#мусонылы

[udmurtanaj]

Софи вераське (4,7)

- Мама, мон но ымам шарик поно, я, бадӟым будӥ ке.

Соку ик ӧй валатскы, кыӵе-мар шарик поныны малпа, но берло валай ини, жвачкаен шарик пельтэмзэс адӟыса озьы шуэ ук та (жвачка кылэз уг тод на, ымаз но огпол но тырылэмез ӧвӧл на).

Ми Биялан, нош ик быдэс гужемлы татчы кӧчимы. Али постъёсы туспуктэмъёстэк луозы, м.к.ш. телефонме Москвае кельтӥськем.

[udmurtanaj]

Куке москваын буш, кезьыт но мӧзмыт

Мар но со ужъёсын сэрен кӧня ке нуналлы Москвае вуи. Пиналъёс мамаен доре кельтэмын. Нырысьсэ люкиськи соосын. Ну Софи дорысь кошкылӥ вал ини, роддоме :-) Мишилэн монтэк кыльылэмез ӧй вал ��а.

Билетъёсты укыр бырйыса ӧй ул ни, вылӥ полкае басьтӥ, огнам мыныкум сыӵеез но яралоз шуыса. Ӝыны вагон пиналъёс вал, дыр. Бызьыло, кесясько. Купеос дортӥ мынӥськод но, кин ке карандашъёсын пуке, кин ке шудонъёсыныз шудэ, кин ке пагӟа кузя туба но васька (улыно-вылоно Италмасэн мынӥ мон озьы), а мон малпасько ас поннам: "Инмаре, кыӵе мыным умой!!!" Пал Бекешлэсь "Чикаго" нимо книгазэ лыдӟыса мынӥ. Лыдӟеме вал ини мынам сое, но ваньмыз вунэм вылэм ини, нош ик туж тунсыко потыса выйи книгалэн сюжетаз. Пиналъёсын ветлыкум мон одно ик женской купее билетъёс октӥсько. Пиосмуртъёс олокыӵеез но луыло, тамак кыско, соргето, соин. Али мыныкум куинь кузя кышномуртъёс вал ми купеын но одӥг воргорон, со но вылаз изиз, ӵапак мон вадьсын. И быдэс уйзэ соргетӥз! Паровоз кадь. Вань нерваос быризы. Мон ӝыны уйзэ но ӧй кӧлы, дыр.  

Поезд бере сиён лэсьтэм уг пот, мынӥмы торговой центре. Кӧня ке магазинэ но пыраны кулэ вал. Со калыкез отын! Мон тышкаськисько, вань тань та ужтэк калгись адямиез бусыосы уриськыны, турнаны, араны келяны кулэ вал шуыса. Туфлизыя юбка утчась кышномуртъёсты эмезь, куды-мульы бичаны тэльёсы, дӥськут бырйись кышнооссы сьӧры калгись пиосты тракторе, комбайнэ пуктылоно ваньзэс! Сю миллион пластик тусьты-пуньыен сиськем интые мед будэтозы асьсэлы кияр-помидор. Выль дӥськутсэс одӥг сезон нуллыса куштэм интые мед келялозы гуртэ, отын вань ӟустари ас интызэ шедьтэ: я половиклы яра, я пуныослы-коӵышъёслы-чипыослы улазы поныны. Кыӵе смыслэз та городын улонлэн?! Йыры озьы бунтовать кариз толон.

Фермерской гамбургер сиим, чыры-пырыос басьтӥм, доре бертыны шуыса васькиськом вал ини нырысетӥ этаже. Мон ӝогак гинэ одӥг магазинэ ветровка учкыны пыри. Сэре пошло-поехало: куинетӥ, витетӥ, дасэтӥ магазин. Одӥгаз шедьтӥ вал ини кельшисьсэ, но мыным тупась размерез ӧй вал. Мукетысьтыз кыкез пӧлась одӥгзэ бырйыны б��гатымтэеным, Балаж мыным кыксэ ик басьтӥз. Огзэ, пе, дорад нуллод, мукетсэ татчы кельтод. Но коркамы дорын мон сётаки пырай на со сетьлэн магазиназ, кудаз мыным кельшись ветровказы бадӟым размерен гинэ вал. И ӵап татын мынам размере но вылэм. Мон сое басьтӥ. Ойдо, шуисько, та кыксэ берен нуом, кулэ ӧвӧл мыным соос. Мынӥм, берен сётӥм :-) Вот озьы нимпоттӥськом (тӥ тодӥськоды-а та кылэз?) пиналъёс ӧвӧлтэм дыръя. Площадкаос дортӥ ортчиськом, торговой центрын аттракционъёс вӧзтӥ мынӥськом, весь Софиен Миши син азе пуксё. Кыӵе буш, кезьыт, мӧзмыт соостэк татын!  

Ӝытазе изьыны выдӥм. Мон берыгъяськисько-берыгъяськисько, нокызьы но умме усеме уг лу, а дорын уйшор но ортчиз ини, сыӵе дыръя мон пукыляк жадьыса изисько Мишие вӧзын. Вань малпанъёс пиналъёс сярысь. Султӥ, мар карыны тодытэк пуки на телефонэн (изён азьын уг яра ке но, мукетсэ номыр карыны мыл ӧз пот).  Куине потӥз вал ини, мырдэм умме уси.

[udmurtanaj]

Шӧдтэк шорысь

Потӥмы туннэ площадкае. Софи гизен шудыны мынӥз, мон кыдёкынгес Мишиез лейкатӥсько. Гизь дорын егит анай пичи пиеныз шудэ. Азьло мынам соосты кык пол-а мар-а адӟылэме вал ини. Софи кышномуртэн вераськыны кутскиз. Кӧня ке улыса дорам лыктэ: "Мама, мама, чаль ай, а кызьы-о со тётялы шуоно, кызьы ми вераськиськом?" Я, мынӥ. "А на каком языке она говорит?" - юа мынэсьтым нылаш. "Я спрашиваю у неё, но она не может сказать" (зэмзэ вераса, "по-удмуртски", "по-русски" сочетаниосты Софи ӟуч кылын уз тод на вераны, со тодэ "мамалэсь" но "папалэсь" кылзэ, "удмурт" но "венгер" шуыса верамез вала). "На удмуртском," - шуисько. "Как, на удмуртском?! И вы сохранили свой язык?! Вы с ней сейчас говорите на удмуртском?! Мы тоже удмурты! Но мы не говорим, конечно". Собере ог ӝыны час пала вераським на. Площадка коркамы дорынгес ик, соин ик пумиськылом на, дыр.

