maanyaank

[maanyaank]

Bangii ngii-npaajbiiyge

Gii-dbaajmayaanh naaniimye enji-zhibiiyge-swaanh megwaa, "giishpin" nwii-zhibiiyaanaaba, gaawii "gishpin". Hyphen gewe ngii-pchi-saa ekwaayiing "gchi-zhaazhi". Nshikesin maanda kidwin, gaawii prefix aaw-zinoo.

Nda-ke-ndagkendaanaaba go naa eta wendgwenh geyaabi zhiwi nishaa da-bit "Blaze" icon, gaa-pchi-maagbin'giba iidik wii-chigaazat, mii'sh gii-maamnanaabndamaanh bangii iidik gii-npaajbiiygeyaambaane.

Ndaanawii-kwedwe minj ge-zhi-bmigaazgobne wa icon. Gnamaa wiinwaa (wegwendigenak) da-bmaawaan ngii-nendam, geyaabi'sh go bi zhiwi. Gaa dash wii go aanwi nwii-naadaabkinmaagoo-sii.

Nongo wii weweni maanda nda-ke-gindaan jibwaa-maagbidoowaanh "Post now". Aabdek naa gnamaa gaawii gegoo nbaashzaamda-ziinaadik. (Niibna nching, nsing pchi-zhibiiygese "a" niizhing go eta wii-zhibiiwak.)

[maanyaank]

Aanii Maany Aan, Aaniish na ezhi-yaayan?

Nmino-bmaadis go. Aaniish pii gaa-bi-zhibiiygemba? Bjiinak go ngii-zhiibiiyge bangii gegoo zhanda Tumblr dbaajmayaanh gegoo megwaa enji-zhibiiy-ziwaanh maanpii. (Na'ii nji, ndictionary getnaamiikmaanh. De-mnik geyaabi te-waa-nan'kiiyaanh zhiwi. Anishinabek News gego naanimye ngii-toon article dbaajmayaanh bemi-yaayaanh nakiitmaanh wi.)

[maanyaank]

Enji-zhibiiyge-swaanh megwaa

Gishpin wiya aapiichin maanpii enaabgwenh wii-ndagkendang wendgwenh gegoo miinwaa da-gii-nji-zhibiimaanh, na'ii nnaash gegoo enji-zhibiiy-ziwaanh, nda-ke-getnaamiikaan ndictionary gchi-zhaazhi-gaa-maajiikmaambaa. Baamaa shkwaa-proofreadwitoowaanh kina niwin naaning mdaaswaak geyaabi ndictionary entries waa-chigaadegin zhiwi, mii miinwaa bjiinak da-maajii-zhibiiygeyaanh aapiichin maanpii, ngii-nendam. Noondaash nsing mdaaswaak entries geyaabi aabdek nwii-proofreadwitoonan. Gnamaa naa October jibwaa-shkwaagzat ndaa-de-giizhiitaa nan'kiiyaanh wi.

[maanyaank]

Na'iin gewe zhiwi miikaansan etegin, fat bike-on bebaamwebshkoowaawaajin waa-bmi-pibzawaat. Aapiichin go bmi-dkabmanoon niwin bemi-pizang skiiwing. Gaawaanh go naagot zhanda mzinaazwaansing bmakwet wa fat bike bmi-dkammak wi miikaans.

[maanyaank]

Ngoji mdaaso-shi-naano-dbagaans jibwaa-niizhwaaso-dbagnek, mii besha gii-ni-yaayaanh oodi enji-maajiibzang wii-bbaa-skiiwing. Gaawii wii go maanpii mzinaazwining enaabminaagok da-piichi-dbikaabminaagok gii-piichi-dbikaabminaag-sinoo. Geyaabi go naa de-weweni gii-waaseyaa.

Bangii go gii-mkomiinswan wi miikaans, bangii dash zaami-gdaakiiyekmigaaak gaawii gshkitoo-siim wii-gdaakiiye-gaadeseng giishpin gwek niigaan nikeyiing naakshinwaat giwi skis. Mii wi nikeyiing zhiwi enji-bmakweyaat gaa-skiiwijik.

