honnunogeftirlit-blog

[honnunogeftirlit-blog]

Að ýmsu þarf að huga þegar kemur að framkvæmdum sem snerta húsbyggingar. Útlitið skiptir gríðarlega miklu máli og gott getur verið að fá arkitekt til að sinna þessu hlutverki. Framtíðarfærslur koma til með að fjalla um nokkra verulega færa íslenska og erlenda hönnuði. Eins og við allt eru kostir og gallar við það að fá Arkitekt til að teikna hús. Arkitektar eru snillingar í að láta það sem þeir hanna líta vel út og ýta því sem er manninum mögulegt að byggja nærri því ómögulega. Því er mikilvægt að fá góðan byggingaverkfræðing eða byggingatæknifræðing sem vinnur náið með arkitektinum.  Þetta ferli getur tekið á, listamaður og raungreinamaður eiga ekki alltaf saman, en ef samstarfið gengur vel verður útkoman alltaf betri en ef raungreinamaðurinn (byggingaverkfræðingurinn / byggingatæknifræðingurinn ) myndi vinna einn. Kosturinn við að byggingatæknifræðingurinn teikni útlit og hanni burð og lagnir er sá að skrefin eru færri og ekki þarf að bakka með eitt né neitt varðandi útlitið vegna burðar þar sem burðurinn er hafður í huga allan tímann. Kostnaðurinn getur þó verið útlitslegur þar sem sá sem teiknar er væntanlega ekki sami listamaður og arkitekt ætti að vera. Auðvitað eru undantekningar á þessu eins og öllu í lífinu. Útkoma úr þessari vinnu eru eftirfarandi teikningar, sama hvort arkitekt er notaður eða ekki eru:

Sérteikningar aðalhönnuðar (arkitekt, byggingaverkfræðingurinn eða byggingatæknifræðingurinn)

Burðarþolsteikningar (byggingaverkfræðingurinn / byggingatæknifræðingurinn)

Lagnateikningar (byggingaverkfræðingurinn / byggingatæknifræðingurinn)

Þegar útlitshönnun er lokið borgar sig að setja raflagnahönnun í gang, en það krefst löggilts rafverktaka og kemur sú vinna til með að skila teikningum af raflögnum og lýsingu fyrir húsið. Gott er að taka þessa vinnu í skrefum, fyrst að fá nógu góðar teikningar til að skila inn til bæjarfélagsins síðan klára teikningarnar þegar mynd er komin á hvernig innréttingar eiga að vera. Þá er hægt að finna rétta staðinn fyrir ljós og innstungur. Nýjar reglur kveða á um að öllum þessum teikningum hafi verið skilað inn áður en byggingaleyfi fæst. Einnig þarf að vera búið að ráða byggingastjóra og skrá iðnmeistara á öll verk. Þetta er frekar einkennilegt þar sem gott væri að fá múrarmeistara til leiks þegar húsið er risið, þá gæti hann metið verkið út frá réttum forsendum. Við stjórn framkvæmda þarf byggingarstjóra, en hér er stutt lýsing á skyldum þessa aðila:

Byggingastjóri er framkvæmdastjóri byggingarframkvæmda og ræður iðnmeistara.

Byggingastjóri ber ábyrgð á því að byggt sé í samræmi við samþykkta uppdrætti, lög og reglugerðir.

Byggingastjóri skal óska úttektar á úttektarskyldum verkþáttum og vera viðstaddur úttektir ásamt viðkomandi iðnmeistara.

Byggingastjóri tilkynnir byggingarfulltrúa þegar bygging er fokheld.

Byggingastjóri skal staðfesta við lok framkvæmda að byggt hafi verið í samræmi við samþykkta uppdrætti, lög og reglugerðir.

Byggingastjórinn þar sérstaka tryggingu og fer verð hennar eftir virði húss og tímalengd á framkvæmdum. Samkvæmt nýjustu reglum geta fyrirtæki sinnt skyldum byggingastjóra. Til að fá byggingarleyfi frá bæjarfélaginu þurfa aðal- og séruppdrættir (á mannamáli, allar teikningar) að hafa verið samþykktar af byggingarfulltrúa hjá bæjarfélaginu. Einnig þurfa öll gjöld að hafa verið greidd og byggingarstjóri og iðnmeistarar hafa undirritað yfirlýsingu um ábyrgð sína (þetta er sem sagt eyðublað sem allir aðilar skrifa nafn sitt á. Hér má finna listi af meisturunum sem þurfa að undirrita ofangreinda yfirlýsingu:

Húsasmíðameistari       

Múrarameistari       

Pípulagningarmeistari      

Vélvirkjameistari      

Rafvirkjameistari