#كلام ملهوش لزمه ومتشغلش بالك بي

[mohamed-refaat]

النهارده كنت في برج العرب بالاخص في المنطقة الرابعة بعمل انترفيو في شركة

ف انا نازل بمبلغ ما علي قد المشوار و الباقي محطوط في فودافون كاش علي أساس لو حصل اي ظرف

و نزلت و عملت الانترفيو و الوقت اتأخر هناك معايا في المقابله

بالمصادفة جالي مكالمه أن عندي تاني انترفيو في شركه تانيه بس دي يعتبر لي اخر الرابعه و انا كنت في أول الرابعه

المهم الفلوس اللي كانت معايا توصلني بس للبيت متخلنيش اعرف اخد راحتي في الحركة

ف قولت لو لقيت حد احوله الفلوس و اخدها نقدي يبقي تمام عشان اركب توكتوك أو اي مواصله توصلني للشركه التانيه

فرق المسافه بين المكان اللي انا في و الشركه التانيه حوالي ٦ كيلو

ف فضلت اتمشي عشان الاقي توكتوك أو اي حاجه توصلني مفيش

طب ادور علي حد احوله الفلوس مفيش

اي محل او كشك مفيش لأن احنا مش في سبورتنج هنا احنا في برج العرب منطقة صناعية يعني صحراء

المهم بعد ما مشيت كتير اوي لقيت عربية فول كدا فيها شيخ

ف قولتله حضرلي طبق فول و هموت و اشرب مياه

المهم وانا باكل سألني ( انت شغال في انهي شركه .. قولتله والله يا شيخ لسه جاي بقدم علي كام حاجه وربنا يسهل الامور .... رد و قالي سيبها علي ربنا انت منين كدا ... قولتله انا من العجمي ... قالي ياااااااه دا انت مشوارك بعيد ربنا يرزقك يابني بالشغل اللي يناسبك )

ف و انا باكل لقيت عصافير جات جنبي بتاكل اي حاجه وقعه في الأرض استغربت لأن مكنش في شجر كتير حوالينا

المهم رحت ماسك العيش و مقطعه قطع اصغر من حبة العدس كدا عشان العصافير تعرف تبلعه رغيف في التاني خلصت العيش ع العصافير

ف الشيخ بيقولي أكلوا منك العيش و ضحك كدا ضحكه جميله ف قولتله انا بحب كل مخلوقات ربنا من حيوانات و طيور شغفي قالي برافوا عليك انك مهشتهمش مثلا ولا حاجه

قولتله يا شيخ الراحمون يرحمهم الرحمن، ارحموا من في الأرض يرحمكم من في السماء

و دول ياعيني موجودين في صحراء و كدا

المهم بعد ما اكلت و خلصت الحمد لله ف بساله معاك فودافون كاش احولك فلوس و تدهاني نقدي

قالي معندناش الحاجات دي احنا

المهم طلعتله الفلوس من جيبي و حقيقي دي كانت اخر فلوس بس هو اكيد ميعرفش ولا انا قولتله ولا حسسته وكدا و بهزر معاه عشان الهي في الكلام و ميقولش حاجه

و سبتهم ع العربيه و بدير لقيته بيجري ورايا و بيديني فلوسي تاني ف لسه بقوله والله ابدا قالي عليا الطلاق من مراتي منا واخد فلوس قولتله عيب عليك دا حقك وانا معايا فلوس و مش من حقي الخير دا خلي الخير دا لحد فعلا يكون محتاج لكن أنا تمام

قالي حلفت طلاق تلاته

ف قولتله ليه عملت كدا رد و قالي نفس الجمله اللي قولتها من شويه الراحمون يرحمهم الرحمن، ارحموا من في الأرض يرحمكم من في السماء

ربنا يوفقك يابني و لما تمسك مكان في اي شركه متنسانيش و عدي عليا

و حقيقي معرفش انا ليه مشيت و انا زعلان و فرحان في نفس الوقت

فرحان أن ربنا حقيقي سترها معايا و محطنيش في موقف بايخ رغم اني بذنب كتير و بقع كتير و ببعد كتير بس مازال ربنا عز وجل بيبعد عني كل شر و بييسرلي حاجات كتير حتى لو مكنش نصيبي لحد دلوقتي جه في المكان المناسب في وظيفه

و زعلان أن حسيت اني تعبت و وصلت لمرحله اني بيصعب عليا نفسي

لأن كنت في حال و منصب و الخ و الخ و بقيت في حال و مكان تاني خالص

بس اخير و ليس اخرا و الحمد لله أن ربنا هو ربنا بجد 🤍

و بجد فعلا الراحمون يرحمهم الرحمن، ارحموا من في الأرض يرحمكم من في السماء

[mohamed-refaat]

كنت النهارده في فرح واحد صاحبي

بعد ما خلصنا إخوة جه قالي انت مرتبط قولتله ليه ؟

قالي في وحده في الفرح سالت عليك و شكرتلها فيك و عطيتها رقمك !!!

قولتله ازاي بتعمل حاجه زي كدا من دماغك و بتاع و شدينا شويه و بقيت مكسوف بقي خلاص

ف قولتله طب شاورلي عليها انهي وحده دي

طلعت البنت اللي انا قاعد طول الفرح اوزع ابتسامت و نظرات عشوائية عشان محدش يحس اني متوحد ف كل ما ابصلها الاقيها بتضحك ف اقوم ضحكلها عشان إبان اجتماعي بقي وكدا

بس الشهادة لله البنت قمر

من نوع البنات اللي تشوفها في المواصلة مرة وحده في حياتك و تتمني تقابلها تاني

و دماغي عامله معايا حوار بقي اللي هو طب انت ليه مفتحتش معاها كلام دي كانت راكبه معاك في العربيه وانتوا راحيين

طب ليه مقعدتش اتكلمت معاها دي جات وقفت جنبك كذا مرا و الهبل و العته دا بقي اصل دماغي ناقصه مرمطه

هيا متمرمطه خلقه

"ليه الإنسان دني و بيحب يبص لبرا و يبقي عنده شغف لكل ما هو جديد "