#مش��ل

[fyunka]

‏اكتشفت ان في حاجة اسمها بنحب بعض بس مننفعش ل بعض، بنحب بعض بس مش شبة بعض، بنحب بس ملناش نصيب في بعض.

[free0spirit]

"عيش في حالة تسليم مش في حالة انتظار"

الانتظار.. فيه مشاعر سلبية زي الخوف والقلق، لأنك منتظر شئ معين يحصل ورافض اي حل غيره!

اما التسليم.. مليان مشاعر إيجابية زي الطمأنينة والرجاء والاتكال واليقين بأنك مش لوحدك، لأنك ببساطة عملت كل اللى عليك، وسلمت الموضوع ل "ضابط الكل" اللي في ايده كل الأشياء.. فأنت راضي بأي نتيجة لأنك عارف ومتأكد ان خططه كلها لخيرك، وانه مش هيقود سفينة حياتك إلا لبر الأمان..

[badr-world]

عارف اللحظة الي بتقول ياااه انا مبسوط بس مش بتفكر في أي حاجه بعد كدا أيا كان ... الي هو دا انا دلوقتي ومن كتر انبساطي عملت التلفون وضع طيران عشان عارف ان هلاقي حد غتت ورخم هيبوظ سعادتي، حبيت اكتب انبساطي هنا ورحلتي الجميلة من سينا ل ابو صوير ل العاشر وعم حسني و كافية الأرزاق بالله ف الاسماعيليه...تو ماتش تيتيلز بس انا مبسوط يا تمبلر

[mshishsworld]

لما تقعد مع نفسك وتكتشف قد ايه انت بقيت بايظ من جوة .. مش نافع ل اي حاجة

[mahmoud-abdelqader]

واقف ف وش العاصفة

محتار أهرب ولا أتدارى

أهاجمك انتي و أقول دي مش مُنْصِفَة

ولا أهاجم نفسي ب مرارة

لازم يكون في دليل بيخلق صِفَة

لازم يكون ف إيديا أي أمارة

لازم فيه شيء يثبت غير العاطِفَة

_مسرح جريمة و اتمسح بشطارة_

مريض يجوز .. و شاركت ف التكلفة

و أنا لو مريض .. هحتاج أكيد ل زيارة

الطحان

[marwa-el-zeiny]

معظم الناس بتبقى مش طايقة نفسها الصبح، زمان مكنتش كدا بالعكس كنت م الناس اللي بتستخسر تنام وبتبقي مستنيه النهار يطلع ودا اتغير مؤخرا ، بس مش مبقيتش طايقه نفسي لأأنا حالتي بتتفاقم! وبقيت حكيم عدمي كئيب، وهادية جدا. الصبح.

روتين الأيام بقي بيخليني أكلم نفسي نوعا ما كنوع م التسليه ، ابتدت ب (ايه التعب ده؟) ل (ايه الملل ده؟) وحاليا (ايه العبط ده؟)

مع نص اليوم، الدنيا بتلهيني، وبرجع جحش أبله عايز ياكل ويشرب ويروح البيت يتفرج ع فيلم ابيض واسود وسط عياله وجوزه .

الروتين من غيره ببقى قلقانة، وبيه ببقى مش فاهمة حاجة انا بقفش نفسي اني ماشيه اوتوماتيك زي الجحش برده اللي عارف مكان بيته ! ودي معضلة محتاجة كل مدارس الطب النفسي يتعاونوا مع بعض ويحلوهالي.

الأيام دي وانا بودي زين الحضانه بعدي ع حدايق ومزارع ، فيه جروب بقر نضاف قوي، يعني بيلمعو، قاعدين ف مرعى نضيف قوي برضه، والشمس جميلة، وع طول مأنتخين وبالهم مرتاح، اللي يقلق إن فيه تطور برضه من ناحيتي اتجاهم وأنا معدية عليهم، الأول (كان صباح الفل يا بقر يا رايق) الى (أنا عايزة أشتغل راعي رايق للبقر ده) ل حاليا (لا أنا عايزة ��بقى البقرة الرايقة دي شخصيا!)

فا الحقيقه انا مش عارفه تحديدا حكيم الصباح العدمي ده رايح بيا فين !

