#كراكيب في دماغي

[omar-mahrous]

03-01-2022

سنة جديدة.. بداية جديدة.. طموحات جديدة .. اخفاقات جديدة.. امال جديدة.. فكرة النقطة الزمنية اللي تقف عندها وتكون بداية او نهاية او اياً كان هي حاجة غريبة جداً يعني ايه الفرق بين 31-12 و 01-01 اعتقد ولا حاجة بس فى المقابل بتكون فرصة عظيمة لمراجعة نفسنا فرصة نشوف ازاي احنا اتغيرنا وحياتنا اتغيرت فى 365 يوم بشكل غريب وغير متوقع ازاي الحياة اخدتنا لطرق عمرنا ماكنا نتوقعها وازاي نقرب من ناس كانت بعيدة وناس كانت قريبة اوي اوي تبقي غريبة, ايام حلوة.. ايام صعبة.. والحياة استمرت بالنسبة ل2021 وانا بفتكر دلوقتي اكيد ايامها الحلوة كانت اكتر, سنة ابتدت وانا بدور على الاستقرار فى حياتي وانتهت وانا بدور على الاستقرار على الاقل فحياتي العملية ابتدت بعد سنة ريحتها ريحة المستشفيات وابتدت ببداية ليا فى مجال عمل جديد بعد ما خلصت منحة الITI عشان ابدأ من تاني للمرة اللي مش عارف كام رحلة البحث عن عمل ورمي السيفهات الخ وفنفس الوقت كنت اخدت خطوة جريئة ومهمة فى حياتي بعد ما قررت الشخص اللي اتمني اني اكمل ماعاه حياتي ودا كان دافع اكبر للبحث عن الوظيفة المنشودة فنفس الوقت الوقت اللي لسا شغال فيه فوظفيتي القديمة اللى بكرهها وتعدي ايام مملة وبايخة كل يوم اصحي مش طايق شغلى وبالتالي مش طايق حياتي باحاول باي طريقة اشوف اي شغل فى مجالي الجديد بقدم فكل حته بعمل انترفيو ولا اتنين واترفض ويعدي شهر و2 و3 على نفس النظام لحد ما فبداية شهر 3 جاتلي فرصة شغل فرى لانس وشغل بارت تايم فاخدت القرار المنتظر من زمان واسيب الشغل بس طبعاً كان لسا فيه شهرالمفروض اكمل فيه الشغل قبل ماامشي وخلاله جالي انترفيواخير مع شركة فالقاهرة انا معرفهاش ولا قدمت فيها وبرغم اني ضد فكرة العمل فالقاهرة بس قولت مش مشكلة اخد خبرة الانترفيو وسبحان الله يكون اول انترفيو اتقبل فيه فمجالي الجديد وبعد تفكير طويل ومرهق اقرر اروح على امل اني بعد وقت قصير اشتغل ريموتلي من اسكندرية وفنفس الوقت دا وقبل بداية رحلتي المرهقة للقاهرة تحصل انتكاسة صحية واقعد كام يوم بين المستشفيات بسبب ميكروبات فى المعدة كالعادة عشان اروح القاهرة يوم 12-04 وانا تعبان وكاره المدينة كالعادة.. الايام الاولى فى القاهرة كانت صعبة جداً السكن المؤقت والتدوير على سكن اي حد مغترب فالقاهرة عارف ازاي بتكون فترة بايخة ومرهقة بجانب تعبي اللي استمر فترة معايا لحد مااستقريت اخيراً على ا��ر شهر 4 عشان يجيي عليا اسوأ شهر رمضان عدى عليا فى حياتي رمضان بلا طعم ولا اي حاجة زود على كل دا بقي زيادة عليه اني بعد شهرين شغل اكتشفت ان الشركة مرهقة مفيش نظام شغل وعشوائية وضغط وكل حاجة سلبية ممكن تلاقيها فى الشغل موجودة بس اللي خلاني صابر كل دا كان ريم كانت معايا فى كل خطوة وعاشت معايا اللحظات دي كلها اكيد مكنتش اجمل ايامنا بس كنا بنحضر لمرحلة جديدة فحياتنا كان الاتفاق تم على خطوبتنا خلاص وممكن دا كان حاجة مخلياني اكمل فى الشغل برغم كل حاجة وبرغم كرهي المستمر والثابت للقاهرة مدينة الزحمة والدوشة والتلوث والصداع والحر والجفاف فبردو كان فيها حاجات كويسة بالنسبة لى اولها المترو طبعاً وحبيت مصر الجديدة صراحة من الاماكن القليلة فى القاهرة اللي فيها روح روحت معرض الكتاب هناك وكان حاجة عظيمة وفرق شاسع بينه وبين اي معرض اتعمل فى اسكندرية يعني مكنتش الايام كلها سيئة الدنيا كانت بتمشي والايام بتجري بتجري بشكل اسرع مما كنت اتخيل وعدي شهور مش فاكر فيهم غير انى قضيت وقت كتير فيهم فالقطر مسافر من والى القاهرة لدرجة اني بقيت باعامل عربيات القطر كأنها بيتي المهم الايام عدت لحد ما وصلنا لاهم يوم فى السنة اكيد 07-10 يوم الخطوبة اعتقد هاحتاج بوست تاني اصلاً عشان احكي فيه تحضيرات الخطوبة بس عامة الفترة دي كانت اجمل فترة فالسنة وانتهت بيوم جميل هافضل دايماً فاكره إن شاء الله بس بعده اخدت بالي بقى من مدى سوء شغلى وحياتي فالوقت الحالي بالنسبة لشخص مقرر انه مستقبلاً هيستقر فى الاسكندرية أُرهقت من العشوائية والغباء فالشغل وأُرهقت من السفر الاسبوعى عشان اعمل شغل ممكن بكل بساطة يتعمل وانا قاعد فبيتي ممكن كنت مستحمل او مش مركز عشان دماغي كانت كلها فى الخطوبة وتحضيرتها ودلوقتي بعد ماانتهت بقي صعب اكمل فى الشغل دا حاولت افصل فى الناس وختمت السنة بشكل جميل وطلعت رحلة لذيذة جداُ مع عمر قضينا يومين جمال جداً فى سيوة وبردو هاحتاج بوست تاني لوحده عشان اتكلم عنها المهم مع اخر اسبوع فالسنة كنت قررت خلاص اني مش هاقدر اكمل فى المكان دا سواء كمدينة او شركة وابتديت من تاني رحلة البحث عن وظيفة جديدة ولحد مالاقيه فانا كل يوم بصحي مش طايق نفسي وبلعن شغلى كنقطة البداية بتاعت السنة بالظبط مش عارف السنة دي هتنتهي هاكون فين للاسف بس واثق انها هتكون افضل بفضل ربنا إن شاء الله وكالعادة البوست السنوي بتاع تكبلر جا عشوائي وطويل بس هو فعلاً شوية كركيب فدماغي حبيت اطلعها