[maanyaank]

Ni-dbikaabminaagok nongo ngii-dbaabndaan pii wii-bbaa-skiiwiyaanh. Mzhakok da-mnwaabminaagot ni-naagshik, ndi-nendam, aapji gewe gii-mno-piichi zhiwebat. -3 Celsius eta ngoji gii-aawan. Gegaa ngo-dbagiiswaan kina maamwi oodi ngii-bbaa-skii-iiw. Nooch go naa oodi namnoon miikaansan ge-naagdoopniin wiya, gaawii go eta bezhik miikaans egiitaamak te-snoo.

[maanyaank]

Eshkwaa-mzinaazmaanh wi miikaans enaabminaagok, ke-aabnaabyaanh gnamaa wiya shkweyaang bi-yaat netaa-skiinwit -- wii-bwaa-giibshkaageyaanh go naa, zaam gaa go naa niinii ngichi-gzhiibza-sii -- mii gii-waabmak bezhik. (Ngii-ke-bke bangii epiichi-mzinaazmaanh wi miikaans.) Gaa wiya gekenmak daa-aaw-sii, ndi-nendam. Besha ebi-yaat, "Baashjikaash-shin, nbejbis wii go naa niinii," ndi-naa. (Ngii-Zhaagnaashiim go naa; gaa go naa wiya zhanda yaa-sii eNshinaabemat ge-bbaa-skiinwipa.) Bmi-baashjikaazhit, nginwaabmik weweni, genii dash go nginwaabmaa. "Giikenmin na?" ndi-naa. (NZhaagnaashiim go naa.) Znagat go naa wiya wii-nsidwaabmin wiikwaan biizkang miinwaa sunglasses, miinwaa'sh gchi-zhaazhi go naa maaba gaa-waabmagba, gaa gewe ngii-gkend-ziin gewii iidik skiinwit. Gewii'sh go gaawii ngii-gkenmik-sii skiinwiyaanh. Mii'sh go naasaap pii gii-nsidwinaadyaang. "Oonh, aanii!" ndikdami.

Mii go shki-ntam nwiij-Nishnaabe bmi-megwaashkwak oodi bbaa-skiinwiyaanh. Mii giiyenh shki-ntam zhanda bi-nji-skiinwit.

Aapji'sh go ngii-waawnendam. Naangodnong ko, ntam ndoo-dkamoojiigebis. Nda-ni-n'kwebis dash oodi wi washme waasa nikeyiing bemi-zhi-giitaamak miikaans. Besha nda-ke-zhi-giitaabis, mii dash miinwaa washme waasa nikeyiing bmi-zhi-giitaabzayaanh ko. Mii'sh nongo miinwaa gaa-zhichgeyaanh. Zhaazhi go naa ni-aabjibzaba wa nwiijkewenh oodi waasa nikeyiing wii-bmi-zhi-giitaabzat.

Ni-n'kwebzang oodi, besha zhiwi te aabdaako-pabwin. Ngii-ke-nnaamdap dash zhiwi, ezhchigeyaanh go naa ko, wii-ke-pizndawgwaa bneshiinsak, miinwaa bekaa go naa wii-maamiikwaabndamaanh epiichi-mnwaabminaagok mzhakwak, mtigwaaki gewe. Bekish dash go nongo ngii-baabiiyaa wa nwiijkewenh wii-bi-zaageyaakbizat oodi waasa washme bi-njibzat.

Mii sa maapiich -- gaa go naa gchi-gbeyiing -- gii-waabmak biijbizat. Besha ebiyaat, waabmit zhiwi nnaamdabyaanh, "Aaniish maanpii gaa-bi-zhi-dgoshnan zhaazhi!?" ndik. (Zhaagnaashiimo go naa; mii maaba bezhik gitziimwaan gaa-Nishnaabemtaag-siiwaajin.) "Gaa na gii-waabmi-sii giimooch gii-bmi-baashkjikaannaanh?" ndi-naa baapzhimak. "Nenbozhoonh iidik yaawyin," ndik baapit.

"Oodi ngii-dkamoojiigebis," ndi-naa. "Oonh, temgat nangna zhiwi shortcut?" ndik. "Gaa go waawaach ngii-maamnanaabnda-ziin," kida.

