#hulingsulyap

[eleeyanna-blog]

Huling Sulyap

Huling Sulyap

Written by: Ellie Cee (Nicole Ann Caidic)

Ito na nga ang huli Ito na ang inaabangang sandali Isang sulyap na walang sukli Sulyap na may hinagpis

Nais kong malaman mo Masaya ako sa naging takbo Buhay ko'y naging mapalad Ika'y aking nakilala

Unang sulyap sa iyo Puso'y kay gaan tuwing napapadako Mga matang nabibighani Sa taglay mong mga ngiti

Kay gaan ng pakiramdam Sa mga maginoo mong tunghay Ano ba ang gagawin Upang ikaw ay maging kaibigan

Tayo'y naging magkaibigan Pagiging totoo sa sarili'y aking natutuhan Walang itinagong ugali Sikreto ma'y hindi ikinubli

Subalit isang araw Dalawa, tatlo, hindi ko na maalala Nababanaag,  halaga ng bawat araw Tuwing ika'y kasama, mundo ko'y sumisigla

Ikaw ay nagtapat, puso ko'y naguluhan Tunay ba ang pag-ibig na ninanais ihalad? Sa mga pagsubok na naranasan, tiwala'y kay hirap ialay Kung kaya't paumanhin sa pagdududang taglay

Ika'y itinaboy, pilit pinapanatili Samahan nating nabuo, pagkakaibigang tinatangi Ngunit sa lahat, ika'y nanatili, pusong takot, ngayo'y naapuhap Pag-ibig mong pinamalas, akin nang tinatanggap

Tayo'y masaya, pag-ibig ay wagas Bawat ngiti mo't tagumpay parang tinatangi na perlas Mahal kita, sana'y 'di na magwakas Mga kamay mo'y huwag bibitiw, kahit pa anong malas

Ngunit ang mga ngiti'y tila napalis Bawat tagumpay ko'y 'di mo ninanais Sukdulang pagmamahal, naging isang kabaliwan Nang ako'y iyong iwang naghihinagpis sa kawalan

Dinamdam nang labis, halos ikamatay Nananalangin na maglaho na lamang Bawat araw, isa iyong parusa, maya't maya naggugunita Binabalikan, masasakit na pangyayari: mayro'n kayang pag-asa?

Ngunit ngayo'y puso ko ay naimulat Puso mo'y 'di na babalik kailanman Walang saysay kung mananatili, mga alaalang walang silbi Tinanggap ko, saksi ang kuwardernong ito sa lahat ng hapdi

Kung kaya't heto na: ako'y magiging masaya Sa huling pagkakataong nakasama Pusong may hinagpis, ngayo'y nakalaya Sa huling sulyap mong hanggang kaibigan na lamang

-wakas-

www.nickcaidicstories.blogspot.com www.ellieceewattpadstories.tumblr.com