moizkhan1967

[moizkhan1967]

کوئی فریاد ترے دل میں دبی ہو جیسے

تو نے آنکھوں سے کوئی بات کہی ہو جیسے

جاگتے جاگتے اک عمر کٹی ہو جیسے

جان باقی ہے مگر سانس رکی ہو جیسے

ہر ملاقات پہ محسوس یہی ہوتا ہے

مجھ سے کچھ تیری نظر پوچھ رہی ہو جیسے

راہ چلتے ہوئے اکثر یہ گماں ہوتا ہے

وہ نظر چھپ کے مجھے دیکھ رہی ہو جیسے

ایک لمحے میں سمٹ آیا ہے صدیوں کا سفر

زندگی تیز بہت تیز چلی ہو جیسے

اس طرح پہروں تجھے سوچتا رہتا ہوں میں

میری ہر سانس ترے نام لکھی ہو جیسے

فیض انور

[moizkhan1967]

فاصلے ایسے بھی ہوں گے یہ کبھی سوچا نہ تھا

سامنے بیٹھا تھا میرے اور وہ میرا نہ تھا

وہ کہ خوشبو کی طرح پھیلا تھا میرے چار سو

میں اسے محسوس کر سکتا تھا چھو سکتا نہ تھا

رات بھر پچھلی سی آہٹ کان میں آتی رہی

جھانک کر دیکھا گلی میں کوئی بھی آیا نہ تھا

آج ملنے کی خوشی میں صرف میں جاگا نہیں

تیری آنکھوں سے بھی لگتا ہے کہ تو سویا نہ تھا

[moizkhan1967]

جانے وہ کیسے لوگ تھے جن کو پیار سے پیار ملا

ہم نے تو جب کلیاں مانگیں کانٹوں کا ہار ملا

خوشیوں کی منزل ڈھونڈی تو غم کی گرد ملی

چاہت کے نغمے چاہے تو آہ سرد ملی

دل کے بوجھ کو دونا کر گیا جو غم خوار ملا

بچھڑ گیا ہر ساتھی دے کر پل دو پل کا ساتھ

کس کو فرصت ہے جو تھامے دیوانوں کا ہاتھ

ہم کو اپنا سایہ تک اکثر بیزار ملا

اس کو ہی جینا کہتے ہیں تو یوں ہی جی لیں گے

اف نہ کریں گے لب سی لیں گے آنسو پی لیں گے

غم سے اب گھبرانا کیسا غم سو بار ملا

ساحر لدھیانوی

[moizkhan1967]

غزل

عمر جلووں میں بسر ہو یہ ضروری تو نہیں

ہر شبِ غم کی سحر ہو یہ ضروری تو نہیں

چشمِ ساقی سے پیو یا لبِ ساغر سے پیو

بےخُدی آٹھوں پہر ہو یہ ضروری تو نہیں

نیند تو درد کے بستر پہ بھی آ سکتی ہے

ان کی آغوش میں سر ہو یہ ضروری تو نہیں

شیخ کرتا تو ہے مسجد میں خدا کو سجدے

اس کے سجدوں میں اثر ہو یہ ضروری تو نہیں

[moizkhan1967]

دل دھڑکنے کا سبب یاد آیا

وہ تیری یاد تھی اب یاد آیا

آج مشکل تھا سنبھلنا اۓ دوست

تُو مصیبت میں عجب یاد آیا

دن گزارا تھا بڑی مشکل سے

پھر تیرا وعدہِ شب یاد آیا

تیرا بھولا ہوا پیمانِ وفا

مر رہیں گے اگر اب یاد آیا

پھر کئی لوگ نظر سے گزرے

پھر کوئی شہرِ طرب یاد آیا

حالِ دل ہم بھی سناتے لیکن

جب وہ رخصت ہوا تب یاد آیا

بیٹھ کر سایہِ گل میں ناصر

ہم بہت روۓ وہ جب یاد آیا

دل دھڑکنے کا سبب یاد آیا

وہ تیری یاد تھی اب یاد آیا

(ناصر کاظمیٓ)

[moizkhan1967]

زندگی سے یہی گلہ ہے مجھے

تو بہت دیر سے ملا ہے مجھے

تو محبت سے کوئی چال تو چل

ہار جانے کا حوصلہ ہے مجھے

دل دھڑکتا نہیں ٹپکتا ہے

کل جو خواہش تھی آبلہ ہے مجھے

ہم سفر چاہیئے ہجوم نہیں

اک مسافر بھی قافلہ ہے مجھے

کوہ کن ہو کہ قیس ہو کہ فرازؔ

سب میں اک شخص ہی ملا ہے مجھے

احمد فراز

[moizkhan1967]