Мон пиналъёсыным ноку но уг вераськиськы ӟуч кылын. И зэмзэ вераса мыным шуг вераны, макем Софи вераське ини та кылын яке макем ляб со сое тодэ. Но толон ми ветлӥм соин нылпиослы радъям мастер-классэ. Пиналъёс пластилинэн суред лэсьтӥзы. Ми отчы бергес вуим, соин ик азьлогес вуэм пиналъёс вазьгес кошкизы. Дышетӥсен кылиз Софи гинэ. Мон Миши сьӧры сопала-тапала ветлӥсько, м.к.ш. солэн шудэмез ӧз пот пластилинэн. Но пал пельыным кылӥсько ик Софилэсь вераськемзэ. И сыӵе ганяк луиз сюлмы нылылэсь ӟуч сямен вераськемзэ кылыса, сыӵе данъяськисько соин! Софилэсь ӟуч кылэз тодэмзэ нокызьы уд ӵошаты ас ёзъёсыныз. Но татчыозь, берло но со будоз кык кылъем семьяын - удмурт но венгер, нош куинетӥ кылэз ас визьмыныз, ас ��ыршеменыз дышетоз. Шуг вераны, кӧня ми улом на Москваын, но пиналъёсмы татчы школае но мынӥзы ке, 5-6 арес тырмем беразы ӟуч кылэз кызьы тодэмзэс шӧдыса мон тыршо соослы юрттыны, нош отчыозь мар "лякиськоз", сое ик тодозы. Нош нылпиос пушкы кылъёс туж ӝог пыӵало.

[udmurtanaj]

��ур ӵукнаен!

Мынам туннэ планъёсам:

- ӵукна пиналъёслы нуназелы мар ке но сиён лэсьтыны (аслым толлоез но яралоз)

- 11.30 котырын площадкае потыны

- 13.30-14.00 котырын бертыны но сиськыны. Мишиез изьтыны. Софи та виысь нуназе бере шер изьылэ ини

- Софи ӧз изь ке, соин лыдӟиськыны, буяськыны яке эшшо мар ке

- ӝытлы сиён пӧраны

-  17.30-18.00 котырын бассейнэ мыныны, собере площадкаын шудыны но самой берзэ 19.45 котырын бертыны

- пиналъёсты но папамес сюдыны но мультик лэзьыны

- 20.00-ысен 21.00-озь венгер кылъя урок ортчытыны

- изён азьын шудон, книга лыдӟон

- 21.30 котырын пиналъёсты изьтон

- 22.00-22.30-ысен ура, мар кареме потэ, сое ик карисько!!!

Тӥ но вань малпам ужъёстэс пумаз-йылаз вуттыны мед быгатоды!

Пы.Сы.: медовиклэн рецептэз татын, таязаз мон ӟег пызен пыжи, туж ческыт!

Нош тарк малпам ужъёсы пӧлысь мар пӧрмиз но мар ӧз:

- ӵукна пиналъёс туж бер султӥзы, Софи-то садике мыноно ӧвӧл ке ӵемысь озьы бабе, но Мишилэн сокема иземезлы ачим но пайми

- соин сэрен нуназелы сиён лэсьтыса ӧй ул ни, 11.30 потӥм педло. Софи кыдёке куриськиз площадкае, метро пала. Со ми дорысен 4-5 остановка. Отчы шудыны ветлыку ми мынонзэ пыдын мынӥськом (Софи самокатэн, но мон кыскисько, аслаз мылыз уг пот! Миши коляскаын пукыса), нош бертонзэ троллейбусэн яке автобусэн бертӥськом ини. Сокеме мынӥмы ини бере, ортопедической магазинэ пырам, аслым компрессионной чулки басьтӥ, Софилы ортопедической стелька, кемалась ӧдъясько вал ини.

- доре 2 час котырын вуим. Пиналъёслы ӝогак сосиска пӧзьтӥ, кияр вандылӥ на вӧзаз. Бер султӥзы бере, огзэс но ӧй изьты ни, нырысь 1 час пала мультик учкизы ("Три кота", туж ярато сое), собере шудӥм, буяським. Толон пластмассалэсь кибыос басьтӥ вал, бергес сётыны ӧдъясько вал так-то, но Софи рюкзакысьтым адӟыса вуттӥз но лул вылам султӥз соос понна, туннэ возьматӥ ини. Шудон сямен ӝытазелы горд чечевицаен шыд пӧрай. Кӧня ке выжез миськи. Огпол Софья кыӵе ке кибыеныз дорам вуиз плита доры. Ӧй лэзьы ке но отын сылыны, ӧз кылзы и со но валаса ӧз ву, мон но ӧй адӟы, индукционной плиталэсь одӥг конфорказэ включить карем. Сутскем зынэз шӧдыса ини ӝуась прихваткаез плита вылысь ӝутӥ. Толэзь талэсь азьло гинэ вури вал! Ну кызьы чидалод сыӵе дыръя пиналдэ кесяськытэк?! Софилы но сюриз.

- бассейнэ мыныны дасяським. Пятницаосы ми огшоры государственной садикысь бассейнэ ветлӥськом, Котьку ик ум, ку кызьы укша. Туннэ таиз дышетскон ар понна берпуметӥзэ ветлӥмы ини. Майысен отоплениез кысо, бассейнзы уз ужа ни. Соин но одно ик мыныны тыршимы. Уямзы бере пиналъёслэн кӧтсы сюма шуыса сьӧрамы кутыны ӝогак пичи табаньёс (оладьи) пыжи.

- бассейн бере поликлиника вадьсысь площадкаын шудӥм. Миши весь кутылысен шудысал. "Тут! (кут!)" шуыса сьӧрам ветлэ. Бызисько ке сэре чир! поттыса кесяське. Отын ик Софья но кутыны косэ ини. Вот бызьылӥсько сэре кык кечпиос сьӧры.

- собере доре бертон азьын чаляк гинэ "Перекрёсток" супермаркетэ пыраны малпай. Отын Сбербанклэн банкоматэз вань. Нырысь кулич басьтӥм. Кылем арын кык пумо пекарнялэсь басьтӥмы вал, тужгес но "У Палыча" фирмалэнэз кельшиз. Туэ сыӵезэ гинэ басьтӥ ини. Али аслам выреме ӧз пот малы ке но, так-то пыжылӥсько вал. Банкоматысен карточкаям уксё поныны ӧдъясько вал. Нырысь солы малы ке но уксёе ӧз яра, нош собере карточкаме ӧз сёт ни, всё, ужамысь дугдӥз!

- бертыкумы пеймыт вал ини, 20.30 котырын доре вуим. Венгер урокмес ӵуказелы пуктӥмы, соин ик нокытчы дыртонэз ӧй вал. Пиналъёсты ӝогак сюдӥ но ӝыны часлы мультик лэзи на ("Пеппа парсьпи" венгер кылын). Ачим мон 18.00 бере туж ик уг сиськылӥськы. Туж зол сием потэ ке, йогурт, банан, яблок кадьёс сиыны тыршисько. Выжез миськыса быдӥ.