Jibwaa-ni-aabjibzat, "Ga-ke-wiidaanzoomin genii selfie-ing," ndi-naa. Oodi go naa gii-shki-megwaashkdaadyaang, mii gewii gaa-zhi-kwejmit (miinwaa ngii-kwejmik wendgwenh da-saagbane niwin mzinaazwinan Facebook).

Eni-maajiibzat, geyaabi go jina nga-ke-nnaamdaap, ndi-nendam. Mii dash go naa wiiba gii-zaami-dkidyeshnaanh. Gaa go naa ngii-bbaamend-ziin wii-jiishwebwak zhiwi aabdaako-pabwining bangii goon gaa-bit, miinwaa gaa go naa aapji gepgaak miiknoot ngii-aagwiitooshk-ziin.

Nongo, aapji go miinwaa mno-giizhgat. Ndoo-nnigaawaabiignidis go memkaach wii-bwaa-bbaa-skiinwiyaanh miinwaa nongo, zaam, aapji go jina ngii-nakiitaan ndictionary jiinaago. Miinwaa mbe miinwaa gegoo zhanda Tumblr nga-ke-zhibiiyaan, ndi-nendam.

Nahaaw, neyaap miinwaa bangii naa gnigenh nga-oo-ke-nakiitaan wi ndictionary.

[maanyaank]

Aanin oodi bebaa-nji-skiinwing, daa-ni-giishkdinaa bangii maage daa-ni-gchi-niisaakiiyemikmigaa naabminaagot, dbishkoo maanpii. Ke-gdaakiiyekmigaa go zhiwi bangii; aabdek go ski poles wii-ke-nakaazang wii-gdaakiiyeng. Mii enji-ekwishnoowaat zhiwi. Bmi-ke-gaakaanjweb'oodzam go naa, bekish gego bmasem.

Pii ni-niisaakiiyebzaang, de-gzhiibzam go bangii; gaa go naa memdage gegeti gchi-niisaakiiyekmigaa-snoo.

[maanyaank]

Mzinaadek, gaa go aapji daa-gchi-niisaakiiyekmigaa-snoo zhiwi naabminaagot. Wii-de-gzhiibzang'sh wii go bangii de-piichi-niisaakiiyekmigaa, (cross-country skiiwing go naa). Ngii-bmi-de-zazaan'kweyaash go bangii gii-niisaakiiyebza, gaa dash wii go aanwi ngii-bmi-shawejiise-sii. Mii go aanwi eshkam ngadziyaanh skiiwiyaanh. Gaa'sh wii go ndaa-de-maanend-ziin downhill daa-gjitoowaambaa.

[maanyaank]

Minj maaba mtik wi enji-zhinaagzigwenh. Gii-bbaa-skiinwiyaanh ngii-bmi-maamnanaabmaa maaba. Mii go shki-ntam waabndamaanh wi dnawa gegoo maajiiging mtigoong.

[maanyaank]

Gegeti aanwi gii-mna-miikseni ndaanis gaa-bmi-wenpazhnemawgiba. Eshkam go niibna zaagkiichganan de-yaanan, mii'sh Restore gii-oo-naabyaambaa. Gnamaa go gshkonwaach tek gegoo zhiwi e-de-zhinaagok go naa shelf da-toopa aanin niwin doo-zaagkiichganan, ndi-nendam. Aapji go mnopii ngii-oo-naabnaaba oodi. Naan'idaa gii-gchi-zhegnjigaade aanin zhiwi edaanding. Mii eta niizhtana nswaabik gii-zhi-dba'maanh maanda. Niimdana yeshkat nagnjigaadeba maanda. Aapji go naa ngii-oo-miikneyaan. Gaa go naa gegoo giishpin mnwaabnda-zik, ndi-nendam, wi go naa gii-wenpangindek.

Nshike ngii-zhaa oodi. Bi-giiyedaabaan'gowaanh go naa ngoding shkwaa-maajiinaak neyaap oodi endaat, mii zhiwi Restore gii-bmi-biindgeyaambaa. E-Niibaa-nam'aang gii-bi-giiyet, mii bjiinak gii-zhiset wii-waabndang. Aapji'sh go naa gii-maamiikwendam. Aapji go naa mnasnoon zhiwi niwin aanin zaagkiichganman.

