வா வந்து இவ்வாசல் கதவை திறந்துவிடு.. என உறங்கிக் கிடப்பவளை கும்பகர்ணனோடு ஒப்பிடுகிறார். எனக்கென்னவோ இப்படி இனிய தமிழில் ஆண்டாள் பாடினால் கும்பகர்ணனே உறக்கம் கலைந்து எழுந்து வந்து விடுவான் என்றே தோன்றுகிறது.

மார்கழி 10 ஆம் நாள் பாடல்..

நோற்றுச் சுவர்க்கம் புகுகின்ற அம்மனாய்

மாற்றமும் தாராரோ வாசல் திறவாதார்

நாற்றத் துழாய்முடி நாராயணன் நம்மால்

போற்றப் பறைதரும் புண்ணியனால்

பண்டுஒருநாள் கூற்றத்தின் வாய்வீழ்ந்த

கும்ப கருணனும் தோற்றும் உனக்கே

பெருந்துயில்தான் தந்தானோ ஆற்ற

அனந்தல் உடையாய் அருங்கலமே

தேற்றமாய் வந்து திறவேலோர் எம்பாவாய்.

[venkatesharumugam]

9. தூமணி மாடத்து...

#மார்கழியின்_மறை

பாலுமகேந்திரா, பி.சி.ஶ்ரீராம், சந்தோஷ்சிவன், மணிகண்டன் போன்ற புகழ் பெற்ற ஒளிப்பதிவாளர்கள் படமாக்கும் காட்சிகள் கலைநயம் மிக்கதாக இருக்கும். அதற்கு முக்கியக் காரணம் காட்சிக்கேற்ற அழகான லைட்டிங்.! இயற்கையாகவோ செயற்கையாகவோ வரும் ஒளியின் மூலம் அந்தக் காட்சியை மெருகு ஏற்றுவார்கள். ஆண்டாளும் ஒரு ஒளிப்பதிவாளர் தான்.!

ஆண்டாள் இப்பாசுரத்தில் நம் கண்முன்னே அழகான காட்சியாக லைட்டிங் அமைக்கிறார் இப்படி …

காமிரா வைட் ஆங்கிளில் ஒரு வீட்டைக் காட்டுகிறது.. சுற்றிலும் அதிகாலை இருள் சூழ்ந்த வீட்டினுள் ஒரு அழகான விளக்கு மாடத்தில் அலங்காரமான விளக்குகள் எரிகின்றது. அங்கு மணிகளுடன் ��ொங்கும் வெண்ணிற திரைச் சீலைகள் லேசாக அசைகின்றன!

கண்களை உறுத்தாத விளக்குகளின் வெளிச்சத்துடன் மணம் கமழும் சாம்பிராணிப் புகை அறையெங்கும் பரவிக்கிடக்கிறது! மெல்ல காமிரா பார்வேர்டில் ஜூம் ஆகிறது. அங்கே கட்டிலில் இலவம் பஞ்சு மெத்தையில் உறங்கிக் கொண்டு இருக்கிறாள் ஒருத்தி.

அப்படியே இந்த காட்சியைக் கற்பனை செய்து பார்த்தால்.. ஆஹா ஒரு மணிரத்னம் படம் போலவோ ஷங்கர் படம் போலவோ இருக்கிறதல்லவா! ஆண்டாள் ரசனை ராணி! அவளது அழகியல் மிகுந்த பார்வை பாசுரங்களின் பல இடத்தில் பிரதிபலிக்கும்!

வார்த்தைகளிலேயே இந்தக் காட்சியை அமைத்த அவள் திறனைப் பாருங்கள் வளமான கற்பனை, ஆழ்ந்த ரசனை, கண்ணன் மேல் கொண்ட அளவிலாக் காதல் அத்தனையும் விளங்கும்.இங்கே இந்த காட்சியை நிறுத்திவிட்டு அடுத்த ஷாட் காமிராவை அப்படியே கதவிற்கு இந்தப்பக்கம் நாம் மாற்றுவோம்...

அங்கே தினமும் இந்த வீட்டிற்கு வரும் அப் பெண்ணின் தோழிகள் கதவுக்கு வெளியில் இருந்து இவளை கூப்பிட்டு எழுப்புகிறார்கள். மாமன் மகளே என்ன உறக்கம்? மணிக்கதவை திறந்துவிடு அட மாமியே நீ உன் மகளை எழுப்ப மாட்டாயா.? உன் மகள் என்ன பேசா மடந்தையா? செவித்திறன் அற்றவளா?

இல்லை மயங்கிக் கிடக்கிறாளா? யாராவது அவளை மந்திரத்தால் மயக்கிவிட்டார்களா? மாயவர்களுக்கு எல்லாம் பெரிய மாயன், மாதவன்,வைகுந்தன் என்று அவன் பல நாமங்களை சொல்லிப் பாடுவோம் அவளை சீக்கிரம் எழுப்பு.. அடடா! ஆண்டாள் இது போல கூப்பிட்டு நம்மை எழுப்பினால் அதற்காகவே தூங்கலாம் போல.

மார்கழி 9 ஆம் நாள் பாடல்.

தூமணி மாடத்து சுற்றும் விளக்கெரியத்

தூமம் கமழத் துயிலணைமேல் கண்வளரும்

மாமான் மகளே மணிக்கதவம் தாழ்திறவாய்

மாமீர் அவளை எழுப்பீரோ உன்மகள்தான்

ஊமையோ அன்றி செவிடோ அனந்தலோ

ஏமப் பெருந்துயில் மந்திரப் பட்டாளோ

மாமாயன் மாதவன் வைகுந்தன் என்றென்று

நாமன் பலவும் நவின்றேலோர் எம்பாவாய்.

[venkatesharumugam]

8. கீழ்வானம் வெள்ளென்று...

#மார்கழியின்_மறை

“வெள்ளென” வந்துருப்பா” மதுரை மாவட்ட மக்கள் பேசும் மொழியில் இன்றைக்கும் பயன்படுத்தும் வார்த்தை இது. வெள்ளென என்பது அதிகாலையை குறிக்கும் சொல்லாகும்! ஆனால் நட்டநடு சென்டர் என்ற விளிப்பது போல “காலையில் வெள்ளென வந்துரு” என்றால் காலையில் சீக்கிரமா வந்துரு என்று அர்த்தமாகும்.

இதை வட்டார வழக்குத் தமிழ் அல்லது பாமர மக்களின் தமிழ் என்று சாதாரணமாக நினைத்துவிட வேண்டாம். பைய, சிலம்புவது, வெள்ளென போன்ற சொற்கள் பாசுரங்களிலும், சிலப்பதிகாரத்திலும் உள்ளன! அதன் அர்த்தம் சிதையாமல் 1300 ஆண்டுகளுக்கு பின்னரும் ��க்கள் பேசும் வழக்கில் இந்தச் சொற்கள் உள்ளன!

உலகில் வேறெந்த மொழிக்கும் இத்தனை நெடிய மொழித் தொடர்ச்சி கிடையாது! நம் தமிழ் மொழியில் மட்டுமே இப்படி வார்த்தைகள் இன்றும் பயனில் உள்ளது. இதுவே நம் தமிழின் சிறப்பாகும். கீழ் வானம் வெள்ளென்று எனத் துவங்கும் இப்பாசுரத்தில் ஆண்டாள் ஒரு மெல்லிய அங்கத நகைச்சுவையை கலந்து துவக்குகிறார்.

“அடியேய் தூங்கு மூஞ்சிப் பெண்ணே பார் கீழ்வானம் விடிந்து புல் வெளியில் எருமைகள் பரந்து மேய்கின்றன” நன்றாகக் கவனியுங்கள் பாசுரங்களில் பல இடங்களில் பசுக்களை பற்றிப் பாடிய ஆண்டாள் இங்கு எருமையைப் பற்றி குறிப்பிடுவதன் காரணம் என்ன தெரியுமா? எருமை ஒரு சோம்பேறியான விலங்கு அசமந்தம் பிடித்தது.

மிக மெதுவாக ஒருவர் செய்யும் காரியத்துக்கு எருமையை உதாரணம் சொல்வது இன்றும் வழக்கம்! அடியே பெரிய சோம்பேறியான எருமையே அதிகாலையில் எழுந்து வந்து மேய்கிறது, நீ இன்னுமா எழவில்லை? நீ அதைவிட சோம்பேறியா? என்கிறார் கிண்டலாக! ஆண்டாள் பாசுரங்களில் அங்கதச் சுவை மெல்லிய இழை போல..

