hobaz - Tumblr blog

[hobaz]

ليست أجمل أيامي ولا أسوأها، صحيح، أصحو من النوم أريد أن أبكي، لكني، على الأقل، أنام. أتوتر كلما غادرت غرفتي، لكني، على الأقل، أغادرها. أحكي لكل من أعرفهم عن نوبات الهلع التي تصيبني كل لحظة، لكني، على الأقل، أشعر بالأمان، الذي يجعلني أحكيها. ليس لدي الثبات النفسي، الذي يجعلني في أحسن نسخي، لكن لدي ما يمنعني من أن أكون في أسوأها. أحلامي كلها كابوسية، لكني، على الأقل، أنساها بسرعة. أشعر كأن العالم كله ًيسقط على كتفي، لكنه، على الأقل، لا يحطمني تمامًا، آخذ نفسًا عميقًا وأحاول القيام به وبي، دون أن ينهار كلًا منا، فلا ينهار شئ، ولا يقوم شئ، كأن هذا، بالضبط، ما يمكنني مجاراته، لكن، لو سقطت شعرة أخرى على كتفي، فلن أسمع إلا أصداء الانهيار.

-بلال علاء

[hobaz]

"مهما كان الخارج ممتع وشيّق، لا شيء يساوي الشعور بالطمأنينة داخل حدودك، حتى لو كنت وحيد أو مريض أو حزين، البيت يعطيك مساحتك وشيء من الكرامة في ممارسة أي شعور تريد."

[hobaz]

كل ما بعدي من عند الشوارع اللي كنا بنتمشى فيها أنا ورشدي زمان بس دلوقتي بنعدي عليها بعربية، ببتسم ابتسامة بلهاء وبييجي في بالي نجاة وهي بتقول أنا بعشق الطريق لأنه فيه لقانا وفرحنا وشقانا

بغض النظر انه لو قالي نتمشى دلوقت هصوت وألم عليه الناس أنا وليلى

[hobaz]

ساعات كتير بيبقى نفسي اعيط ومابعيطش علشان بنتي هتقعد تسألني خمس تلاف مرة مالك يا ماما بتعيطي ليه يا ماما لحد ما بحس اني هقطع شراييني علشان تسكت

[hobaz]

لما كان البحر أزرق.

-إسكندرية/ ديسمبر 2017

[hobaz]

ليلى بتلعب وتقول لون جرين يعني أبيض.. قلتلها لأ جرين أخضر قالتلي يااه يا ماما قلتلك جرين أبيض ليه كل حاجة تقولي لأ لأ لأ 🥴

[hobaz]

أول عمل فني ل ليلى.. رسمتني أنا وباباها 🥴

[hobaz]

باخد ادوية طول اليوم علاجات لحاجات مختلفة، ضغطي عالي، الجو حر وانا بقيت ام مش هينفع اقعد في السرير ارتاح لازم نقوم نلعب ونهري ونرغي ونسأل اسئلة وجودية رديت عليها خمسين مرة، وكل ده وبنتي حبيبتي لازقة فيا وكل ثانيتين ماما ماما ماما

[hobaz]

Sound on🔊

[hobaz]

من ساعة ما رشدي عمل الحادثة وليلى كل نص ساعة تقوله ايه ده يا بابا مال رجلك يا عييني احكيلي حصلك ايه، يعدي شوية وتتفاجيء تاني ايه ده يا بابا مال عينك ايه اللي حصلك بس احكيلي

ورشدي يا عيني بيحكي الحادثة بتفاصيلها كل شوية وليلى بتتأثر وتندهش كل شوية عادي جداً

[hobaz]

خليت رشدي يتفرج على مسلسل أنا شفته قبل كده، ف وصل لأخر حلقة فبقوله شفت باباها مات ازاي قالي لا ماجاش لسه قلتله آسفة والله كنت فاكرة إن المشهد ده جيه، شوية وقلتله شفت يا عيني عمتها لما ماتت.. هو بس زغرلي ما اتكلمش 🥴

[hobaz]

بسمع الأطلال وبغني بحماسة بقول وعدونا ف سبقنا ظلنا.. ليلى أول ما سمعتني بقول وعدونا قالت عتاولة عتاولة الضربة بجولة 🥴

[hobaz]

جميلة مدونتك يا أم ليلى ، أسأل الله أن يحفظ لك ليلى ويجبر قلبك ويعوضك خيراً مما فقدتي 💕

آمين يارب.. متشكرة أوي

[hobaz]

امبارح عملت ملوخية بالارانب وليلى افتكرت الارنب سمكة -مش قادرة افهم ازاي- المهم اني فهمتها ان ده كوكو ارنب بناكله زي الفراخ وزي اللحمة اللي بتيجي من البقرة ورغينا كتير في الموضوع.. النهاردة سألتها تحبي تاكلي ايه قالتلي عايزة أكل كوكو كلب وبكره أكل كوكو قطة ومش مقتنعة انه ماينفعش 😭

اللي هو انتوا طلعتوا ناس سفاحين وبتاكلوا ارانب يبقى ناكل كل كائن حي بقا

[hobaz]

٢٠٠٧ وانا عندي ١٩ سنة بتفرج على فيلم تيمور وشفيقة في السينما " إزاي يا شفيقة تسيبي الوزارة عشان تيمور"

٢٠٢٤ وانا عندي ٣٦ سنة بتفرج على تيمور وشفيقة ع الكنبة في البيت.. "تولع الوزارة يا شفيقة.. المهم الحب "

الحياة دي سياق غريب جدًا أقسم بالله

[hobaz]

ف المرة الأولى التي أجهشت فيها بالبكاء أمام صغيري من التعب، والأرهاق، ظن أنني ألعب معه لعبة ما..

أتذكر حينها أنه بادلني أحد القهقهات النادر ما يفعلها ..

ذاب قلبي، وتحطم ف آنٍ واحد.

كيف لأحدٍ أن يكون بتلك البراءة والسذاجة واللطف؟

الأمومة هي مرض عقلي، ذكرت ذلك من قبل!

أصل مافيش حد عاقل ممكن يعمل كل ده ف نفسه ويروح شعوره بالغضب والحزن والتعب مقابل ضحكه!

كل ما مرّ الوقت وتقدمت ف عمرك كل ما قدرتك ع التلاشي تتلاشى، الخيارات تصبح محدودة جدا جدا.

كل الأمهات وحيدات

كل الأمهات وحيدات

كل الأمهات وحيدات

اليوم فور استيقاظي قلت: يا ريت انتو والعالم تاخدوني غياب النهاردة!

عجيبة الأمومة..

مدهشة

محتاجة حد خارق، روبوت، أو لورد فولدمورت نقسم نفسنا هوركروكسات علشان نلاحق.

كل الأمهات خارقات.

كل سنة وكل الأمهات بتعمل كل اللي بتقدر عليه من غير يوم واحد غياب، وربنا يخليلنا العيال 🧡

[hobaz]

كل ما إعلان عمرو دياب ييجي ليلى بتقول ده عمرو زياد ازيك يا عمرو زياد 🥴