[shimaaabdelrahman]

كل يوم بيمر بكتشف اني بكبر اوي ومش عارفة اتحمل مسئولية نفسي بخاف اخد قرار واندم عليه كل حاجة بعملها وانا خايفة من نهايتها لدرجة اني مش بعرف استمتع بالبداية الحلوة عشان بخاف من ا��رتها اوي اوي عايزة حد يقولي اعملي كذا وانا هعمله مش عارفة اخد قرار حاسة ان مش عارفة اصدق اني كبرت انا اما بلعب مع عيال صغيرة بحس ان انا قدهم انا اصغر بكتير من اللي انا فيه مش عارفة استوعب فكرة اني كبرت وكل حاجة محسوبة عليا وكل اللي حوليا مركزين معايا ويا عايزين يشمتوا فيا يا يلاقوا اي غلطة يمسكوها عليا الواحد كبر اوي من برة بس من جوة ضعيف وخواف واي حاجة بسيطة قادرة تهده وتزعزع مساحة الامان اللي بيحاول يحافظ علي شوية منه هفضل لحد امتي كدة مش عارفة؟! بس انا مش عايزة اكبر اكتر من كدة عشان كل ما بكبر اكتر الحمل بيزيد وانا مش قده انا عايزة العب زي العيال وخلاص مسئولية ايه دي اللي بتتكلموا عنها

#كراكيب في دماغي

[omar-mahrous]

ارهاق ارهاق ارهاق متكرر توصل لمرحلة الاستنزاف الانهاك مش قادر تعمل حاجة طاقتك مش موجودة فى وقت انت محتاج تحارب بكل طاقتك بس انت مُستنزف مش قادر حتي تقوم من السرير مش تتكلم ولا حتي تسمع وفى نفس الوقت الحياة مبتقفش وكله فوق دماغك من شغل لضغوطات حياة محدش بيسمع محدش بيقدر محدش عنده استعداد يقدر اصلاً فتيجي على نفسك زيادة لحد ماتوصل لمرحلة الانكسار بتحارب عشان متوصلش لكدا بتخاف من احساس الخسارة احساس الفشل احساس ان كل اللي فات راح ع الفاضي بس ترجع تسأل نفسك سؤال " كل دا ليه ؟" و"ازاي وصلت لهنا" وتدخل دوامة تساؤلات واخرها ولا حاجة مُستنزف بتحارب او بتأخر لحظة الانكسار او الاستسلام

[omar-mahrous]

وصلت لمرحلة ارهاق نفسي من الشغل اني مبقتش قاد اعمل اي حاجة مش بس مش قادر ادي الشغل دا لا انا مش قادر اعمل اي حاجة ومش عارف وحاسس ان الاجازة دي كأنها لم تكن عشان انا مش محتاج مجرد ٤ ايام اجازة انا محتاج على اقل تقدير شهر بقالي سنة شغال بشكل متواصل فى اكتر من مكان مااخدتش ولا يوم اجازة غير الجمعة من كل اسبوع ودا عادي المشكلة فانا كل مكان من اللي اشتغلت فيهم خلال السنة دي كان كله مشاكل تختلف عن التاني بس بيجتمعوا فى حاجة واحدة انها ملهاش علاقة بشكل مباشر بالشغل نفسه فتزود ضغط على ضغط الشغل وارهاق ذهني ونفسي على ارهاق الشغل لحد ما حرفياً مبقتش قادر خاصة ان اساساً انا مش طايق الشركة الحالية اللي انا فيها ومش شايف حالياً ان باخد منها اي استفادة لا على مستوي الخبرة ولا على المستوي المادي ولا على مستوي العلاقات ولا اي حاجة خالص فى نفس الوقت مش عارف لو سيبت الشغل دلوقتي امتي هاقدر اشتغل تاني وهل هلاقي شغل تاني اصلاً اللي متأكد منه اني هاصحي من النوم بكرة وانا مش طايق نفسي ومش طايق شغلي ولا طايق نفسي وهاقعد ٩ ساعات بيتم استنزاف ما بقي مني مقابل ملاليم ...

[omar-mahrous]

