#كلام ملعبك

[g-lamia-khalil]

لأني لم أعد قادرة على دفع ثمن البقاء مكاني..

أضطررت أن أدفع ثمن التغيير.

وحينها أدركت..

أنه لا تطور يرافق الراحة..

ولاراحة بطريق التطور.

💖

مساء بنكهة الحياة

لمياء

[shu-rooq]

اه فعلا الابديت الجديد بيخلي الاسك طويل ارغي براحتي عادي

وكمان بيخليني اعمل enter وابدأ من اول السطر ومكانش بيعمل كده وبيدي نوتيفيكيشن كمان ان الاسك اتبعت 😅

المهم بقى 😅 يا شروق احنا رجعنا لبعض وكأن رجعتله روحه ورجعله الحماس في شغله وهواياته وحياته بعد ما كان في الشهر ونص الي قررنا نبعد فيهم فاقد الشغف وطول الوقت ملوش نفس ومش عايز ومش مهتم، وعلاقتنا مولتن كيك بشيكولاتة سايحة وأنا مبسوطة ان الوضع مستقر وان هو معايا وبحب أتدلع عليه وهو بشوية دلع صغيرين بس قلبه بيدوب كده.. عمر ابدا ما خذلني الدلع معاه بيفضل يقاوم اوقات بس بعدين بيضعف

انا بحب ده كله، بس السؤال مبيبطلش يروح من دماغي انا عملت الصح؟ في الشهر ونص محسيتش بألم ووجع الفراق وكده بس كنت بحب اني اول اهتماماته وانه بيتلغبط ويقول بحبك وبعدين يلغوش عليها عشان انا قولتله نبقى صحاب انا عارفة انه بيحبني فكنت متطمنة

الموضوع ملعبك جوا دماغي اوي وكل مرة بيقولي بحبك اوقات ب��يت مش برد عليها من كتر ترددي.. انا عايزة ابقى زيه واثقة انا عايزة ايه واثقة من مشاعري زي ما هو واثق اوي انه بيحبني انا كمان عايزة ابقى واثقة اوي اني بحبه.. او حتى واثقة اوي اني مش بحبه؟

ومش قادرة اجاوب إذا حلاوته دي شوفتها من حد تاني هل هتبسط؟ ما انا مجربتش

بصي اصلا بصراحة انا خايفة احب واتدلق علشان هتعب مع ان هو شكله امان ومخذلنيش يعني وانا مطلعة عينه

انا تايهة وبقوله والله بس هو بيتجاهل ده كله وبيحاول يضحكني ويلطف الجو وخلاص مش مستوعب ان ممكن يبقى لا مش بحبه

بس ليه ادوق حلاوته من حد تاني وانا مبسوطة معاه؟

لما بنتخانق بقول لا خلاص انا مش بحبه انا اختياري كان غلط انا مكانش المفروض اقرب منه.. لما بنكون لطاف سوا مخي بيشغل "هو انت جيت منين؟ حبيتك بالتلاتة"

واسفة ان الاسكات بتاعتي طويلة بس ما انا مش لاقية اسك يحكمني في عدد كلمات 🙊

ضحكتيني والله 😂 أول مرة تمبلر يعمل ابديت عليه القيمة، مش أول مرة قوي بس قشطة عشان مخنوقة من تمبلر اليومين دول 😂

أنا تاني مش عارفة اقولك ايه والله 🤦🏻‍♀️

العلاقات دحلابة كدة والمشاعر الانسانية مرهقة والكوميتمنت بيخوف وحاجة اخر قرف. وهو جميل بزيادة وأنا حبيته من كلامك واتمنى يكون فعلا عارف هو عايز ايه وتكون علاقة صحية بنت ناس.

وبعدين تحسي بألم الفراق ازاي وانتوا اصلا متفارقتوش؟ وهو اصلا مدلوق وانتي ضامنة حبه؟ ما انتي اكيد مطمنة عشان هو موجود وعشان حاسة انك متعازة ف ده مالي عندك احساس الامان.

