hanzmendoza

[hanzmendoza]

Atlantis: Alon ng Kasiyahan sa Silangan

Sa pampang ng kabigha-bighaning Arabian Golf, nagtatagpo ang langit at dagat sa kamangha-manghang lugar sa Palm Jumeirah Island sa Dubai- ang Dubai Atlantis na ipinatayo noong Setyembre 2008 na nagtataglay ng misteryoso at pag-aakit na hindi maitutumbas. Nasisilayan ang pangarap at pagnanasa ng mga turista na bumisita rito sa bawat pag-ihip ng hangin at alon ng dagat. Mula sa Aquaventure Waterpark kung saan ang mga palumpong ay nagbibigay ng kasiyahan, hanggang sa Lost Chambers Aquarium na nag-aalab sa kagandahan ng karagatan.

Ang paglalakbay sa Atlantis ay isang paglalakbay sa kaharian ng mga alaala, kultura, at kasaysayan. Ang bawat sandali rito ay isang likha ng kahanga-hangang karanasan na nag-iiwan ng hindi malilimutang marka sa puso't isipan.

Una naming dinalo ang Splashers Children Play Area. Ang init ng nagbabagang araw ay napalitan ng malamig na hangin. Ang malawak na espasyo at nakakabilib na estraktura ng mga makukulay na slide ay bumulaga sa aming mga mata. Pagkatapos ng aming unang pag-ikot sa paligid, kami ay nagpasya na tumambay pansamantala upang maranasan ang mga slides at obstacles sa playground. Isa sa aking kahinaan ay ang matataas na tanawin ngunit naisipan kong harapin ito at subukang mag-slide kasama ang aking pamilya sa Zoomerango. Sa simula ay pinapangunahan ako ng kaba sa mataas na slide na aming haharapin, ngunit ang aking determinasyon na magbahagi ng karanasan kasama ang aking pamilya ay mas matimbang. Sa aming pag-slide at sa bawat pag-ikot ng salbabida ay nagdulot saamin ng kasiglahan sa kabila ng hindi maiwasang kaba. Ang bawat tili at sigaw ay nagpapakita ng kasiyahan at tagumpay na aming nararamdaman.

Nagpasya rin akong subukang ang Poisedon's Revenge, isang nakakaakit na atraksyong puno ng takot. Bagamat mayroong iilang pag-aatubling subukan, hindi ko ito pinabayaan na humadlang sa naghihintay na karanasan at memorya. Habang ako ay umaakyat sa matarik na hagdan patungo sa tuktok, ako ay niyayakap ng kaba at pag-aalala. Ngunit sa pagsabay ng malamig na tubig sa aking takot, ito ay napalitan ng kasiyahan.

At sa huli, naisipan naming puntahan ang Lazy River. Habang kami ay lumulutang sa malamig na tubig, kami ay nagkaroon ng pagkakataon na magpahinga at magkuwentuhan bilang isang pamilya. Sa gitna ng kagandahan ng kalikasan at namumulaklak na kasiyahan, nagawa naming magtulungan na malagpasan ang kaba at takot na nagbigay lakas-loob sa isa't-isa.

Sa bawat segundong lumilipas sa Dubai Atlantis, kami ay lumalago at naging mas matatag bilang isang indibidwal at pamilya. Ang mga alaala at pangyayari na ito ay nagbigay saamin ng panibagong kaalaman at pag-unawa na nagbibigay lakas saamin at nagpapalalim ng aming samahan. Ang paglalakbay na ito ay hindi lamang nagdulot ng kasiyahan, kundi nagbigay ng matatag na pundasyon sa aming pamilya na lumalaban sa hamon ng buhay. Napakaraming alaala ang aking naipon sa paglalakbay na ito kasama ang a king mga minamahal sa buhay. Paniguradong sa susunod kong paglalakbay ay aking itatala ang bawat hakbang.