Mii dash naa gii-dwisninik wi bezhik taaswaans gaa-yaangba wii-tenik TV. Mii bjiinak gii-yaang wi TV eshkwaa-aanjsidoot niwin zaagkiichganan zhiwi mkade-taaswaansing gaa-tegin. Mii dash go aanwi kina gegoo memdage go naa menezit zhaazhgo gnabach yaamgwenh.

[maanyaank]

Eni-zhi-bangiishengizwaat eNshinaabemjik endaawaat

Facebook gii-toon wiya graph zhinoomaagemgak maanda. Bezhik gaa-n'kwetang zhiwi ezhbiigaadek, mbe washme da-getnaamzingba immersion programs toong zhibiiyge kida. Debwe go. Wi dash go naa niibna zhise-sgwaa zhiwi dnoong da-zhaayaapaa pane, maanda genii gaa-zhi-n'kwetwak wa gaa-n'kwetang:

"Na'ii gego daa-naadmaagemgat, zhibii'geng -- giishpin kina waa-zhibiiygejik zhaazhwaach go naa naasaap zhi-zhibiiygeyaat, toong gewe ngoji, na'iing dbishkoo Tumblr maage Twitter, nooch wiya wii-waabndang "enaan'gidooning". Aapiichin go ndizhchige wi, zhiseyaanh go naa. Twitter ko ngii-zhibiiyge, Tumblr dash ngii-zhi-aanjii eshkwaa-giishpnadoot Elon Musk Twitter. (MaanyAanK zhiwi ndizhnikaandis.) Gnigenh go naa gonda eknoomaagzijik daa-waabndaanaawaa wiya "enaan'gidoong", epiichi-te-snok ngoji immersion. Gaawii wii go memkaach wii-kweji-aasookeng. Bekaa go naa ge-naapa wiyan gnoonaat daa-zhizhbiiyaan zhiwi mblog-ong. "Advanced" bemi-yaajik kinoomaagziwaat memdage maanda dnawa gegoo daa-naadmaagnaawaa."

[maanyaank]

Bezhik miinwaa kidwin bjiinak mekwendmaanh

Gegpii na neyaap miinwaa nmaajii-nakiitaan wi ndictionary. Nongo dash miinwaa bezhik example sentence zhibiiymaanh zhiwi, "zgaabiigshkoode" nakaazyaanh, bezhik geyaabi kidwin gaa-nakaazyaanh zhiwi, "giikbizaw'aa", wendgwenh zhaazhi gewii ngoji da-gii-zhibiiymawaambaane maanda, ndi-nendam. Gaa dash iidik. (Maanda wi example gaa-zhibiiymaanh: "Giikbizaw bangii daabaan; detbisenying zhiwi zgaabiigshkoode wi sabaap. Move the car a bit; the end of the rope is pinned under the tire there.")

Gaawii wii go maamdaa niwin bjiinak mekwendmaanin geyaabi kidwinan niin wii-toowaanh zhiwi online ndictionary-ing. Wa linguist nyaadmawit gewii teni gegoo zhiwi waa-aan'ke-zhibiiyang (na'ii dbishkoo, morphemes etegin zhiwi kidwining). Aabdek gewii wii-miiksachgaade wi nooch dnawa information (na'ii dbishkoo, edming wi kidwin, dialect code, example inflections) wii-naagok zhiwi dbendaagok wi nooch dnawa info pii wiya waabndang wi kidwin (na'ii dbishkoo, "example inflections" tek wii-bwaa-bchi-pidek dialect codes).

Gaa go gegoo niinii ndinmand-ziin ezhi-zhichgaadek database. Niish dash yaawak wi en'kiitngik. Nmiinaak go eta niwin kidwinan zhiwi waa-chigaadegin, edming gewe niwin, miinwaa dibii iidik wi bezhik kidwin nakaazang (dbishkoo M'Chigeeng, Sagamok,...), aanin gewe example inflections (dbishkoo "ngiikbizaw'aa," miinwaa "giikbizaw"), example sentences gewe.