تعالي طيب ناخد الموضوع بالعكس، انتي عايزة تسيبيه؟ لو الاجابة لأ والـ لأ طلعت قوية كملي واتبسطي وان شاء الله خير، المؤشرات كلها بنت ناس اهي. اصل هيكون ايه الحب يعني غير انك تبقي مرتاحة ومتعازة وفي قبول من جواكي والشخص اللي معاكي مراضيكي وبيشبع عندك احتياجاتك. هنطمع؟ متصعبيهاش على نفسك.

استفتي قلبك برضه وعارفة، استخيري. عشان لو في حاجة غلط هتفضلي حاسة انك مش مرتاحة وتعرفي ساعتها ان لأ في حاجة غلط! أنا مش قادرة اقولك قرار واشجعك ناحيته بكل قلبي عشان انا زيك محتاسة. لا عمري حبيت ولا اتنيلت حد حبني، ف أنا بحكي معاكي ف كلام نظري. كلام كتب كله :D بس خلي بالك من قلب الولد ده والنبي ودايما خلي قدامك انك متكونيش سبب اذى له، هو شكله غلبان وطيب وبيحبك فشخ.

اه، وحطوا تايم لاين لعلاقتكوا دي لو هتكملوا. أوريدي بقالكوا سنة ف حكم المرتبطين، مش ميغة هي 😂

[kinghapu]

" ‏قواعد الطز السبعة "

‏1 - " مفيش حاجه بتتكسر وتتصلح "

إحنا مش كراسي ، حتي الكراسي لما تتكسر وتتمسمر نسبة كسرها تاني بتبقي أعلي بكتير من قبل كدا ، بين الخصام والرجوع فيه جرح بيتفتح ، مهما رجعت العلاقة بعد كده مبيلمش ، الجرح ده ملوش علاقة بالزعل وسببه ومين غلطان ومين ليه الحق ..‏هو ليه علاقة بـ " ازاي انا هنت عليك تعمل فيا كدا ؟ " وده اصعب من الزعل نفسه .

2- " المواقف بتنسي والكلام لا "

القوي مش عكسه الضعيف، عكسه المدب، اللي مبيفكرش في الكلام قبل ما يقوله، لو حد جاب سكينة تلمه وفضل يقطع في جتتك وانت ساعتها برطمت بأي كلام أهبل، الناس الناس هيسيبوه هو ويمسكوا فيك وفي البرطمه ويركبوك انت الغلط، حاول دايماً تنتصر...‏أرمي أجوان الغلط في ملعبه مش ملعبك، ف متعليش صوتك مهما كان التاني مستفز، مترميش زفت من بقك..أفتكر أن بكرة الموقف يعدي ويفضل الكلام..ويفضل كل طرف صعبان عليه الكلام اللي اتقال في حق التاني..الموقف هيعدي وتتصالحوا بس هتفضلوا فاكرين لبعض الكلام..‏كمان ملوش لازمه تربط كل الخناقات اللي قبل كدا واتقفلت بالموقف ده، وياريت متفكروش بكل الحاجات الحلوة اللي عملتهاله من ساعة ما عرفته إلا لو الموقف يستحق ده او هو أنكر ..متذلوش أنك كنت كويس معاه وأنك أحسن منه.. كفاية أن انت عارف.

‏3-"متبررش للي باعوك"

بعد الفراق بيجي للإنسان لحظة يوجه فيها طاقة عتابه لنفسه بدل ما يوجهها للشخص اللي فارقه،إحساس سخيف بجلد الذات أن هو كمان غلطان مش الشخص التاني، ويبتدي شوية بشوية يشيل الغلط الكامل من علي الشخص ده ويوجهه لنفسه،وحتي لو افتكر الشخص ده هو اللي باعه وأصر على خسارته ‏بيحس أنه هو اللي قصر وأنه السبب اللي خلي التاني يعمل كده، وتتحول الصورة من أبيض وأسود، فيها كل الأمور واضحه وباينه زي الشمس، لصورة رماديه مش واضح مين فيها الظالم والمظلوم، لحد ما يحن للبني آدم ده ويفتكر أيامه الحلوة،اللي عمرها ما كنت حلوة !

