#مش انانيه

[fozdoaa]

متحملوش نفسكم فوق طاقتها افتكروا ان ليها عليكوا حق . لأن فى الاغلب محدش هيقدر وهياخدوا كل حاجه for granted وكأنه حق مكتسب ،وإستكمالا للتناحه والإستغلال انك يوم متتعب محدش هيقدر ويوم متشتكى هتتسأل سؤال واحد ايه ده مانت تقدر تعمل أكتر من كده انت اتغيرت ! محدش هيكملك اللى بدأته حتى لو مش يخصك هيستنوا انت تكمله حتى لو يخصهم . من حقك ترفض اى وضع مش مناسب ليك او بيضغط عليك دى مش انانيه ،متجيش على نفسك ،دمك اللى بيتحرق ده مش بلاش، راحتك النفسيه بالدنيا .

[marmarika-world]

رفضي لوضع مش مناسبني ف سبيل راحتي النفسيه مش انانيه مهما اي حد حاول يقنعني بالعكس.

[kelebek-gibi]

محدش يعرفني اصلاً

انا طول اليوم : انا مش انانيه انا عايزاك ليا لوحدي ، انا ممكن اسيبكوا وامشي قرر تبقا معاها ولا معايا ..

بس كدا كلامي انتهي

[unbreakablesal]

انا عبيطه و غلبانه و مش بعرف اتصرف صح ف المواقف اللى بتعرضلها لأول مره و يمكن كمان اقعد جنب الموقف اعيط ! 😂 بي اوقات كده بتتملكنى شخصية حربوءه ما بتسيبش حقها ابدا و وقتها ابقى واحده يتخاف منها 🫢

كنت خارجه مع صحابي من كام يوم و دخلت التويلت ما كملتش ١٠ دقايق .. لقيت واحده جت تخبط ع باب الحمام كأن حرفيا البوليس قفشنى بهرب مناديل مثلا 😂😂 و بتزعق جامد و تقولي انتى بقالك كتير اوى جوا ! فيه ناس بعدك فيه ناس غيرك ف الحياة و شوية كانت هتقصفنى ب انى انانيه و مغروره 😂🫢 .. اكشلي ف اللحظه دى انا اتخضيت جدا ! هو فيه ايه ؟ مكانش فيه طابور ع التويلت و لا اى زحمه .. ثانيا ده بيبيه يا طنط تيك ات ايزى بدل قلة ادبك دى .. ما رديتش عليها من الخضه اصلا ايدى اترعشت اول مره حد يزعقلي و انا بعمل بيبيه .. جديده دى ! 😂 .. راحت هى قالتلى اخرجى حالا بقولك !! .. بس لأجل قلة ذوقها دى و حسيت بالاحراج جدا .. رديت عليها و قولتلها هخرج لما اخلص ! قالتلى بقولك حالا ! قولتلها بقولك تانى هخرج لما اخلص انا حره ! 😂 .. و انا بقول كده رجلي بتترعش شوية من الموقف و يالهوى ايه العبط ده اشمعنا انا بتعرض للاوساخ دول ؟

سيبتها تولع حرفيا و حطيت بيرفيوم و تعمدت اتبارد ف كل خطواتى بشكل مش طبيعى ! كنت مُستَفزه لأبعد حد و ما اسمحش لحد يكلمنى كده .. خلصت و خرجت و صحابي بيمسكوا ايدي عشان نتصور لقوا ايدي متلجه قالولى فيه ايه ؟! قولتلهم اللى حصل .. قعدوا يقولولى انهم ما شافوش دى مين !

استنينا شوية محدش جه راحت صاحبتى دخلت .. بعد تلات دقايق جت واحده متعصبه جدا و بترزع ع الباب و لسه هتزعق راحت صاحبتى فتحت الباب ف وشها و قالتلها هو فيه ايه ؟! 😂

ف نفس الوقت .. انا بحكى لصاحبتى انى عمرى ما شوفت كده لقيت مدير الفرع جاي يقولى حصل حاجه ضايقت حضرتك؟ تعمدت اعلي صوتى و اسمعها و انا بتكلم و بحكيله الموقف .. و تعمدت اقوله بصراحه انا مش عارفه الناس البيئة دى عرفت الكافيه بتاعكم منين 😂 بل و تعمدت كمان انى اقول انها قليلة الذوق و الادب و ان طريقتها زباله ! و هى خرجت و فضلت تعدي من قدامنا ببطئ .. ف تعمدت اقوله بصراحه كانت واكده ف قمة قلة الذوق و الادب و شرشوحه 😂😂🙂 .. ف المدير و انا بتكلم كان بيضحك و هى معديه كده وشها احمر .. عرفت انها هي ! و هووب راحت واخده حاجتها و مشيت . و هى ماشية تانى تعمدت اسمعها نفس الكلام !