ஆங்காங்கே ஒளிந்திருக்கும்! பெண்ணே நம்மை வரச்சொல்லி அருள்பவன் கண்ணன் அவனைச் சேவிக்க பாவை நோன்பிருக்கும் இடத்திற்கு பலர் ஏற்கனவே போய்விட்டனர் சிலர் அங்கு கிளம்பி போய்க்கொண்டு இருக்கின்றனர். அவர்களை எல்லாம் தடுத்து நிறுத்தி உன் வீட்டு வாசலில் வந்து நிற்கின்றோம்.

நீ எழுந்து வா நாம் வணங்கும் கண்ணன் யார் தெரியுமா? கேசி எனும் குதிரை வடிவெடுத்த அரக்கனின் வாயைப் பிளந்தவன். முஷ்டிகன், சாணுகன் என்னும் இரு மல்லர்களை தோற்கடித்து வென்றவன்.. அவன் தேவர்களுக்கெல்லாம் தேவன். அவன் நம்மை வாவென்று அழைத்து நமக்கு ஆராய்ந்து அருள்வான் என்கிறார் ஆண்டாள்!

மார்கழி 8 ஆம் நாள் பாடல்..

கீழ்வானம் வெள்ளென்று எருமைசிறுவீடு

மேய்வான் பரந்தனகாண் மிக்குள்ளபிள்ளைகளும்

போவான் போகின்றாரை போகாமல் காத்துன்னை

கூவுவான் வந்துநின்றோம் கோது கலமுடைய

பாவாய்! எழுந்திராய் பாடிப்பறை கொண்டு

மாவாய் பிளந்தானை மல்லரை மாட்டிய

தேவாதி தேவனைச் சென்று நாம் சேவித்தால்

ஆஆ என்று ஆராய்ந்து அருளேலோர் எம்பாவாய்.

[venkatesharumugam]

7.கீசு கீசு என்று...

#மார்கழியின்_மறை

ஆறாவது பாசுரத்தில் பல்வேறு இயற்கையான சப்தங்களை வர்ணித்த ஆண்டாள் ஏழாவது பாசுரத்தில் மனிதர்களின் செயல்களால் உருவாகும் சப்தங்களை ஒரு தேர்ந்த சவுண்ட் என்ஜினியரின் இசைக் கோர்வை போல தொகுக்கிறார். ஒரு திரைப்படத்திற்கு சுவாசம் போல உயிர் தருவது RR எனப்படும் ரீ - ரெகார்டிங் தான்!

ஆண்டாள் மிக அழகாக இந்த பாசுரத்தில் எழுதியிருக்கும் ஒலிகளை நமக்கு படிக்கும் போதே கேட்கும்! மிகுந்த ரசனை படைத்தவர்களால் தான் இப்படி ஆழ்ந்து கவனித்து எழுத முடியும். அன்றே ஆஸ்கார் விருது இருந்திருந்தால் சிறந்த சவுண்ட் இஞ்சினியர் விருது பெற்ற இந்தியாவின் முதல் ‘பூக்குட்டி’ஆகியிருப்பார் கோதை பெருமாட்டி!

ஆண்டாள் பாடிய அதிகாலையே பல்வேறு ஒலிகளின் கதம்பமாக விடிகிறது! கீச் கீச்சென கரிக்குருவிகள் தங்களுக்குள் கலந்து உரையாடும் அந்த ஒலி உங்களுக்கு கேட்கவில்லையா? இதோ நறுமண மலர்கள் சூடியதால் மணம் வீசும் கூந்தல் பெற்ற ஆயர்குலப் பெண்கள் தயிரை மண் பானையில் மத்தால் கடைகிறார்கள்.

பானையில் தயிர் சுழலும் ஒலியே பெரும் இரைச்சலாக ஒலிக்கிறதே அது கேட்கவில்லையா? ஆச்சியர் தயிர் கடையும் மத்தை முன்னும் பின்னும் இழுக்கும் போது அவர்கள் உடலும் குலுங்குவதால் கலகலவென ஒலிக்கும் அவர்கள் கழுத்து காசுமாலையும் தாலிக் கொடியும் ஒன்றொடு ஒன்று உரசும் சப்தமும் கேட்கவில்லையா?

அட இவையனைத்தையும் விட மனமுருகி அந்தக் கேசவனின் புகழை நாங்கள் பெருங்குரலெடுத்து பாடி வருகிறோமே அது கூடவா உனக்கு கேட்கவில்லை? இத்தனை ஒலிகளையும் கேட்ட பின்பும் கேட்காதது போல படுத்துக் கொண்டு இருக்கின்றாயே பேய்ப் பெண்ணே? இவ்வளவு சப்தங்கள் கேட்டும் தூங்குகிறாய் என்றால்..

நீ ��ெண் பிள்ளையே அல்ல! பேய் தான் இப்படித் தூங்கும்.. நமது நாரணமூர்த்தியை போற்றிப் பாடுவதை விட உனக்கு இந்த உறக்கம் தான் பெரிதா? வா.. எழுந்து வந்து கதவைத் திற! அவனருள் என்னும் காற்று அப்போது தான் உள்ளே வரும்! உன் உள்ளும் புறமும் மலரும் என்கிறார் சப்தங்களை தொகுத்த சவுண்ட் இஞ்சினியர் ஆண்டாள்!

மார்கழி 7ஆம் நாள் பாடல்..

கீசுகீசு என்றுஎங்கும் ஆனைச்சாத் தன்கலந்து

பேசின பேச்சரவம் கேட்டிலையோ பேய்ப்பெண்ணே

காசும் பிறப்பும் கலகலப்பக் கைபேர்த்து

வாச நறும்குழல் ஆய்ச்சியர் மத்தினால்

ஓசை படுத்த தயிரரவம் கேட்டிலையோ

நாயகப் பெண்பிள்ளாய் நாராயணன் மூர்த்தி

கேசவனைப் பாடவும்நீ கேட்டே கிடத்தியோ

தேச முடையாய் திறவேலோர் எம்பாவாய்.

[venkatesharumugam]

🎵 டி.ஆர் 🎵

👂🏼🎶 காதோரம் போய் சொல்லு 🎶👂🏼

தமிழ் சினிமா பாடல்களில் உடுமலை நாராயணகவி, பட்டுக் கோட்டை, மருதகாசி, கு.மா. பாலசுப்பிரமணியன், கா.மு. ஷெரிப், கண்ணதாசன் வரிசையில் இடம் பெறக் கூடிய தகுதி பெற்றவர் டி.ராஜேந்தர்! காதல் உவமைகளில் உவமைக் கவிஞர் சுரதாவின் உயரம் வரை தொட்டுவிட்டு வந்த அபார தமிழறிவு கொண்டவர்.

திரைத் துறையில் அவர் கோலோச்சிய காலம் இளையராஜாவும் வைரமுத்துவும் இரட்டைக் குழல் துப்பாக்கிகளாக உச்சத்தில் இருந்த காலம். அந்த இரட்டைக் குழலுக்கு நடுவில் இனிய புல்லாங்கு��லாக டி. ராஜேந்தரின் பாடல் வரிகள் மிளிர்ந்தது! அன்றே ஏய் யார்றா இந்தப் பையன்னு இவரை முதலில் வியந்தது கண்ணதாசன் தான்!

ஒரு தலை ராகம் படத்தில் வாசமில்லா மலரிது பாடலில் “வைகை இல்லா மதுரை இது மீனாட்சியைத் தேடுது” இந்த வரிகளைத் தான் அட வித்யாசமா இருக்குய்யா இந்த சிந்தனை என வியந்தார் கவியரசர்! சங்கம் வைத்து தமிழ் வளர்த்த மதுரைக்கு மரியாதை செய்திட வைகைக்கரை பாடலை எழுதினார் இந்த காவிரிக் கரைக்காரர்.

டி. ராஜேந்தர் தமிழ் மீதும் தமிழிலக்கியங்கள் மீதும் அபார பற்று கொண்டவர். டி.ராஜேந்தர் காதலில் தோல்வியடைந்தவர்! அதனால் தான் அவர் உணர்வுப் பூர்வமாக பாடல் எழுதுகிறார் என்பார்கள்! அவர் காதல் கைகூடவில்லை என்றாலும் அவர் காதலித்த தமிழ் அவரை கைவிடவேயில்லை! அவரது கற்பனையில் தமிழ் பெருக்கெடுத்தது!

தமிழ் மீது அவர் கொண்ட காதல் அவர் கற்பனையில் பாடல்களாக பிறந்த போது அது சிகரம் தொட்டது! அவர் காதலித்த பெண்ணுக்கு எழுதிய பல வரிகள் அவர் பாடல்களில் வந்தது! அந்தப் பெண் வேண்டுமானால் அதை புறம் தள்ளியிருக்கலாம்! ஆனால் ஒட்டு மொத்த தமிழினமே அவரைத் தலையில் தூக்கி வைத்துக் கொண்டாடியது!