کتاب سادہ رہے گی کب تک، کبھی تو آغازِ باب ہو گا

جنہوں نے بستی اجاڑ ڈالی، کبھی تو ان کا حساب ہو گا

وہ دن گئے جب کہ ہر ستم کو ادائے محبوب کہہ کے چپ تھے

اٹھی جو اب ہم پہ اینٹ کوئی، تو اس کا پتھر جواب ہو گا

سحر کی خوشیاں منانے والو، سحر کے تیور بتا رہے ہیں

ابھی تو اتنی گھٹن بڑھے گی، کہ سانس لینا عذاب ہو گا

سکوتِ صحرا میں بسنے والو، ذرا رُتوں کا مزاج سمجھو

جو آج کا دن سکوں سے گزرا تو کل کا موسم خراب ہو گا

نہیں کہ یہ صرف شاعری ہے، غزل میں تاریخِ بے حسی ہے

جو آج شعروں میں کہہ دیا ہے، وہ کل شریکِ نصاب ہو گا

مرتضیٰ برلاس~

[moizkhan1967]

ان کے انداز کرم ان پہ وہ آنا دل کا

ہائے وہ وقت وہ باتیں وہ زمانہ دل کا

نہ سنا اس نے توجہ سے فسانا دل کا

زندگی گزری مگر درد نہ جانا دل کا

وہ بھی اپنے نہ ہوئے دل بھی گیا ہاتھوں سے

ایسے آنے سے تو بہتر تھا نہ آنا دل کا

حسرتیں خاک ہوئیں مٹ گئے ارماں سارے

لٹ گیا کوچۂ جاناں میں خزانہ دل کا

ان کی محفل میں نصیرؔ ان کے تبسم کی قسم

دیکھتے رہ گئے ہم ہاتھ سے جانا دل کا

( پیر نصیر الدین نصیر)

[moizkhan1967]

It's my 10 year anniversary on Tumblr 🥳

[moizkhan1967]

ذی حالِ مستی مکن بہ رنجش

بحا لِ ھجراں بے چارا دل ھے

سنائی دیتی ہے جسکی دھڑکن

تمھارا دل یا ہمارا دل ہے

وہ آکے پہلو میں ایسے بیٹھے

کہ شام رنگین ھو گئی ہے

ذرا ذرا سی کھلی طبیعت

ذرا سی غمگین ہو گئ ہے

یہ شرم ہے یا حیا ہے کیا ہے؟؟؟

نظر اُٹھاتے ہی جھک گئی ہے

تمہاری آنکھوں پہ گر کے شبنم

ہماری پلکوں پہ رک گئی ہے

عجیب ہیں دل کے زخم یارو

نہ ہوں تو مشکل ہے جینا اس کا

جو ہو تو ہر درد ایک ہیرا

ہر ایک غم ہے نگینہ اس کا

سنائی دیتی ہے جسکی دھڑکن

تمھارا دل یا ہمارا دل ہے..

گلزار

[moizkhan1967]

تمہارے خط میں نیا اک سلام کس کا تھا

نہ تھا رقیب تو آخر وہ نام کس کا تھا

وہ قتل کر کے مجھے ہر کسی سے پوچھتے ہیں

یہ کام کس نے کیا ہے یہ کام کس کا تھا

وفا کریں گے نباہیں گے بات مانیں گے

تمہیں بھی یاد ہے کچھ یہ کلام کس کا تھا

رہا نہ دل میں وہ بے درد اور درد رہا

مقیم کون ہوا ہے مقام کس کا تھا

نہ پوچھ گچھ تھی کسی کی وہاں نہ آؤ بھگت

تمہاری بزم میں کل اہتمام کس کا تھا

تمام بزم جسے سن کے رہ گئی مشتاق

کہو وہ تذکرۂ نا تمام کس کا تھا

ہمارے خط کے تو پرزے کئے پڑھا بھی نہیں

سنا جو تو نے بہ دل وہ پیام کس کا تھا

اٹھائی کیوں نہ قیامت عدو کے کوچے میں

لحاظ آپ کو وقت خرام کس کا تھا

گزر گیا وہ زمانہ کہوں تو کس سے کہوں

خیال دل کو مرے صبح و شام کس کا تھا

اگرچہ دیکھنے والے ترے ہزاروں تھے

تباہ حال بہت زیر بام کس کا تھا

وہ کون تھا کہ تمہیں جس نے بے وفا جانا

خیال خام یہ سودائے خام کس کا تھا

انہیں صفات سے ہوتا ہے آدمی مشہور

جو لطف عام وہ کرتے یہ نام کس کا تھا

ہر اک سے کہتے ہیں کیا داغؔ بے وفا نکلا

یہ پوچھے ان سے کوئی وہ غلام کس کا تھا

داغ دہلوی~

[moizkhan1967]

ستارے جو دمکتے ہیں

کسی کی چشم حیراں میں

ملاقاتیں جو ہوتی ہیں

جمال ابر و باراں میں

یہ نا‌‌ آباد وقتوں میں

دل ناشاد میں ہوگی

محبت اب نہیں ہوگی

یہ کچھ دن بعد میں ہوگی

گزر جائیں گے جب یہ دن

یہ ان کی یاد میں ہوگی

[moizkhan1967]

