#مصر_الإسلامية

[nohabasiouny]

متحف الفن الإسلامي بميدان باب الخلق المتحف بيضم مجموعة كبيرة جداً ومتنوعة من المعروضات الفنية الإسلامية اللي أغلبها جاي من مصر وسوريا وتونس وتركيا وإيران. بدأت فكرة إنشاء المتحف في عصر الخديوي إسماعيل واتنفذت في عصر الخديوي توفيق. تم افتتاح المتحف الحالي عام ١٩٠٣ وكان اسمه وقتها المتحف العربي واتغير إلى متحف الفن الإسلامي سنة ١٩٥١. المتحف مبني على الطراز الإسلامي على مساحة كبيرة ومن الداخل مقسم إلى قاعات كتيرة مفتوحة على بعض بتحكي تاريخ الدولة الإسلامية بداية من عصر الدولة الأموية مروراً بالدولة العباسية فالفاطمية فالأيوبية ثم دولة المماليك والحكم العثماني. في مدخل المتحف فيه مصحف حجمه كبير مكتوب بالخط الكوفي وتم نسخه في القرن الثامن الميلادي ويعتبر أقدم مصحف فيه علامات الترقيم والإعجام. في الجزء ده من المتحف كمان موجود مفتاح للكعبة منسوب للسلطان المملوكي الأشرف شعبان ودليل للقبلة من الخشب صُنع لأحد الوزراء في عهد السلطان العثماني محمود الأول في القرن ١٨ الميلادي. المعروضات بالمتحف بتوصف تطور الفن وازدهاره في كل عصر وده ظهر جداً في المباني والمنابر والمحاريب وثريات المساجد والمشكاوات والأعمدة والزخرفة على الأدوات مختلفة الاستخدام والجدران والشبابيك والأبواب. بعض قاعات المتحف بتوصف المجالات الأخرى اللي برع فيها المسلمين زي الطب والهندسة والفلك وبعضها الآخر بيحكي عن الحياة اليومية والأدوات اللي استُخدمت في المنازل. غير كده كمان فيه قسم خاص بيتكلم عن الخط العربي وآخر عن السجاد اللي جاي دوغري من إيران وتركيا. على جدران المتحف فيه لوحات بتشرح العصر المعنية بيه كل قاعة وقصص بعض المعروضات أو الحوادث الشهيرة. في يناير ٢٠١٤ أدى تفجير استهدف مديرية أمن القاهرة لتدمير واجهة المتحف المقابلة للمديرية وأعداد كبيرة من القطع الأثرية. اتبرعت منظمة اليونسكو بمبلغ كبير لترميم المتحف وتم افتتاحه من تاني في يناير ٢٠١٧. المتحف موجود بميدان باب الخلق وممكن يتراحله بالمترو لأنه قريب جداً من محطة محمد نجيب. مفتوح يومياً من ٩ صباحاً حتى ٥ مساءً. رسم دخوله ١٠ جنيه ولتصوير الفوتوغرافيا فيه رسم قيمته ٥٠ جنيه. #متحف_الفن_الإسلامي #استكشاف_متاحف_القاهرة #كل_خميس_متحف #تاريخ #ثقافة #اعرف #مصر_الإسلامية #الدولة_الإسلامية #هوية #آثار_إسلامية #museumofislamicart #history #islam #knowledge #islamichistory (at Museum of Islamic Art, Cairo)