malyprojektor

[malyprojektor]

#29 LUCA

To niy był udany seans, pisa od razu, dużo było ku tymu powodow. Miołech ochota na coś lekiego i w sumie dostołech to cego sie spodziywołech ale równocześnie było tyla rzecy psujoncych mi tyn seans że as musa je wymiynić. Zacna od tego że jus od casu filmu „Soul” denerwuje mie w Pixarze lynistwo animatorow, co w sumie jes sprzeczne z tym że lubia jeśli filmy som niyrealistyczne, ale w Pixarze wszystkie animacje majom lyniwy design, a to emotki a to żywiołki, duszyczki, duperelki a jak postacie ludzkie to zawsze karykaturalne. Jo wiym że ktoś może powiedzieć że „to ich styl” no jes ale jes lyniwy. W tym filmie design to jes jakoś tragedia, postacie wygondajom paskudnie a ludzko postać głównego bohatera bydzie mi sie śnić po nocach w koszmarach. Kolejno sprawa fabuła, konflikt w tym filmie i elymynt na siyła rozczulajoncy był jesce bardzij bezczelnie wciskany na siyła niż w „Guardians of the galaxy 3”, tyn film wrzescoł „tu pacz, zrobiyli my do ciebie smutno scyna, smuć sie, no cymu sie niy smucis, płacz!” no i to nic że tyn konflikt wogole niy mo synsu, płytkie to było i niyangażujonce. Główny złol niy był ciekawy yno odpychajoncy no i na koniec na napisach końcowych scynki pokazujonce prziszlość bohaterow. Zapewne Miyazaki niy wymyślył tego w „Moim somsiedzie Totoro” ale z tym filmym momyntalnie mi się to skojarzyło i możliwe że to było do tworcow inspiracjom, ale tu to zupełnie niy grało, w „Totoro” niy było złych bohaterow, wszyscy byli dobrzi, złe były tylko emocje i ta scyna po napisach pokazywała prziszłość właśnie z perspektywy emocji, a tu narobiyli Strzelb Czechowa po to żeby w tych scynkach je pokazywać, jak ktoś niy zobocy napisow to niy dowiy sie cy Luca ujawniył sie innym dzieciom w szkole. Ach i ujawnianie, pamiyntom z recynzji oglondanych 4 lata tymu jak recynzynci godali że tyn film jes tworzony przez włoskich animatorow, ktorzi som potomkami emigrantow w usa a teros to do włoch przibywajom imigranci i tyn film mo uświadomić włochow ile sami dostali od innych żeby byli bardzij otwarci. Wiynkszego bullshitu niy słyszołech, naciongane to jak baranie jaja, nic w tym filmie niy ma emigracji, potwory niy chcom przeniyś sie na lond, as gowa boli jak o tym myśla. Film jes o potworach ukrywajoncych sie wśrod ludzi, ktorych ludzie się bojom, imigranci raczyj niy som w stanie sie chować w tłumie bo to niy urażajonc miyszkańcow bliskiego wschodu, majom inno uroda. To jus pryndzyj miało by to syns jakby miało to być odniesiynie do oriyntacji seksualnyj bo tego niy widać po samym człowieku jeśli tego niy eksponuje. A i jesce na koniec mi sie przipomniało. Dubbing. Niynawidza, połowy tekstow niy zrozumiołech i o ile dzieci godały jesce wyraźnie to z wypowiedzi wujka bohatera niy zrozumiołech absolutnie nic. Szkoda pisać, zawod i padaka, produkt a niy film. Jesce musa dopisać bo wystawiajonc filmowi ocyna na letterbox wyskocył mi wywiad o inspiracji reżysera studiym Ghibli, czyli miołech racja i równocześnie jeśli on sie inspirowoł Miyazakim bo jesce gorzij o nim świadcy bo nic wartościowego od Miyazakiego niy wyciongnoł.