[enngy-alaa]

هتلاقيني لما تقولي صباح الخير بقولك صباح الفل مش صباح النور و هحطلك قلوب كتير لو بنتكلم شات او هقولهالك بصوت عالي مليان ترحاب لو فون او وش ل وش .. هتلاقيني من نفسي بقولك الطقم دا شيك جدا البرفيوم ده عظمه .. الشوز دي جايبها منين .. حلو اوي اللوك ده .. بستخدم كتير "جدا و اوي" و قلوب و ورود .. ممكن ابقي مشغول و برده مش هرد عالقد و مش هحسسك في مره انك معطلني .. انا بحب الناس و بحب اشوفهم فرحانين ... ايا كنت انت مين بتعمل ايه ف انت اهلا بيك دون تصنيف او قولبه او اطلاق احكام مسبقه .. انت مهم عندي مش شرط تكون سوبر مان او بتعمل حاجات خارقه و مش شرط تكون مصدر افاده ليا ف اي جانب من جوانب الحياه ..انت اهلا بيك ف اي وقت .. سلام علي قلوبكم

لقائلها

[jaunerevee]

اي حد يعرفني من زمان هيعرف اني اول ما استخدمت تمبلر في البلوج القديمة كنت بعمل اكل وبصوره وبنزل الطريقة والمكونات والطبخة اخدت قد ايه ومدى سهولتها .. لحد ٢٠١٨ اخدت بريك طويلة جدا من تمبلر ومن كل حاجة تقريبًا ورجعت تاني من ٤ سنين واول كونتنت كنت بنزله هنا كان عن الاكل برضه وحاسة ان ده الحاجة الوحيدة المفيدة اللي ممكن اقدمها لاي حد بحبه ( لقمة دافية ووصفة لذيذة)

انا بحب الاكل بشكل جميل جدًا وعلاقتي بيه مش مؤذيه لاني مابحبش اكل قد ما بحب الطبخ نفسه ..

المقدمة الطويلة دي عشان اقول ان النهاردة اول مرة في حياتي اعمل فطير مشلتت في الطاسة وكان احلى واسمن فطير اكلته بعد فطير مرات عمي

المكونات

كيلو دقيق

نص معلقة ملح

معلقة سكر

٣ كوبايات مياة

كوباية زبدة ونص كوباية سمنة

الطريقة

هننخل الدقيق في بو لك وهنحط الملح والسكر ونضيف المياة بالتدريج واحنا بنعجن لحد ما نوصل لعجينة ناعمة مابتلزقش خالص وسهل نلمها

هنغطي العجينة بكيس بلاستيك ونسيبها نص ساعة

هنرجع نفرد العجينة على ترابيزة او على سطح كبير على شكل مستطيل وهندهنا كلها بالزبدة والسمنة اللي احنا عاملينهم

هنبتدي نلف العينة ونبرمها كأننا بنلف سجارة (او بنعمل سويس رول )

هيتكون عندنا شيء مبروم ملفوف طويل هنقطعه قطع صغيرة متساوية ( غالبا الكمية دي هتعمل من ٨ ل ٩ قطع )

هناغد القطع دي نحطها على صينية بلاستيك مدهونة بالزيت ونغطيهم بكيس بلاستيك ونحطهم في التلاجة ساعة

هنطلعهم من التلاجة ونبتدي ناخد كل قطعة ونفردها وندهنا بالزبدة من جوه برضه وبعدين نطبقها ونحليها في شكل كوره (او بوئجة) ملمومة كده

هنعمل كده في كل القطع بعدين ناخدهم واحدة واح دة في الطاسة

هنرمي ح زبدة في الطاسة ونفرد القطعة هلى شكل دايرة مش سميكة ومش رفيعةونغطي الطاسة ونسيبها خمس دقايق تستوي على درجة حرارة مش عالية وبعدين نقلبها ونفضل كل شوية نقلبها فًوق وتحت لحد ما تستوي وتاخد اللون اللي عايزينه

وبالهنا والشفا 🤭♥️

[t-ablog]

‏بعد انتشار فيديوهات كلام الاطفال مع جنود حرس الحدود ،

مصر قررت النهاردة تقفل كمان بالطوب

ومحدش يطلع حجج للحركة دي.

لانه لو يقدر يمنع عنهم "يشوفوا السما" هيعمل كده.

منظر الطفل وهو بيرفع علامة النصر ، وقصاده واحد بيحط طوبة فوق الطوبة ،فاكر انه هيكسره او يمنع عنه الامل..وكأنه بيقول مهما تعملوا احنا منصورين ومش فارق معانا طوبكم واسواركم وكل الاسلاك دي.

