manar20sabry

[manar20sabry]

وانا في الشقة القديمة ماكنتش حابة انها جنب السطح ولا ان فيها بلكونة رفيعة مالهاش لازمة وشايفة ان تصميمها بايخ وغبي وازاي يعملوا شقة كده..

لما سيبتها.. عرفت ان السطح كان نعمة عشان بنشر الغسيل في الشمس وبنطلع الصبح انا ورقية نشوف الشروق والعصافير ونقول الاذكار، وقبل ما نمشي بفترة بسي��ة ربنا رزقنا بجار جميل بيحب الزرع وكان مالي السطح بالورد بمختلف أنواعه والريحان والطماطم كمان وكان شكله جميل البلكونة كانت ملجأ للكراكيب ،😁 وكانت تحفة لما افتحها على المطبخ تهويه ومايبقاش حر بسبب الفرن..المطبخ محمد ركب لي فيه تكييف وكان واسع وأخد كل الاجهزة بما فيهم الغسالة وتنظيفه ماكنش بالصعوبة اللى كنت مصعباها على نفسي

الشقة فعلا كانت واسعة وكان ممكن استغلها أحلى استغلال وتبقى جنة... النفسية عامل مهم.. الاستقبال عامل أهم.. وجود حد عينه حلوة قريب منك بيخليك تدرك حلاوة الحاجة اللى حواليك ويساعدك تحلّيها

ارجو من الله يساعدني اشوف كل حاجة حلوة في اي شئ مهما كان سئ. وانه لا يبتليني بالجحود وانكار النعم التى لا تحصى.

الحمد لله حمدا كثيرا طيبا مباركا فيه ملء السموات والأرض وما بينهما وملء ما شئت من شئ بعد أهل الثناء والمجد أحق ما قال العبد وكلنا لك عبد.

[manar20sabry]

انما النجوى من الشيطان ليَحُزُنَ الذين آمنوا وليس بضآرهم شيئًا إلا بإذن الله وعلى الله فليتوكل المؤمنون.

[manar20sabry]

ارجو من الله ان يشغلني بما ينفعني وبما هو أكبر من احاسيسي وافكاري الصغيرة التي لا طائل من ورائها غير الغم والكآبة

[manar20sabry]

متخيل اني خايفة يبقى ليا طلبات في شئ معين عشان عارفة انك مش هتعملها زي ما انا عايزة وهتخيب أملى فمش عايزة يبقى ليا طلبات اصلا عشان مش عايزة ازعل منك!

[manar20sabry]

مش معنى إنك زعلان، إن عندك حق!

[manar20sabry]

❤️ سلسلة الآخرة خير ❤️

🙌اللهم أصلح لنا دنيانا التي فيها معاشنا ، وأصلح لنا آخرتنا التي فيها معادنا ، واجعل الحياة زيادة لنا في كل خير، والموت راحة لنا من كل شر.

[manar20sabry]

حبيبي، كرمالي.. بيناتنا بنعرف شو صار!

[manar20sabry]

قصة موسى و فرعون

في الجزء التاسع سورة الاعراف اللي كان هدفها احسم موقفك و متبقاس سلبي و اقف مع الحق، متبقاش مؤمن مذبذب طالما امنت خليك قوي و قول عالحرام حرام و افتخر بالصح اللي انت بتعمله لربنا حتى لو كل الناس شايفينه غلط..

اتذكر في السورة دي و سورة يونس في الجزء الحادي عشر اللي مقصدها (توكل على الله، لا تدري ما سيحدث و لا تدري حكمته) قصة موسى مع قومه و فرعون، القصة واحده بس اتذكرت في سورتين مختلفتين عشان نوصل هدف كل سورة بسهولة بضرب الامثله

لما ربنا بعث نبي الله موسى بكل المعجزات اللي معاه و اللي اهمها معجزة العصا اللي كان بيرميها تتحول لحية و اللي ضرب بها البحر انشق و اللي ضرب بها الارض فا انشقت منه 12 عين مياه و هنحكي كل قصة بالتفصيل، و انه النبي الوحيد اللي ربنا كان بيتكلم معاه مباشرة مبعتلوش ملك زي باقي الانبياء، و انه اكتر نبي نزل على قومه معجزات من ربنا زي معجزة بقرة بني اسرائيل اللي حكيت عنها قبل كده.