ف اللحظه دى ارتحت نفسيا ! مش من حق حد يكلمنى وحش و يهزقنى و اسكلته ! مش من حق حد يعاملنى وحش تاني لنفسي علي حق و انا مش هسيبها تتهان من اى حد تاني.

[manolia-sy]

برحله البحث عنك ..بحثت عنك بكل الاماكن الا الاماكن اللي فيني لاقيك فيها ..بحثت عنك ب اشياء معروفه ومجهوله باشياء قديمه وجديده ..يمكن كنت عم ببحث عنك بالمكان الخطأ متقصده لان عارفه ان ان لقيتك حتنسل من بين ايديي متل المي ورح اغرق بعدك .. يمكن كنت متاكده انك حتهب مهب الريح وحتكون سراب ورح ضل انا ب ضبابك .. الاجدر ان قول ان كنت شايفه الحقيقه اكتر منك يمكن على الرغم ان اللي بحب مابيقدر يشوف الحقائق بس كانت جليه الي لان وان حاولت انسى كان في مين يفتحلي عيوني ويفرجيني ياها .. ورغم انك شفتني حرقت ودمرت وهنت ومشيت بس ماعرفت ان واقفه بمكاني ..بمكان ما فيني مش عم يقدر يتركك او يتخلى عنك لسبب مجهول .. كنت دوما موجود ب احلامي والمشارك الاول لرحله وحدتي كنت الاول مع كل فصل وكل حاله بتنتابني .. بعد كل سنين مرقت وايام مضت بحس ان منيح ماكنت معي كنت ح تكرهني وتشفق علي وتغضب مني وتقسى عليي كانت الحياه حتكون مش عادله لو كنت معي كنت حكون غصه القلب والحزن الطافي ب ايامك كل حدا فينا بيعرف نفسو مافيني كون انانيه اذا وقلك كنت حارب مشاني . ذنوبي تجاهك كبيره اكبر من اللي انت بتعرفو وبتتخيلو وعزائي الوحيد ان في شي خلاك تكون سعيد وان كنا منتشارك الوحده والعزله وان كنا بالمكان الخطأ

" ياورده السلام أخبريه أني وان نظره نظرهً إليك ألقاه

ألقاه بين الحنايا والضلوع. في رف الجفن والدموع

والله لو أن للروح صوتاً يحنو لما طاب الا بالذكر إياه

والله لو ان للدعاء صوتاً يشدو لما قال الا اسمه وصداه

اني والشوق يجرحني والقلب في سلواه ومنفاه

يشدو للحبيب ويطلب رؤياه وان كان مالنا ملقاه

[eman-azab]

انا كنت فاكره نفسي انانيه وواخده الانطباع دا عني ويمكن كنت بصدره للناس كمان بس اما راجعت نفسي كدا اكتشفت ان لا انا مش انانيه خالص وبالعكس بفكر ف الي معايا قبل نفسي وبخاف ع زعلهم اكتر من زعلي واعدي الي بيزعلني وبنساه عشان بس ميضايقوش وباخد فرحتي من فرحتهم فعلا لدرجه اني ممكن انسي ايه الي مفرحني انا ايمان مش هما وللاسف طلعت غلط انا اه مش انانيه بس كنت مغميه عيني لناس متستاهلش ..

[3-zooooooz]

قافله النت والتلفون كله بقالي يومين من غير سبب واضح اقدر اقوله للناس، ما علينا لما فتحت الفيس دلوقتي لقيت اسكرين حرقت دمي لواحده بتقول انها هتولد بعد أيام وحالتها مش سامحه انها تجيب هدوم للنونو (المولود بنت) وطالبه مساعده وبتقول حتى لو هدوم مستعمله، فا في واحده _اقل ما يقال عنها أنها حيوانه_ دخلت ردت عليها وفين يوجعك بالكلام وانتِ مدام مش معاكي بتخلفي ليه وانتي انانيه علشان تجيبي النونو دا للدنيا يعاني نفس معاناتك وهاتك يا كلام من دة وختمت كلامها وقالتلها انتي مش صعبانه عليا انا اللي صعبان عليا البنت واللي هتشوفه معاكي!

