#عالسلامة يا حمامة

[musi9a]

" عسلامة يا حمامة .. يا أم الشعر المشبشب و الرأي المدبدب و الضحكة فضيحة و الرقعة صحيحة ! شنحوالك ؟ شنحوالك و كيفنك و ما أحنك و إنتي حقارة و متلفة الجرة و كان نحل الصرة نلقى خيط من شعرك متسرسب و مكتف معايا عشرة ملايين مرابيط .

التهمة .. التهمة حبك بالسيف .. و أنا لاني سارق لاني مجرم و حتى مالتحليل نظيف .. أما مدمن ! مدمن و مستعرف و نعرف إلي باش نباصي أما الله غالب راسي صحيح و ماعندي وين يدور الريح .

كي تاقف قدامي بالروبة الخضرا و تجري في دمي كي شرارة حمرا نبوسك لا حشمة لا جعرة و شماتة في الشعرة لي مسلسلتني و الغصة لي خنقتني. خاطرني كافر بيهم و ممن بيك و بوسة منك بركعتين لعينيك. أما نمن إلي الحب موش في الكتب و لا في التراكن

الحب في الشوارع و أحمر داكن في ظلام الليلة يزعزع و يزلزل و يزرزق و يلمها شليلة و مليلة الزبل بقطاطسها المراكز بكلابها تتلم بقراطسها و تتباع بسوردي في الحفصية و المعلم يغني : " الشعب يا ليلى يعاتبني "

و ينقز مقطع من سور القصر! و ينقز مقطع من سور القصر و نحفلوها من كرطاج لباب بحر . على حجرك ممدود و نمد العود و تولي إنتي ليلى و أنا هوكا رباني المجنون و نغطسوا للرقبة في العز أما طزز منين العز و إنتي المشكل و الحل .. إنتي الحرية و الربطية .. في غناية إنتي الضرورة الشعرية.

و عسلامة يا حمامة قلي منين الهربة منك ليك و أنا لا نحبك و لا نصبر عليك. "

- مجد مستورة