موسى راح لفرعون و قاله انا رسول من رب العالمين فا خلي بني اسرائيل (ساكني مصر) يخرجوا معايا من مصر و يتبعوني، اشمعنى يخرجوا معاه؟ عشان فرعون كان ملك ظالم معيشهم في ذل بيقتل ولادهم و بيجور عليهم، فا فرعون قاله لو عندك اي دليل على ده وريني، فا راح موسى رمى العصاية بتاعته فا اتحولت لثعبان، و كان النبي موسى ابرص يعني عنده في جلده بقع فا لما حط ايده في جيبه طلعت بيضاء يعني من غير اي بقع خالص كأنه شفي، كل دي دلائل انه نبي مرسل بس محدش صدقه و قالوا عليه ساحر و عايز يخرجكوا من ارضكوا فا متصدقوش كلامه، فا فرعون حب يتحداه و بعت لكل السحرة اللي في البلد و حددوا معاد في عيد الفراعنه كانوا بيحتفلوا بيه عشان كل البلد تكون شاهدة عاللي هيحصل، في الوقت ده كان فرعون بيقول للناس ان هو ربهم و بيجبرهم يتخذوه اله، فا السحرة اجتمعوا و قالوا لفرعون هتدينا اجر كبير لو احنا غلبنا قالهم هديكوا اجر و هتكونوا مقربين مني كمان.

في يوم التحدي موسى ساب السحرة يبدأوا و رموا اللي في ايديهم و سحروا عيون الناس اللي بتتفرج و كإن الحبال اللي رموها بتتحرك و كإنها ثعابين، قام سيدنا موسى رمى عصاه فا وقع الحق و اتحولت لثعبان حقيقي بدأ ياكل الحبال اللي هم رموها، و لانهم عارفين ان التعبان ده حي و حقيقي و مش سحر ابدا فا خروا ساجدين و قالوا لموسى احنا بنؤمن بموسى و ربه، هددهم و قالهم ازاي تؤمنوا و قالهم هقطع ايديكوا و رجليكوا و هم برضوا واقفين مع الحق في هنا قيمتين اول واحده انهم حسموا موقفهم و عرفوا ان موسى على حق فا فضلوا على موقفهم و متهزوش لما موسى قالهم هقتلكوا (هدف سورة الاعراف) ، و القيمة التانية انهم توكلوا على ربنا و مهمهمش ايه نتيجة اللي بيحصل ده (هدف سورة يونس) فا ربنا قال لموسى انهم في جنات ينعمون دلوقتي و ده كان جزاؤهم، فا سلم لربنا و متستناش نتيجة خير انت بتعمله لو مجاش في الدنيا هتشوفه عند ربنا.

في الوقت ده ناس كتير اتبعوا موسى و صدقوه، و اللي بيتبعوا فرعون قالوله انت هتسيبهم كده يضلوا الناس و يفسدوا في الارض يعارضوك انت و الالهة فا قال هقتلهم كلهم..فا ربنا اوحى لموسى انه ياخد قومة و يمشوا بليل عشان فرعون و جنوده خلاص عقدوا النية على قتلهم، ليه ربنا مهلكش فرعون و جنوده و خلاص و ليه امر موسى الامر ده؟ عشان يوري كل الناس قدرته في انه ينجي موسى و من معه فيزدادوا ايمانا و يهلك فرعون و من معه فيكونوا عبره..

في الوقت ده نبي الله موسى كان عنده يقين هو و قومه انه هينجيهم زي ما اتذكر في سورة يونس “

وَقَالَ مُوسَى يَا قَوْمِ إِن كُنتُمْ آمَنتُم بِاللَّهِ فَعَلَيْهِ تَوَكَّلُواْ إِن كُنتُم مُّسْلِمِينَ،فَقَالُواْ عَلَى اللَّهِ تَوَكَّلْنَا رَبَّنَا لاَ تَجْعَلْنَا فِتْنَةً لِّلْقَوْمِ الظَّالِمِينَ،وَنَجِّنَا بِرَحْمَتِكَ مِنَ الْقَوْمِ الْكَافِرِينَ” تخيلوا بقى لما تهربوا من حد و يبقى قدامكوا بحر و هم وراكوا في الوقت ده هتحسوا بايه؟ بس نبي الله موسى كان واثق في ربنا و في انه هينجيه حتى لو في حاجة مستحيلة، ربنا قاله اضرب بالعصا البحر (و كانوا في منطقة خليج السويس اضيق منطقة فيها بحر) فا البحر انشق اتنين و ربنا مهد ليهم التربة اللي تحت البحر عشان يعرفوا يمشوا عليها، تخيل في بحر قدامك مشقوق نصين يقال انهم كانو شايفين السمك جمبهم و هم بيعدوا زي الاكواريوم كده، موسى مخافش و عدى و قومه اتبعوه متوكلين على ربنا عارفين ان البحر مش هينطبق عليهم و هيفضل على حاله لحد ما يعدوا (قيمة التوكل على الله في سورة يونس).