- 21.50 котырын пиньмес сузямы но изьыны выдӥмы. Миши азьлогес ини "айда бабны мыном" шуса киме кысканы кутскиз ни вал (нуназе бере ӧз изе уга). Со туж чаляк умме усиз, нош Софилы Вук ӟичы сярысь книгазэ лыдӟи на (венгер книгаез удмурт сямен верай), собере чупаса-ӟыгыртыса потӥ дорысьтыз, умме усемзэ возьмаса ӧй ул ни.

- Балажлэн кыӵе ке бизнес-ужинэз учырам, со бер вуиз.

[udmurtanaj]

Софи вераське (4,7)

- Мама, кут ини йырсиме, со мынам куась ини. Котмем - кот, куасьмем - малы бен куась уд шу? :-)

***

Уг тодӥськы ни, кыӵе герой сярысь вераз вал, но Ми-ми-мишкаосын мастер-фломастер, пе, шуизы сое. Ломастер кылэз со, конешно, уг тод на, "не ломай!" шуыcа вазьылэ ке но площадкаын, нош фломастер кыл солы кемалась ини тодмо. Гениально малпасько мон :-)

***   

Книга лыдӟемын, тыл кысэмын. Изьыны выдӥмы ини.

- Мама, а Холли принцессалэн дэремезлэн тыбыраз пасез вань-а, а то со кызьы-о бурдъёсыныз дӥсялоз сое?

- О-о, пичие, - ганяк гинэ шуисько Софилы, ачим та мусо вераськемъёсызлэсь копак сиысал ке но ини дыдыме.

[udmurtanaj]

Софилы ньыль но ӝыны!

28-тӥ апреле Софилы ньыль но ӝыны тырмиз. Озьы ик вить но тырмоз ведь, шӧдыса ик уд ву.

Мар яратэ карыны:

- туж зол яратэ вуэз, шумпотыса ветлэ бассейнэ,

- площадкаын но со весь кытчы ке тубасал, кечыръяськысал,

- шукы пелляны (мыльные пузыри) яратэ,

- берло дыре туж тунсыкъяське анатомиен. Басьтӥмы кык книга адямилэн мугорыз сярысь, весь соосты учке, изён азяз но мадьыны косэ, соин сэрен ми асьмеос но трос выльзэ тодӥмы яке тодамы ваимы. Удмурт сямен секытгес ик вераны та тема сярысь, йырвиым, микроб, клетка, желудок, лёгкой шуыны тодэ ини.

- яратэ суредаськыны, буяськыны, краскаен но, фломастерен но,

- книгаос лыдӟыны яратэ, лыдӟытыны шуод-а, огназ учкыса пукемез уг пот, весь милемыз ёртэ, ойдо книга лыдӟом ��уыса,

- гужем паззлъёс бичаны кутскиз вал, сэре туж ик кулэ ӧз кар ни, но куддыръя пуксе но выре, Миши нуназе бере изьыку гинэ пӧрмылэ, м.к.ш. со Софилы гань-гань пукыны уг сёт на, пазя ваньзэ,

- кык суред вискысь пӧртэмлыкъёссэ шедьтонъя, лабиринтъёсын (кызьы лудкеч ӵуж кушман доры вуоз, кылсярысь) но мукет со мактал ужъёсын тетрадьёс бордын пукыны яратэ,

- яратэ чебер дӥсяськыны, ӵемысь ӝытазе ик вера ини, мар со дӥсялоз ӵукна, бырйиське, созэ уз дӥся, таиз уг яра. Гижызэ буяны косэ. Мон ачим шер буясько, но кытчы ке мынӥськом ке, одно ик вералоз врачлы, дышетӥсьлы, кыӵе солэн чебер гижыосыз.

Яратоно мультикъёсыз:

- берло дыре самой трос "Куинь маниосты" ("Три кота") учке. Ог кык толэзь талэсь азьло "Том и Джерри" лэзи вал соослы, собере нуналлы быдэ сое курылӥз. Миши "Синий трактор" сериысь мультикъёсты куре ялан. Куддыръя кыкназылы но нимаз возьматоно луэ, а то огезлэн тазэ потэ учкемез, мукетызлэн созэ. Озьы ик яратоноосыз пӧлын "Пеппа парсьпи", "Маша но гондыр", "Jonalu", "Pocoyo", "Benő manó", "Bogyó és Babóca",  озьы ик "Hey kids" но "Kerek dalok" cериысь кырӟанъёс, "Kicsi gesztenye klub"-лэн кырӟанъёсыз.

Яратоно сиёнъёсыз:

- пельмень, вареник, тыкваен тари ӝук, йӧлын шыд, лапшаен шыд, борщ, картошкаен пыжем чорыг, кукурузаен котлет (тазэ ачим уг лэсьтӥськы, одӥг магазинысь полуфабрикат басьясько), яблокен нянь (almás pite), кияр, яблок, банан, Kinder молочный ломтик. Тазэ сырок гинэ шуисько ини солы. Мон ачим но яратӥсько сое, тужгес но яратӥсько ӵукна чай вӧзы сиыны, и мон азьло ик тодӥсько ни вал, нылылы но со кельшоз шуыса :-) Озьы ик луиз. Огшоры творожной сырокъёсыз Софи туж ик уг сиылы, но киндэрез ноку но уз палэнты. 

***

Софи садике рос-прос ӧз ик ветлы на. Кылем гужем Биялан ветлӥз, Будапештын дыръя ветлылэ. Москваын частной садике нуллӥмы, но мартэ ветрянкаен висемез бере одӥг нунал ветлӥз но нокызьы но нуэммы ӧз лу ни. Мынам, пе, нуназе бере дӥськутме кылеме уг поты, калготкиен но дэремен иземе потэ. Вот сыӵе муг сюриз. Нош садиказы соослэн ӝокыт, верай ке но воспитательёслы, соосыз кылиськыны косо, лэся. Ӵемысь верасько Софилы, мон ужаны мынӥ ке, соку потэ-а, уг-а, одно ветлоно луоды ини шуыса садике. "��" шуэ но, адӟом ини, кызьы сэре мыноз. Гужем Биялан луимы ке, нош ик ӧдъясько сое отысь садике нуллыны. Тыршисько пӧртэм шудон площадкаосы ветлыны, куддыръя автобусэ пуксьыса но мынӥськомы, разнообразие мед луоз шуыса улоназы. Шутэтскон нуналъёсы аттракционъёсы, паркъёсы поталляськом.

[udmurtanaj]

Софи вераське (4,4)

Софи садикысьтыз ветрянка вуттӥз. Таӵе чебересь ми али. Таре возьмасько, ку Мишимы "сяськаяськоз".