இலக்கியச் சுவை, உவமைச் சுவை, எளிய சொற்கள், வார்த்தைகளின் கட்டமைப்பு, எதுகை, அடுக்கு மொழி என அனைத்து அழகு தமிழ் சாதனங்களையும் எடுத்து டி.ஆர் பாடல்களை சீவி, சிங்காரித்து, சிறப்பித்துத் தந்ததை இனி ஒவ்வொன்றாக ரசிப்போமா..

ஒரு தலை ராகம் படத்தில் எந்தப் பாடலை விலக்குவது?! “இது குழந்தை பாடும் தாலாட்டு” பாடலுக்கு வருவோம்.. சூடான நிலா, குளிரும் சூரியன் என்று எதிர்மறை கற்பனையில் இப்பாடலை எழுதியிருப்பார் இது இரவு நேர பூபாளம், இது மேற்கில் தோன்றும் உதயம், இது நதியில்லாத ஓடம் என பல்லவியில் துவங்கி

சரணத்தில் “நடை மறந்த கால்கள் தன்னில் தடயத்தைப் பார்க்கிறேன், வடமிழந்த தேரது ஒன்றை நாள் தோறும் இழுக்கிறேன், சிறகிழந்த பறவை ஒன்றை வானத்தில் பார்க்கிறேன், உறவுறாத பெண்ணை எண்ணி நாளெல்லாம் வாழ்கிறேன்..

அவரது அபார கவித் திறனுக்கு இது ஒரு சோறு பதம்! இந்தப் பாடலின் நீட்சியாக ‘நான் ஒரு ராசியில்லா ராஜா’ பாடல் வரும்

“பாட்டிசைக்க மேடை கண்டேன் ராகங்களை காணவில்லை.. பலர் இழுக்கத் தேரானேன் ஊர்வலமே நடக்கவில்லை” இப்பாடல் முழுக்க விரக்தி தொனிக்கும். டி. ஆர் படத்தில் இது போன்ற ஒரு சோகப் பாடல் அன்றைய டிரெண்ட்! அதுவும் லெஜண்ட் TMS குரலில்!

அதே போல டி.ஆரின் குத்துப் பாடல்களில் இவரது எளிய சொற் பிரயோகம், பாடலின் ஒவ்வொரு வரிகளின் இறுதியில் வரும் எதுகை அந்தப் பாடலை எளிய மக்களையும் முணுமுணுக்க வைத்துவிடும் இதற்கு உதாரணம் “கூடையில கருவாடு” பாடல்..

“ஆயிரத்தில் நீயே ஒண்ணு, நானறிஞ்ச நல்ல பொண்ணு, மாயூரத்து காளை ஒண்ணு, பாடுதடி மயங்கி நின்னு..

ஒண்ணு, பொண்ணு, நின்னு.. இந்த சொற்கட்டு மிக எளிமையாக பாமரனுக்கும் போய் சேர்ந்தது. பின்னாளில் அட யாரோ பின்பாட்டுப் பாட, மொட்டு மொட்டு ஜாதி முல்லை, அடி என்னாடி பந்தாடும் பாப்பாக்களே, கட்டடிப்போம் கட்டடிப்போம் காலேஜுக��கு, உங்கொப்பன் மவனே, என் ஆசை மைதிலியே, தன்னந்ததனி காட்டுக்குள்ள.. எல்லாமே மாஸ்!

ஆம்! டி.ஆரின் சூப்பர் ஹிட் குத்துப் பாடல்களின் வரிசை மிக நீளமானது. அவரது இலக்கியத்தரமான கற்பனை வரிகளின் லிஸ்ட்டும் பெருசு சிலவற்றை மட்டும் பார்ப்போமா! இரயில் பயணங்களில் வரும் வசந்த காலங்கள் இசைந்து பாடுங்கள் பாடலின் சரணத்தில்..

கருவண்டு நடனம், தருகின்ற நளினம். இதயத்தில் சலனம் அம்மம்மா உன் மைவிழி குளத்தினில் தவழ்வது மீனினமோ கவி கண்டிட மனதினில் கமழ்வது தமிழ் மணமோ செம்மார்ந்த மலர்கள் அண்ணாந்து பார்க்கும் உன் காந்த விழிகள் புது ஏகாந்த ராகம் தெம்மாங்கில் பாட ஏதேதோ குயில்கள்..

என்ன ஒரு அழகிய கவிநயமான எழுத்து! இப் பாடலைப் பாடிய ஜெயச்சந்திரனை இதழ்கள் ஊறுமடி என்ற இடத்தில் இவ்வரியை நிறுத்தி இதழ்.. கள் ஊறுமடி எனப் பிரித்து பாட வைத்திருப்பார்.!

இப்படத்தில் அடயாரோ பின்பாட்டுப்பாட என்னும் டப்பாங் குத்து பாடலில் கூட..

ஓர விழியிலே சேர துடிச்சே.. நீ சேரன் வில்லிலே புருவம் அமைச்ச

தேனில் குழைச்ச வீணை ஸ்வரத்த.. நீ தேடி புடிச்சே, பேசி சிரிச்சே..

அட கைபட்டு, மெய் பட்டு, மைப் பொட்டு கலைந்தாலென்ன…

எஸ்.பி.பியின் குரல் இந்தப்பாட்டுக்கு 2 ஸ்டார்களை கூட்டியிருக்கும். அய்யா TMS அவர்கள் ராஜேந்தர் இசையில் பாடிய பாடல்களில் நூலும் இல்லை வாலும் இல்லை.. ஒரு கிளாசிக்..

நிழல் உருவில் இணைந்திருக்க.. நிஜம் வடிவில் பிரிந்திருக்க…

பூத்தால் மலரும் உதிரும்.. நெஞ்சில் பூத்தாள் உதிரவில்லை…

நிலவும் தேய்ந்து வளரும்.. அவள் நினைவோ தேய்வதில்லை…

இப்படி துவங்கிய டி.இராஜேந்தரின் கவித்திறன் மேலும் பல உச்சங்களைத் தொட்டது! அவரது அடுத்தடுத்த படங்களில் அவர் இசையமைத்த பாட்டை எல்லாம் பட்டை தீட்டிய வைரமாக தந்தார்! அவை இன்று வரை ஜொலிக்கின்��ன அதைப் பற்றி அடுத்தப் பதிவில்..

🎶 இசைக்கும் 🎶

[venkatesharumugam]

6. புள்ளும் சிலம்பின காண்..

#மார்கழியின்_மறை

பெருமாளுக்கு சங்கும் ஓர் ஆயுதம்! அவரது அடையாளம் ! நமது நாஸ்டால்ஜியா நினைவுகளில் இளம் பிராயத்தில் காலை 6 மணி, மதியம் 12 மணி, மாலை 6மணி சங்கு என குறிப்பிட்ட நேரங்களில் சங்கொலிப்பதை கேட்டு இருப்போம்! இதில் ஆலைகளில் இழுந்து எழும்பும் சங்கொலியும் உண்டு. சங்கொலி என்பது எந்த நல்லவை தொடங்கும் போதும் கெட்டவை முடியும் போதும் ஒலிக்கும் சப்தம்.!

பிறப்பு, இறப்பு, ஆலயம், போர் என வாழ்வில் சங்கொலிக்காத இடமே இல்லை. கண்ணனின் பாஞ்சஜன்யமாய் பாரதப் போரில் முழங்கியதை படித்திருப்போம்! அதோ அந்தச் சங்கு கருடனின் தலைவனானப் பெருமாள் கோவிலிலிருந்து பேரொலியாய் ஒலிக்கிறது. அது அந்த நாளின் நல்ல தொடக்கமாக அமைய ஒலிக்கிறதே அந்த சப்தம் உங்கள் காதுகளில் விழவில்லையா? எனக் கேட்டு ஆரம்பிக்கிறார்.

அந்த சங்கொலியோடு பறவைகள் சிலம்பும் சப்தமும் பேரரவமாய் ஒலிக்கிறது என்கிறார். இன்றும் மதுரைத் தமிழில் சலம்புவது என்றால் சத்தம் இடுவது என அர்த்தம். இந்த சிலம்புவது தான் சலம்புவதாக மருவியிருக்கும் என்று எண்ணுகிறேன். ஒரு விஷயத்தில் இன்றைய அரசியல்வாதிகளுக்கு ஆண்டாள் முன்னோடி அவர்களுக்கு அவங்க கட்சித் தலைவர்களின் புகழ் ஆண்டாளுக்கு கிருஷ்ணனின் ��ுகழ்!