[malyprojektor]

#28 THE WIZARD OF OZ

Zobocyłech tyn film zachyncony nawet niy samym „Wicked” co jego fabułom przecytanom na wikipedii, bo z rozmachu przecytołech jesce fabuła „Czarnoksiynżnika z Krainy OZ” i sama fabuła spodobała mi sie na tyla że jus w poważnyj dorosłości, piyrszy ros tyn film zobocyłech. Podoboł mi sie, ale jego oglondanie niy przipominało mi nic co widziołech do tyj pory, bo cało treść była do mie przićmiono podziwianiym scynografii i kostiumow, te prawie 90 lot tymu film musioł robić piorunujonce wrażynie a jo podziwiołech jak rozdysponowywali scynografie na halach nagraniowych, które ze scynografii som jesce prawdziwe i kaj na ścianie zacyno sie tło, w tym przipadku nojciekawsze były ścieżki kaj na przikład Dorotka wychodzonc z krainy Munczkinow dosłownie zaczimuje sie przed ścianom. Fabularnie zachwycony byłech postaciom Stracha na wroble, tym że jako poszukojoncy rozumu zawsze mioł go nojwiyncyj i żałuja że niy udało sie tego efektu uzyskać z pozostałymi bohaterami bo Lew myncył mie jus swoim tchórzostwym bo tyla go było a za to zabrakło mi aby jednyj scyny w ktoryj to Drwal zrobiył by cokolwiek za co inni mogli by go pokochać. Aktorka grajonco Wiedźma z Zachodu była wspaniało i to w obydwu rolach. Jeśli mioł bych na coś narzykać to na "Wicked", bo skoro cały świat przedstawiony w filmie mioł miyjsce tylko w gowie Dorotki to niy wiym jaki syns mo robiynie tyj historii prequela skoro niy mog sie wydarzić jeśli nikt o nim niy śniył. Podsumowanie. Uważom że to niy jes tylko film, yno dzieło artystyczno-historyczne które kożdy musi ros w życiu zobocyć.

[malyprojektor]

#27 NEUJAHRSKONZERT 2025

Spisuja wszysko co oglondołech na projektorze to tym razym wyjontkowo koncert. U mie w rodzinie to jus tradycja, som kultywuja ja od 2014 roku od koncertu prowadzonego przez Daniela Barenboima, samo zoboczynie koncertu jes do mie ważniyjsze niż Sylwester, fajerwerkow moga niy widzieć ale koncertu przegapić niy moga, no i do mie Nowy Rok niy zacyno sie o 00:00, yno od życyń Dyrygynta i orkiesty na końcu koncertu. Jak chodzi o tyn rok to koncert niy zaskocył mie nicym wyjontkowym, właściwie to wynudziyłech sie jak cholera ale i tak jestech zadowolony.

[malyprojektor]

#26 WICKED

Zawsze słabi mie jak ktoś kto recynzuje musicale zacyno słowami „nie lubię musicali” i pieprzi gupoty, jo jestech totalnym przeciwiyństwym, dwa moje ulubione i ukochane filmy to musicale, scyny śpiywania i scyny tańca som do mie kwintesyncjom kina, tak jak na studiach ucyli nos że rysunek niy jes zdjynciym, że powinno sie w rysunku przełamywać rzeczywistość, uwypuklać to co jes wyjontkowe do danyj scyny, tak samo mom z kinym, niy oglondom dramatow, za to uwielbiom jak coś jes niyrealistyczne, jak mo jakiś motyw przewodni albo zmiana w stosunku do realnego świata. I przechodzonc do filmu, mom bardzo miyszane uczucia, dodom że oglondołech film niy znajonc musicalu, ani nawet niy oglondajonc „Czarnoksiynżnika z krainy OZ”, ale to niy powinno przeszkodzać w odbiorze. Tyn film mioł wszysko to żeby mog mi sie podobać, ale coś w nim niy zagrało i niy moga powiedzieć że efekty, bo te, mimo że cukierkowe to były orginalne, bioronc za przikład pociong do Szmaragdowego Grodu, piosynki były dobre, dwie z nich wcześnij słyszołech. Myśla że mi nojbardzij w tym filmie przeszkadzały dwie rzecy, a mianowicie brak fabuły, co jes paradoksalne bo w filmie dzioły sie rzecy, ale wydaje mi sie że inny film ogroł by je w 20 minut, a tu konflikt czarownic wlok się przez 3/4 filmu, był tymat dyskryminacji, ale nadal, film niy wywołoł wy mie żodnyj empatii, była scyna upokorzynia bohaterki i znowu, wiym co film chcioł mi powiedzieć, mioł wywołać wy mie żal a wywołoł zażynowanie i cringe. Drugim minusym była do mie Ariana Grange i żeby niy pisać za dugo, som aktorki i piosynkarki których niy lubia, ale równocześnie nojwiynkszom wartościom do mie jes kiedy niy lubiano przyzymie gwiazda udawadnio mi że sie myla, co sprawio że zaczynom ja lubić, to niy jes tyn przipadek, niy polubiołech Ariany Grande, niy moga powiedzieć żeby była beznadziejno, problym mom z ij grom a przede wszystkim z ij wyglondym, jo niy twierdza że som jestech piynkny, ale z niom było coś niy tak, niy jestech w stanie stwierdzić co dokładnie, cy to że majonc ponad 30 lot jes w jakimś anorektycznym stadium kojarzoncym mi sie z nastolatkami, cy miała jakieś operacje plastyczne zrobione, wyglondała do mie tak niynaturalnie że dostowołech doliny niysamowitości, wywalało mie z immersji i zamiast myśleć o filmie zastananwiołech sie nad ij stanym zdrowotnym. Podsumowanie. Do mie ciekawsze od samego filmu było cytanie fabuły musicalu na wikipedii ale równocześnie ciesza sie że tyn film prziciongnie ludzi do kin, bo daje szansa na ekranizacja innych musical.

