sehameltaweel - Tumblr blog

sehameltaweel · 5 years

Text

١٠ أفلام عن الحب وأشياء اخري ..

كان يا مكان في سالف العصر والآوان فلانة قابلت فلان ، عشقته حبة وفارقته حبة وف النهاية بقي الضهر والأمان ..

دي التيمة اللي بتمشي عليها اغلب الأفلام الرومانسية والروايات ، فلان قابل فلانة ، وبتسلك الحبكة اكتر من طريق عشان تخلي كل همك ان الاتنين يبقوا سوا وفعلا بتيجي النهاية السعيدة وبوسة اللقا وينزل تتر الختام ، وانت عارف ومتوقع بس لأن بتحب الحب الحلو بتسقف من قلبك ومن جواك بتقول ياريتني كنت انا

ف الأفلام دي بيكون الحب هو الخيار الأول وكأن الدنيا لازم تتهد عشان خاطر الاتنين دول يبقوا سوا لكن تخيل لو الحب هو الخيار التاني ، بمعني أن البطل منشغل ف قضية ما ، بيحارب ، ف أزمة ادمان ، عنده هوس بشيء ما وف وسط الزحمة دي بيقابل فتاة أحلامه ف الفيلم يمشي ف خطين ، مشكلة البطل الأساسية و البنت الجميلة أو الولد الجميل .

دي قايمة بعشر افلام الحب كان ف المرتبة التانية بالنسبة للبطل فالمعني اللي قدمه الفيلم خلي قصة الحب دي ليها شكل اشيك واجمل وارقي من الافلام الرومانسية الصرف ، ضاف للرومانسية عمق وفلسفة وخلاها المهرب والملاذ الأخير ..

1 - Atonement ( 2007 )

“عن الحب والحرب والبحث عن المغفرة ”

القصة عن شهادة زور من بنت ١٣ سنة بتدخل عشيق اختها السجن بسبب خيالها اللي اقنعها أنه مهووس ج��سيا وبعد ما بتوصل لسن ال ١٨ بتحاول تكفر عن ذنبها وطيشها وتهورها في التفريق بين حبيبين لكن بعد ايه ؟

بعد دخول الشاب “ روبي ” السجن بيخيروه ما بين الاستمرار في السجن أو المشاركة في الحرب فبيختار الخيار التاني ومن ناحية تانية البنت “ سيسيليا ” بتسيب البيت بعد دخول حبيبها السجن وبتقرر تعيش ف شقه لوحدها ومن ثم بتدخل دار ممرضات أثناء الحرب وبدورها بتحاول تطمن حبيبها وانها مستنياه عشان يكملوا قصتهم لكن هل الحرب بتحترم الحب ؟

من ناحية تانية “ باروني ” بعد ما شافت خيالها الواسع وحكمها ع الأمور من منظور واحد ممكن يعملوا ايه بتحاول توصل لاختها عشان تسامحها وف نهاية الفيلم بتظهر بعد ما كبرت ككاتبة مشهورة بتحكي عن التجربة وف عيونها العجز واليأس والندم

القصة ماشية ف ٣ خطوط ، بداية الاعتراف بالحب والذكريات الحلوة اللي ف اي عيلة كبيرة .. الحرب العالمية التانية لكن هنا مش هتشوف حرب وضرب نار لكن هتشوف اثر الحرب ف جنود كل أملهم يرجعوا لاهاليهم وده هيبان ف كادر روبي كان بيتمشي ف معسكر الناجيين .. اخر خط خط باروني وشبابها وعملها كممرضة زي اختها ف الحرب وتأجيل احلام الكتابة واخيرا ف اخر الفيلم وهي بتحكي التجربة بالكامل ..

الفيلم خد الحب من منظور طفلة صغيرة ومن منظور الحرب واد ايه القدر بالإضافة للغباء ممكن يدمروا علاقة جميلة

2 - Brooklyn ( 2015 )

“ الحب والغربة والبحث عن الذات ”

الهجرة لأمريكا حلم بيتقدمله اكتر من نص مليون مصري كل سنة وياعالم أد ايه ف الدول التانية ، في افلام كتير اتناولت موضوع الهجرة والغربة لكن نوعي المفضل فيهم الغربة اللي بتلاقي فيها حب حياتك وبتفضل مستني اليوم اللي تنزل فيه بلدك عشان تعرفه علي اهلك وعينيك ملياها الفرحة .