بجد والله ؟!

تعالي نفترض انها سمعت كلامك وحست بالذنب ! هاا ؟ المفروض تعمل ايه دلوقتي ؟ هترجعها ازاي بقى ؟!

جاتك ستين نيله تنيل�� فوق دماغك اللي مفهاش مخ ولا دين ولا أخلاق ولا تعرف عن الذوق حاجه .. جاكِ اعمور !

يا ست لو مش عايزه تساعدي يبقى على الاقل تحترمي ذل عزيز اتجبر بسبب الظروف اللي احنا فيها انه يمد ايده ويطلب طلب ذي دا .. حسبي الله ونعم الوكيل فيكِ .

انا مش فاهمه والله ايه القسوه دي !!!!!!!!!

[nermeanissawy]

انا اكتشفت مؤخرا انى بحرق وقتى وعمرى وطاقتى ومجهودى فى أماكن غلط مع ناس غلط واوضاع متناسبناش ظنا منى انى جايه هنا أصلح العالم واسيب اثر واخلى حياه اللى حواليا افضل

بس برده اكتشفت ان التغير بيجى من جوا واللى عايز ينجح بينجح واللى عايز يعمل كاريير بيعمله واللى عايز يفضل ياخد على دماغه بيفضل ياخد على دماغه وهى دى قوه الجذب او بمعنى اصح الافكار تجذب الاقدار يعنى لو انت فاكر انك جاى الحياه تعدل المايله وتصلح حيوات الناس وتحدث فرقا فا اعرف انك لسه برياله ومنضجتش لان المايل بيفضل مايل

طول ماهو معندوش استعداد يبقى مش مايل !

فا احفظ اللى باقى من وقتك وطاقتك ومجهودك وادى اللى حواليك اد على اد اللى بتاخده منهم لانك فى الاخر مش هتستلم كأس التميز

مبقولش متعملوش معروف فى حد اعملو المعروف فى اهله وغير اهله ومفيش حاجه عند ربنا بتضيع بس فى حدود متهلكش نفسك فى مساعده ناس هما مش عايزين يساعدو نفسهم

عشان بعد وقت هتلاقى نفسك ضعيف وهزيل ومش قادر تقوم من السرير حتى تواجه العالم وساعتها هتكتشف انك ضيعت كتير وفى الفاضى

ابعدوا عن مصاصى الطاقه اللى مبيسمعوش غير نفسهم وطول الوقت عايزين ياخدو وعاملين مشاكلهم هى محور الكون وانت اولع عادى لانك وقت ماهتقع محدش هيقولك انت فين

فكر فى نفسك واحتياجاتك اولا ثم البقيه تأتى ودى مش انانيه عشان انت لما بتدي اكتر من اللى قدامك يستحقه بيفتكره فرض عليك

ومره على مره على مره بتلاقي نفسك بتعمل اكتر من اللى المفروض تعمله وبتتحمل اكتر من اللى المفروض تتحمله وفى الاخر مبتتشكرش

اه عايزه اقولكم كمان ان الدايم هو ربنا واى حاجه تانيه فانيه ومتغيره ( متغيره)

ويلا نروح ننام وان شاء الله بكره يبقى يوم احسن من النهارده وتحصل فيه حاجه قادره تخلى حياتنا كلها احسن ❤️

تصبحو على خير انا بحبكم واى حاجه حصلتلى مؤخرا كنتو انتو السبب فيها بشكل ما ( خاصه نسوانى حبايب قلبى ) اخواتى الصغيرين والكبار❤️❤️

[mariam-sultan]

اى علاقه تحت اى مسمى لازم الطرفين يكون عندهم ثقافه ان من حق كل واحد انه ياخد مساحته الشخصيه مينفعش نفضل كابسين على بعض ٢٤ ساعه…لازم يكون فى وقت وحياه ليا مش من المفروض و العقلانى ابدا انى اكرس حياتى و وقتى كله للعلاقه دى بس!!! اكيد انا ليا حياتى الشخصيه الخارجية الوقت المخصص ليا اللى بخلص فيه المهام الطبيعيه اللى ورايا و الوقت اللى بعمل فيه الحاجه اللى بحبها و بستمتع بيها و وقت لاهلى و عيلتى و وقت لاصحابى و وقت للطرف الاخر و للطرف الاخر نفس الكلام .. و ابدا دى ما تتسمى انانيه بالعكس ده الظروف الطبيعيه السليمه لاى علاقه.. مينفعش نقوم ننام و احنا سوا هو مش تارجت بحققوا .. مينفعش نلغى حياتنا و اولوياتنا و نتخلى عن الحاجات اللى بنحبها و بتبسطنا علشان نرضى الطرف الاخر علشان ميزعلش..