الأفلام العربية

انا بحب السينما.. بحب السينما جداً بحبها بكل انواعها وبحب اني اشوف افلام مختلفة وتجارب جديدة وشوفت افلام كتير عالمية بعيداً عن هوليوود شوفت كتير فى السينما الاوربية سواء فرنسا المانيا ايطاليا اسبانيا..الخ والسينما الاسيوية وحتي سينما امريكا الجنوبية, الغريب اني لسا واخد بالي قريب انى تقريباً عمري ما شوفت افلام عربية !! وعربية اقصد افلام عربية مش مصرية طبعاً, ممكن عشان فى دولة عربية كتير السينما وصلتلها متأخر بس ولو فى افلام كتير تعتبر عالمية وهي انتاج عربي ومن هنا قررت ابدأ رحلة واني ابدأ ادور واشوف على فيلم من كل دولة عربية وابتديت بأول فيلم عربي اترشح للأوسكار وهو فيلم فلسطيني اسمه الجنة الآن الفيلم دا كان جميل جداً ومؤثر جداً وبيوصل القضية الفلسطينية بأسلوب جميل جداً صراحة كان عندي مشكلة فى اللهجة شوية وكنت بشوف الفيلم بترجمة انجليزي عشان الكلمات اللي كانت بتسقط مني ودي مشكلة مع كل فيلم كانت بتقل شوية بالرغم من اختلاف اللهجات والمهم الفيلم كان حلو وخلاني اكمل وتاني بلد كانت لبنان مع لبنان الموضوع كان اصعب ابتديت اول حاجة بفيلم وهلأ لوين عشان كنت بحب اغانيه جداً بس الفيلم كان تقيل الصراحة ولو كان فى مشكلة او حاجة موضوع اللهجة هنا كان اصعب بكتير ومكنتش فيه ترجمة + ان موضوع الفيلم كان تقيل فقفلت الفيلم واجلته لمرة تانية وبعدها بفترة اتفرجت على اهم فيلم لبناني على حد علمي وهو فيلم بيروت الغربية وعاجبني جداً جداً الفيلم بيحكي عن بداية الحرب الاهلية التانية من منظور اطفال فى سن المراهقة الفيلم معمول فى اطار كوميدي وبشكل جميل جداً والغريبة ان فى الفيلم دا مكنتش عندي اي مشكلة مع اللهجة قبل مااتفرج على ��يلم بيروت الغربية كنت اتفرجت على فيلم لسينما عربية جديدة نسبياً وهي السعودية وشوفت فيلم ست شبابيك من الصحراء والفيلم دا عايز اكتب عنه بوست منفصل عشان فيه كلام كتير اقوله عليه بس عامة هو كان فيلم كويس وبعدها شوفت فيلم تاني اترشح للأوسكار وهو الفيلم الاردني ذيب وصراحة الفيلم دا معجبنيش اوي بالرغم انه متنفذ بشكل محترم جداً بس الصراحة مستمتعتش بيه عجبني بس انه عبر عن التاريخ العربي فى فترة معينة واخيراً انا دلوقتي محضر لبكرة الفيلم السوري مريم وناوي إن شاء الله اكمل بعدها واشوف افلام من سينما شمال افريقيا فياريت لو حد بردو عنده اقتراحات لافلام عربية مش مصرية عامة يقول  عامة كانت تجربة جميلة جداً اني اشوف افلام بتعبر عن الثقافات العربية المختلفة وفنفس الوقت الافلام معمولة بشكل نضيف وممتعة عشان كدا إن شاء الله انا هاكمل لحد مااشوف فيلم على الاقل من كل دولة عربية 

[omar-mahrous]

ليه تمبلر؟ وليه بقفله؟ وليه برجعله؟ (1)

بما اني فتحت تمبلر تاني عشان افضفض فخليني الك شوية كدا مع نفسى الموضوع كله ابتدي 2007 2008 كدا وقتها كنت فى اعدادي مدرسة كان عندي 12 13 سنة كنت فى عالم النت بقالي فترة مش طويلة يعني 3  4 سنين مثلاً وبالنسبة لسني دا النت كان مكان الالعاب الفلاش او تنزيل الالعاب والمنتديات بتاعت الانمي :3 وبردو ياهو ماسنجر زي كله فى الوقت دا بس مكنتش مهتم اوي بيه لحد ماظهرت السوشيال ميديا وكانت بداية السوشيال ميديا ودخلت مواقع زي tagged و Hi5 وفيسبوك اكيد وكلها كانت مواقع للتعارف غير شكلها الحالي ومع الوقت بقيت مهتم اكتر بالفيس بوك زي اغلب الشباب فالوقت دا مش عارف ليه ممكن عشان فكرة الجروبات اللي بتجمع نفس الاهتمامات او البيدجات المهم فاكر فى الفترة دي كنت مهتم ان الاكونت يكون فيه 100 فريند بس مكسميم واكون عارفهم وفعلاً وصلت ل100 ولما كانوا بيزيدوا كنت بمسح قصاد الزيادة الناس اللي مليش كلام معاهم او معرفتي بسيطة بيهم عامة ال100 دول اغلبهم من جنسيات مختلفة كان فيهم عرب وامريكان واسبان وكلهم مكنتش اعرفهم فى الواقع باستثناء 5 او 6 من ال100 كلهم اللي كانوا قرايبي والباقي كانت ناس غريبة والموضوع كان لذيذ وكانت مساحة كويسة اعبر فيها عن نفسي ممكن وقتها مكنتش باكتب اصلاً بس بانزل صور او فيديوهات او اي حاجة مساحة بتاعتي ومن 2010 ابتدا الفيس بوك يتعرف اكتر بين المراهقين من سني وقتها والشباب وواحدة تخليت عن قاعدة ال100 وكتر عدد  الاشخاص اللي اعرفهم لاصحابي اللي فى المدرسة والفصل...الخ وبعدها جت ثورة 25 يناير - اللي لحد دلوقتي وبرغم كل اللي حصل بعدها مقتنع انها اجمل حاجة حصلت حضرتها فى حياتي بس دا موضوع تاني لوقت تاني- واكبر عيب فى الثورة كان ان مش بس مصر كلها عرفت الفيس بوك لا دا بقي كمان جزء من حياتهم والفيس بقي بيمثل كل حاجة فالحياة الواقعية الاسرة والعايلة والكلية والزملا والجيران ومساحة الفيس تلاشت تقريباً وابتدي الشباب يدوروا عن مكان تاني اعرف ناس كتير عملت اكتر من اكونت بس كانت فكرة فاشلة وفيه اللي راح لتويتر وكنت منهم بس مستريحتش هناك فكرة ال140 اكيد منفعتش معايا :””D افتقدت المنتديات تاني ودورت شوية بس للاسف اغلبهم اختفى او بقي مهجور وفى الوقت دا عرفت فكرة البلوجات اللي كانت طالعة بسرعة الصاروخ جنب السوشيال ميديا بس اغلبها او كلها كان بلوجسبوت اللي هي اسطمبة واحدة لحد ماشوفت بلوج عمرو سلامة ودي كانت اجمل بلوج شوفتها ومنها عرفت تمبلر وعملت البلوج دي والكلام دا كان سنة 2015 تقريباً to be continued 