“ إليش ” بنت إيرلندية كانت بتدور علي فرصة تكبر فيها وتحقق لنفسها حاجة فهاجرت لبروكلين بمساعدة صديق والدها لأول مرة ، كانت أول مرة تركب سفينة وعانت من دوار البحر وكانت ملبوخة وتايهة زي مابيقولوا ، بتساعدها واحدة إيرلندية زيها وبتنصحها وبتطمنها لحد مابتوصل بروكلين وبتعاني من الغربة وأنك تبقي بعيد عن اهلك ووطنك باآلاف الأميال ومش عارف ازاي تكبر أو تتأقلم ع الوحدة لحد ما بتقابل حب حياتها وبتتعرف علي أهله هناك وبتبدأ تدرس محاسبة كمان .

لحد مابيحصل ظرف يرجعها بلدها اجازة بس بترجع بنت تانية خالص ، لابسة اغلي لبس وعينيها كلها ثقة وشخصيتها قوية ، عكس البنت الغلبانة اللي كانت ف الاول فده خلي واحد من اولاد الاغنيا أصحاب القصور يتشدلها ، فبتقع ف صراع ما بين الاستمرار معاه “ الغني ابن بلدها ” أو الرجوع لامريكا والاستقرار مع حبيبها “ السباك الايطالي ”

الفيلم لطيف جدا ورقيق وواصف موضوع الهجرة والغربة بالنسبة لبنت بصورة متصدقة والصراحة فكرني بتجربتي الشخصية لاني عشت نفس الموضوع بالظبط ..

3 - Allied ( 2016 )

“ عن الحب والجاسوسية والبحث عن الحقيقة ”

ماذا لو .. اهم شخص ف حياتك جاسوس لدولة معادية ؟

ظابط كندي وعضوة ف المقاومة الفرنسية بيتحطوا ف مهمة لإغتيال السفير الإلماني في المغرب ، وعشان الحبكة تظبط بيمثلوا أنهم متجوزين ادام الألمان بل وبيمثلوا الحب لحد ما بيجي معاد العملية .

بعد العملية الظابط ماكس بيعرض عليها يتجوزها بجد ويكملوا حياتهم سوا ف لندن وفعلا بيتجوزوا وبيخلفوا بنت جميلة وبعد مرور سنة بيجي إتصال للظابط ماكس أن مراته جاسوسة للجيش الألماني وأن لو ثبتت عليها التهمة هو اللي يقتلها ولو رفض هيتقتلوا هما الاتنين وتتيتم بنتهم الوحيدة

ماكس مبيصدقش وبيقرر يدور بنفسه لحد ما تظهر نتيجة التحقيق وكل ده مراته متعرفش حاجة وبتتعامل طبيعي لكن هل مراته هتطلع جاسوسة فعلا ؟

الفيلم محققش ايرادات كتير لكن فكرة الجاسوسية المتغلفة بالحب لطيفة وفكرة حب ف زمن الأربعينات ألطف غير الأزياء طبعا

4 - Requiem Of A Dream ( 2000 )

“ عن الحب والمخدرات والبحث عن النشوة ”

انت ممكن تحب حد لأنه شبهك ف افكارك ، بيحب الحاجات اللي بتحبها لكن هل ممكن تحب حد لأنه مدمن زيك ؟ بتحصل .. ولأن المدمن دايما بيبقي محطوط تحت رحمة الشرب فمهما كانت قصة حبك جميلة هيبقي الشرب له الأولوية الأولي ولو مرة مقدرتش تقضي حاجتك هتأذي أي حد مهما كان عشان توصل للنشوة ..

خليني ف الاول اقول اختصار لقصة الفيلم ، القصة عن ٤ شخصيات بيواجهوا الإدمان لكن كل واحد فيهم علاقته بالمخدرات كانت غير التاني ، وافعال كل واحد وردود فعله كانت مرسومة حسب شخصيته ، لكن النهاية كانت واحدة ، نهاية المخدرات واحدة ..

الفيلم عن ام عايشة لوحدها كل همها تطلع ف برنامج مسابقات بتحبه ولانها فازت بفرصة للحضور بتحاول تعمل ريجيم قاسي عشان تقدر تروح بالفستان اللي بتحبه ، لكن بالغلط خدت أدوية للتخسيس خليتها مدمنة والإدمان ادي لهلوسة ، دي بطلة الفيلم ف نظري لان تمثيلها كان حقيقي ومتصدق .

باقي ال ٣ شخصيات هما الابن وصاحبه اللي عاوزين يبقوا تجار مخدرات جنب الشرب ، وحبيبته اللي بسبب احتياجها للجرعة عملت أفعال غلط ضد شخصيتها لكن ف النهاية كانت واحدة ..

اروع ما ف الفيلم الموسيقي التصويرية واللي تعتبر اشهر من الفيلم نفسه ، استمتعوا ..