[soull22]

اتخطبيله

مش بالسهل كده

انا عارفه انه بيحبني و انه ع الاقل بيحاول يطمني و متفهم جدا حوار نوبات الاكتئاب اللي بتيجي تنميني في السرير بالاسبوع و الاكتر بس مش عاوزه اكون انانيه و أفكر في نفسي بس

[fozdoaa]

حاسه ان يومي انهارده احداثه كانت كتير ،كوليكشن مشاعر خلطبيطه محتاجه افندها ،عارفه كل احساس فيهم وفاهمه المواقف اللى حصلت جدا ،واخده قرارتى اللى المفروض تتاخد وراضيه عن اللى عملته فى مجمل هندلتى لليوم ،بس معرفش ليه حاسه انى عايزه انطق الكلام دا كله ،محتاجه حد قدامى واحكيله انا مش مستنيه منه نصيحه او حل او تطبيل او او او انا بس محتاجه حد قدامى واحكى. انا اللى محتاجه اسمع اللى جوايا واطلعه بصوت برا منى ،وبما انى من الناس اللى بتفهم نفسها كويس انا اللى مزاولنى ليه الرغبه دى جوايا طالما انا عارفه انا عملت ايه وعايزه ايه وهاعمل ايه ؟ محتاجه حد غيرى يشاركنى جايز محتاجه ابرر نفسي لحد لأى حد ،جايز مش عايزه احس انى شريره او انانيه او جاحده بما ان دى مجمل القرارات اللى اخدتها انهارده والمواقف اللى اتصرفتها او هاصرفها!جايز لما احكى لحد مبررى انا نفسي اقنع نفسي انى مش كده وان انا لأول مره هختار نفسي وراحتى واول مره هرفض حاجات لمجرد انها اقل مما استحق لأول مره ااقدر نفسي فعلا وابطل احط تبريرات للى قدامى لأول مره مش هخلى غلاوه اللى قدامى تبخسنى حقى وحقوقى . اعتقد ان ده ممكن يكون السبب انى لما انطق اللى جوايا واسمعنى افتكر قد ايه انا استحملت او تجاوزت وانى كنت دايما بكونسيدر احاسيس اللى قدامى ويزوت اى ادراك منهم وانهم حتى دونت كونسيدرد ماى اون فيلنج .

[marmarika-world]

‏رفضك لوضع مش مناسبك في سبيل راحتك النفسيه مش انانيه مهما اي حد حاول يقنعك بالعكس.

[aaaalsafar]

السلام عليكم ..

انا هرتب كلامي بقدر المستطاع ")

انا مشكلتي بسيطه بس شائكه 😂😂

بين قوسين ( والدي)

والدي من الرجاله اللي هما مش بيظهروا حنيتهم لحسن الناس تقول عليهم ضعيفه دايما يهفي الاعجاب والكلمه الحلوه والتشجيع والحضن 💔.. عمره ما حضني كده زي الابهات او افتكر اني ممكن اجري عليه لما تحصل ��شكله ..انا بتكسف اعيط قدامه ليستخف بدموعي ..مش عارفه هو قاسي ولا حنين../ بطبعي انا حنينه اوي وبسبب جفائه ببعد عنه خالص اول ما بييجي بجري انام بتحاشي اني احتك بيه نهائي ..

ده مزعلني لاني مقدره نعمه اني يبقي عندي اب وام وفي غيري يتيم ويتمني يكون عنده اب خايفه اندم ومش عارفه اتصرف ..دايما بيحبطنا مش حاطط فينا امل او مكنش رسم لينا حلم من ضمن احلامه .. زي ما عرفت خلفنا عشان نخدمه وده سبب جوايا حاجه كبيره من ناحيته معرفش ايه هيا غير اني كل ما بشوفه بحس اني عايزه ابص في عنيه واقوله ان احنا ولادك دماغنا وتفكيرنا ممكن يهلينا احسن ناس في الدنيا بس هو فاكرنا فاشلين وكان بيقولي لما كنت في امتحانات الثانويه وكنت خايفه.. انتي هتطلعي ايه يعني ؟ ومصدقش نفسه لما جبت مجموع كبير ودخلت كليه قمه انا في حاجه نقصاني من ناحيته مخلياني بعيده عنه اوي بخاف ابص في عينه ودايما بيقلل مني اوووي ..