[omar-mahrous]

وفاة جدي كانت صعبة جداً بالرغم من أن سنه كبير وانها حاجة متوقعة خاصة مع امراضه كتير الكام سنة اللي فاتت بس احنا اتعودنا انه كان قوي وكان بيقوم فكل مرة بنحس انها النهاية عشان كدا لما عرفت الخبر اتصدمت الاحتكاك بالموت دايماً صعب مهما كان سن الشخص بس اللي بيفرق بيكون مدى قربه وعايل��نا كانت دايماً قريبة لدرجة اني قعدت فترات مع جدي وجدتي بس -ربنا يرحمهم- فى النهاية رحلته فى الحياة وصلت لنهايتها والحمد لله يعتبر مات من غير ايوة كان دخل المستشفي قبل الموت بس كان واعي بكل اللي بيحصل حواليه وكان بيهزر وبيتكلم معانا وربنا رحمه من اي الم كان ممكن يحصله فى المستشفي

ربنا يجمعه مع جدتي فى الجنة يا رب

[omar-mahrous]

ليه تمبلر؟ وليه بقفله؟ وليه برجعله؟ (2)

عملت البلوج سنة 2015 وكان بالنسبة لى اختراع رهيب اني اختار الثيم بتاع البلوج وفكرة ان يكون عندي بلوج مميزة بالشكل دا وقعدت فترة طويلة الف فى الديزينات الصراحة كان الموضوع مسلي بالنسبة لى وبعدها ..؟ مفيش عملت البلوج وعملت فولو لكام بلوج اجنبي وبلوجات اقتباسات وكدا -كنت بحب الجي اي اف بتاعت الافلام دي- وقعدت فترة البلوج عبارة عن ريبلوجات لصور من الافلام واقتباسات وكدا ونادراً لما كنت بكتب حاجة وتقريباً مكانتش عندي 10 فولورز علي بعض الكلام دا لحد 2016 لما اكتشفت ان صديقي الخولي عنده بلوج على تمبلر واكتشفت ان فيه عرب كتير عليه وعرفت بلوجات كتير محترمة جداً عن طريقه. بس بردو فضلت مع حالي يعني بس ابتديت انى اهتم بتمبلر اكتر كنت بفصل بيه من عالم السوشيال ميديا الصداع هنا مفيش بقي سياسة ولا كورة ولا تريندات -وان كانت فكرة التريندات وقتها ع الفيس مش بنفس القوة- مجرد ناس كل واحد فى عالمه الخاص وكنت بهتم اني اشوف البوستات الشخصية كان الموضوع جميل ورايق جداً وقتها ابتديت اكتب اكتر وانزل اقتباسات من قراياتي بشكل مستمر كنوع من اني اسجلهم لنفسي يعني لقيت ان دى افضل طريقة صراحة  بعدها بفترة ممكن على اخر 2016 اول 2017 ابتديت اتعرف على ناس اكتر على تمبلر وعدد الفولورز ابتدي يزيد تدريجياً واعتقد من اجمل الحاجات اللي عملتها الفترة دي كانت الراديو وكانت ايام جميلة جداً والله :””D انا شخص محب جداً لفكرة الراديو بس الفكرة مكانتش فكرتي كانت فكرة الخولي واعتقد هو كان عاملها قبل كدا عما اتذكر لوحده المهم وقتها الفكرة بكل بساطة كانت اننا بنطلع لايف نتكلم فى اي بمنطق احنا ناس غريبة بنكلم ناس غريبة والموضوع كان ممتع فشخ وكان فى حرية وتلقائية رهيبة فى الكلام اللي هو مكناش بنحضر هو بس بنشوف موضوع نتكلم فيه ونبدأ الكلام ونفتح المايك ساعات كان الكلام بيكون جد ساعات بيكون تهيس ساعات بيقلب بآكتئاب بس الموضوع كان حتي مريح نفسياً وبعدها انضملنا منعم وعلى كمان والتهيس كان عالي جداً ايااام *مسم* وفى فترة توسعت بفكرة الراديو عشان بحبها وعملت بث 24 ساعة وكنت حاطط كذا بلاي ليست مزيكا ومثلاً يوم سهرة اغاني تسعيناتي يوم تاني اندرجراوند وهكذا بس الموضوع دا مطولش عامة عدد الناس اللي كانوا بيسمعونا لايف مكانتش كتير بس فيه مرة وصل لحاجة واربعين واحد وكان رقم خزعبلي بالنسبة لنا والي بيسمعوه بعد كدا كان اكتر اعتقد فى مرة وصل ل100 وشوية المهم الفترة دي وبعدها دخلت تمبلر بشكل اكتر وبعيداً حتي عن الراديو كنت بكتب عليه كل حاجة وكنت بهرب منه قفلت الفيس فترة طويلة لدرجة اني كنت بدخل بلاقي الناس بتتكلم فى مواضيع مش عارفها وميمز مش فاهمها عرفت فعلاً سرعة التريند عندنا رهيبة وفضلت على تمبلر بالشكل دا لحد نص 2018 تقريباً وخلال الفترة اتعرفت على ناس كتير جداً وعدت عليا مواقف كانت ايام جميلة والله.... to be continued

[omar-mahrous]