يا مصر .. الخطر مش هيجيلك

من اهل غزة "اللي لسه بيحبوكي".

الخطر من جنرالك السفاح .. على غزة وعلى مصر.

سيأتى اليوم يابطل الذى ستكسر بيدك وقدمك كل هذه المعابر والحدود والعوائق التى

تمنعك عنا

وتمنعنا عنك

اللهم نصرك الذي وعدت لفلسطين واهلها ومقاومتها

ل أطفالها ونسائها وشيوخها 🤲

✌️🇵🇸✌️

T

[mement-o-mori]

قبل يوم العملية بالليل كانت واضحة ملامح المرض على سارة

لما دخلت بوابة المستشفى وشافتني رمت مفتاح السيارة وكرت ال parking وحكتلي خليتها برا مش قادرة انزلي صفيها

من جواتي كنت مصدومة ولا عمرها أمنت سيارتا لحدا سألتا تعبانة كتير؟ ما جاوبتني مسكتها من إيدها ووصلتا على الغرفة ونزلت على الكافتيريا جبت كل شي ممكن انها تحبه ووصلتن حكتلي لا تعملي شي مجنون كانت تقصد اني ممكن اطلع سوق بالسيارة وضحكت فاتطمنت وقلت لا تخافي واعطيتها بوسة على جبينها

بعد ما نزلت صفيتها طلعت سيجارة ودخنت وصارت السيجارة سيجارتين قام لاقيتا رجعت نزلت قلتلا ول لهاي الدرجة ما بتوثقي فيني؟ حكتلي والله لينا انتي مدمنة دخان روحي اتعالجي

حكينا شوي بعدين طلعنا بالمصعد حكيتلها حاطة عطر؟ في ريحة حلوة عبت كل المصعد حكتلي اجاني من الشام قربي شميها

ما كنت بعرف إنها من آخر المرات اللي رح شم فيها ريحتها

اليوم لاقيت تيشيرت ل 21 pilots بالصدفة كنت بسمع car radio وعم فكر فيها

كنا بنحبن كتير وبنسمع أغانيهن سوا وطلعنا شي يوم جبنا واحد النا وصرنا نلبسه مع بعض

شميته ولبسته ولاقيت في ريحتك

روحك موجودة معي هلق وعم تحضني

[judmpto]

عايزة أشارك بأي حاجة بمناسبة أن الأرض أتمت دورة كاملة حول نفسها وأن سنة أخرى أنقضت من عمري وإن -المفروض والأكيد- أنها علمتني وأفادتني وغيرتني

بس الحقيقة أنا مش حاسة بأي إحساس من أحاسيس البدايات أو الإنجازات أو حتى الملامات، يعني بكره لسه الأربع وغزة لسه بتباد وليس هناك أي حافز ل "اللي جاي حمادة تاني خالص"

باااااس، ده not in a bad way actually

لأن جزء ��بير مني بقى يؤمن أن أكثر التغيرات الدرامتيكية اللي ممكن تحصل في حياتك، تحدث في أكثر الأيام عاديةً وعشوائيةً بدون أي موسيقى تصويرية في الخلفية أو ملاحظةً منك حتى.

الكاركتر ديفلوبمنت اللي أنت مستنيه، المهارة والكارير اللي عايز تتقنهم، المشاعر التي ترغب بتجربتها، لحظة إدراكك للسر الإلهي الكامن فيك، قدرتك أخيرًا على العطاء والمساعدة.

كلها لحظات خاطفة، لذا لو هناك ما يمكن أن أشاركه لشخصي الجديد هو أن أربت على كتفه وأقول له: "امسح وانضج" -صورة الإنمي الميم-

ههههه امزح

هقولها خذي الأمور بسلاسة يا شجرة الدر، ولا تيأسي من المحاولة وحاولي تتشبعي بأكبر قدر ممكن من التجارب هذه السنة

كل تمنياتي بالتوفيق

[ro2ah]

انا بقالي ساعه ونص راجعه من بره ومعنديش طاقه ل اني اقوم اغسل وشي حتي ، الفِعل نفسه اد ايه سهل بس انا فعلًا مش قادررره نفسيًا وجسديًا عايزه اعيط .