[malyprojektor]

#25 DUNE PROPHECY S01E06

Skońcyło sie, nareszcie, durne to było, niy moga ocynić tego jako toalny paździoch bo zdjyncia w tym serialu som z innyj ligi niż scynariusz, ale do samych zdjynć niy warto marnować do niego casu. Ano żeby jesce niy marudzić na wszysko to Travis Fimmel był wspaniały, oniryczny, niyobecny i chciało mi sie na niego przez to paczeć, ale zdaja se sprawa że z powodu tych samych argumyntow do kogoś innego to może być wada. Ah jesce jedno, pochodzynie Desmonda, to jak było to nakryncone jes dowodym na to jak bardzo tworcom sie niy chciało, co owocuje tym że mi niy chce sie wracać żeby sie upewnić cy sie niy myla, w tym odcinku dowiedzieli my sie skond sie wzioł, ale i dopiyro w tym odcinku dowiedzieli my sie że drugo z siostr Harkonnen miała dziecko, tak to było nakryncone że było mi wszysko jedno. Niy polecom.

[malyprojektor]

#24 DUNE PROPHECY S01E05

Tyn odcinek idzie podsumować jenom scynom, ktoro mi przipomniała film „Na noże 2” kaj detektyw niy mog wpaś na rozwionzanie zagadki bez to że była zbyt trywialno. W tym odcinku bratanek Harkonnen wyjawio Desmondowi Hartowi wielko tajymnica, przekazano mu przez zakon Bene Geserit w postaci konieczności poszukiwania źródła dostawy niylegalnego drona u przemytnikow. To samo się komyntuje. Moim zdaniym serial trefiył w swoim powstowaniu na strajk scynarzystow, bo nic innego niy tłumacy takij durnoty.

[malyprojektor]

#23 LOOK BACK

Zostawiyłech se tyn film na Świynta, zobocyłech z polecynia youtubera Ormando. Lubia tego chopa, prowadzi swoj kanał jako hobby a niy po to żeby zbiyrać lajki o obserwacje, ale do brzegu, a właściwie to zacna od końca od ocyny. Niy polecom, straszno padaka, durnota i strata czasu, mimo że trwo niycało godzina z npisami. Opisza. Zacyno sie w miara ok, postaci jednyj z bohaterek niy polubiyłech na wstympie ale z myślom że może zmiyni się z biegiym fabuły na lepsze. Niy zmiyniyła sie, do samego końca była niyprzijymno i zadufano i to że się na koniec rozbecała niy sprawio że stała sie kimś lepszym. Drugo bohaterka, bardzij wycofano była niyco ciekawszo, powiydzmy, bo tys sie niy zmiyniyła na lepsze. Mioł tyn film momynt trocha Nolanowski, który przipomnioł mi anime „Twoje Imię” w tym przipadku historia dostaje swoja alternatywa w trakcie wymiany liścika pod drzwiami ale zamiast to pociongnonć to to tak łostawiyli że czas sie zmiynio ale jednak niy bo otwarła ta zadufano drzwi i nic z tych zmian historii wywołanych liścikiym pod drzwiami niy wynikło.