قصتي مع اليوتيوب

اخدت بالي من حاجة اليومين دول ان تقريباً بقالي سنة وانا اليوتيوب بالنسبة لى بقي شبه التلفزيون زمان اللي هو فى مجموعة قنوات -كتير- على اليوتيوب متابعها وبشكل دوري اللي هو بستني ايام معينة فى الاسبوع اشوف حلقاتها فقغدت ارجع بالزمن كدا واشوف الموضوع دا بدأ امتي  بس الاول عايز اوضح حاجة بالنسبة لي اليوتيوب العربي بيتقسم 4 انواع: 1 اليوتيوب الرسمي ودا اللي هو القنوات بتاعت الاغاني الرسمية واعلانات الافلام والقنوات ..الخ 2 اليوتيوب النكرة ودا عبارة عن فيديوهات توكتوك , رآكت علي فيديوهات التوكتوك, مقالب وكل اللي بيتصوروا باصين ع الكاميرا, فلوجات ملهاش قيمة, ناس بتتصور فى العربية وتقول اي حاجة ... الخ ودي بتجاهلها تماماً 3 الفيديوهات التعليمية زي فيديوهات تعلم البرمجة والديزين ...الخ 4 يوتيوب صناع المحتوي ودي ناس بتحول تقدم محتوي متعلق بمجال معين اياً كان ايه علمي بقي رياضي فني اياً كان وبيختلف فى الجودة من قناة للتانية من حيث التحضير والتصوير او حتي الانتاج بالنسبة للقنوات الكبيرة ودا النوع اللي انا اقصده 

بما اني من مواليد التسعينات فكان التلفزيون بالنسبة لنا فى البيت شيئ اساسي ومنقدرش نعيش من غيره تقريباً وقتها مكنتش فيه موبايلات مفيش نت ولا كمبيوتر من الاساس وعشات مع التلفزيون مراحل عمرية كتير من اول ما كنت بتفرج على توم وجيري ع القناة التانية يوم الجمعة الساعة 8 الصبح وانا عندي 7 سنين لحد ماتشات دوري الابطال وانا عندي 24 سنة  المهم ان مع الوقت قيمة ونقدر نقول هيبة التلفزيون قلت لدرجة انها شبه انعدمت بتكلم هنا عن جيلنا جيل التسعينات وتم استبداله باللابات والموبايلات والنت.... عامة مع بداية دخولي عالم النت وقت ماكنت فى ابتدائي واعدادي مكنتش مهتم باليوتيوب اوي كان اهتمامي الاكبر بالمنتديات وكدا واهتمامي باليوتيوب ابتدا من 2010 كدا تقريباً وكان بيتلخص فى حاجتين بس اغاني اجنبي واعلانات افلام بس كدا بس بعد ثورة 25 يناير اتفرجت على اول صانع محتوي ع اليوتيوب واللي تقريباً عمل ثورة فى عالم اليوتيوب باسم يوسف اكيد بس بردو محصلش تغير فى تعاملي مع اليوتيوب حتي باسم يوسف عرفته اصلاً من التلفزيون.. المهم ان بعدها بفترة وعن طريق الصدفة اتفرجت على اول 2 يوتيوبرز صناع محتوي وهم كانوا السبب اني اكون من متابعي اليوتيوب دلوفتي وهم احمد الغندور الدحيح وكنت عرفته عن طريق فيديو انتشر على الفيس بوك كان عن فيلم كريستوفر نولان والفيزياء الحديثة مش فاكر اسمه المهم دورت عليه ع اليوتيوب واكتشفت ان له فيديوهات تانية وشوفتها كلها وكان ممتع جداً - اللي شاف الغندور فى بداياته على قناة الدحيح هيشوف اد ايه الفيديوهات كان فيها شغف عن دلوقتي- والتاني كان محمود مهدي فيلم جامد وعرفته لما كنت بدور عن افلام الاوسكار تقريباً 2015 2016 مش فاكر بالظبط المهم اني من وقتها وانا بتابعهم ولحد دلوقتي  الفكرة كانت مع اكتشافي الاتنين دول لقيت الفكرة بكل بساطة واحد زي زيه بالظبط بيتكلم معايا فى موضوع بحبه ممكن حتي بيقول رأيه بس الفكرة ان حاجز التلفزيون اتكسر وبعد كدا قعدت ادور وكل يوتيوبر ن دول نقلني للتاني فى نفس الوقت دا تقريباً ابتدي يحصل انفجار وكل الناس ابتدت تعمل فيديوهات لدرجة اني كنت بفكر اعمل قناة اتكلم فبها عن الكتب عشان المحتوي العربي وقتها مكنتش فيه كدا يعني :””D وبعدها بكام شهر لقيت قنوات ظهرت زي الروائي دودة الكتب وغيرهم كتير جداً مع الانفجار دا زي ما طلع ناس كتير معندهاش اللي تقولها ولا عندها  غير انها تعيد محتوي موجود ظهر اكتر من قناة محترمة وممكن اهمها بالنسبةلى زي ماقولت القنوات اللي بتتكلم عن الكتب بس كدا مع الوقت بالنسبة لي القنوات اتفلترت ولما اتخرجت وابتديت اشتغل وابتدبت اني احط روتين معين لحياتي بقي جزء اساسي منه ساعة تقريباً بشوف فيها الجديد من صناع المحتوي دول وممكن كل فترة اكتشف قناة جديدة  ولو فكرت فى الموضوع دلوقتي وقارنت بين التلفزيون واليوتيوب فالفكرة بكل بساطة انه اليوتيوب قدملي المحتوي اللي ان عايزه عن طريق ناس بتتكلم معايا من غير حاجز التلفزيون المهيب واساساً التواصل معاهم بسيط جداً  وبس لو حد كمل قراية البوست الطويل دا لاخره -ودي حاجة اشك فيها :3- مهتم يعرف القنوات اللي بتابعها ممكن يسألني عشان كنت ��اوي اكتبهم بس الصراحة تعبت من الكتابة :””D

[omar-mahrous]