Туннэ Софи шуэ:

-Куке мон пичи вал и мон вордскыкум тынад кӧтысьтыд йырме поттӥ, врачъёс юазы:

- Как тебя зовут?

А мон шуи:

- Э-не-не-не-не!

Быдэс ӝытсэ горисько ини :-)

[udmurtanaj]

Нылпи площадкаос Москваын туж умоесь

И соос трос. Соос ог-огзылэсь кыдёкын ӧвӧл.

Ми ӵемысь одӥг потэмысьтымы 2-3 площадкаын шудыса бертӥськом.

Мынӥськод кыӵе ке площадкае, нош 100-200 м кемын мукетыз адске ини. Котькыӵе поликлиника дорын одно ик шудон инты вань.

Со туж удобно.

Жаляса верано, Будапештын площкадкаос трослы ӧжытгес.

Таиз Берёзовая роща нимо паркын.

Мишилы ӝоген кык арес но ньыль толэзь, Софилы ӝоген ньыль но ӝыны арес. Ярато ӵошен шудыны. Миши тужгес но весь Софиен гинэ лейканы но, нискыланы но турттэ.

[udmurtanaj]

13.04.2019 бассейн бере

[udmurtanaj]

- Мама, кӧты шумпотэ! - лейкан сяменыз кесяське вал Софья, куке "кӧты шурдэ" шуыны уг тод на вал ай.

[udmurtanaj]

Йыртэмасе мынам

Феврале висьыкумы пиналъёслы ныразы пазян эмъюмъёс басьтӥ вал, кыкназылы но пӧртэмзэ, медаз сураське шуыса. Комод вылын сылӥзы соос, нокинлы ӧз люкетэ. Толон син шорам йӧтӥзы но малпасько, холодильнике поно ини мон соосты. Учкисько, Софилэн пияла банкаяз одӥг шапык но эмъюмез ӧвӧл ни. "Кытчы-о луиз нырад пазян эмъюмед?" - юасько. "Мама, Миши озьы кариз". А Миши отчы уз сузьы, мон тодӥсько. "Мар-о карид соин, кытчы-о пазяд?!" "Мама, только эн кесяськы, я, эн кесяськы!" ... Синучконмес миськем соин. О, май гад!

[udmurtanaj]

Висиськом. Быдэс арнязэ ини дорын пукиськом. Мон жадемын.

Арня нунал Софилы шуисько:

- Ӵуказе поликлиникае ветлом.

- Малы?

- Чыртыдэ возьматом.

- А тётя мынэсьтым чыртымэ мороженойлэн пу бодыеныз учкоз, о-о?

- :-))))

Миши кылъёссэ Т букваен кутскыса вера:

- танан (банан), танат (гранат), татот (компот), тибы (кибы), танаи (чонари), тӥяй (кияр), тыс! (кыс), таттӥ (быдтӥ), тус (busz, автобус), тюсь! (csüccs! пеп!)

[udmurtanaj]

Будапешт 20.10-06.11.2018

Укно сьӧрын толсур, ми ӝоген дорамы бертом бабамы доры. Нош ик чемоданъёс дасяно, нош ик таксиос, вокзалъёс, трос калык, кунулын кык пиналъёс... Софья куинети арнязэ садике ветлэ. Мон малпасько вал, со-о-омында ужъёс лэсьто нылы садикын дыръя, нош зэмзэ ке верано, постъёс уг гожъясько, книгаос уг лыдӟисько, сиён гинэ ке шат мылкыды вань-а, ӧвӧл-а, котьку лэсьтӥсько, пиналъёсты сюдоно ук.  

Тазьы лад-лад гинэ кутски вал мон гожъяны та постме 2 толэзь талэсь азьло. Али кужмысь асме пумаз-йылаз вуттытӥсько ини. Тулыспал толэзе.

Дыр вань-а, ӧвӧл-а, мылкыд вань-а, ӧвӧл-а, Будапештэ ветлэммы сярысь гожтоно, вунэ ук ваньмыз. Нош куке но, оло, Софи но шумпотыса лыдӟоз али пичи дырыз сярысь. Со сяна, адӟем интыосмы гожтыса мед кылёзы, асьмеос но отчы вуылом на, нош эшшо, кин тодэ, Будапештын улӥсь но отчы вуылӥсь анай-атайёслы но яралоз, оло. 

Кылемез сӥзьыл Москваын туж чебер вал. Ми дорысь 15-тӥ сентябре вуим вал, нош Будапештэ кошким 20-тӥ октябре, со вискын самой троссэ ог арняос зориз, дыр, шуныт, шундыё зарни сизьыл вал. Таӵе кузь бабье летоез мынам адӟылэме но ӧй вал на кадь ай. Нош Венгрие вуэммы бере отын воксё 20-25 градус кариськиз, милям сыӵе шуныт куазьлы рос-прос дӥськутмы ик ӧй вал сьӧрамы. Сӥзьыл нуллон демисезонной курткаосмес трос ик ӧм дӥсяллялэ. Софи пич кылем ветровкаеныз ветлоно луиз. Таӵе сизьыл бере пеймыт, кезьыт толалтэез пумитаны но сокем кышкыт ӧй вал ни.

Таязаз ми Венгрие люкиськыса мыноно луимы: Балаж машинаен, мон кык пичиосын самолётэн. Кышкытгес ик вал, азьло но мон соосын огнам кык пол лобалляй ке но ини. Чемоданъёсы мынам ӧй вал, рюкзак но Софилэн пичи чемоданэз, курткаосмес пакетэ понӥмы на. Аэропортэ дырыз дыръя вуим, такси пробкаын кема ӧз пукы, но мыным Аэрофлотлэн офисаз ветлоно на вал, м.к.ш. билетъёсты басьтыку мон пичияк янгышай. Телефон пыр жингыртыса Аэрофлотын шуизы, лобӟон азьын но ваньзэ тупатыны луоз шуыса. Аэропортысен ини мон шоры мар ке быдӟа синъёсын учкизы, малы таӵе бер вуиды шуыса, но т-т-т, ваньмыз дырыз дыръя радъяськиз.

Софиен луэ ини вераськыны, возьмано, чидано, татын сылоно шуыса. Мишиен со ласянь секыт али, но со но пумен валаны кутске ини. Нонэмысь дугдэмез бере ог ӝыны ар пала солэн самой юн буйгатӥсез юонэн бутылкаез вал. Будапештэ мыныкумы но ог ӝыны часъёс Миши тани тазьы гань-гань пукиз компотсэ юыса.