5 - Colonia ( 2015 )

“ الحب والقمع والبحث عن الحرية ”

بعد إنقلاب عسكري حصل ف تشيلي سنة ١٩٧٣ الشرطة بتعتقل مصور إلماني فبتبدأ مراته تدور عليها بنفسه علي امل توصله وتنقذه لحد ما بتعرف أنه ف مكان اسمه كولونيا ف جنوب تشيلي ودي طائفة ليها عاداتها الغربة واللي بيدخل منطقتهم مبيخرجش منها ابدا ، بتقرر تنضملهم عشان تبقي جرب جوزها وتحاول تنقذه من أيديهم ، لكن هل هتقدر ؟ خصوصا انها لوحدها وهتنضم لمكان بيحكمه القمع الشديد ..

الفيلم قصة حقيقية وده اجمل ما فيه .

6 - Amélie ( 2001 )

“ الحب والخجل والبحث عن البهجة ”

لما تحب تتكلم عن فيلم زي ده مش هتبقي عارف تبدأ منين لكن هتقول كلمة “ مبهج ” وانت مطمن ، فيلم رغم أن قصته مش ثابته وبيدور ف كز اتجاه بس الخلطة بت��عته خلته بقي من كلاسكيات السينما ولولا وجود “ اودري تاتو ” ف دور البطولة بملامحها الطفوليه وجسمها الصغير اعتقد كان هيبقي فيلم عادي لان أداءها لوحده وعفويتها هما اللي شالوا نص الفيلم .

الفيلم عن بنت خجولة عايشة لوحدها بتحاول تنشر السعادة ف حياة اللي حواليها من غير ما يعرفوا أنها مصدر السعادة وفي وسط محاولاتها بتتعلق بولد بان من تصرفاته أنه بسيط زيها فبتحاول بحيلة من حيلها تعرفه انها بتحبه

يمكن انا بحب الفيلم ده لأن طريقته ف التعبير عن الحب بسيطة وطفولية وده اللي مبقاش موجود ف حب الايام دي اللي بيبقي مليان رعب وخوف وكل واحد مخبي سكينة ورا ضهره تحسبا لأي نوع من انواع الغدر ، و لأن الحب بقي شيء مؤذي للنفس بسبب غباءنا انا بحب الفيلم ده .

فكرني بحب زمان والواحد صغير وكل همه حاجتين ، ازاي يوصل لحد أنه بيحبه ، يعيش باقي العمر معاه ، بس. طب هتعمل ده ازاي ؟ نبعت جوابات ، نكلم صحابهم ، نجيب ارقامهم ، طب وبعدين ؟ مفيش بعدين ، طالما مبسوطين سوا مفيش بعدين ، وكنا بنتعلق واحنا راضيين ومش خايفين .

ده فيلم إستثناء وحالة خاصة ومقابلتش زيه ف كل أفلام السينما ، ولو عاوز تبتسم بدون سبب ، اتفرج عليه ..

7 - The Majestic ( 2001 )

“ الحب والسينما والبحث عن الحرية ”

سيناريست امريكي “ مؤلف افلام ” ناجح في الخمسينات بيتم إتهامه بالإنتماء للشيوعية والترويج ليها فبيتفتح تحقيق معاه ف شركة الإنتاج بتفسخ عقدها معاه وحبيبته بتسيبه وف عز صدمته بيروح لحانة وبيشرب لحد ما بيسكر ، وأثناء رجوعه بيعمل حادثة بعربيته وبيقع من فوق كوبري ف البحر وبيغمي عليه .

بيشده الموج لحد مابيصحيه راجل عجوز علي شط بلد صغيرة وهادية لكن بيصحي فاقد للذاكرة مش فاكر هو مين ، الراجل العجوز بياخده وبيعالجه لكن بسبب الشبه بينه وبين جندي مقاتل ف الحرب العالمية من البلد دي بيفتكروه هو ، ده كله عادي . اللي مش عادي حبيبة الجندي اللي بتفتكر أن حبيبها مماتش ورجع من الحرب فبتسترجع معاه ذكريات هو اصلا ميعرفهاش ، وفرحة ابو الجندي واهل المدينة ومن ناحية بيتلاحظ ف هوليوود أنه اختفي فبيبدأوا يدوروا عليه .