[fozdoaa]

انهارده كنت نايمه ع الكنبه وفتحت عينى علشان حسيت ان راسى بتتحرك طلع يس دخل ولاقنى نايمه شال راسى وحطها على رجله ،عايزه اقول انى بحب يس حب غير مشروط بخاف عليه جدا وهو فعلا نقطه ضعف كبيره فى حياتى لما بتكلم عنه مبقدرش اوصفه غير انه حته القلب اللى حيه جوايا عارف لما يكون الجرح بيلم بس فيه حته صغيره لسه حيه بتوجع!انا يس هو الحته الحيه اللى فى قلبى بس بشكل جميل كانه شريان بيغذى قلبى بالدم ويخليه ينبض ،هو وغد مبيعرفش يعبر عن مشاعره بس انا فهماه وتقرييا محدش بيعرف يتعامل معاه غيرى بيفضلوا يقولولى اتفضلى مهو دماغه مفوته زيك ،فعلا يس اخد معظم اخلاقى بينا حاجات كتيره قوى مشتركه ، يس مارست معاه حب امومى عيشت معاه مشاعر امومه حلوه قوى وانا اصلا معرفش انها مشاعر امومه ده حب ،عارفين جايكوب لما كان بيحب بنت بيلا فى توايليت؟فى حاجه غريزيه جواه ليها ده حبى ل يس ،فى مره كان بيتكرم فى المدرسه وغاب يوم التكريم رغم انه كان عارف والميس مأكده ان الأوائل هيتكرموا وعدت عليهم ومتغيبوش بكرا هو غاب فقامت الدنيا ومقعدتش تغيب ليه وانت عارف ومتتكرمش وسط صحابك ليه؟رد بمنتهى البساطه علشان انا مش فارق معايا اتكرم وسط الطابور او قدام المدرسه كلها المهم ان انتوا عارفين انى شاطر ،الدنيا كانت والعه فانا رديت هو حر وجهه نظره تحترم وقولت يومها حبه غير مشروط بتفوق او تكريم او او واعمل اللى انت عايز تعمله ياحبيبي المهم قولى عايز ايه هديه قالى عايز رز حبه وحبه !ايوووه هو بيحبه ومبنعملوش كتير وشايف ان دى احسن هديه هو عايزها قالولى شوفتى نفس غبائك اهو ونفس طباعك وذوقك فى الأكل ،انا ويس بنحب الرز حبه وحبه .السؤال اللى بسأله لنفسي هو انا يوم مربنا يرزقنى باولاد هحبهم اكتر من يس؟ولا هما هايخدوا فتات الحب ده وحاجه منتهى اشقيت من بعدك ��ايس!

[mshishsworld]

مش عارف ايه حبي ل الراديو ممكن هيا هيا نفس الأغنية مشغلها من أنغامي بس علي الراديو بتكون احلي ليه مش عارف يمكن عشان احساس المفاجأة ان الواحد مش عارف ايه هيشتغل علي الراديو

[sarahbasly]

الناس بتستغرب ليه جيل التمانينات و أول التسعينات أغلبهم traumatized, حضرتك الموضوع أعمق بكتير من فكرة إن الناس دى ماتحضنتش و هى صغيرة

- إنت بتتكلم على أطفال كانوا بيصحوا يوم الجمعة الصبح يتفرجوا على برنامج اسمه "سر الأرض" كله معلومات زراعية

و لو سألت أى حد هتلاقيه فاكر صوت مدام أنغام فى أغنية المقدمة و الراجل ال كان بيهب فيك فى نص الأغنية يقولك بعنف الأرض .. الأرض

- بعد كده بتتفرج على "عالم الحيوان" عشان تتهيأ لما تكبر إن فى حيوانات كتير هتكون عايشة حواليك عادى

- ال كان مثقف شوية كان بيقرا بريد الجمعة ال كان فيها مشكلة اجتماعية كل اسبوع بيحلها عبد الوهاب مطاوع و بتكبر شوية تلاقى انت كمان بقى عندك مشاكل فا بتبطل تقراه ال هو مش ناقصين مشاكل بقى

- تيجى الجمعة بالليل تلاقى برنامج " بين الناس" و الأستاذ جمال الشاعر بيعرض مشاكل اجتماعية برضو

- تدخل على يوم السبت و ذكرى محفورة فى أذهان الجميع مع برنامج " خلف الأسوار"

ال بتشوف فيه قبل ما تنام ناس مسجونة و بيعملوا معاهم حوار، عشان تبدأ أول الاسبوع بتاعك كا طفل نشيط يوم الحد بعد الرعب ال شفته السبت بالليل

