#دكتور عمر عبدالكافي | Explore Tumblr posts and blogs

alaaa95 · 5 years ago

Text

امبارح كان فيه نقاش كده حوالين ان ثوابت الدين عند الناس هنا في مصر مش متأسسة ولا متثبتة صح.. شوية ويقولي "بس انا كنت فاكرك عارفة في الدين حاجات اكتر من كده فيه حاجات واقعة منك" ده عشان عرف ان انا حافظة القرآن، اللي هو ازاي حافظة بس مش عارفة أحكام وكده، فقلتله ان تأسيس القرآن عندي ملوش دعوة بالشرع، عشان انا حفظت في مكان مبيعلموناش فيه غير القشور يعني الفروض وخلاص، باقي الفقه بقى له مدارسه والاماكن بتاعته، شوية وقعد يشتكي ان بسبب التأسيس الغلط ده قعد سنة كاملة مبيصليش عشان كان متربي في السعودية وواخد ومتعلم قراءة القرآن الصح وجه لقى شيخ بيقرا غلط، فالموضوع ده عمل له ربكة وكنت هلحد خلاص، فيه حاجات انا عايز افهم جت ازاي ومحدش هنا عنده معلومات صح وتقنعني عشان لازم اقتنع.

بصراحة كلمة لازم اقتنع دي نوعًا ما بقت بتستفزني بس بهدوء فبعديها وبقوله زي ايه مثلا؟ قال يعني مثلا زي الغزوات، ازاي في غزوة بدر انتوا مسلمين سمحتوا لنفسكوا تعملوا كده في القافلة بتاع قريش؟ مش ده غلط؟ ولا وقتها كان عشان الناس جعانة؟ ونفس السياق دلوقتي اهو، الناس جعانة والدنيا زي ما انت شايفة، لو رجعت للدين وللظروف او الحكم هرجع ابص على الظروف تاني واحكم؟ طب مهو محدش من الشيوخ اللي دلوقتي بيتكلم في حاجة زي دي ولو حد اتكلم بيقول كلام مرسل وخلاص مبحسش الكلام كده، يعني اول مرة اسمع فيها تفسير لقصة آدم وحواء والشجرة كانت من فيديو عالم امريكي، التفسير الوحيد اللي قدر يقنعني ان القرآن ده فيه إعجاز وانه مش مجرد كلام وخلاص

طبعًا انا بسمع الكلام ده ومابين ارد عليه في كذا حاجة ومابين مردش واسيبه يكمل للآخر وبحاول أدور له على مخرج اكمل المناقشة بيه عشان كنت شوية وهبطل كلام خالص واقفل الحوار وفي نفس الوقت عايزة أعرفه أو أوصله ولو جزء بسيط من جمال القرآن والكلام والاعجاز اللي فيه وفي نفس الوقت برضو بيقول لازم يقنعني، طب ده اقوله ايه ده؟

المهم، الحوار تطرق إلى اني فهمته ان موضوع الإلحاد ده اول الغلط، مش عشان مفيش إجابات لأسئلتك اللي هي زي طب مين جاب مين؟ ولما احنا موجودين من وقت نسل آدم يبقى اذًا كان فيه خلق تانيين قبلنا ع الارض، طب ربنا ازاي بقى؟ النوعية دي من الأسئلة اللي تخليك تسكت وفي نفس الوقت عايزة تقوله "لا يُسأل عما يفعل وهم يُسألون" وان فيه حاجات لازم تحط لدماغك الحد وتوقفه عندها، وانك مهما اتمعظمت وفكرت وبعدت بخيالك فانت محطوط لك حد معين متزيدش عنه في التفكير، وان السكة دي سكة شيطان، اه الشيطان اللي جايلك ومزينلك انك كده بتحاول تفهم اكتر في الدين بس هتخلص في حتة تانية خالص ومش كل اللي راحوا رجعوا، واقنعته ان الشيطان اه عنده الطريقة اللي يقنع بيها صاحبه انه ماشي صح وهو معجون في الغلط اصلا وان مفيش ضمان لحاجة ابدًا خصوصًا في سكة ربنا، واحد من الصحابة كان بيقول "والله لا آمن من مكر الله ولو أن إحدى قدماي في الجنة"، "ولو أن إحدى قدماي في الجنة" فاللي هو مفيش صح مطلق في السكة دي وغلط اصلا انك تضمنها عشان انت معكش اللي يثبت انك صح، فسكت كده خالص حسيت ��اعتها اني خدت بوينت 😂