الجميل هنا أداء جيم كاري ، وهدوء البلد دي والصلة بين أهلها ، ساعات الجمال بيكون ف الظروف المحيطة بالاحدث مش الحدث نفسه لأن أي حد هيتابع الفيلم هيحب يكون جزء من البلد الصغيرة دي وهيحب الترابط والمودة اللي بين أهلها ، الفيلم ساحر ومش ممل ابدا

8 - Inception ( 2010 )

“ الحب والأحلام والبحث عن الواقع ”

مخترق احلام بيجيله عرض انه يزرع فكرة ف راس رجل اعمال عشان يهد امبراطوريته ف مقابل أنه يرجع لوطنه ويشوف أطفاله اخيرا ، بيجمع فريق من مهندس وكيمياءي ومزور ومصممة وبيبدأ هو وفريقه المهمة عن طريق أنه بيدخلوا جوة ٣ طبقات من الأحلام عشان يوصلوا للا وعي بتاع الخاضع للحلم “ رجل الأعمال ” ويزرعوا الفكرة بسهولة ..

لكن هل فيلم بالخيال ده ممكن ينجح من غير قصة حب هي اللي تحرك أحداثه وتخلق صراعات جوة راس البطل تعطل مهمته ؟ زوجة متوفية بتظهر ف الحلم كإسقاط خاص بالبطل وبتدمر مهمتهم كل شوية عشان تخلي البطل يرجع يعيش معاها

شرح الفيلم مقدرش اختصره ف كام سطر لكن ده الفيلم ده التطبيق المثالي للحب وشيء اخر ، بمعني أن انت هنا بتهرب من لعنة حبك عشان ترجع لولادك وحياتك ، الفيلم محتاج تركيز كبير لأن الفكرة عبقرية لأنه فيلم خيالي اكتر منه رومانسي ،و لان الرومانسية هنا متوظفة بشكل مختلف تماما عن أي فيلم ف التاريخ جمع بين اتنين بيحبوا بعض ، الفكرة أعمق بمراحل ..

9 - Testament Of Youth ( 2014 )

“ الحب والحرب والبحث عن السلام ”

الفيلم مستوحي من احداث حقيقية حصلت ف فترة الحرب العالمية الأولي و بيتكلم عن طموح فيرا اللي كانت من اول البنات اللي دخلوا جامعة أكسفورد ف مجال الكتابة الصحفية ومحاولاتها ف إقناع اهلها عشان تكمل ف المجال اللي عاوزاه وعن عملها كممرضة أثناء الحرب وقصة حبها اللي نهتها الحرب وموت اقرب الناس ليها ف الحرب ..

الفيلم بيظهر اثر الحرب ف نفوس الشباب اللي عاصروا الفترة دي و كان كل حد منهم بيحلم وعاوز يبقي حاجة ويعيش حياة مستقرة واثرها ف نفوس الأهل اللي كل أملهم يشوفوا أولادهم سالمين وميهمهش مين انتصر ومين خسر .

بالمناسبة اللي قام بشخصية جون سنو ف Game of thrones قام هنا بدور خطيبها بس شكله متغير تماما

10 - V For Vandetta ( 2005 )

“ الحب والفوضي والبحث عن الثأر ”

Remember , remember the fifth of november

دي مقولة شهيرة ف المجتمع الإنجليزي بترجع لحدث حصل ف ٥ نوڤمبر ١٦٠٥ ، لما حاول واحد من الحركة اليسوعية اسمه جاي فوكس تفجير البرلمان البريطاني إعتراضا علي اسلوب الحكم ، فقبل مايفجر البرلمان ب ٣٦ برميل من البارود اتقبض عليه واتعدم هو واللي معاه والانجليز بقوا يحتفلوا دايما بذكري الحادثة دي كل سنة

الفيلم هنا عن مناضل بيحاول ياخد بتاره بعد ٢٠ سنة من حادثه حصلتله بسبب سياسين بريطانين فبيقرر يفجر البرلمان ف الخامس من نوڤمبر ويقتل كل الناس اللي دمروله حياته ، طول الفيلم بيسعي أنه ينشر حالة من الفوضي ف البلد وف نفس الوقت ياخد دعم الشعب عشان الإعلام كان مصدر للعالم أنه إرهابي ، وف رحلته دي بيقابل إيڤ ، وبينقذها من البوليس السري ، لكن بيقع ف غرامها بعد كدة لكن هل ده هيأثر علي خطته ؟

الارتباط بمناضلين من أصعب أنواع الحب لان انت مع حد عنده استعداد يموت عشان بلده وبعدين انت ، لكن اللي بيحب بلده اكتر منك قادر يحققلك سعادة اكتر من شخص بيحبك اكتر من اي حاجة ، ده إعتقادي

——–

بكدة اكون خلصت ، وبعتزر لو متكلمتش عن كل فيلم بإستفاضة عشان مطولش عليكم وبعتزر لو في تقصير ف الشرح . اتمني لايك او ريبلوج عشان الليست توصل لناس اكتر واكتب اكتر

كل سنة وانتوا طيبين وعيد سعيد عليكم 🌸

2K notes · View notes