- دا غير كان فى برنامج اسمه "المواجهة" و كان فى واحد فى المقدمة بينطقها بطريقة مرعبة برضو و كان الهدف إنهم بيهجموا على مجرمين و هما بينفذوا الجريمة

- يوم الأربع بقى كان فى برنامج "اخترنا لك" و كان بيجى فيه مسلسل أجنبى اسمه “ the X files” ، طبعاً الجيل الجديد ممكن يفتكر إنها اختصار ex ، لكن طبعاً احنا مش جيل مايع كده ، دا كان مسلسل تشويقى بيجيب جرايم من ابشع ما يكون و يحاولوا يحلوا لغزها و فيه مناظر جرايم بشعة

- و لما اتفرجنا على مسلسل أجنبى حاجة فانتازى بقى و سوپر هيروز كان " هرقليز و زينا" ال كان من ضمن أبطاله ناس عبارة عن نص جسم إنسان و نص جسم حصان و كنا متعايشين عادى مع الوضع ده و منبهرين بيهم جداً

- و الكارتون ال كنا بنتابعه كان مجموعة سلاحف و المُعلم بتاعهم فار و اشترينا الفكرة عادى جداً

- المسلسلات العربى بقى ال كنا بنتابعها كانت أرابيسك و "لن أعيش فى جلباب أبى "و "إمرأة من زمن الحب "و "الشهد و الدموع " و " المال و البنون" و " الرقص على سلالم متحركة" ال هى كلها حاجات عميقة جداً محتاجة حد معاه ماسترز عشان يفهم عمق الفكرة مش طفل لسة مخلص ابتدائية أو فى اعدادى

- و يوم ما حبوا يروقوا علينا عملوا السهرة الدرامية الأشهر على الإطلاق " جواز على ورق سوليفان" ال خوفت جيل كامل من الارتباط و من أهل العريس

- غير إن كان فى جرنال كامل اسمه أخبار الحوادث كان بيعمل wrapping up لكل الحوادث ال بتحصل حواليك

- و ظهر برضو موضوع عبدة الشيطان ال كان بيخلى الواحد مش بيعرف ينام

- و من الأغانى ال كانت مكسرة الدنيا أغنية ل enrique iglesias ال كان بيقول فيها “would u die for the one u love “ و بعدها back street boys قالولك “ show me the meaning of being lonely” , فا بقيت تحب و تضحى بأقصى حاجة و بعدها تفضل lonely برضو عادى

أكيد كان فى شوية حاجات لطيفة على جنب برضو زى فقرة السيرك و بؤلظ و الكلبة لاسى و فولا بالومبيلا ال طلعنا كنا بنسمعها غلط أصلاً

و مواقف و طرائف و سينما الاطفال و عروستى

و مدام صفاء أبو السعود بتاعة بصوا و شوفوا حاجاتى فى السر

و مدام سهير شلبى فى تاكسى السهرة كان عليها واحدة تاكسى ��يرى سِكسى الصراحة😂😂

بس تعمل إيه الحاجات دى وسط التشوهات التانية دى كلها😂

الموضوع مش بس على قد حاجات الأمهات و الأبهات مقدروش يعملوها عادى كا بشر معندهمش الكمال أو ماكنش عندهم الوعى الكافى، لا حضرتك دا فى طفل هنا استحمل حاجات فوق مستوى استيعاب أى طفل 😅 بس الغريب إننا كنا متعايشين عادى مع ال بنتفرج عليه و مش بنشتكى ال هو قمة السلام النفسى و الأريحية مع اللا منطق ما شاء الله

#جيل_العظماء

#ليالى_النوستالچيا_الحزينة

😂😂😂

منقول

[ebrahimx]

كنت كاتب قبل كدا ان فعالية الدعاء و إحتمالية انه يستجاب مش هتتغير لما بتكتب على السوشيال ميديا بس انا كنت غلطان علشان في مره كنت بقلب بالصدفه على تمبلر ظهر لي دعاء ل قضاء الحاجه بعده اتوضيت وصليت ودعيت نفس الدعاء الحمد لله بعدها ربنا فرجها عليا من وسع الكلام دا كان رمضان اللي فات

ف انا اسف لو كان حد شاف الكلام دا واتضايق او حد عمل بيه بس حقيقي الدعاء على السوشيال ميديا مفيد جدا...