المهم، فهمت بعدين ان فعلًا ربنا بيقسم الأرزاق حتى في الأفهام، وان ممكن فعلًا حد يبقى بيقرا حاجة وميشوفهاش او ميفهمهاش الا بعد طلوع روحه وعشان كده محاولاته معدودة، مش زي اللي ربنا بيفتح عليه وبيكرمه بالفهم سواء لوحده او بحد يمشي معاه ويفهمه او حتى يوضح له، وحوار التدبر ده طلع من النعم والله اللي مش اي حد ربنا بيرزقها لحد كده وخلاص

انا فاكرة ان في نص الكلام قطعت حبل افكاره بآية "والذين جاهدوا فينا لنهدينهم سبلنا.." وسكتت، فسكت هو كمان، شوية وقالي وبعدين؟ قلتله ولا قبلين.. إن الله لمع المحسنين، الوعد صريح هنا اهو، انت هتحاول هتيجي غير كده مش هتوصل، ومجرد محاولتك ربنا واعدك بالجزاء عليها، فمفيش فصال في حتة انك تلاقي حد يقولك او يفهمك، ماشي انت ملقيتش؟ خلاص مش إشكال، افتح واسمع فيديوهات ومقاطع الأئمة والعلماء اللي برا مصر، عندهم علم ماشاء الله يضرب اللي عندنا دلوقتي ده مادام مش عاجبك، والعلم موجود وهيفضل موجود، الفكرة في السكة اللي بتدور فيها، اسمع الإمام النابلسي مثلًا، اسمع للشنقيطي، د. عمر عبدالكافي، قال عمر عبدالكافي مبحسوش، سكت ساعتها بحاول استوعب يعني ايه مبحسوش؟ قالي يعني هو كل كلامه عن الاعجاز والقرآن كلام ربنا وترهيب وسمعتله مقطع من البرنامج بتاعه كان بيتكلم عن يوم القيامة فمحسيتش بالكلام يعني، فسكت تاني بحاول افتكر البرامج كلها بتاع الدكتور افتكرت ان حتى دكتور عمر كان في حلقات سواعد الإخاء في رمضان اللي فات ده، وبعيد عن كلامه مبحسوش او بحسه دي برضو حاجة تدخل تحت بند الاختلافات، بس الفكرة كلها في انك تدي المجال للي قدامك انه يقول الكلام كله، انك تسمعه وهو بيتكلم اه بس في كذا موضوع يمكن موضوع فيهم يشدك وتعرف ان الشيخ ده او العالم ده عنده ملكة في حاجة وحاجة لأ، لقيته بيقولي عارفة الشيخ محمد حسان؟ اخوه بقا ساكن جنبي، في مرة معدي جنب عربيته كان السواق بتاعه بيغسلهاله ومشغل مهرجانات بصوت عالي وفاتح العربية بالاربع ابواب فيها، طبعا انا سكت عشان منظر زي ده معروف ايه اللي هيفكر فيه بعد كده، وهكذا بقى، اهو الشيوخ دول بيطلعوا يقولوا ويعيدوا ويزيدوا وهم اصلا في الاصل كده؟ عايزني انا اسمعك وامشي وراك؟ فقلتله ما احنا قلنا المصريين لأ بقى

من هنا لهنا لقيتني بفرهد، فقال انا بقى عايز اما اقرأ في المصحف مثلا ولو هقعد في صغحة واحدة بس افهمها واحب اقراها زي ما انا سمعت العالم الامريكي كده وحاجة تقنعني، فقلتله بإذن الله هوصلك انا 😂 بس من جوايا حسيت بقفلان بسيط كده قلت ألحقه قبل ما يكبر وقمت روحت وانا حالفة ما هتكلم في حاجة زي دي تاني لوحدي من كتر ما بقى بيقفل كل السكك اللي بحاول افتحهاله وشوية عايز حد يساعده وشوية لأ، ومشيت.

3 notes · View notes