الفرحة الموجودة وسط الاهالي بخبر بإلغاء الامتحانات بتدل على شيئ واحد ان السبب الاساسي فى مشكلة التعليم فى مصر هو الاهالي السبب مش فى المناهج ولا الوزارة ولا التابلت ولا اي حاجة السبب بكل بساطة ان الاهالي حرفياً مش فارق معاهم ابنهم يتعلم ولا لا اللي فارق بس انه ينجح ويجيب درجة عالية ويدخل الكلية من الكليات اللي بتُسمي -زوراً- كليات قمة حرفياً محدش فيهم مهتم باكتر من كدا هم عايزين يتفاخروا قدام بعض انا ايني جاب كذا فى الاعدادية انا بنتي دخلت كلية كذا المشكلة ان التعامل دا من الاهالي مع منظومة التعليم مش بس طلع اجيال معندهاش علم حقيقي -بس طبعاً جايبة الدرجات النهائية- لا وكمان طلعوا معقدين نفسياً نتيجة الضغط النفسي الرهيب اللي بيحصلهم فى مرحلة الثانوية العامة وكارهين للعلم وكمان بيطلعوا فاقدين للهوية وهم مش عارفين عايزين يعملوا ايه في حياتهم لانهم بكل بساطة مدخلوش كليات على اساس غير ان المجتمع شايف ان الكلية دي حلوة فطبيعي تلاقي ٩٠٪؜ من الطلبة الجامعيين بيشتموا كلياتهم ومش طايقينها للاسف الاجيال بتعمل نفس اللي اتعمل فيها فى اولادها وبقينا فى دايرة مبتنتهيش ودروس خصوية بقي وتابلت وسنة ٦ لا مفيش سنة ٦ والنهاية مفيش تغيي وعمر ما هيحصل تغيير غير لما وعي الاهالي دا يتغير ويبتدوا يهتموا بتعليم اولادهم ويخلوهم يحبوا العلم مش يكرهوه....

[omar-mahrous]

Wizidea

امبارح كان اخر يوم ليا فى الشغل بعد 68 يوم عشان يكون الشغل التالت اللي اغيره فى اخر 7 شهور الفكرة مش فى التغير نفسه الفكرة اني كنت وصلت لمرحلة نفسياً كان صعب اكمل اكتر من كدا فى المكان دا وبالرغم من كدا ووانا ماشي حاسس بحاجة غلط مش عارف ايه يعني اللي هو ارتبطت بالمكان دا اكتر من الاماكن اللي قبل كدا او الناس مش عارف  المحصلة انها كانت تجرية كان اه فيها ضغط نفسي فى فترات كتير بس بردو كان فيها أيام حلوة مش قليلة اتلدغت فيها فى اكتر من موقف واتعلمت حاجات كتير سواء على مستوي الشغل أو التعاملات وبردو كسبت علاقات او صداقات ودي حاجة كويسة يعني  فى النهاية اتمني إن الشغل الجديد يكون افضل ويكون المكان اللي اقدر استقر فيه فترة طويلة لأن للأسف الاستقرار دي حاجة موفرهاش ليا اي مكان من اللي اشتغلت فيهم قبل كدا واعتقد إن دي حاجة محتاجها دلوقتي جداً...

[omar-mahrous]

2019 السنة الانتقالية

كالعادة كان لازم ارجع هنا اكتب البوست السنوي -ربنا ما يقطعلنا عادة :”( - بعد ما بعدت فترة طويلة عن المكان هنا وتقريباً البوست مش هيوصل لحد -أعتقد كدا أفضل:3-ـ 