[malyprojektor]

#22 SECRET LEVEL S01E09-15

Kontynuacja, moje odcucia od ostatniego seansu sie niy zmiyniyły to tak jak poprzednio napisa co mi się podobało a co niy. Jes odcinek z lekko przygłupim chłopaczkiym, nic wybitnego ale mo w sobie absurd i groteska i jak jus daje nadzieja że chłopaczek coś udowodni i osiongnie, tyn sie poddaje. Odcinek z ojcym szukajoncym we wszechświecie swoij córki jes gynialny, uwielbiom filmy które majom motyw, który determinuje akcja, w tym przipadku było to to że do podróżujoncych pryndkościom nadświetlnom czas biegnie wolnij niż do przebywajoncych poza niom i tym sposobym ratuje swoja córka tylko po to żeby ta mogła umrzeć przi nim właściwie ze starości, podczas kiedy on, z poczontku zwykły mechanik staje sie poszukiwaczym przigod. Był odcinek z dziewczynkom ktoro odradzała sia po kożdyj śmierci, był bardzo fajny, pokazywoł że kożdo nowo gra jes inno i jes nowom przigodom, nic wielkiego ale był bardzo przijymny. No ale na koniec trafiył się jedyn paździoch, odcinek niy oparty o żodno gra ale posiadajoncy postacie licyncjonoiwane z universum play station z wszyskimi tego wadami, fnservisym do fanservisu, był okropny i przipominoł mi Ready Playe One którego szczerze niynawidza, który jes obraźliwy w odbiorze, tyn odcinek niy jes as tak zły ale nadal był niyprzijymny. Moja ocyna całości. Niy moga się docekać na 2 sezon i w myślach układom se historie co i jakie gry mogły by sie w nim znojś.

[malyprojektor]

#21 HELLUVA BOSS S02E12

Marudziyłech na Stolasa mazgaja to go dostołech, tym razym dosłownie beczoncego pół odcinka. Tyn odcinek był do mie takim zawodym że uswiadomiyłech se ze musa zmniyjszyć swoje oczekiwania odnoście 2 sezonu "Hazbin Hotel". I niby powinno to na mie działać, za co córka Stolasa go niynawidzi ale było to do mie bardzo naciongane, pretynsjonalne i irytujonce. Piosynka była ale tys niy ma do cego wracać.

[malyprojektor]

#20 SECRET LEVEL S01E01-08

Bardzo lubiołech „Love, Death and Robots” i ciesza sie że Amazon zrobiył własno wersja bo ostatni sezon LDR wyszed dwa lata tymu. Przechodzonc do Secret Level, podobało mi się bardzo, co prawda połowy tytułow gier nawet niy znołech, wydaje mi sie że były to jakieś stare gry które miały tanie prawa autorskie, ale niy przeszkodzało to w odbiorze. Niy streszczajonc ani omawiajonc wszyskiego po kolei, napisa yno co mi sie nojbardzij podobało. Jes odcinek z szukajoncym zymsty chłopaczkiym którego kożdo własno śmierć kosztuje 20 lot życio, mści sie ale kosztym własnych 60 lot i pado pytanie cy było warto. Jes odcinek z Arnoldym Shwarzeneggerym który po kożdyj śmierci sie odradzo, bohater jes sympatycznie głupi ale w ramach fabuły ucy sie cegoś i zmiynio na lepsze. Warhammer, jako jedyn z niylicznych które wogole kojarza był wspaniały, co prawda fabularnie niy dzioło sie z nim nic wybitnego ale oddowoł klimat tego uniwersum. Pacman był gynialny i straszny. Moja ocyna – jestech zachwycony, dostołech dokładnie to cego oczekiwołech.