அவன் புகழ் பாடாது அவர் வாய் ஓயாது! பறவைகள் சிலம்ப, சங்கதிரும் ஒலி கேட்டு எழுந்திருக்காத பிள்ளைகளா, உங்களுக்கு தெரியுமா? நம் கண்ணன் பூதகியிடம் பால் குடித்து கொன்றது, சகடனை காலால் நிறுத்திக்கொன்றது, பாம்பின் மேல் உறங்கியது என அவர் காலத்து மாண்பு மிகு, இதய தெய்வம் போல கிருஷ்ணரின் பெருமைகளைச் சொல்லி இறுதியில் இப்படி முடிக்கிறார்...

மனதில் நாரணனை நினைத்து முனிவர்களும் யோகிகளும் அரி என்று உச்சரிக்கும் பேரொலியைக் கேட்டால் அது நம் காது வழியே மனதிற்குள் சென்று நம்மை குளிரச் செய்யுமாம்! அதை கேட்பதற்காக வாவது எழுந்து வாருங்கள் என்கிறார்! வைணவர்கள் அதிகாலையில் அரி என உச்சரிப்பது வாழ்வில��� நலம் விளைவிக்கும் என்பார்கள்.

ஆனால் அரி என்னும் சப்தம் நம் காதுகளில் விழுந்தாலே போதும் என்கிறார் கண்ணனின் மீது காதலில் விழுந்த ஆண்டாள்.!

மார்கழி 6ம் நாள் பாடல்...

புள்ளும் சிலம்பின காண் புள்ளரையன் கோயிலில்

வெள்ளை விளிசங்கின் பேரரவம் கேட்டிலையோ?

பிள்ளாய் எழுந்திராய் பேய் முலை நஞ்சுண்டு

கள்ளச் சகடம் கலக் கழியக் காலோச்சி

வெள்ளத் தரவில் துயிலமர்ந்த வித்தினை

உள்ளத்துக் கொண்டு முனிவர்களும் யோகிகளும்

மெள்ள வெழுந்து அரியென்ற பேரரவம்

உள்ளம் புகுந்து குளிர்ந்தேலோ ரெம்பாவாய்!

[venkatesharumugam]

#வெங்கிஸ்_கிச்சன்

🔴 பியர் சிக்கன் 🔴 🍺 🍗 BEER CHICKEN 🍗 🍺

தேவையானவை : தோல் ந���க்காத சிக்கன் லெக்பீஸ் - 6, அதிக கசப்பில்லாத பியர் - 400 மிலி (எந்த பிராண்டும்), கோதுமை அல்லது மைதா - 250 கிராம், கார்ன் மாவு - 150 கிராம், பெப்பர் - 1 சிறிய ஸ்பூன், மிளகாய் தூள் - 1 சிறிய ஸ்பூன், ஓரிகானா - 1 சிறிய ஸ்பூன், முட்டை - 3, ஆயில் - சிக்கன் பொரிக்கத் தேவையான அளவு, உப்பு - தேவைக்கு.

சாஸ் செய்ய : ஆயில் - 100 மிலி, முட்டை - 1, எலுமிச்சை சாறு - அரை மூடி, சில்லி சாஸ் - 1 ஸ்பூன், தக்காளி சாஸ் - 1 ஸ்பூன், பெப்பர் - அரை ஸ்பூன், உப்பு - அரை ஸ்பூன்

செய்முறை : தோல் நீக்காத 6 சிக்கன் லெக் பீஸ்களை நன்கு கழுவி ஈரம் வடிந்ததும் ஒரு மூடியுள்ள பாட்டிலில் போட்டு 400 மிலி பியர் ஊற்றி பாட்டிலை மூடி 30 - 35 நிமிடங்கள் வைக்கவும். 35 நிமிடங்களுக்குப் பின் ஊறிய சிக்கனை எடுத்து காய்ந்த பேப்பர் நாப்கினால் நன்கு ஒற்றி எடுத்து பிறகு தோல் நீக்கவும்.

தோல் நீக்கிய சிக்கன்களை ஒரு தட்டில் ஓரமாக வைத்துவிட்டு கோதுமை, அல்லது மைதா, கார்ன் மாவுகளோடு பெப்பர், மிளகாய் தூள், ஓரிகனோ, உப்பு சேர்த்து நன்கு கலக்கவும். கலந்த மாவை இரண்டு கிண்ணங்களில் சரி பாதியாக பிரித்து ஒரு கிண்ணத்து மாவை நீர் விட்டு புட்டு போல உதிரி உதிரியாக கிளறி வைக்கவும்.

இன்னொரு கிண்ண மாவில் 3 முட்டைகளை உடைத்து ஊற்றி அதில் தேவைக்கு சிறிது நீர் சேர்த்து பஜ்ஜி மாவு போல கரைக்கவும். அடுப்பில் வாணலியில் ஆயில் விட்டு சூடாக்கவும் ஆயில் காய்ந்ததும் சிக்கனை எடுத்து தென்னை மரத்துல ஒரு குத்து.. ஏணியில ஒரு குத்து வடிவேலு காமெடி போலவே..

முட்டை மாவு பவுலில் ஒரு தோய்ப்பு, உதிரி மாவு பவுலில் ஒரு தோய்ப்பு (முட்டையில் சிக்கன் முழுவதையும் நன்கு தோய்ப்பது முக்கியம், உதிரி மாவில் ஒரு சுற்று சுற்றி பிரட்டவும்) ஆயிலில் பொரிக்கவும் எல்லா புறமும் நன்கு பொரிந்ததும் எடுக்கவும். சூப்பரான ருசியில் அட்டகாசமான பியர் சிக்கன் ரெடி!

சாஸ் செய்ய கொடுக்கப்பட்ட பொருட்கள் அனைத்தையும் ஒரு பவுலில் போட்டு ஆம்லெட்டுக்கு கலக்குவது போல அடித்து கலக்கவும். ஆம்லெட் மிக்ஸர் மிஷினில் கலக்குவது சிறப்பு .

இந்த சாஸுடன் சூடான சிக்கனை பரிமாறவும். KFC சிக்கன் எல்லாம் இதன் ருசிக்கு பக்கத்தில் கூட வரமுடியாது.

ஏன் சிக்கனில் பியர்?

சிக்கனை பியரில் ஊற வைக்கும் போது பியரில் இருக்கும் மினரல்களும் கலோரியும் இறைச்சியை மிருதுவாக்குகிறது. இறைச்சியை வேகமாக சமைக்கலாம். சரிங்க இந்த பியர் சிக்கனை பியர் சாப்பிடும் போது சைடிஷ்ஷா வச்சிக்கலாமான்னு கேட்டா அதற்கு என்னால் பதிலளிக்க இயலாது 🤪🤪

[venkatesharumugam]

5. மாயனை மன்னு...

#மார்கழியின்_மறை

பொதுவாக நமக்கு பிடித்தவர்களுக்கு ஒரு பட்டப் பெயர் வைப்பது இயல்பு. சிலநேரம் வேடிக்கையாக நாம் வைத்த அந்தப் பெயரே அவருக்கு நிலைத்துவிடும். சிலருக்கு பெரிய தலைவர்களாலும், மக்களாலும் பட்டப் பெயர் சூட்டப்பட்டு காலாகாலத்திற்கும் அந்தப் பெயரே நிலைக்கும், அவரது உண்மைப் பெயரே மறந்துவிடும்.!

உதாரணம் தந்தை பெரியார் ‘சிவாஜி’ கணேசன் என்று நடிகர் திலகத்தை அழைத்து கவுரவித்தார். அதன் பின் அவர் கணேசனாக அழைக்கப்படாமல் சிவாஜியாகவே வாழ்ந்து புகழுடம்பு எய்தினார். இப்படி வைக்கப்படும் பெயர்கள் தான் கால காலத்திற்கும் நிலைக்கும் ஆண்டாள் இந்தப் பாசுரத்தில் இதைத் தான் பாடுகிறார்...

தனது உள்ளத்தில் வைத்து பூஜிக்கும் கண்ணனுக்கு ஆண்டாள் தரும் பட்டங்களைப் பாருங்களேன் மாயக் காரன், வடமதுரைச் செல்வன், யமுனைத் துறைத் தலைவன், ஆயர்குல அணிவிளக்கு என்றெல்லாம் அவரை விளித்துவிட்டு., முத்தாய்ப்பாக ஒரு தலைவனே அசந்து வியந்து போவது போல அவனை இப்படி விளிக்கிறார்..