Gaawii wii go enso-bebezhik kidwin nda-kweji-nda-mkwend-ziin example sentence. Na'iin go eta memdage, niwin kidwinan zen'gakin waa-zhi-nsastaming myaa edming wii-zhi-aan'kinoosjigaadek. Nawaa go naa "zgaabiigshkoode." Na'ii eta megwaa mekwendmaanh maanda wii-zhi-aan'kinoosdoowaanh, "end [of a stringlike object] be pinned down [by a weight]." "Aaniish go naa maanda waa-wdaming!?" daa-nendam wiya wi go eta waabndang. Example sentence dash waabndang, mii naa gnamaa da-nsastangba edming wi.

Gegeti ngii-ggiibaadendam iidik myaajiikmaanh maanda ndictionary eko-niishtana nso-bboon'gak washme, "Mii go naa ngoji ni-nso-bboon'gak da-giizhtoowaanh," gii-nendmaanh. Gchi-naanaagdawendmawin niibna niwin kidwinan kweji-nda-mkwendming ge-zhi-aan'kinootmingba zekoonwijik wii-Nishnaabemwaat wii-nsastamwaat edming.

[maanyaank]

Eke-getnaamiikmaa

Gegpii naa neyaap nmaajii-nakiitaan wi ndictionary gaa-maajiikmaambaa eko-niishtana nso-bboon'gak washme. Nooch gegoo bkaan ngii-ninnakii eshkwaa-retirewiyaanh. Wiya dash naanimye ngii-wiindmaak bezhik gekenmangit gaa-zhibiiyang eNishnaabebiiygaadek article Anishinabek News, gii-dgosdoot dash iidik ndictionary link zhiwi. Mii dash naa gii-gshkonwezyaanh gegpii wii-aabjiikmaanh wi. Ngo-bboon washme shkwaach gaa-nabyaambaa wii-nakiitmaanh maanda.

Megwaa dash nginwaabndaan kina gaa-zhibiiymaambaaniin notes Curve Lake endaajik gii-gagwejmagwaaba aanin kidwinan eko-niizhwaaso-bboon'gak gegaa.

Gaawii wii go weyiip nanda nwii-ni-too-siin zhiwi online dictionary-ing, zaam wa linguist nyaadmawit teni gewii aabdek waa-doodang wi eni-zhibiiymaanh ndatabase-ing wii-zhi-aashtoosjigaadek kina wi.

Aanin gewe kidwinan, nda-ke-gchi-naanaagdawendam go ndamkwendmaanh ge-zhi-Zhaagnaashiisidoongba niwin wii-miiksek mooshkin myaa edming niwin Nishnaabemang.

Nishnaabe-kidwinan eta gaa-ni-zhibiiymaanin -- Nishnaabek enaan'gidoonwaat -- mii dash niwin yaan'kinoosdoowaanin. Gaawii nmaanend-ziin wii-Nishnaabewsidoowaanh Zhaagnaashii-kidwinan (dbishkoo "page," "chapter,".....niibna kidwinan!). Na'ii booch Nishnaabek netaa-zhichgeyaat pii aabdek wi gegoo nikeyiing wii-kidwaat, mii go naa eta wi Zhaagnaashii-kidwin nakaazwaat, na'ii dbishkoo "Page 10 ngii-ko-gindaas," maage "Zhaangswi chapters tenoon zhiwi mzin'igning."

Niibna geyaabi kidwinan waa-aan'ke-zhibiiygaadegin zhiwi ndictionary-ing, waawiikaa dash go gnamaa nga-zhise wii-zhibiiygeyaanh maanpii Tumblr. Nga-kweji-zhibiiyge swii go aapiichin.

[maanyaank]

"Gchi-Chief"

Maanda gewii gaa-bmi-waabndamaanh bi-biindgebzayaang neyaap Brisbane. Shoosga'gan iidik daanding, ngii-nendam yeshkat. Printing dash iidik wi -- giishpin naa geyaabi nesaaksingwenh wi daawegamik. Zhaazhi go naa gii-gbaakwigaadegba, zhinaagot.