مهتم بنفسه عنده حتته انانيه بسيطه او مش بسيطه ممكن ميسألش بنلبس ايه او بناكل ايه المهم هو بس انا راضيه واتعودت ..

المهم دلوقتي واللي مخليني ابعت الرساله دي هيا خوفي ان قله خبرتي في اني اتعامل معاه تخليني اندم او راح ممي ..اي حنيه بيحسها من حد فينا بيحتقره يعني محدش يقولي خليكي حنينه معاه لاني ممكن يطردني من البيت ..

حد يقولي اتعامل مع والدي ازاي يخليني من جوا مبقاش كرهاهه او مش طيقاه يخليني لما يرجع ابقي فرحانه زي باقي البنات انا لما بنت بتحكيلي انها باباها مصاحبها وبيسألها مالك وحنين عليها بستغرب اووي وبقولها هو انتي عادي كده بتكلمي ابوكي !

واخيرا بقي كلمه لكل اب

#حب بنااتك وقرب منهم اوي احنا محتاجنكم اوي ولما بنرجع من برا بنبقي عايزين تيجوا تسألونا عملتوا ايه برا وتصاحبونا ولما نزعل تعالو احضنونا.

#ارسمولنا احلام وشجعونا وعلمونا مجرد تشجيعكم هيصنع منا اشخاص خياليين

#خلو بالكم منا ومن لبسنا ولما تشوفونا بنعمل حاجه غلط حاسبونا براحه متكرهوناش فيكم

[yrs-stuff]

أكيد مش سهله وأكيد صعبه ومش لازم عشان الناس كلها شايفه إنه الوضع ميستاهلش الزعل إني مزعلش، طبيعي أقع وانهار فالوقت ده معرفش انا أمتى ممكن أقوم، انا حتى خايفه أقوم! مش فاهمه أنا قصرت ف ايه، وليه ولا اي حاجه م إللي عملتها متقدرتش كأنه شئ طبيعي أو حق مكتسب أي حد فالدنيا بيعملو! ليه القسوه دي كلها؟ ومع مين معايا انا؟ أنا ال عمري م قسيت مع إن كان قدامي فرص كتيره اوي إني أعمل كده ؟ وكنت أصلا كده! إزاي أنا عمري حتى م كنت انانيه عشان يتعمل فيا كده! ولحد إمتى هفضل شايله لاحساس ده جوايا؟

[mwrath]

الساعه جابتلي أن ضربات قلبي قلت و خطر وبتاع ، ايوه كنت مهبط بس نعسان جدا و اني احط راسي انام و مفيش بكره اكتر امنيه انانيه ولكن استحقها ، دائرة اني بدور علي مساعده انتهت ، و بالنسبالي خليني لوحدي هختفي و كده كده فعلا محدش هيهتم غير لو عاوز حاجه او ادفع فاتورة حاجه .

الحقيقه ان خلال ١٠٠ سنه محدش هيفتكرك ، و ده رقم كبير و الحقيقه أنه أقل من كده ، مش nailism بس ده حقيقي ، احنا كإنسان حديث عمرنا علي الارض بتاع ٢٠٠ الف سنه و أجدادنا الي ماتوا من سلالات مختلفه قول من ٩٠٠ الف سنه ، حلو ده 0.1٪ من تاريخ الارض ، لحد دلواتي ليا فيهم ٢٩ سنه و مش عاوز يعدي عليا زيهم ، و كلمة أن اعمارنا هي أقل من لحظات في ال grand scheme of things هو حقيقي ، طيب ليه ��النسبالي هو nightmare on loop .

امتي القطط المنزليه هتسيطر علي العالم ؟

و هل هيتم اكتشاف الفلاح المعاصر أنه هو ده الإنسان في زمنا ؟ ، العالم هيعامل اخر فيصل و شارع الهرم كبقايا الازتك ؟ لما تنغمر فلل الجونا و يتم اكتشافهم كمان كام الف سنه هنعتبرها البيوت العاديه للمصري المتواضع الصياد علي البحر الاحمر سابقا ، حاليا الابيض و الاحمر فتحوا علي بعض و اسمهم البحر البينك.

اتمني ساعاتي تقدر تصمد ٢٠٠ سنه تحكي قصتي .