محبت کی ایک نظم

اگر کبھی میری یاد آئے

تو چاند راتوں کی نرم دلگیر روشنی میں

کسی ستارے کو دیکھ لینا

اگر وہ نخل فلک سے اڑ کر

تمہارے قدموں میں آ گرے

تو یہ جان لینا وہ استعارہ تھا میرے دل کا

اگر نہ آئے

مگر یہ ممکن ہی کس طرح ہے

کہ تم کسی پر نگاہ ڈالو

تو اس کی دیوار جاں نہ ٹوٹے

وہ اپنی ہستی نہ بھول جائے

اگر کبھی میری یاد آئے

گریز کرتی ہوا کی لہروں پہ ہاتھ رکھنا

میں خوشبوؤں میں تمہیں ملوں گا

مجھے گلابوں کی پتیوں میں تلاش کرنا

میں اوس قطروں کے آئینوں میں تمہیں ملوں گا

اگر ستاروں میں اوس قطروں میں خوشبوؤں میں نہ پاؤ مجھ کو

تو اپنے قدموں میں دیکھ لینا میں گرد ہوتی مسافتوں میں تمہیں ملوں گا

کہیں پہ روشن چراغ دیکھو

تو جان لینا کہ ہر پتنگے کے ساتھ میں بھی بکھر چکا ہوں

تم اپنے ہاتھوں سے ان پتنگوں کی خاک دریا میں ڈال دینا

میں خاک بن کر سمندروں میں سفر کروں گا

کسی نہ دیکھے ہوئے جزیرے پہ

رک کے تم کو صدائیں دوں گا

سمندروں کے سفر پہ نکلو

تو اس جزیرے پہ بھی اترنا

[moizkhan1967]

زندگی سے بڑی سزا ہی نہیں

اور کیا جرم ہے پتا ہی نہیں

اتنے حصوں میں بٹ گیا ہوں میں

میرے حصے میں کچھ بچا ہی نہیں

زندگی اب بتا کہاں جائیں

زہر بازار میں ملا ہی نہیں

جس کے کارن فساد ہوتے ہیں

اس کا کوئی اتا پتا ہی نہیں

چاہے سونے کے فریم میں جڑ دو

آئینہ جھوٹ بولتا ہی نہیں

[moizkhan1967]

جھکی جھکی سی نظر بے قرار ہے کہ نہیں

دبا دبا سا سہی دل میں پیار ہے کہ نہیں

تو اپنے دل کی جواں دھڑکنوں کو گن کے بتا

مری طرح ترا دل بے قرار ہے کہ نہیں

وہ پل کہ جس میں محبت جوان ہوتی ہے

اس ایک پل کا تجھے انتظار ہے کہ نہیں

تری امید پہ ٹھکرا رہا ہوں دنیا کو

تجھے بھی اپنے پہ یہ اعتبار ہے کہ نہیں

[moizkhan1967]

بے نام سا یہ دَرد،،، ٹھہر کیوں نہیں جاتا

جو بیت گیا ہے ، وُہ گُزر کیوں نہیں جاتا

سب کُچھ تو ہے ، کیا ڈھونڈھتی رہتی ہیں نِگاہیں

کیا بات ہے ، مَیں وقت پر گھر کیوں نہیں جاتا

وُہ ایک ہی چہرہ تو نہیں سارے جہاں میں

جو دُور ہے ، وُہ دِل سے اُتر کیوں نہیں جاتا

مَیں اپنی ہی اُلجھی ہُوئی راہوں کا تماشہ

جاتے ہیں جِدھر سب ، مَیں اُدھر کیوں نہیں جاتا

وُہ خُواب ��و برسوں سے نہ چہرہ ، نہ بدن ہے

وُہ خُواب ،،، ہَواؤں میں بِکھر کیوں نہیں جاتا

ندا فاضلی ²⁰¹⁶-¹⁹³⁸

مجموعۂ کلام :

(کھویا ہُوا سا کُچھ)

[moizkhan1967]

اپنی دھن میں رہتا ہوں

میں بھی تیرے جیسا ہوں

او پچھلی رت کے ساتھی

اب کے برس میں تنہا ہوں

تیری گلی میں سارا دن

دکھ کے کنکر چنتا ہوں

مجھ سے آنکھ ملائے کون

میں تیرا آئینہ ہوں

میرا دیا جلائے کون

میں ترا خالی کمرہ ہوں

تیرے سوا مجھے پہنے کون

میں ترے تن کا کپڑا ہوں

تو جیون کی بھری گلی

میں جنگل کا رستہ ہوں

آتی رت مجھے روئے گی

جاتی رت کا جھونکا ہوں

اپنی لہر ہے اپنا روگ

دریا ہوں اور پیاسا ہوں

ناصر کاظمی