நீ உன் தாய் வயிற்றுக் குடலினை தூய்மை செய்த குலவிளக்கு என்று! தாமோதரனைப் பெற்றதால் அவரது தாயின் வயிறு பரிசுத்தம் அடைந்ததாம்! தகுதியில்லாத தங்கள் தலைவனைப் போற்றி, வெறும் புகழ் மொழியை மட்டும் தந்து அமைச்சர் பதவியைப் பெறும் இக்கால அரசியல்வாதிகளைப் போல் இல்லாமல்..

தன் மனமுவந்து இந்தப் பட்டங்களை எல்லாம் எந்த பிரதிபலனும் பாராது பெருமாளுக்கு சூட்டி மகிழ்கிறார் ஆண்டாள்! மாயக் கண்ணனின் நாமத்தைச் சொல்லி பரிசுத்தமான இதயத்துடன் அவரை பூத்தூவி வணங்கினாலே நாம் செய்த தீமைகள் மட்டுமின்றி, நாம் செய்யவிருக்கும் தீய எண்ணங்கள் கூட தீயிலிட்டது போல் பொசுங்கிவிடும்!

அவன் நம் பிழைகளை மன்னித்து பிழைக்க வைப்பான். அது ஒன்றே போதும் வேறென்ன வேண்டும். அவனை வேண்டுவது ஒன்றே வேண்டும் என்கிறார். இத்தனை நூற்றாண்டுகள் கடந்தும் இந்தப் பெயர்களில் தானே அனைவரும் அவனை வழிபடுகிறோம். ஆம் தூய மனதோடு ஆண்டாள் அழைத்த பெயர் ஆண்டாண்டுகள் வாழும்.!

மார்கழி 5 ஆம் நாள் பாடல்..

மாயனை மன்னு வடமதுரை மைந்தனைத்

தூய பெருநீர் யமுனைத் துறைவனை

ஆயர் குலத்தினில் தோன்றும் அணிவிளக்கைத்

தாயைக் குடல்விளக்கம் செய்த தாமோதரனைத்

தூயோமாய் வந்துநாம் தூமலர்தூ வித்தொழுது

வாயினால் பாடி மனத்தினால் சிந்திக்கப்

போய பிழையும் புகுதருவான் நின்றனவும்

தீயினில் தூசாகும் செப்பேலோர் எம்பாவாய்.

[venkatesharumugam]

4. ஆழிமழைக் கண்ணா..

#மார்கழியின்_மறை

மழை உலகிற்கு இயற்கை அளிக்கும் கொடை! ஏன் இந்த உலகமே உருவானது மழையால் தானே! அக்னி மழை, அமில மழை, தூசு மழை, இப்படிப் பல மழைகள் பல நூற்றாண்டுகளாகப் பெய்து உருவானது தானே இந்த பூமி! மழை எப்போதும் மகிழ்ச்சியைத் தரும். ஆயிரம் புயல்கள் வீசி அதன் பாதிப்புக்கு நாம் அஞ்சினாலும்..

பேரிடர் தராத மழையை விரும்பாதவர்கள் யார்? தமிழ் சினிமாக்களில் கூட மழைப் பாடல்கள் பிரசித்தம்! கதாநாயகி அறிமுகமே மழையில் நனைந்து ஆனந்தமாக துள்ளி ஆடும் பாடலாக, காதல் பாடலாக மழைப் பாடல்கள் ஏராளம். ஆனால் ஆண்டாள் எழுதிய இந்த மழைப் பாடல் அறிவியலும் ஆன்மீகமும் கலந்த தனித்துவ��் மிக்க பாடல்.

திருப்ப��வையில் மழை பற்றிய இந்த பாசுரத்தை மொழி பெயர்த்து வெளிநாட்டவரிடம் சொன்னால், மிக மிகச் சாதாரணமாக இது உலகில் அனைவருக்கும் தெரிந்த விஷயம் தானே என்பார்கள். அவர்களிடம் இது 1100 வருடங்களுக்கு முன் எழுதியது என்று சொல்லிப் பாருங்கள்.. அவர்கள் வியப்பில் உறைந்து போவார்கள்!

மழை எவ்வாறு உருவாகிறது என்பதை அன்றே சிந்தித்துச் சொன்ன ஆண்டாள் அந்த காலத்து மக்களால் “வெதர் உமன்” என்று போற்றப் பட்டிருக்கலாம். இந்த மழையை வர்ணிக்கும் போதும் கூட அவர் பெருமாளை ஒப்பிட்டு வர்ணிக்கிறார் எனும் போது அவருக்குள் மேகமாய், மின்னலாய், இடியாய், மழையாய் அரங்கனே இருக்கிறார்.

பாருங்களேன் கண்ணனின் கரிய நிறத்தை மேகமாகவும், அவரது சுதர்சன சக்கரத்தை மின்னலாகவும், அவரது பாஞ்சஜன்யம் எனும் சங்கின் முழக்கத்தை இடியாகவும், அவரது சாரங்க வில்லில் இருந்து சீறிப்பாயும் அம்பை மழையாகவும் ரசனையோடு வர்ணிக்கிறார். நீர் கடவுளான வருணனை அழைத்து வருணா.. நீ கடலில் இறங்கி..

கடல் நீரை கவர்ந்து அள்ளிக்கொண்டு மேகமாக மாறி மின்னலாய் மின்னி இடியாக ஒலித்து மழையாக பொழிவாய் எனப் பாடுகிறார். மழை பொழிவது நாட்டிற்கு செழிப்பு நீ பெய்தால் செழுமை பொங்கும் எங்கும் மகிழ்ச்சி தங்கும். அந்த மகிழ்ச்சியில் எங்கள் பெருமானை நினைத்து, துதித்து மார்கழி நீராடி நாங்களும் மகிழ்வோம் என்கிறார்.

எப்படி அன்றே மழை பொழிவதை இவ்வளவு துல்லியமாக ஆண்டாள் கணித்தார் என்று பலர் வியக்கிறார்கள்! ஆனால் என்னிடம் யாராவது இந்தக் கேள்வியை கேட்டால் சொல்வேன் “பத்மநாபன் மேல் தீராத மையல் கொண்ட இந்த மயிலுக்கு மழை வருவது தெரியாதா என்ன!

மார்கழி 4 ஆம் நாள் பாடல்..

ஆழிமழைக்கண்ணா!ஒன்று நீ கைகரவேல்;

ஆழியுள் புக்கு முகந்து கொடு ஆர்த்தேறி

ஊழி முதல்வன் உருவம் போல் மெய் கறுத்துப்

பாழியம் தோளுடைய பற்பநா பன்கையில்

ஆழி போல் மின்னி,வலம்புரி போல நின்றதிர்ந்து,

தாழாதே சார்ங்க முதைத்த சரமழை போல்

வாழ உலகினில் பெய்திடாய்,நாங்களும்

மார்கழி நீராட மகிழ்ந்தேலோ ரெம்பாவாய்.

[venkatesharumugam]

#தேங்காய்_சோறு

பொதுவாக தேங்காய் சோறு எனில் அதில் பூப்போல துருவிய தேங்காயோ அல்லது தேங்காய் சில்லோ வரமிளகாயுடன் போட்டு ஓப்பேற்றி இருப்பார்கள்! தேங்காய் சோறு என்பது ஓர் பூலோக அமுதம்! அதை சீர் குலைக்கும் வகையில் யாரேனும் பேசிவிட்டால் விக்ரம் பட கமல் போல துடிக்குது புஜம் எனப் பாடத் தோன்றும்!

ஒரு நல்ல தேங்காய் சோறு எப்படி இருக்க வேண்டும்? பொல பொலன்னு வடித்த சோற்றில் விறைப்பான சோறாக கைகளில் ஒட்டாத குழைவுடன் தேங்காய் எண்ணெய் ஊற்றி தாளித்த கடலை பருப்பும், முந்திரியும் தென்படவேண்டும் தேங்காய்சில் எல்லாம் டி.இராஜேந்தரின் பாடல் வரிகள் போல வாலண்டியராக போட்டு ..

தேங்காய் சோறு என்று நிரூபிக்கத் தேவையில்லை வறுத்த முந்திரி அல்லது வறுத்த நிலக்கடலை போட்டு செய்யும் தேங்காய் சாதமே மிகச்சிறந்தது! சாதம் குழைந்து விட்டால் அது நல்ல தேங்காய் சோறே கிடையாது! விறைப்பாக வெந்த சோற்றில் தேங்காய் சோறு சாப்பிடுவதே சாலச் சிறந்தது! இந்தச் சோற்றிற்கு தொடுகறியாக..