‏4- " ما صعبتش عليهم .. ميصعبهوش عليك "

المصاحب لفكرة الفراق دايماً، فكرة أن إزاي الشخص ده هيقدر يعيش حياته من غيري؟ لا متخافش هو هيقدر .. اقدر انت بس مالكش دعوة ! اشغل بالك بنفسك شوية ولو مرة، مشكلتنا اننا حتي واحنا متنيلين علي عنينا برضه مش قادرين نبطل انشغال بالناس التانية..‏هّم هيقدروا يعيشوا حياتهم بنفس متعتهم وشغفهم بالدنيا،لو كانوا حسوا ثانية أن حياتهم هتتأثر بعدم وجودك مكانوش خسروك أصلا،خد القرار وفارق..أو استسلم لقرار فراقهم، والغي وجودهم خالص من دفتر حضور حياتك من غير تأنيب ضمير أو زعل أو تفكير، وكل ما تحس انك باقي عليهم افتكر أنهم مبقيوش عليك.

‏5- " مفيش حاجة اسمها أعمل الخير وارميه البحر "

أنت بتعمل خير في بني آدم لحم ودم مش ف بحر ، وبمزاجك أو غصب عنك هتفضل مستني منه مهما قعدت تردد جواك النغمة الخايبة بتاعة "أنا بعمل الخير من غير ما أستني مقابل" انت مش مجبر تتعامل مع الناس الأنانية اللي قادرة تردلك الخير بس هي اتعودت ‏تاخد ومتديش..أو بمعني أصح تاخد وتستخسر تدي.. طول ما في مغفل ذيك مفهمهم أنه قاعد علي بنك مشاعر وبنك وقت..هيفضلوا يفضفضولك ، ويشتكولك ، ويقرفوك ، ويحجزوا الانبساط والفرحة لناس تانية ! .. أنت بني آدم زيهم مش عسكري شطرنج ، بتقع ومحتاح تقوم، وهتحتاج حد يشد إيدك زي ما بتشد في إيد الناس، ‏والناس مطلبتش منك تقف جنبهم أو تديهم ، فمترجعش تلومهم ولا تتعشم أنهم يردوا حاجة ، متفرطش في العطاء عشان متفرطش في الندم بعد كدا !

‏6- " الناس الجديدة.. ذكريات جديدة "

ماتحاولش أبدا، نيفر، تماماً، إنك تملأ مكان ناس قديمة راحوا بناس جديدة لمجرد أنك متحسش بخسارة الفقدان، أغبياء كتير جربوا قبلك الحركة دي واكتشفوا أنها فكرتهم بالناس القدام أكتر وأن كل ذكري حاولوا ينسوا بيها الناس القدام بالناس الجداد..‏عششت في قلوبهم أكتر ، خلي الذكريات تاخد دورتها، خليها تستفزك، ماتحاولش تهرب منها عشان هتلف وترجعلك بشكل أغبي، أستسلمها تماماً، خليها تاخد اللي عايزاه منك، وبالباقي أعمل ذكريات جديدة مع الناس الجديدة دي اللي تجبلهم أماكن جديدة أحسن من اللي فاتت .

‏7- " اهدي علي نفسك"

خسارة الناس مش سهلة ، خسارة قطه او مج اتكسر عندك مش سهلة فما بالك ببني آدم ، عيش وملح وذكريات وحاجات كتير كدا ، فطبيعي يبقي مودك زفت ، وف الحالة دي شوف الحاجات اللي تغير مودك مش تزوده، يعني شوف اي حاجة مفيدة تقدر تعملها...‏أن شاءالله حتي تراقب النمل وهو بيجري بفتافيت البسكويت .. هيبقي أحسن 100 مرة علي فكرة من أنك تقعد تنقي أغاني كئيبة تليق علي مودك الكئيب .. يا كئيب !

- كل الطرق تؤدي لـ60 داهية