Кызьы лобӟеммы но вунӥз ини, малпаськыса-малпаськыса тодам ваисько. Софья но, Миши но пичи но ӧз изе, дорын но нуназе бере ӧз изе вал, таксиын гинэ умме усьылыса вуизы. Мишиен одӥг полаз туалетэ мыныкумы Софи вылаз сок кисьтэм, калготкиез копак кот вал, пызьыртымон. Озьы ик мынӥз ини сэре, Будапештэ вуон азямы гинэ куасьмиз. Будапештэ мыныкумы аэропортын-а, самолёт пушкын-а ини, котьку кинэ ке тодмомес пумитаськом. Али но Будапештысь Финн-угор кафедралэсь кивалтӥсьсэ Клима Ласлоез пумитамы. Со Казаньысь конференциысь бертэ вылэм. Дорамы вуэм берамы пиналъёсты ӝытсэ маин ке но сюдыны кулэ луоз на шуыса, сьӧрам ӝук но кутӥ вал :-) Балаж соку ӧз на вуысалыз, магазинэ пичиосты огназэс кельтыса уд пот, а сиемзы потоз на. Йӧл гинэ ке сьӧре кутоно, уг яра, юонъёсты уг лэзё ук самолётэ пыртыны. Будапештын аэропортысен чемоданъёсмы ӧй вал бере, ми самой нырысетӥосыз потӥмы, лэся, возьмаськон залэ. Мон Софиез дӥсясько, Мишие со куспын пичи чемоданэз кутыса олокытчы кошке. Бызисько сьӧраз, пуктӥсько вӧзам, нош ик бызьса кошке. Озьы но тазьы дӥсяй кыкназэс но. Потӥськом ини. Кафеын ужась нылаш шуэ мыным: "Nem vagy semmi, anyukám".  Вуим дорамы, пиналъёс сиськизы-юизы-шудӥзы-умме усизы. И вот соку мон чаляк гинэ бызьылӥ ини 0-24 ужась магазинэ чыры-пыры сиён басьтыны. Софиен Мишиен жадемын вал, ныс-ныс изизы, мынэсьтым пегамме ӧз ик шӧдэ.

Нош мукет нуналаз 10.30 котырын ми Лулчеберетъя дворецын нылпи концертын пагӟаосты лыдъяськом эктӥськом ини вал. Котькуд арня нунал та дворецын Cifra palota (чибори дворец) нимо нылпи программа радъяське. Отын одно ик концертъёс но киужъёсъя пӧртэм мастер-классъёс, шудонъёс луо. Пичильтокъёслы но, бадӟымгес пиналъёслы но чакламын. Пыронэз дунтэк. Мон сямен арнялы быдэ анай-атайёслы нылпиоссэс таӵе программае нуллыны луонлык сётон - со туж умой. Эшшо ӵап эстон но финн выставкаос вылӥллям отын. Ми отчы ӧм пыралэ, конешно.

Талэсь "эстонгес" пинал вал меда та адӟытонын?

Финн нылпиослы пырон дунтэк луысал ке, милемыз лэзьысалзы, дыр, Салла Тюккялэн выставкаяз.

Чеберлыкъя дворец бере площадкаын шудӥмы но доре бертӥмы бабны - Москваын-а, Будапештын-а, таиз милям нуналлы быдэ программамы.

Дырыз дыръя ӧй ӝуткаськы бере гожъяны, блокнотэя учкисько ини, 22-тӥе нош ик Лулчеберетъя двореце крезьгуръя занятие ветлӥмы шуыса. Будапештын улэммылы быдэ сыӵеосы ветлӥськом. Мусо дышетӥсь, мусо пиналъёс, мусо кырӟанъёс. Только Миши мынам кырӟам интые выж вылын тросгес погылляськиз, дыр.

Билетъёс сыӵе занятиосы чаляк быро, ваньмыз Москваысен ик басьтэмын вал ини, соин ик одно мыноно вал.

Укноос, пагӟаос... - куазь зорыку пиналъёслы огшоры поръяны гинэ но кельшозы отын.

23-тӥ октябре Балажлэн Будапешт вӧзын улӥсь двоюродной сузэрез доры ветлӥм. 5 ар ӧм пумиськылэ ни вал. Пиналъёссы воксё будӥллям. Соос милесьтымъёссэ нырысьсэ адӟизы. Азбаразы но, коркаязы но трос шудӥм, вераським, только вот выжзы туж кезьыт вал, Софи но, Миши но висьны усизы (((

24-тӥе ӵукна мон пиналъёсын садике мынӥ. Софи - быдэс нуналлы, мон Мишиен - одӥг часлы гинэ. Висёнзы укыр алямын ӧй вал на. Собере ми Мишиен крезьгуръя занятие кошким. Занятимы бере Сираки Жофи эшеным пумиськылӥм. Урамын зоре вал, соин ик Лулчеберетъя дворец пушкын ик Мишилэн пагӟаости но эскалаторен уллань-выллань тубан висказ вераськыны вырим. Ӝытазеяз Евдокимова Маша удмурт эшеным пумиськылӥм на.

25-тӥе мар кареммес уг но тодӥськы ни (вот малы татчыозь нуйтоно вал?!) Софи садикын вал.

26-тӥе ӵукназэ пор Иринаен пумиськылӥ. Софи садикын вал, нош мон Мишиен Дунай вӧзысь площадкае мынӥ. Ира но 5 толэзьем Марк пиеныз отчы вуиз. Собере пӧртэм административной ужъёсын вырим, нош ӝыт Бианкаен но мамаеныз, Юляен пумиськылӥмы. Kac-Kac нимо аттракционъёсы ветлӥмы. Ӵапак ар солэсь азьло Софилэсь Вордскем нуналзэ отын пусйим вал. Миши соку пичи на вал, вылысьтым ӧз васькылы, туэ гинэ рос-прос адӟи ини мон со интыез. Софи укыр ик ӧз висьы, нош Миши со нунал зол висе ке но вал ини, мон сое но сьӧрам кутӥ, м.к.ш. шумпотон эмъя, нош аттракционъёсты соос кыкназы но ту-у-ж ярато. О��кисько, мукет пиналъёс милесьтым ӧз палаське.  

27-тӥе, Софилэн Вордскем нуналаз Lurdy ház нимо торговой центрысь аттракционъёсы ветлӥм. Туэзэ асьме понна гинэ ӟечкыламы Софиез. Татын пиналъёс кыкназы но жадьытозязы шудизы. Сиськыны потаммы бере Миши Балажен машина доры васькизы бабыны, нош ми Софиен выльысь пырыса шудӥмы на. Татчыозь ми куинь пумо аттракционъёсын вал - Eleven park, Kac-Kac но Каlandpark. Куинетӥез самой зол кельшиз. Ӝытазеяз Пишта бачи нимо тодмомы доры ветлӥмы. Дедушлы 80 арес ини, но со трослы пиналгес адске, егит дыръяз тодмо уясь вылэм, Совето Союзэ но трос пол вуылэмын пӧртэм ӵошатсконъёсы. Гужем Венгриын улыкумы ми со доры Балатон дурысь дачаяз ветлылӥськомы.