எண்ணெய் கத்திரிக்காய், கார பாகற்காய், புதினா சட்னி போன்றவை தேங்காய் சோற்றின் பெஸ்ட் இணைகளாகும்! அதிக சூடான வாழைப் பூ வடை இன்னும் பெஸ்ட்! முந்திரி பக்கோடா, ஆனியன் பக்கோடா, கிரிஸ்பியான மிளகு சேவு, கார முறுக்கு, கார மைசூர் போண்டா போன்ற பலகாரங்கள் இதற்கு பலே பொருத்தமாக பொருந்தும்!

எங்கள் ஓட்டலில் என் அப்பா கொதிக்கும் சாம்பாரில் ஊறிய மெது வடை மீது 2 ஸ்பூன் நெய் விட்டு தேங்காய் சோற்றுடன் தொடு கறியாகத் தருவார்! அதைச் சாப்பிடுபவர்கள் பாவம்! சோற்று ருசியா வடையின் ருசியா எது நல்லா ருசிக்குதுன்னு தெரியாமல் குழம்பி தே. சோற்றை விட்டுட்டு 4 சாம்பார் வடைகள் வரை தின்று விடுவார்கள்!

மிளகு அப்பளம், வெங்காய வடகம், தக்காளி வடகம், போன்ற கார வடகங்களும் இதற்கு நல்ல ஜோடியாகும்! எண்ணெய் கத்திரிக்காயும் தேங்காய் சோற்றிற்கு நல்ல காம்போ! கார உருளைக்கிழங்குக் கறி கார வாழைக்காய் கறியும் அப்படியே! சூடான வாழைப்பூ வடை அல்லது மசால்வடையும் தேங்காய் சோற்றிற்கு நல்ல காம்போ!

ஆனால் வடைகள் மிகவும் சூடாக இருக்க வேண்டும்! அரைத்துவிட்ட சாம்பாரில் ஊறிய சூடான சாம்பார் வடை இன்னும் பெஸ்ட்! மல்லி / புதினா துவையல், பருப்பு, கொள்ளுத் துவையல், நார்த்தங்காய், மாங்காய், ஆவக்காய் ஊறுகாய்களின் தொக்கு, மாவடு இவை எல்லாம் தேங்காய் சோற்றிற்கு மிக நெருங்கிய ��ண்பர்களாவார்கள்!

அசைவத்தில் மட்டன் குழம்பு, சுக்கா வறுவல் க்ரேவியுடன் ஒரே ஒரு முறை நீங்கள் தேங்காய் சோறு சாப்பிட்டுப் பாருங்கள்! அதன் பிறகு உலகத்தில் உங்களுக்கு எந்த அசைவ பிரியாணியும் பிடிக்காது! அதன் ருசிக்கு நீங்கள் அடிமையாகிவிடுவீர்கள்! தேங்காய் சோறு ஒரு சாத்வீகமான பிரியாணி.! அதை எண்ணெய் கத்திரிக்காயுடனோ..

எலும்புக் குழம்புடனோ நீங்கள் விருப்பம் போல சாப்பிடலாம்! சைவத்தில் அரைத்துவிட்ட சாம்பார் & இஞ்சி புதினா துவையலுடன் உண்பது சொர்க்கம் எனில் அசைவத்தில் மட்டன் சுக்கா, ஈரல் க்ரேவி, நெஞ்சு சாப்ஸ் க்ரேவியுடன் உண்பது சிறந்தது! எனது நண்பர் ஒருவர் வீட்டில் கெட்டியான மிளகு நாட்டுக் கோழி க்ரேவி..

அந்தக் குழம்பில் போட்ட முட்டையுடன் நான் சாப்பிட்ட தேங்காய் சோறு காம்போவிற்கு இன்று வரை ஈடு இணையில்லை! காரமான சைவ அசைவக் குழம்புகளுக்கு நல்ல காம்போ தேங்காய் சோறே! மிளகு முட்டைக் குழம்பு டன் இதை சாப்பிட்டால் இதை ஒரு சைவ & அசைவ பிரியாணி என்பீர்கள்! இது நான் கண்ட உண்மை!

[venkatesharumugam]

3. ஓங்கி உலகளந்த...

#மார்கழியின்_மறை

இன்றைய உலகில் வாழும் மக்களுக்கு என்னென்ன எதிர்பார்ப்புகள் இருக்கும்? இலவச வைஃபை, ஆப்பிள் ஐ போன், விதவிதமான ஆடைகள், நிறைய நகைகள், நல்ல கார், கை நிறைய பணம் போன்ற ஆடம்பரத் தேவைகளை மறந்து யோசித்தால் அடிப்படையான அத்யாவசியமான எரிர்பார்ப்புகள் என்றால்..

நல்ல சாலைகள் வேண்டும், சுகாதாரமான சுற்றுப்புறம் வேண்டும், நல்ல குடிநீர் வேண்டும், நல்ல கல்வியும், தரமான மருத்துவமும் நியாயமான கட்டணத்தில் வேண்டும், நல்ல உணவு வேண்டும், அதாவது மக்களுக்கு நம்பிக்கை தரும் ஒரு நல்ல ஆட்சி வேண்டும் இதெல்லாம் நமக்கு ��ிடைக்கும் என நம்பி தான் வாக்களிக்கிறோம்.

ஆனால் அரசியல்வாதிகள் வாக்குறுதிகள் என்ற பேரில் வாயில் வடை சுட ஆரம்பித்து இன்று பிரியாணியே கிண்டுகிறார்கள்! யாரிடம் போய் இதெல்லாம் கேட்பது? ஆண்டாள் காலத்திலும் இப்படி கேட்க அவர் ஒரு பட்டியல் வைத்திருக்கிறார்..

மாதம் மும்மாரி மழை பெய்ய வேண்டும்.. நாட்டில் தீயவை அழிய வேண்டும்.. விவசாயம் செழித்து நெற்பயிர்கள் விளைய வேண்டும் அவ்வயல்கள் ஊடே ஓடும்..கால்வாயில் மீன்கள் துள்ளிக் குதித்து விளையாட வேண்டும்.. கரையோரச் செடிகளில் பூத்திருக்கும் கருங்குவளை மலர்களில் தேன் உண்ண வேண்டும்..

பால் வளமிக்க பசுக்கள் நாம் கறப்பதற்கு முன்பே வள்ளல்கள் போல தானாகவே பாலை சுரந்து பொழிய வேண்டும்.. எங்கும் செல்வச் செழிப்பு நிறைந்திருக்க வேண்டும்! எந்த அரசியல்வாதியிடம் கேட்பது.? ஆனால் அரசியல்வாதிகள் இதையெல்லாம் செய்ய மாட்டார்கள் என அன்றே ஆண்டாளுக்கு தெரிந்திருக்கிறது.!

இத்தனையும் வேண்டுமா வாருங்கள்.. தன் பாதத்தால் ஓங்கி இவ்வுலகை அளந்த பெருமாளை வணங்கி குளித்து விரதம் இருப்போம்.!அப்படி இருந்து அவனை மகிழ்வித்தாலே போதும் எல்லாம் அவன் பார்த்துக் கொள்வான்.. அவன் உலகம் சுற்றும் அரசியல்வாதி அல்ல.. உலகை தன் அடியால் அளந்தவன்..

அவன் அடி தொழுதால் போதும் நம்செல்வம் செழிக்கும்.. இத்தனயும் இந்த மார்கழி விரதத்தின் மகிமைகள் என்கிறார் ஆண்டாள்.

மார்கழி 3 ஆம் நாள் பாடல்..

ஓங்கி உலகளந்த உத்தமன் பேர் பாடி

நாங்கள் நம் பாவைக்குச் சாற்றிநீ ராடினால்

தீங்கின்றி நாடெல்லாம் திங்கள் மும் மாரிபெய்து

ஓங்கு பெருங் செந்நெல் ஊடு கயலுகளப்

பூக்குவளைப் போதில் பொறிவண்டு கண்படுப்பத்

தேங்காதே புக்கிருந்து சீர்த்த முலைபற்றி

வாங்கக் குடம் நிறைக்கும் வள்ளல் பெரும் பசுக்கள்

நீங்காத செல்வம் நிறைந்தேலோ எம்பாவாய்.

[venkatesharumugam]

2. வையத்து வாழ்வீர்காள்..

#மார்கழியின்_மறை

ஒருவர் தீவிர அசைவ உணவு விரும்பியாக இருப்பார் ஆனால் விரதம் இருந்து மாலை போட்டால் அந்த விரதம் முடியும் வரை அசைவத்தை கையால் கூட தொடமாட்டார். உணவில் மட்டுமல்ல பல பழக்கங்களை விரத காலத்தில் கைவிடுவதே மெய்யான பக்தி. தீய பழக்கங்களை கை விடலாம் சரி.. நல்ல பழக்கங்களை கைவிடுவார்களா?