[malyprojektor]

#19 DUNE PROPHECY S01E04

Niystety mom do tego serialu podejście jak do „Pierściyni władzy”, zaczyło sie dobrze ale z czasym cało przijymność oglondania zmiyniyła sie w wyszukiwanie bzdur scynariusza, nawet niy chce mi sie rozpisywać, gynialny plan głównyj bohaterki to rzucynie nożym w drona który mioł zabić imperatora. Moja ocyna, mom naszykowany 5 odcinek i niy chce mi sie go oglondać.

[malyprojektor]

#18 DUNE PROPHECY S01E03

Marudziyłech na to że świat w serialu niy wyglondo jakby dzioł się 10000 lot przed wydarzyniami w ksionżce to mom za swoje. W odcinku pokozali rodzime planety Harkonnenow i Atrydow. Harkoneni polujom na włochate wieloryby, ich miyso kupujom na targu i miyszkajom w ziymiance i co nojlepsze, włochate wieloryby to w tym świecie nojmniyjszy problym, z resztom sprawdziyłech, som w lore. Problymym jes immersja, a właściwie ij brak, jak jo jako zwykły niydzielny widz tego świata mom w cokolwiek uwierzić co mi tyn serial pokazuje. Władcy planety, mimo że niy nojważniyjszego rodu w e wszechświecie i ukaranego, to nadal władcy planety, ktorzi niy miyszkajom w pałacu tylko jak jacyś chłopi, bijom się o jedzynie, ale równocześnie rozmawiajom o podróżach miyndzygwiezdnych, to było żenujonce. W prawdziwym świecie nawet władcy wsi miyjszkali w nojlepszym w tyj wsi pałacu. Z resztom u Atrydow było to samo. Atrydzi polujom na leśne bawoły, co nadal, z tego co pamiyntom było w lore ale jus w lore niy przipominom se że te polowania odbywały się na koniach w średniowiecznych ubraniach, przi rozmowach o sztucznyj inteligyncji. I nadal, szło to zrobić w sposob żeby szło w to uwierzić, prostymi sposobami, pokazujonc że na tym polowaniu majom nowoczesno, jak na tyn świat, technologia albo ubiory, albo zdanie dialogu że to z uwagi na tradycja tak się ubrali. Nic z tego niy ma, przeklikowujonc się po pasku przewijania, jesce zwracajonc uwaga na poszczególnych aktorow, to mog bych się pomylić cy to niy jes czasym „Ród Smoka”. Napisołbych coś wiyncyj, ale po tym odcinku straciyłech serce do tego serialu.

[malyprojektor]

#17 MARS EXPRESS

Niy planowołech oglondać tego filmu, ale wydoł mi sie nojciekawszym z czterech które miołech odłożone na kiedyśtam. Mom wielki syntymynt do kina francuskiego, jakby cuja różnica w kryncyniu Hollywoodowyj papki w ktoryj na piyrwszym miyjscu jes produkt i termin prymiery, na drugim aktorzi, a dopiyro na samym końcu scynariusz, a muzyka przi okazji w stosunku do filmow francuskich w których priorytetym jes styl, zaros przipominajom mi sie filmy Michela Gondry i Jean-Pierre Jeuneta. Wracajonc do animacji, niystety mie niy zachwyciyła, znacy sie narysowany świat był fenomyntalny, zachwyco mie to że tworcy poświynciyli czas na zaprojektowanie robotow które na ekranie pojawiajom się na kilka sekund, ale jus scynariusz to typowo historia o detektywach probujoncych rozwionzać zagadka dowania robotom wolnyj woli i tu chyba jes mój nojwiynkszy zawod tego filmu, wolno wola i poszukiwanie człowieczyństwa to głowne motywy "Robocopa" i "Terminator Salvation", obydwa za to uwielbiom, a tu wolno wola robotow to niy jes żodno rozkmina a jedynie środek do tego żeby roboty spakowały się na statek kosmiczny i poleciały w pizdu w kosmos bo na Ziymi i Marsie jes dyskryminacja robotow. To tak jakby w obecnym świecie zrobić film o tym jak pakuje się gejow, transseksualistow i uchodźcow na statki i wysyło na pełny ocean bez celu. No cegoś mi tu brakuje w tym filmie i raczyj do niego jus niy wroca.