28-тие Symbol нимо ресторанэ но концерт радъян интые ветлӥм. Тулыс ми отчы вуылӥм вал ини, кельшиз вал. Софилэсь Вордскем нуналзэ тортэн-маин татын пусъём шуыса малпамы. Таязаз концерт отын ӧй вал, шведской меню но нылпиослы шудон инты. Одӥг аниматор но клоун вал. Ми гань-гань сиськимы (огшоры ресторанъёсын, кафеосын кык пичи пиналын озьы гинэ уд сиськы уго). Шудэм сяна, пиналъёсын пицца пыжо но маффинъёс чеберъяло. Софи но йӧндыриз ини. Торт но сюсьтылъёс асьмеос нуимы, крезьгур лэзьыса но фейерверк ӝуатыса поттӥзы сое. Оглом ваньмыз кельшиз.

29-тӥе Софи садэ мыниз. Мон Мишиен крезьгурья занятие кошки. Ӝытазе Балажлэн двоюродной сузэрез дорамы куное пыраз.

30-тӥе Софиен Мишиен садике кылизы. Мишиез мон ӝыны нуналлы гинэ кельтыны ӧдъясько вал. Ми Балажен кошким пӧртэм документъёс лэсьтыны. Одӥг интыысь мукетаз, кыкетӥысьтыз куинетӥяз... Котькытын возьмаськоно. Ум вуиське ни Мишимес басьтыны. Звонитьтӥ, юасько, мар каре ини. Бӧрдылэм ке но, оглом вераса умой возем ассэ. Тани-тани умме усёз ини, пе. Нуназе бере вазьгес ке но басьтӥм соосты, Миши ту-уж бӧрдоно кадь вал ини, жадем, мискине, мамаезтэк. Калтыртон сяменымы одӥгаз торговой центрысь дунтэк вай-фай шедьтыса, усьтыр-табыр коляска утчамы, м.к.ш. азьлоез сӧриськон калэ вуэмын вал ини. Я, шедьтӥм, укыр кыдёке мыноно ӧвӧл. Балаж мынӥз коляскалы, ваиз. Мукет нуналаз пиналъёсыным лифтэ пырисько но, коляскае уг тэры! Дыртонъямы ми чик ӧм ��алпалэ сыӵе югдур сярысь. Берен ӧм нуэ ни, таре киын васькытъяно луэ, мар карод. Ӝытазе удмурт эшеным Маринаен пумиськылӥм. Со кык пиосыныз ми котырысь площадкае вуиз.

31-тӥе нуназезэ чыры-пыры ужъёсын, документъёсын вырим, нош ӝыт пал Софиез садикысь басьтыса ветлимы Apacuka нылпи ансамбльлэн Хэллоуинлы сӥзем концертаз. Софи ведӥн дӥсяськиз, Миши - шайтан. Кӧня ке бергес вуим, концерт кутскемын вал ини. Миши пумитъяське, уг пот пыремез, муз вылын погылляське, мырдэм но кызьы ладъяськиз. Концерт шулдыр вал, мон ачим но яратӥсько соослэсь кырӟанъёссэс, но укыр вакчи потӥз милемлы.

Али кытчы ке мыниськомы ке, милям одӥг шугъяськонмы: Миши жадемын ини, нош Софилэн кошкемез уг поты на. Кыкназы но ас палазы берыктыны туртто.

Концерт бере пиналъёсын пӧртэм киужъёсын выризы на, Софи суредаськиз, бумагалэсь тыква лэсьтӥз, Миши но мар ке дармантӥз ас понназ.

1-тӥ шуркынмонэ нуназе котырын мон пор эшеным Таняен пумиськылӥ. Котьку сямен ик площадкаын. Площадкаос али мынам вань эшъёсыным пумиськон инты луизы. Дорамы бертыкумыБорарош площадьысен Алёна шуыса куаретӥсь луиз. Москваысь Лена нимо эше вылэм, Ира сузэреныз. Ленаен но 5 ар ӧм адскылэ ни вал. Вот сыӵе пичи со - Будапешт. Сиськыса-мараса пиналъёслэн изён дыръязы Гёд нимо пичи городэ кошкимы эшъёсмы доры. Ӝытазе шайвылэ ветлӥмы. Венгриын со нунал поминка порма праздник. Кык но ӝыны арня Будапештын улон куспамы кыкетӥзэ ини кузь шутэтскон нуналъёс кутскизы. Ваньзы шумпото, нош милемлы ӧзгес тупа со, кылсярысь, Софи но садике ветлыны ӧз быгаты. Озьы ик мыным пӧртэм документъёс люкано вал, нош ужан нуналъёс трос ик ӧй вал.

2-тӥ шуркынмонэ Ленаен, Ираен но пиналъёсын площадкаын пумиськылӥм. Ог 2 час пала вераськыса сылӥм, Миши со пӧлысь 1,5 чассэ муз вылын кыллиз. Куазь кезьыт ӧй вал, нылъёсын таре олоку пумисько на, лейкамез уг пот, коляскаяз уг пуксьы, шудонъёс кулэ ӧвӧл, соин ик кыллёд ке, кыллёд шуи ини, мар карод. Собере ми вӧзы Москваысь эшшо одӥг кышномурт итӥськиз на, со внучкаеныз потэмын вал.

3-тӥ шуркынмонэ ӵукна Маргит шормуӵысь площадкае ветлӥмы, отын одӥг тодмо бабуэным пумиськылӥ, нош ӝытпал эшъёсмы доры ветлӥм, соос ас коркаязы уло, пунызы, хомяксы, коӵышсы в��нь - пиналъёс шедьтӥзы асьсэлы шудон.

4-ти шуркынмонэ ӵукна папамы берен Москвае кошкыны дасяське ини вал. Мынам азьло ик гожтыса кельтэмын вал Buborék нылпи ансамбльлэн концертэз, но билет ӧм басьтэ на вал, оло, мыном, оло, ум шуыса. Кема ик малпаськи, мар кароно, кык пичиен быгато-а меда шуыса, но ӵукна султыса ветлоно ик кариськи. Таиз концерт огшоры ӧй вал, теплоходын радъяло вал сое. Куазь туж чебер вал, нош ик беромыса ке но, вуим ик. Нырысь ик концертэз кылзӥм, собере шудыны ваським (улыно-вылыно теплоходын со озьы).

Та программа час но ӝыны кыстӥське. Ӝыны час ӵоже теплоход интыяз сылэ на али. Соку нылпиед кышказ яке мар ке, тӥ потыны быгатӥськоды на.

Собере час ӵоже Дунай кузя ветлэ ини.