 المهم 2019 خلصت وهي سنة فى مجملها غريب جداً سنة توهان رهيب بعد التخرج من كلية بدون شغف حقيقي لمجال أبدأ فيه يعني هندسة قشطة ليه لا, تدريس وماله مفيش مشكلة ممكن كنت ماشي بمبدأ اي حاجة اقدر اكون ناجح فيها ممكن صراحة مش عارف بس أنا فجأة لقيت نفسي لازم اشتغل دلوقتي ابتديت السنة بطموحات اني هاشتغل كمهندس فى شركة كبيرة عن طريق مهندس كبير هناك وبحط مخططتي للغربة فى القاهرة المدينة الكريهة وبعد سلسلة من السفر والانترفيوهات فوجئت برفض مفاجئ عشان مجموعي 64% وهو اقل من الحد الادني اللي مفروض مهندس فىشركة زي دي -شركة مبيدخلهاش حد غير بالواسطة :3- يكون متحصل عليه المهم تم رفضي وفى نفس الوقت اللي كان عندي بلان ب وهي بكل بساطة كنت ماشي فى سلسلة انترفيوهات تانية لشركة هنا فى الاسكندرية عشان اقبل فى الوظيفة دي واتفاجأ بعرض فى ظروف شغل ومرتب غريب جداً برغم من كدا وافقت لحد ما يجيي غيرها يعني وقضيت فيها شهر تقريباً عامة خلال الشهر دا كان الشركة فى مرحلة ما قبل تشغيل المصنع فظروف الشغل كانت كويسة صراحة مقارنة بالمفروض عليا وفقاً للعرض وكان شهر لذيذ يعني عدي بسرعة بين شغل وخروج وطبعاً سيبت الشركة بعد شهر لان الشركة الكبيرة الاولي اللي كان المفروض اتعين فيها قرروا التغاضي عن الـ1% دا وقرروا اني ممكن اتعين عادي ودا مش كرم منهم دا عشان فيه واسطة بس يعني والمفترض انهم هيكلموني الاسبوع اللي جاي عشان الكشف الطبي وبعدها الاوفر فالشغل والحقيقة إن الاسبوع اللي جاي دا مجاش من شهر 3 سنة 2019 عامة مندمتش اني سيبت الشركة اللي كنت فيها كدا كدا ظروفها كانت هتكون مستحيلة للعمل بعد كام اسبوع وبعدها جت فترة الفرااااغ من نص شهر اربعة ولفترة طويلة ابتدي رمضان ومفيش توظيف فى رمضان بعدها عيد وبعد كدا عيد كبير فترة مخطوفة فالسنة كدا والصراحة محستش باي متعة سواء فى رمضان او فى الاعياد مش عشان اني مكنتش شغال بس الموضوع كان غريب كأن فى حاجة ميتة جوايا اللي هو مش عارف حاجات صغيرة كان ممكن بالنسبة لي مهمة جداً وان اصغر دلوقتي مفيش وبعد الفترة دي كلها تأكدت ان الاسبوع اللي جاي مش هيجي ابتدبت اقدم سي فيتانى بغزارة ومفيش رد او هو فعلياً اللي بيفتح للتوظيف قليل جداً ابتديت بقي اخد بالي اني بجري ورا مجال انا مش شغوف بيه للدرجة ابتديت ادور على شغل مؤقت اقدر معاه اعمل اي حاجة كلمت ناس كتير دورت كتير شوفت كل الفرص الممكنة حرفياً كل الفرص لدرجة اني مقدرش انسي لما قدمت فى شغل ككول سنتر وبعد الانترفيو يكون ردها عليا “انت كويس جداً فى الانجلش بس عندك Egyptian accent !!! اتدرب فترة وكلمنا تاني “  مكنتش عارف اني كمصري المفروض يكون عندي Indian accent مثلاً :”””D المهم حاولت برضو اسافر سواء للكويت او السعودية محاولات فشلة فى اللحظات الاخيرة بس كانت بفايدة اني طلعت باسبور  واخيراً بعد كل دا جاتلي فرصة, فرصة رجعتلي الشغف لحاجة كنت شغوف جداً بيها زمان وهي الجرافيك ديزين كانت متماثلة فى تدريب فى شركة تسويق كبيرة فى الاسكندرية وفى اكبر ايفينت بيتعمل فى المكتبة وبالرغم اني كان المفروض اتعين بعد انتهاء التدريب الشهر اللي جاي واللي بردو مجاش من 3 شهور بس الموضوع رجع ليا شغفي القديم + فتح قدامي ابواب للمجال دا + اني اتعلمت فعلاً فاقدر اقول انه كان اهم حاجة فى السنة  مجرد مااتأخروا عليا ابتديت ادور على شغل تاني فى نفس المجال  والحمد لله لقيت بسرعة شغل تعبان بس بطور نفسي واتعلم وفى نفس الوقت قعدت ادور على شغل تاني بشكل مكثف رهيب لدرجة ان فى 10 ايام فى شهر 12 كان عندي 7 انترفيوهات تقريباً مكنتش عندي اي وقت من البيت للانترفيو من الانترفيو للشغل للبيت تاني اعمل التاسك اللي هو باقي الانترفيو لحد مالحمد لله وعلى اخر 10 ايام فى الشهر غيرت الشغل لشغل افضل ولسا بتعلم فى المجال دا..... فى النهاية مقتنع ان كل اللي حصل السنة اللي فاتت دا كان قدر ربنا بيوجهني بيه لطريق معين هاستريح فيه مستقبلاً وافضل بكتير من اللي كنت مخططله فى بدابة السنة 

[omar-mahrous]

الممنوعات

ممنوع من السفر  ممنوع من الغنا

قبل ما المنتخب المجيد يطلع من البطولة كان فيه مقاطع فيديو كتير منتشرة المشجعين مصورينها للمخبرين اللي ماليين الاستادات كنت كل مااشوف يجيي في دماغي المقطع بتاع “مخبر فى كل عقده, عسكر فى كل مينا” بصوت الشيخ إمام.

ممنوع من الكلام ممنوع من الاشتياق

الشيخ إمام كان بيغني قصيدة الممنوعات بتاعت عم أحمد فؤاد نجم -الله يرحمه- والقصيدة نفسها فضلت تطاردني من وقتها تقريباً طول الوقت شغالة فى دماغي. 

ممنوع من الاستياء ممنوع من الابتسام

أحمد فؤاد نجم كتب القصيدة دي سنة 76 لما جاتله دعوة من وزير الثقافة الفرنسي هو والشيخ إمام وبعد ما طلعوا خلصوا ورقهم وطلعوا جوازات السفر وخلاص هيسافرو اتنادي على اسمهم فى المطار واتبلغوا انهم ممنوعين من السفر وفى ساعتها أحمد فؤاد نجم كتب القصيدة قبل مايطلع من المطار على علبة السجاير عشان مكنتش معاه ورق فوقتها.

ممنوع من اني اصبح بعشقك .. او ابات

 للأسف بعد ما عدي اكتر من 40 سنة على الحادثة دي وتأليف القصيدة, دلوقتي بتعبر عن الحال زي زمانها وممكن أكتر كمان, ولسا فى كل حارة حسرة وكل قصر زينة ولسا مخبر فى كل عقدة, عسكر فى كل مينا!!

ممنوع من المناقشه ممنوع من السكات

الممنوعات بصوت الشيخ إمام: https://www.youtube.com/watch?v=51n6Xnk96vE وبصوت الرائع سعيد صالح فى مسرحية كعبلون: https://www.youtube.com/watch?v=9DjdbFHXdXc

[omar-mahrous]

من وحي الكوابيس

صدااااااع  لا أذكر أي شيئ, ذاكرتي عبارة عن قرص صلب للحاسوب لكنه فارغ تماماً

سأموت قبل الصباح, أدرك ذلك جيداً لا تسألني كيف ربما هذا الهاجس الذي يأتي للقتيل قبل جريمة القتل, للسائق قبل الحادثة أو للمريض قبل الوفاة. لا أعرف متي سوف أموت لكن نهايتي ستكون قريباً في هذا المنزل بالتأكيد.