[malyprojektor]

#16 DUNE PROPHECY S01E02

Z jednyj strony tyn odcinek był niyco mnij efektowny niż piyrwszy, ale z drugij, scyna spotkania młodyj akolitki ze swoimi przodkiniami była jednom ze straszniyjszych rzecy jakie kiedykolwiek widziołech. Jesce nawionzujonc do tego co pisołech o piyrwszym odcinku o politykowaniu, scyna wygodania sie ksiyncia swoij kochance ze skonfliktowanego rodu była tak płytko, że to niy jes rywalizacja miyndzy inteligyntnymi ludźmi, tylko rywalizacja miyndzy przeciyntnymi z delilami z rodu Corrino. Scenarzyści muszom bardzo niy lubić tego rodu że robiom z jego członkow takich kretynow. Czekom na kolejny odcinek.

[malyprojektor]

#15 HELLUVA BOSS S02E11

Niy byda się rozpisywoł odnośnie moij miłości do Vivzieverse. Napisza yno że było to do mie nojwiynksze odkrycie 2024 roku, świat który pochłonoł mie na kilka miesiyncy. Helluva Boss bardzo lubia, chociaż woloł bych żeby historia szła w niyco innym kierunku niż złomane serce Stolasa, zwyczajnie niy jes do mie to zbyt ciekawe. Tyn świat mo tyla do zaoferowania, tyla postaci, jak na przikład Barbwire albo złoczyńcow jak Crimson a skupiomy sie na jakże umynczonym jego ksionżyncyj mości. W tym odcinku pokozali w końcu Satana i mioł wspaniały głos. Piosynka była jedna, miała w sobie to co lubia, musicalowy konflikt miyndzy osobowościami, no ale niystety jednom z tych osobliwości był płaczliwy Stolas to niystety kapcie mi z butow niy spadły.

[malyprojektor]

#14 DUNE PROPHECY S01E01

Niy miołech jakiś wielkich oczekiwań odnośnie tego serailu, co do filmow miołech doś miyszane uczucia, jedynka była do mie tylko ok, dwójka jus była lepszo, byłech na nij dwa razy w kinie, ale równocześnie niy chce mi się do tego filmu wracać. Odnośnie serialu to chciołech jedynie miło spyndzić czas i moje wrażynia som doś pozytywne, na sama myśl że serial bydzie się krynciył wokoł zakonnic było mi słabo bo jes to do mie nojnudniyjszo rzec w tym świecie, ale niy było tak źle. Moga nawet napisać że scynografie i stroje som bardzij kreatywne niż w filmie. Ale jes jedyn minus i to ogromny tego serialu a mianowicie akcja dzieje się 100 lot bo buncie maszyn i 10’000 lot przed akcjom filmu, a wszystko, stroje, technologia, walki na mieszcze i tarcze, statki kosmiczne się niy zmiyniyły, tak jakby tworcy w dupie mieli to że Nawigatorzy ewoluowali przez te 10��000 lot po to żeby moc przemieszczać ludzi miyndzy galaktykami, moda się przez 10’000 lot niy zmiyniyła, dynastie się niy zmiyniyły, przipomino mi się zaros świat "Rodu Smoka" kaj dynastie w ciongu 2 pokolyń wywracały się do gory nogami, za to te 100 lot po buncie maszyn tys niy zostawiyło po nich źodnego śladu, jakiś zgliszczy cy esponatow, nawionzuja tu tyn razym do "Władcy Pierściyni". Poza tym jedyn minus i jedyn plus. Minus za rola Imperatora, który jes tak zagrany że mi jes ciynżko uwierzić że pokierowoł by sklepym spożywczym a co dopiyro kilkoma galaktykami. Jo wiym że zostało to tak nakryncone po to żeby pokozać że idzie nim manipulować, że jego żona jest pradziwym władcom, ale nadal wyglondo to słabo bioronc pod uwaga że świat Diuny to niy jes yno SF, to niy som po prostu polityczne gierki, tylko to som polityczne gierki w których rywalizujom bardzo inteligyntni z bardzo inteligyntnymi kaj ludzie byndoncy dwa kroki przed innymi rywalizujom z tymi ktorzi som jesce dalij w planach. No i plus, Travis Fimmel. Mo tyn aktor w sobie to coś co sprawio że chce się go oglondać, tak jak w "Vikingach", jest w tym filmie niyco niyobecny, jakby niy w pełni świadomy. Ale równocześnie wiy co robi. Moja ocyna. Kontynuuja oglondanie.