நம் ஆண்டாள் விடச் சொல்கிறாரே! அதுவும் பெண்களால் கைவிடவே முடியாத ஒரு பழக்கத்தை.! அப்படி என்ன பழக்கம் அது என்று கேட்டால், எந்தப் பெண்ணும் தன்னை அலங்கரித்துக் கொள்ளக்கூடாது என்கிறார். இதெல்லாம் நடக்கிற காரியமா? நீ அழகாக அலங்கரித்துக் கொள்ளாதே என்றால் எந்தப் பெண்ணாவது கேட்பாளா?

பெண்கள் கொடிய கொரோனா காலத்தில் கூட இவ்வுலகை விட்டு எப்போது கொரோனா நோய் பறக்கும் என்று கவலைப்பட்டதை விட எப்போது பியூட்டி பார்லர் திறக்கும் என்றே கவலைப்பட்டனர். தங்களை அழகாக அலங்கரித்துக் கொள்வது பெண்களின் இயற்கை குணம். அந்த இயல்பான குணத்தை ஏன் விட்டுவிட வேண்டும்?

பாற்கடலில் பள்ளி கொண்டிருக்கும் பரமனை எண்ணி பாவை நோன்பிருக்கும் எனதருமைப் பெண்களே வாருங்கள் நமது விழிகளில் மையிட வேண்டாம், நம் தலைகளில் பூச்சூட வேண்டாம் என நம் ஆண்டாள் அழைக்கிறார். நல்லவேளை அன்று ஆண்டாளுக்கு எந்த அல்லக்கைகளும் இல்லை. ஒருவேளை இருந்திருந்தால்?

“தாய்மார்களே எங்கள் அம்மா ஆண்டாள் அழைக்கிறார்” என பேனரும் கட் அவுட்டும் வைத்திருப்பார்கள். இல்லை எனில் மண்சோறு சாப்பிட்டு, அலகு குத்தி, தீச்சட்டி எடுத்து அங்கபிரதட்சணம் செய்து கதறி அழுது கண்ணீர் விட்டு நாடகம் நடத்தியிருப்பார்கள். ஆனால் நம் நாச்சியார், ‘நாங்கள் நெய் உண்ணோம்.. பால் உண்ணோம்..

தீய சொற்கள் பேசாதிருப்போம்.. தான தருமங்கள் செய்வோம்.. செய்யக் கூடாத செயல்களை செய்யாமல் இருப்போம், இதெல்லாம் பொதுவாக விரதம் இருக்கும் அனைவரும் செய்வார்களே என நீங்கள் நினைக்கும் போது சொல்கிறார், ‘பெண்களின் இயல்பான அலங்கரிக்கும் குணத்தையும் அந்த மாலவனுக்கு அர்ப்பணிப்பதே..

இந்நோன்பின் நோக்கம் என்று’ பரந்தாமன் அருளில் உய்வடைய நோன்பிருக்கும் எல்லா பெண்களும் எந்த ஒப்பனையும் இன்றியே மனதால், குணத்தால், கண்ணன் மேல் கொண்ட பக்தியால் பேரழகிகள் என்பதையும் இப்பாசுரத்தில் நமக்குப் புரிய வைக்கிறார் ஆண்டாள்.!

மார்கழி 2ஆம் நாள் பாடல் :

வையத்து வாழ்வீர்காள் நாமும்நம் பா��ைக்குச்

செய்யும் கிரிசைகள் கேளீரோ பாற்கடலுள்

பையத் துயின்ற பரம னடிபாடிநெய்யுண்ணோம் 

பாலுண்ணோம் நாட்காலே நீராடிமையிட்டு 

எழுதோம் மலரிட்டு நாம்முடியோம்செய்யா தன

செய்யோம் தீக்குறளைச் சென்றோதோம்

ஐயமும் பிச்சையும் ஆந்தனையும் கைகாட்டி

உய்யுமாற் எண்ணி உகந்தேலோர் எம்பாவாய்.

[venkatesharumugam]

1. மார்கழித் திங்கள்..

#மார்கழியின்_மறை

குளிரான மார்கழியின் அதிகாலைப் பொழுது! இன்றும் நாமெல்லாம் தூக்கத்திலிருந்து விழிப்பு வந்தாலும் கூட படுக்கையிலிருந்து எழ மனமில்லாது சுகமாகப் போர்த்திக் கொண்டு படுத்துக் கிடக்கிறோம். சிலருக்கு இந்த அதிகாலையின் குளிர் நீரில் குளிக்கப் பிடிக்காது. மார்கழி அதிகாலையில் குளிர் நீரில் குளிப்பது பரம சுகம்!

நூறு ஏசிகளின் காற்று நம் உடல் தழுவுவது போல நம் நரம்பு மண்டலத்தை சிலீரிட வைக்கும் அந்தப் புத்துணர்வை குளித்துப் பார்த்துதான் அனுபவிக்க முடியும். ஆனால் பலர் வெந்நீரில் குளித்து அந்த அனுபவத்தை இழக்கிறார்கள்! ஆண்டாள் மதி நிறைந்த நன்னாளின் அதிகாலையில் குளத்தின் சில்லென்ற நீரில் நீராட..

பெண்களை அழைக்கிறார். அதிகாலை நேரம் நிலவு தன் பணி முடிந்து ஓய்வுக்கு போகின்ற வேளை, இன்றைய கவிஞர்கள் பாடும் குளிர் நிலவே, ஈர நிலாவே என்பதெல்லாம் இந்த அதிகாலை நிலவு தான்.! குளிரை விலக்கி கதிரவன் பணிக்கு வரும்முன் தண்ணெழில் பொழிந்து விடை பெறும் நேரம்.

எப்பேர்ப்பட்ட சுறுசுறுப்பானவர்களும் சுகமாய் ��யங்கிக் கிடக்கும் இவ்வேளையில் ஏன் இன்னும் உறக்கம்? ஏனிந்த ��யக்கம்? எழுந்து வாருங்கள், செல்வச் சிறுமிகளே நம் நாராயணன் நமக்கெல்லாம் அருள்தர காத்திருக்கும் போது அரைத் துக்கம் தகுமா? கார்மேக வண்ணமும், சூரியன் போல வெப்பமும், நிலா போல் குளுமையும் ஒன்றாக உடையவன் நம் கண்ணன்.

அந்த மாயக்காரனை நினைத்து மார்கழி மாதத்து நிறைமதி நன்னாளில் நீராடச் செல்வோம். ஆயர்குல செல்வப் பெண்களே! கூரான வேல் ஏந்தி நமக்கு வரும் கொடும் துன்பத்தை அழிக்கும் நந்தகோபனும், அழகிய கண்கள் உடைய யசோதையும் வளர்த்த இளஞ்சிங்கம் கண்ணன். அவனே நமக்கு பறை தந்து அருள்வான்.

அதற்கு முன் இந்த தூக்கம் பைசா பெறாத ஒன்றாகும். தூக்கத்திலிருந்து எழுந்திருங்கள். உலகமே அவனை புகழும்படி பாடிடுவோம் வாருங்கள். ஆண்டாள் அழைத்தால் கண்ணனே ஓடி வரும் போது, ஆயர்குல பெண்கள் வர மாட்டார்களா என்ன!

ஆண்டாள் வசித்த திருவில்லிப்புத்தூர் தென் தமிழகத்தில் ஓர் சிறிய ஊர்! ஆனால் அந்த ஊரையே ஆயர்பாடியாகவும் அங்குள்ள சிறுமிகளை ஆயர் குல சிறுமிகளாகவும் எண்ணி பாவை நோன்பை துவக்கி வைத்தவர் ஆண்டாள்.!

ஆம்! தமிழகத்தில் ஆயர் குலப் பெண்களின் முதல் மேயர் நம் ஆண்டாள் நாச்சியார் தான்! இன்று மார்கழி முதல் நாள்! பயணிப்போம் அடுத்த 30நாட்களும்.!

மார்கழி 1ஆம் நாள் பாடல்..

மார்கழித் திங்கள் மதிநிறைந்த நன்னாளால்

நீராடப் போதுவீர் போதுமினோ நேரிழையீர்

சீர்மல்கும் ஆய்ப்பாடிச் செல்வச் சிறுமீர்காள்

கூர்வேல் கொடுந்தொழிலன் நந்தகோ பன் குமரன்

ஏரார்ந்த கண்ணி யசோதை இளம் சிங்கம்

கார்மேனி செங்கண் கதிர்மதியம் போல் முகத்தான்

நாரா யணனே நமக்கே பறை தருவான்

பாரோர் புகழப் படிந்தேலோர் எம்பாவாய்.