كل شيئ ضبابي حولي, لا يوجد سوى تلك الهواجس اللعينة واحساس مفاجئ بالوحدة, أريد أن استجمع شتات نفسي لكن هذا المكان اللعين منذ أن انتقلت للعيش هنا وأنا أعيش في حالة من عدم الارتياح والقلق الدائم كأن هناك من يطاردني.... نعم هناك من يطاردني !! تذكرت الآن هذا هو سبب انتقالي المطاردة لقد كنت أهرب لا أذكر من ماذا لكنه كان سريعاً, لم اجرؤ علي النظر خلفي اجري سريعاً البيوت تتشابه الطرق تلتوي وتأخذ منحنيات غريبة انه يقترب بشد, كاد أن يصبيني بمخالبه لكنني هربت, أقفز إلى أحد المنازل القريبة, التقط أنفاسي هذا المنزل صغير لايمكن أن يدخله, لا استطيع أنا أثق في أهل هذا البيت لا استطيع أن أثق فى أحد هنا, لماذا؟ لا أعرف لكني لا استطيع, لكني أذهب إلى المهرب الذي أشاروا إليه لا أملك أي خيار أخر...

أسقط.... أسقط إلى اللانهائية فقط سواد.

أري اجسامهم القصيرة ووجوههم الطويلة وهي تضحك تذكرني بشخصية الجوكر الخيالية ول��ن بشكل كاريكتوري جداً

استيقظ علي هذا السرير بهذه الهواجس..

يجب أن أهرب !!!

[omar-mahrous]

مشاوير الجيش (1)

بما أني خلاص هأخد يعتبر أخدت الأعفا رسمي من يومين وخلاص هأستلم الشهادة الأسبوع اللي جاي اقدر اعتبر ان دي نهاية فترة صغيرة جداً جداً في حياتي وبالرغم من كدا كانت مرهقة سواء علي المستوي او الذهني وفي نفس الوقت كانوا 3 شهور تقريباً مأستفدتش منهم بحاجة بس كنوع من انهاء الفترة دي بيني وبين نفسي قررت اوثقها - كفترة ��لجري ورا وراء التجنيد والاعفاء منها *مشاوير الجيش* :3- 

18-7-2018 النتيجة

دا اليوم اللي يُعتبر نهاية فترة طويلة من حياتي وبداية الفترة دي ودا كان يوم اللي ظهرت فيه نتيجة أخر سنة ليا في الكلية وكعادة دكاترة القسم الجميلة خلونا نروح لحد عندهم ناخد النتيجة من المكتب - عدي عليا خمس سنين ولحد دلوقتي مش فاهم سر العادة دي :3 - المهم طلعت النتيجة وأتخرجت رسمياً اها موصلتش لتقدير جيد بفرق 1% بس في النهاية حالياً أعتبر مهندس كيمائي رسمي بعد 5 سنين دراسة واكيد دي حاجة عظيم تستدعي الأحتفال :D بس بمجرد الأنتهاء من الأحتفال ابتدي الجري ورا ورق التجنيد :3

24-7-2018 نقطة فيصل اول مرة

دا كان اول يوم اخد خطوة في الورق وطبعاً بما أني كائن ليلي بطبعي والمصالح الحكومية بتشتغل الصبح فكان صعب قولت هانزل 9 كدا معقول عشان اطلع الفيش الجنائي وطبعاً بقت 10 روحت اخدت دور رقمي كان 230 تقريباً واللي كان عليه الدلوقتي كان حاجة وستين :””D بس أكيد مش هأنزل علي الفاضي استنيت علي القهوة اللي في الوش لحد ماجت الساعة 1:00 كان الدور علي رقم 140 وقالوا خلاص هناخد 10 كمان ونقفل -_- الباقي يجيي بكرة الصبح وبما أني نزلت قولت اروح اعمل اي حاجة روحت المستشفي وتغلبت علي فوبيا الحقن اللي عندي وعملت تحليل فصيلة دم وكان اول ورقة رسمية اطلعها :v

26-7-2018 نقطة فيصل تاني مرة 

أضطريت الجأ للطرق الملتوية عشان أخلص الفيش :3 فكلمت اخويا راح معايا رحنا الساعة 11:00 وبحكم وظيفته قدر يدخلنا في ساعتها :””D  دخلت اتصورت وبصمت ودفعت ال30 ج وأخدت وصل الأستلام :3 

قسم المنتزة - مركز المعلومات--

وأنا مروح عديت علي قسم المنتزة عشان أطلع شهادة ميلاد جديدة عشان القديمة مش هتنفع رخامة كدا فقالولي عدي علي مركز المعلومات طلع حاجة أسمها الرقم ال��لاثي  أكتشفت فيما بعد أن دا كلام فاضي -_-  بس عامة مكنتش زحمة المشكلة أن كان المفروض أروح بعدها السجل المدني -_- وكان زحمة جداً ففكست يومها

28-7-2018 نقطة فيصل تالت مرة

روحت استلمت الفيش بكل سهولة الحمد لله كان اسهل مشوار :3

To Be Continued :3

[omar-mahrous]

أمبارح كنت بأشوف فيلم phantom thread بعيداً عن إن الفيلم مميز جداً في حاجات كتير وأهتمام بول توماس اندرسون بكل التفاصيل الصغيرة والموسيقي العظيمة الفيلم كان أخر فيلم لأذكي ممثل في التاريخ دانييل دي لويس الرجل دا عبقري فعلاً خلال ٣٠ سنة من ١٩٨٨ ل٢٠١٧ عمل ١٥ فيلم بس الافلام دي كلها مع اختلاف مستوياتها دايماً دوره بيكون صعب جداً وبيظهر موهبته ودا قدر يخليه يسجل كأعظم ممثل في التاريخ -من وجهة نظري- بالرغم من إن ممكن يكون في ممثلين اكثر موهبة منه زي آل باتشينو مثلاً اللي في الوقت اللي دي لويس بيختم مسيرته وبينتقي افلامه لدرجة أنه أستني ٥ سنين عشان يعمل اخر فيلم آل باتشينو كان بيعمل كل سنة فيلم او فيلمين فاشلين لدرجة أن اسمه في الفيلم بقي معناه أن الفيلم فاشل !

دي لويس أعتزل التمثيل بفيلم عظيم كالعادة عشان اي حد مهتم بالسينما يتمني أنه يرجع في قراره دا في المقابل آل باتشينو نزل فيلم السنة اللي فاتت ومحدش أخد باله اصلاً !