Мынам туж кемалась луиз вал ини теплоходэн ворттылэме. Будапешт сыӵе чебер!

Синвуэ ик потиз, таӵе чебер городысь, таӵе паймымон сӥзьыл куазьысь кошконо ини шуыса.

Софилэн сыӵе бертэмез уг пот на вал, сыӵе бӧрдиз, сыӵе жаль потӥз со мыным. Нош Миши жадемын вал ини, бертыкумы метроысен умме усиз. Билетъёс дунтэмесь ӧвӧл, но ми таӵе программае одно ик ветлом на.

5-тӥ шуркынмонлы мынам Мунё театре билетэ вал. Одӥг ласянь, номыр сыӵе-таӵеез ӧвӧл кадь та бордын, но мукет ласянь мыным со нунал (понедельник вал со, кузь выходнойёс бере) одно ик миграционной службае ветлоно вал. Мар кароно?! Балаж кошкиз ини. Садик 8 часын усьтӥське. Миграционной офис 8.30-ын. Пиналъёсты садике нуи ке, отчы мон туж бер вуо ини, мар ке быдӟа черод луоз. Нош тетаре 10 часлы мыноно. Ӝытазеяз Софилы сю пол верай, ӵукна султӥд ке, эн куалекты, ми Мишиен кошкемын луом, нош тон султы но кухняе сиськыны мын. Одӥгезлы бускельмылы ключме кельтӥ, бордэм куараез кылӥд ке, пыра шуыса. Мишиен 8 часын ми миграционка дорын вал ини. Черод маке быдӟа. Инмаре, кызьы сылом ини?!!! шуыса малпасько. 8.15 котырын усьтӥзы, номероклы сылӥськом таре. Пиелэн сокез быриз (со вакытэ юонэн бутылка солэн самой главной буйгатӥсез вал шуыса гожтӥ ини вал), кесяськыны кутскиз. Соке мынам рюкзакам вал на али, но со так но маке мында юиз ини. Номерок сётъясьёс пӧлысь одӥгез кышномурт жаляз монэ, ӧтиз дораз, мон берат гинэ адӟи ини, со но нылпи возьма вылэм шуыса, тау солы. Собере ог 40 минутъёс мон документъёсме сётыны выри на. Миши кызьы ке но чидаз. 9.30 котырын, дыр, ми автобусэ пуксимы. Доре 10 котырын вуимы ини. Мишиез коляскаысьтыз ӧй ик васькытылы, Софиез чаляк дисяй но урмыса кошким садике.  Миши кошкемме адӟыса бӧрдыны кутскиз, кылемез уг пот, воспитательёслы "вождэс эн вае, но мон али мукет сямен карыны уг быгатиськы" шуыса Софиен бызьыса мунё театре кошким. Чалякгес мед вуом шуыса, коляскаен нуи мон сое. Со нунал Миши коньы сярысь спектакль возьматӥзы. Укыр бер вуим шуыса, нырысетӥ актаз милемыз ӧз лэзе ни. 10.20 котырын вуим ми отчы. Спектакль мусо, но кӧтмы ӧз тыр, табере Будапештэ ветлыкумы нош ик вуылыны тыршом. 12.30 котырын вуим садике Мишимес басьтыны. Уг бӧрд ни вал, но лыктэммылы туж шумпотӥз! Таӵе приключениослэсь, лэся, 2 но ӝыны арня куспын мон 2 кг-лы начармиськем.

6-ти шуркынмонэ Лулчеберетъя дворецэ билетмы вал, Вук ӟичы сярысь спектакле. Балет шуод-а мар-а сое, эктыса возьматӥзы. Таязаз укыр куасалтӥ кадь мон программаосын. Москваын ваньмыз кыдёкын шуыса-а мар-а Будапештын пиналъёслы мар быгатӥм, ваньзэ возьматэм потӥз. Со сяна, Москваын ваньмыз ӟуч кылын, нош татын анай кылынызы кылзо, учко, кунгож сьӧрын улэменызы йырин вань адӟымтэзэ восполнять каро. Мынам планъёсыя Мишиез изьтыса кельтоно но чаляк гинэ со спектакле ветлоно вал. Со изьыкуз одӥг эше кухняын пукоз шуыса вераським вал. Вукмы нуназе бере 3 часын кутске, ӵап Мишилэн изён дырыз. Ӵукна но вазьгес ик султӥз вал. Кошкон дырмы вуиз но, пие уг изьы. Коть пилиськы, уг изьы! Сыӵе дыръя мон куддыръя ӧсме пыдсасько но потӥсько со дорысь, шуд, собере изь шуыса. Кӧня ке улыса со умме усемын луэ ини. Мар карыны ёрмыса, соку но озьы ик кельтӥ вал. Умме усьыса вуэм ик-а меда пие, ӧйтӧд, ми кошкем берегес ик потэм но собере весь бӧрдыса улэм. Вуим спектаклямы, кутскемезлэсь азьло ай пиналъёс ӵаш! потто, сыӵе мусо. Быдэс классъёсын лыктэмын вал кадь. Москваын сыӵе лир-люр! уг луы, анай-атайёссы представление мынымтэ дыръя но шыпытгес вераськыны дышето, лэся. Милям спектакльмы час ӵоже мынӥз, антракттэк. Ваньмыз туж мусо вал, чебересь костюмъёс, чебер крезьгур, оформление, мыным Вук ӟичыез нылаш шудӥз шуыса гинэ ӧз кельшы. 16.30 котырын ми дорын вал ини. Нош Софилэн сыӵе уг пот на вал кошкемез!

Инмаре, таиз бӧрдэ, спектакль учко на шуыса, дорын Миши монэ ыштыса бӧрдэ! Коркамылэсь пырон ӧссэ усьтыкум ик кылӥ ини кесяськемзэ.

Тамында концертъёсы, спектакльёсы ветлыса, таяз аре нокытчы но уг мын ни шуыса малпай вал, но ноябрь пумын ми Софиен нош ик мунё театре вуылӥм, Москваын ини.

Софилэсь Будапештын дыръямы гожтэм вераськемъёссэ кельто на татчы.

Одӥг пол ӵукна ваньмы ӵош шудӥськом спальняямы. Шкаф выламы черешняпулэн вайёсызлэн вужеръёсыз адӟисько. Софи шуэ:

- Nézd, apa, báboznak a fák!

(- Учкы ай, папа, вайёс вужер театр/театр теней шудо!)

***

Садикысь басьтэм берам Софилэсь юасько:

- Мар-о сииды ай туннэ садикын?

- Гизесь макарон сётӥзы туннэ, фу, мон уг яратӥськы сое! Мон ӧй сиы!