[malyprojektor]

#13 ARCANE S02E07-09

Trocha ciynżko bydzie mi się rozpisać bo jesce niy ochłonołech po tym finale. Moje oczekiwania były ogromne, no może przesadzom, poprzednie odcinki wystarcyły żeby dać tymu sezonowi nojwyższo ocyna, w kożdym razie niy miołech przewidywań, zaufołech twórcom i dowiyźli. 7 odcinek z poczontku trocha mie nudziył, ale zaznaczom tu że niy jes to coś złego, za przikład podom „Black Hawk Down” który mynczonc dowodoł poczucia immersji z uwiynzionymi żołnierzami, tu odcinek krynciył się wokoł Ekko, który do tego odcinka wydowoł mi się na tyla niyciekawy że jak w poprzednim odcinku zaginoł to mojom reakcjom było „ok, z innego wymiaru z trzech podrożnikow wrociył yno jedyn” a cymu pisa o tym z takim zachwytym to to że w trakcie tego odcinka zaczołech go lubić, na tyla że licyłech że to on stanie się głównom postaciom finału. No i jesce coś, scyna tańca Ekko z Powder, jak zobocyłech ja za piyrwszym razym to mi się podobała, ale jak odświyżyłech se ta scyna to jus złapała mie za serce, ona mo idyntyczny vibe jak finał „La la land”. Bohater zdaje se sprawa z tego że to tylko wyobrażynie, ale cieszy się tom chwilom. Wracajonc do realnego świata w 8 odcinku, było to zawionzanie fabuły przed finałym no i prziznaja, że dołech sie oszukać bo jednak Jayce okazaoł się tym dobrym a Victor złym i w tym miyjscu musa prziznać że sie zgubiyłech, niy wiym cy to wina scynariusza, cy przegabiyłech jakiś dialog, niy rozumia motywacji antagonistow i ich sojuszu, Tak jak Ambesssa jes mojom ulubionom postaciom tak niy mom pojyncia co chce osiongnonć, znacy sie zrozumioł bych jakby miała walczyć z magami, ale magowie pojawiyli się tu w zasadzie po stronie dobrych, jako trzecio strona konfliktu, to akurat bardzo mi się podobało bo przipomniało mi postać Tarantulasa z „Beast Wars”. No ale wracajonc, finał, niy spodziywołech sie takij rozpierduchy, Victor okazoł się być doktorym Manhattanym tego świata, który mog zniszczyć w imię swoij filozofii widzynia świata idealnego, tak jak na to licyłech, świat zostoł uratowany przez Ekko ale tu pojawiył mi się mały zgrzit, znacy się jo rozumia finałowo scyna poświyncynia, że było to nawionzanie do finału 1 sezonu w ktorym zamiast zabijać ojca, chce się go ocalić, ale to poświyncynie było do mie trocha naciongane, była chwila przed tym scyna jak bohaterki upadajom na żelazo i gdyby Jinx wtedy zginyła to było by to trocha mnij trywialne bo pokazywało by bezsyns śmierci a Vi została by z żalym że niy zdonżyła sie pożegnać i podziynkować, no i licyłech że Ekko jesce ros uratuje Jinx, że jego wiynź z niom ktoro pojawiyła się z 7 odcinku sprawi że zrobi wszysko żeby ja uwatować tak jak na poczontku tego odcinka. No ale w sumie to dobrze że serial po zakończyniu zostawio kilka wontkow niydomkniyntych żeby szło się pozastanawiać cy moc cofniyncia czasu przez Ekko po zakończyniu serialu sprawiyła że wcoriył i ja uratowoł, po tym jak odbudowoł swoje urzondzynie. Moja ocyna. Arcydzieło, byda wracać, A piosynka Stromae „Ma Meilleure Ennemie” zostanie zy mnom na zawsze. Cułech gynsio skorka i popłakołech sie jak przesłuchołech ja czytajonc przetłumaczony tekst.