#حد يرجعني الشغل تاني بسرعة أو يوديني على بيت خالتي

[lsd-l]

الحياة بكل مافيها مؤخراً بقت ملخص لكلمة "عبث"

كل شيء عبثي ومش مفهوم ومحدش فاهم إحنا رايحين على فين ولا جايين منين، لأ إحنا جايين منين والله؟

كل حاجة حواليها علامات إستفهام بالهبل ومش عارفين مين اليد العليا اللي متحكمة في العالم بجد؟ أصل أنا متخيلة العالم فيه من فوق كدة إيد كبيرة ماسكة خيوط عرايس لعبة بتحركهم على مسرح كبير، كل عروسة فوقها إيد تانية صغيرة بتحركها على حركة الإيد الكبيرة، أنا واثقة إن مفيش أي حاجة بمزاجنا ولا قرارتنا أو قرارات العالم هي قرارتنا فعلاً، والتمثيلية دي لما تخلص الله أعلم إيه اللي ممكن نشوفه ده لو كنا موجودين، مابقتش عارفة المفروض نثق في مين ونصدق إيه ونؤمن بإيه، إحنا مين وجايين هنا نعمل إيه واللي بيحرّكنا ده عايز يوصل بينا لفين؟ يعني إيه مغزاه من ده كله؟ واذا هو بشر زيّنا فا هو جاب القدرة على اللعب بإحتراف دي منين؟

ساعات بحس إن ده كله كذب، إحنا عايشين في خدعة وكذبة كبيرة وإحنا بنكذب كذبات صغيّرة، عايمين على عومهم ولو غرقوا هنغرق، بس اللي واثقة منه إنهم مابيغرقوش لإنهم بكل بساطة قربوا يوصلوا للي هما عايزينه، دماغي كل يوم بتخلق أسئلة مالهاش إجابات بس في الآخر بتنتهي بحرب صعبة جوايا، أعتقد هو ده جحيم الوعي، كان نفسي ماكونش بفكر ولا بربط حاجات ببعض وبفك حاجات تانية، مش عايزة أفكر غير في اليوم بيومه وحياتي أنا بس، أنا مالي بالكوكب يعني؟

بس برضو بقول كويس إني بفكر في العالم اللي إحنا فيه بس مش في العوالم التانية، أصل أكيد إحنا مش عالم واحد وكوكب واحد عليه حياة، أكيد فيه عوالم تانية فيهم 11 كوكب منهم كوكب واحد عليه حياة زيّنا، أوقات بتسائل شكل القمر بتاعهم حلو زي القمر بتاعنا ولا في فرق؟

الطبقية في كل حاجة بقت ملحوظة بشكل كبير والتفرقة والخطط كل يوم بتبان، أعتقد محدش فقير بمزاجه ولا حد غني بمزاجه، كل ده متخططله، أو يمكن في قرابين معينة لازم نقدمها علشان نوصل لطبقة معينة، والقرابين دي نوعاً ما معروفة، فين مقاييس الصح والغلط؟ فين الفلسفة الأخلاقية؟

إمتى العالم هينتهي فعلاً؟ أعتقد إن إحنا مش م��يّرين ولا مخيّرين، ممكن 50/50 .. لكن طالما في ناس مش بمزاجها حاجات كتير والناس دي مكتوبلها منذ قديم الأزل إنها تكون بالشكل الفُلاني، اللي هو الخير أو الشر، فا حياتهم التانية هتكون مُختارة برضو؟ يعني مكتوبالهم من قديم الأزل كمان زي حياتهم الأولى .. ولا إحنا بنعمل إيه هنا وهنعمل إيه بعدين؟

معقولة إحنا بنتخدع وبنتظلم ولا هنعيش في مساواة في نهاية رحلتنا، والعدل هيبان بعدين ممكن؟ طب لما هو هيبان بعدين، إيه اللي جابنا هنا من الأول؟

الغاية من وجودنا هي فين مش قادرة ألمسها ولا قادرة أقتنع بحاجة حقيقي، وده في حد ذاته شيء مرعب ماتمناهوش لألد أعدائي،

العيشة في شك كبير بتكون لعنة على صاحبها مش بعيد يخلّص على نفسه من أفكاره أو أفكاره اللي تخلّص عليه .