Манной кеньырен лапша сётӥзы, дыр, таослы шуыса малпай вал нырысь. Венгриын со сиёнэз пиналъёс туж ярато. Манной кеньырез вӧй пушкын кӧня ке жарить каро но сое пӧзьтэм лап��аен сурало. Вылаз варення поно на. Аслам огпол но верьяме ӧвӧл, но тодӥсько, сыӵе сиён вань шуыса. Мукет нуналаз садикысен адӟи ини, изэм грецкой орехен лапшаез озьы шуэм вылэм нылы.

Бертӥмы уйин. Самолётын одӥг буш инты но ӧй вал кадь. Аэропортысен мынэсьтым сопала-тапала бызьылӥсь пиналъёсме адӟыса но мон соосын огнам шуыса куд-ог ӟу кышномуртъёс в шоке вал, мон сое тыбырыным ик шӧдӥ. Самолёт инме тубыку Миши зол бӧрдӥз, пукемез уг пот...

Москваын 5 котырын вуим, дыр, доре. Балаж 2 час котырын пырем. Ӵап милям вуонмы азьын вуэм со но. Софи чаляк изьыны выдӥз. Миши нокызьы но уг изь. Мультик включить карыса ини умме усиз сэре. 12 котырын султӥмы вал кадь дэмен. Сэре нош ик каллен ваньмыз ас интыяз пуксиз. Доре бертытозь.

Вот сыӵе вал ��аязаз ветлэммы. Вождэс эн вае, Будапештысь удмурт студентъёс, но алияз нокинэн пумиськыны ӧз пӧрмы. Нош тулыс ми ум мынэ Венгрие, малы ке но билетъёс туж дуноесь али :-( Оло, гужем вуом ай.

Кин пумозяз лыдӟиз - тӥ геройёс!

[udmurtanaj]

Кыӵе ми жадимы дорын пукыса! Пятницае садикысь бассейнэ уяны ветлӥмы ини, чаляк гинэ, выльысь медам кынме шуыса. "Зэмос", бадӟым бассейнэн ӵошатыса, кытчы ми субботаосы ветлӥськом, татын вуэз шунытгес луэ, соин ик таязаз отчы гинэ потамы. Туннэ ӝытазе аттракционъёсы ветлӥм. Пиналъес лӧптэмын вал, но висемзылэн бервылыз шӧдӥське на: чаляк жадизы. Пуэд, кошкы кыдеке, эн берытскы ни дорамы!  

Cофилы ноку укыр льӧмлет, сюлэмъёсын дӥськутъёс басьяме ӧй вал, озьы но сыӵе дӥськутэз яратон дырыз вуиз. Мон ӵемысь унисэкс дӥсь басьтылӥсько, тужгес но курткаос, сапегъёс, нош табере солэн ӵужзэ, вожзэ, лыззэ дӥсяны мылыз туж ик уг пот ни. Табере "таиз пичи кылиз ке, сюлэмъёсынзэ басьтод-а" шуыса юа. "Кызьы-о бамдэ буяны косод? Мани? Тигрик?" - юасько туннэ. "Сюлэмъёсын!"

[udmurtanaj]

Софи вераське (4,1)

Площадкаын шудüськом лымылэсь мороженой лэсьтыса. Юромо кемаласьгес сием емышъёсты тодаз мед ваёз шуыса крыжовникен но тури эмезен мороженой курисько. Мукет нуналаз Софие кынтэмзэ мычыса шуэ:

- Тани, мама, тыныд мороженой эмезен, палэзен...

***

Ог кык-куинь толэзьёс талэсь азьло изён азяз куинь гондыръёс сярысь выжыкыл ��еракум дыды интые Софи тэле мынüз шуыса верай вал. Табере ӵемысь озьы косэ вераны. Мон кӧня ке аслэсьтымзэ но будэтüсько: огпол Софи бабаез дорын улыкуз тэле мынüз. Бабаез сое узы, эмезь, губи бичаны куриз вал. Компот, варення пӧзьто, пирожки пыжо, пе...

***

Уг тодüськы ни мон, кытысен потüз та сяммы, но эшшо Софие туж зол яратэ, куке мон солы вераськы городэ ветлэмез сярысь "выжыкылэз".

Одüг пол Софи бабаез дорын улыкуз городэ ветлыны малпаз. Бабаез солы сьӧраз келяны шуыса пирожки пыжиз. (чалякгес вераны кулэ ке, тазьы гинэ, нош кӧня ке нунал талэсь азьло курег пузэн, ӵуж кушманэн, горд кушманэн, сüлен пирожки пыжиз шуыса верай вал. Туннэ Софи ачиз мыным вера ини, бабаез солы ӵуж кушманэн, киярен ))) пирожки пыжиз шуыса) Компот но пӧзьтüз. Софи ӵукна вазь-вазь султüз, йогурт юиз, пирожки сииз но автобусэз возьманы потüз. Автобусэз вуиз но, Софи билет басьтыса укно вӧзы пуксиз, собере гань-гань бабыса городозь мынüз. Городэ вуиз но, а отын трос-трос машинаос, автобусъёс, троллейбусъёс, трамвайёс! Первой ик Софи аттракционъёсы мынüз. Отын трос-трос тэтчаз, кечыръяськиз, шарикъёс пӧлы усьылüз, трубаос пушкытü ветлüз. Сэре туж зол жадиз но ӝӧк сьӧры пуксьыса одüг пирожкизэ сииз, ӝыны компотсэ юиз (яке кафее мыныса сок но пицца басьтüз). Кӧтыз тырыса нош ик шудüз на али. Собере аттракционъёсын тэтчаса жадиз но зоопарке мынüз. Отын слонъёсты, носорогъёсты, кыйёсты... учкиз, кечъёслы турын сётüз, сиемез потüз но мороженой басьтüз. Зоопарк бере площадкаын шудüз: трос-трос лейказ, нискылаз, гизен шудüз. (Куддыръя зоопарк интые ресторанэ/пароходэн ворттылыны/музее "мынüськом"). Пеймыт луыны кутскиз но, Софи трамвае пуксьыса автобусэз доры мынüз ("Южка" тодэ лыктэ ук, кытчы пырод). Билет басьтüз но кылем пирожкизэ сиыса, компотсэ юыса дорозяз гань-гань изьыса бертüз. А бабаез сое возьма вылэм ини. Сюрес вылын жадем Софилы шаньга пыжем, горд шыд (борщ)пӧзьтэм. Софи кӧттырмоназ сиськем но кӧня ке мультикъёс учкем на. Собере пиньзэ сузям но туж зол жадьыса умме усем.

[udmurtanaj]

Лей, лей, лейканэ,

Лейка, пичи каканэ!

Лей, лей, лейканэ,

Ӝут монэ чагыр инме!

Лей, лей, лейканэ,

Нуы монэ Шарканэ!