فا جه موسى يقفل البحر بعد ما عدى هو و من اتبعه ربنا قاله سيب البحر زي ما هو “و ده كان لحكمة موسى مكانش فاهمها بس امتثل لامر الله” ساب البحر على حاله فا فرعون و جنوده لما شافوا ان التانيين عدوا عادي فا قال ليه لا ما يعدي هو كمان مع جنوده و مش هيحصل حاجة، و هم بيعدوا ربنا قفل عليهم البحر في الوقت ده فرعون قال “ حَتَّى إِذَا أَدْرَكَهُ الْغَرَقُ قَالَ آمَنتُ أَنَّهُ لا إِلَهَ إِلاَّ الَّذِي آمَنَتْ بِهِ بَنُو إِسْرَائِيلَ وَأَنَاْ مِنَ الْمُسْلِمِينَ “

قال انا بامن بيك يارب مش عشان حاجة الا انه ينجيه من اللي هو فيه بس ربنا عشان عارف انه لو نجاه هيطغى اكتر و هيهلك اللياتبعوا موسى منجاهوش و غرقه هو و قومه، و مش بس كده ده ربنا انجاه بجسده يعني مراحش مع البحر مثلا و اتساب و اتحلل جواه لا ربنا امر ان جسمه يتساب على اليابسة عشان الناس تشوفه و تصدق انه مات و مش اي موته ده هلاك من عند ربنا، يقال ان فرعون هو رمسيس الثاني و جثته متحنطة دلوقتي بسبب ان ربنا انجاه بجسده و ان في علماء لما حللوا الجثة بعد سنين طويله لاقوا ان دي جثة واحد غرقان فا صدقوا و امنوا هم كمان.

[manar20sabry]

مصادر الجزء الأول

سورة القاتحة

https://youtu.be/ScI7OTA0JLw

سورة البقرة

https://youtu.be/rNhLi2tcTZs

تدبر من بيدج لازم تتابعوها

https://www.facebook.com/lydbroteam/posts/2059569161035069

و باقي المصادر من دروس معلمتي منى محسن، تابعوها عالفيسبوك

https://www.facebook.com/100003485096615

[manar20sabry]

‏"الحمد لله على نعمةِ الدُّعاء بملاذها وحسنها وطيبها وسكينتها وأمانها، تلكَ التي ما استنجد بها غريقٌ إلا انتشلته، وأبدلت قلقه وخوفه أمنًا واطمئنانًا، سبحان من جعلها عبادةً نلوذُ بها إليه فلا نضلّ ولا نشقى."

[manar20sabry]

لسه مش فاهمة اوي في الاوبشنز بتاعة تمبلر

ومش عارفة ال reply بيبقى عبارة عن مسدج خاصة ولا تعليق عام ولا إيه

بس الخلاصة اني كنت باكمل حلويات محمد في حياتي

النهاردة مثلا.. ٧ رمضان.. وصلي بيا صلاة جميلة واتناقرنا حبتين بس اتصالحنا بسرعة 😅

ودعا دعاء حلو اوي.. الحقيقة انه السنة دي ابهرني بالدعاء في كل ليلة صليناها سوا

ابهرني بفتح ربنا عليه انه يقول دعاء مترتب وجميل وبصوت نديّ 💜

حنيّته مع رُقية بتخليني اغير وافرح.. وباحمد ربنا كل يوم انه أبوها وبادعي إنه يكون صاحبها وسرها وعوضها عن كل حاجة في الدنيا.

كسوفه لما يجي يسألني هو انا هينفع احضنك قدام رقية لما تكبر ؟😁

طموحه حبيبي وسعيه انه يتغير ويغير شغله ومحاولاته في كل حتة شوية.. بادعي ربنا انها ماتروحش سُدًى

طفولته اللى كل شوية تخضني بمسلسل كارتون شكل 🙈 ودوامة ناروتو اللى مش عارفين نخلص منها 😅

تأكيده المستمر على إن اي حاجة عملها زعلتني فهي اجتهاد بشري اخطأ فيه وانه اكيد عن طيب نية وحُسن قصد،ودي حاجة انا متأكدة منها من يوم ما اتجوزنا

اظن ان مفيش مرة محمد اشتكى مني لأي حد يعرفه.. ولا حتى لأمي ولا مامته.. مهما كان الحال بيننا ولو حتى على سبيل الهزار قدام اي حد ،صدقاً هو ماشي يكلم طوب الارض عني وعن سعادته معايا ودي حاجة انا اصلا مقصرة فيها بالغ التقصير!