[venkatesharumugam]

#மந்திரக்கதைப்_புத்தகங்கள்

ஹாரிபாட்டர் என்கிற மந்திரக் கதை நாயகனைப் பற்றிய நாவலை பல பாகங்களில் இந்த உலகமே கொண்டாடியது நாம் அறிந்ததே! ஆனால் லட்சம் ஹாரிபாட்டர் கதைகளுக்கு இணையான கற்பனை வளம் மிக்க மந்திர, மாயாஜாலக் கதைகள் நம் தமிழ் மொழியில் தான் அதிகம். அதுபற்றி தெரிந்து கொள்வோமா!

தமிழில் காமிக்ஸ் கதைப் புத்தகங்களின் சீஸன் துவங்கும் முன் மந்திரஜாலக் கதைகளுக்காக தனி நாவலே வந்தது! அதிக பட்சம் 40 பக்கங்கள் அழுக்கு வெள்ளை ஆஃப் டோன் பேப்பரில் புத்தகம் இருக்கும்! அட்டை மட்டும் வண்ண ஆர்ட் ப��ப்பரில் ஜொலிக்கும். அந்த 40 பக்கங்களில் ஏராளமான விநோதங்கள் குவிந்திருக்கும்!

இன்றைய யூ டியூப் வீடியோக்களின் டெம்ப்ளேட் போல அவற்றின் தலைப்புகளே நம்மை கதையை படிக்கத்தூண்டும்! “மாயக் குள்ளர்களும் மந்திரத் தீவும்” “அந்தரத்தில் மந்திரக்கோட்டை” “வெள்ளை வெளவால் மனிதர்கள்” “மாயலோகத்து மந்திரவாதி” “பறவைத் தீவில் பறக்கும் இளவரசன்” அந்தத் தலைப்புகளே..

நம்மை படிக்க இழுக்கும். இந்தக் கதைகளை எழுதுவோரின் பெயர்களும் அணில் அண்ணா, வாண்டு மாமா, முயல் அண்ணா என்று விநோதமாக இருக்கும்! உலகம் புகழும் ஹாரிபாட்டரில் கற்பனை செய்திடாத வினோதங்கள், மந்திர தந்திரங்கள், மயிர் கூச்செரியும் சாகஸங்கள், சண்டைகள் தமிழில் தான் அதிகம்!

நமது புராணக் கடவுள்களிலேயே விநாயகர், அனுமன், வராகம், நரசிம்மம் என மனித உடலும் மிருகத் தலையும் கொண்ட அவதார புருஷர்களை நாம் பார்த்துவிட்டதால், நமது கற்பனை மிகவும் விசாலமாக இருந்தது. தேவலோகத்து இந்திரனின் ஐராவதம் ஒரு பறக்கும் வெள்ளை யானை என்று படித்து இருப்பீர்கள்!

இதிலிருந்தே நமது ஃபேண்டசி கற்பனையின் வீச்சு எவ்வளவு பெரியது என்பதை அறிந்துகொள்ளலாம்! தமிழில் இந்த மந்திரக் கதைகளை எழுதுபவர்களின் கற்பனைத் திறன் அபாரமானது! அணில் அண்ணாவின் கதைகளில் எலிகளின் உலகம் இருக்கும்! அங்கு எல்லா எலிகளும் எலிகளின் மொழியில் பேசிக் கொள்ளும்!

ஆம்! பாகுபலி படத்தில் எப்படி காலகேயர்களுக்கு ஒரு தனி மொழி இருந்ததோ அதேபோல எலிகளுக்கு ஒரு மொழியை அன்றே அணில் அண்ணா அந்தக் கதையில் எழுதியிருந்தார். அந்த எலி மொழிகளுக்கு பக்கத்திலேயே அடைப்புக் குறிக்குள் தமிழில் அர்த்தம் எழுதியிருப்பார்! உதாரணமாக எலி..

ஒரு மனிதனிடம் கேட்கும் ‘தமிழு தர்பலு’ (தமிழ் தெரியுமா) இப்படி அவர் எழுதியதை இ��்று நினைத்தாலும் வியக்காமல் இருக்க முடியவில்லை. பெரும்பாலும் மந்திரவாதியின் உயிர் 7 மலைகள் 7 கடல்கள் தாண்டியோ அல்லது உயர்ந்த மலை மீதோ அல்லது ஆபத்தான தீவின் நடுவிலோ ஒளித்து வைக்கப்படும்!

அதைத் தேடிப் போய் மந்திரவாதியைக் கொல்வது தான் கதா நாயகனின் வேலையாக இருக்கும். மசாலா சினிமாவின் சக்ஸஸ் ஃபார்முலா போல இந்த ஒற்றை ஃபார்முலாவை வைத்துக் கொண்டு இவர்கள் படைக்கும் கற்பனையான சாகஸங்கள் தான் ஓவ்வொரு கதையையும் தனித் தனியாக தெரியவைக்கும்.

ஒரு கதையில் கிளியில் உயிர் இருந்தால் இன்னொன்றில் பாம்பு, மற்றொன்றில் மான், சிலநேரம் புலி இப்படி மிருகங்களுக்குள் அவன் உயிர் மறைத்து வைக்கப்பட்டு இருக்கும்! இதில் அரசனின் உயிர் காக்கும் அரிய மூலிகை, சாப விமோசனம் பெற வைரக்கல் போன்ற பிராப்பர்ட்டிகளை நாயகன் அங்கிருந்து எடுக்கணும்!

இது போக மந்திரக் கதைகளுக்கே உரிய பறக்கும் பாய், மந்திரக் கோல், உலகில் எதைக் கேட்டாலும் அதை அப்படியே காட்டுகின்ற கூகுளின் முன்னோடியான மாயக் கண்ணாடி போன்ற மாயாஜால பிராப்பர்ட்டிகள் பல வகையான கற்பனைத்திறன் மிளிர அந்தக் கதைகளில் வந்துபோகும். இது தவிர இதில் வரும் இடங்கள்..

கல் கோட்டை, மிதக்கும் மாளிகை, மலையுச்சி குகைகள், பாதாள உலகம், வேதாள உலகம், நெருப்புக் கடல், அமில ஆறு, எரிமலை, ஆழ்கடல் உலகம், ராட்சஸ லோகம், அரக்கர்கள், ஆதிவாசிகள், பழங்குடிகள், காட்டுவாசிகள், அதிசய மனிதர்கள், விசித்திர குள்ளர்கள், ராட்சத தேள், பாம்பு, பூரான், வண்டு, சிலந்திகள்..

இப்படி கதைகளில் வரும் பாத்திரங்கள் க்ரியேட்டிவிட்டியின் உச்சமாக இருக்கும். “பொன்னித்தீவில் பொன்வண்டு இளவரசி” என்று ஒரு கதை அதில் இளவரசியை மந்திரவாதி பொன்வண்டாக மாற்றிவிடுவான். அவனிடம் இருந்து வண்டு உருவத்திலேயே ஜெண்டாகும் இளவரசி அவள் காதலிக்கும் இளவரசனைத் தேடி..

அவன் நாட்டிற்கே போய் பொன்வண்டாக இருப்பது நான் தான் என்று சொல்லி அவனை பொன்னித் தீவிற்கே அழைத்து வந்து மந்திரவாதியை பழி வாங்கி சாபவிமோசனம் பெறுவாள். அப்படியே நான் ஈ படத்தின் கதை போல இருக்கா? இதெல்லாம் சின்ன சாம்பிள் தான். மேலும் நாயகன் செல்லுமிடமெல்லாம் ஏதாவது..

ஒரு நாட்டு இளவரசி அவனைக் காதலிப்பாள்! இந்த யுக்தியை அப்படியே ஹாலிவுட் ஜேம்ஸ்பாண்ட் படங்களில் கட்டாயம் பின்பற்றியிருப்பார்கள்! ராஜமவுலியின் தந்தை மாயக் கதையாக எழுதியதை அப்படியே பாகுபலியில் பல காட்சிகளில் சேர்த்ததாக ஒரு பேட்டியில் சொல்லியிருந்தார். எப்போதும் மந்திரக்கதைகள்..

சிறந்த க்ரியேட்டிவிட்டிக்கு சான்றாக இருக்கும்! வளமான கற்பனை, சுவாரஸ்யம், மர்��ம், மந்திரம், மாயம் எல்லாம் சேர்த்து ஒரு புதிய உலகையும் பல புதிய ஜீவராசிகளையும் படைக்க வேண்டும்! அந்தப் படைப்புத்திறன் பெற்ற ஒவ்வொருவரும் பிரம்மனே! ஆம் உலகில் பிரம்மர்கள் தமிழில் தான் மிக அதிகம்!