[maanyaank]

Crikey Cafe ndaanzgeyaanh

Eko-niizhing bmisgaak te wi cafe, aapji'sh go mnwaabim nanaabing kojiing waawiisning. Bneshiinsak gewe zhiwi paambizwak; bmi-ke-booniiwak ko besha nmadbing.

Zhiwi waandooshkbiiyaak dyebaabminaagok, mii zhiwi gnawenmin bezhik kaada-gnebik.

Memkaach go zhiwi eshkwaa-wiisniyaanh ngii-ke-zhibiiwaak postcards waa-niindaaweyaanik. Zhiwi ngift shop-ing ngii-mkawaak niibna beshgenmagik. De-gbeyiing go ngii-nmadap memkaach go bekish bangii maajiibiiymoogwaa giwi postcard-an eniindaawgik, mii dash gaawii ngii-oo-de-waabmaa-siik meerkats. Zaam waasa oodi ekwaayiing gewiinwaa giwi nji-gnawenjgaazwak da-gii-oo-de-waabmagwaaba jibwaa-maajiibzat mbus wii-bskaabiing Brisbane. Myaa go niiwo-dbagnek wii-maajiibzat gii-kida wa niwin bembizoo'aat. Medaaso-dbagnek zhiwi ngii-bi-bgijwebnignaa, ngodwaaso-dbagiiswaan dash ngii-yaanaa wii-bbaa-nanaabyaang zhiwi.

[maanyaank]

Nongo degwaagik gii-bbaamaadziyaanh bangii

Gaawii wiikaa miinwaa ndaa-maanend-ziin wii-zhaayaanh oodi gchi-waasa npaatkamik, ndi-nendaanaaba. Gegaa ngii-gwibzanaaba gii-paa-zhaayaambaa NAISA conference New Zealand gii-tek 2019. E-shkwaatek wi, Melbourne ngii-ke-zhaanaaba 12 Apostles ezhnikaadegin aazhbikon jiigbiik bedkisnagin wii-oo-waabndamaanh, ni'aak gewe zhaawshko-penguinensak Phillip Island wii-oo-waabmagwaa. Gaawii nnaash ngii-bmi-gshkitoo-siin weweni wii-nbaayaanh. Mbaasjigning gewe bmi-yaayaanh, aapji eta jina ko ngishktoon wii-nbaayaanh.

Mii dash ndaanis gaa-wiijnakiimaajin ko, oodi enjbaanjin -- besha Brisbane daawak giwi -- gii-wiikmigot niibwinit. Pane dash go, zhiseyaambaane, Australia Zoo ndaa-zhaa, Steve Irwin-ba gaa-maajiishkaatoot, ngii-nendam ko. "Mii sa nongo zhisek. Nga-bbaa-zgidyebis ndaanis paazhaat oodi nikeyiing," ndi-nendam. "Ngii-bmaadis gsha go shkwaach oodi nikeyiing gii-zhaayaanh, nga-bmaadis dash go miinwaa," ndi-nendam. "Miinwaa'sh, gaawii nongo ngoji aabdek nwii-oo-nakii-sii bi-bskaabiiyaanh. Nga-bi-gchi-ninwebshin bi-bskaabiiyaanh," ndi-nendam.

Epiichi-yaat ndaanis oodi gaa-nji-niibwikmigak, mii gii-bbaa-zhaayaanh oodi zoo. Naan'idaa gii-gmiwan wi pii. Eni-bgambizat oodi mbus, mii go niibna bemi-yaajik mbusing gii-oo-giishpnadoowaat ponchos zhiwi ngift shop-ing. Umbrella go aanwi ngii-bbaamwidoon, aapji'sh go yeshkat gii-gchi-gmiwan, ndaawaach dash go genii poncho ngii-yaan, wii-bwaa-nsaabaawek nmiiknoot. Geti nwaawnendam ezhi-baapzhinaagziyaanh gii-biiskamaanh wi poncho "wiidaanzoomgwaa" giwi Irwinak.

Komodo ndragonens zhiwi gaa-ni-ntami-waabmak.