محمد بيحب يشيل عني قدام اي حد وبيرفض تماما اني اساعده في نقل الطلبات من العربية للبيت .. ودي حاجة مكفياني بصراحة.. احساسي انه هو سندي من غير ما اطلب ده منه في نظري شئ كامل الرجولة.. وكثير ممن اعرفهم يفتقر لمثل هذه الفضيلة وتغيب عن ذهنه أصلا!

اخلاق محمد نعمة من ربنا والله.. وحُسن ظنه بالله والناس دي اجمل حاجة في الحياة ويارب ما ابهتش عليه بكل سوداوياتي المنيلة بستين نيلة-واحتفظ بيها لنفسي- وهو اللى يعلّمنى ويغيرني

فاللهم آمين.

[manar20sabry]

عايزة اسجل كل لحظاتنا الحلوة عشان لما نفسي الأمارة بالسوء تسول لي اي فتنة اعرف ارجع لعقلي كده واكن من الراشدين

النهاردة مثلا لما اتكلمنا كتير وفضفضنا عن كل اللى جوانا ولما قال لي انه بيحب يشوف نفسه في عيني هيرو

وهو اكبر من ذلك والله ❤️

ولما طبق لي الغسيل.. وجاب لي الاكل.. واتبسطنا واحنا بناكل وبنتكلم

ولما بيصحى نصلي الفجر والضحك اللى بنكركعه لما يبقى مش عايز يصحى ويقوم مغصوب وبعدها يشكرني

حضنه كل يوم وسؤاله زعلانة مني؟

حنيته اللى بشوفها ف عينه لما بيشيل رُقية ويلاعبها ويفضل يسألها انا شكلي بحبك ولا ايه يابت انت؟ 😁

مش هنسى اول مرة غيرلها البامبرز والضحك المصاحب لهذا الموقف الجلل

ومش هنسى مرات كتتييير لما طلب مني انه هو اللي يأكّلِها (يُطعمها)

كل اسبوع لما بيودي هدومه للمكوجي عشان يخفف من عليا او لاني مابعرفش اكوي😂

لما بيبقى رايق ويقول لي تعالي نتفرج على فيلم سوا بقالي كتير ماقعدتش معاكي.

لما سمعني وانا باتكلم عليه مع صحابي وجه قال لي قطعتي في فروتي طبعا؟😁 😁

محمد سكر أيامي والله

وجوده جنبي رحمة واسعه من الله..

نكمل بعدين عشان قفشني😅

[manar20sabry]

‏وتبقى أفضل الأمنيات هي أن يجد كل منا من نبدأ معه وننتهي معه وأن لا نعاني من الفقد ثانية،وأن لا نشعر بصعوبة اللجوء لمن ليس لنا،أن نجد من يهون علينا مرّ العيش،من يبقى كما عرفناه أول مرة، أن لا نقطع طريقًا كاملا مع شخص ثم نكتشف أن عمرنا تناثر هباءًا.

- احمد خالد توفيق.

[manar20sabry]

وفُجأة نقمتك وتحول عافيتك

[manar20sabry]

لك الحمد كله ولك الشكر كله.

[manar20sabry]

أتمنى في السنة الجديدة ان يبلغني رمضان وانا في حال احسن من حالي الحالي

وان لا يجعل حظي من الدين لساني فقط

ويهديني الى القول الطيب والعمل الصالح

وينقي قلبي من كل سوء ظن او حقد او غل او تفكير نسوان

ويشغلني بما ينفعني ويعلمني بعلمه ويردني لطاعته

ويجعل الآخرة همّي.

ويصبرني على تربية رُقية ويجعلني ليها خير رفيق لا تندم على صُحبته.

[manar20sabry]

لا لذة العارفين ولا راحة الجاهلين

نفس ال��كرة والله

لا اشتغلت مع اللى بيشتغلوا فبقوا منهكين

ولا ارتاحت مع اللى ارتاحوا فبقوا مأنتخين